Psalm Wowapi 11- 18

PSALM 11

David tadowan. Dowan itancan kin kicagapi.

1 Jehovah wowinape waye; Tokeca minagi heyakiyapi he; He nitawapi onakipa po, zitkadan iyececa?

2 Wan, wicašta Šicapi tinazipe nakiwinjapi; Ikan kin ekta tunwanhinkpe wiyeya ehnakapi; Otpaza en wicašta cante owotanna wicakutepi kta.

3 Woahde kin hena yujujupi uta: Wicašta owotanna taku econ okihi kta he?

4 Jehovah tipi wakan tawa kin ohna yanka; Jehovah oiyotanke tawa mahpiya kin ekta wanka; lye išta kin wanyaka, iye istojuha wicašta cinca wicayukcan ece.

5 Jehovah wicašta owotanna kin yukcan kta; Tuka wicašta šica qa tona wawicakipi waštedake cin hena iye nagi šicewicadaka ece.

6 Wicašta šice cin hena wakanhdi awicamagaju kte, Peta qa inyanzi, tate iyumni wohitike hinca; Miniyatke ohna wicaqupi kin hee.

7 Jehovah owotanna un, woowotanna waštedaka ece: Tona ecetupi kin hena iye ite kin wanyakapi kta.

PSALM 12

Šeminith akan dowan itancan kin kicakapi. David tadowan.

1 Jehovah wanikiya wo; wicašta wacantkiye cin he owihanke; Wicašta wicake cin wicašta cinca kin etanhan atakunipi šni ce.

2 Otoiyohi iye takodaku kici woitonšni okiciciyapi kta; lha idušduta qa cante nonpa on iapi kta.

3 Jehovah wicaiha šdušduta owasin bašpe kte, Wicaceji watankaicidaya ie cin he nakun.

4 Hena heyapi; Uncejipi on wounhitikapi kta; lha unyukanpi; tuwe itancan unyuhapi he?

5 Wicašta on ka kakijapi kin on, Wicašta wahpanica ceyapi kin on, Wanna nawajin kta ce, Jehovah eye kta; Tuwe he cantokpani hinca kinhan, wankan wapa ewahnake kta ce.

6 Jehovah taku eye cin hena wicoie ecedan; Mazaska maka oceti ohna yuecedan, šakowin akihde sdoyapi.

7 Jehovah, niye hena wicayakpatan kta; Wicoicage kin de etanhan ohinniyan eyahdaku kta.

8 Wicašta cinca wahtepi šni kin wankan ehdepi, kinhan, Wicašta ca owancaya manipi kta.

PSALM 13

Dowankiya Itancan tawa. David tadowan.

1 Jehovah, tohanyan amiyektonje kta he, ohinniyan kta he? Tohanyan niite namayakihbe kta he?

2 Tohanyan minagi on awacin waun kta, Anpetu otoiyohi cante mašice kta he? Tohanyan tokamaye cin miwankan un kta he?

3 Wanyaka wo, Jehovah Wakantanka mitawa, namahon wo: Išta iyoyammayan wo, okinni wiconte en mištinbe kta.

4 Okinni tuwe tokamaye cin, Wanna ohiwaya ce, eye kta; Mahicahe cinhan šicaya makuwapi kin iyašapi kta.

5 Tuka miye nitowaonšida wacinwaya; Micante nitowiconi kin on iyaša kte.

6 Jehovah iwadowan kta, Tanyan ecamicon heon etanhan.

PSALM 14

Dowan itancan kin kicagapi. David tawa.

1 Witkotkoke cin he, Taku Wakan wanica ce, cante mahen eya. Hena ihdušicapi, wicohan wahte šni econpi; Tuwedan taku wašte econ šni.

2 Jehovah mahpiya eciyatanhan wicašta cinca kin ahiwicatonwan; Tuwe wacinkšamya ohanyan hecinhan wanyake kta; Tuwe Wakantanka akita hecinhan.

