II Corinth 5- 7

II. CORINTH WICOWOYAKE 5.

1 Makata wakeya unkitawapi kin de yujujupi kinhan, Wakantanka ticage cin tipi nape codan kagapi kin, mahpiya ekta, owihanke wanin yanke cin he unhapi e sdonunyanpi.

2 Qa de ohna comniunhdazipi, qa tipi unkitawapi mahpiya eciyatanhan un kin he kounyakapi kta e cantounkpanipi.

3 He kounyakapi kinhan, tancodan unyakonpi kte šni.

4 Wakeya kin de ohna unkanpi kin hehanyan comniunhdazipi, unšakapi kin heon. Wokoyake unhdušdokapi kin he uncinpi šni, tuka kounyakapi kta: Hecen wiconi e wiconte ocowasin napce kta.

5 Tuwe he en icahunyanpi kin he Wakantanka ee; qa he Woniya tokaheya kin wanna unqupi.

6 Heon ohinniyan cante unwaštepi, qa tohanyan wicatancan kin ohna unkanpi kin hehanyan Itancan kin itehanyan unyakonpi kin he sdonunyanpi.

7 Wacinyanpi eciyatanhan maunnipi, qa wawanyakapi kin eciyatanhan šni.

8 Cante unwaštepi, tuka tancan kin de ohna unkanpi šni, qa Itancan kin kici unyakonpi kta e he iyotan uncinpi ece.

9 He de aiciciya unkakitapi, ekta kici unyakonpi, kaeš den unkanpi, unma tukte kašta, iyokipiunyanpi kte cin he.

10 Owasin Messiya tawoyaco oiyotanke kin itokam taninyan inaunjinpi kta, otoiyohi taku iye tancan km ohna ohanye cin hena icu kta, token econ qon eciyatanhan, he wašte qa šica unma tukte kašta.

11 Itancan wohitike cin he sdonunyanpi kin, heon wicašta cin wicunkiyapi; Wakantanka en unkihdaotaninpi, qa nakun widukcanpi kin en unkihdaotaninpi wacanmi.

12 Ake niyepi en unkihdatanpi šni, tuka unkiyepi on iniwinktapi kta e okihi unniyanpi; hecen tona cante kin eciyatanhan šni, tuka itohnake kin on iwinktapi kin hena ekta, taku on iniwinktapi kte cin duhapi kta.

13 Wacinunhnunipi hecinhan, he Wakantanka on etanhan; qa wacinunksapapi hecinhan, he niyepi kin on etanhan.

14 Messiya wacantkiye cin he iyounpaštakapi ece.

15 Qa he de unkiyukcanpi, wanji owasin on te cinhan hehan owasin tapi tuka; qa owasin on te cin, heon tona nipi kin hena iš iyepi on nipi kte šni, tuka tuwe hena on te ca ake kini kin hee on nipi kta.

16 Heon etanhan, detanhan wicacehpi eoiyatanhan tuwedan sdonunyanpi šni; han, Messiya hee wicacehpi eciyatanhan sdonunyanpi ešta, nakaha detanhan sdonunyanpi šni.

17 Hecen tuwe Messiya en un kin he wanna wicašta teca; taku tannike cin hena enakiyapi; iho, taku owasin teca icaga.

18 Qa taku owasin Wakantanka etanhan un, he iye kici okiciciye unkiyapi, Jesus Messiya eciyatanhan, qa wookiye wawokiyapi kin he unqupi.

19 Hecen Wakantanka Messiya on, wicoicage kin, iye kici, okiciciye wicaye ca, wahtanipi kin wicakiciyawa šni; qa wookiye wicoie kin he yuhe unkiyapi.

20 Heon Messiya on wawiciyapi kin unkiyepi, unkiyepi eciyatanhan Wakantanka ceniciyapi kin iyececa, Messiya caje on ceunniciyapi, Wakantanka kici okiciciya po.

21 Tuwe woahtani sdonkiye šni un qon he, unkiyepi on woahtani kagapi; hecen iye en Wakantanka toowotanna unkicagapi kta.

II. CORINTH WICOWOYAKE 6.

1 Heon iye kici htaunnipi iyecen, niyepi nakun ceunniciyapi ce, ituh Wakantanka towaonšida kin iyacupi kte šni.

2 He iye kaken eja, Omaka oiyokipi kin en nacihon qa wiconi anpetu kin en ociciya: Iho nakaha omaka oiyokipi kin hee; nakaha wiconi anpetu kin he dee.

