Lakota Galatia (Galatians)

PALOS GALATIA OYATE KIN WOWAPI WICAKICAGE CIN

GALATIA WICOWOYAKE 1.

1 Palos yewicašipi kin heca, wicašta akantu kin etanhan šni, qa wicašta on kagapi šni, tuka Jesus Messiya etanhan, qa Wakantanka Ateyapi kin, he wiconte etanhan najin kiye cin he nakun etanhan;

2 Qa hunkawanjin kiciyapi mici unpi kin owasin ko, Galatia ekta okodakiciye kin wowapi unnicagapi.

3 Wowaonšida, wookiye ko, Wakantanka Ateyapi kin, qa Jesus Messiya Itancan unkiyapi kin etanhan, nicipi un nunwe.

4 He iye waunhtanipi kin on icicu, wicoicage šice cin de etanhan eunhdakupi kta, Wakantanka Ateunyanpi tawacin kin eciyatanhan:

5 He ohinniyan owihanke wanin wowitan kicihan nunwe. Amen.

6 Tuwe Messiya towaonšida kin inicopi kin kohanna aduštanpi, qa wotanin wašte tokeca en oyapapi kin, heon imanihan manka.

7 He nakun tokeca šni, tuka wicašta wanjikji nagiyeniyanpi, qa Messiya tawotanin wašte kin ayuštan niyanpi kta tuka.

8 Tuka he unkiš unkiyepi, kaeš ohnihde wan mahpiya kin eciyatanhan kin, wotanin wašte unkoniciyakapi qon he ohna šni, tuka tokeca oniciyakapi kinhan, wošnapi un nunwe.

9 Unkeyapi qon hecen ake nakaha epe, tuwe wotanin wašte iyacupi qon kici okonwanjidan šni kin oniciyakapi kinhan, he wošnapi un kte.

10 Wicašta kaeš Wakantanka, unma tukte cinwicawakiya he? kaeš wicašta kin iyokipiwicawaya awakita he? Wicašta kin iyokipiwicawaya unkanš, Messiya wowidagmaye kte šni tuka.

11 Mihunkawanji he de ociciyakapi, wotanin wašte omdake ciqon he wicašta akantu kagapi šni;

12 Qa wicašta kin etanhan iwacu šni, qa iye omakiyakapi šni, tuka Jesus Messiya oyake cin eciyatanhan onmaspe.

13 Juda wicohan en opeya waun qehan, token owahantnde cin nayahonpi; Wakantanka taokodakiciye kin nina šicaya wakuwa, qa mdujuju.

14 Qa mitaoyate kin en tona om akinimaskokeca kin hena ota Juda wicohan kin en kawicawape ca, mihunkakepi wohdakapi qon iyotan nina tewahinda.

15 Tuka Wakantanka ina tezi kin etanhan imacu, qa iye towaonšida kin on mico kin he,

16 Iye Cinhintku kin sdonye mayan iyokipi qehan, lkcewicašta wotanin wašte kin owicawakiyake kte cin heon, kohanna wicacehpi, wicawe ko, kici wowahdake šni:

17 Qa Jerusalem ekta tona mitokapa tanhan yewicašipi qon hena ekta wicawai šni, tuka Arabia ekta imdamde ca, ake Damascus ekta icicawin wahdi.

 18 Hehan waniyetu yamni iyohakam Inyan kici wowahdake kta e Jerusalem ekta wai, qa anpetu ake zaptan kici manka.

19 Tuka yewicašipi kin tokeca tuwedan wanmdake šni, Jakob Itancan sunkaku kin heceedan.

 20 Unkan wicoie wowapi en cicagapi kin de, iho, Wakantanka itokam itonšni mawanica.

21 He iyohakam Syria, qa Cilicia makoce kin en wahi.

22 Qa Juda makoce kin en okodakiciye kin Messiya en un kin, hena ekta ite kin sdonmayanpi šni waun.

23 Tuka, Tuwe šicaya unkuwapi qon he nakaha wowacinye ehanna yujuju qon he oyaka ce, hecedan nahonpi.

 24 Unkan miye on Wakantanka yatanpi.

GALATIA WICOWOYAKE 2.

 1 He iyohakam waniyetu ake topa, hehan ake Titus yuha, Barnabas kici Jerusalem ekta itawankanhde mda.

 2 Woyakapi on ekta mde ca, Ikcewicašta ekta wotanin wašte omdake ciqon he hena owicawakiyaka, qa tona okinihanpi kin hena išnašnana owicawakiyaka; ituya waimnanke šni, qa taku šni on waimnanke kte šni heon.

 3 Tuka Titus mici un kin he Helenes heca keš bakihdayapi kta keyapi šni.

 4 Qa he nakun hunkawanjinkiciyapi itonpišni kin heca, hena unkiye token Jesus Messiya on tawa unkiciyapi kin he iwanyakapi kta e en hipi, wowidag unyanpi kte cin heon.

5 Tuka hena wihiyayedan oape wanjidan hehanyan wicihukuya unyakonpi šni, wotanin wašte wowicake kin nicipi un kte cin heon.

 6 Unkan tona wicašta wicakinihanpi seca, qa takupi kašta he etanhan tokeca šni, Wakantanka wicašta itohnake kin iwanyake šni, hena wicakinihanpi seca, tuka wicoie kin en takudan omakiyapi šni.

 7 Tuka hececa ešta, tohan bakihdayapi šni wotanin wašte kin he maqupi e wanyakapi qehan, bakihdayapi wotanin wašte Inyan qupi qon he iyececa;

8 Tuwe bakihdayapi kin on yewicašipi kin en Inyan okihiye cin hee Ikcewicašta ekta okihimayan;

 9 Qa Jakob, Inyan qa Johannes kici, ipatanhdepi kin hecapi seca, wowaonšida maqupi kin he wanyakapi, hehan takodakiciyapi on Barnabas kici nape mayuzapi, unkiš Ikcewicašta ekta unyanpi kta, qa iyepi kin bakihdayapi kin ekta yapi kta.

10 Tuka decedan, tona wahpanicapi kin wicunkiksuyapi kta keyapi, unkan miš nakun hecamon tawatenwaya.

11 Unkan Inyan Antioch ekta hi qehan, kici taninyan awakinica, iye iyaonpepica nakaeš.

12 Jakob etanhan wanjikji hipi šni kin he itokam Ikcewicašta kin om wota ece; tuka wanna en hipi, hehan tona bakihdayapi qon hena kowicakipe ca, tokan iyaye ca ihdonica.