3 Iyuhpa icunonpa iyayapi; witaya ihdušicapi; Tuwedan taku wašte econ šni; han, wanjidan šni.

4 Taku šica econpi kin owasin takudan sdonyapi šni he? Mitaoyate aguyapi iyecen wicayutapi, Qa Jehovah hoyekiyapi šni.

5 Hen wokokipe on kopehdapi; Wakantanka wicoicage owbtanna kin en un, heon.

6 Wicašta onšika tawowacinye kin ištenyayapi kta; Jehovah wowinapeye cin heon.

7 Tokin Israel woehdaku tawa kin Zion etanhan u nunwe: Tohan Jehovah taoyate wayaka unpi kin awicahdi kinhan, Jacob iyuškin kta, Israel pida kta.

PSALM 15

David tadowan.

1 Jehovah, tuwe nitawakeya en ounye kta he? Tuwe paha wakan nitawa kin en ti kta he?

2 Tuwe iyaonpepica šni yan mani, qa woowotanna econ, Qa cante mahen wowicake ia ece:

3 Tuwe iye ceji on waaie šni, Tuwe ikiyedan un kin taku šica ecakicon šni; Qa takodaku on woyake šica wan icu šni:

4 lye ista en wicašta wahte šni kin wahtedapi šni: Tuka tona Jehovah kokipapi kin hena wicayuonihan kta: Iye iciconza on kiunniiciya esta hdutokeca kte šni:

5 Mazaska tawa ota kamna kta ehnake šni; Qa wicašta iyaonpepica šni un kin on wokajuju icu šni; Tuwe dena econ kin he ohinniyan pahohopi kte šni.

PSALM 16

David tawocikiye.

1 Wakantanka makpatan wo; Niye wacinciya, heon etanhan.

2 Jehovah heyakiya; Itancan mitawa kin he niye; Mitowašte kin he niye ekta iyahde šni:

3 Makoce kin en wicašta wacantkiye cin hena ekta, Qa itancanpi kin, hena en ocowasin wimduškin.

4 Tona wanji tokeca wohpapi kin hena woiyokišice ota yuhapi kta: We wošnapi kin hena wapapson kte šni, Qa cajepi kin miiha ohna iwacu kte šni.

5 Jehovah wopamni mitawa qa wiyatke mitawa kin hee; Woaihpeye mitawa kin he niye dutanka kta,

6 Taku wiciyokipi kin imakiyutapi: Han, maga wašte hinca mduha.

7 Jehovah wahokonmakiye cin he mdatan kta; Nakun hanyetu eca mitapakšin onspemakiya ece.

8 Mitokam Jehovah ohinniyan ewahde; Mietapa ekta un, heon mahohopi kte šni.

9 Heon etanhan micante wiyuškin, Qa mitowitan ipšica ece: Han, micehpi wowacinye en wanke kta.

10 Minagi Hades en amayadustan kte šni; Wanji Wakan nitawa kin he wicahwin wanyagyakiye kte šni.

11 Wiconi canku kin he onspemayakiye kta; Niite kin he wowiyuškin  ozudan; Nietapa ekta ohinniyan wiciyokipi.

PSALM 17

David tawocekiye.

1 Jehovah, taku owotanna kin nahon ye; Šicahowamde cin he anolikiya wo; Wocekiye mitawa namakihon ye, Iha wicahnaye šni etanhan u kin he.

2 Mayaowotanpidan kin he nitohnake etanhan u kta; Niišta taku ocitkonza kin hena wanyake kta.

3 Cante imayaduta, hanyetu en mayahi; Imayadukcan, takudan iyeyaye kte šni; Mii kin mitawacin kakipe kte šni.

4 Wicašta wicohan tawapi ekta, niiha oie kin on, Waihangye sa ohanpi kin iwanmdaka ece.

5 Mioye kin nitacanku yuš un; Šiha ewahde kin našdute šni.

6 Wakantanka houciciya; amayadupte kta heon; Anohmakiya wo, taku epe cin namakihon wo.

7 Tona wacinyanpi niwicayaye nitocantekiye hdutanin wo; Tona najinpi kin etanhan, ninape etapa on.

8 Ištasu kin iyecen makpatan wo; Nihupahu ohanzi ihukuya nainayahbe kte;

9 Wicašta šica ihangmayanpi itepi kin etanhan; Minagi tokayapi aohdutemayanpi kin hena.

10 Wasin tawapi kin en aconkaškapi; Ipi on wahanicidaya iapi ece.

11 Wanna unkowepi kin en aohduteunyanpi; lšta on wanyag iheyapi, hdatapi kta heon.

12 Mnaja iyececa, wayapota inahni; Qa mnaja koška woinahbe en iyotanke cin iyececa.

13 Jehovah najin wo, itkokim ya wo, patuskiya wo; Mazasagye nitawa on wicašta šica etanhan minagi eyaku wo:

14 Jehovah, ninape on, wicašta kin etanhan; Wicoicage wicašta etanhan, Taku tawapi wiconi kin den un; Qa taku nahmana yahnake cin on tezi ojuwicayakiye kta: Hena cinca wipipi kta; Qa taku ohdaptapi kin hokšiyoqopa aihpewicakiyapi kta.