3 Takudan on tuwedan ibotounyanpi šni, hecen wawokiyapi kin he bapi kte šni:

4 Tuka Wakantanka taokiye unyanpi kin he taku owasin on unkihduotaninpi ece, wacintankapi kin en, wokakije en, wahpaya unnicapi kin en, woiyokišice en;

5 Apapi kin en, kaška hnakapi kin en, yuomdecapi kin en, wicohtani kin en, kiktahan unpi kin en, wotektehdapi kin en;

6 Ecedan unpi kin on, wosdonye kin on, tehan apepi kin on, wacantkiyapi kin on, Woniya Wakan kin on, awicakehan waštedakapi kin on;

7 Wowicake oie kin on, Wakantanka towošake kin on, wicoowotanna wipe, etapa qa catkatanhan unpi kin on;

8 Wowitan qa wowištece kin ohna; waaiapi qa yaonihanpi kin ohna; wicahnayanpi kin iyececa, tuka wicakapi;

9 Sdonyapi šni un kin iyeuncecapi, tuka tankaya sdonunyanpi; tapi se iyecen unyakonpi, tuka ito unnipi; unkaštakapi, tuka nahanhin unktepi šni;

10 Iyokišicapi iyeuncecapi, tuka ohinniyan wiunyuškinpi; wahpanicapi kin iyeuncecapi, tuka wicota watonka wicunkagapi; takudan yuhapi šni kin iyeuncecapi, tuka taku owasin untonpi.

11 Corinth oyate kin, niyepi on i unhdukawapi, uncantepi kin tanka aya.

12 Unkiyepi en takudan aotins niyanpi šni, tuka niye nicantepi kin en otins niciyapi.

13 Hehan iyunwin kin de mayaqupi kta; micinca kin iyecen ocioiyapi; niš eya tankaya nicicagapi nunwe.

14 Ihnuhan tona awacin šni un kin hena en ecinšniyan iyanihdaškapi kinhan. Token wicoowotanna woahtani kici tidan kta he? qa token iyoyanpa kin otpaza kici un kta he?

15 Qa Messiya Belial kici token okonwanjidan cante yuzapi he? qa tuwe wicada kin he wicada šni un kin kici taku akiptan tawapi kta he?

16 Qa tipi wakan Wakantanka tawa kin he wakagapi kin kici token un kta he? Wakantanka ni un tipi wakan tawa kin he niyepi. Wakantanka heye ciqon he iyececa; Hena om wati kta, qa om mawani kta. Hena Wakantanka mayanpi kta, qa mitaoyate kin hena eepi kta ce.

17 Heon etanhan hena cokaya tanhan tankan upi, qa icunonpa un po, Itancan kin eya, qa taku ašape cin oyutanpi šni po, kinhan miš tawa ciyapi kta;

18 Niye ate mayayapi kta, qa miye cinkši ciyapi qa cunkši ciyapi kta ce, Itancan Iyotan Wašake cin he hena hecen eya.

II. CORINTH WICOWOYAKE 7.

1 Heon waštecicidapi kin, wahoyapi kin dena unhapi kin heon wicacehpi wicanagi ko taku ašape cin etanhan unhduecepidan, qa Wakantanka kokipeyahan wicoowotanna kin tanyan unhduštanpi kta.

2 Anaungoptan po: unkiye tuwedan šicaya ecawicunkiconpi šni, tuwedan wicunyušicapi šni, tuwedan taku icakiš wicunyanpi šni.

3 He wayaco hepe šni; cante en unniyuzapi, ptaya untapi qa iš unnipi kta ce, epe ciqon.

4 Niyepi on wadimatake hinca, niyepi on nina imawinkta; wocantohnake omajudan, unkakijapi owasin en nina imduškin.

5 Macedonia en unhipi qehan, uncehpipi kin takudan oziiciye šni, tuka taku owasin on iyounkišicapi; tankan tanhan wicokicize, qa mahen tanhan wokokipe.  