13 Qa he opeya Juda wicašta tokeca kin iyecen anahbeya econpi, hecen hena wohnaye kin on Barnabas nakun opeya yeyapi.

14 Tuka wotanin wašte wowicake kin eciyatanhan owotanna manipi šni, he wanmdaka hehan owasin wicitokam Inyan hewakiya; Juda wicašta henica, tuka Ikcewicašta kin iyecen yani kinhan, qa Juda wicašta kin iyecece šni, tokeca e Ikcewicašta kin Juda wicohan kin en ope wicayaši he?

15 Unkiye wicacehpi eciyatanhan Juda wicašta kin heuncapi, qa Ikcewicašta wahtanipi sa heuncapi šni;

16 Wicašta kin woope wicohan kin eciyatanhan yaowotanpi šni ece, tuka Jesus Messiya wacinyanpi kin on, he sdonunyanpi kin heon unkis eya Jesus Messiya wacinunyanpi, Messiya wicadapi kin on unyaowotanpi kta e heon, qa woope opapi kin on etanhan šni; woope wicohan kin eciyatanhan wicacehpi owasin tuwedan yaowotanpi kte šni.

 17 Tuka Messiya on unyaowotanpi kta unkakitapi kin he icunhan, wahtanipi sa heuncapi hecinhan, heon Messiya woahtani wowidake kin heca he? Hiya hecetu šni.

 18 Taku mdujuju qon he ake piya wakage cinhan, wawahtani e mihdutanin.

19 Wakantanka on wani kta e heon, woope eciyatanhan, woope kin ekta mata ce.

20 Messiya kici icipaweh omakatanpi; tuka nahahin wani; qa he miye šni tuka miye mahen Messiya ni un kin hee; qa wicacehpi kin en wani kin he Wakantanka Cinhintku wacinyanpi kin eciyatanhan wani, he iye cantemakiye ca miye on iye icicu.

21 Wakantanka towaonšida kin mdujuju šni; woope kin eciyatanhan wicoowotanna u kinhan, hehan Messiya ituya ta.

GALATIA WICOWOYAKE 3.

1 Galatia wicašta wacin tonpi šni kin, tuwe niyuhnaškinyanpi, qa hecen wowicake kin anayagoptanpi kte šni he; niyepi kin en Jesus Messiya icipaweh okatanpi kin he niištapi kin itokam yuotaninpi?

 2 Decedan omayakidakapi kta wacin, woope wicohan kin on, qa wacinyan anagoptanpi kin, unma tukte eciyatanhan Woniya kin iyacupi he?

 3 Tokaheya Woniya kin on ecanonpi, qa ehake wicacehpi kin on nihduštanpi kta he, qa wacinyatonpi kte šni?

 4 Kana owasin taku šni on iyotanhan iyeyakiyapi he? he taku šni on etanhan hecinhan.

 5 Tuwe Woniya kin yuhe niciyapi, qa niyepi en tankaya ohanye cin he woope wicohan kin on,qa wacinyan anagoptanpi kin unma tukte eciyatanhan he?

6 Hecen Abraham Wakantanka wicada, unkan he woowotanna kiciyawapi qon.

7 Heon etanhan, tona wacinyanpi kin en opapi kin hena Abraham cincawicaye cin eepi, he sdonya po.

 8 Wacinyanpi kin on Wakantanka Ikcewicašta kin wicayaowotanna kte cin, he Wowapi Wakan otokaheya tanhan wanyake ca, hecen tokaheya Abraham wotanin wašte kin okiyaka; Niye en oyate kin owasin wicayawaštepi kta ce.

 9 Hecen tona wacinyanpi kin hena Abraham wacinye ciqon kici wowašte yuhapi.

10 Tona woope wicohan kin etanhanpi kin hena woyaco kin en unpi. Hecen wowapi en kagapi; Tona taku woope wowapi kin en kagupi kin owasin opeya unpi šni, qa ecen econpi šni kin hena otoiyohi wanna wicayacopi ce.

11 Unkan woope kin eciyatanhan tuwedan Wakantanka itokam yaowotanpi šni e sdonunyanpi: Tona owotanna un kin hena wacinyanpi eciyatanhan nipi kta ce.

12 Unkan woope kin he wacinyanpi kin eciyatanhan šni; tuka, Wicašta kin tuwe hena econ kinhan, hena on ni kta ce.

13 Woope woyaco kin etanhan Messiya eunhdakupi, unkiyepi on iye woyaco ikicaga. Wowapi en hecen kagapi, Tona can en otkeyapi kin hena owasin yacopi ce.

14 Hecen Jesus Messiya eciyatanhan Abraham wowašte tawa kin he Ikcewicašta kin en awicau kta; hecen wacinyanpi kin on Woniya iwahounyanpi kin he unkicupi kta.

15 Mihunkawanji, wicašta akantu iyecen iwaa. Wicašta akantu wicotakuye tawa kin hee kaeš, wanna hduštanpi kinhan, tuwedan hdujuju šni, qa taku en akage šni ece.

16 Abraham iye cinca kici wahoyapi; Cincapi kin eye šni, hehan ota kapi kta, tuka wanjidan, qa, Nicinkši kin, he Messiya kin ee.

 17 Unkan miš kaken epe kta; Otokahe ekta wicotakuye Messiya en Wakantanka hdusuta kin he, iyohakam waniyetu opawine topa sanpa wikcemna yamni ehan woope u kin he tokaheya kin yujuju, qa hecen wahoyapi qon ecetušniye kta okitpani.

 18 Taku tawapi kte cin he woope eciyatanhan un unkanš, wahoyapi kin eciyatanhan šni; tuka he Wakantanka Abraham iwahoya.

19 Hehan tokeca e woope kin yukan he? He woahtani on kagapi, cinca iwahoyapi qon u šni kin hehanyan, qa ohnihdewicayapi kin on yusutapi, iyotahedan un wan nape kin ohna.

20 Iyotahedan un kin he wanjidan eciyatanhan šni, tuka Wakantanka eqe wanjidan.

21 Heon woope kin he Wakantanka taku iwahowicaye cin he kašeya he? Hiya hecetu šni: woope wiconi kaga okihi unkanš, awicakehan woope kin eciyatanhan wicoowotanna u kta tuka.

