Psalm Wowapi 24- 31

PSALM 24

David tadowan.

1 Maka kin Jehovah tawa, qa woojudan kin; Makowancaya qa tona ounyanpi kin.

2 He iye miniwanca kin akan ehde; Qa wakpa kin iwankam sutaya kaga.

3 Jehovah Paha tawa kin tuwe ekta ye kta he? Qa oyanke wakan tawa ohna tuwe yanke kta he?

4 Tuwe nape kin ska, qa cante kin ecedan; Tuwe takušnišni ekta nagi yeiciye šni; Qa wohnaye on iciconze šni kin.

5 He Jehovah etanhan woyawašte icu kta; Qa woowotanna, Wakantanka Wanikiya tawa kin etanhan.

6 Wicoicage okide unpi kin he dee: Niite akitapi kin hena Jacob eepi. Selah.

7 Tiyopa kin, pa yuwankan ehdaku po; Qa tiyopa ohinniyan un wankan iyeiciya po: Unkan Wowitan Wicaštayatapi kin tin hiyu kta.

8 Wowitan Wicaštayatapi kin he tuwe he? Jehovah wašake ca waditake; Jehovah kicizapi en mdetahunka.

9 Tiyopa kin, pa yuwankan ehdaku po; Qa tiyopa ohinniyan un wankan iyeiciya po: Unkan Wowitan Wicaštayatapi kin tin hiyu kta.

10 Wowitan Wicaštayatapi kin he tuwe he? Jehovah Sabaoth, Wowitan Wicaštayatapi kin hee. Selah.

PSALM 25

David tawa.

1 Jehovah, niye ekta, Minagi wankan wahdomde kta.

2 Wakantanka mitawa, niye wacinciya; Imastece šni nunwe; Tokamayanpi ohimayanpi šni nunwe.

3 Nakun tona anipepi owasin istecapi kte šni: Takušni on wahtanipi kin hena ištecapi kta.

4 Jehovah, nitacanku kin hena makipazo wo; Niohan kin hena onspemakiya ye.

5 Nitowicake en omani makiye ca onspemakiya wo: Wakantanka Wanikiya mitawa kin he niye; Anpetu owasin niye acipe waun.

6 Jehovah, nitowaonšida qa nitocantekiye kiksuya ye; Hena otokahe wanica heon etanhan.

7 Komaška ehan wawahtani qa taku šica ecamon qon hena kiksuye šni ye; Wawacinkta duza tanka eciyatanhan miksuya wo; Jehovah, nitowašte kin heon etanhan.

8 Jehovah wašte qa owotanna; Heon canku kin ohna wahtanipi sa onspewicakiye kta.

9 Tona on hanpi kin woyaco en yuš awicaye kta; Qa onsihanpi kin iye tacanku onspewicakiye kta.

10 Jehovah tohan kin owasin wowaonšida qa wowicake, Tona wicotakuye tawa qa woyaatanin tawa opapi kin hena

11 Jehovah, nicaje kin on etanhan, Wawahtani micicajuju ye, he tanka nakaeš.

12 Wicašta Jehovah kokipe cin tukte e he? Canku hdahnige kte cin he onspekiye kta.

13 Iye nagi wowašte en wanke kta; Qa cinca kin makoce kin tawayapi kte.

14 Tona Jehovah kokipapi kin hena kici wohdakapi ece; Unkan wicotakuye tawa kin sdonyewicakiye kta.

15 Miista ohinniyan Jehovah ekta; Wohmunke etanhan misiha eyaku kta, heon.

16 Miye ekta ihduhomni qa onsimakida ye; Mišnana waun qa makakija, heon etanhan.

17 Micante iyotanhan iyekiye cin yutankapi; Makakije cin etanhan emayaku wo.

18 lyomakišica qa wamayazan kin wanyaka wo; Qa wawahtani owasin micicajuju ye.

19 Tokamayanpi kin wanwicayaka wo; hena otapi; Qa wošicedake wohitika on išicemadapi ece.

20 Minagi micipatan qa emayaku wo; Imastece šni nunwe; wacinciya heon.

21 Woyuecetu qa wicoowotanna mapatanpi kta; Acipe waun kin heon etanhan.

22 Wakantanka, wicokakije owasin etanhan Israel ewicahdaku wo.

PSALM 26

David tawa.