6 Tuka Wakantanka

tona iyokišicapi iwicakiye cin he cantohnag mayan, Titus hen hdi kin heon:

7 Qa he hdi kin hecedan šni, tuka nakun niye cantohnagyayapi kin heon; nina wacin en yeyayapi, qa iyonicišicapi, qa token cante en unyakiduzapi kin hena unkokiyakapi qehan, nina imduškin.

8 Wowapi wan on iyokišinciyapi ešta, heon nakaha iyopemiciye šni, iyopemiciya tuka qon. He wowapi kin ptenyedan iyokišinniyanpi wanmdaka.

9 Nakaha imduškin, iyokišinniyanpi kin heon etanhan šni, tuka nihduecetupi kta e on iyonicišicapi kin heon. Wakantanka eciyatanhan iyokišinniciyapi, hecen takudan icakiš unniyanpi šni.

10 Wakantanka eciyatanhan iyowicakišice cin he ihduecetupi on wiconi kta, on tohinni iyopeiciyapi šni kin he kaga; tuka wicoicage kin de en iyowicakišice cin he wiconte icahya.

11 Wanyaka po, Wakantanka eciyatanhan iyonicišicapi kin he itonpeya nicagapi, waayuptapi, qa wošihda, qa wokokipe, qa cante en hiyeyapi, qa winawizipi, qa hdajujupi kin hena niyepi en icahniciyapi! taku owasin on, he econpi qon en, takudan iyanionpapi šni yaunpi e nihduotaninpi.

12 Heon wowapi cicagapi, tuwe šicaya econ qon he on etanhan šni, qa tuwe šicaya ecakiconpi qon he on etanhan šni, tuka Wakantanka itokamya token wacin en unniyuzapi kin he niyepi en yutaninpi kta.

13 Heon etanhan iniciyapi kin on unkikiyapi; qa Titus iyuškin kin heon miš eya nina imduškin, iye nagi kin niyepi owasin eciyatanhan magagayapi kin heon etanhan.

14 Heon ciyatanpi qa owakiyaka ešta, on imaštece šni; tuka taku owasin eciyatanhan eciciyapi qon, he iyecen Titus en ciyatanpi kin he nakun wowicake.

15 Unkan niye owasin token anayagoptanpi, qa wokokipeya, cancanyan iyowinyakiyapi qon he kiksuya eca, iye iyotan cante en niyuzapi.

16 Heon etanhan, taku owasin on wicacidapi kin heon miš eya imduškin.

II Corinthians 1-4 (II Corinth)

PALOS CORINTH OYATE WOWAPI WICAKICAGE CIN; INONPA KIN.

WICOWOYAKE 1.

1 Palos, Wakantanka tawacin kin eciyatanhan, Jesus Messiya yeši qon he, qa Timotheus hunkawanjinkiciyapi wan kici, Corinth ekta Wakantanka taokodakiciye kin, qa Achaia owancaya tona owotanna un kin hena koya, wowapi unnicagapi,

2 Wowaonšida , wookiye ko, Wakantanka Ateunyanpi, qa Jesus Messiya Itancan kin etanhan, nicipi un nunwe.

3 Wakantanka Jesus Messiya Itancan unkiyapi he Atkuku, qa waonšidapi en ateyapi, qa Wakantanka owasin wacintonhnag wicaye cin he wowašte yuha nunwe.

4 He unkakijapi owasin en wacintonhnag unyanpi, hecen tona wokakije owasin ehna un kin hena iwicunkiyapi unkokihipi kta, wacintonhnagyapi on Wakantanka unkikiyapi kin he eciyatanhan.

5 Hecen Messiya tokakije kin unkiyepi en unkiciyuotapi kin, he iyecen Messiya eciyatanhan wacintonhnag unyanpi kin he nakun unkiciyuotapi kta.

6 Kakišunyanpi eca he wacintonhnag niyanpi, qa ni niyanpi kte cin heon; he wokakije on kakišunyanpi kin hena yuha okihi wicaye kta e ohanyan ece; qa wacintonhnag unyanpi hecinhan, he wacintonhnake niyanpi, qa ni niyanpi kte cin heon.

7 Unkan niyepi kin on sutaya wacinunyanpi, wokakije kin en opeya yaunpi kin he iyecen wacintonhnakeyapi kin en oyapapi kta, sdonunyanpi.

