HDINANPAPI (Exodus) 1-20

HDINANPAPI

WICOWOYAKE 1.

 1 Wanna Israel cinca Jacob kici Egypta ekta hipi cajepi dena eepi, otoiyohi tiyohnaka om hipi.

2 Reuben, Simeon, Levi, qa Judah,

 3 Issachar, Zebulun, qa Benjamin,

4 Dan qa Naphtali, Gad qa Ašer.

5 Unkan wicanagi Jacob ceca etanhan inanpapi kin owasin wicanagi wikcemna šakowin ,qa Joseph eqe wanna Egypta en un.

6 Unkan Joseph ta cincu ko owasin, nakun tona kici icagapi kin owasin.

7 Unkan Israel cinca kin nina icagapi, qa ihduotapi, qa wašaku hinca ayapi, qa nina ota ayapi, on makoce kin owancaya unpi,

8 Unkan Egypta en wicaštayatapi tokeca wan najin, he Joseph sdonye šni.

9 Unkan oyate tawa hewicakiya, Inyun, Israel cinca oyate kin unkiyepi sam iyeya otapi qa wašakapi.

10 Ito wacinksamya econ wicunkiyapi kta, okini ibduotapi, qa ouye wan tatpe unhipi kinhan iš eya toka unyanpi om kokijuyapi kta, qa azuunyanpi qa makoce kin etanhan hdinanpapi kta, eya.

11 Unkan tawaqinpi on wašaka šni wicakiyapi kta e wohtani itancan yuhe wicakiyapi. Unkan opjye otonwe, Pithon qa Raamses Pharoah kicagapi,

12 Unkan token iyokišin wicayapl kin hucen ihduotapi, qa icagapi, qa Israel cinca kin on etanhan nina kokipapi.

13 Unkan Egypti Israel cinca kin nina htani wicakiyapi.

14 Qa wohtani tehika owasin econ wicakiyapi on wiconi tawapi pa wicakagapi upšija en, qa maka omdoton en qa wohtani owasin tehiya econ wicakiyapi.

15 Unkan Egypta wicaštayatapi Hebrew cincatonwicakiyapi wanji Šiphrah eciyapi qa unman Puah eciyapi kin hena hewicakiya;

16 Hebrew winohinca cinca ton wicayakiyapi eca, qa can akan iyotankapi wanwicadakapi eca cinca wica kinhan te yayapi kta, tuka he winyan kinhan eqe ni kta.

17 Tuka cincatonwicakiyapi kin Wakantanka kokipapi qa token Egypta wicaštayatapi kin econ wicaši ecen econpi šni, tuka cinca wica kin ni wicayapi,

18 Unkan Egypta wicaštayatapi kin cincatonwicakiyapi kin wicakico, qa hewicakiya, Tokeca deccn ecanonpi qa cinca wica kin ni wicayayapi he? eya.

19 Unkan cincatonwicakiyapi kin Pharoah heciyapi, Hebrew winohinca kin Egypti winohinca kin iyececapi ni ye, tuka minihecapi qa cincatonwicakiye cin en wicahi šni itokam cincatonpi heon heconkupi ye.

20 Unkan Wakantanka cincatonwicakiyapi tanyan ecawicakicon, unkan oyate kin ibduotapi qa wašaka hinca ayapi.

21 Unkan cincatonwicakiyapi, kin Wakantanka kokipapi heon tipi wicakicaga.

 22 Unkan Pharoah oyate tawa owasin taku wanji econ wicaši, Cinca wica kin owasin wakpa kin en ebpewicayayapi kta, tuka winyan kin, owasin niwicayayapi kta ce, eya,

HDINAPAPI WICOWOYAKE 2.

 1 Unkan wicašta wan Levi tiyohnaka etanhan Levi cunwintku wan ekta i qa yuza.

 2 Unkan winohinca kin ihdušake ca cinca wan ton, qa hokšidan wašte e wanhdake ca wi yamni nakihma.

3 Hehan sanpa nakihma okihi šni, qa huhba wakiškotpa wan icu qa bitumen cansin ko on apawinte ca be ohna hokšiyoqopa kin okihnake ca wakpaicahda psa en ehnaka.

 4 Unkan tankeku token ecakiconpi kte cin sdonye kta e itebanyan inajin.

5 Unkan Pharoah cunwintku ihdujaja kta wakpa ekta i, qa tawikoaka wakpa hutata kin omanipi; qa wakiskotpa kin psa ehna wanyake ca tawikoška kin he huwe ye ši.

 6 Qa yubdoke ca hokšiyoqopa wanyaka. Unkan inyun hokšiyoqopa kin ceya. Unkan onsida qa, Hebrew cinca wan dee, eya.

7 Unkan, Hebrew winohinca waazinkiye cicipan mde ca hokšiyoqopa azin niciye kta ye, tankeku Pharoah cunwintku kin eciya.

8 Unkan, Ya ye, Pharoah cunwintku eciya. Hecen wiciyanna kihde ca hokšiyoqopa hunku kin kipan.

9 Unkan, Hokšiyoqopa kin de atuha, qa azin micieiya ye, kinhan cicicajuju kte ye, eya. Unkan winohinca kin hokšiyoqopa ikikcu qa azinkiya.

10 Unkan hokšidan tanka icaga. Unkan Pharoah cunwintku kin kahi, hecen he cinkši ya, qa miniyatanhan iwacu eya, heon Moses eya cajehdata.

11 Unkan Moses tanka icage cin he iyohakam kakctu; Moses hunkawanjitku wicaye cin ekta i, qa token qin wicakiyapi atonwan, qa Egypti wicašta wan Hebrew wicašta iye sunkaku wan kte wanyaka.

 12 Qa anokatanhan ihduhomni, qa wicašta wanica wanyake cehan, Egypti kin he kte, qa wiyaka mahen nahma.

13 Qa inonpa can tankan i, unkan inyun Hebrew wicašta noni kicizapi, unkan, Tokeca nitakoda ayapa he? šicaya econ kin eciya.

 14 Unkan, Tuwe wicaštayatapi, qa wayaco tawa unyayapi kta e nicaga he? Htanihan Egypti yakte kin he iyecen mayakte kta he? eya. Unkan Moses kokipe ca awicakehan wicoio kin de sdonyapi ce, eya.

 15 Unkan Pharoah wicoie kin de nahon qa Moses kte kta e akita, unkan Moses najica, Pharoah ite kin etanhan qa Midian makoce kin en yanke ca miniyowe wan akan iyotanka.

16 Unkan Midian wawayušna kin cunwintku šakowin atkukupi optaye tawa mini yatke wicakiyapi kta e hipi, qa etanhan icupi, qa wakiskotpa ojudan yapi.

17 Unkan wihanwicakiyapi heca en hipi qa nape wicayapi; unkan Moses najin, qa owicakiye ca tahcaska tawapi mini wicaqu.

18 Unkan atkukupi kin Reuel en hdipi; unkan, Tokeca nakaha ecadan yahdipi he? eya.

19 Unkan, Egypti wicašta wan wihan wicakiyapi etanhan eunhdakupi, qa nakun mini unkicicupi, qa tahcaska kin mini wi; caqu, eyapi.

20 Unkan tukte he? tokeca wicašta kin ehpe yayapi he? kicopo, aguyapi yute kta ce, eya.

21 Unkan wicašta kin he kici ounye kta Moses iyokipi; unkan cunwintku Zipporah tawicu kta e.

22 Unkan cinca wan kiciton, unkan, Oyate tokeca tamakoce kin en manka ce, eye ca heon Geršom eya caskiton.

23 Unkan anpetu ota iyohakam, Egypti wicaštayatapi ta. Unkan Israel cinca kin šica howayapi wohtanipi kin on, qa wontanipi kin on ceyapi kin he wankantuya Wakantanka ekta i.

 24 Unkan Wakantanka šica ho wayapi kin nahon, qa Abraham, qa Isaac, qa Jacob om wicotakuye kage ciqon he kiksuya.

25 Qa Wakantanka Israel cinca kin awicatonwan, qa Wakantanka sdonwicaya.

HDINAPAPI WICOWOYAKE 3.

 1 Unkan Moses iye tunkanku Jethro Midian wawayušna optaye tawa awanwicayake ca optaye hopuze cin iheyata awicaye ca Wakantanka paha tawa kin Horeb ekta i.

2 Unkan Jehovah ohnihde kin otehi wan cokaya, peta ide wan en ihdutanin he wanyaka; unkan inyun otehi peta en itkon, tuka huhnage šni.

3 Unkan, Ito ekta mde ca wowanyake tanka kin he, tokeca otehi kin huhnage šni he wanmdake kta, Moses eya.

4 Unkan wanyake kta e u kin he Jehovah wanyake ca Wakantanka otehi cokaya tanhan kipan, qa Moses, Moses, eya. Unkan, Iho miye, eya.

5 Unkan, Ihnuhan deciya ikiyedan yahi kinhan. Maka kin tukten nayajin kin he wakan ce; heon nisiha etanhan hanpa hdusdoka wo;

 6 Qa miš nihunkake Wakantanka dapi kin he miye Abraham Wakantanka tawa kin qa Isaac Wakantanka tawa kin, qa Jacob Wakantanka tawa kin he miye ce, eya. Unkan Moses Wakantanka atonwe kta kokipa, heon ite kin aihdahpa.

7 Unkan, Egypta en oyate mitawa toiyokišicapi kin he wanmdake, ca wicakahapapi kin on šicahowayapi kin he nawahon qa wayazanhdapi kin sdonwaya.

 8 Qa Egypti napepi kin etanhan ewicawahdaku qa makoce kin he etanhan, makoce tanka qa wašte, makoce wan ohna pte asanpi qa canhanpi tiktica kaduze cin he, Caanani, qa Hitti, qa Amori, qa Perizzi, qa Hivi, qa Jebusi ounyanpi kin, heciya awicamde kta e kun wahi ce.

 9 Hantuke, Israel ceyapi kin wanna en mahi, qa iyokišicapi kin token Egypti iyokišin wicayapi kin he nakun wanmdaka.

10 Heon iho wanna oyate mitawa, Israel cinca kin Egypta etanhan hdinanpe wicayaye kta e Pharoah ekta ye ciši kta ce, Jehovah eya.

11 Unkan, Miš matuwe ho on Pharoah ekta mde ca Israel cinca kin Egypta etanhan hdinanpe wicawaye kta? Moses Wakantanka eciya.

12 Unkan heya, Awicakehan nici waun, qa ye ciši kin de etanhan sdonyaye kta, oyate kin Egypta etanhan hdinanpe wicayaye iyohakam he kin de akan Wakantanka ohoyadapi kta ce.

13 Unkan Moses Wakantanka heciya, Iho Israel cinca kin en i wai, qa nihunkakepi Wakantanka kin he niyepi ckta u maši, epe cinhan; hehan, Token eciyapi emakiyapi kinhan, taku epe kta he?

 14 Unkan, MIYE HE KTA MIYE HE, qa Israel cinca kin hecen ewicaakiye kta, MIYE HE he niyepi en u maši ce, Wakantanka Moses eciya.

15 Qa nakun Wakantanka Moses heciya, Israel cinca kin hecen ewicayakiye kta, Jehovah nihunkakepi  Wakantanka kin, Abraham  Wakantanka tawa kin, qa Isaac Wakantanka tawa kin, qa Jacob Wakantanka tawa kin he niyepi ekta u maši ce. Micaje kin hee owihanke wanin qa wicoicage yeye cin hecen miksuyapi kta.

16 Ekta hde ca Israel hunkayapi kin mniciye wicayakiye ca hecen ewicayakiye kta; Jehovah nihunkakepi wakandapi kin he miye en ihdutanin, Abraham qa Isaac qa Jacob Wakantanka tawa kin hemakiya; Awicakehan wanciyakapi qa Egypta en token ecannionpi kin.

17 Qa Egypti iyokišin niyanpi kin etanhan hdinanpe ciyapi kta, Caanani qa Hitti qa Amori qa Perizzi, qa Hivi qa Jebusi tamakocepi kin ekta, makoce wan pte asanpi qa canhanpi tiktica on kaduze cin he ekta, epa ce.

18 Qa niho kin nanicihtonpi kta, qa nis Israel hunkayapi kin om Egypti wicaštayatapi kin en yaipi kta, qa Hebrew Wakantanka tawa kin Jehovah unkakipapi, heon tokin anpetu yamni oicimani hopuze ekta unyanpi, qa Jehovah Wakantanka undapi taku waunkiyušnapin, eyakiyapi

19 Unkan miye he sdonwaya, Egypti wicaštayatapi kin dapi iyowinniciyapi kte šni, qa nape kin wašake kte šni .

 20 Qa minape kin yewakiye ca taku tehihika mitawa Egypti cokaya ecamon kta, hena owasin on awicawape kta he iyohakam ye nišipi kta.

 21 Qa Egypti kin oyate kin de cante wicakiyapi he wakage kta, hecen yaupi kinhan cokadan yaupi kte šni.

22 Tuka winohinca otoiyohi tuwe ikiyedan ti kin, qa tuwe iye tipi kin ohna tipi kin, he etanhan masaska cinpi qa mazaskazi cinpi qa wokoyake da kta, qa nicincapi wica winyan ko hena un wicayakiyapi kta, hecen Egypti wawicayakipi kta.

 HDNAPAPI WICOWOYAKE 4.

