Hdnapapi (Exodus) 21-40

HDNAPAPI WICOWOYAKE 21.

1 Unkan woyaco wicitokam eyahde kta dena ee.

2 Hebrew ookiye wan opeyaton kinhan waniyetu šakpe wowidag yaye kta, tuka išakowin hehan iyuwin codan ikceya tankan iyaye kta.

3 Tanšnana en hi kinhan tansnana tankan ye kta, tawicu ton kinhan, tawicu kici tankan ye kta.

4 Yuhe cin he winohinca wan qu kinhan, qa cinca wica kaeš winyan kiciton kinhan, tawicu cinca ko yuhe cin tawaye kta, qa iye tašnana inape kta.

5 Tuka, Mayuhe cin waštewadaka, mitawin, micinca nakun, ikceya inawape kte šni, ookiye kin he katinyan eye cinhan,

6 Yuhe cin he wayaco ekta aye kta, qa tiyopa, kaeš tiyopa icahda tosu kin ekta, qa tahinšpa wan on noge kin pahdoke kta, hecen owihanke wanin he okiye kta.

7 Unkan wicašta wan iye cunwintku wiciyanna on wiyope kiye cinhan, he hokšipidan tankan yapi kin he iyecen tankan inape kte šni.

8 Yuhe cin he wokihpe šni, qa šicedake cinhan he opekiton wicakiye kta, wanna he hnayan, heon wiyopekiye ca oyate tokeca qu kta okihi šni.

9 Qa iye cinhintku on he wokihpe cinhan, cunwintku yapi woyaco kin he iyecen ecakicon kta.

10 Winohinca tokeca yuza ešta tado tawa, qa wokoyake tawa qa kici un kin he ekiciyaku kte šni.

11 Qa hena yamni ecakicon šni kinhan, mazaska wanica ikceya inape kta.

12 Tuwe wicašta wan apa, unkan te cinhan, awicakehan te yapi kta.

13 Unkan tuwe he kuwa šni unkanš, tuka nape ekta Wakantanka hiyukiye cinhan, oyanke wan ociciyake kta hen inape kta

14 Tuka tuwe takodaku kte kta e hnayan kicah kuwa kinhan, owayušna mitawa ešta etanhan ktepi kta e iyacu kta.

15 Unkan tuwe iye atkuku kaeš hunku ape cinhan awicakehan te yapi kta.

16 Unkan tuwe wicašta wan manun qa wiyope ye cinhan, qais yuha iyeyapi kinhan te yapi kta.

17 Unkan tuwe atkuku qais hunku ihakta šni kinhan awicakehan te yapi kta.

18 Unkan wicašta nom akinicapi qa wanji tawašitku inyan on, kaeš nape hdupsunka on ape cinhan, unkan te šni tuka hinhpaya makan wanka.

19 Najin,qa sagye kiton tankan mani kinhan, tuwe he ape cin he te kte šni; tuka okizi yapi kajuju kta, qa nakun makan wanke cin on.

20 Unkan wicašta wan tahokšidan, qais wiciyanna tawa canšakadan on ape cinhan, qa nape kin ihukuya te cinhan, katinyan tokiconpi kta.

21 Tuka anpetu wanji, qais nonpa can najin kinhan, tokiconpi kte šni, he mazaska tawa nakaš.

22 Unkan wicašta nom akicipapi qa winohinca ihdušaka wan kiuniyanpi kinhan, unkan cinca hiyu tuka taku šica sanpa ope šni kinhan, mazaska on kajuju kiyapi kta, token winohinca hihnaku eye ca wayaco konzapi kin he qu kta.

23 Tuka taku šica ope cinhan wiconi on wiconi yaqu kta,

24 Išta on išta, hi on hi, nape on nape, šiha on šiha,

25 Guyapi on guyapi kta, capapi on capapi kta, apapi on apapi kta.

26 Unkan wicašta wan tahokšidan išta kin, kaeš tawiciyanna ista kin apa, unkan kpe cinhan, išta kin on ikceya kiyuske kta.

27 Qa tahokšidan hi wan kaeš tawiciyanna hi wan kapsun kinhan, hi kin on ikceya kiyuske kta.

28 Unkan ox wan wicašta kaeš winohinca capa, unkan te cinhan, ox inyan on kininpi kta, qa cehpi kin yutapi kte šni; tuka yuhe cin takudan ecakiconpi kte šni.

29 Tuka he itokam ox kin he wacapa, qa yuhe cin okiyakapi ešta, he hdaske šni kinhan, ox wicašta kaeš winohinca te kiye cinhan. inyan on kininpi kta, qa yuhe cin nakun te yapi kta.

