WOHOKONWICAKIYA KIN (Ecclesiastes) 7- 12

WOHOKONWICAKIYA KIN WICOWOYAKE 7.

1 Wicacaje wašte kin he wihdi waštemna isanpa wašte, qa anpetu en wicate cin he anpetu en tonpi kin isanpa wašte.

2 Wicaceya tipi ekta yapi kin he wayatkanpi tipi ekta yapi kin isanpa wašte; eqe wicašta owasin owihankepi kin hee, qa ni un kin he iye cante en ekihnake kta.

3 Wacjniyokišicapi kin he ihapi kin isanpa wašte; wicite iyokišice cin on wicacante kin yuwaštepi nakaeš.

4 Wicašta ksapapi cante kin he wicaceya tipi kin ohna yanka; tuka witkotkokapi cante kin iyašapi tipi kin ohna yanka.

5 Wicašta ksapa wawiyopeye cin nahonpi kin he wašte, witkotkokapi dowanpi wicašta nahon kte cin he isanpa.

6 Cega wan ihukuya wapepeka ho kin witkotkokapi ihapi kin iyececa. He nakun takušni.

7 Awicakehan wokakisyapi kin he wicašta ksapa yuwitkotkoka; qa taku wicaqupi kin he wicacante kin yušica ece.

8 Wicoie ihanke kin he otokaheya kin isanpa wašte; qa woniya wacintanka kin he woniya wahanicida kin isanpa wašte.

9 Ihnuhan nitaniya en canniniyan inayahni kinhan: wocanniye kin he witkotkokapi maku ohna yanka ece.

10 Tokeca anpetu tokaheya qon anpetu kin dena isanpa wašte he? ihnuhan ehe cinhan: wokšape eciyatanhan de on winunge šni, heon etanhan.

11 Wokšape kin he wašte, woyuha yuhapi kicica; qa tona anpetu wi wanyakapi wokamna tawapi kin hee.

12 Wokšape kin he wowinape, qa mazaska he wowinape; tuka wosdonye wokamna kin, wokšape tona yuhapi wiconi wicaqu ece kin hee.

13 Wakantanka taku kaje kin awacin wo: taku škopa kage cin tuwe owotanna kage kta okihi he?

14 Anpetu wašte kin en cante wašte wo; tuka wošice anpetu kin en waawacin wo: nakun dena icitkokim Wakantanka kaga, wicašta iye iyohakam takndan iyeye kte šni heon etanhan.

15 Anpetu takušni mitawa kin icunhan dena iyuhpa wanmdaka miye: wicašta owotanna iye toowotanna en kašpapi, qa wicašta šica iye tohan šice cin en ihdutehan ece e yukan.

16 Ihnuhan owotanna hinca yaun, qa ksape hinca nicicage cinhan: tokeca nihdutakuni kte šni he?

17 Ihnuhan šice hinca nicicage ca winitkotkoke cinhan: tokeca nahahin iyenihantu šni nite kta he?

18 De duze kte cin he wašte; han, nakun detanhan ninape ehdaku šni wo: tuwe Wakantanka kokipe cin he iyuhpa etanhan hdinanpe kta.

19 Wokšape he wicašta ksapa kin yuwašaka, wicašta wašaka wikcemna otonwe ohna yukanpi kin isanpa.

20 Awicakehan maka akan wicašta owotanna, taku wašte ece econ qa wahtani šni kin heca wanica.

21 Nakun wicoie eyapi kin owasin ekta cante yeye šni wo; okinni nitaokiye niyašica nayahon kta:

22 Niš eya nakun tokeca icijehan wicadašica nicante sdonkiya nakaeš.

23 De ocowasin wokšape on imdute: Wakšape kta ce, epa; tuka he mitehan un.

24 Taku itehanyan yanke ca temahentu hince cin he tuwe iyukcan okihi kta he?

25 Miye qa micante mihduhomni, sdonwaye kta, qa owade kta, qa wokšape wowiyukcan ko awakite kta, qa wowitkotkoke wošice kin sdonwaye kta, han, wowitkotkoke wotakušni koya.

26 Unkan isanpa pa te winohinca kin iyeya miye, winohinca tuwe cante kin mazahtakiyapi qa on hmunkapi, nape kin mazaicaške kin heca he wiconte isanpa pa hinca iyewaye: tuwe Wakantanka itokam wašte kin he etanhan ihduspe kta; tuka wahtani sa kin he iye on yuzapi kta.

27 Wanyaka wo, de iyewaya ce, Wohokonwicakiya kin eya; wanjidan wanjidan iyahna wowiyukcan kin iyeye kta;

28 He hinyahin minagi akita, tuka iyewaye šni ce: kektopawinge ehna wicašta wanjidan iyewaya; tuka dena owasin ehna winohinca wanjidan iyewaye šni.

29 Wanyaka wo, decedan iyewaya, Wakantanka wicašta owotanna kaga; tuka iye qe wowiyukcan ota akitapi ece.

WOHOKONWICAKIYA KIN WICOWOYAKE 8.

1 Tuwe wicašta ksapa iyececa he? qa tuwe e wicoie iyukcan sdonya he? wicašta toksape kin he iye ite kin iyehkiya, qa ite tosuta kin yutokeca kta.