 1 Unkan Moses ayupte ca, Ehaes wicamadapi kte šni, qa Jehovah niye en ihdutanin šni, eyapi kta, hecen maho kin nahonpi kte šni, eya.

2 Unkan Jehovah heciya, Ninape ohna yanke cin he taku he? Unkan, Canšakadan, eya.

 3 Unkan, Makata ehpeya wo, eya. Unkan makata ehpeya qehan wamduška icaga; unkan itokapa tanhan Moses najica.

4 Unkan, Ninape hdugate ca sinte kin yuza wo, Jehovah Moses eciya. Unkan nape hdugate ca he yuza, hehan nape kin ohna canšakadan icaga.

5 Heon Jehovah iye hunkakepi Wakantanka tawa kin, Abraham Wakantanka tawa kin, qa Isaac Wakantanka tawa kin, qa Jacob Wakantanka tawa kin he niye en ihdutanin kin he wicadapi kta,

 6 Qa nakun, Ikpi kin ohna nape ye kiya wo, Jehovah eciya.Unkan nape ikpi kin ohna ye ki| ye ca ehdaku; unkan inyun nai pe kin ska, wa iyececa.

 7 Unkan, Ninape ake niikpi ohna ye kiya wo, eya. Unkan ake nape ikpi kin ohna ye kiye ca ikpi etanhan ehdaku, qa inyun ake iye cehpi kin iyececa.

 8 Unkan kaketu kta, wicanidapi kte šni, qa wowapetokeca tokaheya ho kin wicadapi kte šni ešta, wowapetokeca unman ho kin wicadapi kta.

 9 Qa wowapetokeca nonpa kin dena nakun wicadapi šni kinhan qa niho kin nahonpi kte šni kinhan, wakpa kin etanhan mini iyacu, qa maka puze cin ayakaštan kta, qa mini wakpa etanhan iyacu kin he maka puze cin akan we icu kta ce, eya.

 10 Unkan, Itancan ceciciya ce, miš wicašta wamdapike šni, nitaokiye kici woyahdake cin ehantanhan nakun he itokam; tuka i matke, qa ceji matke, Moses Jehovah eciya.

11 Unkan Jehovah heciya, Tuwe wicai kin kaga he? qa ia okitpani, qa nogetpa, qa wawanyake cin, qa ištagonge cin? Jehovah he miye šni he?

 12 Heon wanna ekta ya wo, unkan niš kin kici waun, qa token ehe kte cin he onspe ciciye kta ce.

 13 Unkan, Itancan ceciciya, Tuwe nape kin on ye yaši kte cin he ye ši ye? eya.

14 Hehan Jehovah tocanniye kin Moses aide qa heya, Aaron Levi kin he nicinye heca šni he? Iye wayapika he sdonwaya, qa nakun, iho wanna itkonicipe kta u ce; qa wanniyake cinhan cante kin iyuškin kta.

15 Qa he taku eyakiye kta, qa i kin ohna wicoie kin yeyakiye kta, qa miš niš kici waun kta, qa iye i kin kici, qa token ecanonpi kta he onspe ciciyapi kta.

16 Qa iye niye on oyate kin taku ewicakiye kta, qa hecen iye niš kin ee yakišye kta, qa iye Wakantanka niyuhe kta.

 17 Unkan canšakadan kin de ninape ohna iyacu kta, qa he on wowapetokeca ecanon kta.

 18 Unkan Moses iye tunkanku Jethro ekta kihde ca heciya, Ito mde ca mihunkawanji Egypta ohna unpi kin ekta wahde ca nahanhin ni unpi kinhan wanmdake kta ce. Unkan, Zaniyan hda wo, Jethro Moses eciya.

19 Wanna Midian ohna Jehovah Moses heciye ciqon, Iho Egypta ekta hda wo: wicašta tona ninagi akitapi qon hena owasin tapi ce.

20 Unkan Moses iye tawicu qa cinhintku napin ewicahdaku, qa šuktanka šonšonna akan iyotangwicakiye ca Egypta niakoce kin ekta kihda; qa Moses Wakantanka canšakadan tawa kin nape kin ohna icu.

21 Unkan Jehovah Moses heciya, Egypta ekta yaki kinhan waktaya un wo. Wowapetokei ca owasin ninape ohna cicu kin Pharoah itokam ecanon kta, qa miš Pharoah cante kin mdusuta kta, hecen oyate kin kihde wicaye kte šni.

22 Qa Pharoah hecen eyakiye kta, Jehovah hecen eya, Israel micinkši tokapa kin hee.

23 Qa heciciya, Micinkši omakiye kta hde si wo; qa hde kta teyahinda kinhan nicinkši tokapa te waye kta ce.

24 Unkan, kaketu tahepi tukten iwankapi kin en Jehovah akipe ca te ye kta cin.

 25 Unkan Zipporah wanhi wan icu, qa cinhintku ce inkpa ha kin bakindava, qa siha kin ekta ehpeye ca, Awicakehan we wicašta takuciya ye, eya.

26 Unkan he ayuštan hehan, Bahdayipi on etanhan we on takuciye ye, eya.

27 Unkan Jehovah Aaron kaken eciye ciqon, Moses itkokipe kta e iyrya wo, hopuze cin ekta, unkan iyaye ca Wakantanka he tawa kin ekta akipe ca i itputaka.

28 Unkan Jehovah yeši kin, oie kin owasin, qa wowapetokeca econ si kin owasin, Moses Aaron okiyaka.

29 Unkan Moses iyaya Aaron kici, qa Israel cinca hunkayapi kin owasin mniciye wicayapi.

30 Qa wicoie Jehovah Moses eciye ciqon owasin Aaron ewicakiya, qa wowapetokeca kin econ, oyate kin wicitokam.

31 Unkan oyate kin wicadapi; qa Jehovah Israel cinca kin en wicahi, qa iyokišicapi kin wanyake cin he nahonpi qehan patujapi qa cekiyapi.

HDNAPAPI WICOWOYAKE 5.

 1 Unkan iyohakain Moses qa Aaron Pharoah en hipi, qa heciyapi, Oyate mitawa hewotahedan wohanpi wan micicagapi kta e iyowin wicakiya wo, Jehovah Israel Wakantanka tawa kin eya ce.

2 Unkan Pharoah heya, Jehovah he tuwe on ho kin nawahon, qa Israel ye wicawaši kta he? Jehovah sdonwaye šni qa Israel amduštan kte šni ce, Pharoah eya.

3 Unkan heyapi, Hebrew Wakantanka tawa kin unkakipapi, ceunniciyapi, iyowinunkiyapi, hopuza ekta anpetu yamni unyanpi, qa Jehovah Wakantnka undapi waunkiciyušnapi kte, okini mazasagye kaeš canhpi on iyaunkihpayapi kta.

 4 Unkan, Tokeca Moses qa Aaron oyate kin wicohtani ayustan wicaya kiyapi he? Nitawaqinpi kin ekta hda po, Egypti wicaštayatapi kin ewicakiya.

5 Qa, Inyun makoce oyate kin wanna ota ce, qa tawaqinpi kin kpahpe wicayakiyapi, Pharoah eya.

 6 Qa anpetu kin he Pharoah oyate wicakahapapi, qa itancanpi kin econ wicaši qa hewicakiya,

7 Dehanyan oyate maka omdoton kagapi kta e peji puza wicayaqupi ece, tokata ecanonpi kte šni. lye yapi qa peji puza mnakiyapi kta.

 8 Qa dehanyan maka omdoton iyuta kagapi kin he kah wicayakiyapi kta, duoptetupi kte šni; kujapi nakaš, heon ho yeyapi qa, Ito unyanpi qa Wakantanka undapi kin waunkiciyušnapi kta, eyapi.

 9 Wicašta kin wohtani tehika econ wicayakiyapi kta, hecen htanipi kta, qa wicoie ecinšniyan ihaktapi kte šni ce.

10 Unkan oyate wicakahapapi kin, qa itancanpi kin tankan ipi, qa oyate kin hewicakiyapi; Pharoah hecen eya, Peji puza cicupi kte šni ce.

11 Niš hunktiya po, qa peji puza tukten iyeyayapi kin hetanhan ikikcu po, qa htayanipi kin takudan yuoptetupi kte šni.

12 Hecen oyate kin Egypta makoee kin owancaya enanakiya iyayapi, qa peji puza hee kiya aguyapi hu kin mnayanpi.

13 Unkan wicakahapapi kin inahni wicayapi, qa Nitohtanipi kin hdustan po; anpetu otoiyohi peji yuke ciqon he iyecen, eyapi.

 14 Unkan Israel cinca itancanpi kin Pharoah wicakahapapi kin yuhe wicakiyapi kin hena awicapapi qa, Tokeca maka omdoton kah nišipi kin htanihan qa nakaha dustanpi šni? hekta ecannonpi qon he iyecen.

15 Hehan Israel cinca itancanpi kin upi, qa Pharoah ho yekiyapi, qa heyapi, Tokeca nitaokiye hecen ecawicayecon he?

16 Peji puza takudan nitaokiye unqupi šni; Maka omdoton kaga po; unkekiyapi, qa nitaokiye unkapapi tuka, oyate nitawa kin hena ee taku šica econpi.

17 Unkan, Nis nikujapi,nikujapi ce, heon, Unkiyayapi qa Jehovah waunkiciyušnapi kta, ehapi.

18 Heon wanna hunktiya po, qa htani po. Peji takudan nicupi kte šni, qa maka omdoton iyenaka yakagapi kta, eya.

19 Unkan, Anpetu otoiyohi maka omdoton yakagapi qon he duoptetupi kte šni, ewicakiyapi qehan, taku šica ehna unpi Israel cinca itancanpi kin wanihdakapi.

20 Unkan Pharoah etanhan hdinanpapi qehan, Moses Aaron kici, canku ohna najinpi, unkan itkowicakipapi.

21 Qa hewicakiyapi, Jehovah anitonwanpi qa wayaco kta. Pharoah išta kin ohna qa taokiye ištapi kin ohna ounmnapi šicamna unyakagapi, qa napepi kin en isan wan on unktepi kta wicayaqupi ce.

 22 Unkan Moses Jehovah ekta ihdamna, qa heya, Itancan tokeca oyate kin de, šicaya ecawicayecon, qa tokeca ekta ye mayasi he?

23 Qa nicajeyan Pharoah takewakiya ekta wahi kin ehantanhan oyate kin de taku šica ecawicakicon, qa dehanyan oyate nitawa ecaca wicayakiduske šni, eya.

HDNAPAPI WICOWOYAKE 6.

1 Unkan Jehovah Moses heciye, Iho token Pharoah ecawecon kte cin he wandake kta. Nape wašaka on ye wicaši kta, qa makoce tawa etanhan nape wašaka on wicakahape kta.

2 Unkan Wakantanka Moses kici wohdaka, qa heciya, Jehovah he miye.

3 Qa Abraham qa Isaac qa Jacob en Wakantanka Iyotan Wašake mihdutanin, tuka micaje Jehovah he sdonmayanpi šni.

4 Qa nakun wicotakuye mitawa wicaweciyusuta; inakoce tawapi šni ohna ihdakapi kin he, Caanan makoce kin he wicawaqu kta.

5 Nakun Israel cinca šicahowayapi kin he nawahon, Egypti wowidag wicayapi kin he on, qa wicotakuye mitawa kin weksuya.

6 Heon Israel cinca kin hecen ewicakiya wo, Jehovah he miye, qa Egypti waqin niciyapi kin ihukuya tanhan hdinape ciyapi kte, ca ritani niciyapi kin etanhan ecihdakupi kta; qa isto hdugata qa woyaco tanka on opecitonpi kta.

7 Qa oyate mitawa kta e ciyuzapi kta, qa Wakantanka yadapi kin he miye kta, qa Jehovah Wakantanka nitawapi Egypti waqin niciyapi ihukuya tanhan hdinape niyanpi kin he miye, sdonyayapi kte.

8 Qa makoce wan Abraham qa Isaac qa Jacob wicawaqu kta kepa, qa minape wankan yewakiya, he ekta aciupi, qa tawayayapi kta e cicupi kta ce: Jehovah he miye.

9 Unkan Moses Israel cinca kin hecen ewicakiya; tuka koksape kicaksapi, qa wicohtai hika, heon Moses anagoptanpi šni.

10 Unkan Jehovah ie ca Moses heciya;

11 Pharoah Egypti wicaštayatapi kin ekta ya wo; qa iye tamakoce kin etanhan Israel cinca kin ye wicaši kta, keciya wo.

12 Unkan Moses Jehovah itokam ie ca, Inyun, Israel cinca kin namahonpi šni, qa iha bamakihdayapi šni hecen token Pharoah namahon kta he? eya.

13 Unkan Jehovah Moses Aaron kici Israel cinca kin ekta, qa Pharoah Egypti wicaštayatapi kin ekta ye wicaši, qa Egypta makoce kin etanhan hdinape wicaye kta, kewicakiya.

14 Hunkake wicayapi tiyohnaka itancanpi kin dena eepi. Israel cinca tokapa kin Reuben, he cinca kin Hanoch, qa Pallu, qa Hezron, qa Carmi; Reuben wicowazi kin hena eepi.

 15 Simeon cinca kin, Jemuel, qa Jamin, qa Ohad, qa Jachin, qa Zohar, qa Caanani winohinca wan cinca Šaul; Simeon wicowazi kin dena eepi.