30 Mazaska on kajuju sipi kinhan token nagi kin on kajuju sipi kin owasin qu kta.

31 Cinca wica kaeš winyan cape cinhan, woyaco kin de iyecen ecakiconpi kta.

32 Ox kin hokšidan, kaeš wiciyanna cape cinhan, wicayuhe cin mazaska wikcemna yamni kicu kta, qa ox inyan on ktepi kta.

33 Unkan wicašta wan woha wan yuhdoke cinhan, kaeš woha wan qe ca akahpe kiton šni kinhan, unkan ox wan, qais šuktanka šonšonna wan he oiyohpaye cinhan,

34 Woha tawa kin kajuju kta, qa yuhe cin mazaska qu kta, qa taku te cin he tawa kta.

35 Unkan wicašta wan ox tawa tawašitku ox tawa kiunni on te cinhan, ox ni kin he wiyope kiyapi kta, qa mazaska kin yuakipam icupi kta, qa te cin nakun cokaya kibaspapi kta.

36 Tuka ox kin wacapa he itokam sdonyapi ešta, yuhe cin he hdaske šni kinhan, yuhe cin ox te cin on ox wan qu kte ca te cin he tawaye kta.

HDAPAPI WICOWOYAKE 22.

1 Wicašta wan ox kaeš tahcaska manun kinhan, qa he pata kaeš wiyope ye cinhan, ox zaptan, ox wanjidan on kicu kta, qa tahcaska topa tahcaska wanjidan on.

2 Wamanun wan tipi kahdokahan iyeyapi, qa apapi on ta ešta he on wevapi wanice kta,

3 Wi kin iyoyam ye cinhan wokajuju on kajuju kiyapi kte, takudan yuhe šni ešta, womanun kin on wiyope kiyapi kta tuka, heon tuwe he kte kinhan we yapi kta.

4 Taku manun kin he niyake nape kin ohna iyeyapi kinhan, ox, šuktanka šonšonna, tahcaska ešta, wanjidan on nonpa hdajuju kta.

5 Wicašta wan taku wihan ye kte cin tokan tamaga, kaeš tahastanhanka iyuwi oju kin en iyaye ye ca maga kaeš hastanhanka iyuwi oju kin temye cinhan, iye tamaga wašte qa hastanhanka iyuwi wašte kin on hdajuju kta.

6 Cetipi qa tinta ideyapi, qa peji paha, kaeš aguyapi basdapi šni, kaeš maga wan huhnage cinhan he hdajuju kta.

7 Wicašta wan tawašitku kin mazaska kaeš wakšica kicihnake kta e qu kinhan qa tipi tawa etanhan manunpi kinhan wamanun iyeya kinhan nonpa akihde hdajuju kta.

8 Wamanun kin iyeyapi šni kinhan, tipi yuhe cin he tawašitku woyuha tawa ekta nape yekiye šni woyuha ekta ohdag kiyapi kta.

9 Taku akinicapi owasin on, ox on, šuktanka šonšonna on, tahcaska on, wokoyake on, taku kašta tuwe tawa tanin šni akinicapi kinhan, napin woyacopi kin ekta ohdag wicakiyapi kta, qa tuwe woyacopi kin yašicapi kinhan tawašitku nonpa akihde kicu kta.

10 Wicašta wan tawašitku šuktanka šonšonna, kaeš ox, kaeš tahcaska wanuyanpi, taku kašta awanyake kta e qu kinhan, unkan te cinhan, qais tuwedan wanyake šni kiunniyanpi, qaiš tokan kahapapi kinhan;

11 Tawašitku taku tawa kin ekta nape kin yekiye šni, Jehovah namahon keya ohduke kta, hecen tawa qon he iyowin kiye kta, unkan kajuju kte šni.

12 Tuka manunpi kinhan tawa qon taku iyehantu kicu kta.

13 Yandecapi kinhan onspa yahdecapi yuotanin kta e ahi kta, qa hecen yahdecapi on takudan kicu kte šni.

14 Unkan wicašta wan takodaku etanhan taku odote, qa tawa kin kici un šni icunhan kiunniyanpi, kaeš te cinhan wokajuju kicu kta.

15 Tawa kin kici un kinhan kajuju kte šni, opeton odote cinhan iyuwin kin he on u ce.

16 Wicašta wan hokšiwinna wan wahoye kuns okiye ca kici wanke cinhan tawicu kta e awicakehan wicakicida kta.

17 Tuka wikoška atkuku kin kicu kta e katinyan tehinda kinhan, wikoška wohpapi kin he iyecen mazaska qu kte.

18 Wicahmugesa niyakiye kte šni.

19 Tuwe woteca wan kici wanke cinhan katinyan ktepi kta.

20 Jehovah heceedan wakiyušnapi kta, qa tuwe taku wakan tokeca wan wakiyušna kinhan ocowasin ihangyapi kte.

21 Tuwe oyate tokeca nici ounye cinhan iyokisin yaye kte šni, qa yakiduse kte šni, nakaš ni Egypta makoce kin ohna oyate tokeca ounyayapi.

