Esther

ESTHER

WICOWOYAKE 1.

1 Unkan Ahasuerus taanpetu kin en kaketu: Ahasuerus India etanhan Ethiopia hehanyan, makoce opawinge sanpa wikcemna nonpa sanpa šakowin en wicaštayatapi yanke ciqon he dee:

2 Anpetu kin hena en Ahasuerus wicaštayatapi kin iye tokiconze oiyotanke Šušan tipi wašte kin en iyotanke ciqon he ehan:

3 Towidake waniyetu iyamni kin en, wicaštayatapicicapi  qa wowidake tawa iyuhpa wohanpi wan kicicopi: Persia qa Media wowašake kin, okinihanpi qa wicaštayatapicincapi kin iye itokam unpi kin icunhan:

4 Hehan towidake wowitan wowišice, qa iye tanka wowinihan woyuonihan kin anpetu ota kpazo yanka, anpetu opawinge sanpa wikcemna šahdogan hehanyan:

5 Unkan anpetu kin hena henakeca hehan oyate ocowasin Šušan conkaške  ohna yakonpi kin hena wotapi wan kicicopi, wicatanka qa wicacištinna, anpetu šakowin hehanyan, wicaštayatapi tipi wašte canwojupi hocoka kin hentu:

6 Minihuha zipzipedan, škaška qa toto, hahonta ska, qa hanonta toto on, mazaska canhdeska qa inyan ska ihupa kin en ikoyagyapi: ohehdepi kin hena mazaskazi qa mazaska, inyan sapsapa, qa škaška, qa toto, qa sapa owanka kin akankan.

7 Unkan mazaskazi wiyatke kin ohnahna wayatkewicakiyapi, qa wiyatke kin owasin toktokeca qa minima wicaštayatapi tawa kin ota hinca, wicaštayatapi nape kin etanhan.

8 Unkan wayatkanpi kin he woope kin eciyatanhan; tuwedan wanagiyeye šni: wicaštayatapi iye tipi kin ohna wicašta itancanpi owasin heoen econ wicaši nakaeš, wicašta otoiyohi token iyokipi kin hecen ecakiconpi ecee kta.

9 Nakun Vašti wicaštayatapi winohinca kin iš eya winohinca wohanpi wan kicicopi, wicaštayatapi tipi, Ahasuerus wicaštayatapi tawa kin he ohna.

10 Anpetu išakowin kin en, wicaštayatapi cante miniša iwašte qehan, hehan Mehuman, Biztha, Harbona, Bigtha qa Abagtha, Zethar qa Carcas, ookiye itancan šakowin, Ahasuerus wicaštayatapi itokam waokiya unpi ecee kin hena,

11 Vašti wicaštayatapi winohinca kin he, wicaštayatapi tawatešdake un, wicaštayatapi kin itokam ahipi kta kewicakiya, he owanyag wašte kin oyate qa wicašta ihdawapi ko wicakipazo kta: he wanyakapi wašte hinca nakaeš.

12 Tuka Vašti wicaštayatapi winohinca kin he wicaštayatapi toie, ookiye itancanpi nape on ahipi kin he on u kta wicada šni: hecen wicaštayatapi kin nina šihda qa iye tanmahen tocanteptanye ide.

13 Hehan wicaštayatapi kin wicašta ksapapi woope sdonyapi ecee kin hena hewicakiya: (tona woope qa woyaco sdonyapi kin hena owasin wicaštayatapi kin hecen ecawicakicon ecee nakaeš:

14 Unkan iye iyokihe Caršena, Šethar, Admatha, Taršiš, Meres, Marsena, qa Memucan, Persia qa Media en wicaštayatapicincapi šakowin, wicaštayatapi ite wanyakapi ece, wokiconze en tokaheya iyotankapi kin hena;)

15 Ookiye itancanpi nape eciyatanhan wicaštayatapi oie kin ecen econ šni kin heon etanhan, woope eciyatanhan, Vašti wicaštayatapi winohinca kin taku ecaunkiconpi kta he? eya.

16 Unkan Memucan wicaštayatapi qa wicaštayatapicincapi kin wicitokam heya; Vašti wicaštayatapi winohinca kin he wicaštayatapi kin išnana taku šica ecakicon šni, tuka wicašta ihdawapi owasin en, qa oyate iyuhpa Ahasuerus wicaštayatapi makoce tawa owasin en unpi kin hena koya.

17 Wicaštayatapi winohinca oie kin de winohinca owasin en u kta nakaeš, hecen iye ištapi en hihnaku šicewicakidapi kta; Ahasuerus wicaštayatapi kin Vašti wicaštayatapi winohinca kin he iye itokam aupi kta keya, tuka iye hi šni cee oyakapi kinhan.

18 Persia qa Media winohincapi kin hena wicaštayatapicincapi wicaštayatapi tawa, anpetu kin de wicaštayatapi winohinca ohan nahonpi kin iyuhpa hecen awicayuptapi ecee kta. Kinhan šicekicidapi qa kicizapi ota kta ce.

19 Wicaštayatapi kin ekta he wašte kinhan, iye etanhan wicaštayatapi oie wanji ye kta, qa he Persia qa Media woope kin en i opeya owapi kta, hecen yutokecapi kte šni, Vašti icimana Ahasuerus wicaštayatapi kin itokam; u kte šni: qa wicaštayatapi tohe tawa kin he tuwe tokeca sanpa wašte kin he wicaštayatapi kin qu kta ce.

20 Unkan wicaštayatapi tawokonze kage cin he wicaštayatapi toun owancaya nahonpi (kinhan he tanka,) nakaeš hehan winohinca owasin, tankapi qa cistinpidan, hihnakupi kin wicahduonihanpi kta ce, eya.

21 Unkan wicoie kin he wicaštayatapi kin waštedaka, qa wicašta ihdawapi kin nakun: hecen wicaštayatapi kin Memucan oie kin eciyatanhan ecen econ.

22 Unkan wicaštayatapi makoce ounyanpi tawa kin owasin ektakta wowapi ye ši, ounyanpi; otoiyohi kin iye wowapi kin eciyatanhan, qa oyate otoiyohi iye iapi kin ohnahna, wicašta otoiyohi iye ti kin ohna itancan kta: unkan oyate iapi tawa kin ohnahna oyakapi ecee.

ESTHER WICOWOYAKE 2.  

1 Wicoie kin dena iyohakam, Ahasuerus wicaštayatapi tocanteptanye kin anaptapi qehan, Vašti kiksuye ca taku econ qon he, qa token wakiconzapi nakun.

2 Hehan wicaštayatapi tawowidake okiyapi ecee kin hena heyapi; Wikoška aškatudan owanyag waštešte kin heca wicaštayatapi kin kicicahnigapi kta;

3 Qa wicaštayatapi kin iye tokiconze en makoce owasin ohnahna wowa wicašta wicakahnige kta, hecen hena wikoška  aškatudan owanyag waštešte kin iyuhpa Šušan tipi wašte kin en winohinca tipi kin ekta mnawicayapi kta, Hege wicaštayatapi taokiye winohinca awanwicayaka ecee kin he nape ihukuya; qa taku on ihduskapi kte cin wicaqupi kta.

4 Qa wikoška tukte wanji wicaštayatapi ista kin en wašte kinhan hee Vašti eekiya wicaštayatapi winohinca kta ce. Unkan wicoie kin he wicaštayatapi išta kin en wašte: unkan ecen econ.

5 Šušan tipi wašte kin ohna Jew wicašta wan yanka, qa caje kin he Mordecai, Jair cinhintku, Šimei cinhintku, Kiš cinhintku, Benjamin wicašta:

6 He qe Jerusalem eianhan wayaka ayapi, Jeconiah Judah wicaštayatapi wayaka ayapi qon he opeya ayapi, Nebuchadnezzar Babylon wicaštayatapi wayaka akiyahde ciqon he en.

7 Unkan he Hadassah icahkiya, Esther hee, iye dekšitku cunwintku; he atkuku qa hunku wanica nakaeš, unkan wicinyanna kin ouncaše wašte qa owanyag wašte: he atkuku qa hunku tapi qehan Mordecai iye cunwintku ye kta on ikikcu.

8 Hecen kaketu, wicaštayatapi oie qa tawokonze nahonpi qehan, qa wikoška ota Šušan conkaške kin ohna, Hege nape ihukuya, wicayuwitayapi qehan, Esther nakun wicaštayatapi tipi kin ekta ahipi, Hege winohinca awanwicayaka ecee kin nape kin en.

9 Unkan iye išta kin en wikoška kin he wašte, qa iye itokam wowacantkiye iyeya; hecen taku on ihduška kte cin hena ohankoya qu iyeya, taku tawa kte cin ahna, qa winyan ookiye šakowin wicaštayatapi tipi kin etanhan qupi kta iyecece cin hena koya: unkan iye qa ookiyewin tawa kin hena winohinca tipi ohna tuktcn iyotan wašte ekta ewicahnaka.