2 Miye wahokonciciya, wicaštayatapi tawoahope kin patan wo, qa taku Wakantanka cajeyatapi kin en eciyatanhan.

3 Iye itokapatanhan de kta inahni šni wo; wicoie šica en inajin šni wo; iye qe taku cin kin owasin econ nakaeš.

4 Wicaštayatapi oie kin tukten yanke cin hen wowašake yukan; unkan tuwe, Taku ecanon he, eciye kta he?

5 Tuwe woahope kin patan kinhan he taku šica sdonye kte šni: qa wicašta ksapa cante kin he tohan iyehantu qa wowiyukcan kin sdonye kta.

6 Taku owasin on wiyukcanpi qa tohan iyehantu yukan ece; heon etanhan wicašta wošice tanka kiciyanke:

7 Taku u kte cin he sdonye šni nakaeš: ecin tohantu kte cin tuwe okiyake kta he?

8 Wicašta tuwedan woniya on wašake šni, iye taniya hduhe kta heon; qa nakun tuwedan wiconte anpetu kin en wowašake hduhe šni: qa okicize kin de en tuwedan kiyuškapi šni: nakun taku šica tona en iyohpayapi kin hena wicayušpe kte šni.

9 De ocowasin wanmdaka miye, qa taku anpetu wi ihukuya econpi kin owasin ekta micante ewacin wakiya: tohan wicašta wanji iš wicašta tokeca wowidagya on taku šica akipa ciyehantu yukan.

10 Unkan tiecen wicaštapi šica wicahapi wanmdaka, hena upi qa oyanke wakan kin etanhan iyayapi, unkan otonwe en heconpi kin hen awicakiktonjapi. De nakun takušni.

11 Taku šica econpi yacopi kin kohanna yuštanpi šni, heon etanhan wicašta cinca cantepi kin šicaya econ wacinkiyuzapi hinca.

12 Wahtani sa wan opawinge akihde taku šica econ qa tehan ni ešta, tona Wakantanka kokipapi, tona iye itokam kokipapi kin hena tanyan unpi kta, awicakehan sdonwaya.

13 Tuka tuwe šice cin he taku wašte yuhe kte šni, qa taanpetu hdutehan kte šni, hena ohanzi iyececa; Wakantanka itokam kokipe šni, heon etanhan.

14 Takušni wan maka akan econpi; wicaštapi owotannapi wicaštapi šicapi ohanpi kin eciyatanhan iyecen akipapi; akeš wicaštapi šicapi kin iš wicaštapi owotannapi ohanpi kin eciyatanhan iyecen akipapi. He nakun takušni ce, epa.

15 Hehan wiyuškinpi kin he mdawašte, wicašta anpetu wi ihukuya taku sanpa wašte yuhe šni, wote kta, qa wayatke kta, qa wiyuškin kta: iye tohtani etanhan, anpetu ni un, anpetu wi ihukuya Wakantanka taku qu kin he hduhe kta nakaeš.

16 Unkan wokšape sdonwaye kta e micante awacinwakiya, qa maka akan wicohan econpi kin wanmdake kta: nakun tuwe anpetu icunhan qa hanyetu icunhan išta on woištinma wanyake šni yukan:

17 Hehan Wakantanka tohan owasin wanmdaka miye; anpetu wi ihukuya wicohan econpi kin owasin wicašta wan iyeye kta okihi šni: wicašta wan he iyukcan kta htani qeyaš iyeye kte šni; han, nakun wicašta ksapa he sdonye kta keya ešta, iyeya okihi kte šni.

WOHOKONWICAKIYA KIN  WICOWOYAKE 9.

1 Dena owasin micante ekta yewaye, qa de ocowasin omdake kta, wicašta owotanna qa ksapapi, qa wicohan tawapi iyuhpa Wakantanka nape ohna yakonpi: taku wicitokam un qon owasin on wicašta tuwedan wowaštedake qa wošicedake unmana sdonye kte šni.

2 Iyuhpa akiyecen owasin en awicau; wicašta owotanna qa wicašta šica taku wanjidan awicakipa; tona wašte, qa tona ska qa tona sapapi kin; tuwe wošna qa tuwe wayušna šni kin: wašte kin he wahtani sa kin iyececa; tuwe cajeyata eciyatanhan taku eye cin he tuwe cajeyata kokipe cin iyececa.

3 Anpetu wi ihukuya taku econpi kin owasin en dee šica, owasin taku wanjidan akipapi kin hee: han, nakun wicašta cincapi cantepi taku šica ojugjudan, nakun tohanyan ni unpi wowitkotkoke cantepi kin en un, qa he iyohakam tapi kin ekta iyayapi.

4 Tuwe ni unpi kin iyuhpa ekta kahnigapi kin he wowacinye yuha; sunka ni un kin he mnaja te cin isanpa wašte nakaeš.

5 Tona nipi kin hena tapi kta sdonkiyapi; tuka tapi kin hena takudan sdonyapi šni, qa nakun sanpa iyunwin yuhapi šni; hena wicakiksuyapi kin hee kaeš akiktonjapi.

6 Nakun wawaštedakapi qa wašicedakapi qa wawinawizipi qon wanna henakeca; qa hetanhan anpetu wi ihukuya taku econpi kin takudan tawapi šni owihanke wanica.