22 Tuka Wowapi Wakan kin he owasin woahtani ohdateya un wicayawa, qa hecen tona wicadapi kin hena, Jesus Messiya wacinyanpi wahoyapi qon he wicaqupi kta.

23 Wowacinye kin hi šni itokam woope kin on unkaškapi; qa wowacinye yuotaninpi kte cin en onauntakapi.

 24 Hecen woope kin he wayeunkiyapi kin hee, Messiya en unkahipi kta, hecen wowacinye on unyaowotanpi kta e heon.

25 Tuka wowacinye kin wanna hiyohi, hecen wanna wayekiyapi kin ihukuya unyakonpi šni.

26 Jesus Messiya wacinyanpi kin eciyatanhan owasin Wakantanka cinca kin heuncapi.

27 Tona Messiya caje on baptem nicupi kin hena Messiya kodakapi.

28 He en Juda qa Helenes wicašta ko wanica; wowidake un tawaiciya ko wanica; wica winyan ko wanica; tuka Jesus Messiya ekta owasin okonniwanjipidan.

29 Messiya tawa niyanpi hecinhan, Abraham cinca kin henicapi, qa wahoyapi kin eciyatanhan tawayapi kte cin.

GALATIA WICOWOYAKE 4.

1 Unkan kaken epa; Tawaye kte cin tohanyan hokšiyopa un kin hehanyan wowidake kin takudan ocitpani šni, taku owasin on itancan un ešta.

2 Tuka tohan Atkuku ke cin hehanyan waonspekiye ca tipi awanyag wicakiyapi kin hena he yuhapi.

 3 He iyecen unkiš eya hokšiyopapi qehan, wicoicage woonspe tokaheya kin ihukuya unyakonpi.

 4 Tuka wanna anpetu iyehantu qehan, Wakantanka iye Cinhintku kin u ši, winohinca wari etanhan icage ca woope kin ohdateya kagapi.

 5 Hecen tona woope kin ihukuya un kin hena opewicakiton kta, atayedan cinhintkuyapi kin unhapi kte cin heon etanhan.

 6 Unkan cinkšiniyanpi kin heon Wakantanka iye Cinhintku Taniya kin nicantepi kin en niu šipi, he, Abba, Ate, eya howaya ece.

7 Hecen wowidake kin henica šni, tuka cinhintku kin henica. Qa cinhintku hecinhan, Messiya eciyatanhan Wakantanka ekta tawaye kte cin heca.

 8 Tuka Wakantanka sdonyayapi šni qehan, taku wakan šni kin hena wowidag niyanpi.

 9 Unkan nakaha Wakantanka sdonyayapi, kaeš Wakantanka sdonniyanpi yaunpi kin, hecen token ake taku tokaheya hunkešni qa takudan okihi šni un kin ekta nihdohdapi, qa hena ake wowidag niyanpi kta yacinpi he?

10 Anpetu qa wi kin, omaka waniyetu ko awacanipi.

11 Kocicipapi, taku šni on niyepi kin htacicinipi epca, heon etanhan.

12 Mihunkawanji, ceciciyapi ce; Miš waun kin iyecen un po; niye yaunpi kin iyecen waun, taku šica takudan ecamiyeconpi šni.

13 Tokaheya ekta wicacehpi wašake šni on wotanin wašte kin ociciyakapi kin he sdonyayapi.

14 Qa micehpi en taku ryutanmaye cin he šiceyadapi šni, qa paha iyeyayapi šni, tuka Wakantanka ohnihde ye cin iyecen, qa Jesus Messiya iyecen tin ye mayašipi.

 15 Hecen wowašte duhapi qon tukte e he? Kaken ciyaotaninpi, okihipica unkanš niištapi kin yahdušdokapi qa mayaqupi kta wicayadapi kta tuka.

 16 Wowicake ociciyakapi kin heon toka mayayapi he?

17 Hena e tanyan canteniciyuzapi seca, tuka he taku wašte on etanhan šni, heyata iyeunyanpi kta cinpi, hecen niye tanyan cantewicayakiyuzapi kta.

18 Tuka ohinniyan taku wašte on tanyan canteyuzapi kin he wašte, qa niyepi ekta waun kin hecedan šni.

 19 Micinca, niyepi kin en Messiya icahyapi kte cin heon ake hokšiksuya waun.

 20 Niyepi kin on, token wacin mduza tannin šni, heon nakaha ekta cicipi waun qa miho kin wahdatokeca kta wacin.

 21 Tona woope ihukuya yaunpi yacinpi kin, woope kin nayahonpi šni hecinhan omakiyaka po.

22 Wowapi en hecen kagapi; Abraham cinhintku nonpa, unma wowidake winohinca etanhan, qa unma iš winohinca tawaiciye cin etanhan.

23 Tuka wowidake winohinca etanhan un kin he wicacehpi eciyatanhan tonpi, qa tawaiciye cin etanhan un kin wahoyapi kin on tonpi.

 24 Hena e wiyacinpi wan ee; qa wicotakuye nonpa kin heepi. Unma Sinai he kin etanhan u, he wowidag yapi kaga, Hagar hee.

25 Qa Hagar he Arabia ekta Sinai he kin hee, qa Jerusalem wanna he cin kici akidecen un, qa cinca kici wowidake un.

26 Tuka Jerusalem wankan tanhan u kin he tawaiciya, he owasin ina unyanpi kin ee.

27 Hecen wowapi en kagapi; Cinca oyakitpani qa cinca ton šni yaun kin iyuškin wo; tohinni hokšinyaksuye šni kin panpan qa dowan wo; tuwe išnana un kin he cinca ota, qa hihnaton kin he cinca tonnna.

28 Mihunkawanji, Isaak iyecen wahoyapi cinca kin heuncapi.

29 Tuka he ehan tuwe wicacehpi eciyatanhan tonpi kin he Woniya eciyatanhan un kin he šicaya kuwa qon, iš eya dehan iyececa.

30 Tuka Wowapi Wakan kin token eya he? Winohinca wowidake un kin cinca kici tankan iyeya wo; wowidake un cinca kin he tawaiciya cinca kin kici akidecen tawaye kte šni.