10 Esther iye taoyate qa takuwicaye cin hinyahin kpazo šni; Mordecai he ohdake šni ši nakaeš.

11 Unkan anpetu otoiyohi Mordecai  winohinca tipi hocoka kin itokam mani ece, Esther tanyan un hecinhan, qa taku ecakiconpi kte cin he sdonye kta.

12 Unkan wikoška  iyohi eca, Ahasuerus wicaštayatapi kin ekta ye kta, wi ake nonpa winohinca ohanpi kin cciyatanhan un qehan; (ihduškapi kta anpetu kin hecen hduštanpi ecee, wi šikpe myrrh ihdi unpi kin on, qa wi šakpe taku waštemna kin on, winohinca econpi ecee kin iyececa:)

13 Hehan wikoška  kin hecen wicaštayatapi kin en ya ece; iye winohinca tipi etanhan wicaštayatapi tipi kin ekta yuha ye kte cin taku da kin owasin qupi ecee.

14 Htayetu hehan iyaya, qa ihanhanna hehan winohinca tipi inonpa kin ekta hdicu, Šaašgaz wicaštayatapi taokiye winohinca tawa awanwicayake cin he nape kin ekta: ake icimana wicaštayatapi kin en ku šni, wicaštayatapi kin waštedake šni, qa cajeyan kico šni kinhan.

15 Unkan Esther Abihail cunwintku Mordecai  dekšitku, eqe cunwintku kta icu qon he wanna wicaštayatapi kin en ye kta iyehantu qehan, Hege wicaštayatapi taokiye winohinca awanwicayaka ecee kin he taku cajeyate cin heceedan da. Unkan Esther tona wanyakapi kin owasin išta kin en wowacantkiye iyeya ece.

16 Hecen Esther wicaštayatapi tipi kin ohna Ahasuerus wicaštayatapi kin ekta eyakupi, wi iwikcemna kin en, Tebeth wi kin hee, iye tokiconze wanryetu išakowin kin en.

17 Unkan wicaštayatapi kin winohinca owasin isanpa Esther waštekidaka, qa iye išta kin en wowacantkiye qa woiyokipi iyeya, wikoška iyuhpa isanpa: hecen wicaštayatapi tawapaha kin he iye pa kin akan ehnaka, qa Vašti eekiya wicaštayatapi winohinca kaga.

18 Hehan wicaštayatapi kin iye wicašta ihdawapi qa tawowidake owasin wayatkanpi tanka wan wicakicaga, Esther wayatkanpi tawa; qa makoce ounyanpi kin woozikiye wicaqu, wicaštayatapi tookihi eciyatanhan wawicaqu ece.

19 Unkan wikoška  inonpa mniciyapi hehan Mordecai  wicaštayatapi tatiyopa kin en iyotanka.

20 Esther nahanhin takuwicaye ca taoyate kin kpazo šni, Mordecai econ si qon iyececa: Esther Mordecai taku eye cin ecen econ nakaeš, kici icage ciqon he iyececa.

21 Anpetu kin hena en, Mordecai wicaštayatapi tatiyopa ohna iyotanka icunhan,Bigthan qa Tereš, wicaštayatapi taokiye nonpa tiyopa awanyakapi kin hena sihdapi, qa Ahasuerus wicaštayatapi kin nape ahnakapi kta akitapi.

22 Unkan wicoie kin he Mordecai sdonya, qa Esther wicaštayatapi winohinca kin okiyaka; unkan Esther Mordecai caje eciyatanhan wicaštayatapi kin okiciyaka.

23 Unkan wicoie kin he akitapi qehan iyeyapi, qa napin can wanji en otkewicayapi. Unkan he anpetu wicoie wowapi kin en owapi, wicaštayatapi kin itokam.

ESTHER WICOWOYAKE 3.

1 Wicoie kin dena iyohakam Ahasuerus wicaštayatapi kin Haman, Hammedatha cinhintku, Agagi kin heca, he tanka kaga, qa yuwankan iyeya, qa toiyotanke kin wicašta ihdawapi om un kin owasin wiciwankam ekicihde.

2 Unkan wicaštayatapi tawowidake wicaštayatapi tatiyopa ohna unpi kin owasin canpeška makehde inajinpi, qa Haman ohodapi ecee; iye on wicaštayatapi kin hecen econ wicaši nakaeš. Tuka Mordecai canpeška makehde inajin šni qa ohoda šni.

3 Hehan wicaštayatapi tawowidake wicaštayatapi tatiyopa ohna unpi kin hena Mordecai  heciyapi; Tokeca niye wicaštayatapi tawowasi kin acayakšin, he?

4 Unkan kaketu, anpetu eca heciyapi ecee, tuka anawicagoptan šni, hehan Haman okiyakapi, Mordecai oie kin ecetu kta hecinhan wanyakapi kta: he qe Jew heca wanna owicakiynka nakaeš.

5 Unkan Mordecai canpeška makehde inajin šni qa ohoda šni ecee he Haman wanyaka, hehan Haman wocanteptanye ojudan.

6 Tuka Mordecai išnana nape ahnake kta he ista en woiyokipi šni; Mordecai taoyate kin kipazopi nakaeš; heon etanhan Jewpi Ahasuerus tokiconze owancaya unpi iyuhpa, Mordecai taoyate kin hena ihangye wacin.

7 Wi tokaheya kin en, Nisan wi hee, Ahasuerus wicaštayatapi tawaniyetu iake nonpa kin en, anpetu eca Pur, oeconna econpi hee, Haman itokam ehpeyapi ece, qa wi otoiyohi en, iake nonpa, Adar wi kin hee, hehanyan.

8 Hehan Haman Ahasuerus wicaštayatapi kin heciya; Oyate wan enanakiya unpi, qa nitokiconze en makoce owasin ektakta oyate kin opeya yakonpi: unkan iye woope tawapi kin toktokeca, oyate owasin en, qa wicaštayatapi toope kin ahopapi šni ecee. Heon etanhan wicaštayatapi kin onsiwicada kta iyecetu šni.

9 Wicaštayatapi kin en he wašte kinhan, hena ihangyapi kta owapi kta: kinhan tona heconpi kta awanyakapi napepi kin en, miye mazaska woqin kektopawinge wikcemna wicawaqu kta, hecen wicaštayatapi tawomnayan kin en aupi kta ce.

10 Unkan wicaštayatapi kin iye nape etanhan mazanapcupe hdušdoka, qa Haman Hamedatha cinhintku Agagi kin, Jewpi tokawicaye cin he qu.

11 Qa wicaštayatapi kin Haman heciya; Mazaska kin he niye nicupi, oyate kin he nakun, niišta en taku wašte kinhan ecawicayecon kta ce.

12 Hehan wicaštayatapi wowapi kagapi tawa kin wicaki copi, wi tokaheya en anpetu iakeyamni hehantu; unkan Haman econ wicaši kin owasin iyecen wowapi wicakicašapi, wicaštayatapi taakicita tancanpi, qa makoce otoiyohi en wicašta itancan, kin, qa makoce owasin en oyate otoiyohi awanwicayakapi kin hena, iye wowapi kin eciyatanhan, qa oyate otoiyohi iye iapi kin en; Ahasuerus wicaštayatapi caje kin on owapi, qa wicaštayatapi tamazanapcupe kin on apuspapi ece.

13 Unkan wowapi kin hena inyankapi napepi on wicaštayatapi tamakoce kin owasin ektakta yeyapi, waihangye kta, wicakte kta, qa awihniiniwicaye kta, Jewpi owasin, aškatudan qa wanakaš wotapi, hokšiyopa qa winohincapi, anpetu wanjidan en, wi iake nonpa, Adar wi kin hee, anpetu iake yamni hehantu; qa tawahpayapi kin icupi kta.

14 Wowaši wowapi akta owapi makoce otoiyohi en wicaqupi kte cin he oyate owasin wicakiyaotaninpi, anpetu kin he itokam wiyeya unpi kta e heon.

15 Unkan inyankapi kin hena iyayapi, wicaštayatapi oie kin on yuinahniwicayapi: unkan wokonze kin he Šušan tipi wašte kin ohna kagapi. Hehan wicaštayatapi kin hee qa Haman wayatkan iyotankapi; tuka Šušan otonwe kin nagiyeya hinca.

ESTHER WICOWOYAKE 4.

1 Hehan Mordecai taku econpi kin owasin sdonye cehan, Mordecai wokoyake hduhdehdeca, qa wakihdaka cahota ko kicun, qa otonwe kin ocokaya ekta iyaye ca woceye tanka qa pa hinca on šicahowaya:

2 Qa wicaštayatapi tatiyopa kin hee kaeš itokam hiyu: wakihdaka unpi tuwedan wicaštayatapi tatiyopa kin ohna tin hiyu kte šni nakaeš.