7 Ya wo, aguyapi nitawa iyuškinyan hduta wo, qa cante wašteya minima hdatkan wo; nakaha niohan kin Wakantanka iyokipiya.

8 Nitawokoyake kin ohinniyan ska nunwe; qanipa kin ihepi codan un šni nunwe.

9 Nitawin wašteyakidake cin he kici wiyuškinyan ni wo, takušni wiconi nitawa anpetu kin owasin, anpetu wi ihukuya takušni anpetu nicu kin iyuhpa: wiconi kin de en qa anpetu wi ihukuya wicohan ecanon kin en taku nitawa kte cin hee nakaeš.

10 Ninape taku econ kta iyeye cin he token oyakihi econ wo: wicahapi ekta de cin heciya wicohan wanica, wicotawacin wanica, wosdonye wanica qa wokšape wanica, heon etanhan.

11 Wahdicu qa anpetu wi ihukuya tuwe duzahe cin he oinyanke kin en ohiye šni wanmdaka, qa wašake cin he okicize en ohiye šni, qa nakun ksapapi kin aguyapi yuhapi šni, qa wicašta wakahniga kin hena wowijice yuhapi šni, qa nakun wicašta wayupikapi woiyokipi yuhapi šni; tuka tohantu qa toketu kin hena owasin en awicau ece.

12 Nakun tohantu kte cin wicašta sdonkiye šni: hogan ho šica wan on wicayuzapi kin iyececa, qa zitkadan on hmunkapi wan on wicayuzapi iyececa; he iyecen wicašta cincapi anpetu šica en wicayahtakapi, ihnuhanna awicahinhpaye cinhan.

13 Nakun anpetu wi ihukuya wokšape kin de wanmdaka miye, unkan he tanka wadaka:

14 Otonwe wan cistinna qa ohna wicašta tonana: unkanwicaštayatapi tanka wan he takpe u, qa aonataka qa conkaške  tanka en akaga:

15 Unkan he ohna wicašta ksapa onsika wan iyeyapi, qa iye toksape kin eciyatanhan otonwe kin nikiya: hececa ešta tuwedan wicašta onsike cin kiksuye šni.

16 Hehan hepa; Wokšape he wowašake isanpa wašte: hececa ešta wicašta onšike cin he toksape kin dektayapi qa oie kin anagoptanpi šni.

17 Wicašta ksapa oiepi kin ainina anagoptanpi, tuwe witkotkokapi ehna itancan hoyeye cin he isanpa.

18 Wokšape he okicize wipe kin isanpa wašte: tuka wahtani sa wanjidan taku wašte ota ihangya ce.

WOHOKONWICAKIYA KIN WICOWOYAKE 10.

1 Honagidanpi tapi ihepi kaga tawihdi kin šicamna kiya ece: tuwe wokšape qa woyuonihan  on yatankapi kin he wowitkotkohe oie ota.

2 Wicašta ksapa cante kin iye etapa eciyatanhan yanka, tuka witkotkoka cante kin he catka tanhan yanka.

3 Han, nakun tuwe witkotkoke cin he canku ohna mani eca cante kiwanica, qa iye witkotkoka e owasin owicakiyaka.

4 Tuwe itancan kin he taniya nitkokim inajin kinhan nitohe ayuštan šni wo; inina unpi kin he woahtani tanka yuwašte ece.

5 Anpetu wi ihukuya taku šica wanji wanmdaka, ecinšniyan econpi wan tuwe itancan kin itokapatanhan hiyu:

6 Wowitkotkoke kin wankan wapa ehnakapi, qa wijicapi kin iš kuya iyotankapi:

7 Wowidake unpi kin hena šuktanka akan iyotankapi wanmdaka, qa wicaštayatapi cincapi makata manipi, wowidake unpi iyececa.

8 Tuwe woha wan qe cinhan en ohinhpaye kta, qa tuwe conkaške  wan yujuju kinhan wamduška wan yahtake kta.

9 Tuwe inyan qe cinhan hena on kiunniye kta: tuwe can kasdesdece cin he on ksuweiciye kta.

10 Mazasapa kin he pe šni, qa he hdube šni kinhan, nina hin wašagya econ kta: tuka wokšape he yukcankiya okihi.

11 Wamduška kin ajijipi šni kinhan wicayahtake kta; qa tuwe iwakan kin iš he isanpa wašte šni.

12 Wicašta ksapa i oie kin hena wowašte; tuka witkotkoka iha kin iye naicipce kta.

13 Iye i oie tokaheya kin he wowitkotkoke; qa taku eya owihanke kin he iš wowitkotkoke šice hinca.

14 Nakun witkotkoke wan oiepi ojudan ce: taku kte cin wicašta wan sdonye šni; qa iye iyohakam taku u kte cin tuwe okiyake kta okihi he?

15 Witkotkokapi htanipi kin mdokitewicaya ece, ecin token otonwe ekta ye kta sdonkiye šni.

16 Hehehe makoce, wicaštayatapi nitawa hokšiyopa kinhan, qa wicaštaytapi cincapi nitawa hanhannahinca wotapi kinhan!

17 Makoce, niyawaštepi ce, wicaštayatapi nitawa wicašta tanka cinca hecinhan, qa wicašta itancanpi nitawa tohan iyehantu eca wotapi kinhan, wasakapi kta heon qa witkopi kte šni.

18 Wokuje ota on tipi tihuha kin hinhpaya; qa wicanape takudan econ šni kin on tipi kin ohiyu ece.

19 Ihapi kta on aguyapi kagapi, qa miniša wicani wiyuškinkiya ece: tuka mazaska taku owasin on waayupte.

20 Nitawacin hee kaeš en wicaštayatapi kin yašice šni wo; qa tipi ohna nunke cin mahen tanhan wijice cin yašice šni wo: mahpiya zitkadan wan wicaho kin aye kta, qa taku hupahu ton kin he wicoie kin oyake kta, heon. ke cistinna hduhe cmhan he iyececa.