31 Hecen mihunkawanji, wowidake un cinca kin ee šni, tuka tawaiciya cinca kin unkiyepi.

GALATIA WICOWOYAKE 5.

1 Hecen tawaiciyapi kin on Messiya tawaiciye unyanpi kin he en tinsadan un po, qa ake wowidake yapi wanapin kin on iyaihdaškapi šni po.

2 Wanyaka po, Palos he miye e kaken eciciyapi; Banicihdayapi kinhan Messiya takudan on oniciyapi kte šni ce.

 3 Wicašta bakihdayapi kin otoiyohi kaken ewakiya ece; Woope kin ocowasin econ kta iyececa tuka ce.

4 Tona woope kin on niyaowotanpidan keniciyapi kin wanna Messiya ehpeyayapi, qa wowaonšida etanhan nihinhpayapi kin.

5 Unkiye Woniya kin eciyatanhan wicoowotanna woape kin wacinyanpi on unkapepi ece.

6 Jesus Messiya en bakihdayapi kin he takudan okihi šni, qa nakun bakihdayapi šni kin; tuka wacinyanpi wowašte en ohanye cin he taku okihi ece.

7 Tanyan yainankapi; tuwe iyoncipi šni kin, hecen wowicake kin wicayadapi kte šni he?

8 Woawacin kin de tuwe nicopi kin eciyatanhan u šni.

9 On napoliyapi cistinna kin he aguyapi ocowasin napohya.

10 Itancan kin eciyatanhan wacinciyapi, takudan tokeca awacanipi kte šni; qa tuwe kašta nagiyeniyanpi kinhan he woyaco hduhe kta.

11 Mihunkawanji, miš miye bakihdayapi kin ieyanwapaha kinhan tokeca e šicaya makuwapi he? kinhan, cansusbeca iwošihda kin he enakiyapi tuka.

12 Tokin tona cante okicunin niyanpi kin hena yušpa iyewicayapin.

13 Mihunkawanji, tawaiciyapi kin en nicopi, tuka tawaiciyapi kin he wicacehpi iyokipi kta e wowinyunyanpi šni po; tuka wowašte on otoiyohi okiciciya po.

14 Woahope kin ocowasin wicoie wanjidan en ecetu, he dee, Niš niye inihdacinyan wicašta aiyog yaun kin canteyakiye kta ce.

15 Tuka yecidahtakapi qa temyeciyapi kinhan, on wakta po, okinni ihangyeciyapi kta naceca.

16 Miye kaken epe; Woniya kin on mani po, hecen wicacehpi on cantiheye cin yahduštanpi kte šni.

17 WicaceHpi kin he Woniya kin inakiwizi, qa Woniya kin iš wicacehpi kin inakiwizi, qa henaozakiya anokatanhan kicizapi, hecen taku token yacinpi šni kin hena ecanonpi ece.

18 Tuka Woniya kin yus aniyanpi hecinhan, woope kin ihukuya yaunpi šni.

19 Wicacehpi wicohan kin taninyan un; Wawicihahapi, wiinahmanpi, waašapapi, wicaštapi šni;

20 Wakagapi kin ohodapi, wapiyapi, šice kicidapi, wakinicapi, wawihnupi, wacantahdepi, wicokicize, wawakipajinpi, yuomdecapi,

21 Winawizipi, tin wicaktepi, witkopi, qa witkoya wacipi, qa taku tona hecece cin hena ee; wanakaja ociciyakapi kin he iyecen nakaha eciciyapi, Tona taku hececa econpi kin hena Wakantanka tokiconze kin tawapi kte šni.

22 Tuka Woniya kin waskuyeca tawa kin he, wowaštedake, wowiyuškin, wookiye, wacintankapi, wicowahbayedan, wowašte, wowacinye;

23 Wicotawacin wašte, qa iyatahde iciyapi šni hena ee; qa taku hecece cin woope kin tuktedan iyamya un šni.

24 Unkan tona Messiya tawa wicaye cin hena wicacehpi kin icipaweh okatanpi, qa wacinyuzapi cantiheyapi koya.

25 Woniya kin unkicinipi kinhan, Woniya kin unkopapi kta.

26 Otoiyohi šihdakiciyapi, qa winakiciwizipi, qa ecinšniyan iwinkta iciyapi wanin unyakonpi nunwe.

GALATIA WICOWOYAKE 6.

1 Mihunkawanji, wicašta wan ihnuhanna taku šica en iyohpaye cinhan, niye tona owotanna yaunpi kin woksape wowahbayedan yuha wicašta kin he ake piya opeya maniya po; qa awanihdaka wo, okinni taku wawiyutanyan un kin en niu nun ce.

2 Otoiyohi waqinpi kin kicicin po, hecen Messiya toope kin tanyan ecetu yayapi kta.

 3 Tuwe taku šni un ešta, taku icida kinhan, he icihnayan.

4 Tuka otoiyohi iye ohan kin awakicin kta, hecen iye qe eciyatanhan, qa tokan tanhan šni, iyuškin kta.

5 Otoiyohi waqinpi tawa kin kicin kta.

6 Tuwe wicoie kin eciyatanhan onspekiyapi kinhan, he waonspekiye cin taku wašte kin owasin etanhan okinikiya nunwe.

7 Ihnuhan nihnayanpi kin; Wakantanka

uncapi kte šni ce. Wicašta kin taku oju kinhan, he yukse kta ce.

8 Tuwe iye cehpi kin wokiciju kinhan, he wicacehpi kin etanhan wicotakuni šni mnaye kta; qa tuwe Woniya kin wokiciju kinhan, he Woniya kin eciyatanhan wiconi owihanke wanica mnaye kta.

9 Taku wašte econ unkapinpi šni nunwe; hu unstakapi šni kinhan tohantu kte cin mnaunyanpi kta.

10 Heon tohanyan unkokihipi kinhan, wicašta owasin taku wašte ecawicunkiconpi kta, qa wacinyanpi tiyohnaka kin hena iyotan.

11 Wowapi hinsko tanka miye minape on cicagapi e wandakapi.

12 Tona wicacehpi ekta wašte ihdutaninpi cinpi kin hena banicihdayapi kta cinniciyapi, Messiya cansusbeca tawa kin on šicaya kuwapi kte šni kin heon heconpi.

