JOHANNES WAYUOTANIN TAWA KIN Chapters 5-11 (Revelation/ Apocalypse) Dakota

JOHANNES WAYUOTANIN TAWA KIN.

WAYUOTANIN WICOWOYAKE 5.

1 Unkan tuwe oiyotanke kin akan kiyotanke cin he etapa kin eciyatanhan wowapi wan mahen tanhan qa akapatanhan owapi, qa ipuspe šakowin on apuspapi kin he wanmdaka.

2 Qa mahpiya ohnihde wašaka wan wanmdaka, he hotankakiya hotanin qa, Wowapi kin he tuwe yumdaye ca ipuspe šakowin kin yuhdoke kta okihi he, eya.

3 Unkan mahpiya kin ekta, qa maka kin akan, qa maka kin ihukuya tanhan tuwedan wowapi kin he yumdaye ca, en wanyaka okihi šni.

4 Hehan nina waceya, tuwe wowapi kin yumdaye ca yawa, qa en wanyake kta iyekicihantu kin tuwedan iyeyapi šni kin heon etanhan.

5 Unkan hunkawicayapi kin wanji hemakiya; Ceye šni wo, ito Juda wicoun kin etanhan, mnaja kin, David hutkan kin hee wowapi kin yumdaye ca, ipuspe šakowin kin yuhdoke kta okihi.

6 Hehan wanmdake ca, iho, oiyotanke kin cokaya, qa taku ni un topa, hunkawicayapi ko wicacokaya tahcaska cinca wan najin, wošnapi iyececa, he šakowin išta šakowin ko yukan, Wakantanka taniya šakowin maka kin owancaya ye wicayapi kin hena eepi.

7 He en hi, qa tuwe oiyotanke kin akan kiyotanke cin nape etapa kin etanhan wowapi qon icu.

8 Unkan wowapi kin he icu qehan, taku ni un topa kin, qa hunkawicayapi wikcemna nonpa sam topa kin hena tahcaska cinca kin itokam makata elipeiciyapi, otoiyohi candowankiyapi hduhapi, qa nakun mazaskazi wiyatke taku waštemna on ojudan, wicašta wašte wocekiye tawapi kin hee:

9 Qa odowan teca wan ahiyayapi, qa heyapi ; Wowapi kin iyacu, qa ipuspe kin duhdoke kta e iyenihantu ce, waniyušnapi qa Wakantanka ekta niwe kin on opeunyakitonpi, wicoun otoiyohi etanhan, qa iapi kin, qa wicowazi kin, qa oyate kin otoiyohi etanhan;

10 Qa Wakantanka ekta wicaštayatapi wawayušnapi ko unyakagapi; unkan maka kin oununyanpi kta ce.

11 Unkan wanmdake ca, oiyotanke kin ihdukšan, qa taku ni unpi kin hunkawicayapi ko wicihdukšan, mahpiya ohnihde woyawa tanka ota, qa kektopawinge ece kektopawinge, hena hopi kin nawahon;

12 Hotankakiya heyapi, tahcaska cinca wošnapi qon he wowašake, qa woyuha, qa woksape, qa wicookihi, qa wootanin, qa wowitan, qa wowašte henakiya icu kta okihi ce.

13 Unkan taku mahpiya ekta un, qa taku maka akan un, qa taku maka ihukuya tanhan un, qa taku miniwanca mahen un, hena taku ohnaka ko owasin kaken eyapi nawahon; Tuwe oiyotanke kin akan kiyotanke cin tahcaska cinca kin kici wowašte kin, wootanin kin, wowitan kin, qa wowašake kin henakiya owihanke wanin tawapi nunwe.

14 Unkan taku ni un topa kin hena, Hecetu nunwe, eyapi; qa hunkawicayapi wikcemna nonpa sam topa kin hena makata ehpeiciyapi, qa tuwe ohinniyan ni un kin he ohodapi.

WAYUOTANIN WICOWOYAKE 6.

1 Unkan tahcaska cinca kin ipuspe tokaheya yuhdoke cehan wanmdaka; unkan taku ni un topa kin wanji, wakinyan hotonpi kin iyecen hotanin qa, U qa wanyaka wo, eya nawahon.

2 Unkan wanmdake ca, ito, šuktanka ska wan tuwe akan iyotanke cin he itazipa wan yuha; qa watešdake wan qupi; unkan ohiye ca, ohiye kta e iyaya.

3 Unkan ipuspe inonpa yuhdoke cehan, taku ni un icinonpa kin he, U qa wanyaka wo, eya nawahon.

4 Unkan šuktanka wan tokeca hin ša kin he hinanpa; unkan tuwe akan iyotanke cin he maka kin etanhan wookiye icu kta e qupi, hecen otoiyohi kiciktepi kta; qa nakun mazasagye wan tanka qupi.

5 Unkan ipuspe iyamni kin yuhdoke cehan, taku ni un wiciyamni kin he, U qa wanyaka wo, eya nawahon. Unkan wanmdake ca ito šuktanka sapa wan; qa tuwe akan iyotanke cin he nape ohna taku on tke utapi wanji yuha.

6 Unkan taku ni un topa kin cokaya tanhan wicaho wan nawahon, Aguyapi iyutapi wanji he kašpapidan wanjidan, qa šuktanka tawote iyutapi nonpa he kašpapidan wanjidan kta; qa wihdi miniša ko ihnuhan kiuniyaye cin, eya.

7 Unkan ipuspe itopa kin yuhdoke cehan, taku ni un icitopa kin he ho kin nawahon; U qa wanyaka wo, eya.

8 Unkan wanmdake ca ito šuktanka wan hin san; tuwe akan iyotanke cin he Wiconte eciyapi, qa Wicahapi kin he ihakam iyaya. Unkan maka hanke itopa kin hehanyan mazasagye, qa wicaakihan, qa wiconte, qa wamanica maka akan un kin hena on wicašta wicakte kta e wowašake qupi.

