Ohanyanpi Qon 21-24 (Acts 21-24) Paul arrested

OHANYANPI QON WICOWOYAKE 21.

1 Unkan hena ehpewicunyanpi, qa pacanan iyeunyanpi, hehan Coos ekta owotanna unkupi, qa ihannanna hehan Rhodes ekta, qa hetanhan Patara en iyounhipi.

2 Qa hen wita wata wan Phenice ekta watom ye kte cin iyeunyanpi, qa he en unkopapi, qa hetanhan unyanpi.

3 Qa Cyprus taninyan wanunyakapi, hehan catka tanhan ehpeya unhiyupi, qa Syria ekta watom unkupi, qa Tyre en unhdihunipi, hen wata taku ohnaka kin wahetajupi kta.

4 Unkan waonspewicakiyapi kin iyewicunyanpi, qa hen anpetu šakowin unkokihpapi; hena e qe Woniya Wakan eciyatanhan Palos Jerusalem ekta ye kte šni, keciyapi.

5 Tuka anpetu kin hena wanna unkihunnipi, hehan hetanhan inaunpapi, qa hena iš tawicupi šiceca ko owasin opapi, otonwe itankata hehanyan, qa huta kin ekta canpeška makehde inaunjinpi, qa ptaya ceunkiyapi.

6 Unkan hehan nape unkiciyuzapi, qa unkiš wata kin en unkopapi, tuka iyepi kin ekta hdapi.

7 Unkan Tyre etanhan watom unkupi kin he ihunni unkiyapi, hehan Ptolemais ekta unhipi; qa hunkawanjin kiciyapi kin nape wicunyuzapi, qa anpetu wanjidan om unkanpi.

8 Unkan ihannanna qehan, tona Palos kici unyakonpi kin, hetanhan inaunpapi, qa Cæsarea en iyounhipi; qa Philip wotanin wašte oyake cin he ti kin en unyanpi, šakowinpi qon he wanji ee, qa he kici unyakonpi.

9 Unkan he cunwintku topa witanšna unpi, hena wokcanpi ece.

10 Unkan hen anpetu ota owanji unkanpi kin icunhan, wicašta wokcan wan Agabus eciyapi, Juda makoce kin hetanhan apamahde hi.

11 Qa en unhiyupi qehan, Palos ipiyaka tawa kin icu, qa on siha nape ko iyaihdaške ca, Woniya Wakan kin heya ce, Wicašta tuwe ipiyaka kin de tawa hecinhan, he Juda wicašta, Jerusalem ekta,hecen kaškapi kta, qa Ikcewicašta kin nape kin en wicaqupi kta ce, eya.

12 Unkan he naunhonpi qehan, tona en tipi kin hena om, ceunkiyapi, Jerusalem ekta ye kte šni.

13 Tuka Palos, Token ecanonpi qa yaceyapi, qa hecen cante mayadutakunipi šni he? Jesus Itancan caje kin on Jerusalem ekta makaškapi, qa nakun mate kta e wiyeya manka ce, eya.

14 Unkan wicada šni qehan, unkayaštanpi qa, Itancan tawacin kin ecen econpi nunwe, unkeyapi.

15 Unkan anpetu kin hena iyohakam owasin piunkiciyapi, qa Jerusalem ekta itawankanhde unyanpi.

16 Nakun Cæsarea etanhan waonspewicakiyapi kin wanjikji unkopapi, qa wanji Mnason eciyapi kin he aupi, he Cyprus etanhan, wanakaja waonspekiyapi kin heca, he ti kin en unyakonpi kta.

17 Unkan Jerusalem ekta iyounhipi, hehan hunkawanjinkiciyapi kin iyuškinyan tin unkicopi.

18 Unkan ihannanna kin hehan, Palos kici Jakob ekta unyanpi; unkan hunkawicayapi kin owasin en yukanpi.

19 Hena nape wicayuze ca, hehan Ikcewicašta kin ekta iye woyake cin on token Wakantanka econ qon owasin ecekcen owicakiyaka.

20 Unkan hena nahonpi qehan, Itancan kin idowanpi qa Palos heciyapi, Cinye, Juda wicašta kektopawinge ota wicadapi, qa owasin wicoope kin sutaya awakicinpi kin he wandaka.

21 Qa niye, Juda oyate Ikcewicašta ehna yakonpi kin hena owasin Moses toope kin ahduštanpi kta e onspewicayakiye ca, cinca bawicakicihdayapi kte šni, qa wicohan kin hena eciyatanhan manipi kte šni, keha keyapi e nahonpi.

22 Heon toketu kta he? Awicakehan wicota kin kawitaya iheyapi kte. Wanna yahi kin he nahonpi.

23 Hecen token unkeniciyapi kin de ecen econ wo. Wicašta torn token iciconzapi kin hena om unyakonpi.

24 Hena owicape ca, om ihduska, qa mazaska on owicakiya wo, hecen paha kin hdušdapi kta. Unkan hecen token oniyakapi nahonpi qon hena taku šni, qa niš eya owotanna mayani, qa wicoope kin opeya yaun kin he owasin sdonyapi kta.

25 Tuka Ikcewicašta, tona wicadapi kin hena wowapi wicunkicagapi, qa wicohan kin dena takudan opapi kte šni unkeyapi qon, tuka taku wakagapi wakiyušnapi, qa we, qa taku we ye šni yutapi kin, qa wiinahmanpi kin hena en ihdoipi kte šni ce, hecedan unkeyapi.

26 Hehan Palos wicašta kin hena owicape ca, ihanhanna kin hehan om ihduska, qa ihduskapi anpetu kin wanna henakeca kte cin he yuotanin kta e tipi wakan kin tin iyaya; taku qupi wan otoiyohi on wošnapi kta hehantu.

27 Unkan anpetu šakowin qon wanna henakeca kte hehan Juda wicašta, Asia etanhan upi qon hena tipi wakan kin en un wanyakapi qehan, oyate kin owasin iyowicapaštakapi qa Palos iyahpayapi;

28 Qa hotaninpi, Israel wicašta kin, ounkiya po; wicašta kin de oyate kin en, qa wicoope kin, qa nakun tipi kin de aie ca, owancaya hecen onspewicakiya; qa nakun Helenes wicašta kin tipi wakan kin en awicahi, qa hecen tipi iyotan wašte kin de ašamya ce, eyapi.

29 He itokam Trophimus, Ephesus wicašta kin heca, e otonwe kin en kici un qon he wanyakapi, unkan he Palos tipi wakan kin en ahi, kecinpi.

30 Unkan otonwe kin ocowasin nina oqoyapi, oyate kin kawitaya iheyapi, qa Palos icupi, qa tipi wakan kin etanhan tankan yusdohan ayapi, unkan ecahankeya tiyopa kin ecen iyeyapi,

31 Wanna ktepi kta e hakitapi, hehan akicita tancan wicobe yuhe cin he, Jerusalem owancaya owodutaton ce, eya okiyakapi kin he nahon;

32 Qa kohanna akicita, akicita tancan ko iwicacu, qa inyang ye ca ekta wicai. Unkan akicita tancan akicita ko wamwicayakapi qehan, Palos apapi kin ayuštanpi.

33 Hehan akicita tancan kin en ye ca, icu, qa maza icicahiha nom on kaške wicaši; qa he tuwe kin, qa token econ kin he, eya iwicawanga.