15 Tuka miye woowotanna en niite wanmdake kta; Tohan ouncage nitawa yuha wekta kiuhau, cante mawašte kta.

PSALM 18

Dowankiya itancan kin. David Jehovah taokiye kin he kaga: Jehovah tokayapi owasin napepi etanhan, qa Saul nape etanhan eyaku qon, anpetu kiu ho en odowan oie kin dena Jehovah eciya. Unkan heya,

1 Jehovah mitowašake, nina waštecidake kta.

2 Jehovah imnija mitawa, qa conkaške mitawa, qa emahdaku ece kin hee: Wakantanka mitawa, wowinape mitawa, he wacinwaye kta; Wahacanka mitawa, qa ni makiya he kin, paha tehanwankantu mitawa kin hee.

3 Jehovah yatanpi kte cin he hoyewakiye kta; Unkan tokamayanpi etanhan nimayanpi kta.

4 Wiconte ikan kin on mayuškiškitapi; Qa wicošice wakpa kin mayu nyaye kta.

5 Hades ikan kin aohdutemayanpi; Wiconte mazahtakiyapi kin mayuzapi.

6 Iyotanhan iyewakiye cin en Jehovah hoyewakiye kta; Qa Wakantanka mitawa cewakiye kta; Tipi wakan tawa kin eciyatanhan miho kin nahon kta; Qa wocekiye mitawa iye itokam u kte, iye noge kin en.

7 Hehan maka kin yuhuhuzapi qa cancan; He oahde kin yuhuhuzapi qa škanškan; Iye sinhda heon etanhan.

8 Canniyan etanhan sota wankan iyaya; Qa i kin etanhan peta wahuhnaga; Heon petaga ideyapi.

9 Nakun mahpiya kin patuskiye ca kun u; Qa iye siha ihukuya otpaza.

10 Qa Cherub wan akan iyotanke ca kinyan iyaya: Han, tate hupahu kin akan kinyan.

11 Woinahbe tawa otpaza kin he kaga; Ihdukšan tawokeya kin mini otpaza; Mahpiya en mahpiya šoka kin hee.

12 Itokam iyoyanpa on mahpiya soka tawa kin hiyaya; Wasu qa petaga.

13 Hehan mahpiya ekta Jehovah wakinyan hotonkiya; Qa lyotan Wankan kin ho hdatanin: Wasu qa petaga.

14 Unkan tunwanhinkpe kihiyeya qa napewicaya; Nakun wakanhdi hiyuye ca yušinyewicaya.

15 Hehan mini sicu kin wanyakapi; Qa maka oahde kin yutaninpi; Jehovah niye he iyopeyaya; Nitocanniye oniya ipogan kin heon.

16 Hehan wankantanhan hiyu qa mayuze kta; Mini ota etanhan imaeu kta.

17 Tokamaye wašake cin etanhan emayaku kta; Qa tona šicemadapi kin etanhan; Hena mikapeya wašakapi nakaeš.

18 lyomaki ca anpetu kin en iyamahpayapi kta; Tuka Jehovah mayusuta kin hee.