9 Unkan ipuspe izaptan kin yuhdoke cehan, wahna wošnapi kin ihukuya tona Wakantanka oie, qa iye waayataninpi kin he on wicaktepi qon hena nagipi kin wanwicamdaka.

10 Hena hotankakiya hotaninpi qa heyapi, Itancan wakan, qa wicaka, tohanyan tona maka kin akan yukanpi kin wicadaco šni qa we unkitawapi kin on toyecon šni he?

11 Unkan hena otoiyohi wokoyake ska wicaqupi, qa ptecedan ape yukanpi kta, tona om taokiye unpi qon, qa iye hunkawanjitkupi kin, iš iyepi iyecen wicaktepi kte cin he yuštanpi kta hehanyan, kewicakiyapi.

12 Unkan ipuspe išakpe kin yuhdoke cehan, wanmdake ca ito maka škanškan tanka, qa anpetu wi kin sapa aya, wahinske ojuha kin iyececa, qa hanyetu wi kin iš we iyecen icaga.

13 Qa mahpiya wicanhpi kin makata hinhpayapi, witanšna hu wan tateyanpa tanka kahuhuza eca waskuyeca štunkadan keš pahpa ece kin he iyececa.

14 Qa wowapi pehan ehnakapi kin he iyecen mahpiya kin tanin šni iyaye ca, he otoiyohi, wita otoiyohi ko yutokan iyeyapi.

15 Qa maka wicaštayatapi, qa wicašta tankinkinyanpi, qa wicašta watonpika, qa wicašta itancanpi, qa wicašta wašakšakapi, qa wicašta wowidake unpi kin otoiyohi, qa ihduhapi kin otoiyohi, makohdoka qa he imnija kin ehna naicihmanpi;

16 Qa inyan he imnija ko hena heciyapi, Unkahinhpayapi,qa tuwe oiyotanke kin akan kiyotanke cin itohnake kin etanhan, qa tahcaska cinca kin wocanniye tawa kin etanhan anaunhman po:

17 He wošihda tawa anpetu tanka kin wanna hi; unkan tuwe najin okihi kta he?

WAYUOTANIN WICOWOYAKE 7.

1 Unkan hena iyohakam mahpiya ohnihde topa maka oise topa kin en inajinpi kin wanwicamdaka, maka tate ouye topa kin yuhapi, hecen maka qa miniwanca qa can hiyeye cin wanjidan atateyanpa kte šni.

2 Hehan mahpiya ohnihde tokeca wan wiyohiyanpa tanhan wankantkiya u kin wanmdaka, he Wakantanka ni on ipuspe tawa kin yuhe ca mahpiya ohnihde topa maka miniwanca ko kiuniyanpi kta e wicaqupi qon hena hotankakiya hoyewicakiye;

3 Qa heya, Maka, qa miniwanca, qa can hiyeye cin kiuniyanpi šni po, Wakantanka unkitawapi taokiye wicaye cin itepi kin en wapetog wicuntonpi šni kin hehanyan.

4 Unkan tona wapetog wicatonpi wicayawapi kin nawahon, Israel cincapi wicoun owasin etanhan kektopawinge opawinge sam kektopawinge wikcemna topa sanpa kektopawinge topa wapetog wicatonpi.

5 Juda wicoun kin etanhan kektopawinge ake nom wapetog wicatonpi; qa Reuben wicoun kin etanhan kektopawinge ake nom wapetog wicatonpi; qa Gad wicoun kin etanhan kektopawinge ake nom wapetog wicatonpi;

6 Aser wicoun kin etanhan kektopawinge ake nom wapetog wicatonpi; qa Nepthalim wicoun kin etanhan kektopawinge akenonpa wapetog wicatonpi; qa Manasses wicoun kin etanhan kektopawinge ake nom wapetog wicatonpi;

7 Simeon wicoun kin etanhan kektopawinge ake nom wapetog wicatonpi; qa Levi wicoun kin etanhan kektopawinge ake nom wapetog wicatonpi; qa Issachar wicoun kin etanhan kektopawinge ake nom wapetog wicatonpi;

8 Zabulon wicoun kin etanhan kektopawinge ake nom wapetog wicatonpi; qa Joseph wicoun kin etanhan kektopawinge ake nom wapetog wicatonpi ; qa Benjamin wicoun kin etanhan kektopawinge ake nom wapetog wicatonpi.

9 Hena taku kin iyohakam wanmdake ca, iho, wicota hinca, wicayawa kta tuwedan okihi šni, oyate hiyeye cin,qa wicoun kin, wicowazi kin, iapi ko owasin otoiyohi etanhanpi, oiyotanke kin itokam, qa tahcaska cinca kin itokam najinpi, wokoyake ska ece koyakapi, qa can wapa nape ohna yuhapi;

10 Qa hotankakiya hotaninpi qa heyapi, Wakantanka unkitawapi oiyotanke kin akan kiyotanke cin hee, tahcaska cinca kin kici, niwicaye yuha nunwe.

11 Unkan mahpiya ohnihde owasin oiyotanke kin okšan, qa hunkawicayapi taku ni un topa kin hena ko wicihdukšan inajinpi, qa oiyotanke kin itokam ite makipusdiya ehpeiciyapi, qa Wakantanka ohodapi ;

12 Qa heyapi, Amen; Wowašte, qa wowitan, qa woksape, qa wopida, qa woyuonihan, qa wowašake, qa wicookihi henakiya Wakantanka unkitawapi kin owihanke wanin yuha nunwe. Amen.

13 Hehan hunkawicayapi kin etanhan wanji waayupte ca, Wokoyake ska koyakapi kin hena tuwepi? qa tokiya tanhan upi he? emakiya.

14 Unkan, Itancan, niye sdonyaya ce, epa. Unkan hemakiya; Wicokakije tanka etanhan upi qon dena eepi, unkan wokoyake hdujajapi, qa tahcaska cinca we kin on hduskapi.