34 Tuka oyate kin hunh taku eya hotaninpi, qa hunh iš togye eyapi. Unkan owodutaton kin on wowicake kin sdonya okitpani, heon conkaške kin mahen aye wicaši.

35 Unkan can iyadipi kin en hdipi, hehan akicita kin yuha ayapi, oyate kin aotins upi kin heon etanhan.

36 Oyate kin iyuhpa ihakam yapi qa, Yutokan aya po, eya hotaninpi.

37 Unkan conkaške kin mahen ayapi kta, hehan Palos akicita tancan kin heciya, Taku eciciye kta tuka ce, iyowinmayakiye kta he? Unkan iš, Helenes iapi kin onnispe he? eya.

38 Egypta wicašta anpetu kin dena itokam icage ca, wicašta wabotica kin hecapi kektopawinge topa ihakam hewoskan makoce kin ekta awicaye ciqon he niye šni he?

39 Unkan Palos, Juda wicasla Cilicia en, Tarsus otonwe kin hetanhan waun, otonwe šice šni en imacaga. Oeciciya ce, oyate kin taku ewicawakiye kta, iyowinmakiya wo, eya.

40 Hecen iyowinkiya; unkan Palos can iyadipi kin akan inajin, qa oyate kin namwicakicawin. Unkan inina yukanpi qehan, Hebrew iapi kin on ie ca, hewicakiya;

OHANYANPI QON WICOWOYAKE 22.

1 Wicašta hunkawanjinciyapi qa hunkakeciyapi kin, nakaha niyepi en wowahdake cin namahon po.

2 Unkan Hebrew iapi un wowicakiyake cin he nahonpi qehan, iyotan inina yukanpi.

3 Unkan hecen eya; Juda wicašta kin hemaca, Cilicia ekta Tarsus en matonpi, qa otonwe kin de en icahmayanpi, qa Gamaliel siha kin ekta, hunkake wicayapi wicoope yuhapi kin tanyan onspemakiyapi, qa Wakantanka on nina inawahni, niyepi kin owasin nakaha yaunpi kin iyececa.

4 Qa canku kin de wiconte aiyahdeya šicaya wakuwa, wicawakaške ca, wicakaška tipi kin en iyewicawaya, wica winyan ko.

5 Hecen wošna kagapi itancan, qa hunka wicayapi kin owasin mayaotaninpi ece. Hena eepi hunkawanjinkiciyapi kin wowapi wicakicagapi qa maqupi qon, hecen Damascus ekta imdamde, heciya tona yukanpi kin hena wicakaška Jerusalem ekta wicakaštakapi kta e awicawau kta, heon etanhan.

6 Ohnihde waun, qa Damascus wanna ikiyadan, unkan wiyotanhe cin hehan, iho, ihnuhanna mahpiya kin eciyatanhan iyoyanpa tanka wan aohdute mayan.

7 Hehan makata mahinhpaye ca, wicaho wan nawahon, Saul, Saul, tokeca e šicaya mayakuwa he? emakiya.

8 Unkan miš amdupte ca, Itancan nituwe he? epa. Hehan iš, Jesus Nazareth etanhan šicaya yakuwa kin he miye ce, emakiya.

9 Unkan tona om waun kin ojanjan kin wanyakapi, qa nina inihanpi, tuka wicaho omakiye cin he nahonpi šni.

10 Hehan miš, Itancan token ecamon kta he? epa. Unkan Itancan kin, Najin, qa Damascus ekta ya wo, heciya token ecanon kte cin owasin oniciyakapi kta ce, emakiya.

11 Unkan iyoyanpa wiyatpa kin on wawanmdake šni, hecen tona om waun kin hena minape kin yus amayanpi, qa Damascus en wai.

12 Qa wicašta wan, Ananias eciyapi, wicoope kin eciyatanhan owotanna, Juda oyate hen yakonpi kin owasin he oyakapi;

13 He en mahi, qa najin, qa hemakiya, Saul, misunka tonwan wo. Unkan wihiyayedan oape kin he en ekta ewatonwan.

14 Hehan iye heya; Hunkake wicunyanpi Wakantanka tawapi kin nicahniga, iye tawacin kin sdonyaye kta, qa Wanji Owotanna kin wandake ca he i kin eciyatanhan ho kin nayahon kta;

15 Qa iye on taku wandake ca, nayahon kin wicašta owasin owicayakidake kta heon.

16 Unkan nakaha taku e ayape he? Najin wo, baptem nicupi kta, Itancan caje kin hoyeyakiye kta, hecen wayahtani kin yakpakinte kta ce, eya.

17 Unkan ake Jerusalem ekta icicawin wahdi, qa tipi wakan kin ohna cekiya waun, hehan woakiktonje wan mahiyahde;

18 Qa Itancan kin wanmdaka; he kaken emakiya; Inahni, qa kohanna Jerusalem etanhan inanpa wo, mayadaotanin kin he wicadapi kte šni ce, eya.

19 Unkan hepa; Itancan, tona wacinniyanpi kin hena wicawakaška, qa omniciye tipi kin ohna wicawakaštaka ece qon he sdonyapi:

20 Qa Stephanos waayatanin nitawa kin we papsonpi qehan, hen nawajin, qa he iyowinwicawakiye ca, tona ktepi tašina awanwicaweciyaka qon.

21 Hehan, Hunktiya wo, detanhan tehan ye ciši, Ikcewicašta kin ekta, emakiya ce.

22 Unkan wicoie kin de hehanyan nahon yukanpi, hehan nina hotaninpi qa, Wicašta kin de maka kin etanhan aya po, ni kta e iyececešni ce, eyapi.

23 Unkan hotankakiya hotaninpi, qa šina ehpekiyapi, qa watušekšeca wankan yeyapi kin;

24 Hehan akicita tancan kin, conkaške mahen aupi, qa kapsinpsintapi kin on wiwangapi kta, keya; hecen tokeca on oyate kin nina aoqoyapi kin he sdonye kta.

25 Unkan tehmiso on kaškapi icunhan, Palos akicita tancan wan en najin kin heciya, Roma wicašta kin heca, qa nahahin yacopi šni, tuka yakapsinpsintapi kta oyakihipi he?

26 Akicita tancan kin he nahon, unkan akicita tancan tanka kin hoši hde ca heya; Taku ecanon kte cin he itonpa wo, wicašta kin he Roma kin heca.

27 Hehan akicita tancan tanka kin en hi, qa heciya, Roma wicašta kin henica he, omakiyaka wo? Unkan, Han, eya.

28 Unkan akicita tancan qon heya, Ihduhapi kin de ota iyopewakiya, eya. Tuka miš hecen matonpi ce, Palos eya.

29 Heon kohanna tona Palos wiwangapi kte cin hena ayuštan iyayapi, qa akicita tancan tanka kin nina kopehda; he kaška tuka Roma wicašta kin heca e sdonye cin he etanhan.

30 Unkan ihanhanna qehan, Juda oyate taku iyaonpapi hecinhan, he atayedan sdonye kta, heon icaške kin etanhan kiyuške ca, wošnapi kagapi, hunkawicayapi ko owasin mniciye wicaši, qa hehan en ahi, qa wicacokaya ehde.

OHANYANPI QON WICOWOYAKE 23.

