WOHOKONWICAKIYA KIN (Ecclesiastes) 1- 6

WAHOKONWICAKIYA KIN.

WICOWOYAKE 1.

1 Wahokonwicakiya kin, David cinhintku Jerusalem en Wicaštayatapi oie kin dena ee

2 Takušni, takušni, Wahokonwicakiya kin eya, takušni, takušni, iyuhpa takušni ce.

3 Anpetu wi ihukuya wicašta wicohtani econ kin owasin on iyunwin taku yuha he?

4 Wicoicage wanji iyaye ca wicoicage wan u ece; tuka maka kin ohinniyan han.

5 Nakun anpetu wi kin hinanpa, qa anpetu wi kin iyaya, qa totanhan hiyu qon he ekta inahni hda ece.

6 Tate kin itokahkiya iyaye ca waziyatakiya ihduhomni; tate ihduhomnimni, qa totanhan iyaye cin ake en hdi ece.

7 Wakpa iyuhpa miniwanca kin en iyaya; tuka miniwanca kin ojudan šni; wakpa kin totanhan hiyupi qon he ake ekta hdapi ece.

8 Wicoie owasin hunkitapi ojudan; wicašta oyake kta okihi šni: wicišta kin he wawanyaka imnan šni, qa wicanoge kin wanahonpi on imnan šni.

9 Taku un qon he u kte cin hee: qa taku econpi ece kin taku econpi kte cin ee: qa anpetu wi kin ihukuya taku teca wanica.

10 Taku on, Wanyaka wo, de teca ce, eyepica he? wanna tanina un qon hee, unkiye unkitokapatanhan yanke.

11 Taku hekta un qon hena kiksuyapi šni; qa nakun taku tokata kin tona ohakam unpi kte cin hena kiksuyapi kte šni.

13 Wahokonwicakiya kin he miye, Jerusalem en Wicaštayatapi manka.

13 Unkan taku mahpiya ihukuya econpi kin owasin wokšape on awakite kta, qa imdukcan kta e micante ekta yewaya: wicohtani tehike cin de Wakantanka wicašta cincapi wicaqu, on htanipi kta heon.

14 Anpetu wi kin ihukuya wicohan econpi kin owasin wanmdaka, unkan iho, iyuhpa takušni qa woniya iyokišinyapi kin hee.

15 Taku skope cin he yuowotanpidan kta okihipica šni; qa taku iyokpani un kin hena yawapica šni.

16 Micante kici wowahdaka qa hepa; Iho, tanka imacaga qa wokšape mnawakiya, tona Jerusalem en mitokam unpi qon owasin isanpa: han, micante wokšape qa wosdonye ota wanyaka.

17 Nakun wokšape sdonwaye kta micante waqu, wicoksape šni qa wowitkotkoke sdonwaye kta: De nakun woniya iyokisinyapi kin h e imdukcan.

18 Wokšape ota en woiyokišice ota yukan; qa tuwe wosdonye hduota kinhan he wicocantešica hduota ece.

WOHOKONWICAKIYA KIN  WICOWOYAKE 2.

1 Micante en hepa; Iho wo, wowiyuškin on iciyute kta ce; hecen taku wiciyokipi sdonya wo. Unkan iho, he nakun taku šni.

2 Ihapi kin he, Wowitkotkoka, ewakiya: qa wowiyuškin, He taku tokon he?

3 Micehpi miniša on wahdusuta kta micante en awakita, qa micante wokšape sdonyewakiye kta; qa wowitkotkoka kin he mduze kta, hecen wicašta cincapi on taku wašte kin tukte e he, anpetu towanakeca hipi kin en, mahpiya ihukuya taku econpi kte cin he wanmdake kta.

4 Taku tanka micicaga; tipi micicaga; hastanhanka iyuwi ojupi kin hu wehde:

5 Maga qa canwojupi kin micicaga, qa en waskuyeca can ocaje owasin hu wahde:

6 Miniyowe kagapi kin micicaga, on contanka can icahye cin he spayewaye kta:

7 Wicašta taokiye qa winyan taokiye opewicawaton, qa wati ohna tonpi wicamduha; nakun tanka qa cistinna ptewanunyanpi ota hinca wicawahduha, Jerusalem en mitokam unpi qon owasin isanpa:

8 Nakun mazaska qa mazaskazi mnamiciye, qa wicaštayatapi makoce tawapi ko tawokamna kin: wicašta dowanpi qa winohinca dowanpi heca icahwicawakiya, qa wicašta cincapi tawowiyuškinpi, token icuwa dowansa, qa on owasin ocaje he.

9 Hecen matanka, qa tona mi tokam Jerusalem en unpi qon ikapeya taku ota micicaga: nakun wokšape mitawa miciun.

10 Qa taku miišta da kin takudan ipimicida šni, wowiyuškin wanjidan kes micante etanhan wakipatan šni; mitohtani owasin on micante iyuškin nakaeš: qa mitohtani ocowasin on wokamna mitawa kin hee.

