WOHOKONWICAKIYA KIN (Ecclesiastes) 1- 6

WAHOKONWICAKIYA KIN.

WICOWOYAKE 1.

1 Wahokonwicakiya kin, David cinhintku Jerusalem en Wicaštayatapi oie kin dena ee

2 Takušni, takušni, Wahokonwicakiya kin eya, takušni, takušni, iyuhpa takušni ce.

3 Anpetu wi ihukuya wicašta wicohtani econ kin owasin on iyunwin taku yuha he?

4 Wicoicage wanji iyaye ca wicoicage wan u ece; tuka maka kin ohinniyan han.

5 Nakun anpetu wi kin hinanpa, qa anpetu wi kin iyaya, qa totanhan hiyu qon he ekta inahni hda ece.

6 Tate kin itokahkiya iyaye ca waziyatakiya ihduhomni; tate ihduhomnimni, qa totanhan iyaye cin ake en hdi ece.

7 Wakpa iyuhpa miniwanca kin en iyaya; tuka miniwanca kin ojudan šni; wakpa kin totanhan hiyupi qon he ake ekta hdapi ece.

8 Wicoie owasin hunkitapi ojudan; wicašta oyake kta okihi šni: wicišta kin he wawanyaka imnan šni, qa wicanoge kin wanahonpi on imnan šni.

9 Taku un qon he u kte cin hee: qa taku econpi ece kin taku econpi kte cin ee: qa anpetu wi kin ihukuya taku teca wanica.

10 Taku on, Wanyaka wo, de teca ce, eyepica he? wanna tanina un qon hee, unkiye unkitokapatanhan yanke.

11 Taku hekta un qon hena kiksuyapi šni; qa nakun taku tokata kin tona ohakam unpi kte cin hena kiksuyapi kte šni.

13 Wahokonwicakiya kin he miye, Jerusalem en Wicaštayatapi manka.

13 Unkan taku mahpiya ihukuya econpi kin owasin wokšape on awakite kta, qa imdukcan kta e micante ekta yewaya: wicohtani tehike cin de Wakantanka wicašta cincapi wicaqu, on htanipi kta heon.

14 Anpetu wi kin ihukuya wicohan econpi kin owasin wanmdaka, unkan iho, iyuhpa takušni qa woniya iyokišinyapi kin hee.

15 Taku skope cin he yuowotanpidan kta okihipica šni; qa taku iyokpani un kin hena yawapica šni.

16 Micante kici wowahdaka qa hepa; Iho, tanka imacaga qa wokšape mnawakiya, tona Jerusalem en mitokam unpi qon owasin isanpa: han, micante wokšape qa wosdonye ota wanyaka.

17 Nakun wokšape sdonwaye kta micante waqu, wicoksape šni qa wowitkotkoke sdonwaye kta: De nakun woniya iyokisinyapi kin h e imdukcan.

18 Wokšape ota en woiyokišice ota yukan; qa tuwe wosdonye hduota kinhan he wicocantešica hduota ece.

WOHOKONWICAKIYA KIN  WICOWOYAKE 2.

1 Micante en hepa; Iho wo, wowiyuškin on iciyute kta ce; hecen taku wiciyokipi sdonya wo. Unkan iho, he nakun taku šni.

2 Ihapi kin he, Wowitkotkoka, ewakiya: qa wowiyuškin, He taku tokon he?

3 Micehpi miniša on wahdusuta kta micante en awakita, qa micante wokšape sdonyewakiye kta; qa wowitkotkoka kin he mduze kta, hecen wicašta cincapi on taku wašte kin tukte e he, anpetu towanakeca hipi kin en, mahpiya ihukuya taku econpi kte cin he wanmdake kta.

4 Taku tanka micicaga; tipi micicaga; hastanhanka iyuwi ojupi kin hu wehde:

5 Maga qa canwojupi kin micicaga, qa en waskuyeca can ocaje owasin hu wahde:

6 Miniyowe kagapi kin micicaga, on contanka can icahye cin he spayewaye kta:

7 Wicašta taokiye qa winyan taokiye opewicawaton, qa wati ohna tonpi wicamduha; nakun tanka qa cistinna ptewanunyanpi ota hinca wicawahduha, Jerusalem en mitokam unpi qon owasin isanpa:

8 Nakun mazaska qa mazaskazi mnamiciye, qa wicaštayatapi makoce tawapi ko tawokamna kin: wicašta dowanpi qa winohinca dowanpi heca icahwicawakiya, qa wicašta cincapi tawowiyuškinpi, token icuwa dowansa, qa on owasin ocaje he.

9 Hecen matanka, qa tona mi tokam Jerusalem en unpi qon ikapeya taku ota micicaga: nakun wokšape mitawa miciun.

10 Qa taku miišta da kin takudan ipimicida šni, wowiyuškin wanjidan kes micante etanhan wakipatan šni; mitohtani owasin on micante iyuškin nakaeš: qa mitohtani ocowasin on wokamna mitawa kin hee.

11 Hehan wicohan minape econ kin owasin en ewakitonwan, qa wicohtani htawani kta ecamon kin hena; unkan iho, ocowasin takušni qa woniya iyokišica hee, qa anpetu wi kin ihukuya wokamna wanica.

12 Unkan wokšape qa wicokšapešni qa wowitkotkoke kin iwanmdake kta mihdamna: wicašta wan wicaštayatapi ihakam u kin he taku okihi kta he? taku wanna econpi kin heceedan.

13 Hehan wokšape en wokamna yukan e wanmdaka, wowitkotkoke kin isanpa, iyoyanpa kin he otpaza isanpa wašte kin he iyececa.

14 Wicašta ksapa išta iye pa kin en un; tuka witkotkoke cin he otpaza omani: hececa ešta miye qe taku wanjidan owasin awicakipa ece e wanmdaka.

15 Hehan cante mahen hepa; Witkotkoke cin he taku akipa he iyecen miš eya awakipa; hecen tokiyatanhan miye qe iyotan wakšapa he? Hehan cante mahen, De iš eya takušni ce, epa.

16 Witkotkoke cin iyececa wicašta ksapa kin ohinniyan kiksuyapi šni nakaeš; taku nakaha un kin hena tokata anpetu kin en owasin akiktonjapi kta, heon etanhan. Qa wicašta ksape cin iš token te kta he? witkotkoke cin iyececa.

17 Heon etanhan wicani kin šicewakidaka; anpetu wi kin ihukuya wicohan econpi kin he waciniyowakišica nakaeš: iyuhpa takušni qa woniyaiyoki inyapi kin hee.

18 Han, mitohtani anpetu wi ihukuya ecamon kin ocowasin šicewakidake; wicašta mihakam u kte cin he aihpewakiye kta, heon etanhan.

19 Qa he wicašta ksape kta, qa i witkotkoka kta tuwe sdonya he? Hececa, mitohtani ecamon kin owasin, qa en anpetu wi ihukuya ksapa mihdutanin kin hena iye tawaye kta. De nakun takušni.

20 Heon etanhan anpetu wi kin ihukuya wicohtani ecamon kin iyuhpa micante kicunniwakiye kta mihdamna.

21 Wicašta wan tohtani kin wokšape en, qa wosdonye en, qa wokonze en un: tuka he wicašta wan on htani šni kin he tawa kta aihpekiye kta. He nakun takušni qa taku šica tanka.

22 Wicašta iye tohtani owasin, qa cante iyokišica, on anpetu wi ihukuya htani kin etanhan taku hduha he?

23 Taanpetu kin iyuhpa wicocantešica, qa tokakije kin he woiyokišica nakaeš: han, hanyetu en iye cante oziiciye šni. He nakun takušni.

24 Wicašta wote kta, qa wayatke kta, qa iye nagi tohtani kin on iyuškinkiye kta, taku sanpa wašte wanica. De wanyaka miye nakun, Wakantanka nape kin etanhan ce.