3 Nakun makoce owasin tukten wicaštayatapi oie qa tawokonze kin ee hi kin en, Jewpi ehna wicaceya tanka, qa wote šni unpi, qa ceyapi, qa šicahowayapi, qa wicota wakihdaka cahota ko ohna wankapi ecee.

4 Hecen Esther tawikoška kin iye en hipi, tawowidake kin nakun he okiciyakapi. Hehan wicaštayatapi winyan kin iš nina iyokišica,qa wokoyake Mordecai koyake kta e kaye wicaši, qa wakihdaka kin ekiciyakupi kta: tuka iye icu šni.

5 Hehan Esther Hatach, wicaštayatapi tawowidake wan, itokam najin ši qon he kico, qa Mordecai ekta ye ši, he taku he, qa tokeca hecinhan, he sdonye kta.

 6 Hecen Hatach tankan iyaya, Mordecai ekta, otonwe hocoka kin ohna, wicaštayatapi tatiyopa kin itokam hetu.

7 Unkan Mordecai taku akipe cin owasin he okiyaka, qa mazaska oyakapi, tona Haman wicaštayatapi mazaska opiye tawa kin en, Jewpi on ehpeye kta keye cin, hena ihangyapi kta e heon.

8 Nakun wokonze wowapi owapi wan, ihangwicayapi kta on Šušan ekta wicaqupi qon he qu, Esther kipazo kta, qa okiyake kta, qa wicaštayatapi kin ekta ye si kta, cekiye kta, qa iye taoyate on wocekiye ekiciye kta.

9 Unkan Hatach hdicu qa Mordecai oie kin Esther okiyaka.

10 Akeš Esther Hatach kici ie ca Mordecai ekta ye ši:

11 Wicaštayatapi tawowidake owasin, qa makoce wicaštayatapi tawa en oyate kin he de sdonyapi ecee, tuwe kašta, wicašta qa winohinca owasin, kicopi šni kinhan, hocoka mahentu kin en wicaštayatapi kin ekta tin hiyu kinhan, on tawokonze wanjidan, he ktepi kta; tuwe wicaštayatapi nikiye kta on mazaskazi sagye kin kipazo šni kinhan. Tuka miye qe wanna anpetu wikcemna yamni hehanyan wicaštayatapi kin ekta u mašipi šni ce.  

12 Unkan Esther oie kin Mordecai okiyakapi.

13 Hehan Mordecai Esther decen ayuptapi kta keya: Jewpi iyuhpa isanpa niye wicaštayatapi tipi ohna tanhan nayašdoke kta ninagi en kecin šni wo:

14 Dehantu hin niye ocowasin inina yaun kinhan, wowanikiye qa woehdaku Jewpi kin tokantanhan en wicahi kta; tuka niye qa niyate tipi kin ihanšniyanpi kta; unkan taku dececa on wicaštayatapi toyanke kin en yahi hecinhan tuwe sdonya he?  

15 Hehan Esther Mordecai decen ayuptapi kta keya:

16 Ye ca Jewpi Šušan en ounyanpi kin iyuhpa mniciye wicaši ye, qa miye on wote šni un pe, qa anpetu yamni wotapi šni qa wayatkanpi šni pe, hanyetu qa anpetu: miš eya wikoška mitawa koya wote šni unyakonpi kta: unkan hecen wicaštayatapi kin en mde kta, he woope kin eciyatanhan šni qeyas: qa hecen mate cinhan mate kta ce.

17 Unkan Mordecai  iyaye ca Esther taku econ si qon owasin ohnayan yustan.

ESTHER WICOWOYAKE 5.

1 Unkan anpetu iyamni qehan kaketu, Esther wicaštayatapi ihduze ca wicaštayatapi tahocoka mahentu kin ohna inajin, wicaštayatapi tipi kin iyotakonza: unkan wicaštayatapi kin he wicaštayatapi tipi ohna wicaštayatapi toiyotanke kin akan kiyotanka yanka.

2 Unkan kaketu, wicaštayatapi kin Esther wicaštayatapi winohinca hocoka ohna najin wanhdake cehan, iye išta en wocantekiye iyeya: unkan wicaštayatapi kin mazaskazi sagye nape ohna hduhe cin he Esther kipazo. Hecen Esther kiyedan u qa sagye pa kin yutan.

3 Hehan wicaštayatapi kin heciya; Esther wicaštayatapi winohinca, taku yacin he? qa yada kte cin he taku he? wokiconze kin hanke hehanyan kinhan nicupi kta ce.

4 Hehan Esther heya ayupta; Wicaštayatapi kin en wašte kinhan, wayatkanpi wan anpetu kin de wicaštayatapi wecage cin he en Haman kici u kta ye.

5 Hehan wicaštayatapi kin heya; Haman inahnikiya po, hecen Esther oie kin ohnayan econ kta. Hecen wicaštayatapi kin he qa Haman wayatkanpi Esther ka e ciqon he en hipi.

6 Unkan miniša yatkanpi kin en wicaštayatapi kin Esther heciya; Wocekiye nitawa kin tukte e he? kinhan nicupi kta: qa taku yada kte cin tukte e he? wokiconze hanke kin hehanyan ecen ecaniconpi kta ce.

7 Hehan Esther ayupte ca heya; Mitawocekiye qa taku wada kin;

8 Wicaštayatapi išta kin en wocantekiye iyewaye cinhan, qa mitawocekiye ayupte kta wicaštayatapi waštedake cinhjin, qa taku wada kin ecen econ kta hecinhan, wicaštayatapi qa Haman wayatkanpi wicawecage kte cin he ekta upi kta, kinhan wicaštayatapi eye cin he heyakecinhan ecen ecamon kta ye.

9 Hehan anpetu kin he Haman wiyuškin, qa hetanhan cante wašteya kihda: tuka Mordecai wicaštayatapi tatiyopa ohna, iye on najin šni qa ihduškanškan šni Haman wanyake cehan, hehan Mordecai  on Haman nina canteptanyan.

10 Tuka Haman tinšiciya: unkan iye tipi kin ekta ki qehan yewicaši, qa iye takuwicaye cin wicakico,qa tawicu Zereš nakun.

11 Qa Haman iye towijice wowitan kin owicakiyaka, qa cinca wicota nakun, qa taku owasin on wicaštayatapi yuwankan iyeya, qa wicaštayatapi tawowidake qa wicašta ihdawapi kin hena wiciwankam ehnake cin.

12 Nakun Haman heya; Han, Esther wicaštayatapi winohinca kin he wayatkanpi ka e cin tuwedan wicaštayatapi kin kici en ya iyowinkiye šni, tuka mišnana; qa heyakecinhan nakun wicaštayatapi kin kici iye en micopi;

13 Tuka dena owasin taku šni wadake, tohanyan Mordecai Jew kin wicaštayatapi tatiyopa en iyotanka waumdakc cinhan.

14 Hehan tawicu Zereš qa takuwicaye cin owasin heciyapi; Can wan obosdatu wicišpa wikcemna zaptan kin he kapipi kta, qa heyakecinhan Mordecai  he en otkeyapi kta wicaštayatapi kin keyakiye kta; hehan wayatkanpi kin en wicaštayatapi kici wiyuškinyan ya wo. Unkan wicoie kin he Haman waštedaka: hecen can kin he kah wicaši.

ESTHER WICOWOYAKE 6.

1 Hanyetu kin he en wicaštayatapi kin ištinma okihi šni, qa anpetu wicoie wowapi owapi qon he ahiwicaši: unkan wicaštayatapi kin itokam hena yawapi.

2 Unkan Bigthana qa Tereš, wicaštayatapi tawowidake nonpa, tiyopa awanyakapi ecee qon, hena Ahasuerus wicaštayatapi kin nape ahnakapi kta akitapi qon he en owapi iyeyapi, he Mordecai oyake ciqon.

3 Unkan wicaštayatapi kin heya; De on taku wowitan qa i woyuonihan Mordecai ecakieonpi he? Hehan wicaštayatapi tawowidake en okiyapi ecee kin hena heciyapi; Takudan ecakiconpi šni ce.

4 Hehan wicaštayatapi kin heya; Tuwe hocoka kin en un he? Wanna Haman wicaštayatapi tipi hocoka tankantu kin en hi, can wan kicage cin en Mordecai otkeye kta e wicaštayatapi keciye kta e heon.

5 Unkan wicaštayatapi tawoI widake kin heciyapi; Iho, Haman hocoka kin en najin ce. Unkan, Tin u kta ce, wicaštayatapi kin eya.

6 Hecen Haman timahen hi. Unkan wicaštayatapi kin heciya; Tuwe wicaštayatapi yuonihan kta iyokipi kin he taku ecakiconpi kta iyececa he? Unkan, Tuwe miye kin isanpa wicaštayatapi kin yuonihan iyokipi kta he? Haman cante ekta ecin.