1 Jehovah woyaco maqu wo: Mito ecetu kin ohna mawani, heon: Nakun Jehovah wacinyan waun; Mahicahe kte šni.

2 Jehovah mayukcan qa imayutan wo; Mapaksin micante ko yuecedan ye.

3 Nitowaonšida miista itokam un; Qa wowicake nitawa ohna mawani.

4 Wicašta itonpišni om imdotanke šni; Qa wanakihmanpi kin en mde kte šni.

5 Šicaya econpi omniciye kin šice wadaka; Qa wahtanipi sa om imdotanke kte šni.

6 Wiyaonpepica šni ohna nape wahilujaja; Hecen Jehovah, owayušna nitawa ohomni mde kta.

7 Wopida ho kin on eyanwapaha kta; Qa nionan wakan owasin omdake kta.

8 Jehovah, yati ounyanpi kin he waštewadaka; Qa nitowitan wokeya oyanke kin he nakun.

9 Wahtanipi sa om minagi mnakiye šni wo; Qa mitaniya, we wicašta kin om.

10 Hena napepi ohna wicowicašta šni; Qa nape etapapi wiyopeyapi ojudan.

11 Tuka miye qe mitoecetu ohna mawani kta: Opemakiton qa onsimakida wo.

12 Misiha makomdaya ohna han: Mniciyapi kin en Jehovah mdawašte kta.

PSALM 27.

David tawa.

1 Jehovah iyoyanpa mitawa qa Wanikiya mitawa hee, tuwe kowakipe kta he? Jehovah wiconi mitawa wowašake kin hee, tuwe on kopewahda kta he?

2 Wicašta šica micehpi yutapi kta e mikiyedan upi qehan, Tokamayanpi qa šicemadapi kin hena eepi hicahanpi qa hinhpayapi.

3 Wicota en ahimawanka ešta, micante kokipe kte šni; Ozuye wan ahimanajin esia, de wacinyan waun.

4 Taku wanji Jehovah wakida, he awakita ece kta; Anpetu tona wani kin owasin Jehovah tipi kin en waun kta; Jehovah toiyokipi wannidake kta, Qa tipi wakan tawa kin ohna wawimunge kte.

5 Anpetu šice cin en tawokeya ohna namahbe kta; lye tawakeya onahbe kin en inahbe makiye kta; Imnija wan akan wankan emahnake kte.

6 Unkan nakaha mapa kin toka mihdukšan hiyeya wiciwankam un kte; Heon iye tawakeya ohna wowiyuškin wošna kin wawakiyušna kta; Wadowan kta, han, Jehovah odowan wakahiyaye kte.

7 Jehovah anagoptan wo, miho on wahowamde; Hecen onšimakida qa amayupta wo.

8 Miite akita po: Micante heniciya; Jehovah, niite awakite kta ce.

9 Niite inamakilibe šni wo; Canniniyan nitaokiye ehpeye šni ye; Omakiye cin he niye; amayuštan šni wo; Qa ehpemaye šni, O Wakantanka Wanikiya mitawa.

10 Tohan ate qa ina ehpemayanpi kinhan, Hehan Jehovah miye icu wankan kte.

11 Jehovah, nitacanku kin onspemakiya ye; Qa ocanku owehanna ohna amayan wo, Tona iwanmayakapi kin hena on.

12 Tokamayanpi tawacinpi kin en wicarnaqu šni wo; Wayaatanin itonpi šni kin itkom inahinajinpi, Qa tona wositkihda apoganpi kin.

13 Wiconi makoce kin en, Jehovah towašte opahta wacinwaye šni kinhan.

14 Jehovah wacinyan wo; Waditaka wo, kinhan cante niyuwašake kte: Han, Jehovah wacinyan wo.

PSALM 28

David tawa.

1 Jehovah, niye hoyeciciye kta; Imnija mitawa, miye on inina yanke šni wo; Miye on noge nikpe cinhan, Hehan wicahapi ekta yapi kin iyemacece kta.

2 Houciciya eca wocekiye mitawa ho kin nahon wo; Nitawakeya wakan ektakiya nape mdugata eca.

3 Wicašta šica orn ehpemaye šni wo; Qa tona woahtani econpi kin om; Hena wicikiyedan unpi kin om wookiye eyapi; Tuka cantepi en woyušica yukan.

4 Taku econpi kin iyecen wicaqu wo; Qa šicaya ohanyanpi kin iyececa; lye nape ohanpi kin on niye wicaqu wo; Taku econpi kin iyecen wicakicu wo.