16 Qa Levi cinca cajepi wicoicagepi kin iyececa; Geršon, qa Kohath, qa Merari. Qa waniyetu Levi ni kin opawinge sanpa waniyetu wikcemna yamni sanpa šakowin .

17 Geršon cinca kin Libni, qa Šimi wicowazi tawapi kin iyececa.

18 Qa Kohath cinca kin Amram, qa Izhar, qa Hebron, qa Uzziel; qa waniyetu Kohath ni kin waniyetu opawinge sanpa wikcemna yamni sanpa yamni.

19 Qa Merari cinca kin, Mahali, qa Muši. Levi wicowazi kin hena eepi wicoicage tawapi kin iyececa.

20 Unkan Amram iye tnnwicu Jochebed e yuza; unkan he Aaron, qa Moses kiciton; qa waniyetu Amram ni kin hena waniyetu opawinge sanpa wikcemna yamni sanpa šakowin .

21 Qa Izhar cinca kin Korah, qa Nepheg, qa Zichri.

22 Unkan Uziel cinca kin Mifeela qa Ehzapan, qa Sitri.

23 Unkan Aaron Amminadab cunwintku, Naašon tawinohtin, Elišeba yuza; unkan Nadab, qa Abihu, qa Eleazar, qa Ithamar hena kiciton.

 24 Unkan Korah cinca kin Assir qa Elkanah, qa Abiasaph; Korahti wicowazipi kin hena eepi.

25 Unkan Aaron cinhintku Eleazar, Putiel cunwintku kin etanhan wanji yuza; unkan he Phinehas kiciton. Levi ateyapi kin itancanpi kin hena eepi, wicowazipi kin iyececa.

 26 Egypta makoce etanhan Israel cinca kin obe tawapi ecekcen hdinape wicaya po, Jehovah tuwe ewicakiye ciqon, he Aaron qa Moses dena eepi.

27 Tuwe Israel cinca kin Egupta etanhan hdinape wicaye kta, Pharoah, Egypti wicaštayatapi eciyapi qon, Moses qa Aaron hena eepi.

28 Qa anpetu wan Jehovah Moses Egypta makoce kin ohna taku eciya he en kaketu.

 29 Unkan Jehovah ie ca, Moses heciya, Jehovah he miye, taku eciciye cin owasin Pharoah Egypti wicaštayatapi eciya wo, eya.

30 Unkan, Inyun iha bamakihdayapi ni, heon Pharoah namahon kte šni, Moses, Jehovah itokam, eya.

HDNAPAPI WICOWOYAKE 7.

 1 Unkan Jehovah Moses heciya, Wan Pharoah taku wakan niye kta e cicaga: qa Aaron nicinye ie yakiye kta.

 2 Miš taku eye ci i kin owasin ecen ehe kta, qa nicinye Aaron Pharoah iye tamakocepi kin etanhan Israel cinca kin kihde wicaši kta, eciye kta.

 3 Tuka miš Pharoah cante kin mdusuta kta, qa Egypta makoce kin ohna wowapetogtokeca mitawa, qa taku woyusinya wahduota kta.

 4 Tuka Pharoah nanihonpi kte šni, hecen Egypti akan minape ewahnake kte ca woyaco tankinkinyan on Israel cinca kin, oyate mitawa, obe mitawa kin, Egypta makoce kin etanhan hdinape wicawaye kta.

5 Hecen Jehovah he miye Egypti sdonyapi kta, minape Egypti akan ye wakiye ca wicacokaya tanhan Israel cinca kin hdinape wicawakiye cinhan.

 6 Unkan Moses qa Aaron Jehovah token econ wicaši kin owasin ecen econpi.

7 Unkan Moses waniyetu wikcemna šahdogan, qa Aaron waniyetu wikcemna šahdogan sanpa yamni, hehan Pharoah en wohdakapi.

 8 Unkan Jehovah ie ca Moses Aaron kici hewicakiya;

 9 Tohan, Wowapetokeca kin kpazo po, Pharoah eniciyapi kinhan, Canšakadan ikikcu, qa Pharoah itokam ehpe kiya wo; Aaron eyakiye kta; unkan wamduška icage kta.

 10 Unkan Moses qa Aaron Pharoah en hipi; qa token Jehovah econ wicaši kin ecen econpi, qa Aaron canšakadan kin ehpe kiya, Pharoah itokam, qa taokiye wicitokam; unkan wamduška icage.

11 Unkan Pharoah nakun wicašta ksapa qa pejuta wicašta wicakico, unkan Egypti pejuta wicašta iš eya taku wakanyan ohanyanpi on iyecen econpi.

12 Qa otoiyohi canšakadan ehpe kiya; unkan wamduška icagapi, tuka Aaron canšakadan tawa kin he canšakadan tawapi kin napca.

13 Unkan Pharoah cante kin ihdusuta, qa nawicahon šni, Jehovah eye ciqon he iyeeen.

14 Unkan Jehovah Moses heciya. Pharoah cante kin tke, oyate kin ye wicaši wicada šni.

 15 Iho hanhanna Pharoah mini ekta i kta; ekta ya wo, qa wakpa hutata itkokim nayajin kta, qa canšakadan wamduška icage ciqon he ninape ohna iyacu kta.

16 Qa heyakiye kta, Jehovah Hebrew Wakantanka tawa kin niye ekta u maši qa, Mitaokiye, oyate mitawa kin, hopuze cin ekta ye wicaši wo, eniciye maši; tuka dehanh wanayahon šni.

17 Ito Jehovah hecen eya, Jehovah he miye, de etanhan sdonyaye kta. Miš canšakadan minape ohna mduhe cin on mini wakpa ohna un kin awape kta; hecen mini kin we icu kta.

18 Qa hogan wakpa ohna yakonpi kin tapi kta, qa wakpa kin šicamna kta, hecen Egypti wakpa mini kin yatkanpi hitihdapi kta.

19 Unkan Jehovah Moses heciya, Aaron heciya wo, Canšakadan ikikcu; qa Egypti mini tawapi ektakiya nape hdugata wo; wakpa tawapi ektakiya, qa tawakpadanpi ektakiya, qa cokan tawapi ektakiya, qa minikiwitaya tawapi ektakiya, hecen hena we icu kta; qa Egypta makoce kin owancaya we yuke kta; nakun canopiye ohna qa inyan opiye ohna.

20 Unkan Moses qa Aaron token Jehovah econ wicaši kin he iyeeen econpi, qa canšakadan qon yuwankan icu, qa mini wakpa ohna un kin apa, he Pharoah wanyaka, qa taokiye wanyakapi; hecen mini wakpa ohna un kin owasin we icu.

21 Qa hogan wakpa ohna yakonpi kin tapi, qa wakpa kin šicamna, qa Egypti mini wakpa etanhan yatkanpi okihipi šni; qa Egypta makoce kin owancaya we yukan.

22 Unkan Egypti pejuta wicašta iš eya taku wakanyan ohanyanpi on iyecen econpi, hecen Pharoah cante kin ihdusuta, qa nawicahon šni, Jehovah eye ciqon he iyecen.

23 Unkan Pharoah ihdamna, qa ti kin ckta kihda, qa he nakun ekta cante kin ye kiye šni.

 24 Unkan Egypti owasin mini wakpa etanhan yatkanpi okihipi šni, heon mini yatkanpi kta e wakpa icahda qapi.

25 Unkan Jehovah wakpa kin apa ehantanhan anpetu šakowin wanna henakeca.

HDNAPAPI WICOWOYAKE 8

1 Unkan Jehovah Moses heciya, Pharoah ekta ya, qa heciya wo; Jehovah hecen eya, Oyate mitawa omakiyapi kta ye wicaši wo.

 2 Tuka yapi kta teyahda kinhan, inyun makoce nitawa owancaya hnaška on awape kta.

3 Qa wakpa kin hnaška ota icah ye kta, hecen hinanpapi qa yati kin en hiyupi kta, qa tipi ohna inonke cin mahentuya, qa owinja nitawa akan, qa nitaokiye tipi kin mahen, qa ohna aguyapi spanyayapi kin en; qa oyaptapi wopiye nitawapi kin en;

4 Qa niye en, qa nitaoyate kin en, qa nitaokiye owasin en, hnaška wankan hiyupi kta.

5 Unkan Jehovah Moses heciya, Aaron hecen eciya wo; Canšakadan hduha ninape hdugata wo, wakpa kin ektakiya, qa wakpudan kin ektakiya, qa cokan ektakiya, hecen hnaška kin Egypta makoce kin akan hinanpapi kta.

6 Unkan Aaron Egypti mini tawapi ektakiya nape hdugata, unkan hnaška kin hinanpapi qa Egypti tamakocepi kin akahpapi.

7 Unkan pejuta wicašta wakanyan ohanyanpi ece on hecen econpi, unkan hnaška kin Egupta makoce kin akan hinanpapi.

8 Unkan Pharoah Moses Aaron kici wicakico qa, Jehovah cekiya po, hecen hnaška kin yutokan kta; miye etanhan qa oyate mitawa etanhan; kinhan oyate kin ye wicawaši kta, qa Jehovah wakiciyušnapi kta, eya.

9 Unkan miye on ihdatan wo; tohantu kte, niye qa nitaokiye, qa nitaoyate wocekiye eciciyapi kta, qa hnaška awihnunipi kta; niye etanhan qa yati kin etanhan; wakpa kin heceedan ohna ihanpi kta? Moses Pharoah eciya.

10 Unkan, Heyakecinhan, eya; Unkan heya, Jehovah Wakantanka undapi kin he tuwedan iyececa šni sdonyaye kta e heon token ehe cin hecetu kta;

11 Qa hnaška kin aniyuštanpi kta, qa yati kin, qa nitaokiye, qa oyate nitawa, wakpa heceedan ohna ihanpi kta.

12 Qa Moses qa Aaron Pharoah etanhan inanpapi, qa Moses Jehovah hoyekiya; hnaška Pharoah en hiyuye ciqon heon etanhan.

13 Unkan Moses eye cin he iyecen Jehovah econ, qa hnaška kin tapi, tipi kin etanhan, qa tonwanyanpi kin etanhan qa maga etanhan.

14 Unkan hena mnayanpi paha ota, unkan makoce kin šicamna.

15 Unkan iyozi yukan he Pharoah wanyake ca cante kin ihdutke, qa nawicahon šni, Jehovah eye ciqon he iyecen.

16 Unkan Jehovah Moses heciya, Aaron heciya wo, Canšakadan ye kiye ca makamdu kin apa wo, hecen Egypta makoce kin owancaya hoponkadan icage kta.

17 Unkan hecen econpi, qa Aaron canšakadan hduha nape hdugate ca makamdu kin apa, hecen hoponkadan icaga, wicašta akan qa woteca akan, Egypta makoce kin owancaya makamdu km owasin hoponkadan icaga.

18 Unkan pejuta wicašta taku wakanyan ohanyanpi on he iyecen econpi hoponkadan hinanpe yapi kta, tuka okihipi šni; hececa ešta hoponkadan yukan, wicašta akan qa woteca akan.

19 Unkan ejuta wicašta kin Wakantanka napsukaza kin dee,  Pharoah eciyapi; tuka Pharoah cante kin ihdusuta, qa nawicahon šni; Jehovah eye ciqon he iyecen.

20 Unkan Jehovah Moses heciya, Hanhanna hin kikta, qa Pharoah itokam inajin wo, iho mini ekta inanpe kta, qa heyakiye kta; Jehovah hecen eya, Oyate mitawa ye wicaši wo, hecen omakiyapi kta.

21 Tuka niye mitaoyate kin ye wicayaši šni kinhan, ito miš tatawamduška ye wicawaši kta, niye en, qa nitaokiye en, qa nitaoyate en, qa yatipi kin en; hecen tatawamdnska kin Egup. ton tipi kin ojun yapi kta, qa , maka akan yakonpi kin he nakun.

22 Qa anpetu kin he en, Gošen makoce kin akan mitaoyate yakonpi kin he mdukinukan kte, he ohna tatawamduška wamice kta; hecen maka cokaya kin Jehovah he miye sdonyaye kta.

23 Qa oyate mitawa oyate nitawa iyececapi kte šni wakage kta. Heyakecinhan wowapetokeca kin de tanin kta.

24 Unkan Jehovah hecen econ, qa tatawamduška tehika Pharoah ti kin ekta hipi; qa taokiye tipi kin, qa Egypta makoce owancaya en, makoce kin awihnuni tatawamduška kin on.

25 Hehan Pharoah Moses Aaron kici wicakico, qa heya, Hunktiya po, makoce kin ohna Wakantanka yadapi kin wakiciyusna po.

26 Unkan Moses heya, Hecen econkupi kta iyecetu šni. Jehovah Wakan undapi waunkiciyušnapi kin he Egypti wahte dapi šni. Inyun Egypti taku wahte dapi šni ištapi kin itokam waunyušnapi kinhan inyan on unkininpi kta.

27 Anpetu yamni imanipi hewoskantu kin ohna unyanpi, qa Jehovah Wakantanka undapi kin waunkiciyušnapi kta, unkekiyapi qon he iyecen.

28 Unkan Pharoah heya, Ye cišipi kta qa hewoskantu ohna Jehovah Wakan yadapi kin wayecidušnapi kta, tuka sanpa tehan idadapi kte šni. Wocekiye emiciciya po.