25 Tuwe wote kta he, qa miye mikapeya tuwe wiyuškin kta he?

26 Taku iye itokam wašte kin he Wakantanka wicašta wicaqu ece, wokšape qa wosdonye qa wowiyuškin: tuka wahtani sa kin he wokakije qu, wamnaye kta qa waeju kta, hecen Wakantanka itokam taku wašte kin he qu kta. He nakun takušni qa woniya iyokišica.

WOHOKONWICAKIYA KIN  WICOWOYAKE 3.

1 Taku iyuhpa iyehantu yukan, qa mahpiya kin ihukuya woawacin owasin tohantu kte cin yukan ece.

2 Wicatonpi iyehantu yukan, Qa wicate kta iyehantu; Woju econpi iyehantu; Qa wojupi yujunpi kta iyehantu:

3 Wicaktepi iyehantu yukan, Qa okiziyapi iyehantu; Wayujujupi iyehantu, Qa piya kagapi iyehantu yukan:

4 Wicaceya iyehantu yukan, Qa ihapi kta iyehantu; Wasihdapi iyehantu, Qa škatapi iyehantu yukan:

5 Inyan ehpeyapi iyehantu yukan, Qa inyan witaya pahipi kta; Adoksohan wicayuzapi iyehantu yukan, Qa poškin wicayuzapi ayuštanpi kta.

6 Waakitapi iyehantu yukan, Qa toki ehpeyapi kta iyehantu; Wapatanpi kta iyehantu, Qa wapaganpi iyehantu yukan:

7 Wayuhdehdecapi iyehantu yukan, Qa wakagegepi iyehantu yukan; Inina yukanpi iyehantu, Qa iapi kta iyehantu yukan:

8 Waštewicadaka iyehantu yukan, Qa Šicewicadaka iyehantu; Okicize iyehantu yukan, Qa wookiye kagapi kta iyehantu.

9 Wicašta htani kin he iye tohtani eciyatanhan iyunwin taku hduha he?

10 Wicohtani en wicašta cincapi htani iciyapi kta Wakantanka wicaqu kin he wanmdaka miye:

11 Taku owasin iyehantu eca owanyag wašte kaga: nakun iye cantepikin en ohinniyan kte cin he ewicakicihnaka, hecen Wakantanka tohtani kage cin otokaheya tanhan qa owihanke ekta wicašta tuwedan okahnige kte šni.

12 Hena en taku wašte wanica sdonwaya; tuka wiyuškin kta, qa ni un icunhan taku wašte econ kta:

13 Qa nakun wicašta otoiyohi wote kta, qa wayatke kta, qa tohtani owasin taku wašte en un kin he on ihduškin kta; Wakantanka taku qu kin hee.

14 Taku Wakantanka econ kin owasin owihanke wanice kta sdonwaya; takudan en akagapi kte šni, qa takudan etanhan icupi kte šni: unkan iye itokam wakokipapi kta e Wakantanka hecon ece.

15 Taku hekta un qon he nakaha un, qa taku tokatam u kte cin he wanna hekta un: qa taku hekta un kin he Wakantanka kin ake hdiyohi kiye kta.

16 Unkan nakun anpetu wi ihukuya woyaco oyanke kin wanmdaka, wošice hen yanka; qa woowotanna oyanke kin, wicošice en yanka.

17 Cante mahen hepa; Owotanna kin he qa šice cin Wakantanka wicayaco kta: han, wicotawacin otoiyohi qa wicohan otoiyohi hen iyehantu yukan.

18 Wicašta cincapi kin on cante mahen hepa; Tokin Wakantanka hena iwicayuten, hecen iye qe woteca hecapi e wanihdakapi kta.

19 Wicašta cinca kin taku akipapi hecinhan, he woteca akipapi; han, taku wanjidan awicakipa ece: wanji iš token ta hecinhan, unma kin iš iyecen ta: han, owasin woniya okonwanjidan yuhapi: hecen wicašta kin iš woteca isanpa takudan iciwašte šni; iyuhpa takušni nakaeš.

20 Owasin oyanke wanjidan ekta yapi; iyuhpa maka mdu heca, qa iyuhpa ake maka mdu icagapi ece.

21 Wicašta cinca taniya wankan ye cinhan, qa woteca taniya kin iš maka ekta kun ye cinhan, tuwe sdonya he?

22 Heon etanhan wicašta iye tohan kin on ihduškin kta taku sanpa wašte wanica imdukcan; he taku tawa kin ee nakaeš: qa iye iyohakam taku u kte cin he tuwe wanyagkiye kta he?

WOHOKONWICAKIYA KIN  WICOWOYAKE 4.

1 Unkan wahdicu qa wokakišye anpetu wi ihukuya econpi kin hena owasin iwanmdaka: qa iho, kakišyapi ištainnihanpe awicau; qa wicakicanpte yuhapi šni: unkan wakakišwicaye nape ohna wowašake yukan; tuka wicakicanpte yuhapi šni.

2 Heon etanhan tapi kin, tona wanna tapi kin hena wicadmawašte, nipi, tona nahanhin ni unpi kin isanpa:

3 Han, tuwe tohinni ni un šni kin he hena napin isanpa wašte, wicohan šica anpetu wi ihukuya econpi kin hena wanyake šni nakaeš.

4 Akeš wicohtani owasin iwanmdaka, qa wicohan yuštanpi otoiyohi, on wicašta iye takodaku kici nakiciwizipi kin hee. De iš eya takušni qa woniya iyokisica ce.

5 Witkotkoke cin he nape hdukšija qa iye cehpi hduta ece.

6 Napohnaka wanjidan woozi kici hee wašte, nape nonpa ojudan isanpa, wicohtani econpi qa woniya iyokišica iyahna hecinhan, eya.

7 Hehan wahdiyaku qa anpetu wi ihukuya takušni kin he wanmdaka miye.

8 Wanjidan yukan, qa inonpa wanica; han he cinca qa sunkaku takudan hduhe šni; tuka tohtani owasin ayuštan šni; nakun iye išta kin wowijice imna šni; qa, Tuwe on htawani qa minagi taku wašte icakišwaya he? eye šni. De nakun takušni; han, wicohtani tehika.

9 Nonpa kinhan wanjidan isanpa waštepi; wicohtani econpi kin on wokajuju wašte yuhapi nakaeš.

10 Hena hinhpayapi kinhan, unma kin iš takodaku najin kiye kta: tuka, hehehe, tuwe išnana un hinhpaye cinhan; tuwe najin kiye kta yuhe šni nakaeš.

11 Akeš, nonpa sakim wankapi kinhan cozapi ece; tuka tokiyatanhan wanjidan išnana coza kta he?

12 Unkan wanji kici econ ohiye cinhan, nonpa kici inajinpi kta; qa hahonta yamni kahmonpi kin he yupsakapi tehika.

13 Hokšidan wan wahpanica qa ksapa he wašte, wicaštayatapi wan wicahinca qa witkotkoka wanna onspekiyapi kta wicada šni kin he isanpa.

14 He qe wicokaške tipi kin etanhan wicaštayatapi kta hiyu; tuka nakun tuwe iye en tonpi kin he wahpanica aya.

15 Wicašta ni unpi owasin anetu wi kin ihukuya manipi kin ena, hokšidan inonpa kin eekiya inajin kte cin kici iwanwicamdaka.

16 Oyate kin owasin wopteca šni, tona wicitokam unpi qon owasin: nakun tona ohakam upi kin hena he on iyuškinpi kte šni. Awicakehan he nakun takušni qa woniya iyokišice cin hee.

WOHOKONWICAKIYA KIN  WICOWOYAKE 5.

1 Wakantanka tipi kin ekta da eca nišiha awanhdaka wo, qa witkotkoka tawošna yaqu kte šni e wanahon yanka wo; hena eqe taku šica econpi kecinpi šni.

2 Nii on ohanko šni wo, qa nicante Wakantanka itokam taku eya inahni kte šni. Wakantanka mahpiya ekta yanka, qa niye maka akan yaun; heon etanhan nioie tonana kta iyececa.