11 Hehan wicohan minape econ kin owasin en ewakitonwan, qa wicohtani htawani kta ecamon kin hena; unkan iho, ocowasin takušni qa woniya iyokišica hee, qa anpetu wi kin ihukuya wokamna wanica.

12 Unkan wokšape qa wicokšapešni qa wowitkotkoke kin iwanmdake kta mihdamna: wicašta wan wicaštayatapi ihakam u kin he taku okihi kta he? taku wanna econpi kin heceedan.

13 Hehan wokšape en wokamna yukan e wanmdaka, wowitkotkoke kin isanpa, iyoyanpa kin he otpaza isanpa wašte kin he iyececa.

14 Wicašta ksapa išta iye pa kin en un; tuka witkotkoke cin he otpaza omani: hececa ešta miye qe taku wanjidan owasin awicakipa ece e wanmdaka.

15 Hehan cante mahen hepa; Witkotkoke cin he taku akipa he iyecen miš eya awakipa; hecen tokiyatanhan miye qe iyotan wakšapa he? Hehan cante mahen, De iš eya takušni ce, epa.

16 Witkotkoke cin iyececa wicašta ksapa kin ohinniyan kiksuyapi šni nakaeš; taku nakaha un kin hena tokata anpetu kin en owasin akiktonjapi kta, heon etanhan. Qa wicašta ksape cin iš token te kta he? witkotkoke cin iyececa.

17 Heon etanhan wicani kin šicewakidaka; anpetu wi kin ihukuya wicohan econpi kin he waciniyowakišica nakaeš: iyuhpa takušni qa woniyaiyoki inyapi kin hee.

18 Han, mitohtani anpetu wi ihukuya ecamon kin ocowasin šicewakidake; wicašta mihakam u kte cin he aihpewakiye kta, heon etanhan.

19 Qa he wicašta ksape kta, qa i witkotkoka kta tuwe sdonya he? Hececa, mitohtani ecamon kin owasin, qa en anpetu wi ihukuya ksapa mihdutanin kin hena iye tawaye kta. De nakun takušni.

20 Heon etanhan anpetu wi kin ihukuya wicohtani ecamon kin iyuhpa micante kicunniwakiye kta mihdamna.

21 Wicašta wan tohtani kin wokšape en, qa wosdonye en, qa wokonze en un: tuka he wicašta wan on htani šni kin he tawa kta aihpekiye kta. He nakun takušni qa taku šica tanka.

22 Wicašta iye tohtani owasin, qa cante iyokišica, on anpetu wi ihukuya htani kin etanhan taku hduha he?

23 Taanpetu kin iyuhpa wicocantešica, qa tokakije kin he woiyokišica nakaeš: han, hanyetu en iye cante oziiciye šni. He nakun takušni.

24 Wicašta wote kta, qa wayatke kta, qa iye nagi tohtani kin on iyuškinkiye kta, taku sanpa wašte wanica. De wanyaka miye nakun, Wakantanka nape kin etanhan ce.

25 Tuwe wote kta he, qa miye mikapeya tuwe wiyuškin kta he?

26 Taku iye itokam wašte kin he Wakantanka wicašta wicaqu ece, wokšape qa wosdonye qa wowiyuškin: tuka wahtani sa kin he wokakije qu, wamnaye kta qa waeju kta, hecen Wakantanka itokam taku wašte kin he qu kta. He nakun takušni qa woniya iyokišica.

WOHOKONWICAKIYA KIN  WICOWOYAKE 3.

1 Taku iyuhpa iyehantu yukan, qa mahpiya kin ihukuya woawacin owasin tohantu kte cin yukan ece.

2 Wicatonpi iyehantu yukan, Qa wicate kta iyehantu; Woju econpi iyehantu; Qa wojupi yujunpi kta iyehantu:

3 Wicaktepi iyehantu yukan, Qa okiziyapi iyehantu; Wayujujupi iyehantu, Qa piya kagapi iyehantu yukan:

4 Wicaceya iyehantu yukan, Qa ihapi kta iyehantu; Wasihdapi iyehantu, Qa škatapi iyehantu yukan:

5 Inyan ehpeyapi iyehantu yukan, Qa inyan witaya pahipi kta; Adoksohan wicayuzapi iyehantu yukan, Qa poškin wicayuzapi ayuštanpi kta.

6 Waakitapi iyehantu yukan, Qa toki ehpeyapi kta iyehantu; Wapatanpi kta iyehantu, Qa wapaganpi iyehantu yukan:

7 Wayuhdehdecapi iyehantu yukan, Qa wakagegepi iyehantu yukan; Inina yukanpi iyehantu, Qa iapi kta iyehantu yukan:

8 Waštewicadaka iyehantu yukan, Qa Šicewicadaka iyehantu; Okicize iyehantu yukan, Qa wookiye kagapi kta iyehantu.

9 Wicašta htani kin he iye tohtani eciyatanhan iyunwin taku hduha he?

10 Wicohtani en wicašta cincapi htani iciyapi kta Wakantanka wicaqu kin he wanmdaka miye:

11 Taku owasin iyehantu eca owanyag wašte kaga: nakun iye cantepikin en ohinniyan kte cin he ewicakicihnaka, hecen Wakantanka tohtani kage cin otokaheya tanhan qa owihanke ekta wicašta tuwedan okahnige kte šni.