29 Unkan Moses heya, Ito miš niye etanhan inawape ca Jehovah cewakiye kta; unkan tatawamduška, kin yutokan kta, Pharoah etanhan, qa taokiye etanhan, qa taoyate etanhan; tuka ihnuhan Pharoah ake wahnayan, qa oyate kin Jehovah wakiyušnapi kta ye wicaši šni.

30 Hehan Moses Pharoah etanhan tankan inanpe ca Jehovah cekiya.

31 Unkan Jehovah Moses eye ciqon he iyecen econ, qa tatawamduška kin yutokan, Pharoah etanhan, qa taokiye etanhan, qa taoyate etanhan, wanjidan ihe šni.

32 Tuka Pharoah dehan nakun cante kin ihdutke, qa oyate kin ye wicaši šni.

HDNAPAPI WICOWOYAKE 9.

1 Unkan Jehovah Moses heciya, Pharoah ekta ya wo, unkan heyakiye kta; Jehovah Hebrew Wakantanka tawa kin hecen eya, Oyate mitawa omakiyapi kta ye wicas i wo.

2 Qa yapi kta teyahinda, qa nahanhin sutaya wicaduze cinhan;

3 Ito Jehovah nape kin wanunyanpi nitawa tinta ohna yakonpi kin akan un kta, šuktanka en, šuktanka šonšonna en, cankahupajo en, oxen wosdohan en, qa tahcaska en makošice iehika hinca kta.

4 Qa Jehovah Israel tawanunyanpi, qa Egypti tawanunyanpi otahedan yukinukan kta, hecen Israel cinca taku tawapi kin owasin etanhan takudan te kte šni.

 5 Nakun tohantu kte Jehovah yaotanin, qa heya; heyakecinhan Jehovah wicoie kin de econ kta, makoce ohna.

6 Unkan ihanhanna wicoie kin he econ; unkan Egypti tawanunyanpi kin owasin tapi, tuka Israel cinca tawanunyanpi wanjidan te šni.

7 Unkan Pharoah tuwe ekta ye ši, unkan inyun, Israel tawanunyanpi kin wanjidan te šni, tuka cante kin ihdutke qa oyate kin ye wicaši šni.

 8 Unkan Jehovah Moses Aaron kici hewicakiya, Maza sdoyapi oceti cahota kin ninape ohnakapi kin icu po, qa Moses he mahpiya ektakiya kadada iyeye kta, Pharoah išta kin itokam.

9 Qa he watusekseca kta, Egypta makoce kin owancaya, qa šiyaka wicao ton icahye cin heca kta, wicašta akan, qa woteca akan, Egypta makoce kin owancaya.

10 Unkan maza sdoyapi oceti etanhan cahota icupi, qa Pharoah itokam inajinpi, qa Moses he mahpiya ektakiya kadada iyeya. Unkan he šiyaka wicao ton icuh ye cin heca, wicašta en, qa woteca en.

11 Unkan siyaka wicao on etanhan pejuta wicašta kin Moses itokain najin okitpanipi; nakaš šiyaka wicao pejuta wicašta en, qa Egypti owasin en.

12 Tuka Jehovah Pharoah cante kin yušuta, hecen nawicahon šni, Jehovah Moses eciye ciqon he iyecen.

13 Unkan Jehovah Moses heciya, Hanhannahin kikta, qa Pharoah itokam inajin wo, qa heyakiye kta; Jehovah Hebrew Wakantanka tawa kin hecen eya, Oyate mitawa ye wicaši wo, unkan ohomadapi kta.

14 Dehan wowayazan mitawa owasin nicante ekta hiyu waye kta, qa nitaokiye en, qa nitaoyate en, hecen maka kin owancaya tuwedan iyemaceca šni sdonyaye kta, heon.

15 Nakaha minape ye wakiye ca acipe kta, qa oyate nitawa makošice on, qa maka kin etanhan nitanin kte šni;

16 Qa awicakehan heon najin ciye, mitowašake kin niye en wahdutanin kta; qa micaje kin maka kin owancaya oyakapi kte.

17 Dehanyan niš nihduwankantuya, oyate mitawa en, qa yapi kta iyowin wacayakiye šni.

18 Ito miš heyakecinhan dehantu Egypta ohna hinhewaye kta, wasu tehika hinca anpetu tokaheya en ounyanpi ehantanhan ecen dehanyan, tohinni hececa šni.

19 Heon wanna ye wicaši, qa nita wanunyanpi kin nape wica ya wo,qa taku nitawa tintaen un kin owasin, wicašta, qa woteca i tona tinta ohna yakonpi, qa tipi en mnawicayapi šni, hena owasin wasu ahinhewicaye kta, unkan tapi kta.

20 Pharoah taokiye tuwewe Jehovah oie kin ikope cinhan iye taokiye, qa tawanunyanpi tipi kin ekta awicahdi.

21 Tuka tuwe Jehovah oie kin ekta cante kin ye kiye šni kinhan, taokiye qa tawanunyanpi kin tinta ohna ehpe wicaya.

22 Unkan Jehovah Moses heciya, Mahpiya ektakiya nape hdugata wo, hecen Egypta makoce owancaya wasu yuke kta, wicašta akan, qa woteca akan, qa tinta wato owasin akan, Egypta makoce ohna.

 23 Unkan Moses canšakadan hdugata mahpiya ektakiya, unkan Jehovah hoton, qa wasu hiyuya, qa peta maka ainyanka, hecen Jehovah wasu Egypta makoce ahiuhe kiya.

24 Unkan wasu, qa peta wasu kici icicahiya tchika hinca, Egypti oyate yukan ehantanhan makoce owancaya ohna tohinni hececa šni.

25 Qa Egypta makoce kin owancaya wasu kin taku tankan un kin owasin apa, wicašta, qa woteca, qa tinta wato kin owasin apa, qa wasu kin can iheye cin owasin kawega.

 26 Tuka Gošen makoce kin Israel cinca ohna yakonpi kin, heceedan ohna wasu wanica.

27 Unkan Pharoah tuwe ekta ye ši, qa Moses Aaron kici wicakico, qa hewicakiya; Dehan wawahtani, Jehovah hee ohan owotanna tuka miš qa oyate mitawa unšicapi.

28 Jehovah cekiya po, qa henakeca kta, sanpa Wakantanka hoton kte šni, qa wasu wanice kta; unkan ye cišipi kta, qa sanpa owanji nayajinpi kte šni.

 29 Unkan Moses heciya, Otonwe etanhan inanwape cinhan Jehovah ektakiya nape wahdumdaye kta hecen hoton kin henakeca kta, qa wasu kin sanpa wanice kta; heon Jehovah maka kin tawaya sdonyaye kta.

30 Tuka niye qa nitaokiye dehanyan Jehovah Wakantanka yakinihanpi kte šni sdonwaya.

 31 Unkan hahonta on kagapi, qa barley kin hena kawankapi; nakaš barley kin wanna itka hinanpa, qa hahonta on kagapi wahca.

32 Tuka aguyapi hu kin qa wamnaheza kin hena kawankapi šni, nakaš hena cicah tehan.

33 Unkan Moses Pharoah etanhan otonwe itankan inanpe ca nape hdumdaya, Jehovah ektakiya; unkan hotonpi kin qa wasu kin anapta, qa magaju maka kin sanpa ahinhe šni.

34 Unkan magaju kin qa wasu kin qa hotonpi kin anaptapi, Pharoah wanyake ca ake wahtani, qa cante kin ihdutke; iye qa taokiye nakun.

 35 Hecen Pharoah cante kin ihdusuta, qa Israel cinca kin ye wicaši šni, Jehovah Moses on eye eiqon he iyecen.

HDNAPAPI WICOWOYAKE 10.

1 Unkan Jehovah Moses heciya, Pharoah ekta ya wo, miš iye cante kin mdutke, qa taokiye cantepi kin nakun; hecen wicacokaya wowapetokeca kin dena wahdutanin kta, heon etanhan.

2 Qa hecen Egypta ohna woyuhapi owahanhada, qa wowapetokeca mitawa ecawicawecon kin hena nicinkši, qa nitakoja owicayakidake kta, nogepi ohna, qa Jehovah he miye sdonyayapi kta.

3 Unkan Moses qa Aaron Pharoah en hipi, qa heciyapi, Jehovah Hebrew Wakan dapi kin hecen eya, Tohanyan mitokara nihduhukuya tawatenyaye kte šni he? Oyate mitawa ye wicaši wo, unkan omakiyapi kta.

 4 Tuka mitaoyate yapi kta teyahinda kinhan, ito heyakecinhan miš Psipsicadan ota nitamakoce en hiyu waye kta.

5 Unkan maka itohnake kin akahipapi kta, hecen tuwe maka kin wanyake kte šni, qa taku nahanhin ecen han, taku wasu kin onicicaptapi kin he temyapi kta, qa maga ohna can nitawapi kin tona camni uye cin owasin temyapi kta.

 6 Qa yati kin ohna otapi kta, qa nitaokiye tipi kin owasin, qa Egypti owasin tipi kin ohna otapi kta, niyatepi qa niyate ateyapi kin takudan he iyececa wanyakapi šni, maka akan unpi ehantanhan ecen anpetu kin de iyehantu; eya qa ihduhomni qa Pharoah etanhan inanpa.

7 Unkan Pharoah taokiye heciyapi, Tohanyan wicašta kin de unhmunkapi kta he? Wicašta kin Jehovah Wakantanka kin okiyapi kta e ye wicaši wo; Egupta awihnuni nahanhin sdonyaye šni he?

8 Unkan ake Moses, Aaron kici Pharoah en hiyuwicayapi, unkan hewicakiya, Hunktiya po, Jehovah Wakan yadapi kin okiya po; tuwewe dapi kta he?

9 Unkan Moses heya, Koška, wicahinca ko unyanpi kte, unkicincapi wica winyan ko opapi kta, optaye qa optaye ko hduha unyanpi kta, Nakaš Jehovah wounkicihanpi kta.

10 Unkan hewicakiya, Niš nitašicecapi ko ye cišipi kta e Jehovah nicipi un kte. Wanyaka po; nitokam taku šica yukan.

11 Hecetu šni po. Wicašta tanka kin wanna ya po, qa Jehovah okiyapo yacinpi qon hee. Unkan Pharoah itokapatanhan ham wicayapi.

12 Unkan Jehovah Moses heciya, Egypta makoce ektakiya nape hdugata wo, Psipsicadan on, unkan Egypta makoce kin akan hiyupi kta, qa makoce wato kin owasin temyapi kte, taku wasu kin okapte cin iyuhpa.

 13 Unkan Moses canšakadan kin hdugate, Egypta makoce kin ektakiya; unkan Jehovah wiyohiyanpa tanhan tateyanpa makoce en hiyuya, anpetu kin he osan, qa hanyetu osan, qa ihanhanna wiyohiyanpa tanhan tateyanpa kin Psipsicadan hiyuya.

14 Unkan Psipsicadan kin Egupta makoce owancaya iwankam iyayapi, qa Egypta ihdukšan owancaya iyahanpi, tehika hinca, hena itokam Psipsicadan hececa wanica, qa iyohakam hececapi kte šni.

15 Qa makoce itohnake kin owancaya akahpapi, qa makoce kin aotpas yapi, qa makoce wato kin owasin temyapi, qa can waskuyeca wasu okapte cin nakun owasin; hecen Egypta makoce owancaya can akan, qa tinta peji ohna takudan to ihe šni.

16 Unkan Pharoah inahniyan Moses Aaron kici wicakico, qa heya, Wawahtani, Jehovah Wakantanka yadapi kin en, qa niyepi nakun en.

17 Qa wanna tokin wawahtani kin nakaha heceadan miyecicajujun, qa Jehovah Wakantanka yadapi kin cekiya po, hecen wiconte kin de heceedan miciyutokan kta.

18 Unkan Pharoah etanhan inanpe ca Jehovah cekiya.

19 Unkan Jehovah tateyanpa kin yuhorani wiyohpeya tanhan suta hinca, qa he Psipsicadan icu, qa Mde sa en iyohpe wicaya, Egypta makoce owancaya Psipsicadan wanjidan ihe šni.

 20 Unkan Jehovah Pharoah cante kin yušuta unkan Israel cinca kin ye wicaši šni.

 21 Unkan Jehovah Moses heciya, Mahpiya ektakiya nape hdugata wo, hecen Egypta makoce akan otpaza kta, qa otpaza kin yutanpica kta.

22 Unkan Moses mahpiya ektakiya nape hdugata, hecen Egupta makoce kin owancaya otpaza šoka hinca yikan, anpetu yamni.

23 Tuwedan sunkaku wanhdake šni, qa tuwedan towiuja kin etanhan najin šni, anpetu yamni; tuka Israel cinca owasin tipi kin ohna ojanjan wicayukan.

24 Unkan Pharoah Moses kico qa heya, Hunktiyapo, Jehovah okiyapo nitašicecapi nakun onipapi kta, optaye nitawapi qa optaye nitawapi kin heceedan owanji yakonpi kta.

25 Unkan Moses heya, Wošnapi, qa wohuhnahyapi nakun hduhe unyakiyapi kta, hecen Jehovah Wakantanka undapi waunkiciyušnapi kta.

26 Qa nakun wanunyanpi unkitawapi opapi kta, tašake wanjidan ihe kte šni. Hena etanhan Jehovah Wakantanka undapi kin ounkiyapi kta. Nakaš unkiš ekta unkipi šni hehanyan taku on Jehovah ounkiyapi kta sdon unkiyapi šni.