3 Wicohan ota eciyatanhan wihanmnanpi icaga: qa witkotkoka ho kin wicoie ota en un.

4 Tohan Wakantanka ekta taku on niciconze cinhan, hdajuju dutehan kte šni; iye qe witkotkokapi kin on wiyuškin šni; taku on niciconze cin he hdajuju wo.

5 Niciconza qa yahdajuju šni kinhan, niciconze šni unkanš hee wašte kta tuka.

6 Ihnuhan nii kin he nicehpi wahtanikiye cinhan; qa ohnihde kin itokam, He woyašna ce, ehe kte šni: Taku on etanhan Wakantanka niho on sinhda kta, qa ninape taku econ kin ihangye kta he?

7 Wihanmnanpi ota kin en takušnipi yukan, qa wicoie ota; tuka niye Wakantanka kokipa wo.

8 Wicašta onsika wicakipi kin he, qa makoce tehan yanke cin en woyaco woowotanna ko yupemnipi kin hena wandake cinhan, he taku kin on yusinyaye šni wo: tuwe wašaka keš isanpa wašake cin he awacin yanka; qa hena isanpa wašakapi yukan.

9 Nakun maka wokamna kin he wicašta owasin tawapi; wicaštayatapi hee kaeš maga kin wowidagya.

10 Tuwe mazaska waštedake cin he mazaska imnan kte šni; qa tuwe woyuha ota waštedake cin he oicage on imnan kte šni. He nakun takušni.

11 Woyuha kin hena ota aye cinhan, tona yutapi kin hena yuotapi; hecen tuwe tawapi kin hena taku iwaštepi he; išta on wanhdakapi heceedan?

12 Tuwe htani ištinbe cin he skuya, taku tonana kaeš ota yuta ešta: tuka wijice woyuha ota ton kin he ištinma okihi šni kiya.

13 Anpetu wi kin ihukuya taku šica tehika wan wanmdaka miye, woyuha tona tawapi išicapi kte cin on kihnakapi hee.

14 Tuka woyuha kin hena šicaya waakipapi on atakuni šni ece; unkan cinca wan icahkiye ca takudan nape ohna yanke šni.

15 Iye hunku tamni etanhan u qon he iyecen tancodan hde kta, hiyu qon iyecen ye kta, tohtani etanhan taku nape ohna aye kte cin takudan icu kte šni.

16 Unkan de iš eya taku šica tehika, token u qon he iyecehin ake hde kta: hecen tuwe tate htakicini kin wokamna taku yuha he?

17 Nakun taanpetu owasin otpaza en wota, qa wicocante šica ota yuha, qa wayazanka en woiyokišice.

18 Iho, taku miye wanmdake cin he dee; taku wašte wan oiyokipi, wote kta qa wayatke kta, qa tohtani anpetu wi ihukuya econ kin owasin, anpetu wi un towanakeca Wakantanka qu kin hehanyan iyuškin kta; taku tawa kte cin hee nakaeš.

19 Nakun wicašta otoiyohi Wakantanka woyuha qa wowijice qu kin he etanhan yute kta okihi, qa taku tawa kte cin hduhe kta, qa tohtani on iyuškin kta: Wakantanka taku qu kin hee.

20 Ota šni qeyaš anpetu ni un kin kiksuye kta; iye cante wiyuškin kin en Wakantanka toayupte yanka nakaeš.

WOHOKONWICAKIYA KIN WICOWOYAKE 6.

1 Anpetu wi kin ihukuya taku šica wanji yukan wanmdaka miye, qa he wicaštapi ehna tanka hinca:

2 Wicašta wanji wowijice, woyuha qa woyuonihan Wakantanka qu, hecen iye nagi taku cin kin iyuhpa takudan kiwanice šni, tuka hetanhan hdute kta Wakantanka okihikiye šni, tuka wicašta tokeca yuta. De iš eya takušni qa woyazan tehike.

3 Wicašta wan opawinge cincaton, qa waniyetu ota ni un, hecen iye tawaniyetu anpetu ota qeyaš, iye nagi taku wašte on imnan šni, qa nakun wicahapi hduhe šni kinhan, okaškan tonpi wan hee kaeš he isanpa wašte, epa.

4 He qe opo etanhan hiyu, qa otpaza en iyaya, qa iye caje kin otpaza akahpe kta.

5 Nakun anpetu wi wanyake šni  qa sdonye šni, eqe woozi yuha, unma qon isanpa.

6 Han, waniyetu kektopawinge nonpa hehanyan ni qeyaš taku wašte takudan wanyake šni: owasin ounyanpi wanjidan ekta yapi šni he?

7 Wicašta tohtani ocowasin iye i kin on etanhan, hececa ešta iye nagi kin ininan šni.

8 Wicašta ksapa wicašta witkotkoka isanpa taku yuha he? wicašta onsike cin ni unpi wicitokam mani sdonye cin he taku yuha he?

9 Wicašta wawanyake cin he wicanagi onuni kin isanpa wašte. De nakun takušni qa woniya iyokišice cin hee.

10 Taku hekta un qon hena wanna cajeyatapi, qa he taku kin wicašta ee šdonyapi: nakun tuwe iye isanpa wašake cin he kici econ kta okihi šni.

11 Hecen wicoie ota takušni yuotapi ece, heon wica ta hena taku iwašteka he?

12 Wicašta wan ni un, takušni ni un taanpetu iyuhpa ohanzi iyecen hiyaye cin he taku wašte yuhe kta tuwe sdonya he? qa anpetu wi kin ihukuya wicašta wan iyohakam taku u kte cin tuwe he okiyake kta he?

 

Psalm Wowapi 120-150

PSALM 120.

Oicimani odowan.

1 Makakija en Jehovah hoyewakiya: Unkan iye amayupta.

2 Jehovah, woitonsrii iha etanhan minagi eyaku wo; Wohnayan ceji kin etanhan.

3 Taku nicu kta he, wohnayan ceji kin? Qa taku sanpa yuheniciye kta he?

4 Wicašta wašaka tiwanhinkpe pe hinca, Genista petaga koya.

5 Hehehe, haiye Mesech en ounwaye; Kedar tawakeyapi kin ohna wati.

6 Tuwe wookiye šicedake cin he Minagi wanna tehan kici ti.

7 Miye wookiye wacin, tuka iwaa eca, Hena e kicizapi kta.

PSALM 121.

Oicimani odowan.

1 Paha kin ekta Miišta wankan yewaya: Omakiyapi kin he tokiyatanhan u he.

2 Omakiyapi kin he Jehovah eeiyatanhan, Mahpiya maka ko kage cin he.

3 Nisiha nasdute kta iyowinkiye kte šni: Tuwe awanniyake cin he istinbe kte šni.

4 Iho, Israel Waawanyake tawa kin He hba kte šni qa istinbe kte šni.

5 Waawanyake nitawa kin Jehovah hee; Nietapa ekta ahanziniye cin Jehovah hee.

6 Anpetu eca anpetu wi kin kiunniniye kte šni; Qa hanyetu wi kin, hanyetu icunhan.

7 Taku šica owasin etanhan Jehovah awanniyake kta; Ninagi awanyake kta.

8 Tankan de ca tin yahdi eca, Jehovah awanniyake kta, Detanhan qa owihanke wanica.

PSALM 122.

Oicimani odowan. David tawa.

1 Jehovah ti kin ekta unyanpi kta ce, Emakiyapi kin on imduškin.

2 Jerusalem, nitatiyopa kin en Unsihapi iyahanpi.

3 Otonwe wan icikoyagya he cin He iyececa Jerusalem kagapi.

4 Heciya wicowazipi wankan yapi ece; Jah tawicowazi kin, Israel yaotaninpi kta; Jehovah caje yatanpi kta heon.

5 Hen woyaco oiyotanke kin hdepi; David tiyohnaka oiyotanke tawapi.

6 Jerusalem wookiye kin icekiya po; Tona waštenidapi kin hena wookiye yuhapi nunwe.

7 Wookiye conkaške nitawa mahen un nunwe; Qa woozi iciyapi tipi waštešte nitawa mahen.

8 Mihunkawanji qa mitakuye on, Wookiye mahen niun nunwe, epe kta.

9 Jehovah Wakantanka unkitawapi ti kin on, Tanyan yaun kta awakite kta.

PSALM 123.