1 Unkan Palos omniciye kin opawicahta yanke ca, Wicašta hunkawanjin eiyapi, Wakantanka itokam mitawacin ocowasin wašte, anpetu kin dehan wani, eya.

2 Unkan Ananias wošna kagapi itancan kin, tona ikiyadan najinpi kin Palos i kin ohna ape wicaši.

3 Hehan Pains heciya, Conkaške skayapi kin, Wakantanka anipe kta ce; wicoope kin eciyatanhan mayadaco kta e yahidotanka tuka wicoope kašeya amape wicayaši.

4 Unkan tona en najinpi kin, Wakantanka wawayušna itancan tawa kin he šicaya owayakiya he? eyapi.

5 Unkan Palos, Hunkawanjinciyapi, he wawayušna itancan kin ee sdonwaye šni, eya; Wowapi en kaken kagapi, Nitaoyate kin en wicašta itancan kin dašice kte šni ce.

6 Tuka apa Sadducee, qa apa iš Pharisee kin hecapi e Palos iyukcan qehan, hehan omniciye kin en hotankakiya heya; Pharisee kin hemaca,qanakun Pharisee cinhintku kin, qa wicate cin piya ikicagapi kte cin ape waun kin heon etanhan nakaha mayacopi ce.

7 Unkan hecen eye cehan, Pharisee Sadducee kin om hdokinicapi, qa omniciye kin akipam iyeyapi.

8 Piya ikicagapi kin wanica,qa mahpiya ohnihde, wanagi ko wanica ce, Sadducee kin eyapi ece; tuka Pharisee kin, Napin yukan ce, eyapi ece.

9 Hecen nina owodutaton, qa wowapi kagapi Pharisee etanhanpi kin hena inajinpi, qa wicakigepi,qa heyapi, Wicasla kin de en taku šica takudan iyeunyanpi šni; tuka wanagi, qa mahpiya ohnihde wan taku okiyake cin he hecetu kinhan, Wakantanka kici unkicizapi kte šni.

10 Nina hdokinicapi, unkan Palos yušpašpa icupi kta e akicita tancan tanka kin kokipe ca, heon akicita kin kun ye wicaši, hena wicacokaya tanhan icupi, qa conkaške kin mahen akupi kta.

11 Unkan he ihtayetu, hehan Itancan kin en hinajin qa, Palos cante wašte wo, Jerusalem en mayadaotanin kin he iyecen Roma ekta mayadaotanin kta ce, eciya.

12 Unkan anpa kamdeze cin, hehan Juda wicašta wanjikji okodakiciye wan kagapi, qa witaya iciconzapi, takudan yutapi kte šni, qa takudan yatkanpi kte šni, Palos ktepi šni kin hehanyan kta, keyapi.

13 Wakiconzapi kin hena wicašta wikcemna topa aktonpi.

14 Unkan hena wawayušna tankapi, qa hunka wicayapi ko en wicayapi, qa heyapi; Palos unktepi šni kin hehanyan, takudan untapi kte šni e wokonze on unkiconzapi.

15 Heon etanhan hanhanna, niye omniciye kin owasin om akicita tancan tanka kin he au yašipi kta, taku sanpa atayedan inungapi kta seca e heon; qa unkiš he ikiyadan aupi šni, hehan unktepi kta e wiyeya unkanpi kta ce, eyapi.

16 Unkan hena nahmana iyape yukanpi kin he Palos tonškaku kin nahon qehan, hehan ekta ye ca conkaške kin timahen i, qa Palos okiyaka.

17 Hehan Palos akicita tancan wanji kico qa, Koška kin de akicita tancan tanka kin ekta aya wo, taku okiyake kta ce, eya.

18 Unkan heon he icu, qa akicita tancan tanka kin ekta ai qa, Palos kaškapi un kin he mico, qa koška kin de cicahi kta e econ maši, taku oniciyake kta keya ce, eya.

19 Hehan akicita tancan tanka he nape yuze ca kicišnana icunom iyaye ca, Taku omayakidake kta he? eya iwanga.

20 Unkan, Heyakecinhan Juda wicašta kin omniciye kin en Palos au nišipi kta wanna konzapi, taku sanpa atayedan iwangapi  kta seca e heon heyapi.

21 Tuka niš awicayupte šni wo. Wicašta wikcemna tom aktonpi kin wokonze on wakiconzapi, Palos ktepi šni hehanyan takudan yutapi kte šni qa takudan yatkanpi kte šni, hena nakaha wiyeya yukanpi qa niš awicadupte kte cin he ape yukanpi, eya.

22 Hehan akicita tancan tanka koška qon hdicu ye ca, Hena omayakidake cin he tuwedan sdonye ye šni wo, eciya.

23 Qa hehan akicita tancan nom wicakico qa, Akicita opawinge nom taku owasin on wicayuwiyeya po, qa nakun šuktanka akan yotankapi kin wikcemna šakowin, qa wahukeza yuhapi kin opawinge nom, hanyetu kin oape iyamni, hehan Cæsarea ekta yapi kta ce.

24 Nakun šuktanka wiyeya ehnaka po, Palos akan yankekiyapi kta, qa Felix wicašta itancan yanke cin he en tanyan aipi kta, ewicakiya.

25 Hehan wowapi wan kaken kaga:

26 Kladius Lysias, Felix wicašta itancan iyotan wašte kin wowapi kicaga ce. Wookiye.

27 Wicašta kin de Juda wicašta kin icupi,qa wanna ktepi kta hehan akicita hduha en wai, qa etanhan iwacu, he Roma wicašta kin heca e nawahon kin heon.

28 Qa taku iyaonpapi kin he tanyan sdonwaye kta wacin, heon iye omniciye yuhapi kin en awai;

29 Qa iye wicoope hduhapi kin eciyatanhan wiwangapi kin iyaonpapi wanmdaka, tuka taku on ktepi, qa kaškapi kta e iyaonpapi kin takudan iyewaye šni.

30 Qa wicašta kin de Juda wicašta nahmana iyape yukanpi kin he omakiyakapi qehan, kohanna niye ekta aye wicawaši, qa tona taku en aupi kte cin hena hecen iyaonpeya eniciye wicawaši. Tanyan yaun nunwe.

31 Hehan akicita iš econ wicaši qon iyecen Palos hanyen icupi, qa Antipatris en aipi;

32 Qa hanhanna hehan šuktanka akan yotankapi kin hena hetanhan ayapi kta e ehpewicayapi, qa conkaške kin ekta hdicupi.

33 Unkan hena iš Cæsarea ekta ipi, qa wicašta itancan wowapi qon qupi qehan, hehan Palos itokam ehdepi.

34 Unkan iye he yawa, qa makoce kin tukte e etanhan un hecinhan wiwanga; qa Cilicia etanhan un kin he sdonya;

35 Hehan, Tohan tona taku iyanionpapi kin hena nakun hipi kinhan, hehan miš eya nacihon kta ce, eya; qa Herod woyaco tipi tawa qon he ohna awanyag wicaši.

OHANYANPI QON WICOWOYAKE 24.

1 Unkan hetanhan anpetu zaptan, hehan Ananias wawayušna itancan kin hee, qa hunkawicayapi kin om, ekta apamahde ya, nakun wicašta ieksapa wan, Tertullus eciyapi, hena wicašta itancan kin itokam Palos taku iyaonpapi kta.