8 Mihunkawanji, Asia en token wokakije unhiyahdepi qon he sdonye šni yaunpi kta uncinpi šni, iyotan nina unkakijapi, unkokihipi kin isanpa, hecen unnipi kta unkecinpi šni.

9 Tuka unkiyepi kin mahen wiconte woyaco kin unhapi, hecen takudan wacinunkiciyapi kte šni, tuka Wakantanka wicate cin ekicetu wicaye cin he wacinunyanpi kta:

10 lye wiconte hinsko tanka etanhan eunhdakupi, qa nakaha ehdaku ece; qa eeš nakun eunhdakupi kta wacinunyanpi:

11 Qa niš eya wocekiye on ounyakiyapi kta, hecen wicašta ota etanhan, taku unqupi qon he on, unkiyepi on etanhan wicota wopida eyapi kta.

12 Unkiyuškinpi kin he unnagipi hdaotanin kin hee, wowicake wowakan ko en okonwanjidan, wicacehpi woksape yuhe šni, tuka Wakantanka towaonšida yuha, wicoicage kin ehna unnipi, qa niyepi kin ekta iyotan hececa.

13 Taku dawapi, qa sdonyayapi kin hecedan wowapi en unnicagapi; qa owihanke kin hehanyan wicayadapi kta kepce.

14 Onšpa sdonunyayapi, unkiyuškinpi kin he niyepi, he iyecen wowitan nitawapi kin he unkiyepi, Jesus Itancan taanpetu kin en.

15 Hecen wacinmduza, tokaheya niyepi kin ekta ciupi kta tuka, on inonpa wowašte duhapi kte cin heon.

16 Qa niyepi kin etanhan iyoopta Macedonia ekta mde ca, ake Macedonia etanhan niyepi kin ekta icicawin wahdi kta, qa Juda makoee kin ekta ye mayayapi kta wacin.

17 Hecen wacin mduze cehan, hehan iyowihan wacin mduza he? qa token miciconze cin he wicacehpi eciyatanhan miciconze ca hecen, Han, han, hiya, hiya, eya waun he?

18 Wakantanka wacinyepica, wicoie unkeniciyapi qon he, han qa hiya, hee šni.

19 Miye, qa Silvanus, qa Timotheus, Jesus Messiya Wakantanka Cinhintku kin unkoniciyakapi qon he, han, qa hiya, hee šni, tuka iye kin on, han ecedan.

20 Wakantanka iwahounyanpi kin hena owasin iye en, Han hee, qa iye en Amen, unkiyepi kin etanhan Wakantanka yatanpi kte cin heon.

21 Tuwe niyepi kici Messiya en unyusutapi, qa sdaunyanpi kin he Wakantanka kin ee.

22 Qa he unkapuspapi, qa uncantepi kin ekta Woniya tokaheya icupi ece kin he unqupi.

23 Unkan nakaha minagi kin ekta Wakantanka mayaotanin kta e cewakiya; ltoncipapi kta e on nahahin Corinth ekta wai šni.

24 Wacinyayapi kin on wowidag unniyanpi šni, tuka widuškinpi kin en ounniciyapi kta. Wacinyanpi on sutaya nayajinpi ece.

II. CORINTH. WICOWOYAKE 2.

1 Miye qe hecen mihdukcan, ake iyokišinya ekta ciupi kte šni.

2 Miye iyokišinciyapi kinhan, tuwe iyuškinniaye kta he; iyokišinwaye cin hee kta?

3 Hecen on he wowapi cicagapi, ekta wau kinhan tona on imduškin kte cin hena on etanhan iyokišin waun kte šni. Qa niyepi owasin wacinciyapi, mitowiyuškin kin he en niyepi owasin oyapapi kta.

4 Wicokakije tanka, qa wicocantešica, qa ištamnihanpe ota ehna wowapi cicagapi qon, iyokišinniyanpi kte cin heon hecanupi šni; tuka nina canteciciyapi kin he sdonyayapi kte cin heon.