27 Unkan Jehovah Pharoah cante kinyusuta; unkan ye wicaši tawatenye šni.

 28 Qa Pharoah heciya, Mitan tanhan hunktiya wo. Ihnunhan miite kin ake wandake cinhan. Tohan miite wandake cinhan anpetu kin he en nite kta.

29 Unkan Moses heya, Token ehe cin hecetu kta. Niite kin ake icimana wanmdake kte šni.

HDNAPAPI WICOWOYAKE 11.

1 Wanna Jehovah Moses heciye ciqon, Ehake wowayazan wanjidan Pharoah akan hiyu waye kta, qa Egypti akan. He iyohakam detanhan ye nisipi kta, tohan ye nišipi kinhan ocowasin detanhan nicahapapi kta.

2 Wanna oyate nogepi ohna kewicakiya wo, qa wicašta otoiyohi takodaku etanhan, qa winohinca tuwe kodaye cin etanhan mazaska oinpi, qa mazaskazi oinpi kidapi kta.

3 Unkan Egypti kin oyate kin cante wicakiye Jehovah kaga. Nakun Moses wicašta kin tanka hinca, Egypta makoce ohna, Pharoah taokiye wicitokam, qa oyate kin wicitokam.

4 Unkan Moses heya, Jehovah hecen eya, Hanyetu cokaya miš Egypti cokaya inanwape kta.

 5 Qa tuwe caške owasin Egupta makoce ohna tapi kta Pharoah cinhintku tokapa oiyotanke tawa akan iyotanke kte cin etanhan, wikoška wiyukpan icahda iyotanke cin cinhintku tokapa kin aiyahdeya; nakun woteca cinca tokaheya wica tonpi kin owasin.

 6 Qa Egypta makoce owancaya woceye tanka kta; he iyececa hektapatanhan wanica, qa tokata ake he iyecece kte šni.

7 Tuka Israel cinca owasin ekta šunka wanjidan kei ceji hduštan kte šni, wicašta qa woteca unman tukte ekta. Hecen Egypti, qa Israel cinca kin otahedan Jehovah yukinukan sdon yayapi kta.

8 Qa nitaokiye dena owasin en mahipi qa miye en patujapi kta, qa toki iyaya ye niye, qa oyate nihukuya unpi kin owasin, emakiyapi kta, qa he iyohakam toki mde kta, eye ca Pharoah nina canniye cin etanhan inanpa.

9 Wanna Jehovah Moses heciye ciqon, Mita wowapetokeca Egypta makoce ohna yuotapi kta; heon Pharoah nanihonpi kte šni.

10 Unkan Moses Aaron kici wowapetokeca kin dena owasin Pharoah itokam econpi, unkan Jehovah Pharoah cante kin yušuta, heon iye tamakoce etanhan Israel cinca kin ye wicaši šni.

HDNAPAPI WICOWOYAKE 12.

 1 Wanna Jehovah Moses Aaron kici Egypta makoce kin ohna hewicakiye ciqon.

2 Wi kin de wi itancan dawapi kta; omaka wi kin de tokaheya dawapi kta ce.

3 Israel omniciye owasin hecen ewicakiya po; Wi kin de anpetu iwikcemna kin tipi otoiyohi on tahcaska cinca ikikcupi kta, ateyapi tipi kin iyececa.

4 Tuka tiyohnaka tonana on tahcaska cinca yutapi okihipi šni kinhan, iye qa tuwe ikiyedan tipi kin he kici icu kta, wicanagi yawapi iyecen, wicašta otoiyohi token yute kta okihi, tahcaska cinca on dawapi kta.

5 Tahcaska cinca wašte, mdoka waniyetu wanjidan kta, tahin wanunyanpi, kaeš hekinškayapi etanhan iyekcupi kta.

6 Qa wi kin de anpetu iaketopa kin, hehanyan kaška yahduhapi kta, qa htayetu otahedan, Israel omniciye owasin he patapi kta.

7 Qa we kin etanhan icupi qa tošu tiyopa anokatanhan, qa iwankam amnimnipi kta, tipi ohna he yutapi kte cin he akan.

8 Qa hanyetu kin he en cehpi kin peta on ceonpapi yutapi kta, aguyapi onapohye codan, qa peji pa kici he yutapi kta.

9 Hetanhan ongedan šaka qa mini ohna ohanpi yatapi kte am, tuka petan ceonpapi; pa kin qa huha šupe kici yatapi kta.

10 Hetanhan ihanhanna hehanyan oyahdaptapi kte šni; qa ihanhanna hehanyan ongedan oyaptapi kinhan, he peta on huhnah yayapi kta.

11 Qa hecen yatapi kte, nite ipiyag yakitonpi, qa siha hanpa oyakihanpi, qa sagye nape ohna yahduhapi kta, qa inahniyan yatapi kta; Jehovah toacakšin kin hee.

12 Qa hanyetu kin de Egypta makoce opta mde ca tona tokapa Egypta makoce ohna, wicašta woteca ko owasin awicawape kta, qa Egypti taku wakan dapi kin owasin akan woyaco ecamon kta. Jehovah he miye.

13 Unkan tipi ohna dukanpi kin hena we kin on wapetog yakitonpi kta, hecen we kin wanmdake ca niwankam acak u mde ca Egypta makoce kin awape cinhan wowayazan on nitapi kta iyonihipi kte šni.

14 Unkan anpetu kin de wokiksuye duhapi kta, qa he ohna wohanpi Jehovah woyecihanpi kta; nitoicagepi ohna wokage, owihanke wanica wohanpi yayapi kta.

15 Anpetu šakowin aguyapi onapohye codan yatapi kta; anpetu tokaheya awicakehan yatipi kin etanhan onapohye dutokanpi kta: akaš anpetu tokaheya etanhan anpetu išakowin kin hehanyan tuwe kašta onapohye yute cinhan, wicanagi kin he Israel etanhan yutokunpi kta.

16 Anpetu tokaheya kin en wicakicopi wakan, qa anpetu išakowin en wicakicopi wakan duhapi kte, anpetu kin hena en wohtani takudan econpi kte šni, tuka wicanagi iyohi taku yute kta wiyeya kagapi kta, heceedan ecanonpi kta.

17 Qa onapohye codan wohanpi kin yapatanpi kta, nakaš anpetu kin de en obe nitawapi kin Egypta makoce etanhan hdinanpe ciyapi, heon anpetu kin de yapatanpi kta, nitoicagepi yeye cin wokage owihanke wanica.

18 Wi tokaheya, anpetu iaketopa, htayetu etanhan aguyapi onapohye codan yatapi kte, wi anpetu wikcemna nonpa sanpa wanjidan htayetu kta hehanyan.

19 Anpetu šakowin onapohye yatipi kin ohna iyeyapi kte šni, nakaš hehanyan tuwe taku napohyapi yute cinhan wicanagi kin he oyate tokeca kaeš makoce he en tonpi kin unman tukte kašta, Israel omniciye etanhan yutokanpi kta.

 20 Takudan napohyapi yatapi kte šni. Yatipi kin owasin ohna aguyapi napohyapi šni yatapi kta, eya.

 21 Unkan Moses Israel hunkayapi kin owasin wicakico, qa hewicakiya, Ekta hdapo, qa wicoun nitawapi on tahcaska cinca ikikcupo, qa woacakšin kin patapo.

22 Qa peji šota opahte wan iyacupi kta, qa we kin tiyopa icahda un kin he en oyaputkanpi, qa tosu tiyopa anokatanhan, qa iwankapatanhan ayanwimnipi kta, we tiyopa icahda un kin heon. Unkan ihanhanna kin hehanyan tuwedan iye tiyopa etanhan inanpe kte šni.

23 Hecen Jehovah Egypti wicakaštaka hiyaye kta, qa tošu tiyopa anokatanhan qa iwankam hena akan we kin wanyake cinhan Jehovah tiyopa kin acaksin kta, qa waihang ye cin he anipe kta e yatipi en hiyu iyowinkiye kte šni.

 24 Unkan wicoie kin de yapatanpi kta, he wokage owihanke wanica niye qa nicinca duhapi kta.

 25 Qa hecetu kta, tohan makoce wan Jehovah nicupi kin ekta yaipi, eye ciqon iyecen, wohtani kin de oyapapi kta.

26 Qa tohan nicincapi kin, Wohtani kin de ecannonpi kin he taku he? eniciyapi kinhan;  

27 Hehan hehapi kta, Woacakšin Jehovah wakiyušnapi kin dee, Iye Egypti wicakaštake cehan, Egypta makoce ohna Israel cinca tipi kin acakšin, qa untipi kin patan ce. Unkan oyate kin patujapi qa ohodapi.

28 Unkan Israel cinca kin ekta hdapi, qa token Jehovah Moses Aaron kici econ wicaši kin he iyecen econpi.

29 Unkan kaketu, hanyetu cokaya hehan Jehovah tona Egypta makoce ohna caške owasin wicakaštaka, Pharoah cinhintku tokapa toiyotanke akan iyotanke kta etanhan, wayaka wicakaška tipi ohna yanke cin cinhintku tokapa aiyahdeya, qa woteca cinca tokapa nakun owasin.

30 Unkan Pharoah hanyen kikta, iye qa taokiye owasin, qa, Egypti owasin. Unkan Egypta ohna šicahoyayapi tanka, nakaš tipi tukte tuwedan te šni wanica.

31 Unkan hanyen Moses, Aaron kici wicakico, qa heya, Najin po, oyate mitawa wicehnatanhan inanpapo, niye qa nakun Israel cinca kin owasin, qa hunktiyapo, Jehovah okiyapo ehapi qon iyecen.

32 Nakun optaye nitawapi qa optaye nitawapi kin ikikcupo, ehapi qon iyecen; nakun miš eya mayawašte po.

33 Unkan Egypti iyowicapaštakapi, qa owasin untapi se eyapi, heon oyate kin makoce etanhan ye wicayapi kta inahnipi.

34 Unkan oyate kin aguyapi indu kin nahanhin napohyapi šni ikikcupi, wakšica towokoyakepi ohna pahtapi tahpapi kin akan.

35 Qa Israel cinca kin Moses eye ciqon he iyecen econpi, qa Egypti etanhan mazaska oinpi, qa mazaskazi oinpi, qa wokoyake dapi.

36 Unkan Egypti kin oyate kin cante wicakiyapi kin he Jehovah kaga; heon wicaqupi, unkan taku Egypti tawapi yuha iyayapi.

37 Qa Israel cinca kin Rameses etanhan ihdakapi, Succoth ekta, wicašta kektopawinge opawinge šakpe huninyunkenken manipi qa šicecapi kin hena wicayawapi šni.

38 Qa oyate tokeca wicota opapi qa optaye qa optaye, wanuyanpi ota hinca.

39 Qa aguyapi mdu Egypta etanhan yuha hdinanpapi kin he spanyanpi, aguyapi hmiyanyan he napohyapi šni, ecin Egypta etanhan nape wicayapi, qa owanji unpi okihipi šni, qa nakun waneya icicagapi šni, nakaš.

40 Israel cinca Egypta en iyotankapi kin wanna waniyetu opawinge topa sanpa wikcemna yamni en ounyanpi.

41 Qa waniyetu opawinge topa sanpa wikcemna yamni owihanketa, anpetu kin he en, Jehovah obe tawa owasin, Egypta etanhan hdinanpapi.

42 Hanyetu kin de Jehovah on awacinpi kta; Egypta makoce etanhan hdinanpe wicaya, heon Israel cinca kin owasin wicoicage yeye cin ecekcen Jehovah hanyetu tawa kin he awacinpi kta.

43 Unkan Jehovah Moses Aaron kici hewicakiye ciqon; Woacakšin wokonze kin dee, oyate tokeca cinca kin tuwedan hetanhan yute kte šni.

44 Tuka wicašta otoiyohi taokiye mazaska on opetonpi, he bayahdaye cinhan, hehan hetanhan yute kta.

45 Tuwe oyate tokeca makoce en ti, kaeš tohtani opeyaton ešta he yute kte šni.

46 Tipi wanjidan ohna he yutapi kta, qa cehpi kin ongedan tipi kin he etanhan tankan adapi kte šni, qa huhu kin wanjidan duwegapi kte šni.

47 Israel omniciye ocowasin heconpi kta.

48 Qa tuwe oyate tokeca niye kici ounye ca woacakšin Jehovah on ope kte cinhan, tona wica iye ti kin ohna owasin bahdayapi kte, hehan ikiyedan hi, qa hecon kta; hecen tuwe makoce ohna tonpi kin iyececa kta; tuka bahdayapi šni tuwedan hetanhan yute kte šni.

49 Tona makoce en tonpi, qa oyate tokeca niyepi ehna ounyanpi kin wicoope wanjidan yuhapi kta.

50 Unkan token Jehovah Moses qa Aaron econ wicaši kin he iyecen Israel cinca kin owasin econpi.

51 Unkan anpetu kin he Jehovah Israel cinca kin obe tawapi kin ecekcen, Egypta makoce kin etanhan hdinanpe wicaya.

HDNAPAPI WICOWOYAKE 13.

1 Unkan Jehovah ie ca Moses heciya,

2 Tona caške owasin miciyuwakan wo, Israel cinca kin ehna tona winyan tamni nahdoke cin wicašta woteca ko owasin mitawa.

3 Unkan Moses oyate kin hewicakiya, Anpetu kin de kiksuya po, he en Egypta makoce kin etanhan, wayaka tipi kin etanhan yahdinanpapi, Jehovah nape wašaka on hetanhan hdinanpe niyanpi, heon takudan napohyapi yutapi kte šni.