2 Unkan en kicopi qehan, Tertullus taku iyaonpe ca heya;

3 Niye enitanhan wookiye tanka unhapi ce, qa waawandake cin eciyatanhan oyate kin de en wicohan wašte econpi ece kin he ohinniyan qa owancaya unkicupi, qa on, Felix iyotan wašte, wopida unkeniciyapi ce.

4 Tuka sanpa nagiyeciye kte šni, heon ceciciya ce, nitowaonšida kin on wicoie wanjikji naunyahonpi kta.

5 Wicašta kin de makošice, qa maka kin owancaya Juda oyate cante okicuninwicaye cin, qa yuomdecapi wan Nazareth etanhanpi, ewicakiyapi kin he en mdetahunkapi kin he wanji dee e iyeunyanpi ce.

6 He tipi wakan kin yušape kta; unkan hehan unkiš unkicupi, qa wicoope unkitawapi kin eciyatanhan unyacopi kta;

7 Tuka Lysias akicita tancan tanka kin ekta i, qa wicowašake tanka on unnapepi kin etanhan eyaku.

8 Qa tona taku iyaonpeya eyapi kin hena niye kin ekta u wicaši. Hena wiwicanunge cinhan taku iyaunkonpapi kin owasin atayedan sdonyaye kta ce.

9 Unkan Juda wicašta kin iš waayuptapi qa, Hena hecetu ce, eyapi.

10 Hehan wicašta itancan kin Palos ie kta e namkicawin, hehan waayupte; Oyate kin de en waniyetu ota wicašta wayaco nanka e sdonwaya, heon etanhan nakaha iyuškinyan wowahdaka.

11 Hecen Jerusalem ekta cekiya imdamde cin, hehantanhan wanna anpetu ake nomnana e sdonyaye kta oyakihi.

12 Qa tipi wakan kin ohna tuwe kici awakinica ecen wanmayakapi šni, qa omniciye tipi kin ohna, qa otonwe kin en, oyate kin wicayuomdeca waun šni.

13 Qa nakaha taku iyamaonpapi kin hena yasutapi kta e okihipi šni.

14 Tuka de ociciyaka, yuomdecapi kin cajeyatapi qon he canku kin ohna hunkake wicawaye cin Wakantanka tawapi kin ohowada, qa wicoope, qa wicašta wokcan taku owapi qon hena owasin wicawada:

15 Qa Wakantanka wacinwaye, qa wicate cin, wašte šica ko, ake woekicetu kte cin he ape waun, he iš iyepi nakun hecen wicadapi.

16 Heon Wakantanka, qa nakun wicašta kin en tawacin takudan iyaonpepica šni waun kta e ohinniyan opimiciya ce.

17 Unkan nakaha waniyetu ota iyohakam, mitaoyate kin taku qupi, wošnapi ko wicawecicau kta e wahdi.

18 Qa hecen tipi wakan kin ohna mihduska waun, wicota qa owodutaton kin unmana en owape šni, ecen Juda wicašta Asia etanhan wanjikji wanmayakapi qon.

19 Hena eepi kin niye en nihiyupi, qa taku yuhapi kinhan iyamaonpapi kta tuka.

20 Qa dena iš, omniciye kin en nawajin kin, he icunhan taku šica ecamon kin taku sdonyapi kinhan oyakapi kta.

21 Tuka wicacokaya nawajin qehan, wicoie wanjidan taninyan epa, Anpetu kin de wicate cin woekicetu kte cin heon mayadacopi, epe ciqon hee, eya.

22 Unkan Felix hena nahon qehan, qa canku kin de on sanpa tanyan sdonye kta cin kin heon, hde wicaši qa, Tohan Lysias akicita tancan tanka hi kinhan, niyepi kin on taku owasin sdonwaye kta ce, eya.

23 Qa akicita tancan wan Palos awanyag kiye ca, woozi yuhe kta, qa iye takuwicaye cin tuwe en hi qa okiye kta cin kinhan tehinda kte šni, keya.

24 Unkan anpetu tonana iyohakam, Felix, qa tawicu Drusilla eciyapi, Juda winohinca kin heca, he kici hi, hehan Palos kico, qa Messiya wacinyanpi kin on nahon.

25 Unkan Palos wicoowotanna, qa iyatahde iciyapi šni, qa woyaco u kte cin hena oyake cin, he icunhan Felix cancan, qa, Nakaha ekta hda wo, tohan tanyan iyomakipi kinhan ake cico kta ce, eya. 

26 Palos kiyuške kta e on mazaska qupi kta kecin, heon kico, qa kici wohdaka ece.

27 Tuka wanna waniyetu nonpa, hehan Felix yanke cin en Porcius Festus hiyotanka. Unkan Felix Juda oyate kin iyokipi wicaye kta cin, qa heon Palos kaškapi ecen ehpeya kihda.

Ohanyanpi Qon (Acts) 13-16 (Paul, Barnabas, Lydia included)

OHANYANPI QON WICOWOYAKE 13.

1 Unkan Antioch ekta okodakiciye kin en wicašta wokcan waonspekiya ko wanjikji yukan; Barnabas, qa Simeon he nakun Niger eciyapi, qa Lucius Cyrene etanhan, qa Manaen, Herod wicašta ihdawa qon kici icage cin hee, qa Saul.

2 Hehan Itancan kin cekiyapi qa wote šni unpi kin icunhan, Woniya Wakan kin heya; Barnabas Saul kici wokicanye iwicaweco kin heon ewicamicihde po, eya.

3 Unkan hehan takudan yute šni wocekiye eyapi, qa nape awicaputakapi, hecen ye wicašipi.

4 Hena Woniya Wakan tokiya ye wicaši, unkan Selucia ekta iyohipi, qa hetanhan Cyprus ektakiya watom yapi.

5 Qa Salamis en iyukanpi hehan, omniciye tipi Juda oyate tawapi kin ohna Wakantanka oie kin oyakapi, qa Johannes he ookiye yuhapi.

6 Unkan wita kin opta yapi, qa Paphos ekta iyohipi qehan, wicašta wapiyapi econ kin, wicašta wokcan itonšni, Juda wicašta kin heca wan, Barjesus eciyapi he wanyakapi:

7 He Sergius Palos, wicašta ksapa, makoce kin en itancan yanke cin he kici un. He qe Barnabas qa Saul kici wicakico, qa Wakantanka oie kin nahon cin.

8 Tuka Elymas wapiye cin, caje kin hecen kapi, he wicakipajin, qa wicašta itancan kin wacinyanpi kin etanhan yuhomni kta e akita.

9 Hehan Saul, iye nakun Palos eciyapi, Woniya Wakan on ojudan he opahta najin,

10 Qa heya; Taku wohnaye owasin on ojudan, qa wicohan šica owasin, Wakanšica cinca niye ca, taku owotanna owasin toka yaye cin, Itancan tacanku owotanna kin kašeyaye cin he aduštan kte šni he?

11 Hecen dehan inyun, Itancan nape kin iyahdeniyan; unkan anpetu ota ištanigonge ca anpetu wi kin waniiake kte šni, eciya. Unkan ihnuhanna opo qa otpaza wan ahinhpaya; qa tuwe nape yus aye kta e akin iyaya.