5 Jehovah tohan kin hena awacinpi kte šni, Qa iye nape taku kage cin hena, Heon wicakawanke kta, qa icahwicaye kte šni.

6 Jehovah yawaštepi ntinwe; Wocekiye mitawa ho nahon kin heon.

7 Jehovah mitowašake qa wahacanka mitawa kin hee: Micante wacinyan un, unkan omakiyapi: Heon micante nina iyuškin kta; Qa odowan mitawa on mdatan kte.

 8 Wowašake tawapi kin Jehovah hee; Qa wiconi conkaške wan iye sdakiye cin tawa.

9 Nitaoyate niwicakiya wo; Qa taku nitawa kin hdawašte wo: Nakun wonwicaya wo, Qa owihanke wanica hehanyan wicahduha ye.

PSALM 29

David tadowan.

1 Wašakapi cinca kin, Jehovah qu po; Jehovah wowitan wowašake ko qu po.

2 Iye caje ton nan kin Jehovah kicu po; Wokoyake wakan un Jehovah ohoda po.

3 Jehovah ho kin mini kin akan; Wowitan Wakantanka wakinyan hotonkiya; Jehovah mini tanka kin akan mi.

4 Jehovah ho kin wowašake en; Jehovah ho kin wowitan en un.

5 Jehovah ho kin hantesa bowehwega; Han, Jehovah Lebanon hantesa kin kawehwega:

6 Qa ptejincadan wan iyecen psipsinwicaya; Lebanon qa Sirion, unicorn aškatudan iyececa.

7 Jehovah ho kin peta ide kin yapta ece.

8 Jehovah ho contanka kin yahuhuze kta, Kadeš contanka kin Jehovah yuhuhuze kta.

9 Jehovah ho kin tawiyedan hok ksuye kiya: Qa can kin kahna okihi kta: Unkan iye tipi wakan kin ohna owasin, wowitan, eyapi ece.

10 Jehovah mini tanka kin akan iyotanka; Han, Jehovah Wicaštayatapi iyotanka, owihanke wanica.

11 Jehovah iye taoyate wowa ke wicaqu kte: Jehovah iye taoyate wookiye on wicayawašte kta.

PSALM 30

Odowan. Tipi David yuwakanpi kin on dowanpi. David tawa.

1 Jehovah, iyotan ciyawa kta, niye wankan emayahde; Qa tokamayanpi miye on iyuškinwicayaye šni heon.

2 Jehovah Wakantanka mitawa, Hoyeciciya, unkan niye asnimayaya.

3 Jehovah, wicahapi etanhan minagi iyacu; Woha ekta yapi kin etanhan nimayaya.

4 Wicašta wacantkiye tawa, niye Jehovah kahiyaya po; Qa iye towakan kiksuyapi kin on wopida eya po.

5 Tocanniye kin ista kakpapi hehanyan; Toiyokipi kin he wiconi: Htayetu eca wicaceya yuke kta, Tuka hanhanna dowanpi kta.

6 Unkan miye tanyan waun kin en, Owihanke wanin mapahohopi kte šni ce, epa.

7 Jehovah, nitoiyokipi kin on paha mitawa wowašake yakaga; Niite nayakihbe, unkan mayustnyaya.

8 Jehovah, niye hoyeciciye kta; Qa Jehovah wocekiye ewakiye kta.

9 Mawe kin en wokamna yukan he, Woha ekta kun mde cinhan? Maka mdu kin niyatan kta he? Nitowicake kin oyake kta he?

10 Jehovah, anagoptan qa onšimakida ye; Jehovah, omakiye cin he niye nunwe.

11 Wa inwahda kin he wacipi miyecaga; Heyake šica mayakidusdokeca wowiyuškin on ipiyagmayakiton.

12 Heon wowitan inidowan kta, qa inina un kte šni: Jehovah Wakantanka mitawa, owihanke wanin wopida eciciye kta.

PSALM 31

Dowan itancan kin on. David tadowan.

1 Jehovah niye wacinciya: Owihanke wanin imastece šni nunwe: Nitoowotanna on emahdaku wo.

2 Anohmakiya ye; emayaku inahni wo: Wowašake imnija mitawa kin he niye nunwe; Qa conkaške tipi on nimayanpi kte.

3 Imnija mitawa qa conkaške mitawa kin he niye; Heon nicaje on napata mayaduze ca yuš amayade kta.

4 On hmunkapi nahmana emakionpapi kin etanhan mayadušdute kta; Wowašake mitawa kin he niye, heon etanhan.

5 Mitaniya ninape en owehnake kta; Jehovah wowicake Wakantanka, niye opemayakiton.

6 Tona takušni itonšni awacinpi kin hena šicewicawadaka; Tuka Jehovah wacinwaya ece.

7 Nitowaon da on piwada qa imduskin kte: Woiyokišice mitawa niye wandaka; Wokakije en minagi sdonyaye ciqon:

8 Nakun toka nape en onamayatake šni; Makoce tanka en siha emayahde.

9 Jehovah, onšimada wo, makakija heon: Woiyokišica on išta mašica amayan; Minagi qa mitezi nakun.

10 Wani kin woiyokišica on mašote; Qa waniyetu mitawa comnihdazipi on; Wawahtani on wašake šni amayan; Qa mahuhu kin hena šihtin.