Oicimani odowan.

1 Mahpiya kin en yakidotanke cin Niye ekta Miišta wankan yewaye.

2 Wan, wicašta taokiye wicayuhapi napepi kin ekta iita yeyapi; Winyan taokiye yuhe cin nape ekta etonwan ece; He iyecen unkistapi Jehovah Wakantanka unkitawapi ekta etonwanpi, Onsiunkidapi kte cin hehanyan.

3 Onsiunkida po, Jehovah onsiunkida po; Wowahtedašni on nina iunmnanpi;

4 Tona owanji yukanpi kin hena Wahtedapišni on unnagipi imnan hinca; Wahanicidapi wowahtedašni kin he.

PSALM 124.

Oicimani odowan. David tawa.

1 Jehovah unkicipi un ni unkuns; Hecen Israel eyapi kta;

2 Unkicipi un kin Jehovah ee šni unkanš, Wicašta akantu anauntanpi qehan;

3 Hehan tiiyake naunpcapi kta tuka, Wocantahdeunyanpi ide qehan:

4 Hehan mini kin unkiwankam iyaye kta, Wakpa wan unnagipi iwankam iyaye kta;

5 Hehan unnagipi iwankam, Mini ipiga kin iyaye kta tuka.

6 lye hipi kin on unyahtakapi kta unqupi šni. Heon Jehovah yawaštepi kte.

7 Unnagipi ihduške, Zitkadan wan wicašta wahmunke etanhan he iyececa; On hmunknpi kin yufidecapi, Unkan unkiye unkiyukcapi.

8 Ounkiyapi kin he Jehovah caje kin en un; Manpiya qa maka kage cin he.

PSALM 125.

Oicimani odowan.

1 Jehovah wacinyanpi kin hena, Zion Paha kin iyececapi; Yuhohopi šni, ohinniyan han.

2 Paha kin Jerusalem ihdukšan hiyeya; Qa Jehovah iye taoyate wicihdukšan un, Detanhan qa owihanke wanica.

3 Wicošice can sagye kin wicašta owotanna Tamakoce kin akan wanke kte šni; Hecen wicašta owotanna taku šica Ekta nape yeyapi kte šni.

4 Jehovah, tona wašte taku wašte ecakicon wo; Qa tona cante ecetu kin hena.

5 Tuka tona canku pemni ekta icunom yapi kin, Hena wicohan šica econpi kin om Jehovah iyaye wicaye kta. Israel wookiye kici un nunwe.

PSALM 126.

Oicimani odowan.

1 Zion hdicu kin en Jehovah ihdohdi qehan, Wihanmnanpi kin iyeuncecapi.

2 Hehan ihapi on i unkojupidan; Qa uncejipi wowiyuškin on: Hehan lkcewicašta ehna heyapi; Jehovah taku tanka ecawicakicon ce.

3 Jehovah taku tanka ecaunkiconpi; On unkiye piundapi.

4 Jehovah, unhdicupi kin en ihdoku wo, Itokah wakpadan kin iyececa.

5 Tona ceya wojupi kin hena wiyuškinyan wamnayanpi kta.

6 Ceya ye kta, wojupi opahte yuha ye kta; Wiyuškinyan ku kta, Aguyapi pahtapi hduha ku kta.

PSALM 127.

Oicimani odowan. Solomon tawa.

1 Tipi kin Jehovah kage šni kinhan, He en tona kagapi kin ituya skanpi. Jehovah otonwe kin awanyake šni kinhan, Waawanyake kin ituya kiktahan un.

2 Ituh hanhanna hin yektapi; Tehan oziniciyapi šni; Wicohtani woyute yatapi kta. Waštekidake cin hecen woistinma qu ece.

3 Iho, wicacinca Jehovah taku wicaqu kin hee; Wicatamni oicage cin he wokajuju ee.

4 Wanhinkpe wicašta wašaka nape ohna, Wicakoška   cinca kin hena iyececa.

5 Tuwe hena on wanju okikju kinhan, Wicašta kin he cante wašte hinca: Hena istecapi kte šni; Tiyopa kin ohna toka om wohdakapi kta.

PSALM 128.

Oicimani odowan.

1 Jehovah kokipapi kin otoiyohi cante wašte; lye tacanku ohna inanipi kin hena.

2 Ninape ohtani kin he yahdute cinhan, Cante niwašte hinca, qa tanyan nanke kta.

3 Nitawin hastanyanka iyuwi waicage cin he iyececa, Tipi nitawa mahen; Nicinca kin hena Ohwe ojupi kin iyececapi, Wahna wotapi nitawa ihduk an.

4 Wanyaka wo, wicašta Jehovah kokipe cin, He hecen yawadtepi kta.

5 Jehovah Zion etanhan niyawašte kte; Qa Jerusalem towašte kin wandake kta, Yani kin anpetu owasin.

6 Nakun nicinca cinca kin wanyahdake kta. Israel wookiye kici un nunwe.

PSALM 129.

Oicimani odowan.

1 Komaška hantanhan ota kakismayanpi ce; Israel eye kta iyececa;

2 Komaška ehantanhan ota kakismayanpi, Tuka maktepidan šni.

3 Mahyumdupi kin mitapete ayumdupi; Cankuyetonton hanskaska kagapi,

4 Jehovah owotanna; Wicašta šica ikan tawa kin he bapsaka.

5 Tona Zion Šicedakapi kin hena owasin istecapi qa hekta hdicuyapi kta.

 6 Tipi akan wato icage cin he iyececapi kta; He yujunpi šni itokam šnija ece.

7 He on aguyapi bakse cin nape okikju šni; Qa tuwe pahte cin he inaku en ohnaka šni.

8 Nakun tona en hiyayapi kin heyapi ni; Jehovah tawoyawašte en niunpi nunwe; Jehovah caje on unniyawaštepi ce, eyapi šni.

PSALM 130.

Oicimani odowan.

1 Jehovah, wošbe kin etanhan, houciciya ece.

2 Itancan miho kin nahon ye; Wocekiye oiitawa ho kin anohkiya wo.

3 Jah, woahtani cajeyakiyate cinhan, Itancan, tnwe en najin okihi kta he?

4 Tuka wokajuju kin he niye duha; Hecen konicipapi kta.

5 Jehovah ape waun, minagi ape un; Qa iye oie kin wacinwaye.

6 Minagi Itancan kin akipe; Anpao kta ape unpi kin isanpa; Anpao kta ape unpi kin hena.

7 Israel, Jehovah wacinyan wo; Jehovah wowaonšida hduha; Qa wopekitonpi untkanna kici un.

8 Unkan iye Israel opekiton kta, Wahtani owasin etanhan.

PSALM 131.

Oicimani odowan. David tawa.

1 Jehovah, micante wahanicida šni, Qa Miišta wankantuye šni; Nakun taku tanka kin en opimiciye šni, Qa taku miwankam hiyeye cin.

2 Awicakehan minagi wahduwahbadan, Qa wahduinina; Tuwe hunku azin ehpeye cin iyececa; Azin enakiya wanji minagi iyececa.

3 Israel, Jehovah wacinyan wo; Detanhan qa owihanke wanica.

PSALM 132.