15 Heon etanhan Wakantanka oiyotanke kin itokam yakonpi, qa tipi wakan iye tawa kin ohna anpetu hanyetu ko ohodapi ece; qa tuwe oiyotanke kin akan kiyotanke cin he hena wicacokaya ounye kta.

16 Qa tohinni wotektehdapi kte šni, qa ipuzapi kte šni, qa anpetu wi kin qa taku kata ašpanwicaye kte šni.

17 Tuka tahcaska cinca kin, oiyotanke cokaya un kin he, hena wonwicaye ca, minihdoka ni un kin icahda yus awicaye kta: qa hena ištapi kin etanhan Wakantanka ištamnihanpe kin owasin wicakipakinte kta.

                                             

WAYUOTANIN WICOWOYAKE 8.

1 Unkan ipuspe išakowin kin yuhdoke cehan, mahpiya ekta wihiyayedan wancadan ape cin hanke hehanyan inina yukanpi.

2 Unkan mahpiya ohnihde šakowin Wakantanka itokam najinpi kin wanwicamdaka; qa ma-za yahotonpi tanka šakowin wicaqupi.

3 Hehan mahpiya ohnihde wan tokeca u qa wahna wošnapi kin ekta hinajin, mazaskazi oizinye wan yuha: Unkan taku waštemna ota qupi kin he, tona owotanna un kin owasin wocekiye tawapi kin ahna, mazaskazi wahna wošnapi kin oiyotanke kin itokam wanke cin he akan wošna kta e heon.

4 Unkan mahpiya ohnihde nape kin etanhan šota izite cin, tona owotanna un wocekiye tawapi kin hena ko, Wakantanka itokam wankantkiya aya.

5 Unkan mahpiya ohnihde kin he oizinye kin icu, qa wahna wošnapi peta kin etanhan oju, qa maka kin ekta ehpeya; unkan iho, wicaho, qa wakinyan hotonpi, qa wakanhdi, qa maka škanškan.

6 Unkan mahpiya ohnihde šakowinpi maza yahotonpi tanka yuhapi kin hena yahotonpi kta e hduwiyeyapi.

7 Unkan mahpiya ohnihde tokaheya kin yahoton, qa wasu peta ko we icicahiyapi maka kin ahinhe: Qa can iyamnimni kin huhnaga, qa wato kin iyuhpa huhnaga.

8 Unkan mahpiya ohnihde iyokihe kin he yahoton, qa taku he wan tanka iyececa peta on itkonyahe cin he miniwanca kin en iyohpeyapi: Qa miniwanca kin hanke iyamni we icaga:

9 Qa taku miniwanca oicage ni un kin hanke iyamni tapi, qa wita wata kin iyamnimni kin owihanke yapi.

10 Unkan mahpiya ohnihde iciyamni kin he yahoton, qa wicanhpi wan tanka ideyapi petijanjan iyececa, mahpiya kin eciyatanhan hinhpaye ca wakpa iyamnimni kin ahinhpaye ca mini hdoka kin en.

11 Wlcanhpi kin he, Yatkepicašni, eciyapi. Unkan mini yatkepica šni icage ca wicašta ota mini kin on tapi, pa icage cin heon.

12 Unkan mahpiya ohnihde icitopa kin he yahoton; unkan anpetu wi hanke iyamni, qa hanyetu wi hanke iyamni, qa wicanhpi iyamnimni kin apapi, qa hecen hanke iyamni otpaza icu, qa anpetu kin hanke iyamni hehanyan iyoyanpa šni un, qa hanyetu kin nakun iyececa.

13 Hehan wanmdake ca nawahon, mahpiya ohnihde wan mahpiya cokaya tanhan kinyan iyaye ca hotankakiya heya, Wicokakije, wicokakije, wicokakije, tona maka ounyanpi kin hena en, maza yahotonpi tanka hotonpi kin mahpiya ohnihde yamni yahotonpi kte cin heon etanhan.

WAYUOTANIN WICOWOYAKE 9.

1 Unkan mahpiya ohnihde icizaptan kin he yahoton, qa iho, wacanhpi mahpiya kin eciyatanhan maka kin ahinhpaya wanmdaka; unkan he makohdoka ceteta wanica tiyopa iyuhdoke kin qupi.

2 Qa makohdoka ceteta wanica he tiyopa kin yuhdoka, unkan makohdoka kin etanhan šota hiyu, peta on maza šdoyapi tanka hinca etanhan šota uye cin iyececa; qa wošbe etanhan šota kin he on anpetu wi kin okotonyan kici aotpaza.

3 Unkan šota kin etanhan psipsicadan au, maka kin ekta, qa wicowašake wicaqupi, wanmduška maka akan un kin wicowašake yuhe cin he iyececa.

4 Qa wato maka aicage cin, taku toya un, qa can kin owasin kiuniye šni wicašipi, tuka wicašta kin tona itepi kin en Wakantanka tawowapetogton yuhapišni kin henana.

5 Qa hena wicaktepi kta e wicaqupi šni, tuka wi zaptan hehanyan kakišwicaye kta e wicaqupi. Unkan kakišyapi kin he wanmduska wicašta cawicape cinhan kiuniyanpi kin he iyececa.

6 Unkan anpetu kin hena en wicašta wiconte akitapi kta, tuka iyeyapi kte šni, qa tapi cinpi kta, tuka wiconte e nawicakicipe kta.

7 Psipsicadan kin hena ouncage kin šuktanka ozuye on wiyeya ehnag najinpi kin he iyececa; qa pa akan mazaskazi watešdake iyececa wapaha kitonpi, qa itepi kin wicašta ite kin iyececa.

8 Qa paha kin he winohinca paha iyecen yuhapi, qa hi kin hena mnaja hi kin iyececa.

9 Qa maza sapa maku akahpe iyececa maku akahpe tonpi; qa hupahu hmuhmunyan he ozuye canpahmihma, qa šuktanka ota ozuye ekta nawang yapi kin he iyececa.