12 Hehan taku econpi kin wicašta itancan kin wanyake cehan wicada, qa Itancan tawoonspe kin on yušinyaya.

13 Unkan Palos tona om un kin hena Paphos etanhan pacanan iyeyapi, qa Pamphylia ekta Perga en iyohipi. Hehan Johannes awicayuštan qa Jerusalem ekta icicawin hda.

14 Hehan Pergs etanhan inanpapi, qa Antioch Pisidia en, he ekta ipi, qa anpetu wakan hehan omniciye tipi kin en tin iyayapi, qa iyotankapi.

15 Unkan woope, qa wicašta wokcan tawowapi kin, hena yawapi enakiyapi qehan, omniciye tipi kin en wicašta itancan wicakiyapi kin iš wicakicopi qa, Wicašta hunkawanjin unniyanpi wicakicanpte oie wanji duhapi kinhan oyate kin owicakiyaka po, ewicakiyapi.

16 Hehan Palos najin, qa namwicakicawin qa heya, Israel wicašta, qa tona Wakantanka kokipapi kin anagoptan po.

17 Israel oyate kin de Wakantanka tawapi kin he hunkake wicunyanpi kin wicakahnige ca, oyate kin Egypta makoce kin en yakonpi kin he icunhan yuwankan iwicacu, qa isto hduwankan iyeye cin on tankan awicau.

18 Qa waniyetu wikcemna topa hehanyan hewoskan makoce kin en won wicakiya.

19 Qa oyate šakowinpi Kanan makoce kin en, ihang wicaye cehan, makoce kin woohiye eciyatanhan kicipamni wicakiya.

20 Qa he iyohakam, wicašta wayaco kin heca wicaqu, waniyetu opawinge topa sanpa wikcemna zaptan hehanyan, ecen Samuel wicašta wokcan qon icaga.

21 Unkan hehan wicaštayatapi wan cinpi; qa Wakantanka Saul, Kiš cinhintku, Benjamin wicoun kin hetanlian, wicašta kin he wicaqu, waniyetu wikcemna topa hehanyan.

22 Qa he heyata iyeye cehan, David icahwicakiciciye ca wicaštayatapi kaga; he oyake ca heya, David Jesse cinhintku kin he iyewakiya, wicašta wašte wakidake cin, he mitawacin kin ocowasin ecen econ kta ce.

23 Wakantanka token eye ciqon he eciyatanhan, wicašta kin de cinca kin etanhan, Jesus Wanikiya kin, Israel oyate kin icahwicakiciciya.

24 He ihdutanin šni qon itokam, Johannes baptem on ihduecetupi kte cin he Israel oyate kin iyuhpa en eyanpaha owicakiyaka.

25 Unkan Johannes oinyanke kin ihunniye kte cin, hehan hecen eya, Miš matuwe kecannipi he? He miye šni; tuka iho, wanji mihektam u kin he tahanpe siha kin etanhan kiyuška owakihi šni ce.

26 Wicašta hunkawanjin ciyapi kin, Abraham cinca wicaye cin, qa tona Wakantanka kokipapi kin, niš niyepi wiconi oie kin de oniciyakapi.

27 Tona Jerusalem en yakonpi, wicašta itancan wicayuhapi ko, he iyekiyapi šni, qa wicašta wokcan oiepi,anpetu wakan eca yawapi ece kin he nakun; hecen he yacopi kin on hena ecetuyapi.

28 Qa taku on te kte cin takudan iyeyapi šni qeyaš, he ktepi kta e Pilate icekiyapi.

29 Qa on taku wowapi en kagapi qon owasin ecetuyapi qehan, can kin etanhan eyakupi, qa ohna hnakapi wan en ohnakapi.

30 Tuka te cin etanhan Wakantanka najin kiya.

31 Unkan tona Galilee etanhan Jerusalem ekta om hi qon hena anpetu ota wanhdakapi, qa hena eepi dehan oyate kin wicakiyaotaninpi ece.

32 Unkan unkiye wotanin wašte unkoniciyakapi, hunkake wicunyanpi taku iwahowicaye ciqon,

33 He cincawicayapi unkiyepi kin en, Wakantanka ecetukiya, Jesus piya icahkiye cin hee on; hecen odowan icinonpa kin en kaken owapi qon, Micinkši kin he niye, anpe dehan cinca cicaga ce.

34 Qa wicate cin etanhan najin kiye ca, wicahwin kin ekta i kte šni, heon kaken eya, David towaonšida wicakapi kin he cicupi kta ce.

35 Heon etanhan wanji tokeca en hecen eya; Wanji Owotanna nitawa kin he wicahwin wanyake kta e iyowinyakiye kte šni.

36 David wicoicage tawa kin tanyan owicakicihan, Wakantanka tawacin kin eciyatanhan, hehan ištinma iyaye ca, hunkake wicaye cin om hnakapi, qa wicahwin wanyaka.

37 Tuka tuwe Wakantanka najin kiye cin he wicahwin wanyake šni.

38 Heon wicašta hunkawanjin ciyapi, wicašta kin de eciyatanhan, woahtani kajujupi kin oniciyakapi e sdonya po.

39 Qa taku owasin, Moses tawoahope kin niyuowotanpidan kta e okitpani kin hena ee kaeš etanhan, tuwe wicada kinhan iye on owotanna kagapi kta.

40 Heon itonicipa po, okinni taku wicašta wokcan kin en cajeyatapi qon he en nihiyahdepi kta:

41 Tona ayaktapi šni kin, wawanyakapi a inihanpi qa yutakuni šni iyeiciya po; anpetu nitawapi kin en wicohan wanji ecamon kta, qa wicohan kin he tuwe oniciyakapi ešta wicayadapi kte šni ce.

42 Unkan Juda wicašta kin omniciye tipi kin etanhan tankan hdicupi, hehan wicoie kin hena anpetu wakan hepiya, owicakiyakapi kta e icewicakiyapi.

43 Unkan omniciye kin wanna enakiyapi, hehan Juda wicašta qa oyate tokeca etanhan he en opapi qon, cekiya unpi kin hena wicota Palos qa Barnabas kici owicapapi. Unkan wowicakiyakapi, qa Wakantanka towaonšida kin en unpi kta e iwahokonwicakiyapi.

44 Unkan ake anpetu wakan, hehan Wakantanka oie nahonpi kta e otonwe kin iyuhpa se en kiwitaya iheyapi.

45 Tuka Juda wicašta kin hena wicota kin wanyakapi qehan, winawizipi on ojupidan, qa Palos taku eye cin he akinicapi qa aiapi.

46 Hehan Palos Barnabas kici waditake icicagapi qa heyapi, Wakantanka oie kin niyepi tokaheya oniciyakapi kta e hecetu; tuka he ayaktapi šni, qa owihanke wanin wiconi kin iyenihantupi šni nihdukcanpi kin heon, iho, Ikcewicašta kin ekta unkihdamnanpi.

47 Hecen Itancan kin iwahounyanpi; Ikcewicašta iyoyanpa kin ecihnaka, maka ihanke kin hehanyan niwicayakiye kte cin heon.

48 Unkan Ikcewicašta kin, hena oie kin nahonpi qehan, nina iyuškinpi, qa Itancan oie kin yatanpi. Unkan tona owihanke wanin wiconi yuhapi kta e wicakahnigapi qon hena wicadapi.