7 Hehan Haman wicaštayatapi kin ayupta; Wicašta tuwe wicaštayatapi yuonihan iyokipi kin,

8 He on wicaštayatapi tawokoyake wicaštayatapi un ecee, qa šuktanka wicaštayatapi akan iyotanka ecee kin, qa wicaštayatapi tawapaha iye pa kin akan ehnakapi ecee kin hena aupi kta;

9 Qa wokoyake qa šuktanka kin hena wicašta ihdawa iyotanpi wicaštayatapi tawa wanji nape en qupi kta, hecen wicašta kin tuwe wicaštayatapi kin yuonihan iyokipi kin he koyngyapi kta, qa šuktanka akan otonwe canku kin opta hiyuyapi kta, qa itokam, Wicašta kin tuwe wicaštayatapi yuonihan iyokipi kin he decen ecakiconpi ecee kta ce, eya eyanpahapi kta ce.

10 Hehan wicaštayatapi kin Haman heciya; Inahni wo, wokoyake kin he, qa šuktanka kin icu wo, ehe cin iyececa, qa Mordecai Jew kin, wicaštayatapi tatiyopa en iyotanke cin he iyecece hinca ecakicon wo: taku tona ehe cin wicoie wanjidan ecetu šni wanice kta.

11 Hehan Haman wokoyake qa šuktanka kin icu, qa Mordecai koyagya, qa otonwe canku kin ohna šuktanka akan iyotangkiya, qa itokam eyanpaha, Wicašta tuwe wicaštayatapi yuonihan kta iyokipi kin he decen ecakiconpi kta ce.

12 Unkan Mordecai wicaštayatapi tatiyopa kin en hdi. Tuka Haman iye tipi ekta inahni ceya kihda, qa pa ahdahpa.

13 Unkan Haman iye tawicu Zereš qa takuwicaye cin taku akipe cin owasin owicakiyaka. Hehan wicašta ksapapi tawa qa tawicu Zereš hena hecen eciyapi; Mordecai itokam hinhpaye niyanpi kin eqe Jewpi wicoicage kin etanhan hecinhan, niye ohiyaye kte šni, tuka hinhpayapi on nihinhpaye kta ce.

14 Unkan kici wohdakapi icunhan, wicaštayatapi tawowidake kin hena hipi, qa Esther wayatkanpi kage cin ekta inahni yeyapi.

ESTHER WICOWOYAKE 7.

1 Hehan wicaštayatapi qa Haman Esther wayatkanpi kage cin en hipi.

2 Unkan miniša yatkanpi anpetu inonpa kin en wicaštayatapi kin ake Esther heciya; Esther wicaštayatapi winohinca, nitawocekiye kin tukte e he: unkan aniyuptapi kta: qa taku yada kin tukte e he; kinhan ecaniconpi kta ce, wokiconze hanke kta hehanyan.

3 Hehan Esther wicaštayatapi winohinca kin waayupte ca heya; Wicaštayatapi, niišta en wowaonšida iyewaye ca wicaštayatapi kin iyokipi kinhan, wani kte cin he mitawocekiye on maqupi kta, qa wada on mitaoyate kin hena:

4 Wiyopeunkiyapi nakaeš, miye qa mitaoyate, ihangwicayapi kta, wicaktepi kta, qa atakunipi kte šni heon. Tuka wicašta wowidake qa winyan wowidake kin heca kta wiyopeunkiyapi unkanš inina waun kta tuka; toka kin wicaštayatapi taku akicitakuni šni kin yuwašte okihi šni qeyaš.

5 Hehan Ahasuerus wicaštayatapi kin waayupte, qa Esther wicaštayatapi winohinca kin heciya; He tuwe he, qa tukten un he, cante on hecen econ wacin kta he?

6 Unkan Esther heya; Wicašta wawakipajin qa štoka kin Haman šice cin dee ye, eya. Hehan wicaštayatapi qa wicaštayatapi winohinca kin wicitokam Haman nihinciya.

7 Hehan wicaštayatapi tošinhda on miniša yatkanpi kin etanhan najin hiyaya, tipi wašte mahcistinna kin ekta. Unkan Haman iye nagi on Esther itokam cekiya inajin; wicaštayatapi kin en wanna taku šica kiciyuštanpi wanyaka nakaeš.

8 Hehan wicaštayatapi kin tipi tanka tawoju kin etanhan miniša yatkanpi owanka kin en hdi; unkan owinja Esther akan wanke cin he Haman ahinhpaya yanka. Hehan wicaštayatapi kin heya; Nakun tipi ohna mitokam wicaštayatapi winohinca kin kikšan kta he? Wicoie kin he wicaštayatapi i kin etanhan enanpe cehan Haman ite akahpapi.

9 Hehan Harbonah, wowidake wanji iš wicaštayatapi kin itokam heya; Can kin wicišpa wikcemna zaptan wankantu, Haman Mordecai kicaša, eqe wicaštayatapi taku wašte eciya tuka, he Haman tipi kin ohna han e wanyaka ye. Hehan wicaštayatapi kin heya; En otkeya po.

10 Kinhan iyepi Haman otkeya en can kin iye on Mordeai yuwiya kiya. Hehan wicaštayatapi kin wocanniye yuwašte un.

ESTHER WICOWOYAKE 8.

1 Anpetu kin he en Ahasuerus wicaštayatapi kin Haman Jewpi tokawicaye cin hee tiyohnaka tawa kin Esther wicaštayatapi winohinca kin qu. Unkan Mordecai wicaštayatapi kin itokam hi; token takuye cin he Esther okiyaka nakaeš.

2 Unkan wicaštayatapi kin mazanapcupe Haman ekicihdaku qon he hdušdoka qa Mordecai qu. Unkan Esther Haman tipi kin en Mordecai itancan kaga.

3 Unkan Esther akihdeye ca wicaštayatapi kin itokam ie ca šiha kin en makata ehpeiciye ca Haman Agagi kin taku šica kajie ca woawacin Jewpi kin awicawakicin kin he yutokan iyeye kta e ceya icekiya.

4 Hehan wicaštayatapi kin mazaskazi sagye kin Esther kipazo. Hecen Esther najin hiyaye wicaštayatapi kin itokam inajin:

5 Qa heya; Wicaštayatapi kin en he wašte kinhan, qa iye itokam wocantekiye iyewaye cinhan, qa wicoie kin he wicaštayatapi kin itokam owotanna kinhan, qa iye išta en miye mawašte kinhan, Haman Hammedatha cinhintku, Agagi kin, Judah oyate wicaštayatapi tamakoce owasin ohna unpi kin hena ihangye kta on wowapi kage ciqon, wokonze kin he ecetu šni ye kta e wowapi kagapi nunwe:

6 Ecin token owakihi kta, qa mitaoyate taku šica awicau kta en ewatonwe kta he? qa token owakihi kta, qa mitakuye ihangyapi kta wanmdake kta he?

7 Hehan Ahasuerus wicaštayatapi kin Esther wicaštayatapi winohinca qa Mordecai Jew kin hewicakiya; Wanyaka wo, Haman tiyohnaka kin wanna Esther waqu; unkan iye hinca can wan en otkeyapi, Jewpi nape awicahnake cin heon etanhan.

8 Nakun niyepi, token iyonicipipi, hecen Jewpi on wowapi kaga po, wicaštayatapi caje en, qa wicaštayatapi mazanapcupe tawa on apuspa po: wowapi kin tukte e wicaštayatapi caje en kagapi, qa wicaštayatapi mazanapcupe tawa on apuspapi kinhan tuwedan ecetu šni ye kte šni ece.

9 Hehan anpetu kin he en wicaštayatapi wowapi kagapi tawa kin hena wicakieopi, wi iyamni kin en, Sivan wi kin hee, anpetu wikcemna nonpa sanpa iyamni kin hehantu; unkan wowapi, Mordecai token econwicaši kin owasin eciyatanhan, Jewpi, qa wicaštayatapi, qa wicašta ihdawapi, qa India etanhau Ethiopia hehanyan makoce en itancanpi, makoce opawinge sanpa wikcemna nonpa sanpa šakowin, wowapi wicakicagapi; makoce otoiyohi tawowapi kin eciyatanhan, qa oyate otoiyohi iapi tawapi eciyatanhan, qa Jewpi iye tawowapi qa iapi tawapi kin eciyatanhan.

10 Unkan Ahasuerus wicaštayatapi caje kin en wowapi kaga, qa wicaštayatapi mazanapcupe tawa kin on apuspa ecee: qa wowapi kin hena inyankapi napepi on yeya, stiktanka akan iyotankapi, šonšonna akan, cankahupajo akan, dromedary cincapi akan.

11 He on wicaštayatapi kin Jewpi otonwe otoiyohi en unpi kin hecen wicaqu, witaya mniciyapi kta, qa iye nagipi on najinpi kta, waihangye kta, wicakte kta, qa makoce, qa oyate tona takpe wicaupi kin he wowašake ocowasin yutakuni kte šni, hoksiyopa qa winohinca, qa tawahpaya kin icupi kta;

12 Anpetu wanjidan en, Ahasuerus wicaštayatapi tamakoce iyuhpa ohnahna, wi iake nonpa, Adar wi kin hee, anpetu iakeyamni kin en.