19 Unkan makoce tanka en amahi; Iyokipiwaye cin heon emayaku kta.

20 Mitoowotanna iyecen Jehovah ecamicon kta; Minape ska kin iyecen micicajuju kta.

21 Jehovah tacanku kin hena owape; Qa Taku Wakan mitawa šicaya amduštan šni.

22 Iye tawoyaco kin owasin mitokam un; Qa toope kin mitantanhan ehpewaye kte šni.

23 Nakun iye itokam ecetu waun; Qa wawahtani kin etanhan tinsmiciya.

24 Heon mitoowotanna iyecen Jehovah micicajuju; Iye išta itokam minape ska kin heon.

25 Tuwe wacantkiye cin he kici wacantkiya nihdutanin kta; Wicašta owotanna kici oniwotanna kta:

26 Tuwe ecedan un kin he kici ecedan nihdutanin kta; Qa tuwe pemni un kin he kici nihdupemni kta.

27 Niye oyate on ka niwicayaye kte: Tuka išta wankantupi kin kun hiyuwicayaye kta.

28 Niye petijanjan mitawa ideyaye kta: Jehovah mita Wakantanka otpaza iyoyammiciye kte.

29 Niye on ozuye wan awaimnanke kta; Wakantanka mitawa on conkaške wan awapšice kta.

30 Wakantanka tacanku kin he yuštanpi; Jehovah oie kin he yuecepidan; Tona waeinyanpi owasin he wahacanka yapi.

31 Hecen Jehovah icunonpa tanhan Taku Wakan kin tukte e he? Qa Wakantanka unkitawapi icunonpa tanhan tuwe imnija he?

32 Wakantanka cin wowašake on ipiyag makiton; Qa mitacanku miciyuštan.

33 Mišiha tatokadan iyececa micaga; Qa pajodan mitawa akan najin makiya.

34 Minape kicizapi onspemakiya, Hecen miišto mazasa itazipa kin yuwinja.

35 Unkan nitowiconi wahacanka kin mayaqu: Nakun ninape etapa kin najin makiye kta; Qa nitowahbadan tanka makage kta.

36 Mihukuya caewahde kin hena mayadutanka kte; Hecen miiskahu našdute kte šni.

37 Tokamayanpi tawicawapa qa ewicawehdege kta; Qa bowicasotapi šni hehanyan wahdicu kte šni.

38 Wicawakahuhuge kta, hecen najin okihipi šni; Mišiha ihukuya ihpayapi kta.

39 Unkan okicize kta wowašake on ipiyag mayakiton; Tona takpe maupi kin hena mihukuya iyewicayaye kta.

40 Nakun tokamayanpi tahupi kin mayaqu; Qa tona šice madapi kin hena ihangwicawaye kta.

41 Hena howayapi kta, tuka wanikiya wanica: Jehovah hoyekiyapi kta, tuka awicayupte šni.

42 Hehan wicawakamdumdu kta, tate itokam maka mdu iyececa; Canku upšija iyecen tankan ehpewicawaye kta.

43 Oyate kicizapi kin etanhan emayahdaku kte; Ikcewicašta kin en itancan emayahnake kte; Oyate sdonwicawaye šni qon hena wowidagwaye kta.

44 Noge on nahonpi kinhan anamagoptanpi kta; Wicašta tokeca cinca kin mayaonihanpi kte.

45 Oyate tokeca cinca kin atakunipi kte šni; Qa conkaške tawapi etanhan cancanyan hiyupi kta.

46 Jehovah ni un; qa Imnija mitawa yawaštepi nunwe; Qa Wakantanka Wanikiya mitawa kin he yatanpi nunwe.

47 Wakantanka watokiconpi maqu ece kin nee; Qa nakun mihukuya oyatepi wicaktedan.

48 Tokamaye cin etanhan emahdaku; Han, tona takpe maupi kin wiciwankam emayahde kta; Wicašta waihangye cin etanhan emayahdaku kta.

49 Heon, Jehovah, Ikcewicašta ehna ciyatan kte; Qa nicaje iwadowan kta.

50 Wicaštayatapi tawa kin woehdaku kiciyutanka; Qa tuwe sdakiye cin he wowaonšida ecakicon ece; David qa iye cinca kin, owihanke wanica.

Psalm Wowapi 1-10

PSALM WOWAPI.

PSALM 1.

PSALM 1.

1 Wicašta cante wašte ninca; Tuwe wicašta šica tawowahokonkiye kin ohna mani šni, qa wahtanipi sa tacanku kin en inajin šni, qa wauncapi oyanke tawapi kin en iyotanke šni:

2 Tuka Jehovah toope kin wowiyuškin ya; Qa tawoahope kin awacin un kta, anpetu hanyetu koya.

3 Unkan he can wan mini wakpa icahda ojupi, qa iyehantu eca waskuyeca icahya ece kin he iyecece kta; Nakun ape tawa kin šnije kte Šni, Qa taku econ kte cin owasin tanyan yuštan kta.