 WAHOKONWICAKIYA KIN  WICOWOYAKE 11.

1 Aguyapi nitawa mini ite kin akan kada ehpeya wo; anpetu ota kinhan ake iyeyakiye kta.

 2 Onge šakowin wicaqu wo, qa nakun šahdogan: taku šica maka akan un kta tukte e sdonyaye šni nakaeš.

3 Mahpiya šapa kin mini ojugjudan kinhan maka akan ihducokapi; qa can wan okaga hinhpaya, kaeš waziyatakiya hinhpaya kinhan, tukte en can wankahan hecinhan hen wanke kta.

4 Tuwe tate kin iwanyake cinhan woju kte šni; qa tuwe mahpiya šapa kin ekta ewacin kinhan aguyapi bakse kte šni.

5 Iyecen taniya tacanku kin taku he niye sdonye šni, kaeš tuwe ihdušaka tamni ohna token huhu icage cin šni, he iyecen Wakantanka taku owasin kage cin he taku kage kin sdonyaye šni.

6 Hanhanna eca nitawoju kin okikju wo, qa htayetu eca ninape ehdaku šni wo: unma tukte icage kta, dee qa hee, kaeš napiu akiyecen wašte kta sdonyaye šni.

7 Awicakehan iyoyanpa kin he oiyokipi hinca, qa wicašta anpetu wi wanyake cin he wašte:

8 Tuka wicašta wan waniyetu ota ni, owasin on iyuškin ešta, otpaza anpetu kin kiksuye kta iyececa; hena is eya ota kta. Taku u kte cin iyuhpa takušni.

9 Koška, hokšiyopa icunhan cante wašte wo; qa koniska anpetu kin en nicante iyuškiniciya nunwe; qa nicante tacanku kin ohna mani wo, qa niišta wawanyake cin en: tuka dena owasin on Wakantanka woyaco en aniu kta, he sdonya wo.

10 Heon etanhan nicante etanhan wicocantešice hdutukan wo, qa nicehpi etanhan taku šica ehpeya wo: hokšiyopa qa koška unpi kin napin takušni nakaeš.

WAHOKONWICAKIYA KIN WICOWOYAKE 12.

1 Wanna koniska anpetu kin en Wawicahniye cin he kiksuya wo, anpetu šice cin hinyahin ahi šni, qa waniyetu en, Hena ecaca iyomakipi šni ce, ehe kte cin hinyahin kiyadan u šni:

2 Anpetu wi, qa iyoyanpa, qa hanyetu wi, qa wicanhpi kin hinyahin aotpasyapi šni, qa mahpiya šapa magaju iyokakam ake hdiyohi icunhan:

3 Anpetu kin en ti awanhdakapi kin cancanpi kta, qa wicašta wašaka patus iciyapi kta, qa hi wiyakpan kin hena ayastanpi kta, tonana heon, qa owanyeye eciyatanhan eyokasinpi kin aotpasyapi kta;

4 Qa canku ohna tiyopa kin ecen icupi kta, wotpanpi ho kin ayuštankiyapi kinhan; qa zitkadan hoton kin on inajin kta, qa dowanpi cunwintkupi iyuhpa kun ehpeyapi kta:

5 Nakun taku wankantu kin kokipapi kta, qa canku ohna kopehdapi kta; qa uma kin he aktapi kte šni, qa psipšicadan kin he wosake dapi kta, qa cinpi kin he enakiyapi kta: wicašta tipi owihanke wanice cin he ekta hde kta nakaeš, qa tona ceyapi kin hena canku ohna yapi ece:

6 Nahanhin mazaska ikan kin yuškapi šni, qa mazaskazi wiyatke kin yuptujapi šni, qa waksica miniyowe kin ekta kamdecapi ni, qa minihdoka en iyuhmihma kin yuwegapi šni itokam.

7 Hehan makamdu kin token un qon maka kin ekta hde kta, qa wicaniya kin he Wakantanka qu qon he ekta hde kta.

8 Takušni takušni, Wahokonwicakiya kin eya; owasin takušni ce.

9 Unkan Wahokonwicakiya kin he sanpa ksapa nakaeš, heon etanhan nakun oyate kin wosdonye onspewicakiya; han, nina awacin qa wicoie wakan ota owotanna kage kta akita.

10 Wicoie oiyokipi Wahokonwicakiya kin iyeye kta akita: unkan taku owapi kin he owotanna, wowicake oie kin heca.

11 Wicašta ksapa oie kin hena wicahtake kin iyececa, qa wonwicaye wanjidan etanhan qupi mazaiyokatkuge omniciye itancanpi okatanpi kin iyececa.

12 Nakun, micinkši, dena on onspeicieiya wo: wowapi ota kagapi kin he owihanke yuke šni; qa nina wayawapi kin he wicacehpi mdokiteya ece.

13 Wicoie ocowasin yuštanpi kin he naunhonpi kte; Wakantanka kokipa wo, qa iye tawoahope kin ahopa wo: wicašta ocowasin kin hee.

14 Wakantanka wicohan owasin woyaco on an kta nakaeš, taku nahmanpi iyuhpa koya, wašte qa šica unma tukte kašta.

WOHOKONWICAKIYA KIN (Ecclesiastes) 1- 6

WAHOKONWICAKIYA KIN.