13 Wowapi owapi woope on makoce owasin en wicaqupi kin he oyate iyuhpa wicakiyaotaninpi, qa Jewpi kin hena anpetu kin he en tokawicayapi kin towicakiconpi kta ihduwitayapi kta.

14 Inyankapi kin hena šonšonna cankahupajo ko akan yanka iyayapi, wicaštayatapi oie on wicayuduzahanpi, qa inatini wicayapi. Unkan Šušan tipi wašte kin en woope kin he wicaqupi.

15 Hehan Mordecai wicaštayatapi tawokoyake to qa ska, qa mazaskazi watešdake tanka wan un, qa šina wan ska qa duta in, wicaštayatapi kin etanhan iyaya. Unkan Šušan otonwe kin wiyuškin qa cante wašte hinca.

16 Unkan Jewpi kin iyoyanpa, qa cante waštepi, qa wowiyuškin qa woyuonihan yuhapi.

17 Unkan makoce otoiyohi en, qa otonwe otoiyohi en, tukte etu wicaštayatapi oie qa toope kin ekta hi eca, Jewpi kin wowiyuškin qa wicocantc wašte, wotapi qa anpetu wašte yuhapi ece. Unkan makoce oyate kin ota Jewpi icagapi: Jewpi oyate tawokokipe kin awicahinhpaya nakaeš.

ESTHER WICOWOYAKE 9.

1 Unkan wi iake nonpa kin en, Adar wi kin hee, anpetu iakeyamni kin en, wicaštayatapi oie qa toope wanna econpi kta kiyedan aye cehan, anpetu kin he en tokawicayapi kin hena Jewpi kin wicaktepidan kta kecinpi tuka qon ešta he yuecetupi šni, (qa Judah oyate kin tona šice wicadakapi qon hena wicaktepidan:)

2 Jewpi kin Ahasuerus wicaštayatapi tamakoce kin owasin ohnahna, iye totonwepi kin en mniciyapi, tona kiunniwicaye wacinpi tuka qon hena nape awicaputakapi kta: unkan tuwedan wicitkokim najin okihi šni; hena kowicakipapi kin oyate owasin awicahinhpaya nakaeš.

3 Unkan makoce kin ohnahna wicaštayatapi owasin, qa wicašta ihdawapi, qa wicašta itancanpi, qa wicaštayatapi taakicita kin Jewpi owicakiyapi ecee: Mordecai kokipapi kin awicahinhpaya nakaeš.

4 Mordecai wicaštayatapi ti kin ohna tanka nakaeš, qa tawootanin makoce owasin ektakta iyaya. Mordecai wicašta kin de icage ca tanka aya ece.

5 Hecen Jewpi tona tokawicayapi kin iyuhpa mazasagye apapi qa wicaktepi, qa ihangwicayapi on awicapapi, qa token tawacinpi tona šicewicadakapi qon ecawicakiconpi ece.

6 Unkan Šušan tipi wašte kin ohna Jewpi kin wicašta opawinge zaptan ecetu wicaktepi qa ihangwicayapi.

7 Qa Paršandatha, qa Dalphon, qa Aspatha,

8 Qa Poratha, qa Adalia, qa Aridatha,

9 Qa Parmašta, qa Arisai, qa Aridai, qa Vajezatha,

10 Haman Hammedatha cinhintku, Jewpi tokawieaye ciqon he cinca wikcemna kin hena wicaktepi; tuka tawatipayapi kin nape ahnakapi šni.

11 Anpetu kin he en tona Šušan tipi wašte kin en wicaktepi wicayawapi kin he wicaštayatapi kin itokam ahipi.

12 Hehan wicaštayatapi kin Esther wicaštayatapi winohinea kin heciya; Šušan tipi wašte kin ohna Judah wicašta kin wicašta opawinge zaptan wicaktepi qa ihangwicayapi, qa Haman cinhintku wikcemna kin hena: wicaštayatapi tamakoce unmapi kin ohnahna taku econpi he? wanna nitawocekiye tukte e he? unkan aniyuptapi kta: qa taku sanpa yada kin tukte e he? kinhan ecen ecanicicoupi kta ce.

13 Unkan Esther heya; Wicaštayatapi kin en he wašte kinahan, anpetu kin de wokonze kin he iyecen nakun Jewpi Šušan en unpi kin heyakccinhan iyecen econpi kta e wakiconzapi nunwe, qa Haman cinhintku wikcemna kin hena can akan otkewicayapi kta ye.

14 Unkan wicaštayatapi kin hecen econpi kta keya: qa wokonze kin he Šušan en wicaqupi: unkan Haman cinca wikcemna kin hena otkewicayapi.

15 Hehan Jewpi Šušan en unpi kin hena Adar wi kin anpetu iake topa kin en nakun witaya iheyapi, qa Šušan ohna wicašta opawinge yamni wicaktepi; tuka tawahpaya kin nape ahnakapi šni.

16 Tuka Jewpi unmapi wicaštayatapi tamakoce kin ohnahna unpi kin hena widwitaya mniciyapi, qa iye nagipi on najinpi, qa tokawicayapi kin etanhan oziiciyapi, qa tokapi kin kektopawinge wikcemna šakowin sanpa kektopawinge zaptan wicaktepi, tuka tawahpayapi kin nape ahnakapi šni;

17 Adar wi kin anpetu iakeyanini kin en; qa anpetu iaketopa kin en oziiciyapi, qa wotapi, qa wiyuškinpi anpetu kagapi.

18 Tuka Jewpi Šušan en unpi qon hena anpetu iakeyamni qa nakun anpetu iaketopa kin en witaya iheyapi; qa anpetu iakezaptan kin en oziiciyapi, qa he wotapi anpetu qa wiyuškinpi kagapi.

19 Heon etanhan Jewpi makomdaye otonwe kin ohna, otonwe acankaškanpi šni ohnahna tipi kin hena Adar wi anpetu iaketopa kin he wiyuškinpi qa wotapi qa anpetu wašte kagapi, qa otoiyohi taku kicicupi ece.

20 Unkan Mordeca wicoie kin dena owa, qa Jewpi Ahasuerus wicaštayatapi tamakoce ohnahna unpi kin owasin wowapi wicakicaga, kiyedan qa tehan unpi kin.

21 Oinaka owasin en, Adar wi kin anpetu iaketopa qa nakun anpetu iakezaptan kin ahopapi kta e wicakiciyustan kta:

22 Anpetu kin hena en Jewpi kin tokawicayapi etanhan oziiciyapi, qa wi kin he woiyokišice etanhan wowiyuškin iwicakicaga, qa wicaceya anpetu wašte icage ciqon: heon anpetu kin hena wotapi qa wowiyuškin kagapi kta, qa otoiyohi taku kicicupi kta, qa wahpanica wawicaqupi ecee kta.

23 Unkan Jewpi kin he ohnayan econpi ecee kta icupi, qa Mordecai wowapi wicakicage cin he ohnayan.

24 Haman Hammedatha cinhintku, Agagi kin, Jewpi owasin tokawicaye ciqon, Jewpi kin ihangwicaye kta awacin, qa on Pur ehpeya, oeconna hee, on wicayutakuni kte šni qa ihangwicaye kta e heon.

25 Tuka iye Esther wicaštayatapi kin itokam hiyu qehan, eqe woawacin šica Jewpi wicakiconza qon he iye pa kin en hdihpaye kta, qa iye hinca cincawicaye cin hena koya can en otkewicayapi kta e wowapi on econwicaši.

26 Heon etanhan anpetu kin dena Purim eya cajeyatapi, Pur caje kin he eciyatanhan. Heon etanhan wowapi kin de wicoie owasin on, qa de on taku wanyakapi, qa taku akipapi kin on etanhan,

27 Jewpi wakiconzapi, qa iyepi hinca on icupi qa iye cincapi kin on, qa nakun tona en ihdaškapi kin hena owasin on, qa ecetu šni wanice kta, heeen anpetu dena oza wowapi iyecen opapi kta, qa waniyetu owasin en omaka iyehantu kin eciyatanhan:

28 Qa anpetu kin dena kiksuyapi kta, qa wicoicage qa wicoicage kin en opapi kta, wicowazi qa wicowazi, makoce qa makoce, otonwe qa otonwe kin en: qa Purim anpetu kin dena Jewpi kin en ecetu šni wanice kta, qa okiksuye kin iye cincapi kin etanhan atakuni šni wanice kta.

29 Hehan Esther Abihail cunwintku, wicaštayatapi winohinca kin he, qa Mordecai Jew kin wowašake ocowasin on wowapi kagapi, Purim wowapi inonpa kin de yušutapi kta.