5 Tuwe iyokišicapi kage ciqon he miye iyokišinmaye šni; tuka niye nihunhnanpidan, owasin cihapi kte šni.

6 He tuwe kin hecen yacopi qon, wicota econpi kin hecehnana kta.

7 Heon nakaha wicašta kin he iyuškinyayapi, qa yecanptapi kta, okinni nina iyokišice cin on ktepidan kta.

8 Heon ceciciyapi ce, he cante en duzapi kin hduotanin po.

9 Taku owasin on waanagoptan yaunpi hecinhan, iciyukcanpi kte cin heon wowapi cicagapi qon.

10 Tuwe taku yecicajujupi kinhan, miš eya hecamon, qa tuwe taku wecicajuju kin he niyepi kin on wecicajuju, Messiya itokam.

11 Hecen Satan ohiunyanpi kte šni; iye token iciconze cin sdonunyanpi.

12 Troas ekta Messiya tawootanin wašte yuha wahi, qa Itancan kin tiyopa wan makiyuzamni;

13 Hehan minagi ekta cante wašteya waun šni, Titus mihunkawanji kin hen iyewaye šni kin heon; hecen hena nape wicamduze ca, hetanhan Macedonia ekta imdamda.

14 Wakantanka, ohinniyan Messiya on ohiye unyanpi, qa ohinniyan unkiyepi kin on tawosdonye woomna yaotanin kin, hee wopida yuha nunwe.

15 Wakantanka ekta, Messiya on woomna wašte kin he unkiyepi, tona wiconi yuhapi kta, qa nakun tona yutakunipi kte šni kin hena en.

16 Dena iš tapi kta e wiconte oomna kin he unkiyepi, qa hena e nipi kta e wiconi oomna kin he unkiyepi; qa tuwe hena taku kin okihi he?

17 Wicota Wakantanka oie kin hnayan kuwapi kin hena iyeuncecapi šni; tuka wowicake eciyatanhan, tuka Wakantanka eciyatanhan, qa Wakantanka itokam, Messiya unkoyakapi ece.

II. CORINTH WICOWOYAKE 3.

1 Ake unkihdatanpi unkayapi he? qa wicašta wanjikji iyecen waayatanin wowapi nicagapi kte cin heca uncinpi he, kaeš waayatanin wowapi unyecagapi kta uncinpi he?

2 Wowapi unkitawapi unkicantepi kin ekta owapi kin he niyepi, wicašta owasin sdonyapi qa yawapi;

3 Messiya tawowapi taninyan oyakapi unkiye unkagapi kin; mini sapa on kagapi šni, tuka Wakantanka ni un kin Taniya kin on owapi; inyan mdaska kin en un šni, tuka wicacante conica kin he en.

4 Unkan Wakantanka ekta Messiya eciyatanhan woawacin kin de unhapi.

5 Unkiye cinka taku unkiyukcanpi kta unkokitpanipi, unkiyepi atayedan, taku unkokihipi kin he Wakantanka eciyatanhan.

6 Iye wicotakuye teca kin en ookiye wawokihika unkagapi, oowa kin he en un šni, woniya kin hee en; oowa kin he wateya, tuka woniya kin he waniya ece.

7 Wiconte wawokiyapi kin he owapi, qa inyan akan pagopi qon he wowitan yuhe cin, on Israel cinca kin Moses itohnake wiyatpa kin he opahta yukanpi kta okihipi šni hecinhan, wowitan kin he enakiyapi tuka;

8 Hecen Woniya wawokiyapi kin he sam iyeya nina wowitan kte šni he?

9 Woyaco wawokiyapi kin he wowitan hecinhan, wicoowotanna wawokiyapi kin he sanpa nina wowitan kta.

10 Qa taku yuwitanpi qon he taku wanji on wowitan šni, taku iyakapeya wowitan kin hee on etanhan.

11 Qa taku enakiyapi qon he wowitan kin hee hecinhan, taku ecen he cin he iyotan wowitan kin ee.

12 Woape hececa unhapi kin heon nina wadiuntakapi ece

13 Unkan Moses ite akahpe wan itohnake kin akahpe kiton kin he iyecece šni, taku enakiyapi kin owihanke kin hehanyan Israel cincapi kin ekta etonwan okihipi šni kin heon etanhan.

14 Tuka iye tawacinpi kin aotpasyapi: qa anpetu kin dehanyan Wowapi Wakan tanina kin yawapi eca, ite akahpe kin he eyakupi šni ecen un: he Messiya eciyatanhan eyakupi tuka.