WICOWOYAKE 1.

1 Wahokonwicakiya kin, David cinhintku Jerusalem en Wicaštayatapi oie kin dena ee

2 Takušni, takušni, Wahokonwicakiya kin eya, takušni, takušni, iyuhpa takušni ce.

3 Anpetu wi ihukuya wicašta wicohtani econ kin owasin on iyunwin taku yuha he?

4 Wicoicage wanji iyaye ca wicoicage wan u ece; tuka maka kin ohinniyan han.

5 Nakun anpetu wi kin hinanpa, qa anpetu wi kin iyaya, qa totanhan hiyu qon he ekta inahni hda ece.

6 Tate kin itokahkiya iyaye ca waziyatakiya ihduhomni; tate ihduhomnimni, qa totanhan iyaye cin ake en hdi ece.

7 Wakpa iyuhpa miniwanca kin en iyaya; tuka miniwanca kin ojudan šni; wakpa kin totanhan hiyupi qon he ake ekta hdapi ece.

8 Wicoie owasin hunkitapi ojudan; wicašta oyake kta okihi šni: wicišta kin he wawanyaka imnan šni, qa wicanoge kin wanahonpi on imnan šni.

9 Taku un qon he u kte cin hee: qa taku econpi ece kin taku econpi kte cin ee: qa anpetu wi kin ihukuya taku teca wanica.

10 Taku on, Wanyaka wo, de teca ce, eyepica he? wanna tanina un qon hee, unkiye unkitokapatanhan yanke.

11 Taku hekta un qon hena kiksuyapi šni; qa nakun taku tokata kin tona ohakam unpi kte cin hena kiksuyapi kte šni.

13 Wahokonwicakiya kin he miye, Jerusalem en Wicaštayatapi manka.

13 Unkan taku mahpiya ihukuya econpi kin owasin wokšape on awakite kta, qa imdukcan kta e micante ekta yewaya: wicohtani tehike cin de Wakantanka wicašta cincapi wicaqu, on htanipi kta heon.

14 Anpetu wi kin ihukuya wicohan econpi kin owasin wanmdaka, unkan iho, iyuhpa takušni qa woniya iyokišinyapi kin hee.

15 Taku skope cin he yuowotanpidan kta okihipica šni; qa taku iyokpani un kin hena yawapica šni.

16 Micante kici wowahdaka qa hepa; Iho, tanka imacaga qa wokšape mnawakiya, tona Jerusalem en mitokam unpi qon owasin isanpa: han, micante wokšape qa wosdonye ota wanyaka.

17 Nakun wokšape sdonwaye kta micante waqu, wicoksape šni qa wowitkotkoke sdonwaye kta: De nakun woniya iyokisinyapi kin h e imdukcan.

18 Wokšape ota en woiyokišice ota yukan; qa tuwe wosdonye hduota kinhan he wicocantešica hduota ece.

WOHOKONWICAKIYA KIN  WICOWOYAKE 2.

1 Micante en hepa; Iho wo, wowiyuškin on iciyute kta ce; hecen taku wiciyokipi sdonya wo. Unkan iho, he nakun taku šni.

2 Ihapi kin he, Wowitkotkoka, ewakiya: qa wowiyuškin, He taku tokon he?

3 Micehpi miniša on wahdusuta kta micante en awakita, qa micante wokšape sdonyewakiye kta; qa wowitkotkoka kin he mduze kta, hecen wicašta cincapi on taku wašte kin tukte e he, anpetu towanakeca hipi kin en, mahpiya ihukuya taku econpi kte cin he wanmdake kta.

4 Taku tanka micicaga; tipi micicaga; hastanhanka iyuwi ojupi kin hu wehde:

5 Maga qa canwojupi kin micicaga, qa en waskuyeca can ocaje owasin hu wahde:

6 Miniyowe kagapi kin micicaga, on contanka can icahye cin he spayewaye kta:

7 Wicašta taokiye qa winyan taokiye opewicawaton, qa wati ohna tonpi wicamduha; nakun tanka qa cistinna ptewanunyanpi ota hinca wicawahduha, Jerusalem en mitokam unpi qon owasin isanpa:

8 Nakun mazaska qa mazaskazi mnamiciye, qa wicaštayatapi makoce tawapi ko tawokamna kin: wicašta dowanpi qa winohinca dowanpi heca icahwicawakiya, qa wicašta cincapi tawowiyuškinpi, token icuwa dowansa, qa on owasin ocaje he.

9 Hecen matanka, qa tona mi tokam Jerusalem en unpi qon ikapeya taku ota micicaga: nakun wokšape mitawa miciun.

10 Qa taku miišta da kin takudan ipimicida šni, wowiyuškin wanjidan kes micante etanhan wakipatan šni; mitohtani owasin on micante iyuškin nakaeš: qa mitohtani ocowasin on wokamna mitawa kin hee.

11 Hehan wicohan minape econ kin owasin en ewakitonwan, qa wicohtani htawani kta ecamon kin hena; unkan iho, ocowasin takušni qa woniya iyokišica hee, qa anpetu wi kin ihukuya wokamna wanica.

12 Unkan wokšape qa wicokšapešni qa wowitkotkoke kin iwanmdake kta mihdamna: wicašta wan wicaštayatapi ihakam u kin he taku okihi kta he? taku wanna econpi kin heceedan.