22 Wiwazica qa wamdenica wanjidan dušicapi kte šni.

23 He dušice unkan hoye makiye cinhan ho kin nahon manke kta ce.

24 Qa mitocanniye ideye kta, qa canhpi on ciktepi kta, hecen nitawinpi wiwazicapi kta, qa nicinca wamdenicapi kta.

25 Oyate mitawa tuwe onšika nici un kin mazaska oyaqu kinhan, wayahtakeša iyecen ecayecon kte šni, woyahtake yakidake kte šni.

26 Nitakoda taku oyaqu nicicajuju kta e tašina iyacu kinhan tohan wi iyaye cinhan yecu kta.

27 Tašina uka kin hee, taku hdowin kta heceedan kinhan, taku ohna istinbe kta he? hecen hoye makiye cinhan nawahon kta; wacantkiya waun ce.

28 Taku wakan dušice kte šni, qa oyate nitawaitancan kinihnuhan wahte yada šni kinhan.

29 Nicinkši tokapa kin mayaqu kte; ca taku icah yaye tokaheya suton kin woyute woyatke ko mayaqu dutehan kte šni.

30 He iyecen tayanka wosdohan nitawa qa tahcaska nitawa kin ecayecon kte; anpetu šakowin hunku kici yanke kte ca išahdogan can hehan mayaqu kta.

31 Wicašta wakan mitawa kin yaunpi kta, heon taku tinta ekta yahdecapi kin he yatapi kte šni, he sunka ekta ehpe yayapi kta.

HDNAPAPI WICOWOYAKE 23.

1 Taku ecinkta oyakapi kin iyacu kte šni, qa itonšniyan wadaatanm kta e wicašta šica nape duze kte šni.

2 Wicota taku šica econpi owicayape kte šni, qa takuakinicapi en wicota yaskopapi ešta yaskope kta e awicadupte kte šni.

3 Nakun wicašta wahpanica toakinice kin en duonihan kte šni.

4 Tuwe niciyuse ox tawa, kaeš tasunke šonšonna nuni kin ayakipe cinhan, he ekta hdiyakiye kta.

5 Tuwe šicemdake tasunka šonšonna tawaqin ihukuya makata wanka wandake cinhan duske kta yakapin ešta kici duške kta.

6 Wicašta wahpanica nici un: kin toakinice kin en woyaco dapemni kte šni.

7 Wicoie itonšni etanhan ihdutehan wo, ihnuhan wicašta owotanna qa tuwe taku šica econ i šni yakte kinhan nakaš tuwe: šice cin he mdaowotaiina kte šni.

8 Taku ituhanpi kin iyacu kte i šni; Nakaš taku ituhanpi tona išta mdezapi kin hena ištagonge wicaye ca ohan owotanpidan ešta oiepi kin wicakiyupemni.

9 Egypta makoce kin ohna ounyayapi qon, heon wicašta oyate tokeca ohna ounyanpi cantepi kin sdonyayapi, qa tuwe oyate tokeca yakiduse kte šni.

10 Waniyetu šakpe makoce nitawa woyaju kte ca taku aicage cin mnayaye kta.

11 Tuka išakowin kin he adusj tan kte ca ehpe yaye kta, hecen oyate nitawa tona onšika he yutapi kta, unkan taku ihe cin tinta warnanica kin yutapi kta; hastanhanka iyuwi nitawa qa wihdi can nitawa kin nakun he iyecen ecayecon kta ce.

12 Anpetu šakpe nitohtani ecannon kte ca anpetu išakowin kin en oziniciye kta ce, hecen ox nitawa qa nitasunke šonšonna okihpe kta; qa nitawiciyanna cinca, qa tuwe oyate tokeca nakun magaga iciye kta.

13 Taku eciciyapi kin owasin en ikpatan po, qa taku wakan tokeca caje kin he kiksuye yakiye kte šni nii kin etanhan tuwedan he nahon kte šni.

14 Mdoketu eca yamni akihde womiyecihe ece kta.

15 Aguyapi napohye codan wohanpi yapatanpi kta, (Abib wi, kin he en Egypta etanhan yahdinape, heon etanhan iyehantu eca anpetu šakowin aguyapi napohye codan yatapi ece kta, econ cišipi kin he iyecen, qa wošna codan tuwedan mitokam wanyakapi kte šni:)

16 Nakun basdapi wohanpi kin nitohtani taku maga ohna oyaju tokaheya icage cin hee, qa wamnayanpi wohanpi kin omaka owihanketa, nitohtani kin maga etanhan mnayaye cin iyehantu eca.

17 Mdoketu eca, yamni akihde tona wica owasin Jehovah itancan kin itokam nihdutaninpi ece kta.

18 Taku wamayakidušna we kin aguyapi napohyapi kici mayaqu kte šni, qa wohanpi mitawa wasin kin ihanhanna kin hehanyan ihe kte šni.