12 Hena en taku wašte wanica sdonwaya; tuka wiyuškin kta, qa ni un icunhan taku wašte econ kta:

13 Qa nakun wicašta otoiyohi wote kta, qa wayatke kta, qa tohtani owasin taku wašte en un kin he on ihduškin kta; Wakantanka taku qu kin hee.

14 Taku Wakantanka econ kin owasin owihanke wanice kta sdonwaya; takudan en akagapi kte šni, qa takudan etanhan icupi kte šni: unkan iye itokam wakokipapi kta e Wakantanka hecon ece.

15 Taku hekta un qon he nakaha un, qa taku tokatam u kte cin he wanna hekta un: qa taku hekta un kin he Wakantanka kin ake hdiyohi kiye kta.

16 Unkan nakun anpetu wi ihukuya woyaco oyanke kin wanmdaka, wošice hen yanka; qa woowotanna oyanke kin, wicošice en yanka.

17 Cante mahen hepa; Owotanna kin he qa šice cin Wakantanka wicayaco kta: han, wicotawacin otoiyohi qa wicohan otoiyohi hen iyehantu yukan.

18 Wicašta cincapi kin on cante mahen hepa; Tokin Wakantanka hena iwicayuten, hecen iye qe woteca hecapi e wanihdakapi kta.

19 Wicašta cinca kin taku akipapi hecinhan, he woteca akipapi; han, taku wanjidan awicakipa ece: wanji iš token ta hecinhan, unma kin iš iyecen ta: han, owasin woniya okonwanjidan yuhapi: hecen wicašta kin iš woteca isanpa takudan iciwašte šni; iyuhpa takušni nakaeš.

20 Owasin oyanke wanjidan ekta yapi; iyuhpa maka mdu heca, qa iyuhpa ake maka mdu icagapi ece.

21 Wicašta cinca taniya wankan ye cinhan, qa woteca taniya kin iš maka ekta kun ye cinhan, tuwe sdonya he?

22 Heon etanhan wicašta iye tohan kin on ihduškin kta taku sanpa wašte wanica imdukcan; he taku tawa kin ee nakaeš: qa iye iyohakam taku u kte cin he tuwe wanyagkiye kta he?

WOHOKONWICAKIYA KIN  WICOWOYAKE 4.

1 Unkan wahdicu qa wokakišye anpetu wi ihukuya econpi kin hena owasin iwanmdaka: qa iho, kakišyapi ištainnihanpe awicau; qa wicakicanpte yuhapi šni: unkan wakakišwicaye nape ohna wowašake yukan; tuka wicakicanpte yuhapi šni.

2 Heon etanhan tapi kin, tona wanna tapi kin hena wicadmawašte, nipi, tona nahanhin ni unpi kin isanpa:

3 Han, tuwe tohinni ni un šni kin he hena napin isanpa wašte, wicohan šica anpetu wi ihukuya econpi kin hena wanyake šni nakaeš.

4 Akeš wicohtani owasin iwanmdaka, qa wicohan yuštanpi otoiyohi, on wicašta iye takodaku kici nakiciwizipi kin hee. De iš eya takušni qa woniya iyokisica ce.

5 Witkotkoke cin he nape hdukšija qa iye cehpi hduta ece.

6 Napohnaka wanjidan woozi kici hee wašte, nape nonpa ojudan isanpa, wicohtani econpi qa woniya iyokišica iyahna hecinhan, eya.

7 Hehan wahdiyaku qa anpetu wi ihukuya takušni kin he wanmdaka miye.

8 Wanjidan yukan, qa inonpa wanica; han he cinca qa sunkaku takudan hduhe šni; tuka tohtani owasin ayuštan šni; nakun iye išta kin wowijice imna šni; qa, Tuwe on htawani qa minagi taku wašte icakišwaya he? eye šni. De nakun takušni; han, wicohtani tehika.

9 Nonpa kinhan wanjidan isanpa waštepi; wicohtani econpi kin on wokajuju wašte yuhapi nakaeš.

10 Hena hinhpayapi kinhan, unma kin iš takodaku najin kiye kta: tuka, hehehe, tuwe išnana un hinhpaye cinhan; tuwe najin kiye kta yuhe šni nakaeš.

11 Akeš, nonpa sakim wankapi kinhan cozapi ece; tuka tokiyatanhan wanjidan išnana coza kta he?

12 Unkan wanji kici econ ohiye cinhan, nonpa kici inajinpi kta; qa hahonta yamni kahmonpi kin he yupsakapi tehika.

13 Hokšidan wan wahpanica qa ksapa he wašte, wicaštayatapi wan wicahinca qa witkotkoka wanna onspekiyapi kta wicada šni kin he isanpa.