30 Unkan wowapi kin hena Jewpi owasin ekta yeya, Ahasuerus tokiconze kin en, makoce opawinge sanpa wikcemna nonpa sanpa šakowin ekta, wookiye qa wowicake oie;

31 Purim anpetu kin dena yušutapi kta, omaka iyehantu eca, Mordecai Jew kin qa Esther wicaštayatapi winohinca econ wicašipi kin iyececa, qa iyepi hinca on qa iye cincapi on iciconzapi qon he eciyatanhan, wotešni unpi qa howayapi wicoie kin hena.

32 Unkan Esther wakiconze cin he Purim oie kin dena yusuta: Unkan wowapi en kagapi.

ESTHER WICOWOYAKE 10.

1 Unkan Ahasherus wicaštayatapi kin he wicohtani wan maka kin ahnaka, qa miniwanca wita kin akan.

2 Unkan iye towašake qa tookihi ohan kin owasin, qa Mordecai tanka oyakapi, on wicaštayatapi kin yutanka qun hena Media qa Persia wicaštayatapi anpetu iyohi wicoie wowapi kin en owapi šni he?

3 Mordecai Jew kin Ahasuerus wicaštayatapi kin iyokihe yanka, qa Jewpi kin en tanka, qa iye hunkawanjitku wicota iyokipipi, iye taoyate towašte kin akita, qa wicoicage tawa kin iyuhpa wookiye ewicakiya ece.

Wicaceya (Lamentations)

WICACEYA.

WICOWOYAKE 1.

1 Tokiyatanhan otonwe oyate ojudan qon he išnana iyotanka he! oyate kin ehna tanka tuka qon he wiwazica iyecen icaga: makoce kin ehna wicaštayatapi winohinca yanke ciqon he kajujukiyapi ihukuya yanka!

2 Ceya ece, hanyetu kin en ceya yanka; qa tapon akan ištaminigaga yukan; waštedakapi qon owasin etanhan magagaye kte cin wanica takuwicaye ciqon hena iyuhpa hnayanpi, hena toka icagapi.

3 Wokakisye qa wowidagyapi ota on etanhan Judah unhdaka iyaya: Ikcewicašta oyate kin om ounyan, woozikiye iyeye ni: paši yapi kin owasin okiyute kin en ehdegapi.

4 Zion tacanku kin ceyapi, tomniciye wakan kin ekta tuwedan u šni nakaeš: totonwe tiyopa kin owasin ihangyapi: wawayušnapi tawa kin hena comnihdazipi ece, witanšnatawa kin hena kakišyapi, qa iye hinca wopazeca en un.

5 Wakakišye cin hena itancan icagapi, tokayapi kin hena tanyan unpi: wahtani ota kin heon etanhan Jehovah iyokišinya nakaeš: tašiceca kin wakakisya ite kin itokam wayaka awicayapi.

6 Qa Zion cunwintku kin towanyagwašte qon ocowasin ayuštan: wicašta itancan tawa kin hena tawiyedan wihanpi iyeye šni kin iyececapi, qa wicapasi kin itokam wowašake codan iyayapi.

7 Wokakisye anpetu tawa qa tokakije kin en, Jerusalem wanakaja anpetu kin en taku waštešte yuhe ciqon hena kiksuya; tokayapi nape en ohinhpaya qa tuwedan okiye šni, hehan toka kin wanyaka, woihangye tawa kin on ihahapi.

8 Jerusalem wahtani hinca, heon wayaka iyaya; tona yuonihanpi qon owasin šicedakapi, towištece kin wanyakapi nakaeš: han, iye hinca comnihdazi qa hiklam ihdohda.

9 Tošice kin he tašina en un; owihauke tawa kin kiksuye šni: heon etanhan wowinihanyan hinhpaya; wicakicanpte takudan yuhe šni. Jehovah, kukismayanpi kin wanyaka ye; toka kin ihdutanka hinca nakaeš.

10 Taku cinpica tawa qon owasin toka kin nape ayumdaya; iye wanyaka nakaeš; ikcewicašta oyate kin tipi wakan tawa kin en yapi qehan; niye ekta omniciye kin en upi kte šni, kewicayakiya tuka qon.

11 Oyate tawa iyuhpa comnihdazipi, aguyapi akitapi; taku tehike hinca yuhapi kin woyute on tokiyopeyapi, na i nikiyapi kta heon: Jehovah wanyaka wo, qa awacin wo, miye wahte šni imacaga nakaeš.

12 Canku ohna idadapi owasin, niye initokecapi šni he: Tonwan po qa wanyaka po, woiyokišice wan woiyokišice mitawa en mau kin iyececa yukan hecinhan, on Jehovah tocanteptanye anpetu kin en kakismaye ciqon.

13 Wankantanhan niahuhu kin en peta u ši, unkan mahen iyaya; onhmunkapi wan miš iha emakionpa; hekta hdicumayan: anpetu ocowasin atakuni ini cante šica emahnaka ece.

14 Miohan šica can napinpi kin he iye nape kin on iyakaškapi; hena pahmonpi, mitahu akan u: mitowašake kin awihnunimakiya: Itancan kin wicanape kin en emahnaka; najin owakihi kte šni.

15 Itancan kin wašakšakapi mitawa kin owasin micokaya awicanajin: mitokam ozuye wan wicakico, koška mitawa wicukamdecapi kta: miniša iyuskice wan ohna Itancan kin Judah cunwintku wikoška  kin naskica ece.

16 Hena on miye waceya; Miišta, miišta etanhan minigaga au; wicakicanpte kin tuwe minagi yuecetu kte ciqon he mitehanyan yanka nakaeš; micinkši awihnunipi, toka kin ohiya nakaeš.

17 Zion nape hdugata; wicakicanpte kiwanica; Jehovah Jacob on hecen wakiconza, ihdukšan unpi kin hena wakakisyapi kta: hena owicapeya Jerusalem winohinca išnati kin iyececa.

18 Jehovah iye hinca owotanna; miye i en iyewaya nakaeš: Ceciciyapi ce, oyate owasin onahon po, qa mitoiyokišice kin wanyaka miye: wikoška  iaitawa qa koška mitawa wayaka iyayapi.

19 Cantemakiyapi qon hena wicawakipan; hena mahnayanpi: Wawayušnapi mitawa qa hunkayapi mitawa otonwe kin en tapi, woyute on nagi hduecetuyapi kta e okidepi icunhan.

20 Jehovah wanyaka wo, wokakije en maun nakaeš: mitezi nina škanškan; tanmahen micante ihduptanye; miye nina hin wawakipajin nakaeš: tankan mazasagye kin cincodan ehpewicaya, timahen wiconte iyececa.

21 Comniwahdazi kin he nahonpi; wicakicanpte kin manica: tokamayanpi kin owasin taku šica mitawa onabonpi; niye hecanon kin on iyuškinpi: Niye anpetu cajedate ciqon he ayahi kta; unkan iye iyemaceca unpi kta.

22 Taku šica tawapi kin ocowasin niye nitokam u nunwe: qa wawabtani owasin on token ecamiyecon kin he iyecen ecawicakicon wo: comniwahdazi kin hena ota, qa micante wankadan pakaeš.

WICACEYA WICOWOYAKE 2.

1 Tokiyatanhan Itancan kin iye tocanteptanye en Zion cunwintku kin mahpiya sapa on akabpa he: Israel toiyokipi kin he mahpiya eciyatanhan makata ehpeya: qa tocanteptanye anpetu kin en siha oahe tawa kin kiksuye šni.

2 Itancan kin wanapca iyeya, qa Jacob ounye cin iyuhpa onšikida šni: tošinhda en Judah cunwintku taconkaške suta kin yujuju; hena makata ehpeya: wokiconze kin he qa wicašta itancan tawa kin wicayušica.

3 Tocanteptanye wohitike en Israel he kin ocowasin kaksa: toka kin itokapatanhan nape etapa kin ehdaku; hecen Jacob aide kiya, peta itkon iyececa, ihduksan huhnahya ece.

4 Tinazipe kin nakiwinja, toka kin iyececa; wawakipajin wan iyecen nape etapa hduš najin; qa tona owanyag waštešte kin; owasin Zion cunwintku tawakeya ohna wicakte: tošinhda hdaštan, peta iyececa.

5 Itancan kin toka wan iyececa; Israel ihangya, tipi waštešte tawa kin iyuhpa ihangya: taconkaške šuta kin yujuju, qa Judah cunwintku kin en wicoiyokišice qa wicaceya nina yuota.

6 Qa maga iyecen ihdukšan canokaške kin hdujunjun; omniciye tipi kin hena ihangkiya: Zion en omniciye wakan qa anpetu wakan kin hena Jehovah akiktonsyeya, qa tocanteptanye wohitike cin en wicaštayatapi wawayušna ko wahtewicada šni.

7 Itancan kin he owayušna tawa ehpekiya: tipi wakan tawa kin waštekida šni: tipi waštešte tawa conkaške  kin hena toka nape kin en wicaqu: Jehovah tipi kin ohna ho hiyuyapi, omniciye anpetu kin en iyececa.