11 Tokamayanpi owasin wowahteda šni mayanpi, Nakun mikiyedan unpi kin hena iyotan; Qa tona sdonmayanpi kin wokokipe mayanpi; Tona tankan wanmayakapi kin hena namakipapi.

12 Taku ta iyecen cante on amiktonjapi; Wakšica kamdecapi wan iyemaceca.

13 Wicota waaiapi kin nawahon; Ihdukšan wokokipe, wiyamaonpapi kin icunhan, Mitaniya icupi kta akitapi.

14 Tuka Jehovah, niye wacinciya; Wakantanka mitawa kin he niye ce, epa.

15 Mitaanpetu ninape ohna un; Tokamayanpi qa šicaya makuwapi napepi etanhan emahdaku wo.

16 Niite nitaokiye aiyehkiya ye; Nitowaonšida on nimayan wo.

17 Jehovah, imaštece šni nunwe, hoyeciciye cin heon: Tona šicapi kin hena ištecapi nunwe, wicahapi en inina unpi kte.

18 Woitonšni ihapi kin inina unpi nunwe; Hena wahanicidaya qa wawostehdaya Ikceya wicašta owotanna aiapi.

19 Tona konicipapi nitowašte wicayecihnake cin he tanka hinca; Wicašta cinca itokam tona wacinniyanpi kin en he wicayakidutanin.

20 Hena nitohndke woinahbe kin en nawicayahbe kta, Wicašta mniciyapi kin etanhan; Wicaceji wakinicapi etanhan wokeya wan ohna wicayakpatan kta.

21 Otonwe šuta wan ohna wowinihanyan cantemakiya, Heon Jehovah yawaštepi nunwe.

22 Tuka miš imanihan qehan, Niišta itokapatanhan makaspapi ce, epa: Hececa ešta cewakiya ho kin namayakihon, Hoyeciciye cehan.

23 Wicašta wacantkiye tawa kin owasin, Jehovah waštedaka po: Tona wicakapi kin hena Jehovah wicakpatan: Qa tuwe wahanhanicidaya ohanye cin he iyakicuya kicicajuju ece.

24 Wašaka po, hecen cante niyutinzapi kte; Jehovah wacinyayapi kin owasin.

Psalm Wowapi 19- Psalm 23

PSALM 19

Dowan itancan kin. David tadowan.

1 Mahpiya kin Wakantanka towitan kin oyaka; Qa okotonyan kin iye nape ohan kin yuotanin ece.

2 Anpetu wan anpetu iapi okiciyake kta; Qa hanyetu wan hanyetu wosdonye kiciyuotanin kta.

3 Iapi wanica qa wicoie wanica; Hena ho kin ecaca nahonpi šni.

4 Hena iyutapi ikan kin maka owancaya iyaya; Qa oiepi kin maka ihanke kin ekta. Hena ehna anpetu wi kin wokeya wan kicaga.

5 Unkan he nakaha tawicuton kte cin wan wankan tipi etanhan hdinanpe cin iyececa; Wicašta wašaka iyecen kiinyanka iyuškin.

6 Mahpiya ihanke kin hetanhan ya ece; Qa unma ihanke kin ekta ki: Qa iyokate cin etanhan takudan nahmanpi šni.

7 Jehovah toope kin yuštanpi, wicanagi kin yuhomni; Jehovah tawoyaotanin kin he wowicake, Witkotkoke cin wicayuksapa ece.

8 Jehovah taku econ wicaši kin hena ecetu, Wicacante iyuškinkiya; Jehovah tawoahope kin ecedan, wicašta iyoyamya ece.

9 Jehovah kokipapi kin he ska, ohinniyan he kta; Jehovah tawoyaco kin he wowicake, ocowasin owotanna.

10 Hena mazaskazi isanpa waštedapi kte; Han, mazaskazi ecedan ota kin isanpa: Nakun tuhmaga canhanpi isanpa skuya; Qa tuhmaga canhanpi sbu kin.