Oicimani odowan,

1 Jehovah, David on kiksuya wo, Tawokakije kin owasin.

2 He Jehovah ekta iciconza; Awicakehan Wanji Wašaka Jacob tawa kin heciya;

3 Wakeya ohna wati kin en wahde kte šni; Ohehdepi akan manke cin en mde kte šni;

4 Miišta woitinma waqu kte šni; Qa miištojuha, owicagunga;

5 Jehovah owanka wan iyeweciye šni; Tipi wan Wanji Wašaka Jacob tawa kin on.

6 Iho, Ephratah en he naunhonpi; Can wojupi kin ohna iyeunyanpi ce.

7 Iye ti kin en unkupi kta; Iye siha hde kin en canpeška makehde inaunjinpi kta.

8 Jehovah najin wo, woozi nitawa kin en; Niye qa nitowašake can koka kin.

9 Wawayusnapi nitawa woowotanna koyakapi kte; Qa wicašta wacantkiya nitawa iyašapi nunwe.

10 David nitaokiye kin on etanhan, Sdayakiye cin ite kin hduhomni šni wo.

11 Jehovah wowicake eciyatanhan David heciya; Etanhan namni kte šni; Nitancan etanhan icage cin he Oiyotanke nitawa akan iyotangwakiye kta ce.

12 Nicinca wicotakuye mitawa patanpi kinhan; Qa mitawoyaotanin onspewicawakiye cin hena; Hehan nakun iye cinca kin ohinniyan Oiyotanke kin akan nici iyotankapi kta.

13 Jehovah Zion hdahniga; Ohna ti kta cin kin heon.

14 Ohinniyan woozi mitawa kin he dee; Den manke kta, wahdahniga heon etanhan.

15 Tawoyute woyawašte on mdawašte kta; Wahpanicapi tawa kin hena Aguyapi on imnawicawaye kta.

16 Nakun wawayusnapi tawa kin Hena wiconi koyagwicawaye kta; Qa wicašta wacantkiya tawa kin hena iyasapi, iyašapi kta.

17 Hen David he wan icahweciye kta; Petijanjan wan Sdawakiye cin piweciya.

18 Tona tokawicaye cin wowištece koyagwicawaye kta. Tuka iye akan tawatešdake kin hca kta.

PSALM 133.

Oicimani odowan. David tawa.

1 Wanyaka wo, hunkawanjinkiciyapi Nakun witaya tipi kin he wašte qa wiciyokipi hinca.

2 He wihdi wašte kin iyececa, pa akan, Putinhin ekta kaduza, Aaron putinhin tawa; Qa taonhdohda okagege kin ekta iyahde.

3 Hermon cu kin iyececa, Zion paha kin ahinhe cin hee: Hen Jehovah woyawašte wan u Hi; Owihanke wanin wiconi kin hee.

 PSALM 134.

Oicimani odowan.

1 Iho, Jehovah taokiye kin owasin, Jehovah yawašte miye; Hanyetu eca Jehovah tipi kin ohna nayajinpi kin.

2 Oyanke wakan kin ekta nape kiyugata po; Qa Jehovah yawašte.

3 Jehovah Zion etanhan niyawašte kta; Tuwe mahpiya maka ko kage cin he.

PSALM 135.

1 Jehovah caje kin he yatan po; Jehovah taokiye yaunpi, he idowan po.

2 Tona Jehovah ti kin ohna nayajinpi kin; Wakantanka unkitawapi ti hocoka en yaunpi:

3 Jehovah yawašte; Jehovah wašte; lye caje kin idowan po, he oiyokipi nakaeš.

4 Jehovah Jacob hdahniga; Israel tawaye kte cin heon.

5 Jehovah tanka hinca he sdonwaya; Qa Itancan unkitawapi taku wakan owasin isanpa.

6 Jehovah taku cin kin owasin econ ece; Mahpiya kin ekta qa maka akan; Miniwanca qa wosbe owasin en.

7 Maka ihanke etanhan opo wankantkiya iyayeya; Magaju kin wakanhdi kicaga; Mazopiye tawa etanhan tate kin hiyu kiya.

8 Egypta en tokaheya tonpi kin wicakastaka; Wicašta qa nakun wanunyanpi kin.

9 Wowapetokeca qa taku wowinihan, Egypta, niye en ukiye ciqon; Pharoh qa taokiye kin owasin en.

10 Oyate ota wicakastaka, Qa wicaštayatapi wasaksaka wicakte:

11 Sihon, Amori wicaštayatapi kin; Qa Og, Bašan wicaštayatapi; Qa Caanan wokiconze kin owasin:

12 Qa makoce tawapi qon yuhapi kta wicaqu; Israel iye taoyate yuhapi kta.

13 Jehovah, nicaje kin he owihauke wanica: Jehovah, niksuyapi kin he Wicoicage qa wicoicage hehanyan.

14 Jehovah iye taoyate kin hdaco kta; Qa iye taokiye kin hena on ihduhomni kta.

15 Ikcewicašta taku wakan tawapi kin Hena mazaska qa mazaskazi; Wicašta nape on kagapi.

16 I yukanpi, tuka iapi šni; Išta yukanpi, tuka wawanyakapi šni;

17 Noge yukanpi, tuka winahonpi šni; Nakun ipi ohna oniya wanica.

18 Tuwe hena kage cin heca iyececapi; Nakun tona wacinyanpi kin owasin.

19 Israel tiyohnaka, Jehovah yawašte po; Aaron tiyohnaka, Jehovah yawašte po.

20 Levi tiyohnaka, Jehovah yawašte po; Jehovah koyakipapi kin, Jehovah yawašte po.

21 Jehovah Zion etanhan yawaštepi nunwe, Jerusalem en ounye cin. Jehovah yawašte po.

PSALM 136.

1 Jehovah wašte, hecen wopida eciya po; Towaonšida kin he owihanke wanica.

2 Taku wakan ta Wakantanka kin wopida eciya po; Towaonšida kin he owihanke wanica.

3 Itancanpi kin en Itancan kin wopida eciya po; Towaonšida kin he owihanke wanica.

4 Tuwe išnana taku tanka wowinihan econ kin; Towaonšida kin he owihanke wanica.

5 Tuwe wokšape on mahpiya kage cin; Towaonšida kin he owihanke wanica.

6 Tuwe maka kin mini akan yumdaya; Towaonšida kin he owihanke wanica.

7 Tuwe iyoyanpa tanka kage cin; Towaonšida kin he owihanke wanica.

8 Anpetu wi anpetu en ounye kte cin; Towaonšida kin he owihanke wanica.

9 Hanyetu wi wicanhpi ko hanyetu en ounyanpi kta; Towaonšida kin he owihanke wanica.

10 Tuwe Egypta en tokaheya wicatonpi wicakaštake ciqon; Towaonšida kin he owihanke wanica.

11 Qa wicaookaya tanhan Israel ewicahdaku; Towaonšida kin he owihanke wanica.

12 Nape wašake ca isto hdugate cin on; Towaonšida kin he owihanke wanica.

13 Tuwe Mde sa kin yukinukan ehnaka; Towaonšida kin he owihanke wanica.

14 Qa cokaya Israel iyayeye cin; Towaonšida kin he owihanke wanica.

15 Tuka Pharoah qa ozuye tawa kin mde sa kin en ehpewicaya; Towaonšida kin he owihanke wanica.

16 Tuwe iye taoyate hewotahedan yus awieaye cin; Towaonšida kin he owihanke wanica.

17 Tuwe wicaštayatapi tanka wicakaStaka; Towaonšida kin he owihanke wanica.

18 Qa wicaštayatapi wašaka wicakte; Towaonšida kin he owihanke wanica.

19 Sihon, Amori wicaštayatapi kin; Towaonšida kin he owihanke wanica.

20 Qa Og, Bašan wicaštayatapi kin; Towaonšida kin he owihanke wanica.

21 Qa tamakocepi kin yuhapi kta wicaqu; Towaonšida kin he owihanke wanica.

22 lye taokiye Israel yuhe kta; Towaonšida kin he owihanke wanica.

23 Tuwe unwahpanicapi en unkiksuyapi; Towaonšida kin he owihanke wanica.

24 Qa tokaunyanpi kin etanhan eunhdakupi; Towaonšida kin he owihanke wanica.

25 Tuwe cehpi ton owasin woyute wicaqu; Towaonšida kin he owihanke wanica.

26 Mahpiya ta Wakantanka kin wopida eciya po; Towaonšida kin he owihanke wanica.

PSALM 137.