49 Unkan Itancan oie kin makoce kin he owancaya oyakapi.

50 Tuka Juda wicašta kin iš, winohinca okinihan cekiya unpi kin hena iyowicapaštakapi, qa otonwe kin en wicašta itancanpi kin nakun, hecen Palos qa Barnabas kici šicaya wicakuwapi, qa makoce kin he etanhan hdicu wicayapi.

51 Tuka iš iyepi kin, hena en, siha watušekšeca askape cin he hdatatapi, qa lconium ekta ipi.

52 Unkan waonspewicakiyapi kin wowiyuškin Woniya Wakan ko on ojupidan.

OHANYANPI QON WICOWOYAKE 14.

1 Unkan lconium ekta, sakim omniciye tipi, Juda oyate tawapi kin he en timahen yapi, qa iyecen iapi, hecen Juda wicašta Helenes ko ota wicadapi.

2 Tuka Juda wicašta tona wicadapi šni kin hena Ikcewicašta kin iyowicapaštakapi, qa hunkawanjin kiciyapi kin šicaya wacinwicakiyus wicakiyapi.

3 Unkan tehan en yukanpi, qa Itancan kin on waditagya iapi, he qe wowaonšida oie kin hdaotanin, qa wowapetokeca wakanyan econpi ko econ wicakiya.

4 Tuka otonwe kin oyate kin akipam iyeyapi; apa Juda wicašta kin om tipidan, qa apa iš yewicašipi kin hena owicapapi.

5 Unkan Ikcewicašta, qa Juda oyate kin, tona itancan wicayuhapi kin hena koya, hena anawicatanpi, šicaya wicakuwapi qa inyan on wicakininpi kta;

6 He iye sdonkiyapi, qa Lystra qa Derbe, Lycaoniya en otonwe kin, makoce ihdukšan ko en onapapi.

7 Qa hen wotanin wašte kin oyakapi.

8 Unkan Lystra en wicašta wan siha on okitpani iyotankehan yanka, tonpi kin ehantanhan hušte, qa tohinni mani šni.

9 He Palos ie cin nahon; unkan he opanta yanke ca, wacinyanpi on ni kte cin yuha e wanyaka,

10 Hehan hotankakiya, Nisiha on bosdan najin wo, eya. Unkan iš psin iyaye ca mani.

11 Unkan Palos taku econ kin he oyate kin wanyakapi qehan ho yuwankan icupi qa Lycaonia iapi kin eciyatanhan, Taku wakan kin wicašta ihduza unkiyepi en kun unhiyupi ce, eyapi.

12 Qa Barnabas Jupiter eya caštonpi; qa Palos iš, Hermes eciyapi, iapi on itancan kin hee, heon etanhan.

13 Hehan Jupiter otonwe itokam yanke cin he wošna kagapi tawa kin he tatanka watešdake ko, tiyopa kin en ahi, qa oyate kin om wošna kta tuka.

11 He yewicašipi kin, Barnabas qa Palos kici, nahonpi qehan, wokoyake aihdupotapi, qa oyate kin ekta inyang yapi, hotaninpi,

15 Qa heyapi, Wicašta kin, tokeca hecanonpi he? niye yaunpi kin iyecen, wicašta akantu kin heuncapi, qa hena takušnišni kin aduštanpi qa Wakantanka ni un kin ekta nihduhomnipi kta e iwahokonunniciyapi; he mahpiya, maka, qa miniwanca, taku ohnaka ko, owasin kage cin hee.

16 He wicoicage hekpata un kin en, oyate kin owasin canku tawapi kin ohna manipi kta e iyowinwicakiya.

17 Hececa ešta tanyan econ, qa mahpiya eciyatanhan magaju wicaqu, makoncage taku ota icahye cin hena ko, qa woyute wowiyuškin ko on cante imnaunyanpi qon, he eciyatanhan ohinniyan ihdutanin ce.

18 Unkan wicoie kin hena on wawicakiyušnapi kte cin oyate kin kitan se ayuštan wicayapi.

19 Hehan Antioch qa Ikonium etanhan Juda wicašta wanjikji en hipi qa oyate kin iyowicapaštakapi; hecen Palos inyan on kininpi qa otonwe kin tankan yusdohan ayapi, wanna ta kecinpi.

20 Tuka waonspewicakiyapi kin ihdukšan hinajin yukanpi kin icunhan, iye najin hiyaye ca otonwe kin en i. Unkan ihanhanna qehan Barnabas kici Derbe ekta iyaya.

21 Unkan otonwe kin he en wotanin wašte kin oyakapi, qa wicota waonspewicakiyapi qehan, hehan Lystra, qa Iconium, qa Antioch ekta icicawin hdapi.

22 Qa waonspewicakiyapi nagipi kin wašag wicakiyapi, qa wacinyanpi kin en kitanyan unpi kta e iwahokonwicakiyapi, qa wokakije ota iyoopteya Wakantanka tokiconze kin en unkipi kta ce.

23 Unkan okodakiciye otoiyohi en hunka wicayapi kin wicakagapi, qa wote šni wocekiye eyapi qehan, Itancan wicadapi qon he awanwicahdake kta e icekiyapi.

24 Unkan Pisidia opta yapi hehan Pampylia en kiyohipi.

25 Qa Perga en wicoie kin oyakapi qehan, Attalia ekta apamahde iyayapi.

26 Qa hetanhan Antioch ekta watom hdapi, wicohtani wanna hduštanpi kin heon, Wakantanka towaonšida kin yuhapi ktae icekiyapi qon he hetu.

27 Hen hdipi qa okodakiciye kin mniciye wicašipi, qa Wakantanka token econ wicakiye cin hena owasin owicakiyakapi, qa wacinyanpi tiyopa wan Ikcewicašta kin wicakiyuhdoke cin he nakun.

28 Unkan hen waonspewicakiyapi kin om tehan owanji yukanpi.

OHANYANPI QON WICOWOYAKE 15.

1 Unkan wicašta wanjikji Juda makoce kin etanhan apamahde yapi, qa hunkawanjinkiciyapi kin wahokonwicakiyapi qa, Moses toope kin eciyatanhan banicihdayapi šni kinhan yanipi kte šni ce, eyapi.

2 Unkan Palos Barnabas kici hena wicakigepi, qa nina awicakinicapi, hehan wiwicawangapi kin he on, Palos Barnabas kici, qa iyepi kin etanhan wicašta tokeca wanjikji ko, yewicašipi kin, qa hunkawicayapi kin, Jerusalem ekta yakonpi kin, hena en wicayapi kta e konzapi.

3 Unkan okodakiciye kin hena hecen yewicakiyapi qehan, Phenice, qa Samaria opta yapi, qa Ikcewicašta ihduhomnipi kin he oyakapi; qa hunkawanjin kiciyapi kin owasin en wowiyuškin tanka kagapi.

4 Unkan Jerusalem ekta ipi qehan, okodakiciye kin he, qa yewicašipi kin, hunkawicayapi kin hena ko, tin hiyu wicakiyapi; hehan Wakantanka token econ wicakiye cin owasin ohdakapi.

5 Tuka Pharisee yuomdecapi kin etanhan wanjikji wicadapi qon hena inajinpi qa heyapi, Bawicakihdayapi qa Moses toope kin ope wicašipi kta iyececa ce, eyapi ce.