11 Nakun hena on nitaokiye wahokonkiyapi; Hena yuhapi kin wokajuju tanka.

12 Tuwe wahtani ohdahniga okihi he; Nahmanpi kin hena rnicicajuju wo.

13 Nakun woahtani tanka kin etanhan nitaokiye ehdaku wo; Hena wowidagmaye un nunwe; kinhan omaowotanna kta, Qa woahtani ota iyaonpepica šni waun kta.

14 Jehovah imnija mitawa qa tuwe opemakiton kin, Mii oie kin qa micante taku awacin kin, Hena niye iyonicipi nunwe.

PSALM 20

Dowan itancan kin on. David tadowan.

1 Wicocante šica anpetu kin en Jehovah nanihon kte; Jacob ta Wakantanka caje kin wankan enihde nunwe.

2 Tipi wakan kin etanhan oniciye kte; Qa Zion etanhan niyuwašake kta.

3 Nitawošna owasin kiksuye kte; Qa peta on wadušna kin hena icu kta. Selah.

4 Nicante yuze cin eciyatanhan nicu kte; Qa nitawacin owasin ecetuniciciye kta.

5 Woehdaku nitawa on unkiyuskinpi kta; Qa Wakantanka unkitawapi caje kin on Wiyokihedan eunkihdepi kta. Wocekiye nitawa owasin Jehovah ecetuniciciye kte.

6 Jehovah iye Sdakiye cin he nikiya wanna sdonwaya; Mahpiya wakan tawa eciyatanhan nakihon kta. Nape etapa waniye wowašake kin he on.

7 Hunh canpahmihma qa hunh šuktanka, Tuka unkiye Jehovah Wakantanka unkitawapi caje on unkiwinktapi kta.

8 Hena e patujapi qa hinhpayapi: Tuka unkiye naunjinpi qa bosdan unyakonpi.

9 Jehovah wanikiya wo; Hoyeunyanpi anpetu kin en, Wicaštayatapi kin naunkihonpi kte.

PSALM 21

Dowan itancan kin on. David tadowan.

1 Jehovah, nitowašake on wicaštayatapi kin cantewašte kta; Qa woehdaku nitawa on nina iyugkin kta.

2 Taku cantokpani kin he yaqu; Qa iye iha taku da kin he teyahinda šni. Selah.

3 Woyawašte wašte kin yuha itkoyakipe kta; Mazaskazi watesdake wan pa akan eyecihnake kta.

4 Wiconi nicida, he yaqu; Anpetu hanska, ohinniyan qa owihanke wanica.

5 Waniyakiye cin on towitan tanka kte; Woyuonihan qa wowašte akan eyahnake kta.

6 He woyuwašte owihanke wanica yakage kta; Niite etanhan wowiyuškin on iyuikinyakiye kta.

7 Wicaštayatapi kin Jehovah wacinyan un; Unkan lyotan Wankan un tawocantekiye en kahuhuzapi kte šni.

8 Tokaniyanpi owasin ninape iyewicaye kta; Tona šicenidapi kin ninape etapa iyewicaye kta.

9 Niite itokam maza sdoyapi oceti ide kin iyecen wicayakage kta; Jehovah tocanniye on nawicapce kta; Qa peta kin huhnahwicaye kta.

10 Taku icahyapi kin maka etanhan ihangyaye kta; Qa cincapi kin wicašta cinca kin etanhan.

11 Taku šica nihiyohi kta cinpi; Taku šica konzapi, tuka okihipi kte šni.

12 Heon etanhan wicitokam eyakate cinhan, Hekta itoheya hdicu wicayaye kta.

13 Jehovah, nitowašake on nihduwankantuya nunwe, Unkahiyayapi kta, qa nitowašake unkidowanpi kta.

PSALM 22

Dowankiya itancan: Anpao tahinca kin on. David tadowan.