4 Aguyapi itka hinanpe, Abib wi kin anpetu kin de yahdinanpapi.

5 Unkan makoce wan Jehovah nicu kta e niyate wokonze on ewicakiya, Caanani qa Hitti kin, qa Amori kin qa Hivi kin qa Jebusi kin tarnakocepi kin he en Jehovah hiyuniye cinhan, makoce wan ohna pte asanpi qa canhanpi tiktica kaduze cin he ohna, wi kin de en wicohan kin de ecannon kta.

6 Anpetu šakowin hehanyan aguyapi napohyapi šni yate kta, qa anpetu išakowin kin Jehovah wohanpi kicagapi kta.

7 Aguyapi napohyapi šni , anpetu šakowin yutapi kta, qa agu; yapi napohyapi nicipi wanyakapi kte šni, qa onnapohyapi kin makoce nitawapi kin ohna wanyakapi kte šni.

8 Qa anpetu kin he nicinksl oyakidake ca heyakiye kta, Egypta makoce etanhan wau qehan Jehovah taku ecamicon heon de ecamon.

9 Unkan he ninape akan wowapetokeca duhe kta, qa niišta otahedan wokiksuye kta, hecen Jehovah toope kin nii kin ohna un kta; nakaš nape wašaka on Jehovah Egypta etanhan hiyu niyan.

10 Heon wokonze kin de omaka iyehantu ca oyape kta, waniyetu otoiyohi.

11 Unkan tohan Jehovah Caanani makoce kin ekta aniye cinhan, qa he nicu, niš qa nihunkakepi eniciya qon he iyecen;

12 Hehan winyan cinca tokapa kin owasin, Jehovah on dutokan kta, qa wanunyanpi nitawa cinca tokapa mdoka kin owasin Jehovah tawa kta.

13 Qa šuktanka šonšonna cinca tokapa kin owasin opeyakiton kta, tahcaska cinca wan he iyopeyakiye kta, qa opešakiton šni kinhan pakin yakakše kta; qa wicašta nicincapi kin tona caškepi owasin opeyakiton kta.

14 Qa kaketu kta, tokata tohan nicinca, De taku hwo eya iniwange cinhan? hehan heyakiye kta, Nape wašaka on Egypta etanhan, wayaka tipi kin etanhan, Jehovah hdinanpe unyanpi.

15 Unkan unhdapi Pharoah katinyan tehinda; heon Jehovah tona caškepi Egypta makoce ohna owasin wicakte, wicašta cinca tokapa, qa nakun woteca cinca tokapa, heon tona caskepi owasin Jehovah wawakiyušna, qa micinca caške opewakiton, ehe kta.

16 Qa he ninape akan wowapetokeca kta, qa ite akahpe niišta otahedan niciyuke kta, nakaš nape wašaka on Jehovah Egypta etanhan hdinape niyan.

17 Unkan kaketu, Pharoah oyate ye wicaši qehan Wakantanka Philisti tamakocepi canku kin ohna awicaye šni, he ptecedan tuka okini oyate ozuye wanyakapi kinhan iyope iciyapi qa Egypta ekta hdapi kta, eya.

18 Heon Wakantanka oyate kin wicayuhomni, qa Mdeša hopuze canku kin ohna awicaya; unkan Israel cinca kin ipiyag kitonpi Egypta makoce kin etanhan in an papi.

19 Unkan Moses Joseph huhu kin yuha hda, nakaš Israel cinca kin wicaši qa heya, Awicakehan Wakantanka en nihipi kta, qa huhu mitawa yuha detanhan inayapapi kta.

20 Unkan Succoth etanhan ihdakapi, qa hopuze kin icahda Elam en etipi.

21 Unkan Jehovah wicitokam anpa eca mahpiya bosdata wan ohna, canku kin ohna ye wicaya, qa hanyetu eca peta bosdata, hecen anpetu hanyetu ko, mani okihipi ece.

22 Anpetu eca mahpiya bosdata ewicakicihdaku šni, qa hanyetu eca peta bosdata wicitokapa tanhan.

HDNAPAPI WICOWOYAKE 14.

1 Unkan Jehovah ie ca Moses heciya,

2 Israel cinca kin decen ewicakiya wo; Ihdamnapi qa Pi-hahiroth i kin itokani etipi kta, Migdol qa Mde kin otahedan, Baal-zephon itokapatanhan he iyotakons, mde icahda eyatipi kta.

3 Unkan, Israel cinca kin makoce ohna nunipi hewoskan onawicataka, Pharoah eye kta.

4 Hecen Pharoah cante kin mdušuta kta, unkan tawicape kta; he cen Pharoah qa ozuye tawa kin owasin etanhan wowitan waton kta; qa Jehovah he miye Egypti sdonyapi kta. Unkan hecen econpi.

5 Unkan oyate kin najicapi kin Egypti wicaštayatapi kin okiyakapi, hehan Pharoah cante kin, qa taokiye cantepi kin oyate ekta ayuhomnipi, qa tokeca de econkupi, qa Israel wowidag wicunyanpi qon tokan ye wicunšipi hwo? eyapi.

6 Qa canpahmihma aqin kicaton qa taoyate kin hduha eyaya.

7 Qa canpahmihma opawinge šakpe kahnin icu, qa Egypti tacanpahmihma owasin, qa otoiyohi ohna wicašta yamni.

8 Unkan Jehovah Egypti wicaštayatapi kin Pharoah cante kin yusuta; hecen Israel cinca kin tawicapa; tuka Israel cinca kin nape hduwankan iyayapi.

9 Unkan Egypti kin tawicapapi, qa Pharoah šuktanka tawa owasin, canpahmihma qa šuktanka akan iyotankapi, qa ozuye tawa kin wicakihdegapi, mde icahda wankapi, Pi-hahiroth i kin ekta Baal-zephon iyotakonš.

10 Unkan Pharoah ikiyedan hi qehan, Israel cinca ista wankan ikikcupi, unkan inyun Egypti wicihakam natan an, heon nina kokipapi, qa Israel cinca kin Jehovah hoyekiyapi.

11 Qa Moses heciyapi, Egypta ekta wicahapi wanica nace, heon Hewoskan ohna untapi kta e hetanhan hiyu unyayapi he? Tokeca de ecaunyeconpi, qa Egupta etanhan hiyu unyayapi he?

12 Oie wan Egypta en unkeniciyapi qon dee seca. Unkayuštan po, hecen Egypti wowidag unyanpi kta, unkeyapi. Egypti wowidag unyanpi kin heewašte, qa hewoskan untapi kin hee šica.

13 Unkan Moses oyate kin hewicakiya, ltmuhan koyakipapi kin. Owanji najin po, hecen Jehovah woehdaku ecanionpi kte cin he wandakapi kta; Egypti token nakaha wandakapi, he iyecen ake iciraana wanwicadakapi kte šni.

14 Jehovah niyepi on kize kta, qa niš inina dukanpi kta.

15 Unkan Jehovah Moses heciya, Tokeca miye hoyemayakiya he? Israel cinca kin ihdag wicaši wo.

16 Qa nia canšakadan yuwankan ikikcu, qa ninape kin mde kin iwankan ye kiya wo; qa he: yuakipam iyeya wo, hecen Israel cinca kin mde cokaya maka puza ohna manipi kta.

17 Unkan miš Egypti cantepi kin mdušuta, kta, hecen wicapašipi kta, qa Pharoah on, qa ozuye tawa ocowasin, canpahmihraa qa šuktanka akan yotankapi on mayutanpi kta.

18 Qa Pharoah on, canpahmihma tawa on, qa šuktanka akan yotankapi on, wowitan waton kinhan hehan Jehovah he miye, Egypti sdonyapi kta, eya.

19 Unkan Wakantanka ohnihde kin Israel ihdakapi wicitokam mani qon škanškan, qa wicihektam u, qa mahpiya bosdata wicitokapatanhan iyaya, qa wicihakam najin.

20 Qa Egypti owanka kin, qa Israel owanka kin otahedan u, qa mahpiya šapa qa otpaza heca, tuka dena hanyen iyoyamya, hecen hanyetn osan icikiyedan upi šni.

21 Unkan Moses mde kin iwankam nape hdugata, unkan Jehovah hanyetu osan wiyohiyanpatanhan tateyanpa wašaka on mde kin yutokan, mini kin kicaspe ca mde kin puza kaga.

22 Unkan Israel cinca kin mde cokaya ipi, puze cin ohna, qa etapa tanhan catka tanhan ko mini kin aconkaške wicaya.

23 Unkan Egypti kuwa awicayapi, qa Pharoah šuktanka tawa owasin, canpahmihma, šuktanka akan yotankapi koya, mde kin cokaya wicihakam ipi.

24 Unkan hanhanna iwaktapi hehan, Jehovah Egypti ihdakapi ekta etonwan, peta bosdata qa mahpiya šapa ohna, qa Egypti ihdakapi kin yusinye wicaya.

25 Qa canpahmihma huha kin yusdoka hecen tketkeya toksupi; unkan Jehovah Israel on Egypti wicakiza, heon etanhan Israel etanhan naunjicapi kta, Egypti eyapi.

26 Hehan Jehovah Moses heciya, Mde kin ektakiya ninape kiyugata wo, hecen mini kin ecen hdiwanke kta Egypti akan, canpahmihma tawapi, qa šuktanka tawapi akan.

27 Unkan Moses mde kin iwankam nape yekiya; unkan hanhanna hehan mde kin token un qon he iyecen hdiwanka; unkan Egypti najicapi kin he itkokipapi, hecen Jehovah Egypti kin mde cokaya ehpe wicaya.

28 Unkan mini hdiwanka qa canpahmihran, šuktanka akan yotankapi ko awicakahpa, Pharoah ozuye tawa owasin, tona wicihakam mde kin en hipi wanjidan kaš ni šni.

29 Unkan Israel cinca kin mde cokaya puze cin amanipi, qa etapa tanhan catka tanhan ko mini kin aconkaške wicaya.

30 Unkan Jehovah anpetu kin he en Israel niwicaya, Egypti napepi etanhan. Unkan Israel, Egypti tapi wanwicayaka, mde kin hutata ekta.

31 Qa Israel wicohan tanka Jehovah Egypti ecawicakicon kin he wanyakapi, qa oyate kin Jehovah kokipapi, qa Jehovah wacinyanpi, taokiye Moses nakun.

HDNAPAPI WICOWOYAKE 15.

1 Hehan Moses Israel cinca ko odowan kin de Jehovah kahiyayapi, qa heyapi. Jehovah iwadowan kta, wowitan tanka icicaga. Šuktanka qa tuwe akan iyotanke cin mde kin en ehpe wicaya.

2 Jehovah mitowašake qa mitadowan kin hce, qa nakaha nimayan. Wakantanka mitawa wada kin hee, heon mdatan kta. Ate Wakantanka, heon, rndawankantu ye kta.

3 Jehovah wicašta kicizapi itancan kin heca, caje tawa kin Jehovah ee.

4 Pharoah tacanpahmihma, ozuye tawa ko, mde en ehpe wicaya. Unkan taakicita kuhnigupi mde sa ohna minin tapi.

5 Wosbe kin awicakuhpa; mini she kin ohna kun iyayapi; inyan wan iyecen.

6 Jehovah ninape etapa kin wowašake on yutanpi ce. Ninape etapa, Jehovah, toka kin wicakawanka.

7 Nitowitan tanka on tona nicipajinpi kin ihang wicayaya. Nitocanniye kin yeyakiye cin he peji seca iyecen huhnahwicaya.

8 Nipoge oniye kin on mini kin kiwitayapi. Minitan kin paha iyecen bosdan najin. Mde cokaya wosbe kin tašag icu.  

9 Toka kin heya, Wicawakuwa kta ewicawehdege kta, woyuha wapamni kta, hena on minagi imnayanpi kta, isan wahdusdoke kta, minape ihang wicaye kta.

10 Tate nitawa ipoh yakiya, Mde kin awicakahpa. Mini wašaka aohdute wicaya, maza su iyecen.

11 Jehovah taku wakan ehua tuwe iyeniceca? Tuwe iyeniceca wowakan on yutanpi kta yatanpi kin nicinihanpi kta, wowapetokeca ecannon?

12 Ninape etapa kin yeyakiya, maka kin nawicapca.

13 Oyate kin de opewicayakiton, nitocantekiye on awicada. Nitowašake on oyanke wakan nitawa kin en hiyuwicayaye kta.

14 Oyate nahonpi qa kokipapi kta, Palestina ounyanpi kin wokokipe wicayuze kta.

15 Hehan Edom itancanpi kin wicayušinyayapi kta. Moab wicašta wašaka wocancan wicayuze kta. Caanan ounyanpi iyuhpa skanpi kta.

16 Nihinciyapi, wokokipc ko awicahinhpaye kta. Niišto tanka kin on tašag tapi kta, inyan iyecen. Oyate nitawa iyoopta iyaye kte cin hehanyan, Jehovah; Oyate kin de opeyakiton iyoopta iyaye kte cin hehanyan.

17 He nitawa kin he ekta hiyu wicayaye ca ohna hu hde wicayaye kta. Oyanke ohna yakidotanke kta e wiyeya yakaga, Jehovah. Tipi wakan, Itancan, ninape nicicage kte cin he ekta.