10 Wanmduška kin iyecen sinte yuhapi, qa sinte kin en icape yuke ca, wi zaptan hehanyan wicašta kin kiuniwicaye kta okihipi.

11 Unkan wicaštayatapi wan yuhapi, wošbe ceteta wanica etanhan ohnihde, Hebrew iapi kin eciyatanhan Abaddon eciyapi, qa Helenes iapi kin eci- yatanhan Apollyon eciyapi kin hee.

12 Wicokakije kin wanji wanna henakeca, qa ito he iyohakam wicokakije nom u kta ce.

13 Unkan hehan mahpiya ohnihde icišakpe kin yahoton, qa mazaskazi wahna wošnapi Wakantanka itokam wanke cin he he topa kin etanhan wicaho wan taninyan nawahon:

14 He mahpiya ohnihde icišakpe maza yahotonpi tanka yuhe cin he heciya; Mahpiya ohnihde topa wakpa tanka Euphrates kin ekta wicakaškapi kin hena wicakiyuška wo.

15 Hehan mahpiya ohnihde topa kin wicakiyuškapi; hena e wancadan ape cin, qa anpetu wanji, qa wi wanji, qa omaka wanjidan hehanyan wiyeya ehnag unpi, wicašta iciyamnimni kin wicaktepi kta e heon.

16 Unkan ozuye kin šuktanka akan iyotankapi kin hena kektopawinge kektopawinge opawinge nonpa; hena wicayawapi kin nawahon.

17 Qa wowanyake kin en šuktanka kin hecen wanwicamdaka, qa wicašta akan iyotankapi kin hena maku akahpe šaša, toto, qa zizi yuhapi. Unkan šuktanka pa kin he mnaja pa kin iyececa, qa ipi kin etanhan peta, qa sota, qa cahdi on kagapi kin hiyu.

18 Unkan hena yamni, peta, qa šota, qa cahdi on kagapi, hena ipi kin etanhan hiyu qon he on wicašta iciyamnimni kin wicaktepi

19 Wowašake yuhapi kin he ipi kin ohna qa sintepi kin ohna; sintepi kin hena wamduška kin iyececa, qa pa yukan ece, qa hena on wakiuniyapi ece.

20 Unkan wicašta tona wicokakije kin hena on wicaktepi šni kin hena iye napepi wicohan kin on iyopeiciyapi šni, hecen taku wakanšicapi kin ohowicadapi, qa mazaskazi, qa mazaska, qa mazazi, qa inyan, qa can wakagapi ohodapi ece kin ayuštanpi šni; hena wawanyake šni, qa winahonšni qa mani okihi šni.

21 Qa nakun tinwicaktepi, qa wapiyapi, qa wiinahmanpi, qa wamanonpi econpi kin on iyopeiciyapi šni.

WAYUOTANIN. WICOWOYAKE 10.

1 Unkan hehan mahpiya ohnihde wan tokeca wašake hinca mahpiya kin eciyatanhan kuntkiya u, mahpiya šapa hdowin kin he wanmdaka; wihmunke wan wapaha kiye ca, ite kin he anpetu wi kin iyececa, qa siha kin peta wankantkiya ide kin iyececa.

2 Qa nape kin on wowapi wan cistinna yumdayeya yuha. Qa siha etapa kin miniwanca ahekiye ca, sicatka kin iš maka kin akan.

3 Qa hotankakiya hotanin, mnaja wan hoton kin iyececa. Unkan hotanin hehan wakinyan šakowin hotonpi.

4 Unkan wakinyan šakowin kin hotonpi hehan wowapi wakage kta, tuka wicaho wan nawahon, mahpiya kin eciyatanhan hemakiya, Taku wakinyan šakowin eyapi kin he sutaya apuspa wo, qa wowapi en kage šni wo.

5 Unkan mahpiya ohnihde miniwanca maka ko akan najin wanmdake ciqon he nape kin mahpiya kin ekta hdugate;

6 Qa tuwe ohinniyan ni un, qa mahpiya kage ca, taku ohnaka ko, maka qa taku ohnaka ko, miniwanca qa taku ohnaka ko kage cin hee on konza, wihiyaya kin wanna henakeca kta;

7 Tuka mahpiya ohnihde icišakowin yahoton kinhan, anpetu kin hena en Wakantanka tawowiyukcan henakeca kte cin hehanyan, iye taokiye, wicašta wokcanpi kin owicakiyake ciqon he iyecetu ce.

8 Unkan wicaho mahpiya kin eciyatanhan tanin qon he ake hoyemakiye ca heya, Mahpiya ohnihde miniwanca maka ko akan najin kin he ekta ye ca, wowapi cistinna yumdayapi kin nape en un kin he icu wo.

9 Hehan mahpiya ohnihde kin he en wai qa hewakiya, Wowapi cistinna kin he maqu wo. Unkan, Icu qa yuta wo, tezi kin pa niye kta, tuka nii kin ohna tuhmaga canhanpi kin iyecen skuye kta ce, emakiya.

10 Unkan wowapi cistinna kin mahpiya ohnihde nape kin etanhan iwacu, qa temwaya; qa mii kin en tuhmaga canhanpi kin iyecen skuya, tuka nawapca hehan tezi kin pa mayan.

11 Hehan, Oyate, qa Ikcewicašta, qa iapi kin, qa wicaštaya-tapi ota en wicayakidukcan kta ce, emakiya.

WAYUOTANIN. WICOWOYAKE 11.

1 Unkan cedi wan cansakadan iyececa he maqupi; unkan mahpiya ohnihde kin najinhan najin qa heya; Najin, qa tipi wakan Wakantanka tawa kin iyuta wo, qa wahna wošnapi, qa tona en cekiyapi ece kin hena nakun.