13 Tona bakihdayapi kin hena e qe nakun woope kin tanyan yuhapi šni, tuka banicihdayapi kta cinpi, nicehpipi kin on iwinktapi kta heon.

14 Tuka takudan on imawinkta šni nunwe, Jesus Messiya Itancan unkiyapi cansusbeca tawa kin hecedan on, he on miye ekta wicoicage kin icipaweh okatanpi, qa wicoicage kin ekta icipaweh omakatanpi.

15 Jesus Messiya en bakihdayapi kin he takudan okihi šni, qa bakihdayapi šni kin he nakun, tuka wicašta teca kin.

16 Tona woope kin de eciyatanhan manipi, Israel Wakantanka tawa wicaye cin hena ko, wookiye, wowaonšida ko, wicakici unpi nunwe.

17 Detanhan tuwedan nagiyemaye šni nunwe: Jesus Messiya towapetogton kin mitancan kin en yuha waun.

18 Mihunkawanji, Jesus Messiya Itancan unkiyapi towaonšida kin ninagipi kin kici un nunwe. Amen.

2 Corinth 9-13

II. CORINTH WICOWOYAKE 8.

1 Mihunkawanji, Wakantanka towaonšida Macedonia okodakiciye kin en yutaninpi qon he sdonyeciciyapi.

2 Hena wokakije tanka en nina iyuškinpi, qa iyotan wahpanica unpi kin he etanhan taku ota iyokipiya wicaqupi.

3 Okihipi kin iyacinyan, miš mdaotanin, qa okihipi kin kapeya, iye cinka wicaqu wacinpi.

4 Qa wocekiye ota on ceunkiyapi, taku wicaqupi kin he, qa tona ecedan un kin wicakipamnipi wawokiyapi kin he nakun unkicupi kte.

5 Qa unkecinpi qon iyecece šni, tuka tokaheya iye tancanpi kin Itancan kin icicupi, qa nakun Wakantanka tawacin kin eciyatanhan unkiyepi kin en icicupi.

6 Hecen Titus ceunkiyapi, niyepi en wanna tokaheya hecon kin, he iyecen wowaonšida  kin de nakun niciyustanpi kta.

7 Heon taku owasin on winijicapi, wacinyanpi, qa iapi, qa wosdonye, qa wicamniheca owasin, qa wašteunyakidapi ko, he iyecen wowašte kin de on nakun winijicapi kta.

8 Wicoope eciyatanhan hena hepe šni, tuka wicašta tokeca aiciciyapi kin heon; qa wacanyakiyapi kin he wowicake kinhan imdute kta.

9 Jesus Messiya Itancan unkiyapi towaonšida kin he sdonyayapi, watonka tuka niyepi on wahpaniiciya, hecen iye wahpanica kin on winijicapi kta.

10 Unkan he de on wahokonciciyapi; niye decanonpi kta iyececa, wanihan sanpa hecanonpi kta e niciconzapi, qa wiyeya yaunpi kin heon etanhan.

11 Nakaha woecon kin he hduštan po, kohanna wicayadapi qon he iyecen taku duhapi kin etanhan ecen ecanonpi kta.

12 Tokaheya wicadapi yuke cinhan, wicašta taku yuhe cin he eciyatanhan iyokipiya icupi ece, qa taku yuhe šni kin eciyatanhan šni.

13 Wicašta tokeca oziiciyapi kta, qa niye dušakapi kte cin hee šni; tuka akiyecen unpi kta; heon nakaha wijinya yaunpi kin he hena taku iwicakakije cin en un kta;

14 Kaeš iyepi nakun wijicapi kinhan, wicakišya yaunpi kin en oniciyapi kta; hecen akiyececapi yuke kta.

15 Wowapi en kagapi qon iyececa; Tuwe ota pahi kin he takudan ohdapte šni, qa tuwe waniqadan pahi kin he takudan icakiš un šni ce.

16 Tuka Wakantanka wopida yuha nunwe, he niyepi on Titus hecen cante yuskiya.

17 Awicakehan wahokonkiyapi kin anagoptan; tuka iye hinca inahni, qa kohanna niyepi kin ekta ye wacin.

18 Unkan he kici hunkawanjinkiciyapi wan, wotanin wašte on okodakiciye owasin en yatanpi kin hee ekta ye unšipi.

19 Qa hecedan šni, tuka kici ohnihde unyakonpi kta e he okodakiciye kin kahnigapi, Itancan kin yatanpi kta, qa unkiye de iyokipiya econkupi kta e heon taku ituhanpi kin de en ounkiyapi kta.

20 Qa taku ota unpamnipi kin de on tuwedan unbapi kte šni e he unkakitapi.

21 Taku wašte ece unkihnipi kta, Itancan kin itokam, qa nakun wicašta kin en.

22 Unkan hena om hunkawanjinunyanpi kin yeunšipi, he wanna ota unkiyukcanpi, owotanna ohanyan ece, qa nakaha iyotan aiciciya, tanyan wacinniyanpi nakaeš.

23 Hecen Titus he kapi hecinhan, he mitawaši qa niyepi on omakiye cin hee; qa hunkawanjinwicunyanpi kin hena eepi kinhan, okodakiciye yewicašipi qa Messiya towitan kin hena eepi ce.

24 Heon etanhan, hena en, qa okodakiciye kin wicitokam, wacanyakiyapi kin, qa unniyatanpi qon he nakun wicakipazo po.

II. CORINTH WICOWOYAKE 9.

1 Wicašta owotanna owicakiyapi kte cin on wowapi cicagapi kta wanna iyecece šni.

2 Token wacin duzapi kin he sdonwaya, heon Macedonia etanhanpi kin hena en yaonihanyan cajeciyatapi, wanna waniyetu wanjidan hehanyan Achaia wiyeya yanka ce, qa inayahnipi kin he wicašta ota iyowicapaštaka.

3 Tuka hunkawanjin wicawaye cin hena ekta yewicawaši, unniyatanpi qon he ecetu kta, qa epe ciqon iyecen wiyeya nankapi kta e heon.

4 Okinni Macedonia etanhan upi kin hena om ekta wai, qa wiyeya yaunpi šni ecen wanunniyakapi kinhan, unkiye, niyepi epe šni, sutaya wacinyus unniyatanpi qon he on unkištecapi kta.