1 Wakantanka mitawa, Wakantanka mitawa, Tokeca ehpemayaya he? Wašicahowamde oie kin en tehan omayakiye šni?

2 Wakantanka mitawa, anpetu icunhan hoyewaye kta, Tuka amayadupte kte šni; Nakun hanyetu en, qa inina manke šni.

3 Tuka niye niwakan, Israel yatanpi kin en ounyaye cin.

4 Atewicunyanpi wacinniyanpi qon; Wacinniyanpi unkan ewicayahdaku.

5 Hoyeniciyapi unkan ewicahdakupi; Wacinniyanpi unkan ištecapi šni.

6 Tuka miye wamduhan hemaca, qa wicašta hemaca šni; Wicašta ekta wowištece mayanpi, qa oyate kin wahtemadapi šni.

7 Tona wanmayakapi owasin wowihaha mayanpi; Aikšin mayanpi, apomnamna makiyapi,

8 Jehovah ihduzeze ce; ehmaku kta; Waštedake cin heon nikiye kta ce, eyapi.

9 Tuka wicatamni etanhan imacu qon he niye; Ina aze kin akan wowacinye mayaqu.

10 Wicatamni kin etanhan niye en aihpemayanpi; Ina tezi kin hetanhan Wakantanka mitawa he niye.

11 Mitehanyan un šni wo, woiyokišice kiyedan un; Nakun waokiya wanica, heon etanhan.

12 Tatanka ota aohdutemayanpi; Bašan etanhan wašakapi kin ohomni takpe maupi.

13 Mnaja ocinšica qa hoton ece kin, He iyecen aimayukawapi.

14 Mini iyecen mapapsonpi; qa huhu mitawa owasin makap sunpi; Micante cansin iyececa, mitezi mahen sdoyapi.

5 Maka cega onspa iyecen mitowašake špan; Nakun miceji macaka en aškapa, Qa wiconte maka mdu kin en amayade kta.

16 Šunka ohomni imayayapi; Wicašta sica omniciye kin aohdutemayanpi; Minape misiha ko capapi.

17 Huhu mitawa owasin wahdawa; Ahitonwanpi qa opamahtupi.

18 Wokoyake mitawa kicipamnipi; Qa mitawa on kansu kutepi.

19 Tuka Jehovah niye mitehanyan un šni ye; Mitowašake he niye, omakiya inahni wo.

20 Mazasagye etanhan minagi ehmaku wo; Mitawa ecedan kin šunka nape kin etanhan.

21 Mnaja i kin etanhan nimayan wo: Unkan tatanka he kin hetanhan amayadupta.

22 Nicaje mihunkawanji owicawakiyuke kta; Omniciye kin cokaya tanhan icidowan kta.

23 Jehovah kokipa yaunpi kin, he idowan po; Jacob cinca owasin, he yuonihan po: Qa Israel cinca owasin, kokipa po.

24 Tuwe onšika kakije cin he ihaha šni qa šicedake šni; Nakun ite inakihbe šni; tuka hoyekiya eca nakihon ece.

25 Omniciye tanka kin en niye on wadowan kta; Tona kokipapi wicitokam wošna mitawa wahdajuju kta.

26 Wahbapidan kin hena wotapi qa imnanpi kta; Tona Jehovah akitapi kin hena idowanpi kte: Nicantepi owihanke wanin ni kte.

27 Maka ihanke kin owasin kiksuyapi qa Jehovah ekta ihduhomnipi kta; Qa Ikcewicašta en wicowazi owasin nitokam ohodapi kta.

28 Wokiconze kin he Jehovah tawa; Qa iye Ikcewicašta kin wowidagwicaya ece.

29 Maka akan tona cepapi owasin wotapi qa ohodapi kta; Watušekšeca ekta kun yapi kin iyuhpa he itokam patujapi kta: Qa tuwe iye nagi nikiya okihi šni kin.

30 Wicacinca wowidagwicaye kta; Hena Itancan kin wicoicage wicahdawa kta.

31 Upi qa toowotanna kin oyakapi kta; Oyate wan tonpi kte cin en; Iye hecon kin heon.

PSALM 23

David tadowan.

1 Wonmakiye cin Jehovah hee; Takudan imakakije kte šni.

2 Peji toto en iwanke maye kta; Wicoozi mini kin icahda yus amaye kta.

3 Minagi yuecetu kte; Woowotanna canku kin ohna amaye kta; Iye caje kin on.

4 Han, wiconte ohanzi kaksiza kin en mawani kinhan, Taku sica kowakipe kte šni, niye mici yaun heon; Canšakadan nitawa qa cansagye nitawa, hena cantohnagmaye kta.

5 Tokamayanpi wicitokam wahna wotapi wan wiyeya miyecihnake kta; Wihdi on pa sdamayakiye; Wiyatke mitawa iyatahde.

6 Awicakehan wani kta anpetu owasin, Wowašte wowaon da ko miyahna un kta: Qa Jehovah tipi kin en ounwaye kta, anpetu hanškaška.