2 Tuka hocoka kin, tipi wakan itankan, he tankan iyeye ca iyute šni wo; he Ikcewicašta kin wicaqupi; unkan otonwe wakan kin amanipi kta, wi wikcemna topa sam nonpa hehanyan.

3 Unkan waayataninpi nom mitawa kin wahinske ojuha oihdugepi waayatapi kta e wicawaqu kta, anpetu kektopawinge sanpa opawinge nonpa sanpa wikcemna šakpe hehanyan.

4 Hena e Olive can nonpa qa petijanjan nom, Wakantanka maka yuhe cin itokam he cin hena eepi.

5 Unkan tuwe hena kiuniwicaye kta cin kinhan, ipi kin etanhan peta hiyu, qa toka wicayapi kin ihang wicaye kta: Tuwe kiuniwicaya cin kinhan he hecen ktepi kta.

6 Hena e mahpiya kin onataka okihipi, hecen magaju kte šni, waayatapi anpetu kin icunhan, qa mini kin we icahyapi kta okihipi, qa tohan cinpi eca wokakije owasin on maka kin kakišyapi ece.

7 Unkan taku yaotaninpi kin wanna yuštanpi kta hehan, wošbe kin etanhan wamanica wan wankantkiya hiyu, qa hena azuwicaye kta, qa ohiwicaye ca wicakte kta.

8 Unkan hena tancan tapi kin otonwe tanka canku kin ohna wanke kta, he iapi wakan kin eciyatanhan Sodom qa Egypta eciyapi, qa tukten Itancan unkitawapi kin icipaweh okatanpi qon.

9 Unkan wicašta kin, qa wicowazi kin, qa iapi kin, qa oyate kin, hena tancan tapi kin wanwicayakapi kta, anpetu yamni qa wanji hanke hehanyan, qa tancan tapi kin maka mahen wicahapi kte cin iyowinwicakiyapi kte šni.

10 Unkan hena on etanhan tona makoce kin en ounyanpi kin magagaiciyapi, qa wiyuškinpi kta, qa taku kicicupi kta, waayatapi nom tona maka akan ni un kin kakišwicayapi qon hena on etanhan.

11 Unkan anpetu yamni qa wanji hanke iyohakam, wiconi oniya kin Wakantanka eciyatanhan hena mahen iwicayaya; qa siha on najinpi, unkan tona wanwicayakapi kin nina yušinyayapi.

12 Unkan hena wicaho wan tanka nahonpi, mahpiya kin eciyatanhan hewicakiya; Deciya wankan u po, eya. Unkan mahpiya šapa wan akan mahpiya kin ekta iyayapi, qa tona toka wicayapi qon hena wanwicayakapi.

13 Unkan wihiyayedan ape cin he icunhan maka škanškan wan tanka, qa otonwe kin hankedan iwikcemnamna kin hinhpaya, qa maka škanškan kin on tona tapi kin hena wicašta kektopawinge šakowin. Qa unmapi kin yušinyayapi qa mahpiya Wakantanka kin wowitan qupi.

14 Wicokakije inonpa kin wanna henakeca, qa ito wicokakije iyamni kin kohanna u kta ce.

15 Hehan mahpiya ohnihde icišakowin kin yahoton, qa mahpiya kin ekta wicaho tanka hotaninpi, qa heyapi, Itancan unkitawapi qa Messiya tawa kin, maka wokiconze kin tawaye ca, ohinniyan en wicaštayatapi un kta ce.

16 Hehan hunkawicayapi wikcemna nonpa sanpa topa, Wakantanka itokam oiyotanke kin akan kiyotankapi kin, hena makata ehpeiciyapi, qa Wakantanka ohodapi;

17 Qa heyapi, Itancan Wakantanka Iyotan wašake cin, tuwe un, qa un qon, u kte cin he niye ce, pidaunyayapi, nitowašake tanka kin iyekcu, qa wicayeconza ce.

18 Qa oyate kin šinhdapi, qa wocantiyahde nitawa kin wanna hi; qa tohan wicate cin wicayacopi kta, qa ookiye wicayaye cin wicašta wokcanpi, qa owotanna, qa tona nicaje kin kokipapi, cistinpidan tankinkinyan ko, taku wicayaqu kta, qa tona maka napištanyanpi kin hena napištanwicayaye kte cin.

19 Hehan mahpiya kin ekta tipi wakan Wakantanka tawa kin yuhdokapi, qa tipi wakan  kin en wicotakuye can koka kin wanyakapi. Unkan ito wakanhdi, qa wicaho, qa wakinyan hotonpi, qa maka škanškan, qa wasu tanka.

JOHANNES WAYUOTANIN TAWA KIN, Revelation (The Apocalypse) Dakota/ Lakota Bible Chapters 1-4

JOHANNES WAYUOTANIN TAWA KIN.

WICOWOYAKE 1.

1 Jesus Messiya wayuotanin tawa, taku ecadan u kta e he tawowidake kin sdonyewicakiye kta Wakantanka qu qon he dee; unkan taohnihde wan u ši, qa tawowidake Johannes he okiyaka:

2 He Wakantanka oie kin, qa Jesus Messiya wohdake cin, taku tona wanyake cin hena yaotanin.

3 Tuwe wokcan oie kin de yawa, qa tona nahonpi, qa taku en kagapi kin anagoptanpi kin, hena wowašte yuhapi. Wanna kiya- dan ihan.

4 Johannes, Asia ekta okodakiciye šakowinpi kin wowapi wicakicaga. Wowaonšida, wookiye ko, tuwe un, qa un qon, u kte cin hetanhan niyepi en nicipi un nunwe; qa Woniya šakowinpi oiyotanke tawa kin itokam unpi kin hena eciyatanhan;

5 Qa Jesus Messiya etanhan, he waayatanin wicaka, wiconte etanhan tokaheya tonpi, qa maka wicaštayatapi kin Itancan kin hee. Tuwe wašteunkidapi, qa waunhtanipi kin etanhan iye we kin en unyujajapi,

6 Qa Atkuku Wakantanka ekta wicaštayatapi, wošna kagapi ko unkagapi kin hee, wowitan, wowašake ko owihanke wanin tawa nunwe. Amen.