1 Babylon tawakpa kin icahda, Hen unkiyotankapi, nakun unceyapi, Zion unkiksuyapi qehan.

2 He cokaya cohwanjiea kin en, Candowankiyapi unkitawapi otkeunyanpi.

3 Hen wayaka unyuhapi dowanpi oie kin unkidapi; Qa waunkipi kin hena wowiyuškin dapi; Zion tadowan etanhan unkicidowan po, eyapi.

4 Token Jehovah tadowan kin, Makoce tokeca en, unkahiyayapi kta he?

5 Jerusalem aciktonje cinhan, Minape etapa kin akiktonja nunwe:

6 Miceji macaka en askapa nunwe, Ciksuye šni kinhan; Mitowiyuškin tokapa ekta Jerusalem ewahnake šni kinhan.

7 Jehovah, Edom cinca kin ekta, Jerusalem taanpetu kin kiksuya wo: Yujuju po, yujuju po, Taku ahdehe cin hehanyan, eyapi.

8 Babylon cunwintku, ihangyapi kte cin, Tuwe ecaunyeconpi kin iyecen Nicicajuju kinhan he cantewašte kta.

9 Tuwe hoksiyopa nitawa iyawicahpaya, Qa inyan en ehpewicaye cinhan, he cantewašte kta.

PSALM 138.

David tawa.

1 Micante ocowasin on wopida eciciye kta; Taku wakan kin wicitokam icidowan kta.

2 Tipi wakan nitawa ekta canpeška makehde inawajin kta; Qa nicaje mdatan kta, nitowaonšida qa nitowicake on: Nioie kin nicaje ocowasin isanpa tanka yakaga heon.

3 Anpetu en hoyewaya, hehan amayadupte; Minagi en wowasakc on waditag mayaya.

4 Jehovah, maka wicaštayatapi owasin niyatanpi kta; Nii oie kin naiionpi kinhan.

5 Qa Jehovah tacanku ohna dowanpi kta; Jehovah towitan kin he tanka nakaeš.

6 Jehovah tehanwankantu ešta kun unpi kin awicatonwan; Tuka wahanicidapi kin tehantanhan sdonwicaya.

7 Wokakije cokaya mda ešta nimayaye kta; Tokamayanpi sinhdapi kin ekta nape yahdugate kta; Qa ninape etapa on nimayaye kta.

8 Jehovah taku miciyustan kta: Jehovah, nitowaonšida kin he owihanke wanica: Ninape taku kage cin ehpeye šni wo.

PSALM 139.

Dowan itancan kin kicagapi. David tadowan.

1 Jehovah, mayadukcan qa sdonyaya;

2 Imdotanka nawajin ko sdonyaya; Mitawacin tehantanhan oyakahniga.

3 Omawani qa imunke cin wapetogyaton; Qa miohan kin owasin tanyan idukcan.

4 Miceji en wicoie wanjidan ešta, Iho, Jehovah, niye ocowasin sdonyaya.

5 Miheyata qa mitokam aohdutemayaya, Qa ninape amayahnaka.

6 Wosdonye kin he okahnih owakihi šni; Tehan wankantu, hecen owakihi kte šni.

7 Nitaniya etanhan toki mde kta he? Qa niite etanhan toki nawajin kta he?

8 Wankan mahpiya ekta mde cinhan, hen niye yaun, Qa Hades en owinswaton kinhan, inyun, niye.

9 Anpao hupahu kin wakamdage kta; Miniwanca ihanke kin en ounwaye kta:

10 Heciya ešta ninape amayan; Qa nape nietapa kin mayuza.

11 Awicakehan otpaza amahinhpaye kta, epa ešta hehan hanyetu kin mihdukšan iyoyanpa.

12 Otpaza hee kaeš aotpašniye šni; Qa hanyetu kin anpetu iyecen iyojanjan: Otpaza kin he iyoyanpa kin iyececa.

13 Mitapaksin kin niye yakaga; Ina tamni mahen akahpemayaton.

14 Wowinihanyan makagapi heon ciyatan kta; Niohan kin hena wowinihan; Qa he minagi tanyan sdonya.

15 Woinahbe en makagapi qehan, Mahuhu kin ananicihmanpi šni, Maka osbe kin en makazontapi qehan.

16 Wiyapemni wann qon niista wanmayaka, Qa mitaanpetu icage kte cin, hinahin wanica ehan, Owasin nitawowapi kin en owapi.

17 Unkan Wakantanka nitawacin kin hena nina tewahinda; Hena yuwitayapi kin tanka hinca.

18 Hena mdawa kta, tuka wiyaka kin isanpa ota: Wekta qa hinahin cici waun.

19 Wiakantanka, awicakehan wicašta šica yakte kta: Heon we wicašta yaunpi kin, amayuštan po.

20 Hena taku šica on cajeniyatapi ece: Tokaniyanpi kin ikcekceya eajeniyatapi.

21 Jehovah, tona šicenidapi kin hena šicewicawada kte šni he? Qa tona nicipajinpi kin hena wahtewicawada kte šni he?

22 Wošicedake wowicake on šicewicawadaka; Hena tokawicawaya iyeceea.

23 Wakantanka, imayukcan qa micante sdonya wo, Imayute qa micanteoze kin sdonya wo.

24 Qa wokakije canku wan en maun kinhan wanyaka wo; Qa canku owihanke wanice cin en amayan wo.

PSALM 140.

Dowan itancan kin kicagapi. David tadowan.

1 Jehovah, wicašta šice cin etanhan emayaku wo; Wicašta wohitika etanhan mayakpatan kta.

2 Hena cante mahen wicohan šica awacinpi; Anpetu osan wokicize on mniciyapi ece.

3 Ceji hdumanpi, wamduška iyeceea; Ihapi mahen sintehda tage yukan. Selah.

4 Jehovah, wicašta šica nape etanhan emayaku wo; Wicašta wawicaki sa etanhan mayakpatan kta; Hena mioye yutehi wacinpi.

5 Wahanicidapi kin hena, On hmunkapi wan emaonpapi, hahonta nakun; Canku icahda wohmunke wan ehnakapi; Qa mazahtakiyapi emaonpapi. Selah.

6 Wakantanka mitawa kin he niye, Jehovah ewakiya; Jehovah, wocekiye mitawa ho kin nahon wo.

7 Jehovah Itancan, wowašake wanimakiye cin; Kicizapi anpetu kin en pa akahpemayaton.

8 Jehovah, wicašta šica taku cin kin ayupte šni wo; Taku awacin kin ecetu šni kiya wo; Wahanicidapi kta. Selah.

9 Tona mihdukšan hiyeye cin Hena iha taku wayušice cin pa ahdahpapi kta.

10 Petaga aihpewicayapi kta; Peta en iyewicaye kta, qa mini sma en: Hecen ake najinpi kte šni.

11 Wicašta iwakan kin hena Makoce kin en yusutapi šni nunwe: Taku šica wicašta wawicakiša ihangya kuwa kta.

12 Jehovah wicašta onsika woowotanna, Qa wicašta wahpanica kin woyaco ecakicon kta sdonwaya.

13 Wicašta owotanna cedan nicaje yatanpi kta; Wicašta ecetupi kin nitokam iyotankapi kta.

PSALM 141.

David tadowan.

1 Jehovah, houciciya, en mau inahni ye; Ceciciya eca maho kin nahon wo.

2 Wocekiye mitawa azintonpi kin nitokam un nunwe; Minape yugatapi htayetu wošnapi kin iyececa.

3 Jehovah, mii kin en akicita najin wicasi wo; Miiha tiyopa kin awanyaka ye.

4 Wicoie šica wan ekta micante yekiye šni wo; Wicašta woahtani econpi kin om, Wicošice en htawani kte šni. Qa woyute wašte yuhapi kin wate kte šni.

5 Wowaonšida on wicašta owotanna amape; Qa iyopemayan; he ihepi ee kta, Mapa tehinda kte šni; Tuka nakun iye kakijapi kin en cewakiye kta.