14 He qe wicokaške tipi kin etanhan wicaštayatapi kta hiyu; tuka nakun tuwe iye en tonpi kin he wahpanica aya.

15 Wicašta ni unpi owasin anetu wi kin ihukuya manipi kin ena, hokšidan inonpa kin eekiya inajin kte cin kici iwanwicamdaka.

16 Oyate kin owasin wopteca šni, tona wicitokam unpi qon owasin: nakun tona ohakam upi kin hena he on iyuškinpi kte šni. Awicakehan he nakun takušni qa woniya iyokišice cin hee.

WOHOKONWICAKIYA KIN  WICOWOYAKE 5.

1 Wakantanka tipi kin ekta da eca nišiha awanhdaka wo, qa witkotkoka tawošna yaqu kte šni e wanahon yanka wo; hena eqe taku šica econpi kecinpi šni.

2 Nii on ohanko šni wo, qa nicante Wakantanka itokam taku eya inahni kte šni. Wakantanka mahpiya ekta yanka, qa niye maka akan yaun; heon etanhan nioie tonana kta iyececa.

3 Wicohan ota eciyatanhan wihanmnanpi icaga: qa witkotkoka ho kin wicoie ota en un.

4 Tohan Wakantanka ekta taku on niciconze cinhan, hdajuju dutehan kte šni; iye qe witkotkokapi kin on wiyuškin šni; taku on niciconze cin he hdajuju wo.

5 Niciconza qa yahdajuju šni kinhan, niciconze šni unkanš hee wašte kta tuka.

6 Ihnuhan nii kin he nicehpi wahtanikiye cinhan; qa ohnihde kin itokam, He woyašna ce, ehe kte šni: Taku on etanhan Wakantanka niho on sinhda kta, qa ninape taku econ kin ihangye kta he?

7 Wihanmnanpi ota kin en takušnipi yukan, qa wicoie ota; tuka niye Wakantanka kokipa wo.

8 Wicašta onsika wicakipi kin he, qa makoce tehan yanke cin en woyaco woowotanna ko yupemnipi kin hena wandake cinhan, he taku kin on yusinyaye šni wo: tuwe wašaka keš isanpa wašake cin he awacin yanka; qa hena isanpa wašakapi yukan.

9 Nakun maka wokamna kin he wicašta owasin tawapi; wicaštayatapi hee kaeš maga kin wowidagya.

10 Tuwe mazaska waštedake cin he mazaska imnan kte šni; qa tuwe woyuha ota waštedake cin he oicage on imnan kte šni. He nakun takušni.

11 Woyuha kin hena ota aye cinhan, tona yutapi kin hena yuotapi; hecen tuwe tawapi kin hena taku iwaštepi he; išta on wanhdakapi heceedan?

12 Tuwe htani ištinbe cin he skuya, taku tonana kaeš ota yuta ešta: tuka wijice woyuha ota ton kin he ištinma okihi šni kiya.

13 Anpetu wi kin ihukuya taku šica tehika wan wanmdaka miye, woyuha tona tawapi išicapi kte cin on kihnakapi hee.

14 Tuka woyuha kin hena šicaya waakipapi on atakuni šni ece; unkan cinca wan icahkiye ca takudan nape ohna yanke šni.

15 Iye hunku tamni etanhan u qon he iyecen tancodan hde kta, hiyu qon iyecen ye kta, tohtani etanhan taku nape ohna aye kte cin takudan icu kte šni.

16 Unkan de iš eya taku šica tehika, token u qon he iyecehin ake hde kta: hecen tuwe tate htakicini kin wokamna taku yuha he?

17 Nakun taanpetu owasin otpaza en wota, qa wicocante šica ota yuha, qa wayazanka en woiyokišice.

18 Iho, taku miye wanmdake cin he dee; taku wašte wan oiyokipi, wote kta qa wayatke kta, qa tohtani anpetu wi ihukuya econ kin owasin, anpetu wi un towanakeca Wakantanka qu kin hehanyan iyuškin kta; taku tawa kte cin hee nakaeš.

19 Nakun wicašta otoiyohi Wakantanka woyuha qa wowijice qu kin he etanhan yute kta okihi, qa taku tawa kte cin hduhe kta, qa tohtani on iyuškin kta: Wakantanka taku qu kin hee.

20 Ota šni qeyaš anpetu ni un kin kiksuye kta; iye cante wiyuškin kin en Wakantanka toayupte yanka nakaeš.

WOHOKONWICAKIYA KIN WICOWOYAKE 6.

1 Anpetu wi kin ihukuya taku šica wanji yukan wanmdaka miye, qa he wicaštapi ehna tanka hinca:

2 Wicašta wanji wowijice, woyuha qa woyuonihan Wakantanka qu, hecen iye nagi taku cin kin iyuhpa takudan kiwanice šni, tuka hetanhan hdute kta Wakantanka okihikiye šni, tuka wicašta tokeca yuta. De iš eya takušni qa woyazan tehike.