19 Maga nitawa taku tokaheya aicage cin he Jehovah wakanyada tipi kin en ayahi ece kta. Hekinškayapi cinca kin he hunku asanpi kin ohna oyahe kte šni.

20 Inyun, miš Ohnihde wan nitokam ye waši he canku ohna awanniyake ca oyanke wiyeya cicihnake cin he ekta aniye kta.

21 Ite kin awacin wo, qa ho kin nahon wo, ihnuhan yakipajin kin, wayahtanipi kin tokan aniyanpi kte šni, nakaš he cokaya micaje yanka.

22 Tuka awicakehan ho kin anayagoptan, qa taku eciciye cin owasin ecen ecannon kinhan tona toka niyanpi kin owasin toka waye kta, qa tona nicipajinpi kin hena wicawakipajin kta.

23 Mitaohnihde nitokam ye kta, qa Amori kin, qa Hitti kin, qa Perizzi kin, qa Caanani kin, qa Hivi kin, qa Jebusi kin ekta aniye kta, qa awihnuni wicawaye kta ce.  

24 Hena taku wakan dapi kin ekta yapatuje kte šni, qa ohoyada kte šni, qa token econpi kin he iyecen ecannon kte šni; tuka tawakagapi kin yakawanke kta, qa ocowasin yakamdemdece kte ce.

25 Tuka Jehovah wakan yadapi kin he oyecipapi kte, hecen aguyapi nitawapi kin he yawašte kta qa mini nitawa kin nakun, qa nicokayatanhan wowayazan mdutokan kta.

26 Qa makoce nitawa kin ohna takudan okaškan ton kte šni, qa cinca nica yuke kte šni, anpetu nitawa oyawa kin ojuwaye kta.

27 Qa wokokipe mitawa kin nitokam yewaye ca oyate ekta wicaya i kte cin owasin yusinye wicawaye kta, qa tona toka niyanpi kin owasin tahupi kin cicu kta.

28 Unkan tuhmaga nitokam yewaye kta, unkan hena Hivi kin, Caanani kin, qa Hitti kin nitokapa tanhan wicakahapapi kta.

29 Waniyetu wanjidan en ham wicawaye kte šni, okini makoce kin hewoskantu kta, qa wamanica ota kta niyepi ehna.

30 Tonana qa hehan tonana nitokapatanhan ham wicawaye kta, ecen nihduota, qa makoce kin tawayaye kta.

31 Qa Mdeša etanhan Philisti tamde kin aiyahdeya, qa hopuze cin etanhan wakpa kin ekta, hehanyan makoce kin cicu kta, nakaš makoce kin he tona ounyanpi kin hena ninape en waqu kta; unkan nitokapatanhan ham wicayaye kta.

32 Hena om, qa taku wakandapi om wicotakuye yakage kte šni.

33 Makoce nitawa kin en ounyanpi kte šni, okini miye en wahtani niyanpi kta. Taku wakandapi kin oyakiye cinhan he nihmunke kta.

HDNAPAPI WICOWOYAKE 24.

1 Unkan Moses heciya, Jehovah ekta itanwankanhdeya u wo, niš qa Aaron, Nadab qa Abihu, qa Israel hunkayapi kin wikcemna šakowin , qa itehanyan yapatujapi kte.

2 Qa Moses išnana Jehovah ikiyedan hi kta, tuka hena ikiyedan hipi kte šni; nakun iye kici oyate kin itanwankanhdeya upi kte šni.

3 Unkan Moses ekta hda, qa Jehovah oie kin owasin, qa woyaco kin owasin oyate kin owicakiyaka; unkan oyate kin owasin ayuptapi, qa ho wanjidan heyapi; wicoie owasin Jehovah eye cin ecen econkupi kte ce.

4 Unkan Moses Jehovah oie km owasin owa, qa hanhanna najin kikta, qa wahna wošnapi wan paha ihukuya ehde, qa inyan wokiksuye wikcemna sanpa nonpa Israel wicoun akenonpa on;

5 Qa Israel cinca kin etanhan koška ye wicaši, unkan wohuhnahyapi riuhnahyapi, qa oxen wopida wošna Jehovah wa kiyušnapi.

6 Unkan Moses we kin hanke rnaza wakšica ohna icu, qa we kin hanke wahna wošnapi akan ehpeya.

7 Qa wicotakuye wowapi kin icu, qa yawa oyate nogepi kin ohna; unkan, Taku Jehovah eye cin owasin ohinniyan ecen econkupi kta, eyapi.

8 Unkan Moses we kin icu qa oyate kin awicamnimni, qa, Inyun wicoie kin dena on Jehovah wicotakuye nicicagapi we kin dee ce, eya.

9 Hehan Moses qa Aaron, Nadab qa Abihu, qa Israel hunkayapi kin etanban wikcemna šakowin itanwankanhdeya yapi.

10 Qa Israel Wakantanka kin wanyakapi, unkan siha kin ihukuya Sapphire inyan kamdayapi qa owanka kagapi kin iyecen, qa mahpiya hinca kamdeza kin he iyecen.