5 Heon hunkawanjin kiciyapi kin cewicawakiye kta wacami qon, tokaheya niyepi ekta ipi, qa wowaonšida  nitawapi ehanna iwahoniyanpi qon he wiyeya ehnakapi kta, hecen awicakehan wowaonšida  kta, qa watehindapi kin eciyatanhan kte šni.

6 Tuka de; Tuwe waniqadan oju kin he waniqadan mnaye kta; qa tuwe iyakicuya oju kin he iyakicuya mnaye kta ce.

7 Otoiyohi iye cante kin ekta iciconze cin eciyatanhan qu kta, woiyokišice on qa econ šipi kin on etanhan šni; iyuškinyan wicaqu kin he Wakantanka waštedaka.

8 Wakantanka wowaonšida  owasin niyepi en niciyuotapi kta okihi; hecen taku owasin ota duhapi kin on wicohan wašte kin wadupipike kta.

9 (Wowapi en kagapi qon iyecetu; Taku ehpeya, wahpaninica kin taku wicaqu ece kin he toowotanna kin ohinniyan un kta.

10 Tuwe woju kin ojupi yuhekiya ece kin he aguyapi woyute yayapi kte cin nicupi, qa taku oyajupi kin icah niciyapi, qa nitoowotanna waskuyeca kin niciyuotapi nunwe;)

11 Qa taku owasin en wijinya yaunpi kta on iyotan ohannipipi kta, heon unkiye Wakantanka wopida unkekiciyapi.

12 Wapamnipi wawokiyapi kin de tona owotanna un kin taku icakijapi kin enakiye kte ca, nakun Wakantanka wopida nina eciyapi kta e kaga.

13 Messiya tawotanin wašte kin en oyapapi e daotaninpi, qa hena taku ota wicayaqupi, qa owasin taku wicayaqupi kin he on wawokiyapi utapi kin de on etanhan Wakantanka yaonihanpi.

14 Qa niyepi on wocekiye eniciyapi kin heon nina cantonikpanipi, Wakantanka towaonšida tanka nicipi un kin heon etanhan.

15 Wakantanka taku yawapica šni unqupi kin he on wopida kiciun nunwe.

II. CORINTH WICOWOYAKE 10.

1 Palos he miye, Messiya wahbayedan qa wacintanka heon ceciciyapi ce, niyepi ekta onšihanyan waun, tuka en waun šni ehantanhan, niyepi on wadimataka;

2 Tuka ceciciyapi, en waun kinhan, wanjikji wicacehpi kin eciyatanhan maunnipi kecanunkinpi kin, hena en waditagya waun kta wacanmi kin he iyecen wadimatake kte šni.

3 Wicacehpi kin en maunnipi ešta, wicacehpi eciyatanhan unkicizapi šni.

4 Wipe unkunpi kin hena wicacehpi kin heca šni, tuka wašaka, Wakantanka on, inatake suta kin yujuju ece:

5 Wacinyuzapi kin kun ehpeya, qa taku tehan wankantuya un Wakantanka sdonyapi kin en wankan iyeiciye cin hena owasin, qa wicotawacin iyuhpa Messiya anagoptanpi kin en wayaka ai ece.

6 Qa wanahonpi šni kin tounkiconpi kta e wiyeya unkanpi; tohan anayagoptanpi kin hduštanpi kinhan.

7 Wicašta itohnake kin hecedan iwandakapi he? Tuwe Messiya tawa kecanicin kinhan, he ake kaken awacin kta; iš iye Messiya tawa kin heca he iyecen unkiš unkiyepi Messiya tawa unyanpi.

8 Wookihi Itancan unqupi kin, on icahunniyanpi kta, qa on ihangunniyanpi kte šni, heon sanpa mihdatan ešta, imaštece kte šni.

9 Wowapi on wakokipe cicagapi kta wacanmi šni.

10 He wowapi kage cin hena suta qa wašaka, tuka tancan en un kin he wašake šni qa ie cin he wowiha ce, eyapi.

11 Tuwe hecece cin he kaken awacin kta, en unkanpi šni wowapi wicoie kin on tounkecapi kin, he tohan en unkanpi kinhan, wicohan kin on heuncecapi kta.

12 Tona ihdatanpi kin hena unkihdacinpi, qa opeya unkihdawapi kta tawatenunyanpi šni; hena e iš iye on wihdutapi, qa iyepi on ihdukcanpi, qa hecen okannigapi šni.

13 Unkiye wiunhdutapi kin isanpa unkihdatanpi kte šni; tuka wicohan iyutapi Wakantanka unqupi kin he eciyatanhan, iyutapi kin niyepi kin iyahde niyanpi.

14 Ekta iyahde unniyanpi kta e sanpa unkihdutitanpi šni. Tuka Messiya tawotanin wašte kin en niyepi kaeš ekta unniupi.

15 Wiunhdutapi kin isanpa unkihdatanpi šni, wicašta tokeca wicohtani kin en; tuka wicayadapi kin he icage cinhan, niyepi on wiyutapi unhapi kin eciyatanhan sanpa unyuonihanpi kta unkapepi.

16 Hecen niye dukanpi kin akowapa wotanin wašte kin unkoyakapi kta, qa tuwe tokeca taku tawa wiyeya yanke cin en unkiwinktapi kte šni.

17 Tuka tuwe iwinkta kinlian Itancan kin on iwinkta nunwe.

18 Tuwe ihdaonihan kin he ecetudakapi kin ee šni, tuka Itancan kin tuwe yaonihan kin hee kta.

II. CORINTH WICOWOYAKE 11.

1 Witkotkoya iwae cin cistiyedan iyowinmayakiyapi kta wacin. He iyowinmayakiyapi nakaeš.

2 Wakantanka winawizi kin iyecen inaciwizipi, wicašta wanjidan kiciyus ciyapi, hokšiwinna ecedan un kin Messiya ekta aciipi kta heon.

3 Tuka he kowakipa, wamduška wohnaye on Eve hnaye ciqon he iyecen nitawacinpi kin yušicapi kta, qa woyuecedan Messiya en un kin etanhan iyaye niyanpi kta naceca.

4 Tuwe en niupi kin he Jesus tokeca wan unkiye unkoyakapi šni kin he oyaka, qa woniya tokeca, iyacupi šni qon, he nakaha iyacupi, qa wotanin wašte tokeca, anayagoptanpi šni qon he oniciyakapi kinhan, iyowinyakiyapi kta.