8 Zion cunwintku taconkaške  kin he Jehovah ibangya awacin: ikan wan ayuštan, ihangya etanhan nape ehdaku šni: heon ctanhan ihdukšan maka qapi qa conkaške  kin hinhpayekiya; ptaya ocowasin atakuni šni.

9 Otonwe tiyopa tawa kin maka mahen iyaya: inatake tawa ihangya qa yukšakša: wicaštayatapi tawa qa wicašta itancan wicayuha qon hena Ikcewicašta ehna unpi: woope kin wanica: nakun wicašta wokcanpi tawa kin hena Jehovah etanhan wowanyake takudan yuhapi šni.

10 Makata iyotankapi, Zion cunwintku hunkayapi tawa kin inina unpi: pa akan maka aihpeiciyapi: wakihdaka ipiyag kitonpi: Jerusalem tawikoška kin makata pamahdedan unpi.

11 Ištamnihanpe on miišta atakuni šni, mitezi škanškan, mapi kin he makata papsonpi, mitaoyate cunwintku ihangyapi kin heon etanhan; šiceca qa hokšiyoqopa otonwe canku kin ohna hanyanpi qehan.

12 Wicašta taopi iyecen otonwe canku kin ohnahna ihpayapi qehan, Aguyapi qa miniša tukte e hunkupi ewicakiyapi? iye inayapi maku kin ohna nagi kpapsonpi qehan.

13 Taku e akta ociciyake kta he? Jerusalem cunwintku, taku iciyacin kta he? taku e iyececa cidake kta, hecen cantohnagciye kta he, wikoška  Zion cunwintku? ihanšniyanpi kin he tanka, miniwanca kin iyececa mikues: tuwe okiziniyan okihi kta he?

14 Wicašta wokcanpi nitawa woitonšni qa wowitkotkoke wanniciyakapi; tuka wayahtanipi kin niciyataninpi šni, wayaka yaunpi kin yahomnipi kta: tuka woitonšni wowiyukcan qa wohnaye wanniciyakapi ece.

15 Tona canku ohna hiyayapi kin owasin niye on nape hdaskaškapapi; jojopi qa pa kapsanpsanpi, Jerusalem cunwintku kin on: Otonwe wan, Iyotan owanyag wašte hinca, Maka ocowasin wowiyuškin, eciyapi qon he dee he? eyapi.

16 Tokaniyanpi kin owasin niye on i kapapi; jojopi qa hi hdakinskinzapi: Napca iyeunyanpi ce: Awicakehan anpetu unkodepi qon he dee, iyeunyanpi, wanunyakapi ce, eyapi.

17 Jehovah taku konze ciqon he hduštan; iye oie anpetu wanakaja tanhan hdašute ciqon he hduecetu: waehpeya qa waonšida šni; tuka niye on toka kin iyuškinkiya; nicipajinpi he kin he yuwankan iyeya.

18 Iye cantcpi Itancan kin hoyekiyapi: Zion cunwintku tacunkaske, anpetu qa hanyetu ištaminigaga hiyukiya wo, minicaduza iyececa; oziiciye šni wo; ništasu kin ayuštan kiye šni wo.

19 Najin wo; hanyetu en pan wo: tokaheya awanyakapi kin en, Itancan ite kin itokam, nicante, mini iyecen, hdapson wo: hokšiyopa nitawa canku pa kin owasin en wotektehdapi on hanyanpi hena nagipi on iye ekta nape hdugata wo.

 20 Wanyaka ye, Jehovah, qa tuwe decen ecayecon kin he awacin ye: Winohinca iye cinca hdutapi kta iyececa he, hokšiyoqopa nape ohna wicahduhapi kin? Itancan tipi wakan tawa ohna wicašta wokcan wawayušna ko wicaktepi kta iyececa he?

21 Hokšidan qa wicahinca kin canku ohnahna makata wankapi: wikoška mitawa qa koška mitawa mazasagye on hinhpayapi: nitocanniye anpetu kin en wicayakte; wateyaya, waonsiyada šni.

22 Anpetu en mniciyapi kin iyecen wonihinciye mitawa ihdukšantanhan yeco, hecen Jehovah tocanniye anpetu kin en najica un qa okaptapi kin wanica: tona wicawahnahna qa icahwicawaye cin hena tokamaye cin awihnuniwicaya.

WICACEYA WICOWOYAKE 3.

1 Wicašta wokakije wanyake cin he miye, iye tocanteptanye canšakadan kin on.

2 Yuš amayan, qa otpaza en amayan, qa iyoyanpa šni.

3 Awicakehan miye en iye ihduhomni; anpetu osan iye nape hduptanyan ece.

4 Micehpi qa uka kin kuka icahmiciya; mahuhu kin hena kawehwega.

5 lye acanmakaška, qa pizi wokakije ko on aohdutemayan.

6 Tukten otpaza kin en ounye inayan, wanakaja tapi kin iyececa.

7 lye onamataka, hecen tankan mde kte šni; on makaškapi kin tke hinca micaga.