11 Qa Israel cinca otancanke kin Wakantanka wanyakapi, qa wotapi qa wayatkanpi, tuka nape kin awicahnake šni.

12 Unkan Jehovah Moses heciya, Itanwankanhdeya kuwa, he kin ekta, miye en, qa hen yanka wo, qa onspe wicayakiye kta e inyan mdaska qa woope woahope akan owawa kin hena cicu kta ce.

13 Unkan Moses najin, taokiye Jošua kici, qa Moses Wakantanka paha tawa kin ekta itanwankanhdeya iyaya.

14 Qa hunkayapi kin hewicakiya, Deciya unkapepo, niyepi en unhdipi kte kin hehanyan,, qa iho po, Aaron qa Hur niyepi: om unpi, qa tuwe taku akinice cinhan hena en hi kte ce.

15 Qa Moses itanwankanhdeya paha akan i, qa mahpiya šoka kin paha kin akahpa.

16 Unkan Jehovah towitan kin Sinai paha akan owanji yanka, qa anpetu šakpe kin hehanyan mahpiya šoka kin paha akahpa, qa anpetu išakowin kin hehan mahpiya šoka cokayatanhan Moses kipan.

17 Unkan Israel cinca kin Jehovah towitan kin peta wahuhnahye cin he iyecen he ipa akan wanyakapi.

18 Unkan Moses mahpiya šoka cokaya i, qa he kin akan i, qa Moses anpetu wikcemna topa, qa hanyetu wikcemna topa he kin ohna yanka.

 HDNAPAPI WICOWOYAKE 25.

1 Unkan Jehovah Moses okiye ca heya;

2 Taku ituhanpi kte cin he makahipi kta e Israel cinca kin hewicakiya wo, wicašta tona cante kin iyopaštake cin hena owasin taku itumakihanpi kin he iyacupi kta.

3 Qa hena etanhan taku ituhanpi iyacupi kte cin dee; mazaskazi, qa mazaska, qa mazasa;

4 Qa to, qa stan, qa duta, qa minihuha ska, qa hekinškayapi hin,

5 Qa tahcaska mdoka ha šayapi, qa hoka ha, qa šittim can;

 6 Wihdi petijanjan on, qa taku waštemna wihdi sdawicayapi on kagapi kin heon, qa izin yapi km on.

 7 Inyan wicašake iyececa, qa inyan amdo akahpe, qa maku akahpe otaspuyapi.

8 Unkan tipi wakan wan micagapi kta, hecen wicacokaya ounwaye kta.

9 Wakeya okagapi kin, qa taku wo winyunyanpi owasin okagapi kin hena wanyag ciciye cin owasin, he iyecen yakage kta.

10 Qa can wohnaka wan micagapi kta, šittim can kin on, wicišpa nom sanpa hanke ohanske cin, qa wicišpa sanpa hanke ohdakinyan kin, qa obosdatu kin wicišpa sanpa hanke.

11 Qa mazaskazi ecedan on ayapawinte kta, mahentanhan, akapatanhan koya ayapawinte kta, qa mazaskazi watešdake wan he akan ihdukšan yakage kte.

12 Qa mazaskazi napcupe topa oyecieaste kta, qa hena oise topa ekta ikoyag yaye kta, cuwi tokaheya ekta napcupe nonpa, qa cuwi inonpa ekta napcupe nonpa.

13 Unkan šittim can tosu nonpa yakage kte ca hena mazaskazi on ayapawinte kte.

14 Qa canwohnake akiyuhapi kta e tosu kin napcupe canwohnake cuwi ekta ikoyakapi km hena ohna iyeyaye kta.;

15 Qa tosu kin canwohnaka napcupe kin ohna yakonpi kta, hetanhan icupi kte šni.

16 Unkan woyaatanin cicu kte cin he canwohnaka kin en yehnake kta.

17 Qa wokajuju iha wan mazaskazi ecedan on yakage kta, wicišpa nonpa sanpa hanke ohanske cin, qa wicišpa wan sanpa hanke ohdakinyan kin.

 18 Qa Cherubim nonpa mazaskazi , pagopi on yakage kta, wokajuju iha ihanke nonpa etanhan hena yakage kta.

19 Hecen Cherub wanji wokajuju iha ihanke deciyatanhan kaga wo, qa Cerub unman ihanke unman eciyatanhan wokajuju iha kin hetanhan, ihanke anokatanhan akan Cherubim kin yakage kta.

20 Qa Cherubim hupahu wankan kamdah yakonpi kte, hupahupi km wokajuju iha kin akahpa unpi kta, qa itepi kin napin unman ektakiya kta; Cherubim itepi kin wokajaju iha kin ektakiya tonwanpi kta.