4 Wicašta šicapi kin hececapi šni; Tuka hena aguyapi ha tate hamya iyeye cin he iyececapi.

5 Heon wicašta šica woyaco kin en najinpi kte šni; qa wahtanipi sa wicašta owotanna tomniciye kin en unpi šni.

6 Jehovah wicašta owotanpidan tacanku kin he sdonya; Tuka wicašta šicapi tacanku kin atakuni kte šni.

PSALM 2.

1 Tokeca Ikcewicašta kin oqoyapi, qa oyatepi taku šni awacinpi kta he?

2 Maka wicaštayatapi kin odakonkiciyapi, qa wicašta itancanpi witaya wohdakapi, Jehovah qa tuwe sdakiye cin on.

3 Wicaške tawapi kin unpapšakapi kta, Qa hakahmonpi tawapi ehpeunyanpi kta ce.

4 Mahpiya kin en iyotanke cin he iha kta; Itancan kin iwicahaha kta.

5 Hehan tocanniye en wowicakiyake kta; Qa Šinhda hinca en Šitkihda wicaye kta.

6 Tuka Zion Paha Wakan mitawa kin akan, Wicaštayatapi mitawa sdawakiya ce.

7 Wokonze kin owahdake kta; Jehovah hemakiya, Micinkši kin he niye; anpe dehan cinca cicaga ce.

8 Makida wo, kinhan Ikcewicašta tawa wicayaye kta, qa maka ihanke kin nitawa kta e cicu kta.

9 Maza icapsinte wan on wicayakawihnuni kta, Maka wakšica iyecen wicayakamdece kta ce.

10 Heon etanhan wicaštayatapi, ksapa po; Maka wayacopi, waonspeiciciya po:

11 Wokokipe yuha Jehovah ohoda po; Qa wonihinciye on iyasa po.

12 Cinhintku kin i iputaka po, Okinni sinhda kta, qa tocanniye kitanna ide kinhan, canku kin etanhan nitakunipi kte šni. Tona iye wacinyanpi owasin cante waštepi ece.

PSALM 3

David tadowan, iye cinhintku Absalom ite kin nakicipa, he ehan.

1 Jehovah, toka mayanpi kin hena ota aya; Tona takpe maupi kin hena wicota.

2 Wicota minagi heciyapi; Wakantanka en nikiyapi wanica ce. Selah.

3 Unkan Jehovah, mitawa wahacanka kin he niye; Wowitan mitawa qa pa yuwankan imacu kin.

4 Miho kin on Jehovah hoyewakiya; Unkan iye paha wakan tawa kin etanhan namahon. Selah.

5 Miye imunke ca mištinbe; Ake wekta; Jehovah mayuhe cin heon.

6 Oyate kektopawinge wikcemna kowicawakipe kte šni, Ihdukšan tanhan takpe maupi kin.

7 Jehovah inajin wo; Wakantanka mitawa nimayan wo; Tokamayanpi owasin tapon hu kin en awicayapa; Wicašta šica hi kin wicayecamdeca.

8 Woehdaku kin he Jehovah tawa; Woyawašte nitawa nitaoyate kin en un nunwe. Selah.

PSALM 4

David tadowan. Candowankiyapi on dowan itancan kin.

1 Wakantanka owotanna mitawa, Houwaye cinhan amayupta wo; Makakija en mayadutanka; Onšimakida, qa wocekiye mitawa nahon wo.

2 Wicašta cinca, tohanyan mitowitan wowiištece yayapi kta he; Tohanyan takušni wašteyadapi qa woiton šni ayakitapi kta he? Sela.

3 Tuka Jehovah wicašta wacantkiye cin iye on eicihde e sdonya po; Hoyewakiya eca Jehovah namakihon ece kta.

4 Kokipa po, qa wahtanipi šni po, Nitowinjapi akan nicantepi on awaicicinpi, Qa inina yukan po. Selah.

5 Wicoowotanna wognapi kin wošna po, Qa Jehovah wacinyan po.

6 Tuwe taku wašte unkipazopi kta he, wicota eyapi oce: Jehovah, niye nitohnake iyoyanpa kin akan unkiyepi yuwankan icu po.