8 Nakun wapan qa hoyewaya ešta mitawocekiye kin he icagi makiya.

9 Inyan kakanpi on mitacanku kin aconkaška; cankuwaye cin he yupemni.

10 Aiiye en wahankšica wawiyape kin iyececa; mnaja wan woinahbe en iyecen un.

11 Mitacanku miciyupemnimni, qa rnayuhdehdeca: wotakuni šni makaga.

12 Itazipa nakiwinja, qa wanhinkpe on makutepi kta emahnaka.

13 Tawanju wanhinkpe kin minite en iyaye kiya.

14 Mitaoyate iyuhpa imahahapi waun; anpetu ihuniyan imadowanpi waun.

15 Taku paza on ojumayan, pizi on witkomayan.

16 Nakun inyan on he mayutemtepa; cahota on amakahpa.

17 Unkan minagi wookiye itehan iyeyaya; taku wašte awektonja.

18 Hehan hepa; Mitowašte qa taku Jehovah etanhan ape waun qon he atakuni šni ce.

19 Makakije qa iyomakišice cin kiksuya wo, taku paza qa pizi kin.

20 Hena kiksuya waun kta, hecen miye mahen minagi paihahdedun yanke kta.

21 De micante ekta yewaye kta, heon etanhan ape waun kta.

22 Jehovah tocantekiye on awicakehan unyušotapi šni; towaonšida kin owihanke šni nakaeš.

23 Hanhanna eca hena yutecapi ece; nitowicake kin he tanka hinca.

24 Taku mitawa kte cin Jehovah hee, minagi eya; heon etanhan wacinwaye kta.

25 Tona akipe unpi kin hena en Jehovah wašte, wicanagi akite cin he en.

26 Jehovah towanikiye apepi qa inina unpi kin he wašte ece.

27 Wicašta koška icunhan cannapinpi kin qin kinhan he wašte ce.

28 Išnana iyotanke, qa inina yanka; iye akan ehnaka nakaeš.

29 Iye i kin makata eicihnake kta; okinni apepicayuke kta.

30 Iye tapon waapa kin kipazo kla; waaiapi kin on inina hinca.

31 Itancan kin ohinniyan waehpekiye kte šni nakaeš.

32 Tuka wakakišya ešta towaonšida ota kin eciyatanhan wacantekiye kta.

33 Cante eciyatanhan wakakišye šni, qa wicašta cinca iyotanhan iyewicakiye šni nakaeš:

34 Iye šiha ihukuya maka akan wicakaškapi kin iyuhpa nawicasušuje kta:

35 Iyotan Wankan un ite itokam wicašta tawoyaco kin yupeinnipi kta:

36 Wicašta tawoakinica yuhomnipi kin he ekta Jehovah atonwe šni ecee.

37 He tuwe heya unkan ecetu he, Itancan kin econ ši šni kinhan?

38 Iyotan Wankan un i kin etanhan taku šica qa taku wašte koya inanpe kte šni?

39 Tokeca wicašta ni un kin wayicaba kta he; wicašta wan tawoahitani kin on?

40 Canku unkokidepi qa unkakitapi kta, qa Jehovah en unkihduhomnipi kta.

41 Wicanape kici uncantepi kin Wakantanka mahpiya ekta wankan iyeunkiyapi kta.

42 Unkiyewaunhtanipi qa wawaunkipajinpi ecee: niye ytayakajuju šni.

43 Wocanniye on aohduteunyayapi qa kuwa unkayaupi: niye wateyaya, niye onsiwicayada šni.

44 Mahpiya sapa on aohduteniciya, hecen ohna wocekiye nihiyohi kte šni ye.

45 Oyate wicacokaya watušekšeca qa taku tankan ehpeyapi ece kin heca unyaka api.

46 Tona tokaunyanpi kin owasin iunkapapi ece.

47 Wokokipe qa mazahtakiyapi en unkanpi; woihangye qa woyutakuni šni.

48 Mitaoyate cunwintku kin awihnuniyapi kin on etanhan miišta mini wakpadan hiyuyaece.

49 Miišta minigaga qa owanji yanke kte šni, ayuštan wanica:

50 Jehovah mahpiya eciyatanhan kun ahitonwan, qa wanyake kte cin hehanyan.

51 Miišta minagi iyokišinya, mitotonwe cunwintku kin owasin on etanhan.

52 Taku on etanhan šni tokamayanpi kin ninii niakuwapi ece, zitkadan wan iyececa.

53 Woha kin en mitaniya kawihnunipi, qa inyan wan amapaptanyanpi.

54 Pa iwankam mini imayaya: Makakšapi ce, epa.

55 Woha temahentu kin etanhan, Jehovah, nicaje hoyewakiya.

56 Miho kin nayahon ece; waniya kin en, hoyewakiye cin en, ninoje kpe icicage šni wo.

57 Anpetu en hoyeciciya he ehan kiyedan yau: Wakokipe šni wo, eha.

58 Itancan, minagi toakinica kin he ayakinica: mitaniya kin opeyakiton.

59 Jehovah, patušmayanpi kin he wandaka: mitawoyaco kin he niye yaco wo.

60 Watokiconpi tawapi kin iyuhpa niye wandaka; amawacinpi kin hena owasin.

61 Woaie tawapi kin, Jehovah, niye nayahon; amawacinpi kin hena iyuhpa:

62 Tona makipajinpi iha kin, qa anpetu osan amajijipi kin hena.

63 Iyotankapi qa najinpi kin hena wanyaka wo: miye imadowanpi waun.

64 Jehovah, iye nape ohanpi kin eciyatanhan wokajuju wicakicu wo:

65 Cante aotpasyapi kin wicaqu wo; woyašice nitawa wicakiciun nunwe.

66 Wocanniye en wicakuwa qa ihangwicaya wo, Jehovah tamahpiya kin ihukuyatanhan.

WICACEYA WICOWOYAKE 4.

1 Tokiyatanhan mazaskazi kin san aya he! mazaskazi iyotan wašte kin he yutokecapi! inyan wakan kin hena tankan ehpeyapi, canku pa kin owasin ektakta.

2 Zion cinhintku tehihipike cin hena mazaskazi kici tkeuwicatapi iyececa, tokiyatanhan hena makawakšica, maka wakšica kaga nape on kagapi kin iyececa wicudakapi he!

3 Unkteni heepi kaeš aze kpazopi, cinca azin wicakiyapi ece: mitaoyate cunwintku kin cante tehike icaga, makoška u hinhankaga tanka iyececa.

4 Hokšiyoqopa azin kin he ceji caka en ihdaskapa, ipuza on etanhan: šiceca aguyapi dapi, tuwedan wicakipamni šni.

5 Tona taku waštešte ece yutapi qon hena canku ohnahna hanyanpi: tona taku duta ece un icagapi kin hena tacesdi paha kin adoksohanpi ece.

6 Mitaoyate cunwintku taku šica econ kin he Sodom wahtani kin isanpa tanka: he qe ihnuhanna ihangyapi, qa he ekta wicanape ihduhomnipi šni.

7 Iciconzapi tawa kin hena wa isanpa wakašote šni unpi; pteasanpi kin isanpa skaškapi; hena tancan inyan šaša kin isanpa šašapi; sapphire iyecen šdušdutapi:

8 Itohnake tawapi kin otpaza isanpa šapšapa aya; otonwe canku kin ohna sdonwicayapi šni: ha kin huhu en askapa, pišpija, can seca iyececa.

9 Mazasagye on ktepi kin he akihantapi kin isanpa wašte: dena e hanyanpi, maga waskuyeca codan on wicaktepi nakaeš.

10 Winohinca waonšida napepi iye cinca kin ohanpi: mitaoyate cunwintku ihangyapi kin en hena e woyuteyapi ece.

11 Jehovah wanna tocanniye kin hdustan; tocanteptanye wohitike cin he hdaštan, qa Zion en peta wan itkonya, unkan taku akan he cin hena huhnahya.

12 Maka akan wicaštayatapi qa maka en ounyanpi kin owasin, wawakipajin qa toka kin hena Jerusalem tiyopa kin ohna tin iyayapi kta, he wicadapi kte šni tuka.

13 Wicašta wokcanpi tawa tawoahtanipi kin on, wawayušnapi tawa taku šica econpi kin on etanhan, hena e otonwe cokaya wicašta owotanna we papsonpi nakaeš:

14 Canku kin ohna nunipi ece, ištagongapi; we on ihdušapa,  hecen tawokoyake yutanpi kla okihipi kte šni.

15 Woašape, napa po, eya hoyewicakiyapi; napa po, napa po, yutanpi šni po: najicapi, han onuni unpi qehan, ikcewicašta kin ehna heyapi, Icimana ake en ounyanpi kte šni ce.

16 Jehovah ite kin yukinukan iyewicaya; ake en awicatonwe kte šni: wawayušnapi tawapi itepi kin ohokidapi šni, hunkayapi wicayuhapi kin onsiwicakidapi šni ece.

17 Hehanyan unkiyepi, waounkiyapi takušnišni kin on išta unkitakunipi šni; oyate wan wanikiya okihi šni kin he ekta etonwan unyakonpi nakaeš.

18 Unkowepi km ode unpi: hecen otonwe canku unkltawapi ohna unyanpi unkokihipi šni; unkowdiankepi kin he kiyedan; anpetu unkitawapi kin henakeca; unkowihankepi kin wanna hiyohi nakaeš.

19 Kuwa unkaupi kin hena mahpiya wamdi kin isanpa duzahanpi hinca: he akan kuwa unkaupi, makotahedan unkapepi yakonpi.

20 Unpogepi taniya, Jehovah sdakiye cin hee e woha tawapi kin ohna yuzapi; he qe on, ikcewicašta ehna ohanzi tawa kin ihukuya unnipi kta ce, unkeyapi tuka qon.

21 Edom cunwintku, Uz makoce kin en ounyaye cin, cante wašte qa wiyuškin wo: nakun wiyatke kin he niye ekta iyoopta iyaye kta: winitko kta qa tancodan nicicage kta.

22 Zion cunwintku, taku šica ecanon kin on wokakisyapi kin he yuštanpi; ake icimana wayaka aniye kte šni: Edom cunwintku, taku šica ecanon kin he wanyag i kta; wayahtani kin he sdayehna ehnake kta.

WICACEYA WICOWOYAKE 5.

1 Jehovah, taku unkakipapi kin hekiksuyawo: awacin qa iyaunqonpapi kin he atonwan wo.

2 Taku aihpcunkiyapi qon he toka wicašta kin ekta iyaya, untipi kin wicašta tokeca ekta.

3 Wamdenica heuncapi qa ateyapi codan unyakonpi; inawicunyanpi kin wiwazicapi iyececapi.

4 Mini unkitawapi kin mazaska on unyatkanpi; can unkitawapi kin he opetonpi on u ece.

5 Untahupi akan kuwa unkaupi ece; ntaunnipi, qa woozikiye unhapi šni.

6 Egypta oyate kin nape wicunqupi, Assyri oyate kin, aguyapi iunmnanpi kta e heon.

7 Atewicunyanpi wahtanipi, qa en unpi šni; unkan unkiye taku šica econpi kin unkicinpi ece.

8 Wowidake unpi hena unkidakapi: iye nape kin etanhan tuwedan eunyakupi šni.

9 Unnagipi otohnaka aguyapi unkicupi ece, hewoškan mazasagye kin on etanhan.

10 Ha unsapapi mazaoceti wan iyececa, wicaakihan tehike hinca on etanhan.

11 Zion en winohinca wicakikšanpi, wikoskapi kin Judah otonwe kin ohna.

12 Wiciišta itancanpi kin hena nape on otkewicayapi ece; wicahinca itepi ohowicadapi šni.

13 Koškapi kin hena wotpan wicakiyapi, qa hokšipidan can ihukuya kaktihanhanpi ece.

14 Wicahincapi otonwe tiyopa kin ayuštanpi, koška can cega apapi enakiyapi.

15 Uncantepi wiyuškin kin henakeca; unyajojopi kin wicaceya icaga.

16 Paha unkitawapi watešdake kin hinhpaya: wanna woyašice unkicipi un, waunhtanipi nakaeš.

17 Heon etanhan cante unyazanpi: dena on išta unkatpazapi.

18 Hewoškan icaga, heon Zion he kin akan sungidan anianipi ece.

19 Jehovah, niye owihanke wanica idotanka; nitoiyotanke kin wicoicage qa wicoicage hehanyan.

20 Tokeca ohinniyan unkayektonjapi kta he; anpetu ota ehpeunyayapi?

21 Jehovah, niye en hdicu unkiya po, kinhan unhdicupi kta; anpetu unkitawapi kin yuteca ye, wanakaja qon iyececa.

22 Tuka ocowasin ehpeunyayapi; nina hin canniyeunyakiyapi nakaeš.