 21 Qa woyaatanin cicu kte cin he canwohnake mahen oyakihnake kta, qa he iwankam canwohnaka akan wokajuju iha kin eyahnake kte.

22 Qa hen itkocicipe kte ca wokajuju iha kin iwankapatanhan Cherubim nonpa woyaatanin canwohnaka akan unpi kin hena cokayatanhan ociciye kte, taku Israel cinca kin owicakiyag cisi kte cin owasin.

 23 Qa šittim can wahna wotapi wan yakage kta, wicišpa nora ohanske cin, qa wicišpa wanjidan ohdakinyan kin, qa obosdatu kin wicišpa sanpa hanke.

24 Qa he mazaskazi ecedan on ayapawinte kte, qa ihdukšan mazaskazi watešdake wan yecage kta.

25 Qa he ihdukšan iyuskite nape hdakinyan yecage kta, qa: iyuskite kin ihdukšan mazaskazi ecedan watešdake wan yecage kta.

 26 Qa mazaskazi napcupe topa he yecage kta qa šiha topa kin itepi topa kin akan napcupe kin ikoyag yaye kta.

27 Wahna wotapi akiyuhapi kta e mazanapcupe kin tosu icupi kta on iyuskite iyotakonš unpi kta.

28 Qa tosu kin šittim can on yakage kte ca mazaskazi on ayapawinte kta, hena on wahna wotapi kin akiyuhapi kte.

29 Qa wahna wotapi kin wakšica, qa tukiha, qa wiyatke, qa cega, hena owasin yecage kta, on wakanyan okaštanpi, qa mazaskazi ecedan on hena yakage kta.

 30 Qa wahna wotapi kin akan aguyapi itokam hnakapi eyahnake kta, mitokam ohinniyan un kte.

31 Unkan mazaskazi ecedan petijanjan ihupa wan yakage kta. pagopi he yakage kta, ceca kin, qa adetka kin, qa tawakšica kin, qa psonka kin, qa wahca kin.

32 Qa petijanjan ihupa cuwi etanhan adetka šakpe inanpe kta, adetka yamni cuwi wanji etanhan, qa adetka yamni petij janjan cuwi unman kin eciyatanhan.

33 Wakšica yamni hma iyececa, psonka wan, qa wahca wan kicica adetka wanjidan en, qa wakšica yamni mna iyececa, qa psonka wan qa wahca wan adetka unman en, adetka šakpe petijanjan ihupa etanhan inanpe cin owasin hececa kta.

34 Qa petijanjan ihupa kin en wakšica topa uma iyececa, otoiyohi psonka wan qa wahca wan kicica kta.

35 Qa psonka wan adetka nonpa ihukuya, qa ake psonka wan adetka nonpa ihu kuya, qa psonka wan adetka nonpa ihukuya, adetka šakpe petijanjan ihupa etanhan inanpe cin owasin hececa kta.

36 Petijanjan ihupa psonka tawa, qa adetka tawa kin, okonwanjidan kta, mazaskazi ecedan onspa wanjidan pagopi on owasin kagapi kta.

 37 Unkan petijanjan šakowin yecage kta,qa akan petijanjan ehnakapi kta, qa he itokapatanhan iyoyam ye kta.

38 Qa petijanjan iyukse, qa ohna cahota icupi mazaskazi ecedan.

39 He qa on kicanyanpi kin hena owasin mazaskazi ecedan woqin wanjidan on kagapi kta.

40 Qa waktaya wo owasin okagapi paha en wandake cin he iyecen kaga wo.

HDNAPAPI WICOWOYAKE 26.

1 Unkan tipi kin ozanpi wikcemna minihuha ska nonpa kahmupi, to, qa štan, qa duta Cherubim kazuntapi hecen yakage kte.

 2 Ozanpi wanji ohanske cin wicišpa wikcernna nonpa sanpa šahdogan, qa ohdakinyan kin wicišpa topa, ozanpi owasin otoiyohi hinskokeca kta.

3 Ozanpi zaptan icikoyag yapi kte, qa ozanpi zaptan icikoyag yapi kta,

4 Qa icikoyag yapi kta e ozanpi tokaheya opapun kin en sunjoyake to yakage kta, apahdate ekta, qa ozanpi inonpa ihanke opapun icikoyag yapi en hecen yakage kta.

 5 Sunjoyake wikcemna zaptan ozanpi tokaheya en yakage kta, qa icikoyag yapi kin ekta sunjoyake wikcemna zaptan ozanpi inonpa opapun en yakage kta, sunjoyake iyotakonzapi kta, wanji unman ekta.

 6 Unkan mazaskazi taspu wikcemna zaptan yakage kta, qa maza taspu kin on ozanpi kin icikoyag yaye kte, hecen wakeya wanjidan kte.

7 Unkan hekinškayapi hin ozanpi wakeya kin yecage kte, tipi kin iwankam: ozanpi kin ake wanji yakage kte.

 8 Ozanpi wanji ohanske cin wicišpa wikcemna yamni, qa ohdakinyan kin wicišpa topa; ozanpi akewanji owasin iakedececa hinskokeca kte.