15 Tuka anpetu kin dehanyan, Moses yawapi eca, ite akahpe kin he iye cantepi kin akahpa.

16 Tuka tohan Itancan kin ekta yuhomnipi kinhan, hehan ite akahpe kin he yuzamnipi kta.

17 Woniya kin he Itancan kin ee, qa tukten Itancan Taniya kin un kin, hen tawa iciyapi yukan.

18 Tuka unkiye owasin itohnake kin en takudan unkahpapi šni, ihdiyomdasin en wawanyakapi kin iyecen Itancan towitan kin wanunyakapi, qa iye ouncage kin iyecen unkagapi, wowitan sanpa wowitan kin en, Itancan Taniya kin on etanhan iyececa.

II. CORINTH WICOWOYAKE 4

1 Heon etanhan wawokiyapi kin de unhapi kin, wowaonšida unkicupi kin heon wacin ibounšakapi šni.

2 Tuka taku wowištece nahmana un kin hena ehpeunyanpi, qa wicahnayanpi kin en maunnipi šni, qa wohnaye yuha Wakantanka oie kin unkiciyuhapi šni, tuka wowicake yaotaninpi kin on wicašta owasin wiyukcanpi kin ekta unhdaotaninpi, Wakantanka itokam.

3 Wootanin wašte unkitawapi kin he anahmanpi hecinhan, tona takunipi šni kin hna anawicakihmanpi.

4 Hena ekta wicoicage kin de taku wakan tawa kin tona wicadapi šni wicotawacin kin wacinton šni wicakaga; Messiya Wakantanka ouncage kin hee, tawotanin wašte wowitan iyoyanpa kin he iyoyamwicaye kte šni heon etanhan.

5 Unkiye unkihdaotaninpi šni. tuka Messiya Jesus Itancan kin he unyaotaninpi ece; qa unkiye Jesus on ookiyewicayayapi kin.

6 Wakantanka iyoyanpa kin otpaza etanhan yege ši qon he uncantepi kin iyoyamunyanpi, Jesus Messiya itohnake kin eciyatanhan, Wakantanka towitan wosdonye iyoyanpa kin unqupi kte cin heon.

7 Tuka woyuha kin de maka cega ohna unhapi, heceu wowašake tanka kin Wakantanka etanhan un kta, qa unketanhanpi kte šni.

8 Ihdukšantanhan aotinsunyanpi, tuka unkahdaskicapi šni: wacinhnuni unyanpi, tuka takudan wacinye šni kin heuncecapi šni.

9 Šicaya unkuwapi, tuka ehpeunyanpi unyakonpi šni: makata ehpeunyanpi, tuka ihang unyanpi  šni.

10 Ohinniyan untancanpi kin en Jesus Itancan te cin he yuha unkanpi, hecen Jesus wiconi tawa kin untancanpi kin en taninyan un kta.

11 Unkije unnipi kin Jesus

on ohinniyan wiconte en iyaye unyanpi, Jesus wiconi tawa kin uncehpipi te kte cin en atanin kte cin heon.

12 Hecen unkiyepi kin en wiconte ohanyan un, tuka niyepi kin en wiconi.

13 Unkiye wowacinye woniya kin de unhapi, wowapi en kagapi qon iyececa; Wicawada kin heon iwaa ce; unkiš eya wicaundapi kin heon unkiapi ece.

14 Qa tuwe Jesus Itancan kin piya ekicetu ye ciqon, he Jesus eciyatanhan, ake ekicetu unyanpi kta, qa niyepi kin om sutaya he unkiyapi kta e sdonunyanpi.

15 Niyepi kin on etanhan taku owasin ecen un, hecen wowaonšida tanka kin, wicota wopida eyapi kin on sanpa ota aye kta, Wakantanka towitan kin on.

16 Heon wacin ibounšakapi šni, tuka wicašta akantanhan unkitawapi kin he takuni šni aya ešta, wicašta mahen tanhan un kin he anpetu iyohi yutecapi.

17 Unkakijapi cistinna, qa ptecedan kin he wowitan ota hinca, ota hinca, owihanke wanin tke hinca unkicagapi kta.

18 Icunhan taku wanyakapi kin hena ekta unketonwanpi šni, tuka taku tona wanyakapi šni kin hena ekta ewauncinpi. Taku tona wanyakapi kin hena ihanke kta, qa taku tona wanyakapi šni un kin hena owihanke wanica.