7 Wanyaka po, mahpiya sapa kin akan u; unkan wicišta owasin wanyakapi kta, qa tona he capapi qon hena nakun, qa iye on oyate maka ohnaka kin owasin aicipapi kta. Hecetu nunwe. Amen.

8 Alpha qa Omega, otokahe qa owihanke kin he miye ce; Itancan un, qa un qon, u kta, iyotan wašake cin he hena hecen eya.

9 Johannes hunkawanjinyayapi, wokakije, qa wokiconze, wowahbadan ko, Jesus Messiya tawa kin en, tawaši yayapi kin he miye: Wakantanka oie qa Jesus Messiya wohdake cin on etanhan, wita wan, Patmos eciyapi, hen waun.

10 Itancan taanpetu kin en Woniya kin kici waun; unkan mihektapa tanhan wicaho wan tanka, maza yahotonpi tanka wan iyececa, nawahon;  

11 He kaken eya, Alpha qa Omega, tokaheya qa ehake kin he miye ce. Taku wandake cin wowapi ecen kage ca, Asia ekta okodakiciye kin iwahowicaya wo; Ephesus, qa Smyrna, qa Pergamus, qa Thyatira, qa Sardis,qa Philadelphia,qa Laodicea.

12 Unkan wicaho omakiye cin he wanmdake kta e ekta mihdamna. Unkan mihdamna qehan mazaskazi petijanjan ihupa šakowin wanmdaka.

13 Qa petijanjan ihupa šakowin kin cokaya Wanji Wicašta Cinhintku kin iyececa, tawokoyake kin siha kin ekta iyahdeya, qa maku kin opta mazaskazi ihduskita.

14 Qa pa kin paha ko ska, tahinca wanuyanpi hin kin iyecen ska, qa wa iyececa, qa išta kin peta ide kin iyececa;

15 Qa siha kin iš mazazi ecedan iyececa, peta tanka en itkonyahe seca; qa ho kin he mini ota ihaha kin iyececa.

16 Qa nape etapa kin ohna wicanhpi šakowin hduhe ca, i kin eciyatanhan mazasagye anog ope kin heca wan hiyu, qa itohnake kin he anpetu wi nina iyege cin iyececa.

17 He wanmdaka, unkan ta wanke cin iyecen siha hde kin en mahinhpaya. Hehan iye nape etapa kin on omayutan qa, Ihnuhan koyakipe cin, emakiya; Tokaheya qa ehake kin he miye;

18 Tuwe te ca ake kini, qa ito owihanke wanin ni waun; Amen; qa Hades kin wiconte ko tiyopa iyuhdoke kin yuha manka ce.

19 Taku wandake cin he wowapi ecen kaga wo, taku nakaha un qa dena iyohakam taku u kte cin hena.

20 Wicanhpi Šakowin minape etapa kin ohna wandake ciqon wowiyukcan kin hee, qa mazaskazi petijanjan ihupa kin hena nakun. Wicanhpi šakowin qon okodakiciye šakowinpi ohnihde yuhapi kin hena eepi; qa petijanjan ihupa šakowin wandake cin okodakiciye šakowinpi kin hena eepi.

WAYUOTANIN WICOWOYAKE 2.

1 Ephesus ekta okodakiciye ohnihde yuhapi kin he ecen wowapi kicaga wo; Tuwe wicanhpi šakowin nape etapa kin ohna hduhe ca, mazaskazi petijanjan ihupa šakowin cokaya omani kin he hecen eya;

2 Niohan, qa nitohtani, qa wa- cinnitanka kin he sdonwaya; qa tona šicapi kin hena iyowinwicakiya oyakihi šni; qa tona yewicašipi kin hecapi keiciyapi kin hena wicadukcan qa itonpišni kin heca iyewicayaya.

3 Wacinnitanka, qa ayape, qa micaje kin on litayani, qa oyakite šni.

4 Tuka taku cistinna iyacionpa, tokaheya wašteyadake cin he aduštan.

5 Heon tokiya tanhan nihinhpaye cin he kiksuye, ca ihduecetu, qa niohan tokaheya kin hdustan wo. Hecanon šni kinhan kohanna ekta ciu, qa petijanjan nitawa kin yutokan iyeciciye kta, nihduecetu šni kinhan.

6 Tuka he duha, Nicolaiton wicohan kin šiceyadake cin, hena miš eya šicewadaka.

7 Tuwe noge yukan hecinhan, taku Woniya kin okodakiciye kin ewicakiye cin he nahon kta. Tuwe ohiye cinhan he can wiconi, Wakantanka tamaga cokaya he cin, hetanhan yun wakiye kta.

8 Unkan Smyrna ekta okodakiciye ohnihde yuhapi kin he ecen wowapi kicaga wo; Tuwe tokaheya qa ehake un kin, te ca ake kini kin hee hecen eya;

9 Niohan kin sdonwaya, wokakije wowahpanica ko nitawa kin, (tuka winijica;) qa tona Juda wicašta keiciyapi qa hecapi šni, tuka Satan omniciye tawa kin etanhanpi, hena waaiapi kin nakun sdonwaya.

10 Token nicakije kte cin ihnuhan taku koyakipe cin. Iho, Wakanšica niyepi wanjikji wicakaška tipi kin en iyeniyanpi kta, iniyukcanpi kta e heon; unkan anpetu wikcemna hehanyan wokakije duhapi kta, tuka wicate cin hehanyan wicaka wo, kinhan wiconi watešdake wan cicu kta.

11 Tuwe noge yukan hecinhan, taku Woniya kin okodakiciye kin ewicakiye cin he nahon kta. Tuwe ohiye cinhan he wiconte icinonpa kin on kiuniyanpi kte šni.