9 Qa ozanpi zaptan yuwitaya icikoyag yaye kte, qa ozanpi šakpe icikoyag yaye kta, qa ozanpi išakpa kin wakeya tiyopa kin iwankam yape han kte.

10 Qa icikoyag yapi kta e ozanpi opapun ihanke kin en sunjoyake wikcemna zaptan yakage kte, qa ozanpi inonpa opapun en ikoyagyapi kta e sunjoyake wikcemna zaptan.

11 Qa mazasa taspu wikcemna zaptan yakage kte, qa mazataspu kin sunjoyake ohna yeyaye kte, hecen wakeya kin icikoyag yaye kte, qa wanjidan kte.

12 Qa wakeya ozanpi etanhan taku ihe cin he ozanpi wan hanke iyaye cin he tipi kin ihektam okazeze he kta.

13 Qa wakeya anokatanhan ozanpi ohanske cin wicišpa wanji  iyaye cin he tipi cuwi anokatanhan okazeze he kta.

14 Unkan tahcaska mdoka wanunyanpi ha sayapi woakahpe wakeya kin yecage kta, qa akapatanhan hoka ha woakahpe wan.

15 Unkan šittim can canmdaška bosdan unpi kta tipi kin yecage kta.

 16 Canmdaška otoiyohi ohanske cin wicišpa wikcemna, qa ohdakinyan kin wicišpa sanpa hanke.

 17 Qa canmdaška wanji nape nonpa yecage kta, on icikoyag yapi kte; tipi canmdaška kin owasin hecen yecage kta.

18 Qa tipi on canmdaška kin hecen yecage kta, canmdaška wikcemna nonpa itokaga cuwi kin on, wiyotanhan ektakiya.

19 Qa mazaska sicu wikcemna tom canmdaška wikcemna nonpa ihukuya yakage kta, canmdaška wanji nape nonpa kin on maza sicu nonpa, canmdaška wanji ihukuya, canmdaška otoiyohi on hecen maza sicu nonpa kta.

20 Qa tipi cuwi inonpa on waziyatakiya canmdaška wikcemna nonpa kta,

 21 Qa mazaska sicu wikcemna topa; canmdaška wanji ihukuya sicu nonpa, qa canmdaška iyokihe ihukuya sicu nonpa kta.

 22 Qa tipi catku wiyohpeyata ektakiya canmdaška šakpe yecage kta.

 23 Qa tipi catku kahmin nonpa kin on canmdaška nonpa yecage kta.

24 Qa napin iakedececapi kta, ihukuyatanhan, qa napin otoiyohi pa kin ekta maza napcupe tokaheya en ikoyag yapi kte kahmin nonpa kin on hena nonpa okonwanjidan kta.

 25 Hecen canmdaška kin šahdogan kta.qa maza sicu kin ake sak pe, maza sicu nonpa canmdaška wanjidan ihukuya, qa maza sicu nonpa canmdaška wanjidan ihukuya.

26 Qa šittim canhdakinyan yakage kta, zaptan tipi onnaptan tokaheya canmdaška kin on.

27 Qa canhdakinyan zaptan tipi onnaptan inonpa canmdaška on, qa canhdakinyan zaptan tipi ihanke wiyohpeyata ektakiya catkuta canmdaška on.

28 Qa canhdakinyan cokaya kin canmdaška cokaya ohnaiyaye kta, ihanke wanji etanhan ihanke unman ekta iyohi ye kta.

 29 Qa canmdaška kin mazaskazi ayapawinte kta, qa mazaskazi napcupe yecage kta, qa hena ohna canhdakinyan iyaye kta, qa canhdakinyan kin mazaskazi ayapawinte kta.

30 Qa tipi kin eyahde kta, he en okagapi kin wanyag niyanpi kin he iyecen.

31 Unkan cokaya ozanpi wan yakage kte, minihuha ska nonpa kahmupi, qa to qa štan, qa duta kazuntapi, cherubim akan kazuntapi kte.

32 Unkan mazaska sicu topa akan sitim can ipatan torn mazaskazi apawintapi qa mazaskazi yuksanpi tom akan cokaya ozanpi otkeyaye kte.

33 Qa cokaya ozanpi kin maza yuksanpi kin ihukuya otkeyaye kta, qa cokaya ozanpi kin he mahen woyaatanin can wohnake kin ade kta, qa niyepi on cokaya ozanpi kin tipi wakan qa wakan hinca otahedan yukinukan kta.

34 Qa wokajuju iha kin woyaatanin can wohnake akan eyahnake kta, tipi wakanhinca mahen.

35 Qa wahna wotapi kin he cokaya ozanpi kin itankan eyahde kta, qa petijanjan ihupa kin wahna wotapi iyotakonš, tipi cuwi itokaga ekta, qa wahna wotapi kin cuwi waziyata kin ekta eyahnake kta.