13 Hehan wokšape en wokamna yukan e wanmdaka, wowitkotkoke kin isanpa, iyoyanpa kin he otpaza isanpa wašte kin he iyececa.

14 Wicašta ksapa išta iye pa kin en un; tuka witkotkoke cin he otpaza omani: hececa ešta miye qe taku wanjidan owasin awicakipa ece e wanmdaka.

15 Hehan cante mahen hepa; Witkotkoke cin he taku akipa he iyecen miš eya awakipa; hecen tokiyatanhan miye qe iyotan wakšapa he? Hehan cante mahen, De iš eya takušni ce, epa.

16 Witkotkoke cin iyececa wicašta ksapa kin ohinniyan kiksuyapi šni nakaeš; taku nakaha un kin hena tokata anpetu kin en owasin akiktonjapi kta, heon etanhan. Qa wicašta ksape cin iš token te kta he? witkotkoke cin iyececa.

17 Heon etanhan wicani kin šicewakidaka; anpetu wi kin ihukuya wicohan econpi kin he waciniyowakišica nakaeš: iyuhpa takušni qa woniyaiyoki inyapi kin hee.

18 Han, mitohtani anpetu wi ihukuya ecamon kin ocowasin šicewakidake; wicašta mihakam u kte cin he aihpewakiye kta, heon etanhan.

19 Qa he wicašta ksape kta, qa i witkotkoka kta tuwe sdonya he? Hececa, mitohtani ecamon kin owasin, qa en anpetu wi ihukuya ksapa mihdutanin kin hena iye tawaye kta. De nakun takušni.

20 Heon etanhan anpetu wi kin ihukuya wicohtani ecamon kin iyuhpa micante kicunniwakiye kta mihdamna.

21 Wicašta wan tohtani kin wokšape en, qa wosdonye en, qa wokonze en un: tuka he wicašta wan on htani šni kin he tawa kta aihpekiye kta. He nakun takušni qa taku šica tanka.

22 Wicašta iye tohtani owasin, qa cante iyokišica, on anpetu wi ihukuya htani kin etanhan taku hduha he?

23 Taanpetu kin iyuhpa wicocantešica, qa tokakije kin he woiyokišica nakaeš: han, hanyetu en iye cante oziiciye šni. He nakun takušni.

24 Wicašta wote kta, qa wayatke kta, qa iye nagi tohtani kin on iyuškinkiye kta, taku sanpa wašte wanica. De wanyaka miye nakun, Wakantanka nape kin etanhan ce.

25 Tuwe wote kta he, qa miye mikapeya tuwe wiyuškin kta he?

26 Taku iye itokam wašte kin he Wakantanka wicašta wicaqu ece, wokšape qa wosdonye qa wowiyuškin: tuka wahtani sa kin he wokakije qu, wamnaye kta qa waeju kta, hecen Wakantanka itokam taku wašte kin he qu kta. He nakun takušni qa woniya iyokišica.

WOHOKONWICAKIYA KIN  WICOWOYAKE 3.

1 Taku iyuhpa iyehantu yukan, qa mahpiya kin ihukuya woawacin owasin tohantu kte cin yukan ece.

2 Wicatonpi iyehantu yukan, Qa wicate kta iyehantu; Woju econpi iyehantu; Qa wojupi yujunpi kta iyehantu:

3 Wicaktepi iyehantu yukan, Qa okiziyapi iyehantu; Wayujujupi iyehantu, Qa piya kagapi iyehantu yukan:

4 Wicaceya iyehantu yukan, Qa ihapi kta iyehantu; Wasihdapi iyehantu, Qa škatapi iyehantu yukan:

5 Inyan ehpeyapi iyehantu yukan, Qa inyan witaya pahipi kta; Adoksohan wicayuzapi iyehantu yukan, Qa poškin wicayuzapi ayuštanpi kta.

6 Waakitapi iyehantu yukan, Qa toki ehpeyapi kta iyehantu; Wapatanpi kta iyehantu, Qa wapaganpi iyehantu yukan:

7 Wayuhdehdecapi iyehantu yukan, Qa wakagegepi iyehantu yukan; Inina yukanpi iyehantu, Qa iapi kta iyehantu yukan:

8 Waštewicadaka iyehantu yukan, Qa Šicewicadaka iyehantu; Okicize iyehantu yukan, Qa wookiye kagapi kta iyehantu.

9 Wicašta htani kin he iye tohtani eciyatanhan iyunwin taku hduha he?

10 Wicohtani en wicašta cincapi htani iciyapi kta Wakantanka wicaqu kin he wanmdaka miye:

11 Taku owasin iyehantu eca owanyag wašte kaga: nakun iye cantepikin en ohinniyan kte cin he ewicakicihnaka, hecen Wakantanka tohtani kage cin otokaheya tanhan qa owihanke ekta wicašta tuwedan okahnige kte šni.

12 Hena en taku wašte wanica sdonwaya; tuka wiyuškin kta, qa ni un icunhan taku wašte econ kta:

13 Qa nakun wicašta otoiyohi wote kta, qa wayatke kta, qa tohtani owasin taku wašte en un kin he on ihduškin kta; Wakantanka taku qu kin hee.

14 Taku Wakantanka econ kin owasin owihanke wanice kta sdonwaya; takudan en akagapi kte šni, qa takudan etanhan icupi kte šni: unkan iye itokam wakokipapi kta e Wakantanka hecon ece.