5 Miye yewicašipi iyotan tanka kin takudan ihukuya waun šni, imdukcan.

6 Ho magahan ešta, wosdonye kin on waksapa; tuka niyepi kin en taku owasin on tanyan unkihdaotaninpi.

7 Wakantanka tawotanin waste kin iyunwin codan ociciyakapi, qa wankantuya iyeniyanpi kta e on mihduhukuya kin he wawahtani he?

8 Okodakiciye tokeca kin taku wicawaki, qa opemicatonpi kin iwacu, ociciyapi kte cin heon; qa cicipi waun qa taku imakakije cehan, taku nitawapi kin mun šni:

9 Taku iyokpani waun qon he hunkawanjin kiciyapi Macedonia etanhan hipi kin maqupi, qa ohinniyan takudan inagiyeciyapi šni waun, qa eeš nakun hecen waun kta.

10 Messiya wowicake tawa miciun kin heon Achaia makoce kin en imawinkta kin de ecetu šni makiyapi kte šni.

11 Tokeca he? waštecicidapi šni kin heon etanhan he? Wakantanka sdonya.

12 Tuka taku ecamon kin he nakun ecamon kta, hecen tona wiyaonpapi akitapi kin hena etanhan wiyaonpapi kin emdaku kta, qa en iwinktapi kin he unkiyepi kin iyecen unpi kta.

13 Hena yewicašipi itonšni kin hecapi, wohnaye ohanyanpi, qa Messiya yewicaši qon hena iyecen ihduzapi.

14 Qa he taku wowinihan šni, Satan iye kaeš iyoyanpa ohnihde kin iyecen ihduza.

15 Heon etanhan, iye taokiye kin hena wicoowotanna ookiye kin iyecen ihduzapi kte cin he taku tanka šni, hena iye wicohan kin eciyatanhan ihang yapi kta.

16 Ake hecen epa; Tuwedan witkotkoke madake kte šni. Tuka hecon kinhan witkotkoke cin iyecen iyowinmakiye kta, cistiyedan mihdatan kta.

17 Taku epe cin hena Itancan kin eciyatanhan epe šni, tuka nina ihdatanpi kin he on witkoya ie cin iyemaceca.

18 Wicota wicacehpi kin on ihdatanpi kin he iyecen miš eya mihdatan kta.

19 Witkotkopike cin hena iyokipiya iyowinwicayakiyapi ece, niye yaksapapi nakaeš.

20 Tuwe wowidag niyanpi, tuwe temniyanpi, tuwe wanicipi, tuwe wahanicida, tuwe ite ohna anipapi hecinhan, iyowinwicayakiyapi ece.

21 Waoštehdapi kin he waka, waunšakapi šni kin heon. Tuka taku on tuwe waditake cinhan, witkotkoya iwaa ce, he on miš eya wadimataka.

22 Hena Hebrew wicašta kin hecapi he? Miš eya hemaca. Hena Israel etanhanpi he? Miš eya. Hena Abraham cinca he? Miš eya.

23 Hena e Messiya taokiye kin hecapi he? (witkotkoke cin iyecen iwaa,) miš eya imayotan. Wicohtani kin en imayotan; apapi kin en wopteca šni waun; kaška hnakapi kin en imayotan, qa wiconte kin en otakiya waun.

24 Juda oyate zaptan akihde, apapi wikcempa topa wanjidan iyokpani maqupi.

25 Yamni akihde cansakadan on amapapi; wancadan inyan on makininpi; yamni akihde wita wata micamdecapi; anpetu wanjidan hanyetu iyahna ošbe kin mahen waun;

26 Nina icimawani, mini ota wokokipe kin en waun, wakipi sa okokipe kin en, mitaoyate on wokokipe kin en, Ikcewicašta on wokokipe en. otonwe ekta wokokipe en, hewoskantuya wokokipe en, miniwanca ekta wokokipe en, hunkawanjin kiciyapi itonpi šni kin hena ekta wokokipe en;

27 Mdowakita qa nina htawani kin on, ota kiktahan waun kin on, wotektewahda qa imapuza on, ijehan amakihan kin on, macuwita qa tancodan waun kin on;

28 Qa tankan tanhan anpetu iyohi taku amaupi kin, okodakiciye kin owasin awanhdakapi kin he nakun.

29 Tuwe wašake šni un, qa miye wamašake šni he? tuwe aiapi un,qa miye šinwahda šni he?

30 Tuka imawinkta kta iyecece cinhan, wamašake šni waun kin heon imawinkta kta.

31 Jesus Messiya Itancan unkiyapi he Wakantanka tawa, qa Atkuku kin, owihanke wanin wowašte yuhe cin he sdonmayan, itonšni mawanica.

32 Damascus en, Aretas wicaštayatapi yanke cin ihukuya, wicašta itancan kin akicita ota wicayuha, Damascus oyate otonwe tawapi kin awanhdake ca, maktepi kta akita.

33 Hehan conkaške owanyeye wan etanhan, makanyankapi wan ohna, kun hiyumayanpi; qa iye nape kin etanhan nawajica.

II. CORINTH WICOWOYAKE 12.

1 Imawinkta kte cin he iyemicihantu šni, wowihanmde qa Itancan woyakapi tawa kin ekta wau kta.

2 Ehanna waniyetu ake topa sam iyeya, wicašta wan Messiya en un kin he sdonwaya; (wicatancan kin ohna un kin sdonwaye šni, qa tanton šni un kinhan nakun sdonwaye šni, Wakantanka he sdonya;) wicašta kin he mahpiya iciyamni kin ekta eyakupi;

3 Wicašta kin he sdonwaya, (wicatancan kin ohna un sdonwaye šni, qa tanton šni un kinhan nakun sdonwaye šni, Wakantanka he sdonya;)

4 He Wakantanka tipi kin ekta eyakupi, unkan wicoie oyagpica šni kin nation, hena wicašta oyake kta ešta okitpani kta.

5 Wicašta kin hecece cin on imawinkta kta, qa miye qe on imawinkta kte šni, tuka wamašake šni waun kin heceedan on.

6 Tuka imawinkta wacanmi keš wimatkotkoke kte šni, wowicake epe kta; tuka nakaha hecamon kte šni, tuwe wanmayake ca, token waun nation kin he isanpa tanka kecanmakin kta he kowakipa.