3 Wicašta wan opawinge cincaton, qa waniyetu ota ni un, hecen iye tawaniyetu anpetu ota qeyaš, iye nagi taku wašte on imnan šni, qa nakun wicahapi hduhe šni kinhan, okaškan tonpi wan hee kaeš he isanpa wašte, epa.

4 He qe opo etanhan hiyu, qa otpaza en iyaya, qa iye caje kin otpaza akahpe kta.

5 Nakun anpetu wi wanyake šni  qa sdonye šni, eqe woozi yuha, unma qon isanpa.

6 Han, waniyetu kektopawinge nonpa hehanyan ni qeyaš taku wašte takudan wanyake šni: owasin ounyanpi wanjidan ekta yapi šni he?

7 Wicašta tohtani ocowasin iye i kin on etanhan, hececa ešta iye nagi kin ininan šni.

8 Wicašta ksapa wicašta witkotkoka isanpa taku yuha he? wicašta onsike cin ni unpi wicitokam mani sdonye cin he taku yuha he?

9 Wicašta wawanyake cin he wicanagi onuni kin isanpa wašte. De nakun takušni qa woniya iyokišice cin hee.

10 Taku hekta un qon hena wanna cajeyatapi, qa he taku kin wicašta ee šdonyapi: nakun tuwe iye isanpa wašake cin he kici econ kta okihi šni.

11 Hecen wicoie ota takušni yuotapi ece, heon wica ta hena taku iwašteka he?

12 Wicašta wan ni un, takušni ni un taanpetu iyuhpa ohanzi iyecen hiyaye cin he taku wašte yuhe kta tuwe sdonya he? qa anpetu wi kin ihukuya wicašta wan iyohakam taku u kte cin tuwe he okiyake kta he?

 

Ruth Tawowapi

RUTH TAWOWAPI

WICOWOYAKE 1.

1 Unkan wayaco wicašta kin wicaštayatapi hecapi qehan, makoce kin ohna wicaakihan: unkan wicašta wan, Bet-lehem-judah etanhan, Moab makoce ohnayanke kta e ekta i, iye qa tawicu, qa cinhintku nonpa.

2 Qa wicašta kin he Elimelech eciyapi, qa tawicu Naomi eciyapi, qa cinhintku nonpa kin Mahlon qa Chilion ewicakiyapi. Ephrati hecapi, Bet-lehem-judah etanhan; qa Moab makoce ekta ipi, qa hen yakonpi.

3 Unkan Elimelech Nayomi hihnaku ta, unkan iye catka un, qa cinhintku iye nonpa om.

4 Unkan napin Moab winohinca yuzapi, wanji Orpah eciyapi, qa unman Ruth eciyapi, qa hen yakonpi waniyetu wikcemna cetu.

5 Unkan Mahlon qa Chilion napin nakun tapi; hecen cinhintku napin, qa hihnaku winohinca ehpeya iyayapi.

6 Unkan Moab makoce etanhan kihde kta e najin, takos wicaya om; Jehovah taoyate en wicai qa aguyapi wicaqu kin he Moab makoce ohna nahon nakaš.

7 Qa ohna yanke ciqon etanhan wazi tawa ekta, qa hetanhan otoiyohi tamaga ekta kihda. He ehan Israel ohna wicaštayatapi wanica, wicašta otoiyohi iye ista kin en taku ecetu kin he econ hinanpa, takoswicaya napin om, qa Judah makoce ekta kihdapi kta, canku ohna iyayapi.

8 Qa Naomi takos wicaye cin napin hewicakiya, Hope, otoiyohi hunku ti kin ekta yahdapi kta i ye, Jehovah cante niciyapi nunwe, niyepi tapi kin cante wica; yakiyapi, qa miš eya canle mayakiyapi kin he iyecen.

9 Iyohi hihnaku ti kin ohna iyozi iyeyayapi kta e Jehovah ionšinidapi ye; eye ca i iwicaputaka. Unkan hoyeyapi qa ceyapi.

10 Qa heciyapi, Awicakehan niye kici i oyate nitawae kta unhdapi kta ye.

11 Tuka Naomi heya, Micunkši kihdape, tokeca micidapi kta he? Nahanhin mitezi ohna cinca mayukan, qa hena niyuza; pi kta he?

12 Micunkši kihdape; wamakanka hinca, heon tuwedan mayuze kte šni ye. Nakun, Wowacinye mayukan qa hanyetu kin de wicašta wan mayuze kta, ia hokšidan waton kta ye, epa ešta,

13 Heon ayapepi kta,tankaicagapi kta, hehanyan, wicašta niyuzapi kte šni e onanitakapi tawaten yayapi kta he? hiya, micunkši, niyepi isanpa tehiya ecamiconpi, Jehovah nape kin amapa ye nakaš.