15 Taku hekta un qon he nakaha un, qa taku tokatam u kte cin he wanna hekta un: qa taku hekta un kin he Wakantanka kin ake hdiyohi kiye kta.

16 Unkan nakun anpetu wi ihukuya woyaco oyanke kin wanmdaka, wošice hen yanka; qa woowotanna oyanke kin, wicošice en yanka.

17 Cante mahen hepa; Owotanna kin he qa šice cin Wakantanka wicayaco kta: han, wicotawacin otoiyohi qa wicohan otoiyohi hen iyehantu yukan.

18 Wicašta cincapi kin on cante mahen hepa; Tokin Wakantanka hena iwicayuten, hecen iye qe woteca hecapi e wanihdakapi kta.

19 Wicašta cinca kin taku akipapi hecinhan, he woteca akipapi; han, taku wanjidan awicakipa ece: wanji iš token ta hecinhan, unma kin iš iyecen ta: han, owasin woniya okonwanjidan yuhapi: hecen wicašta kin iš woteca isanpa takudan iciwašte šni; iyuhpa takušni nakaeš.

20 Owasin oyanke wanjidan ekta yapi; iyuhpa maka mdu heca, qa iyuhpa ake maka mdu icagapi ece.

21 Wicašta cinca taniya wankan ye cinhan, qa woteca taniya kin iš maka ekta kun ye cinhan, tuwe sdonya he?

22 Heon etanhan wicašta iye tohan kin on ihduškin kta taku sanpa wašte wanica imdukcan; he taku tawa kin ee nakaeš: qa iye iyohakam taku u kte cin he tuwe wanyagkiye kta he?

WOHOKONWICAKIYA KIN  WICOWOYAKE 4.

1 Unkan wahdicu qa wokakišye anpetu wi ihukuya econpi kin hena owasin iwanmdaka: qa iho, kakišyapi ištainnihanpe awicau; qa wicakicanpte yuhapi šni: unkan wakakišwicaye nape ohna wowašake yukan; tuka wicakicanpte yuhapi šni.

2 Heon etanhan tapi kin, tona wanna tapi kin hena wicadmawašte, nipi, tona nahanhin ni unpi kin isanpa:

3 Han, tuwe tohinni ni un šni kin he hena napin isanpa wašte, wicohan šica anpetu wi ihukuya econpi kin hena wanyake šni nakaeš.

4 Akeš wicohtani owasin iwanmdaka, qa wicohan yuštanpi otoiyohi, on wicašta iye takodaku kici nakiciwizipi kin hee. De iš eya takušni qa woniya iyokisica ce.

5 Witkotkoke cin he nape hdukšija qa iye cehpi hduta ece.

6 Napohnaka wanjidan woozi kici hee wašte, nape nonpa ojudan isanpa, wicohtani econpi qa woniya iyokišica iyahna hecinhan, eya.

7 Hehan wahdiyaku qa anpetu wi ihukuya takušni kin he wanmdaka miye.

8 Wanjidan yukan, qa inonpa wanica; han he cinca qa sunkaku takudan hduhe šni; tuka tohtani owasin ayuštan šni; nakun iye išta kin wowijice imna šni; qa, Tuwe on htawani qa minagi taku wašte icakišwaya he? eye šni. De nakun takušni; han, wicohtani tehika.

9 Nonpa kinhan wanjidan isanpa waštepi; wicohtani econpi kin on wokajuju wašte yuhapi nakaeš.

10 Hena hinhpayapi kinhan, unma kin iš takodaku najin kiye kta: tuka, hehehe, tuwe išnana un hinhpaye cinhan; tuwe najin kiye kta yuhe šni nakaeš.

11 Akeš, nonpa sakim wankapi kinhan cozapi ece; tuka tokiyatanhan wanjidan išnana coza kta he?

12 Unkan wanji kici econ ohiye cinhan, nonpa kici inajinpi kta; qa hahonta yamni kahmonpi kin he yupsakapi tehika.

13 Hokšidan wan wahpanica qa ksapa he wašte, wicaštayatapi wan wicahinca qa witkotkoka wanna onspekiyapi kta wicada šni kin he isanpa.

14 He qe wicokaške tipi kin etanhan wicaštayatapi kta hiyu; tuka nakun tuwe iye en tonpi kin he wahpanica aya.

15 Wicašta ni unpi owasin anetu wi kin ihukuya manipi kin ena, hokšidan inonpa kin eekiya inajin kte cin kici iwanwicamdaka.

16 Oyate kin owasin wopteca šni, tona wicitokam unpi qon owasin: nakun tona ohakam upi kin hena he on iyuškinpi kte šni. Awicakehan he nakun takušni qa woniya iyokišice cin hee.

WOHOKONWICAKIYA KIN  WICOWOYAKE 5.

1 Wakantanka tipi kin ekta da eca nišiha awanhdaka wo, qa witkotkoka tawošna yaqu kte šni e wanahon yanka wo; hena eqe taku šica econpi kecinpi šni.

2 Nii on ohanko šni wo, qa nicante Wakantanka itokam taku eya inahni kte šni. Wakantanka mahpiya ekta yanka, qa niye maka akan yaun; heon etanhan nioie tonana kta iyececa.

3 Wicohan ota eciyatanhan wihanmnanpi icaga: qa witkotkoka ho kin wicoie ota en un.

4 Tohan Wakantanka ekta taku on niciconze cinhan, hdajuju dutehan kte šni; iye qe witkotkokapi kin on wiyuškin šni; taku on niciconze cin he hdajuju wo.