7 Wowiyuškin micante kin en eyahnaka, Aguyapi qa miniša wicakiciyuotapi kin he isanpa.

8 Wookiye en imunke ca nakun mištinbe kta; Jehovah, niye nišnana wowacinye en ounye mayakiye cin heon.

PSALM 5

David tadowan. Cotanka on dowan itancan kin kicagapi.

1 Jehovah mioie kin nahon wo; Mitawacin kin he iyukcan ye.

2 Mitawocekiye ho kin he nahon wo, Wicaštayatapi mitawa, qa Wakantanka mitawa; Ceciciye kta heon etanhan.

3 Jehovah, hanhanna eca miho kin nayahon kta; Hanhanna eca houciciye ca wankan ewatonwe kta.

4 Taku Wakan woahtani en iyuškin kin henica šni; Taku šice cin he niciti kte šni.

5 Tona witkotkoke cin niišta itokam najinpi kte šni: Tona woahtani econpi kin iyuhpa šice wicayadaka ece.

6 Tona itonpi šni kin hena ihangwicayaye kta; We wicašta qa wicahnaye sa kin he Jehovah wahteda kte šni.

7 Tuka miye nitowaonšida ota kin on yati en wau kte; Kocicipe cin on tipi wakan nitawa etkiya ohowada kta.

8 Jehovah, nitoowotanna on amayan wo, toka mayanpi kin on etanhan; Miite itokam canku nitawa owotanna kaga wo.

9 I kin ohna wowicake wanica: Mahen tanhan wicošice yukan; Dotepi kin wicawoha yuhdokapi kin heca cejipi on wicahnayanpi ece.

10 Wakantanka, kakiswicaya wo; Wowahokonkiye tawapi on hinnpayapi nunwe; Woahtani hduotapi kin on ehpewicaya wo; Niye nicipajinpi kin heon etanhan.

11 Tuka wacinniyanpi kin owasin wiyuskinpi kte; Ohinniyan wiyuskinyan dowanpi kte; Niye awanwicayahdake cin heon etanhan: Nakun tona nicaje waštedakapi kin hena iniyuškinpi kte.

12 Wicašta owotanna kin niye dawašte kta; Jehovah, wahacanka iyececa, wowašte watešdag yaye kta.

PSALM 6

David tadowan. Kuya ahiyayapi en candowankiyapi on dowan itancan kin.

1 Jehovah, nitocanniye en iyopemaye šni ye; Qa sinyahda en kakismaye šni wo.

2 Jehovah, onšimakida ye, wamasake šni; Jehovah asnimayan ye, mahuhu tehiya kakija.

3 Minagi kin iš eya nina kakija; Tuka niye Jehovah, tohanyan kta he?

4 Jehovah hdicu ye, minagi ehdaku wo; Nitowaonšida kin on nimayan wo.

5 Wiconte en niksuyapi kin wanica; wicahapi ekta tuwe wopida eniciye kta he?

6 Comniwahdazi on wašake šni amayan; Hanyetu osan mitowinja amnitan waya; Istamnihanpe amau kin on ipahin spaye wakiya ece.

7 Ceyapi on išta amatakuni šni; Tokamayanpi owasin on kan amayan.

8 Taku šica ecanonpi kin owasin mitan tanhan ya po; Jehovah woceye mitawa ho mamahon kin heon.

9 Jehovah hoyewakiye cin he namahon; Wocekiye mitawa kin he Jehovah icu kta.

10 Tokamayanpi owasin ištecapi qa nihinciyapi kte; Ihnuhanna hdicupi qa ištecapi nunwe.

PSALM 7

David tadowan. Cuš Benjamite oie kin on Jehovah kahiyaye ciqon.

1 Jehovah Wakantanka mitawa, niye wacinciye; Tehiya makuwapi owasin etanhan nimayan qa emahdaku wo:

2 Okinni mnaja iyecen minagi yašpašpa qa yahdehdece kta; Unkan waehdaku wanice kta.

 3 Jehovah Wakantanka mitawa, hecen ecamon kinhan; Minape ohna taku šica yuke cinhan;

4 Tuwe wookiye en mici un kin itkom taku šica ecawecon kinhan; Han, tuwe taku on etanhan šni šicaya makuwa kin he emdaku ece:

5 Hehan toka kin minagi tapa qa ehdege kte; Han, mitaniya maka kin en namdu kte; qa mitowitan watušekšeca en ounye kiya nunwe. Selah.