14 Hehan hoyeyapi qa ake ceyapi,qa Orpah kunku i kin itputaka; tuka Ruth en ikoyag iciya.

15 Unkan Naomi Ruth heciya, Inyun nitanka oyate tawa, qa taku iye wakan da kin ekta kihda ye: nitanka okipa kihda.

16 Tuka Ruth heya, Ihnuhan mayakišica ye, on aciyuštan, qa nihakapa tanhan wahde kte cin. Awicakehan toki de cin heciya miš mde kta ye, qa tukten nanke kte cin hen manke kta ye; oyate nitawa kin he oyate mitawa kte, qa Wakantanka yada kin he miš Wakantanka kta ye.

17 Tukten nite cin hen mate kta qa hen mahnakapi kta ye. Wiconte heceedan niye qa miye unyukinunkan kta ye; taku tokeca hecon kinhan .lehowa hecen qa isanpa ecamicon ye.

18 Unkan kici ye kta wakišag iciye tin he wanyake cehan heciye kta ayaštan.

19 Unkan Beth-lehem ekta ipi kin hehanyan sakim manipi, qa Beth-lehem ekta hipi qehan otonwe kin ocowasin hena on yusinyayapi, qa Naomi dee? eyapi.

20 Unkan hewicakiya, Ihnuhan Naomi emayakiyapi kin, Mara hemakiyape, Iyotan Wašake cin he nina iyokišin mayan ye.

21 Omajudan imdamda, unkan comakadan Jehovah hdicu mayan: tokeca Naomi emayakiyapi he, Jehovah amayatanin, qa Iyotan Wašake cin iyokisin mayan ye?

22 Hecen Nayomi takosku Ruth Moabiwin kin kici hdi, he Moab inakoce etanhan hiyu, qa barley tokaheva baksapi iyehantu, hehan Betlehem ekta hipi.  

RUTH WICOWOYAKE 2.

1 Unkan wicašta wan Naomi takuya, hihnaku qon Elimelech tawicowazi etanhan, wicašta wašaka waditaka, qa Boaz eciyapi.

2 Unkan Ruth Moabiwin kin Naomi heciya, Ceciciye maga ekta mde kta ye, qa tuwe išta kin en woiyokipi iyewaye cin he ihakam aguyapi su itka kin mnawaye kta ye. Unkan, Micunkši ya ye, eciya.

3 Unkan iyaye ca ekta i, qa wa baksapi ihakam maga ohna wamnayan, hecen Boaz Elimelech wicowazi etanhan tamaga en wamnayan.

4 Unkan inyun Boaz Bet-lehem etanhan hiyu, qa Jehovah niyepi kici un nunwe, wabaksapi kin ewicakiya. Unkan iyepi iye, Jehovah niyawašte ye, eciyapi.

5 Unkan Boaz tahokšidan wabaksapi awanwicayake cin heciya, Wikoška kin de tuwe tawa he?

6 Unkan hokšidan wabaksapi awanwicayake cin he ayupte ca heya, Moabi wikoška kin dee. Moab makoce etanhan Naomi kici hdi kin hee.

7 Qa heya, ceciciya waitka mnawaye kta iyowin makiyaye, kinhan wopahte ehna wamnawaye kta, baksapi kin ihakam, qa en hi, qa hecen škan hanhanna ehantanhan dehantu, Tipi kin de ohna iyotanka aškatudan.

8 Unkan Boaz Ruth heciya, Micunkši, namahon wo? Ihnuhan wamnaye kta e maga tokeca ekta de cin; qa nakun detanhan iyaye šni wo: tuka den witanšnapi mitawa wicikiyedan un wo.

9 Qa maga baksapi kin he atonwan, qa wicinyanpidan owicapa wo. Wicaštapi aškatudan ni yutanpi kte šni wicawagi ce? qa inipuza eca cega tawapi kin ekta de kta, qa wicaštapi aškada taku huweyapi kin hetanhan datke kta.

10 Unkan patuja, qa makipusdiya ehpe iciya, qa heciya, Tokeca niišta en woiyokipi iyewaya he, qa oyate matokeca ešta en amayatonwan ye?

11 Unkan Boaz ayupte ca heciya, Nihihna te cin iyohakam taku nikun ecayecon kin, qa niyate, qa nihun, qa makoce en nitonpi kin ehpe wicayakiye cin tanyan omakiyakapi, qa oyate wan itokam sdonyaye šni kin ekta yahi ce.

12 Jehovah niohan kin nicicajuju kta, qa Jehovah Israel Wakantanka tawa hupahu ihukuya inayape kta e yahi kin hetanhan iyuwin iyakicuya duhe kta.

13 Unkan Itancan niišta en woiyokipi iyewaya nunwe. Cantomayahnake ca nitawicinyanna cante ekta iyae, tuka miye wicinyanpidan nitawa wanji iyemaceca ših ye.

14 Unkan wotapi iyehantu qehan Boaz heciya, Deci ikiyedan kuwa wo, qa aguyapi onspa yuta, qa onspa nitawa miniskuya kinenoputkan wo. Unkanwahaksapi kin icahda hiyotanka. Unkan ceonpapi kin onge kicu. Unkan wota qa wipi qa onge okapta.