6 Unkan wicoie kin de akiiapi kta e on yewicašipi kin, hunkawicayapi ko witaya mniciyapi.

7 Qa nina wikiciwangapi hehan, Inyan inajin qa hewicakiya, Wicašta hunkawanjinciyapi kin, ehanna unketanhanpi kin Wakantanka miye makahnige ca, mii kin eciyatanhan Ikcewicašta kin wotanin wašte oie kin nahonpi, qa wicadapi kta e konza sdonyayapi.

8 Qa Wakantanka wicacante kin sdonye cin he wicayaotanin, qa Woniya Wakan unkiye unqupi qon, he iyecen wicaqu.

9 Qa takudan ocitkonzešni unkagapi, iye cantepi kin nakun wicadapi kin on wicakipakinta.

10 Heon nakaha tokeca e Wakantanka iyutanyayapi, qa can napinpi wan, hunkake wicunyanpi qa unkiyepi kin yuha unkokihipi šni kin he waonspewicakiyapi tahupi kin en eyahnakapi kta he?

11 Tuka Jesus Messiya Itancan kin towaonšida kin on, iš iyepi kin wiconi yuhapi kte cin, he iyecen unkiš unhapi kta e wicaundapi ce.

12 Hehan omniciye kin owasin inina yukanpi, 

qa Barnabas qa Palos kici, wowapetokeca wakanyan econpi ko, Wakantanka lkcewicašta kin ekta econ wicakiye cin hena ecen ohdakapi kin nahonpi.

13 Unkan wanna ayaštanpi, hehan Jakob ayupte ca heya; Wicašta hunkawanjin ciyapi, miye namahon po.

14 Otokahe ekta token Wakantanka lkcewicašta kin etanhan oyate wanji, iye caje kin on, iwicacu kta e ekta wicai qon he Simon oyaka.

15 Qa he kici wicašta wokcan oiepi qon okonwanjidan, kaken wowapi en kagapi;

16 He iyohakam mihdamna, qa David tawakeya jujuwahe cin he piya wakage kta; qa mdecahe cin hena ake wakage ca ecen he wakiye kta.

17 Qa hecen wicašta okaptapi kin, lkcewicašta owasin ko, tona micaje icajewicayatapi kin hena Jehovah akitapi kta ce, Itancan kin hena owasin econ kin he heya ce.

18 Otokaheya tanhan Wakantanka taku icahye cin owasin sdonkiya.

19 Heon etanhan miš kaken imdukcan, lkcewicašta kin tona Wakantanka ekta ihduhomnipi kin hena nagiyewicunyanpi kte šni.

20 Tuka wakagapi on ašapapi kin, qa wiinahmanpi kin, qa we, qa taku weye šni yutapi kin, hena itehan yeiciyapi kta e wowapi wicunkicagapi kta.

21 Wanakaja tanhan tona Moses oyakapi kin hena otonwe otoiyohi kin en yukanpi, qa anpetu okihpapi eca, omniciye tipi kin ohna he yawapi ece, eya.

22 Hehan iš iyepi kin etanhan wicašta kahnigapi kin heea, Judas Barsabas eciyapi, qa Silas, hunkawanjin kiciyapi kin en wicašta okinihan, hena Palos qa Barnabas kici, Antioch ekta ye wicašipi kta e, yewicašipi kin, hunka wicayapi kin, okodakiciye kin owasin ko iyokipipi.

23 Qa heciya ayapi kta e kaken wowapi kagapi; Yewicašipi kin, qa hunka wicayapi, hunkawanjin kiciyapi kin hena ko, hunkawanjin kiciyapi lkcewicasta etanhan, Antioch, qa Syria, qa Cilicia en yakonpi kin, Wookiye yukan po.

24 Unkiyepi etanhan wanjikji iyayapi, qa wicoie on nagiyeniyanpi, qa ninagipi kin nipahohopi qa, Banicihdayapi, qa wicoope kin oyapapi kta ce, eniciyapi ce, naunhonpi; unkiye tohinni heye wicunšipi šni tuka:

25 Heon etanhan tawacin wanjidan hduha unwitayapi qehan, wicašta kahnigapi kin heca e niyepi kin ekta ye wicunšipi kta e iyounkipipi, Barnabas qa Palos waštewicunkidakapi kin hena om:

26 Hena wicašta kin wiconi ehpekiyapi seca, Jesus Messiya Itancan unkiyapi kin heon etanhan.

27 Hecen Judas qa Silas ye wicunšipi, hena e wicoie on atayedan hecen oniciyakapi kta.

28 Woniya Wakan kici hecen iyounkipipi, waqinpi tokeca unkanihnakapi kte šni, tuka dena taku owotanna kin hecehnana;

29 Taku wakagapi wakiyušnapi, qa we, qa taku we ye šni yutapi, qa wiinahmanpi kin hena itehan yeniciyapi kta. Hena itehanyan yaunpi kinhan tanyan ecanonpi kta. Tanyan yaunpi nunwe.

30 Hecen hena ye wicašipi qehan, Antioch ekta ipi, qa oyate kin kawitaya iheyapi, hehan wowapi kin he wicaqupi.

31 He yawapi, unkan wahokonwicakiyapi kin on nina iyuškinpi.

32 Unkan Judas qa Silas wicašta wokcan kin hecapi, heon hunkawanjin kiciyapi kin oie ota on wahokonwicakiyapi, qa wicayasutapi.

33 Wanna anpetu ota en yukanpi, hehan hunkawanjin kiciyapi kin hena yewicašipi kin ekta wookiye hde wicašipi.

34 Tuka Silas en un kta e iyokipi.

35 Palos qa Barnabas Antioch en unpi, wicašta tokeca ota ko, oyate kin waonspewicakiyapi, qa Itancan oie kin oyakapi.

36 Unkan iyohakam anpetu tonana, hehan Palos Barnabas heciya, Tukten Itancan oie kin unkoyake ciqon, ake otonwe otoiyohi ekta unye ca, hunkawanjin wicunye cin wanwicunhdake ca, token yakonpi kin sdonunye kta ce, eya.

37 Unkan Barnabas he iš, Johannes Markos eciyapi, yuha yapi kta cin.

38 Tuka he Pampylia ekta ehpewicaye ca wicohtani kin en owicape šni qon, heon etanhan Palos he yuha yapi kte cin iyokipi šni.

39 Unkan he on hdokinicapi qa hecen otoiyohi ehpekiciyapi: unkan Barnabas Markos yuha Cyprus ekta watom iyaya.

40 Tuka Palos Silas kahnige ca, Wakantanka towaonšida kin kici un kta e hunkawanjinkiciyapi kin icekiyapi qehan, hehan iyaya;

41 Qa Syria qa CiliCia opta iyaye ca, okodakiciye kin suta wicakaga.

OHANYANPI QON WICOWOYAKE 16.

1 Hehan Derbe qa Lystra ekta iyohi; unkan iho, waonspekiyapi kin wanji hen un, Timotheos eciyapi, Juda winohinca wicake cin he cinhintku, tuka atkuku kin e Helenes oyate kin etanhan.

3 Hunkawanjin kiciyapi Lystra, qa Ikonium en yukanpi kin hena, he wašte e oyakapi.

3 Hetanhan Palos kici ya cin, qa Juda wicašta henunpi kin hena on, he icu qa bakicihdaya; atkuku kin Helenes heca e owasin sdonyapi.