12 Unkan Pergamus ekta okodakiciye ohnihde yuhapi kin he ecen wowapi kicaga wo; Tuwe mazasagye anog ope kin hduhe cin hee hecen eya;

13 Niohan kin sdonwaya, qa tukten Satan oiyotanke tawa yanke cin hen yati; qa micaje kin yuha yaun, qa wacinmayanpi kin aduštan šni, anpetu kin Antipas waayatanin wicaka mitawa kin niyepi kin en, tukten Satan ti kin, hen ktepi qon he ehan.

14 Tuka taku wanjikjidan iyacionpa; Balaam hee Balak Israel cinca kin taku on wahtani iciyapi kte cin wicitokam ehde kin he onspekiye ca, taku wakagapi wakiyušnapi kin yutapi, qa wiinahmanpi econpi kta, he tawoonspe tona yuhapi kin hena wicaduha;

15 Qa nakun Nicolaiton tawoonspe yuhapi kin hena wicaduha, he šicewadaka tuka.

16 Ihduecetu wo; hecanon šni kinhan kohanna ekta ciu, qa mii mazasagye kin on hena kici wecize kta.

17 Tuwe noge yukan hecinhan, taku Woniya kin okodakiciye kin ewicakiye cin he nahon kta. Tuwe ohiye cinhan he manna kihnakapi qon he etanhan yunwakiye ca inyan ska wan waqu kta, inyan kin he en wicacaje teca wan kagapi kin he tuwedan sdonye šni, tuka tuwe icu kte cin hecedan.

18 Unkan Thyatira ekta okodakiciye ohnihde yuhapi kin he ecen wowapi kicaga wo; Wakantanka Cinhintku, išta peta ide kin iyecen hduhe ca, siha kin mazazi ecedan iyececa hee hecen eya;

19 Niohan kin sdonwaya, wacanyakiye, ca htayani, qa wicayada, qa ayape, qa niohan kin, qa ehake kin hena tokaheya kin sam iyeya ota.

20 Tuka taku tonana iyacionpa, winohinca wan Jezebel eciyapi, winohinca wokcanka keiciye cin he mitaokiye kin wicahnaye ca, wiinahmanpi econpi, qa taku wakagapi wakiyušnapi kin yutapi kta e onspe wicakiye cin hee iyowinyakiya.

21 Unkan he wawicihahapi econ kin on iyopeiciye kta e anpetu waqu, tuka iyopeiciye šni.

22 Ito, owinja wan akan ewaonpe kta, qa tona kici wawicihahapi econpi kin hena nakun, wokakije tanka en; wicohan kin on iyopeiciyapi šni kinhan.

23 Qa iye cinca kin wiconte on wicawakte kta; qa okodakiciye kin owasin, tuwe wicapakšin wicacante ko iyukcan kin he miye e sdonyapi kta. Qa niyepi kin otoiyohi niohanpi kin eciyatanhan cicupi kta.

24 Tuka niyepi, qa tona Thyatira ekta woonspe kin he yuhapi šni, qa Satan ošbe tawa eyapi kin sdonye šni yaunpi kin kaken eciciyapi; Waqinpi tokeca acihnakapi kte šni;

25 Tuka taku duhapi kin he tinsa hduha po, hibu kte cin hehanyan.

26 Qa tuwe ohiye ca owihanke kin iyahdeya miohan kin yuha un kinhan, oyate kin en wowašake waqu kta.

27 Qa maza icapsinte wan on wicayuhe ca maka wakšica iyecen wicakamdece kta ce; hecen Ate etanhan hduha waun.

28 Qa anpao wicanhpi kin he waqu kta.

29 Tuwe noge yukan hecinhan taku Woniya kin okodakiciye kin ewicakiye cin he nahon kta.

WAYUOTANIN WICOWOYAKE 3.

1 Unkan Sardis ekta okodakiciye ohnihde yuhapi kin he ecen wowapi kicaga wo; Tuwe Wakantanka Taniya šakowin kin hena, qa wicanhpi šakowin hduhe cin he hecen eya; Niohan kin sdonwaya, caje wan duha, yani kin hee, tuka nita.

2 Kiktahan un, qa taku tona nahahin en un qa te kte cin hena hduwašaka wo; Wakantanka itokam niohan kin owotanna e iyewaye šni.

3 Heon token iyacu, qa nayahon kin kiksuye ca, tinsa yuze ca, ihduecetu wo. Kiktahan yaun šni kinhan wamanon sa iyecen ekta ciu kta, qa tohan ekta cihi kte cin he sdonyakiye kte šni.

4 Tuka Sardis ekta wicacaje tonana duha, hena e tawokoyake kin hdušapapi šni; qa ska ihduzapi ecen mici manipi kta; he iyehantupi nakaeš.

5 Tuwe ohiye cinhan he wokoyake ska koyake kta, qa iye caje kin wiconi wowapi kin etanhan wapajuju kte šni, tuka he caje kin Ate itokam,qa ohnihde wicaye cin hena wicitokam omdake kta.

6 Tuwe noge yukan hecinhan taku Woniya kin okodakiciye kin ewicakiye cin he nahon kta.

7 Unkan Philadelphia ekta okodakiciye ohnihde yuhapi kin he ecen wowapi kicaga wo; Tuwe wakan qa wicaka un, qa David tiyopa iyuhdoke kin yuhe ca, yuhdoka eca tuwedan ecen iyeye šni, qa ecen icu eca tuwedan yuhdoke šni ece kin hee hecen eya;

8 Niohan kin sdonwaya, tiyopa wan yuhdokapi ecen he cin he nitokam ewahde, qa tuwedan ecen iyeya okihi šni; wowašake cistinna duhe ca mioie kin yuha yaun, qa micaje kin ehpemayaye šni.

9 Ito, Satan omniciye tawa kin etanhanpi Juda wicašta keiciyapi, tuka hecapi šni, qa itonpi šni kin, hena iho, upi, qa nisiha kin itokam canpeška makehde inajin wicawakiye kta, qa waštecicida e sdonyapi kta.