6 Wayaco tawapi kin hena inyan en ehpewicayapi: Unkan mioie nahonpi, hena skuya nakaeš.

7 Tuwe maka yumdu qa yuksaksa iyececa, Huhu unkitawapi Hades i kin en kada ehpeyapi.

8 Jehovah Itancan, Miišta kin niye ekta yanke; Wowacinye mitawa kin he niye; Minagi papson šni wo.

9 Mazahtakiyapi emaonpapi kin etanhan imacu wo; Qa woahtani econpi wohmunke tawapi etanhan.

10 Wicašta šica wohmunke iye tawapi en ehpeiciyapi nunwe; Tuka miye qe sam imdamde kta.

PSALM 142.

David tawoonspe, makofidoka en un qehan. Wocekiye wan.

1 Miho kin on Jehovah hoyewakiya; Miho kin on Jehovah cewakiya.

2 Iye itokam taku awacanmi wakpapson; Itokam woiyokišice mitawa owahdaka.

3 Mahentanhan mitaniya ktepidan; Tuka mitacanku kin niye sdonyaya; Canku ohna mde cin en wohmunke wan emakionpapi.

4 Etapa tanhan etonwe ca wanyaka wo; Unkan tuwedan sdonmaye šni; Wowinape takudan mduhe šni; Tuwedan minagi ekta etonwe šni.

5 Jehovah, niye houciciya: Wiconi makoce kin en taku mitawa, Wowinape mitawa kin he niye, epa.

6 Waceye cin he nahou wo, nina makakija; Tona šicaya makuwapi etanhan emayaku wo; Hena mikapeya wašakapi nakaeš.

7 Wicakaška tipi kin etanhan minagi icu wo, Hecen nicaje mdatan kta: Tanyan ecamiyecon kinhan, Wicašta owotanna mihdukšan hiyeye kta.

PSALM 143.

David tadowan.

1 Jehovah, wocekiye mitawa nahon wo; Onšiya hoyewaye cin he anohkiya ye: Nitoowotanna eciyatanhan nitowicake on amayupta wo.

2 Qa nitaokiye kici woyaco akite šni wo; Niye nitokam ni unpi kin tuwedan owotanna šni.

3 Toka kin he minagi šicaya kuwa; Wiconi mitawa makata ehpeya; Wanakas tapi kin iyecen otpaza en ounye makiya.

4 Heon mahentanhan mitaniya aopaskicapi; Mahentanhan micante atakuni šni.

5 Anpetu wanakaja kin hena weksuya; Niohan kin owasin awacanmi; Ninape taku kage cin hena awacin waun.

6 Minape ciciyugata; Maka puze cin iyecen minagi nitokam wanka. Selah.

7 Inahni wo, Jehovah amayupta wo; Minagi atakuni šni. Niite inahbe makiye šni wo; Okinni wicahapi ekta yapi kin iyemacece kta.

8 Hanhanna eca wocantekiye nitawa nahon mayan wo; Niye wacinciya, heon: Canku ohna mde kte cin he sdonye mayan wo; Niye ekta minagi wahdomda, heon etanhan.

9 Tokamayanpi kin etanhan emayaku wo; Jehovah, niye en inawahbe.

10 Nitawacin ecamon kta onspemakiya wo; Taku Wakan mitawa kin he niye: Nitaniya kin he wašte; Makoce omdaya en amayan nunwe.

11 Jehovah, nicaje on etanhan nimayaye kta; Nitoowotanna on minagi wokakije etanhan inape yaye kta.

12 Nakun nitowaonšida on tokamaye cin ihangyaye kta; Qa tona minagi iyokisinyapi kin owasin atakunišni iyewicayaye kta; Nitaokiye kin he miye, heon etanhan.

PSALM 144.

David tawa.

1 Jehovah, Imnija mitawa, yawaštepi nunwe; He ninape zuyapi onspekiya; Qa minapsukaza, kicizapi kin.

2 Wacanmakiye ca conkaške  mitawa, Wowinape mitawa qa emahdaku ece; Wahacanka mitawa qa tuwe wacinwaye cin, Mitaoyate mihukuya hiyuye cin he.

3 Jehovah, wica ta kin taku he, on sdonyaye kta; Qa wicašta cinhintku, unkan en yahi kta he.

4 Wicašta kin taku šni  iyececa; Taanpetu kin ohanzi wan hiyaye cin iyececa.

5 Jehovah, mahpiya nitawa hduhukuye ca kun u wo; He kin hena yutan wo, kinhan hena izite kta.

6 Wakanhdi hdutanin qa wicukamdeca wo; Wanhinkpe nitawa hiyuye ca yusinye wicaya wo.

7 Wankantanhan ninape hiyukiya wo; Makiyuska qa mini ota etanhan imacu wo; Toka cinca nape kin etanhan.

8 Hena ipi wohnayan iapi ece; Qa nape etapa tawapi kin he nape itonšni.

9 Wakantanka, odowan teca wan cicahiyaye kta; Candowankiyapi ikan wikcemna on icidowan kta.

10 He wicaštayatapi wanikiyapi wicaqu; lye taokiye David isan šice cin etanhan icu ece.

11 Makiyuška qa toka cinca nape kin etanhan imacu wo; Hena ipi kin wohnayan iapi ece; Qa nape etapa tawapi kin he nape itonšni.

12 Hecen unkicinkšipi kosknpi ehan Taku ojupi tanka icage cin iyececapi kta; Unkicunkšipi kin tipi wakan oise Inyan ayuco bagopi kin iyececapi kta.

13 Dotopiye unkitawapi kin ocaje owasin on oJudahn kta: Tahinca unkitawapi kin kektopawinge cinca tonpi kta, Qa kektopawinge yuotapi canku unkitawapi ohna.

14 Tatanka unkitawapi yušakapi kta; Yuksapi wanica qa yujujupi wanica; Qa canku unkitawapi ohna ceyapi wanice kta.

15 Oyate wan hecen unpi kin he cante waštepi: Oyate Taku Wakan tawapi kin Jehovah hee hecinhan he cante waštepi.

PSALM 145.

David tawa. Woyatan.

1 Wakantanka, Wicaštayatapi mitawa ciyawankantuya kta; Qa nicaje nidawašte kta, ohinniyan qa owihanke šni.

2 Anpetu owasin ciyawašte kta; Qa nicaje iwadowan kta, Ohinniyan qa owihanke šni.

3 Jehovah tanka qa nina yatanpi kta iyececa; Qa tanka kin he iyukcanpica šni.

4 Wicoicage wicoicage iyahdeya taku ecanon kin yatanpi; Qa niohan wašaka oyakapi kta.

5 Wotanka nitawa wowitan oiyokipi kin he, Qa wicoie wowinihan nitawa awacanmi kta.

6 Nakun niohan wakan wokokipe kin he oyakapi; Unkan miye wotanka nitawa mdaotanin kta.

7 Nitowašte tanka wokiksuye kin he yatanpi; Qa nitoowotanna kin on iyasapi ece.

8 Jehovah waon da qa wacantkiya; Tehan canteptanye šni qa tocantekiye tanka.

9 Owasin ekta Jehovah wašte; Qa tocantekiye taku kage cin owasin en un.

10 Jehovah, taku icahyaye cin owasin niyatanpi; Qa wicašta wacantkiya nitawa kin hena niyawaštepi kta.

11 Nitokiconze wowitan kin he oyakapi; Qa nitowašake kin cajeyatapi ece.

12 Tohan tanka kin wicašta cinca sdonyewicayapi kta; Qa tokiconze wotanka wowitan kin.

13 Nitokiconze kin he wokiconze owihanke wanica ocowasin; Qa wicašta niyatapi kin he wicoicage qa wicoicage en.

14 Tona hicahanpi owasin Jehovah najin wicakiya; Qa patujapi kin hena owasin wicayubosdata.

15 Taku ista yuke cin owasin niye anipepi; Unkan iyehantu eca woyute wicayaqu ece.

16 Ninape yahdumdaya, Qa taku ni un kin owasin hana wicayaya.

17 Tacanku owasin en Jehovah owotanna; Qa ohan owasin en wacantkiya.

18 Jehovah tona hoyekiyapi kin owasin wicikiyedan un; Tona wowicake en hoyekiyapi kin owasin.

19 Tona iye kokipapi taku cinpi kin ecetuye kta; Qa nakun hoyeyapi kin nahon, qa niwicaye kta.

20 Tona waštedapi kin hena owasin Jehovah wicapatan; Tuka šicapi kin hena owasin ihangwicaye kta.

21 Jehovah yatanpi kin he mii cajeyate kta; Qa wicacehpi owasin iye caje wakan kin he yawaštepi kta; Ohinniyan qa owihanke wanica.