7 Unkan woyakapi tanka kin on etanhan wahanmicida kte šni heon taku pepe wan micehpi kin en maqupi, Satan taokiye wanji hee, šicaya makuwa kta heon, wahanmicida kte šni heon etanhan.

8 Qa heon Itancan kin yamni wocekiye ewakiya, he amayuštan kte cin heon.

9 Hehan, Mitowaonšida kin iyonihi kta, qa mitowašake kin he wowašake šni kin en hduštanpi ce, emakiya. Hecen Messiya towašake kin miye en miciun kte cin, heon makakije cin on iyuškinyan imawinkta kta.

10 Heon etanhan wowayazan kin en imduškin ece, qa waaiapi, qa iwicakakije, qa šicaya wicakuwapi, qa Messiya on wicokakije kin henakiya en; tohan wamašake šni eca taku owakihi ece.

11 Iwinktapi kin on witkotkoka imacaga, niye hecon mayakiyapi, mayadaotaninpi kta tuka qon; yewicašipi iyotan tankapi kin takudan en wicihukuya waun šni, mataku šni ešta.

12 Awicakehan niyepi ekta yewicašipi wowapetokeca tawapi kin econkupi, wacintankapi owasin en, wapetogtokeca, taku wowinihan, qa wašagya wicohan kin hena on.

13 Taku e on okodakiciye tokeca kin ihukuya yaunpi he; taku nitawapi kin iwacu šni kin hee naceca? Heon wawahtani kin he micicajuju po.

14 Wanyaka po, iciyamni ekta ciupi kta wiyeya manka, qa nakun taku nitawapi kin iwacu kte šni. Taku yatonpi kin he awakite šni, tuka niyepi atayedan. Cinca yapi kin hunkakepi kin taku wicakihnakapi kin he hecetu šni, tuka hunkake yapi kin hena hokšiyoqopa kin on taku ekicihnakapi kta.

15 Ninagipi kin on htawani, qa mihdusote kte cin he iyomakipi; tuka iyotan canteciciyapi ešta, aoptetuya waštemadakapi ece.

16 Tuka he hecetu, taku nitawapi kin iwacu šni; hececa ešta wamdupike cin heon wohnaye on ciyuzapi, keyapi.

17 Tona niyepi ekta ye wicawaši qon hena eciyatanhan, taku mihdamna he?

18 Titus cewakiye ca kici hunkawanjitku wan ekta ye waši. Niyepi etanhan Titus taku kamna he? Wicoksape okonwanjidan en maunnipi šni he? oye okonwanjidan ohna maunnipi šni he?

19 Ake niyepi en unkihduwicakapi kecannipi he? Wakantanka itokamya Messiya kin en unkiapi ece. Waštecicidapi kin, tanyan icahniyanpi kte cin heon taku owasin econkupi.

20 Ekta ciupi kinhan, niyepi token wacin kin hececa iyeciyapi kte šni, qa miye nakun token yacinpi šni kin hecen iyemayayapi kta kowakipa. Wakinicapi kin, winawizipi, canniyekiciyapi, wicokicize, waaiapi, waajijipi, wahanicidapi qa owodutaton kin henakiya en un kta kowakipa.

21 Qa okinni ekta wau kinhan, niyepi kin en Wakantanka mitawa kin iyokišin maye kta, qa tona wanna woahtani econpi, qa taku ašape cin, wiinahmanpi, qa wicawihomnipi econpi kin on iyopeiciyapi šni kin hena awicawakiceye kta naceca, he kowakipa.

II. CORINTH WICOWOYAKE 13.

1 De iciyamni ekta ciupi; waayatanin nonpa qa yamni ipi kin on wicoie owasin yasutapi kta.

2 Ociciyakapi qon he ake nakaha ociciyakapi, icinonpa ekta waun kin iyececa; qa nakaha en waun šni, tona toka wahtanipi, wicašta tokeca ko owasin, wowapi wicawecaga, ake ekta wai kinhan itonwicawape kte šni.

3 Miye mahen tanhan Messiya ie cin on wowapetokeca ayakitapi kin heon etanhan; he niyepi ekta taku okitpani šni, tuka niyepi kin en wašake hinca.

4 He iye wowašake šni on cansusbeca kin en okatanpi ešta, Wakantanka towašake kin on ni un. Heon unkiš eya waunšakapi šni, tuka niyepi kin ekta Wakantanka towašake kin on kici unnipi kta.

5 Nis niyepi ihdukcan po, wacinyanpi kin en yaunpi hecinhan; tanyan wihduta po. Ehpeniyanpi šni kinhan, Jesus Messiya niyepi kin mahen un, he sdonyakiyapi šni he?

6 Tuka ehpewicayapi kin heuncapi šni e sdonyayapi kta imdukcan.

7 Taku šica takudan ecanonpi kte šni he Wakantanka icewakiya; unkiye unwaštepi e unyaotaninpi kte cin hee šni, tuka wahtepi šni kin iyeuncecapi kta ešta, niye taku wašte ecanonpi kte cin hee wacin.

8 Taku wowicake kašeye cin takudan unkokihipi šni, tuka wowicake kin on etanhan.

9 Unkiye waunšakapi šni, qa niye wanišakapi eca unkiyuškinpi ece. Qa tanyan onihduštanpi kte cin he uncinpi.

10 Heon etanhan en waun šni icuuhan, hena wowapi en wakaga, okinni ekta waun kinhan yašinya iapi kin ohna iwae kta naceca; wowašake Itancan maqu kin eciyatanhan, he waicahyapi kin on maqupi, qa waihangyapi kin on etanhan šni.

11 Ehake, hunkawanjin ciyapi kin, wiyuškin po; oihduštan un po, cante wašte po, okonwanjidan awacin po, wokiyapi kin en un po: qa wowašte, wookiye ko Wakantanka kin nicipi un nunwe.

12 Otoiyohi iiputakapi wakan kin on i ikiciputaka po. Wicašta owotanna un kin owasin i iniputakapi.

13 Jesus Messiya Itancan towaonšida kin, Wakantanka towaštedake kin, qa Woniya Wakan iwicakiye

cin niyepi owasin en nicipi unpi nunwe. Amen.