10 Woape oie mitawa kin he awandake cin, heon tohan taku wawiyutanyan un kin tona maka owancaya unpi kin iyutanwicaye kta u kinhan, hehan awanciyake kta.

11 Iho ecadan wau kta; taku duhe cin he tinsa yuza wo, hecen watešdake nitawa kin tuwedan nici kte šni.

12 Tuwe ohiye cinhan, he tipi wakan mita Wakantanka tawa kin ohna can ihupa wan wakage kta, qa icimana tankan ye kte šni; qa he akan mita Wakantanka caje kin owawa kta, qa mita Wakantanka otonwe tawa caje kin, Jerusalem teca kin hee, mahpiya kin etanhan Wakantanka mitawa kin eciyatanhan u kin hee, qa nakun micaje teca kin.

13 Tuwe noge yukan hecinhan, taku Woniya kin okodakiciye kin ewicakiye cin he nahon kta.

14 Unkan Laodicea ekta okodakiciye ohnihde yuhapi kin he ecen wowapi kicaga wo; Tuwe Amen eciyapi, waayatanin owotanna, qa wicaka, Wakantanka woicage tawa otokahe kin hee hecen eya;

15 Niohan kin sdonwaya,šni qa ipiga unmana ecen yaun šni, šni qa ipiga unma tukte e ecen yaun kta wacin;

16 Tuka initeca, qa sni ipiga kici unmana ecen yaun šni, heon mil kin etanhan icihdepe kta.

17 Wimajica, qa woyuha ota waton, qa takudan imakakije šni, keha ce; qa inicakije ca, onnišike ca, niwahpanica, qa ištanigonge ca, tanconikadan e sdonyakiye šni.

18 Kaken wahokonciciya ce, mazaskazi peta on yuecedan kagapi kin he opemicaton wo, winijica kta ce; qa wokoyake ska, kodake kta e heon, hecen tanconikadan on winištece cin he tanin kte šni; qa wicišta wihdi kin, niišta iyakiun kta, hecen wawandake kta.

19 Tona cantewicawakiye cin hena wahokonwicawakiye ca, iyopewicawakiya ece. Heon mniheiciye ca ihduecetu wo.

20 Ito, tiyopa kin en nawajin qa wakabubu ece; tuwe miho kin nahon, qa tiyopa hduhdoke cinhan, he ekta tin hibu, qa kici wawate kta, qa iš eya mici wote kta.

21 Tuwe ohiye cinhan he oiyotanke rnitawa kin akan mici iyotanke wakiye kta, miye ohiwaye ca Ate oiyotanke tawa kin akan weci imdotanke cin he iyecen.

22 Tuwe noge yukan hecinhan, taku Woniya kin okodakiciye kin ewicakiye cin he nahon kta.

WAYUOTANIN WICOWOYAKE 4.

1 Hena iyohakam wanmdake ca ito mahpiya kin ekta tiyopa wan yuhdokapi; qa wicaho tokaheya nawahon kin he maza yahotonpi tanka kin iyececa, he omakiye ca heya, Deciya u wo, dena iyohakam taku u kte cin hena wanyagciciye kta ce.

2 Unkan kohanna Woniya kin en waun ; qa ito, mahpiya kin ekta oiyotanke wan ecen hdepi, qa tuwe akan iyotankehan yanka.

3 Tuwe akan iyotanke cin he iwanyakapi kin inyan tehika, iyaspis qa sahdinos iyececa; qa oiyotanke kin ihdukšan wihmunke wan hmihbeya yanka, smahagdos inyan kin iyececa.

4 Qa oiyotanke kin ihdukšan oyanke wikcemna nonpa sam topa wanka; qa oyanke kin hena en hunkawicayapi wikcemna nonpa sam topa iyotankapi, qa wokoyake ska koyakapi e wanmdaka; qa pa kin en mazaskazi tešdakapi.

5 Unkan oiyotanke kin etanhan wakanhdi qa wakinyan hotonpi qa wicaho hiyu; qa oiyotanke kin itokam petijanjan šakowin peta ece ideyapi, hena Wakantanka taniya šakowin kin heepi.

6 Unkan oiyotanke kin itokam mde wan wanka janjan seca, cahtowata iyecen kohdi; qa oiyotanke kin cokaya, qa oiyotanke kin ihdukšan, taku ni un topa kin yukanpi, hena e tokapatanhan qa hektapatanhan ko išta ojupidan.

7 Unkan taku ni un tokaheya kin he mnaja ouncage kin iyececa; qa taku ni un iyokihe kin he ptezicadan ouncage kin iyececa; qa taku ni un iciyamni kin he wicašta itohnake kin iyecen yuha; qa taku ni un icitopa kin he wanmdi kinyan un ouncage kin iyececa.

8 Qa taku ni un topa kin otoiyohi hupahu šakpekpe yuhapi, qa ihdukšan, qa mahen tanhan išta ojupidan; qa anpetu hanyetu ko ayaštan šni hecen eyapi, Wakan, Wakan, Wakan, Itancan Wakantanka Iyotan wašaka, tuwe un, qa un qon, u kte cin hee ce.

9 Qa tohan taku ni un topa kin, tuwe oiyotanke kin akan kiyotanke ca owihanke wanin ni un kin he wowitan, qa wootanin, qa wopida qupi kinhan;

10 Hehan hunkawicayapi wikcemna nonpa sam topa kin hena, tuwe oiyotanke kin akan kiyotanke cin he itokam makata ehpeiciyapi, qa tuwe ohinniyan ni un kin ohodapi, qa watešdake tawapi kin oiyotanke kin itokam ehpekiyapi, qa hecen eyapi;

11 Itancan, wowitan, qa wootanin, qa wowašake iyacu kta e iyenihantu, taku owasin yakage ca nitoiyokipi kin on owasin kagapi qa ecen han.