6 Jehovah, canniniye cin en inajin wo; Tokamayanpi sinhdapi kin on wankan iyeiciya wo; Qa miye on woyaco cajedate cin on ihduhica wo.

7 Unkan oyate mniciyapi kin aohduteniyanpi kta; Heon etanhan hena on wankan ihdoku wo.

8 Jehovah oyatepi kin wicayaco kta; Jehovah, mitoowotanna qa mitowašte en maun kin he iyecen mayaco ye.

9 Tokin wicašta šica tohanpi šica hena owihanke yen; Tuka wicašta owotanna kin he yušuta wo; Taku Wakan owotanna wicacante qa wicapakšin iyukoon kin.

10 Wahacanka mitawa kin he Wakantanka etanhan; Tona cante owotanna niwicaye cin hee.

11 Wakantanka wayaco owotanna; Qa Wakantanka anpetu iyohi canniyan un:

12 Ihduhomni šni kinhan isan hduhe kta; Tinazipe wanna nawinja qa wiyeya ehnaka:

13 Qa wiconte wipe kin ekta epazo; Tunwanhinkpe kin ide kiye kta.

14 Wanyaka wo, woahtani on tinge; Taku šica on ihdušaka, qa woitonšni hiyuya.

15 Woha wan kage ca iye kica; Qa oqapi iye kage cin en ohinnpaya.

16 Tohtani iye pa kin en hdi kta; Qa tohan šica iye pešdete ahdinpaye kta.

17 Jehovah toowotanna kin on wakahimdamde kta; Qa Jehovah tehan wankantu caje kin iwadowan kta.

 PSALM 8

David tadowan. Gittith on dowan itancan kin.

1 Jehovah Itancan unkitawapi, Maka kin owancaya nicaje wokitanin hinca; Nitowitan mahpiya kin iwankam eyehde.

2 Hokšiyopa qa azin unpi ipi kin etanhan woyatan yakaga; Tona toka niyanpi kin hena on, Toka watokicon ko wicaduinina kta heon.

3 Mahpiya nitawa ninapsukaza kage cin he wanmdaka eca; Hanyetu wi qa wicanhpi eyahnake cin;

4 Wicašta kin taku, hecen ekta ewacanni he; Qa wicašta cinhintku kin, on en yahi kta he?

5 Kitan ecinyan Taku Wakan kin ihukuya yakaga; Wowitan qa woyuonihan on watešdag yecaton;

6 Ninape taku kage cin hena idake yakiya; Taku owasin iye siha ihukuya eyahnaka;

7 Tahinca optaye, tatanka ko owasin; Qa nakun tinta woteca kin;

8 Mahpiya okinyanpi, qa miniwanca hogan kin, Taku miniwanca ohna cankuye cin hena.

9 Jehovah Itancan unkitawapi, Maka kin owancaya nicaje wokitanin hinca.

PSALM 9

David tadowan. Muth-labben on dowan itancan kin.

1 Micante ocowasin on Jehovah mdatan kta; Taku wowinihan nitawa owasin mdatanin kta.

2 Cante mawašte qa niye on wimduškin kta; Tehan Wankan yaun nicaje iwadowan kta.

3 Tokamayanpi hekta itoheya hdicuyapi kinhan, Nitokam hicahanpi qa hinnpayapi kte.

4 Woakinica qa woyaco mitawa dušuta; Oiyotanke kin akan owotanna wayaco idotanke.

5 Ikcewicašta iyopewicayaya, tona šice cin hena ihangwicayaya; Ohinniyan qa owihanke wanica cajepi yapajuju.

6 Toka woihangye tawapi kin wanna owihanke: Qa totonwepi kin hena dujuju; Ahna wicakiksuyapi kin he atakuni šni.

7 Tuka Jehovah owihanke wanica ounye kte; Woyaco on oiyotanke tawa wiyeya ekihde.

8 Unkan wowašte on maka kin hdaco kta; Woowotanna on oyate kin wicayaco kta.

9 Nakun šicaya wicakuwapi kin hena Jehovah wowinape yapi kta; Wokakije anpetu kin en he wowinape yapi kta.

10 Unkan tona nicaje sdonyapi hena wacinniyanpi kta; Niye Jehovah, tona anicitapi kin hena ehpewicayaye šni ece.

11 Jehovah Zion en ounye cin he idowan po; Tohan tanka oyate kin en oyaka po.

12 Tohan wicawe akita eca hena kiksuya ece; Tona kakija hoyeyapi kin he akiktonje šni.

13 Jehovah onšimakida wo; Tona šicemadapi token kakišmayanpi kin he wanyaka wo. Wiconte tiyopa etanhan imacu kin he niye.