18 Jehovah owihanke wanin wicaštayatapi kta.

19 Hecen Pharoah šuktanka tawa, canpahmihma qa šuktanka akan yotankapi kin inde kin en hipi, unkan Jehovah mde mini kin hena akan awicahdi; tuka Israel cinca kin mde cokaya taku puze cin amanipi.

20 Unkan Miriam, winyan wokcan, Aaron tankeku cancega wan nape ohna icu, unkan winohinca owasin cancega yuha opapi, qa wacipi.

21 Unkan Miriam awicayupta, qa heya, Jehovah idowan po, wowitan tanka icicaga, šuktanka qa akan yotanka kin he mde en ehpe wicaya.

22 Unkan Moses Israel Mdeša etanhan ihdag wicaya, unkan Šur hopuze kin ekta ipi, qa anpetu yamni hopuza ohna manipi, qa mini iyeyapi šni.

23 Qa Marah en hipi qa Marah mini yatkanpi okihipi šni, ecin pa ce, heon he Marah eciyapi.

24 Unkan oyate kin Moses kipajinpi qa taku unyatkanpi kta hwo? eyapi.

25 Unkan Jehovah hoyekiya, unkan Jehovah he can wan sdonyekiya; he mini kin en enpe ye cin hehan mini wašte icu. Hen wokage wan qa woyaco wan wicaqu, qa hen iyutan wicaya.

26 Qa heya, Jehovah wakan yada ho kinohinniyan anayagoptan, qa taku iye išta kin ohna ecetu kin hecannon, qa woahope tawa kin owasin nayahon, qa wokage tawa owasin duhe cinhan, wowayazan tona Egypti awicawahnaka wanjidan acihnake kte šni, nakaš Jehovah ašniniye cin he miye.

27 Unkan Elim en hipi, hen miniyowe ake nonpa, qa tamar can wikcemna šakowin , qa hen etipi mini icahda.

HDNAPAPI WICOWOYAKE 16.

1 Unkan Elim etanhan ihdakapi, qa Egypta makoce etanhan iyayapi, wi inonpa anpetu iake zaptan hehan Israel cinca omniciye owasin Sin Hopuze cin ekta hipi; he Elim qa Sinai otahedan.

2 Qa Israel cinca omniciye ocowasin Hopuze cin ohna Moses qa Aaron en kipajinpi.

3 Qa Israel cinca kin hewicakiyapi, Tokin Egypta makoce ohna Jehovah nape on untapin, cehpi cega icahda iyotankehan aguyapi imnahan untapi qehan; omniciye kin de ocowasin akihan te unyayapi kta e Hopuze cin de ekta hiyu unyayapi.

4 Unkan Jehovah Moses heciya, Inyun, mahpiya etanhan aguyapi amagaju ciciyapi kta, qa oyate kin tankan yapi, qa anpetu otoiyobi taku anpetu wan iyohiye cin he mnayanpi kta; hecen iyutan wicawaye kta, mitoope omanipi kta, qais omanipi kte šni.

5 Qa anpetu išakpe hehan taku anpetu otoiyohi mnayanpi kin tie nonpa akihde ahdipi kta, qa he spanyanpi kta.

6 Unkan Moses Aaron kici Israel cinca kin owasin hewicakiya, Htayetu kinhan Egypta makoce etanhan hdinanpe niyanpi kin Jehovah hee sdonyayapi kta.

7 Qa hanhanna eca Jehovah towitan kin wandakapi kta; Jehovah en wiyahnupi kin he nahon, tuka unkiyepi untakupi hwo; on; wiunyahnupi he?

8 Qa Moses heya, Htayetu eca Jehovah cehpi yatapi kta e nicu, pi, qa hanhanna ca aguyapi inimnapi kta, heon etanhan Jehovah wiyahnupi kin iš iye en wiya, hnupi kin he nahon sdonyayapi kta; tuka unkis untakupi he? unkiyepi en wiunyahnupi šni, tuka Jehovah he en.

9 Unkan Moses Aaron heciya, Israel cinca omniciye ocowasin hewicakiya wo; Jehovah wiyahnupi kin nahon, heon ikiyedan upo.

10 Unkan Aaron Israel omniciye ocowasin ewicakiye cin he icunhan, Hopuze cin ekta ihduhomnipi, qa inyun, Jehovah towitan kin mahpiya soka kin ohna wanyakapi.

11 Unkan Jehovah ie ca Moses heciya;

12 Israel cinca wihnupi kin nawahon, hecen ewicakiya wo, Htayetu eca cehpi yatapi ece kta, qa hanhanna eca aguyapi inimnapi kta, qa Jehovah wakan yadapi kin he miye sdonyayapi kta.

13 Unkan htayetu siyo en hipi qa owanke kin akahpapi, qa hanhanna eca owanke ihdukšan cu kin makata wanka ece.

14 Qa cu makata wanke cin akan hiyu qehan, inyun hopuze ite akan taku cistinna wa šuta iyecen, hewanke iyecen cistinna maka akan wanka.

15 Unkan Israel cinca kin he wanyakapi, qa wicašta otoiyohi hunkawanjitku kin hekiciyapi, manna eya; nakaš he taku sdonyapi šni. Unkan Moses hewicakiya, Aguyapi yutapi kte Jehovah nicupi kin dee.

16 Taku Jehovah econ nišipi kin dee, Hetanhan mnayanpo, wicašta otoiyohi token yute kta iyacinyan wicašta iyohi, wicanagi tona wakeya tawa ohna yakonpi, pahu otoiyohi on omer iyutapi wanjidan icu kta.

17 Unkan Israel cinca kin ecen econpi, qa hunh ota mnayanpi, qa hunh aoptetu mnayanpi.

18 Qa omer ohna iyutapi qehan tuwe ota mnaye cin he taku iyakicuya yuhe šni, qa tuwe cistinna mnaye cin he aokpani yuhe šni; otoiyohi token yute kta iyeeeca hecen mnayan.

19 Unkan Moses hewicakiya; Ihnuhan tuwe hetanhan ihanhanna hehanyan onge oyapte cinhan.

20 Unkan Moses nahonpi šni, qa wicašta wanjikši ihanhanna kin hehanyan onge oyaptapi; unkan he šicamna qa ohna wamdudan icagapi; unkan Moses canniye wicaya.

21 He hanhanna otoiyohi mnayanpi, wicašta otoiyohi token yute kta iyececa; tuka anpetu wi kin kate cin hehan škan.

22 Unkan anpetu išakpe hehan aguyapi nonpa akihde mnayanpi, otoiyohi on omer iyutapi nonpa; unkan omniciye itancan kin owasin en hipi, qa Moses okiyakapi.

23 Unkan hewicakiya, Jehovah eye ciqon dee, Heyakecinhan sabbath wakan Jehovah okihpapi wakan tawa kin hee. Taku aguyayapi kte cin he aguyapo, qa taku cega en oyahanpi kte cin he ohanpo, qa taku ihe cin owasin kihnakapo; heyakecinhan hehanyan he yahduhapi kta.

24 Unkan hanhanna hehanyan kihnakapi, Moses econ wicaši kin he iyecen; tuka šicamna šni, qa ohna wamdudan yuke šni.

25 Unkan Moses heya, Nakaha he yutapo, anpetu kin de Jehovah okihpapi tawa kin ee. Ecin tinta ekta he iyeyayapi kte šni.

26 Anpetu šakpe he mnayayapi kta, qa anpetu išakowin kin he okihpapi, he icunhan wanice kta.

27 Unkan anpetu išakowin kin hehan oyate etanhan wanjiksi mnayanpi kta tankan ipi, tuka takudan iyeyapi šni.

28 Unkan Jehovah Moses heciya, Tohanyan mitawoahope, qa mitoope oyapapi tawaten yayapi kte šni he?

29 Wanyaka po, Jehovah okihpapi nicupi kin, heon anpetu išakpe kin he en nonpa can on woyute nicupi, owanji yankapo, otoiyohi tone kin ohna. Anpetu išakowin icunhan tuwedan oyanke tawa etanhan tankan iyaye kte šni, eya.

30 Unkan oyate kin anpetu išakowin kin he en okihpapi.

31 Qa Israel tipi kin he Manna eya caje yatapi, he taku su kin iyececa ska, qa he utapi kin he aguyapi zibzipedan canhanpi tiktica icicahiyapi iyececa.

32 Unkan Moses heya, Taku Jehovah econ nišipi kin dee, hetanhan omer wanjidan ojuyapo he inicagapi yeye cin yuha yaunpi kta; hecen Egypta makoce etanhan hdinanpe ciyapi qehan, Hopuze cin ohna aguyapi yun ciyapi kin he wanyakapi kta.

33 Unkan Moses Aaron heciya, Cega wan icu qa he ohna manna omer iyutapi wan yeya wo, qa he Jehovah itokam kihnaka wo, Inicagapi yeye cin he yuha unpi kta.

34 Unkan Aaron he woyaatanin kin itokam, he yuhapi kta e kihnaka, Jehovah Moses econ sicon he iyecen.

35 Unkan Israel cinca kin manna yutapi, waniyetu wikcemna torn hehanyan, makoce ohna woju tipi wan en ipi kin hehanyan, Caanan makoce ihanke kin en ipi kin hehanyan manna kin yutapi.

36 Unkan omer iyutapi wikcemna ca epah wanji ojunyanpi.

HDAPAPI WICOWOYAKE 17.

1 Unkan Israel cinca kin omniciye owasin Jehovah oie kin eciyatanhan ihdakapi kin hena Sin hopuze etanhan ihdakapi, qa Rephidim en etipi tuka oyate yatkanpi kta e mini wanica.

2 Unkan oyate kin Moses iyope yapi qa, Mini unqu po, unyatkanpi kta eyapi. Unkan, Tokeca miš iyope mayayapi? Tokeca Jehovah iyutan yayapi? Moses ewicakiya.

3 Unkan hen oyate kin mini on ipuzapi, qa oyate kin Moses i en hiyeyapi, qa, De tokeca hwo, Egypta etanhan inape unyayapi qa ipuza te mayaye kta, qa micinca, qa mitawanuyanpi kin? eyapi.

4 Unkan Moses Jehovah hoyekiya, qa, Oyate kin de taku ecawicawecon kta he? unhanketa e inyan on makininpi kta, eya.

5 Unkan Jehovah Moses heciya, Oyate kin itokam ya wo, qa Israel hunkayapi etanhan ope wicayaši kta, qa canšakadan on wakpa ayape ciqon ninape ohna ikikcu, qa iyaya wo.

6 Inyun, miš Horeb heciya imnija kin akan nitokam iyawahe kta, qa imnija kin ayape kta, qa hetanhan mini hiyu kta; hecen oyate kin mini yatkanpi kta. Unkan Israel hunkayapi kin wanyakapi, Moses hecen econ.

7 Unkan oyanke kin he Massah, qa Meribah cajeyata, Israel cinca kin iyopeyapi qa Jehovah iyutan yanpi, qa Jehovah unkiyopeya un, kaeš un šni he? eyapi kin heon etanhan.

8 Hehan Amaleki en hipi, qa Rephidim ohna Israel azuya.

9 Unkan Moses Jošua heciya,  Wicašta unkicicahniga wo, qa Amaleki wicakiza wo. Heyakecinhah Wakantanka canšakadan tawa nape ohna yuha paha iyawahe kta.

10 Unkan Jošua Amaleki wicakiza, token Moses eciye cin he iyecen econ. Unkan Moses, Aaron qa Hur paha akan itanwankanhdeya iyayapi.

11 Unkan tohan Moses nape kin wankantuya hdugate hehanyan Israel ohiya, qa tohan nape ozikiya ca Amaleki ohiya.

12 Unkan Moses nape kin tke heon inyan wan icupi, qa ihukuya ehnakapi; unkan he akan iyotanka; hehan Aaron Hur kici nape en yuzapi, unman etapa tanhan, qa unman catka tanhan; hecen nape kin patin anpetu wi kin iyaya, hehanyan.

13 Unkan Jošua tacanhpi hi kin on Amaleki, qa taoyate wicakawanka.

14 Unkan Jehovah Moses heciya; Wokiksuye kin de wowapi wan en kage ca Jošua noge kin en kihnaka wo. Amaleki kiksuyapi kin mahpiya ihukuya tanhan wapajuju kta.

15 Unkan Moses wahna wošnapi wan kage ca, Jehovah-Nissi eya caje yata.

16 Qa heya, Nape kin Jehovah toiyotanke kin akan heon wicoicage yeye cin ohinniyan Jehovah Amaleki kize kta.

HDNAPAPI WICOWOYAKE 18.

1 Unkan Jethro Moses tunkanku, Midian wawayušna kin, Wakantanka taoyate Israel, qa Moses token ecawicakicon owasin nahon, Jehovah Israel Egypta etanhan hdinanpe wicayc cin he.

2 Hehan Jetro Moses tunkanku  kin Zipporah Moses tawicu kin icu, he kihdeye ciqon iyohakam.

3 Qa cinhintku nonpa, tokapa Geršom eciyapi, Makoce tokeca ohna ounwaya, eya, heon etanhan.

4 Qa unman Eiezer eciyapi; Ate Wakantanka kin omakiye ca Pharoah tacanhpi kin etanhan emahdaku, eya, heon etanhan.

5 Unkan Wakantanka he tawa kin icahda, hopuze ohna Moses ti kin he ekta Jetro Moses tunkanku hi, qa cinhintku qa tawicu nakun.