PSALM 146.

1 Halleluia: Minagi, Jehovah yatan wo.

2 Tohanyan wani kin hehanyan Jehovah mdatan kta; Tohanyan en waun hehanyan Mita Wakantanka iwadowan kta.

3 Wicaštayatapi wacinwicayapi šni po; Wicašta cinca kin, en wanikiyapi wanica.

4 Taniya kin iyaya, hehan maka ekta hda; Anpetu kin he en tawacin kin atakuni šni.

5 Jacob ta Wakantanka tuwe okiye cin he cante wašte; Ta Wakantanka Jehovah he wacinye cinhan.

6 He mahpiya qa maka kin kaga; Miniwanca qa taku ohnaka kin owasin: He wowicake ohinniyan kpatan.

7 Tona šicaya wicakuwapi kin on woyaco econ ece; Wotektehdapi kin hena aguyapi wicaqu; Kaška unpi kin hena Jehovah wicayukca.

8 Ištagongapi kin hena Jehovah i ta wicakiyukawa; Pakopi kin hena Jehovah wicayuowotanna; Wicašta owotanna kin hena Jehovah wašte wicadaka.

9 Jehovah tona oyate tokeoa kin hena awanwicayaka; Wamdenica qa wiwazica kin owicakiya ece: Tuka wicašta šica tacanku kin yupemni.

10 Jehovah owihanke wanin wicaštayatapi un kta; Zion, nita Wakantanka ohinniyan qa ohinniyan kta. Halleluia.

PSALM 147.

1 Halleluya. Wakantanka unkitawapi idowanpi kin he wašte; He wiciyokipi, heon yatanpi kin he wicimdeza.

2 Jehovah Jerusalem piya kaga; Israel enanakiya iyayapi kin hena mnawicakiya.

3 Tona cante kicaksapi kin okiziwicaya; Qa capapi kin pawicakihta ece.

4 Wicanhpi kin tonakeca ešta hena yawa; Owasin cajeyata ece.

5 Itancan unkitawapi kin tanka, qa towašake kin ota; Qa tookahnige kin he yawapica šni.

6 Wahpanicapi kin hena Jehovah najin wicakiya; Šicapi kin hena makata ehpewicaya ece.

7 Wopida odowan on Jehovah ayupta po; Candowankiyapi on Wakantanka unkitawapi kahiyaya po.

8 He mahpiya kin mahpiya šapa on akahpa; Maka kin magaju kicaga; Qa he kin peji oicahya ece.

9 Woteca kin woyute wicaqu; Kangi cinca nakun, ceyapi kinhan.

10 Šuktanka towašake kin he iyokipi šni; Wicašta huha kin hena on iyuškin šni.

11 Tona kokipapi kin hena Jehovah iyokipi; Tona iye towaonšida apepi kin hena.

12 Jerusalem, Jehovah yatan wo; Zion, Wakantanka nitawa idowan wo.

13 Nitatiyopa ihupa kin hena yusuta; Nicokaya nicinca kin wicayawašte.

14 Nihdukšan wookiye kaga ece; Aguyapi šin kin on imnaniyan.

15 Taku eye cin he maka kin ekta ye ši; Iye oie kin dus inyanka ece.

16 Wa kin he hiyuya, tahinca hin iyececa; Hewanke kin cahota iyecen kada ece,

17 Wasu tawa kin onspaspa iyecen ehpeya; Ošni tawa itokam tuwe najinhan najin okihi he?

18 Iye oie kin ye ši, qa hena span kiya; Tate tawa ukiya eca mini kaduza ece.

19 Iye oie kin Jacob okiyaka; Tawoahope qa tawoyaco kin, Israel en.

20 Oyate kin owasin hecen ecawicakicon Šni; Qa tawoyaco kin hena sdonyapi šni. Halleluia.

PSALM 148.

1 Halleluya. Mahpiya kin etanhan Jehovah yatan po; Tehanwankantu ekta he yatan miye.

2 Taohnihde wicaye cin owasin, he yatan po; Wicobe tawa iyuhpa, he yatan miye.

3 Anpetu wi qa hanyetu wi, he yatan po; Iyoyanpa wicanhpi owasin, he yatan miye.

4 Mahpiya mahpiya kin, he yatan po; Qa mini, mahpiya iwankam un kin nakun.

5 Hena Jehovah caje kin yatanpi kte; Iye eeen eya, unkan kagapi, heon etanhan.

6 Qa hena yusuta, owihanke šni hehanyan; Woope wan wicaqu, unkan he acakšinpi šni.

7 Maka kin etanhan, Jehovah yatan miye; Hogan tankinyanyan qa osbe kin owasin.

8 Peta qa wasu, wa qa šota; Tateiyumni iye oie econ ece kin:

9 He kin hena, qa paha owasin; Waskuyeca can, qa hante owasin:

10 Wamanica, qa woteca owasin; Watntka, qa taku kinyan un kin:

11 Maka wicaštayatapi, qa oyate owasin; Wicašta itancanpi, qa maka akan wayaco owasin:

12 Koška, qa nakun wikoška ; Wicahinca qa hoksiyopa om:

13 Hena Jehovah caje kin yatanpi kte; lye caje kin ecedan yatankapi ece; Towitan kin maka qa mahpiya kin iwankam.

14 Unkan iye taoyate he wan icahwicakiciya; Wicašta wacantkiya tawa owasin on wowitan kin hee; Israel cinca kin on, oyate wan iye ikiyedan unpi. Halleluia.

PSALM 149.

1 Halleluya. Jehovah odowan teca wan kahiyaya po; Towitan kin, wicašta wacantkiya mniciyapi kin en.

2 Waicahye cin on Israel iyuškin nunwe; Zion cinca Wicaštayatapi tawapi kin on icidowanpi kte.

3 Wacipi kin on iye caje kin yatanpi nunwe; Cancega cotanka ko on idowan miye.

4 Jehovah iye taoyate kin on iyuškin; Onšiicidapi kin hena wiconi koyagwicaya ece.

5 Wowitan on wicašta wacantkiya iyuškinpi kte; Towinjapi akan dowanpi nunwe.

6 Wakantanka yatanpi kin dotepi ohna un; Qa napepi ohna mazasagye anog ope kin.

7 Hecen Ikcewicašta ehna watokiconpi kta; Qa oyatepi kin kakiswicayapi kta.

8 Wicaštayatapi wicayuhapi mazaicicahiha on wicakaštapi kta; Qa tona wicakinicapi kin hena maza icaške on.

9 Hena en woyaco owapi kin yuštanpi kta; Wowitan kin de wicašta wacantkiya tawa owasin yuhapi. Halleluia.

PSALM 150.

1 Halleluia. Tipi wakan tawa ohna Wakantanka yatan po; Wowašake mahpiya tawa kin ohna idowan po.

2 Wicohan tanka econ kin on yatan miye; Iyotan tanka kin iyececa idowan po.

3 Mazayahotonpi on yatan miye; Cotanka candowankiyapi ko on yatan po.

4 Cancega wacipi ko on he yatan miye; Candowankiyapi cotanka ko on yatan po.

5 Mazasnasna hotanka on yatan po; Mazasnasna wiyuškin on he yatan miye.

6 Taku niya un kin owasin Jehovah yatan po. Jehovah yawašte po..