14 Hecen Zion cunwintku tatiyopa kin en nitowitan ocowasin omdake kta; Wiconi nitawa on imduškin kta.

15 Ikcewicašta woha wan kagapi kin he ohna ihpayapi; Wohmunke wan iye nahmanpi kin he ohna siha icihmunkapi.

16 Woyaco econ kin eciyatanhan Jehovah sdonyapi: Tuwe šice cin he iye nape ohan kin on hmunkapi ece. Higgaion. Sela.

17 Wicašta šicapi Hades en hdicuwicayapi kta; Oyate Wakantanka akiktonjapi kin iyuhpa.

18 Wahpanicapi kin ohinniyan akiktonjapi kte šni; Wicašta onsika wacinyanpi kin he owihanke wanica ihanke kte šni.

19 Jehovah inajin ye, wicašta akantu wašake šni nunwe; Nitokam Ikcewicašta kin wicayacopi kte.

20 Jehovah, wakokipe wicakicaga wo; Hecen Ikcewicašta wicašta ikceka hecapi e sdoniciyapi kta. Sela.

PSALM 10

1 Jehovah, tokeca itehan nayajin he? Wokakije anpetu kin en nayakihbe kta he?

2 Wicašta šica wahanicida on kakije cin tehiya kuwa ece; Wohnaye awacinpi kin he on icihduzapi nunwe.

3 Wicašta šica iye nagi taku cantiheye cin on ihdatan; Qa waicucu kinhan ihdawašte; Jehovah he wahteda šni tuka.

 4 Wicašta šica, ite wahanicida kin on, Takudan akite kte šni, Wakantanka wanica; Hecen tawacin ece.

5 Tacanku kin ohinniyan suta; Nitawoyaco kin iwankam un, išta kin itehan; Tokawicaye cin owasin awicapogan kta.

6 Cante mahen heya; lcimaha mayatakanpi kte šni; Wicoicage qa wicoicage hehanyan woiyokišice wanice kta ce.

7 Woyašice, woyahnayan qa woyušice on i kin ozudan; Ceji ihukuya woyaškiškapi qa woahtani hiyeya.

8 Otonwe en waiyapepi kin hen iyotanke kta; Wonahbe oyanke kin en wicašta owotanna wicakte kta; lye išta wicašta onšika iyawicape kta.

9 Mnaja wan wasun ohna yanka, He iyecen, woinahbe oyanke kin ohna waiyape un kta; Wicašta onšika yuze kta e iyape kta; Wohmunke tawa kin en wicašta onšika au eca yuza ece.

10 Patuš inajin qa makata iwanka, Hecen wicašta wašaka wicayuhe cin on wicašta onšika hinhpayapi kta.

11 Cante mahen heya; Wakantanka akiktonja; Ite nakihman; icimana wanyake kte šni ce.

12 Jehovah, najin wo; Wakantanka, nape yuwankan ehdaku wo; Onšike cin hena akiktonje šni wo.

13 Tokeca wicašta šica Wakantanka wahteda šni he? Niye wawinunge kte šni, cante mahen keya he?

14 Niye wandaka; ninape on toyecon kta e wicohan šica wocanniye ko ayatonwan ece: Tuwe onšike cin he wacinniye kta; Wamdenica kin oyakiya ece.

15 Wahtani sa isto kin kawega wo; Wicašta šica tošice cin ayakite kta, takudan iyeyaye kte šni hehanyan.

16 Jehovah Wicaštayatapi ohinniyan qa owihanke wanice kta: Makoce tawa kin etanhan Ikcewicašta kin atakunipi šni.

17 Tona onšika taku icekiyapi kin he, Jehovah niye nayahon; Cantepi dušuta kta; ninoge anohyakiye kta.

18 Wamdenica qa kakišyapi kin towicayecicon kta; Hecen wicašta maka akan icimana wakokipe wicakicage kte šni.