15 Unkan wamnaye kta najin iyaye cehan. Boaz tawicaštapi aškatudan wahokon wicakiye ca hewicakiya, Wopakte ehna wamnaye kta, qa ihnuhan išten yayapi kin.

16 Qa nakun mnaye kta e napohnaka kin etanhan ongege yusnapo, qa hena mnaye kta e ehpeyapo, qa iyopekiyapi šni po.

17 Unkan htayetu kin hehanyan maga ohna wamnayan, qa taku mnayan kapa barley epa wanji cetu.

18 Qa qin qa otonwe ekta hdohda. Unkan kunku taku mnaye cin wanyaka. Unkan wipi qon etanhan taku okapte cin kipazo.

19 Unkan kunku kin heciya Nakaha tukten wamna yaya he? qa tukten htayani he? Tuwe en anitonwe cin yawaštepi nunwe. Unkan tuwe kici wakage cin kunku okiyake ca, Wicašta kici nakahawawakage cin Boaz eciyapi ye, eya.

20 Unkan Naomi takosku heciya, Jehovah he yawašte nunwe ye, he tocantkiye nipi kin qa tapi kin unmanna ektakiya ahdustan šni. Nakun Nayomi heciya, Wicašta kin he taku unyanpi, qa ope unkitonpi heca wanji ee ye.

21 Unkan Ruth Moabiwin kin heya, Nakun hemakiya ye, wicaštapi aškatudan wicamduha taku mitawa owasin yuštanpi šni hehanyan wicikiyedan un wo.

22 Unkan, Micunkši tawitanšapi om idade ca maga tokeca en anicipapi šni hee wašte ye, Naomi iye takosku Ruth eciya.

23 Unkan barley baksapi,qa aguyapi su baksapi kin yuštanpi šni kin hehanyan Boaz tawikoška opeya un, qa hehan kunku kici kiyotanka.

RUTH WICOWOYAKE 3.

1 Unkan kunku Naomi heciya, Micunkši iyozi acicite kte šni he, niye on he wašte kta ye?

2 Qa Boaz wiciyanna wicayuhe cin om, yaun qon he awicakehan taku unyanpi, qa ito hanyetu kin de wakapanpi kin ohna barley kaduga ye.

3 Heon ihdujaja, qa sdaiciyaye, qa wokoyake wašte kicun ye, qa wakapanpi ekta apamahde ya ye, wotapi qa wayatkanpi kin hdustanpi šni kin hehanyan ihnuhan wicašta kin en nihdutanin kin.

4 Unkan iwanke cinhan, tukten wankekte cin oyanke kin tanyan wanyaka ye, qa ekta de kta, qa siha kin duzamni kta, qa ekta inonke kta. Unkan iye taku ecanon kte cin oniciyake kta ye.

5 Unkan heciya, Taku emayakiye cin owasin ecamon kta ye.

6 Unkan apamahde iyaya wa kapanpi ekta, qa token kunku econsl kin owasin ecen econ.

7 Unkan Boaz wota qa wayatkan, qa cante wa te qehan barley hu paha ihanke kin ekta iwanka. Unkan winyan kin nahmnna ekta i, qa šiha kin yuzamni, qa ekta wanka.

8 Unkan hanye cokaya qehan wicašta kin yusinyaye ca ihduptanyan qa inyun siha kin yanke cin ekta winohinca wan yanka.

9 Qa, Ni tuwe he? eya, Unkan Ruth wicinyanna nitawa kin he miye ye, qa wopekiton he niye, heon wicinyanna nitawa nihupahu amakahpa ye, eya.

10 Unkan heya, Micunkši Jehovah on niyawaštepi, wocante duza ehake kin de tokaheya kin kapa, qa wicaštapi aškatudan wahpanica qa wijica unmanna oyape šni.

11 Qa micunkši wanna ihnuhan wikoyape cin. Taku emayakiye cin owasin ecacicon kta; otonwe mitawa oyate owasin winohinca ksapa henica sdonyapi nakaš.

12 Qa wanna wicayaka, wopekiton wan hemaca, tuka wopekiton wan miye isanpa ikiyedan yukan.

13 Hanyetu kin de den wanka wo; qa hanhanna iye openiciton kinhan wašte kta, openiciton kta. Tuka openiciton kte tawaten ye šni kinhan, miye ope ciciton kta, Jehovah ni kinhan. Hanhanna kte cin hehanyan wanka wo.

14 Unkan ihanhanna hehanyan siha kin yakonpi ekta wanka. Unkan, Ihnuhan winohinca wan kapanpi owanka en hi kin sdonyapi kte cin, eya. Heon wicašta wan takodaku iyekiye kta okihi itokam winyan kin kikta.

15 Unkan heya, Šina hinni kin hduza wo. Unkan hduza. Unkan barley iyutapi šakpe ikiciyuta, qa winyan qon akan ehnaka, qa otonwe ekta kihda.