6 Qa Moses heciya, Nitunkan Jethro he miye, niye en wahi, nakun mtawin, qa nicinca nonpa opapi.

7 Unkan Moses, iye tunkanku itkokipe kta tankan iyaye ca pakicapsan, qa i iputaka, qa zaniyan unpi hecinhan ikiciwangapi, qa wakeya kin en hipi.

8 Unkan Jehovah taku Pharoah qa Egypti ecawicakicon, Israel on etanhan owasin Moses iye tunkanku okiyaka, taku tehika canku ohna awicakipa owasin, qa Jehovah ewicahdaku kin nakun, Moses iye tunkanku okiyaka.

9 Unkan Jehovah Egypti napepi etanhan Israel ehdaku, qa taku wašte ecawicakicon owasin on Jetrho iyuškin.

10 Qa Jethro heya, Jehovah Egypti napepi etanhan, qa Pharoah nape etanhan enihdakupi kin he yawaštepi nunwe. He Egypti napepi ihukuya tanhan taoyate kin ewicahdaku.

11 Wanna Jehovah taku wakan kin owasin isanpa tanka ee sdonwaya, taku en wahan icidaya skanpi kin he en ohiwicaya ce.

12 Unkan Moses tunkanku Jethro wošnapi, qa wohuhnah yapi Wakantanka wakiciyušna. Unkan Aaron qa Israel hunkayapi, Wakantanka itokam, Moses tunkanku kici aguyapi yutapi kta en hipi.

13 Unkan ihanhanna Moses oyate kin wicayaco kta e iyotankahan yanka. Unkan oyate kin Moses ihdukšan najinpi, hanhanna etanhan ecen htayetu.

14 Unkan Moses tunkanku taku iye taoyate kin ecawicakicon owasin wanyake ca heya, De taku oyate kin ecawicayecon hwo? Tokeca nišnana yakidotanka, qa oyate kin owasin hanhanna etanhan ecen htayetu nihduksan najinpi he?

15 Unkan Moses iye tunkanku heciya, Oyate kin Wakantanka iwangapi kta en mahipi ece.

16 Nakaš taku akinicapi eca en mahipi ece, qa wicašta wiciyotahedan mdaco, qa Wakantanka tokage, toope, ko sdonye wicawakiya ece.

17 Unkan Moses tunkanku kin heya, Taku ecannon kin de wašte šni;

18 Hanyaye kta, nis qa oyate kin de onipapi owasin nakun; Taku kin de tke heon nišnana hecon oyakihi šni nakaš.

19 Wanna maho kin nahon, wahokon ciciya, qa Wakantanka nici un kta. Oyate kin ie ska niyanpi kta, Wakantanka ekta, qa oiepi kin Wakantanka oyakidake kta.

20 Qa wokage, woope ko onspe wicayakiye kta, qa canku ohna nmanipi kta, qa woecon econpi kte cin hena sdonye wicayakiye kta.

21 Qa niye oyate kin owasin etanhan wicašta waditaka yakahnige kta, wicašta wicakapi, Wakantanka kokipapi qa basminyanpi kin šicedakapi kin hecapi, qa kektopawingege itancanpi, opawingege itancanpi, qa wikcemna zaptanptan itancanpi, qa wikcemnamna itancanpi kin hena wicayecage kta.

22 Unkan hena ohinniyan oyate kin yacopi kta, qa taku tanka kin owasin en anihipi kta; heeen iyepi nicicinpi kta qa kapojedan nicicagapi kta.

23 Taku kin de ecannon, qa Wakantanka hecon niši kinhan, najinhan oyakihi kta, unkan oyate kin de owasin oyanke tawapi kin en zaniyan kipi kta.

24 Unkan Moses iye tunkanku ho kin anagoptan, qa token eye cin owasin ecen econ.  

25 Qa Moses Israel owasin etanhan wicašta waditaka wicakahnige ca oyate pa wicayapi i kta, kektopawingege itancanpi,; opawingege itancanpi, wikcemna zaptanptan itancanpi, qa wikcemnamna itancanpi wicakaga.

26 Unkan hena ohinniyan oyate kin yacopi, taku tehike cin he Moses en ahipi, qa taku cistinna akinicapi kin he iye yacopi.

27 Unkan Moses iye tunkanku kihde ya; unkan iye tamakoce kin ekta kihda.

HDNAPAPI WICOWOYAKE 19.

1 Israel cinca Egypta makoce etanhan inanpapi kin etanhan, wi iyamni, wi tanin kin anpetu kin en Sinai ho puze cin en hipi.

2 Nakaš Rephidim etanhan ihda: kapi qon, qa Hopuze en hipi, qa Hopuze ohna e tipi, qa Israel hen wankapi he itokam.

3 Unkan Moses itanwankanhdeya Wakantanka ekta i, unkan Jehovah paha kin etanhan hoyekiye ca heya. Jacob tiyoi hnaka hecen eyakiye ca Israel cinca kin owicayakidake kta;

4 Taku Egypti ecawicawecon niš wandakapi, qa wanmdi hupahu akan ciyuhapi, qa naiye en cicahipi.

5 Qa wanna inaho kin katinyan nayahonpi, qa wicotakuye mitawa yapatanpi kinhan, maka kin ocowasin mitawa, tuka oyate owasin isanpa miš tawa ciyapi kta.

6 Unkan niye oyate wakan, qa wicaštayatapi wawayušnapi ciyuhapi kta. Wicoie kin hena Israel cinca kin owicayakidake kta.

7 Unkan Moses en hi, qa oyate hunkayapi kin wkakico, qa wicoie kin hena owasin wicitokam ehde, Jehovah econ ši kin iyecen.

8 Unkan oyate kin owasin okonwanjidan ayuptapi qaheyapi, Token Jehovah eye cin owasin ecen econkupi kta. Unkan Moses itkom oyate oiepi kin Jehovah okiyaka.

9 Unkan Jehovah Moses heciya, Inyun mahpiya šoka wan ohna en cihi kta, hecen ociciye cin he oyate kin nahonpi kta, qa owihanke wanin wicanidapi kta. Unkan Moses oyate oiepi kin Jehovah okiyaka.

10 Unkan Jehovah Moses heciya, Oyate kin ekta hda, qa wicayuwakan wo, ecin qa nakun heyakecinhan, qa wokoyake hdujajapi kta.

11 Unkan anpetu iyamni on wiyeya icihnakapi kte, anpetu iyamni kin hehan Jehovah kun u, qa Sinai paha akan iyahe kte cin he oyate owasin wanyakapi kta.

12 Unkan ihdukšan oyate kin iwicayecago kta, qa hehe kta, Ihnuhan paha akan idadapi kin, qa ihanke kin ešta odutanpi kin; tuwe kašta he yutan kinhan ktepi kta.

13 Ihnuhan wicanape wanjidan he yutan kin, tuka inyan on kininpi kta kaeš wanhinkpe on ipahdan iheyapi kte, woteca wicašta unman tukte kašta ni kte šni. Maza yahotonpi tehan ho ton kinhan iyepi paha en itanwankanhdeya yapi kte.

14 Unkan Moses paha kin etanhan apamahdedan ku, oyate kin ekta, qa oyate kin wicayuwakan, unkan wokoyake kin hdujajapi.

15 Unkan oyate kin hewicakiya, Anpetu iyamni on wiyeya un po. Ihnuhan winohinca odutanpi kin.

16 Unkan anpetu iyamni hanhanna hehan wakinyan hotonpi, qa wakanhdi, qa paha akan mahpiya wan šoka hinca, qa maza yahotonpi nina hoton, unkan oyate kin owanka ohna owasin cancanpi.

17 Unkan Moses oyate kin Wakantanka itkokipapi kta owanke etanhan inanpe wicaya; unkan paha ihukuya inajinpi.

18 Unkan Jehovah peta ohna Sinai paha akan kun hiyu, heon paha kin owancaya sotoju, qa šota wankan hiyaya, maza sdoyapi oceti šota kin iyececa, qa paha kin owancaya nina cancan.

19 Unkan maza yahotonpi kin tehan nina hoton qehan, Moses ia, unkan Wakantanka ho wan on ayupta.

20 Unkan Jehovah Sinai paha kin akan kun hiyu, he paha kin akan, qa Jehovah Moses kipan he paha kin ekta, qa Moses itanwankanhdeya ekta i.

21 Unkan Jehovah Moses heciya, kun hda oyate kin wicakiyaotanin, okini wanyakapi kta e Jehovah ekta iyoptapi kta, qa etanhan wicota ihpayapi kta.

22 Qa wawayušnapi Jehovah ikiyedan hipi ece kin, iš eya ihduwakanpi kte, okini Jehovah wicakaohpe kta.

23 Unkan, He kin yuwakan, qa ihdukšan icago wo, unyakidaotanin, qa eha, heon oyate kin Sinai he kin ekta ipi okitpanipi ce, Moses Jehovah eciya.

24 Unkan, Hunktiya kun hda, qa itanwankanhdeya yau kta niš qa Aaron yecica kta, tuka wawayušnapi kin, qa oyate kin ihnunhan Jehovah ekta yapi kta e naoksapi, okini wicakaohpe kte, Jehovah eciya.

25 Unkan Moses oyate ekta kun hde ca owawicakiye.

HDNAPAPI WICOWOYAKE 20.

1 Unkan Wakantanka ie ca oie kin dena owasin eya.

2 Jehovah nitawa Wakantanka, qa Egupta makoce etanhan, wayaka tipi etanhan, inanpe niye cin he miye ce.

3 Mitokam taku wakan tokeca duhe kte šni.

4 Ihnunhan wakagapi pagopi nicicage cin, qa mahpiya wankan taku ohnaka, qa ihukuya taku maka kin ohnaka, qa mini maka ihukuya taku ohnaka kin hena owasin taku iyececanicicage cin.

5 Hena ohoyada kte šni, qa itokam yapatuje kte šni. Nakaš Jehovah Wanakntanka nitawa, Wakantanka winawizi he miye, tona šicemadapi wicoicage iyamni, qa itopa kin hehanyan ateyapi wahtanipi iye cincapi kin en awicawai ece.

6 Qa tona waštemadapi qa mitawoahope patanpi kin hena wicoicage kektopawinge hehanyan cantewicawakiya ece.

7 Jehovah Wakantanka nitawa kin he ikcekceya caje date kte šni, Jehovah tuwe ikcekceya caje yate cinhan yaowotanna kte šni.

8 Anpetu išakowin wakan yada kta e kiksuya wo.

9 Anpetu šakpe htayani, qa nitontani kin owasin ecannon kta.

10 Tuka anpetu išakowin kin Jehovah Wakantanka nitawa kin he tawa, he en wohtani takudan ecannon kte šni; niye qa nicinkši, qa nicunkši, nitahokšidan, qa wiciyanna nitawa, qa wanuyanpi nitawa, qa tuwe oyate to keca otonwe nitawa ohna un kin.

11 Nakaš anpetu šakpe en Jehovah, mahpiya kin, qa maka kin, miniwanca, qa taku hena ohna un kin owasin kage ca anpetu išakowin kin en okihpa, heon Jehovah anpetu išakowin kin he hdawašte qa hdawakan.

12 Niyate qa nihun wicahduonihan wo, hecen Jehovah Wakantanka nitawa kin makoce nicu kin he en tehan yani kta.

13 Tin wicayakte kte šni.

14 Wawicihahapi ecannon kte šni.

15 Wamayanon kte šni.

16 Nikiyenati woyaotanin iton šniyan odake kte šni.

17 Nikiyenati tipi kin cantiheyaye kte šni. Nikiyenati tawicu, qa hokšidan tawa, qa wiciyanna tawa, qa ox tawa, qa šuktanka tawa, qa taku kašta nikiyenati tawa cantiheyaye kte šni.

18 Unkan oyate owasin taku hotonpi kin qa taku ide kin qa mazayahotonpi kin hoton, qa he sotoju kin he wanyakapi qehan, oyate kin kokipapi, qa cancanpi, qa itehan kinajinpi.

19 Qa, Niš unkokiyapo, hecen naunhonpi kta, tuka Wakantanka unkokiyapi kte šni, okini untapi kta, Moses eciyapi.

20 Unkan Moses oyate kin hewicakiya, Inihanpi šni po; iyutanniyanpi kta on Wakantanka hi, qa tokokipe niitepi itokam un kta, hecen wayahtanipi kte šni, heon etanhan.

21 Unkan oyate kin itehan najinpi, tuka Moses otpaza šoka ohna Wakantanka yanke cin he ikiyedan i.

22 Unkan Jehovah Moses heciya, Israel cinca kin hecen ewicayakiye kta, Mahpiya etanhan, ociciyapi kin he niš wandakapi.

23 Mitokam mazaska taku wakan, qa mazaskazi taku wakan nicicagapi kte šni.

24 Maka owayušna miyecage kta, qa he akan peta wošnapi, qa wopida wošnapi nitawa kin, tahcaska nitawa qa pte nitawa kin wayadušna kta; tukte kašta micaje kiksuye ciyapi kin he en cihi qa ciyawašte kta.

25 Qa inyan owayušna miyecage cinhan, wokakanpi on yakage kte šni, maziyape nitawa kin he ekta yeyakiye cinhan dusape kta.

26 Qa owayušna mitawa kin ekta itanwankanhdeya idada eca, woiyadipi akan mayani kte šni ece, okini tanconikadan tanin kta.