5 Niciconza qa yahdajuju šni kinhan, niciconze šni unkanš hee wašte kta tuka.

6 Ihnuhan nii kin he nicehpi wahtanikiye cinhan; qa ohnihde kin itokam, He woyašna ce, ehe kte šni: Taku on etanhan Wakantanka niho on sinhda kta, qa ninape taku econ kin ihangye kta he?

7 Wihanmnanpi ota kin en takušnipi yukan, qa wicoie ota; tuka niye Wakantanka kokipa wo.

8 Wicašta onsika wicakipi kin he, qa makoce tehan yanke cin en woyaco woowotanna ko yupemnipi kin hena wandake cinhan, he taku kin on yusinyaye šni wo: tuwe wašaka keš isanpa wašake cin he awacin yanka; qa hena isanpa wašakapi yukan.

9 Nakun maka wokamna kin he wicašta owasin tawapi; wicaštayatapi hee kaeš maga kin wowidagya.

10 Tuwe mazaska waštedake cin he mazaska imnan kte šni; qa tuwe woyuha ota waštedake cin he oicage on imnan kte šni. He nakun takušni.

11 Woyuha kin hena ota aye cinhan, tona yutapi kin hena yuotapi; hecen tuwe tawapi kin hena taku iwaštepi he; išta on wanhdakapi heceedan?

12 Tuwe htani ištinbe cin he skuya, taku tonana kaeš ota yuta ešta: tuka wijice woyuha ota ton kin he ištinma okihi šni kiya.

13 Anpetu wi kin ihukuya taku šica tehika wan wanmdaka miye, woyuha tona tawapi išicapi kte cin on kihnakapi hee.

14 Tuka woyuha kin hena šicaya waakipapi on atakuni šni ece; unkan cinca wan icahkiye ca takudan nape ohna yanke šni.

15 Iye hunku tamni etanhan u qon he iyecen tancodan hde kta, hiyu qon iyecen ye kta, tohtani etanhan taku nape ohna aye kte cin takudan icu kte šni.

16 Unkan de iš eya taku šica tehika, token u qon he iyecehin ake hde kta: hecen tuwe tate htakicini kin wokamna taku yuha he?

17 Nakun taanpetu owasin otpaza en wota, qa wicocante šica ota yuha, qa wayazanka en woiyokišice.

18 Iho, taku miye wanmdake cin he dee; taku wašte wan oiyokipi, wote kta qa wayatke kta, qa tohtani anpetu wi ihukuya econ kin owasin, anpetu wi un towanakeca Wakantanka qu kin hehanyan iyuškin kta; taku tawa kte cin hee nakaeš.

19 Nakun wicašta otoiyohi Wakantanka woyuha qa wowijice qu kin he etanhan yute kta okihi, qa taku tawa kte cin hduhe kta, qa tohtani on iyuškin kta: Wakantanka taku qu kin hee.

20 Ota šni qeyaš anpetu ni un kin kiksuye kta; iye cante wiyuškin kin en Wakantanka toayupte yanka nakaeš.

WOHOKONWICAKIYA KIN WICOWOYAKE 6.

1 Anpetu wi kin ihukuya taku šica wanji yukan wanmdaka miye, qa he wicaštapi ehna tanka hinca:

2 Wicašta wanji wowijice, woyuha qa woyuonihan Wakantanka qu, hecen iye nagi taku cin kin iyuhpa takudan kiwanice šni, tuka hetanhan hdute kta Wakantanka okihikiye šni, tuka wicašta tokeca yuta. De iš eya takušni qa woyazan tehike.

3 Wicašta wan opawinge cincaton, qa waniyetu ota ni un, hecen iye tawaniyetu anpetu ota qeyaš, iye nagi taku wašte on imnan šni, qa nakun wicahapi hduhe šni kinhan, okaškan tonpi wan hee kaeš he isanpa wašte, epa.

4 He qe opo etanhan hiyu, qa otpaza en iyaya, qa iye caje kin otpaza akahpe kta.

5 Nakun anpetu wi wanyake šni  qa sdonye šni, eqe woozi yuha, unma qon isanpa.

6 Han, waniyetu kektopawinge nonpa hehanyan ni qeyaš taku wašte takudan wanyake šni: owasin ounyanpi wanjidan ekta yapi šni he?

7 Wicašta tohtani ocowasin iye i kin on etanhan, hececa ešta iye nagi kin ininan šni.

8 Wicašta ksapa wicašta witkotkoka isanpa taku yuha he? wicašta onsike cin ni unpi wicitokam mani sdonye cin he taku yuha he?

9 Wicašta wawanyake cin he wicanagi onuni kin isanpa wašte. De nakun takušni qa woniya iyokišice cin hee.

10 Taku hekta un qon hena wanna cajeyatapi, qa he taku kin wicašta ee šdonyapi: nakun tuwe iye isanpa wašake cin he kici econ kta okihi šni.

11 Hecen wicoie ota takušni yuotapi ece, heon wica ta hena taku iwašteka he?

12 Wicašta wan ni un, takušni ni un taanpetu iyuhpa ohanzi iyecen hiyaye cin he taku wašte yuhe kta tuwe sdonya he? qa anpetu wi kin ihukuya wicašta wan iyohakam taku u kte cin tuwe he okiyake kta he?