16 Unkan winyan kin kunku ekta ki. Unkan Nituwe he ye, micunkši? eya. Unkan wicašta qon taku ecakicon owasin okiciyaka.

17 Nakun heya, Barley šakpe kin, dena maqu, qa heya, Ihnuhan nikun ekta cokadan yaki ce.

18 Unkan, Micunkši iyotanka ye, toketu kte cin sdon yaye kte cin hehanyan. Wicašta kin he nakaha taku owasin hdu tan kte cin hehanyan owanjin yanke kte šni ye, eya.

RUTH WICOWOYAKE 4.

1 Unkan Boaz otonwe tiyopa ekta i qa hen iyotanka: unkan wopekiton kin Boaz ke ciqon ahiyaya, hehanyan tuwe iye heciya, Iho ihdiihomni! den iyotanka wo. Unkan ihduhomni, qa hiyotanka.

2 Unkan otonwe hunkayapi etanhan Boaz wicašta wikceinna iwicacu, qa den iyotankapo, ewicakiya; unkan iyotankapi.

3 Qa wopekiton qon heciya, Naomi Moab makoce etanhan; hdi kin he maga onspa Elimelech hunkawanji unyanpi tawa qon wiyopekiye kta cin:

4 Qa miye he nahon ciye kta, qa den iyotankapi itokam, qa oyate mitawa hunkayapi itokam opeton wo, epe kta, epca. Opeyakiton kta yacin kinhan opekiton wo. Qa opeyakiton kte šni kinhan omakiyaka wo, hecen sdonwaye kta. Wopekiton kta nišnana, qa nihakam he miye. Unkan, Miye opewakiton kta, eya.

5 Unkan Boaz heya, Tohan Naomi nape etanhan maga opeyakiton kinhan, nakun Ruth Moabiwin, te cin tawicu kin etanhan opeyakiton kta, hecen te cin caje kin maga tawaye cin akan eyahde kta.

6 Unkan wopekiton kin heya, Miye opewakiton owakihi šni. Hecamon kinhan taku tawa waye cin mdušice kta: Niye on opekiton wo, he opekiton ma pi, tuka: miye opewakiton kta owakihi šni, nakaš.

7 Unkan ehanna Israel ohna wopekitonpi, qa wiyopeyapi en decen econpi, hecen taku owasin yušutapi, wicašta kin hanpa hduidoka, qa takodaku qu, qa Israel ohna woyaatanin kin hee.

8 Heon wopekiton kin Boaz heciya, Niye on opekiton wo, qa hanpa kin hdušdoka.

9 Unkan Boaz hunkayapi, qa oyate kin owasin hewicakiya, Taku Elimelech tawa owasin, qa taku Chilion tawa, qa Mahlon tawa owasin, nakaha Naomi nape etanhan opewaton wayaatanin he niyepi.

10 Qa nakun Ruth Moabiwin kin mduze kta e opewaton; Mahlon tawicu qon, te cin tamaga akan caje kin ewahde kta heon etanhan; hecen te cin caje kin hunkawanji wicaye cin etanhan, qa otonwe tawa tiyopa etanhan yuspapi kte šni, nakaha wayaataninpi he niyepi.

11 Unkan oyate otonwe tiyopa ohna yakonpi kin owasin heyapi, Wayaatanin heuncapi, Jehovah winohinca yati en hi kin Rachel qa Leah iyececa kte ioiisinicida kte; henanapin Israel tiyohnaka kagapi. Niye Ephratah ohna wowijice kaga wo, qa Beth-lehem ohna caje niyatapi nunwe ye.

12 Qa yati kin Pharez Tamar Judah kiciton tipi kin iyececa kte, nicinca Jehovah wikoška  kin de etanhan nicu kte cin etanhan ye.

13 Unkan Boaz Ruth yuza, hecen tawicu kin hee, qa ekta i, unkan ihdušake kta e Jehovah okihi ya, heon cinca wica, wan ton.

14 Unkan winohinca Naomi heciyapi, Jehovah yawaštepi nunwe; he nakaha wopekiton codan aniciyuštan šni, qa he Israel ohna nina caje yatapi kta ye.

15 Qa nagi ekicetu niciye kta, qa pa niska hehan wonicu kta, nitakos cante niciye cin he cinca šakowin isanpa niye ekta wašte ye, he ton makati.

16 Unkan Naomi hokšidan kin icu, qa maku ohnaka, qa kicin ece.

17 Unkan winohinca hen tipi kin caje wan qupi, qa heyapi, Naomi cinca wan kicitonpi, qa Obed eya caje yatapi, He Jesse atkuku David atkuku, kin hee.

18 Unkan Pharez wicoicage kin dena eepi; Pharez Hezron cinca kaga.

19 Unkan Hezron Ram cinca kaga, qa Ram Amminadab cinca kaga.

20 Qa Amminadab Nahšon cinca kaga, qa Nahšon Salmon cinca kaga.

21 Qa Salmon Boaz cinca kaga, qa Boaz Obed cinca kaga.

22 Qa Obed Jesse cinca kaga, qa Jesse David cinca kaga.