4 Unkan otonwe iyaza yapi, qa yewicašipi kin, kunka wicayapi ko, Jerusalem en yukanpi kin woahope kagapi qon hena tanyan yuhe wicašipi.

5 Hecen okodakiciye kin wacinyanpi kin en wicayusutapi, qa anpetu otoiyohi nina yuota aya.

6 Unkan Phrygia qa Galatia makoce kin opta iyayapi, qa Asia en wicoie kin oyakapi kte cin Woniya Wakan kin tehinda qehan;

7 Hehan Mysia ekta ipi, qa hetanhan Bithynia ekta ye wacinpi, tuka Woniya kin iyowicaki šni.

8 Unkan Mysia opta iyayapi qehan, Troas en iyohipi.

9 Unkan hanyen Palos wowanyake wan wanyaka; Wicašta wan Macedonia etanhan taninyan inajin, qa cekiye ca, Macedonia en u, qa ounkiya po, eya.

10 Wowanyake kin de wanyake cin heon hinnakaha Macedonia heciya unyanpi kta e uncinpi, Itancan kin hena wotanin wašte kin owicunkiyakapi kta cin heon unkicopi e unhdukcan

11 Hecen Troas etanhan pacanan iyeunyanpi, qa Samothracia ekta owotanna unyanpi, qa hetanhan ihanhanna Neapolis en unkipi.

12 Qa hetanhan Philippi en unkipi, otonwe teca qa Macedonia makoce onšpa kin he en otonwe tokapa kin hee. Qa anpetu tonana otonwe kin he en unkanpi.

13 Unkan anpetu wakan hehan, otonwe kin etanhan inaunpapi, qa wakpa wan icahda wocekiye eyapi ece qon he en unkipi; hen unkiyotankapi, qa winohinca ece en mniciyapi kin hena owicunkiyapi.

14 Unkan winohinca wan, Lydia eciyapi, Thyatira otonwe kin etanhan, wokoyake duta ece wiyopeye cin heca, Wakantanka kokipeyahan un he nahon yanka: unkan cante kin Itancan kin yuzamni, on Palos oie kin anagoptan.

15 Unkan tiyohnaka kin om baptem qupi qehan, hehan ceunkiyapi qa, Itancan kin on wicawaka kecanmayakinpi hecinhan, wati kin en tin upi, qa ohna yukan pe, eye ca ecen econ unkiyapi.

16 Hetanhan wooekiye eya unyanpi eca, wicinyanna wan itkounkipapi ece, he taku wakan woyaka ece kin yuhe ca, wakanyan wohdag un kin heon tawayapi kin taku ota wicakicamna.

17 He Palos unkiyepi ko unkihakam u, qa; Wicašta kin dena Wakantanka tehan wankantuya un kin taokiye wicaye cin, wiconi canku kin unkokiyakapi kin hena eepi ce, eya hoyekiya.

18 Qa anpetu ota hecen econ. Tuka Palos nagiyeye cin heon hakikta qa, Jesus Messiya caje on winohinca kin de etanhan tankata inanpe ciši, taku wakan kin eciya. Unkan wihiyayedan oape kin he en tankan hiyu.

19 Unkan winohinca kin de yuhapi kin heepi, taku kamnanpi kte cin he akitakunipi šni kin he wanyakapi e etanhan, Palos Silas kici wicayuzapi, qa tipi hocoka kin ekta wicašta tokahe wicakiyapi kin en awicayapi:

20 Qa wicašta itancan wicakiyapi kin en wicakaipi, qa heyapi, Wicašta kin dena Juda wicašta kin hecapi, otonwe unkitawapi kin nina nagiyeyapi;

21 Qa wicoftan onspewicakiyapi kin hena e, Roma wicašta heuneapi kin, unkicupi qa unkopapi kta e iyecece šni.

22 Unkan oyate kin owasin witaya takpe wicaupi; qa wicašta itancan wicakiyapi kin wokoyake awicayupotapi, qa wicakapsinpsinte wicašipi.

23 Unkan ota awicapapi, hehan wicakaška tipi kin en iyewicayapi, qa tipi awanyake cin sutaya wicayuhe šipi.

24 He hecen econ šipi, unkan wicakaška tipi temahentuya kin he en onawicataka, qa siha kin can on kaškapi ece kin en sutaya kaška wicahnaka.

25 Unkan hanye cokaya hehan, Palos qa Silas kici Wakantanka cekiyapi, qa yatan dowanpi; unkan wicašta wicakaškapi kin he nahonpi.

26 Unkan ihnuhanna maka kin nina huhuzahan, qa tipi ahe cin hena yuhuhuzapi, qa tiyopa kin owasin kazamni iyaye ca,on pawicahtapi kin owasin mdecahan hinhda.

27 Hececa, unkan wicakaška tipi awanyag kiyapi kin kikta, qa tiyopa kin yuzamni han wanyaka, unkan wicašta wicakaškapi kin owasin kihdapi kecin, heon mazasagye ehdaku qa on icikte kta;

28 Tuka Palos nina hoyekiye ca, Kiuniiciye šni wo, owasin den unkanpi ce, eya.

29 Hehan petijanjan wan da, qa tin iyaye ca, cancan Palos Silas kici siha hdepi kin en ehpciciya;

30 Qa tankan awicaye ca, Itancanpi wani kta e token ecamon kta he? ewicakiya.

31 Unkan, Jesus Messiya Itancan kin wacinyan wo, hecen nicinca om yani kta ce, eciyapi.

32 Qa Itancan oie kin okiyakapi, tona ti kin en yukanpi kin hena owasin koya.

33 Unkan hanyetu kin wihiyayedan oape kin he en, iwicacu, qa oape kin wicakiyujaja, qa hehan baptem qupi, tiyohnaka owasin ko.

34 Qa iye ti kin en awicaki qa won wicaya; qa tiyohnaka kin om wicada qa iyuškin.

35 Unkan wanna anpa qehan, itancan wicakiyapi kin akicita eyanpaha kin ekta ye wicašipi, qa, Wicašta kin hena wicakiyuška wo, eyapi.

36 Unkan wicakaška tipi awanyake cin, hena oie kin Palos okiyake ca, Itancan wicakiyapi kin niciyuškapi kta keya hoši hipi, heon etanhan tankan kinanpapi, qa wookiye hda po, eya.

37 Tuka Palos hewicakiya, Roma wicašta heuncapi, tuka unyacopi šni ecen taninyan unkapsinpsintapi, qa onatag eunhnakapi, qa hinnakaha anahbeya hde unšipi he? hiya, iye atayedan upi, qa tankan unkaupi kta, eya.

38 Hehan akicita eyanpaha kin itancan wicakiyapi kin dena owicakiyakapi, unkan Roma wicašta kin hecapi e nahonpi kin heon inihanpi.

39 Qa iye atayedan ekta ipi, qa cewicakiyapi, qa tankan awicaupi, qa otonwe kin etanhan hdapi kta icewicakiyapi.

40 Unkan wicakaška tipi kin etanhan tankata inanpapi,qa Lydia ti kin en ipi; qa hunkawanjin kiciyapi kin wanwicahdakapi, hehan wicakihnapi, qa etanhan tokan iyayapi.