36 Qa wakeya tiyopa woakahpe wan yecage kta, minihuha ska nonpa kahmupi, to qa štan qa duta hdehdega ipatapi.

37 Unkan sitim can ipatan zaptan woakahpe kin yecage kta, qa hena mazaskazi ayapawinte kta, qa yuksanpi kin mazaskazi kta, qa hena on mazasa sicu zaptan sdoyakiye kte.

HDNAPAPI WICOWOYAKE 27.

1 Unkan owayušna wan šittim can on yakage kte, ohanske cin wicišpa zaptan, qa ohdakinyan kin wicišpa zaptan; owayušna topa omdoton kta; qa obosdata kin wicišpa yamni kta.

2 Qa oise topa kin akan he yakage kta, he kin owayušna en ikoyakapi kta, qa owayušna ocowasin mazasa ayapawinte kte.

3 Qa cahota wakšica yecage kta, qa maza mdaska qa wakšica on amnimnipi, qa mazajata, qa mazaoceti kin hena owasin mazasa on yakage kta.

 4 Qa mazasa oceti wan ho kagapi iyececa, owayušna kin yecage kta, qa oceti kin akan mazasa napcupe topa oise topa kin akan.

5 Qa owayušna opapun kin ihukuya oceti kin otkeyaye kta, qa owayušna cokaya kin iyohi kta.

 6 Qa šittim can tosu nonpa owayušna kin yecage kta, qa tosu kin mazasa ayapawinte kte.

7 Qa tosu kin mazanapcupe ohna yeyaye kta, qa tosu kin owayušna cuwi napin akan unpi kta, hena on akiyuhapi kta.

8 Canmdaška on yakage kta hdogeca, paha akan okagapi kin wanyag niyanpi kin he iyecen he kagapi kte.

9 Unkan tipi tahocoka kin yakage kta, cuwi itokaga wiyotanhan ektakiya hocoka cuwi wanjidan on ozanpi wan mininuha ska nonpa kahmupi ohanske cin wicišpa opawinge kta.

10 Qa mazasa ipatan kin wikcemna nonpa, qa mazasa sicu kin wikcemna nonpa, qa ipatan yuksanpi kin, qa icikoyag yapi kin hena mazaska on kagapi kta.

11 He iyecen waziyata cuwi on ozanpi ohanske cin wicišpa opawinge, qa mazasa ipatan kin wikcemna nonpa, qa mazasa sicu kin wikcemna nonpa, ipatan maza yuksanpi kin, qa icikoyag yapi kin hena maza ska kta.

12 Qa hocoka hdakinyan wiyohpeyata ihanke on ozanpi kin wicišpa wikcemna zaptan, ipatan wikcemna, qa sicu wikcemna.

 13 Qa ihanke wihinanpe ektakiya tiyopata hocoka hdakinyan kin wicišpa wikcemna zaptan kta.

14 Qa hiyete wanji on ozanpi kin wicišpa akezaptan, ipatan; kin yamni qa sicu kin yamni.

15 Qa hiyete unman kin on ozanpi akezaptan, ipatan kin yamni, qa sicu kin yamni kta.

16 Qa hocoka tiyopa akahpe kin minihuha ska nonpa kahj mupi, to qa stan, qa duta ipatapi, wicišpa wikcemna nonpa, qa ipatan topa, qa sicu topa.

17 Ipatan owasin hocoka ihdukšan mazaska on ikoyag yapi kta, qa yuksanpi kin hena mazaska kta, qa tasicu kin mazasa kta.

18 Hocoka ohanske cin wicišpa opawinge, qa anog ihanke ohdakinyan kin wicišpa wikcemna  zaptan, qa obosdatu kin wicišpa zaptan, anog ihanke ozanpi kin minihuha ska nonpa kahmupi, qa sicu kin mazasa kta.

19 Tipi wakšica kin owasin on kicanyanpi, qa wihutipaspe kin owasin, qa hocoka wihutipaspe kin owasin mazasa kta.

20 Unkan Israel cinca kin can ihdi bopanpi heceedan nicahi wicayasi kta, petijanjan on, hecen ohinniyan ideye kta.

21 Aaron qa iye cinca kin itkokipapi wakeya kin ohna, cokaya ozanpi kin woyaatanin itokam yanke cin, he itankan petijanjan kin kicanyanpi kta ece, htayetu etanhan ihanhanna aiyahdeya Jehovah itokam, Israel cinca kin wicoicage yeye cin, wicoope kin de ohinniyan yuhapi kta.

HDNAPAPI WICOWOYAKE 28.

 1 Unkan niš Israel cinca cokayatanhan nicinye Aaron iye cinca om nikiyedan hiyu wicayakiye kte, wayušnapi ece omakiyapi kte, Aaron qa iye cinca Nadab qa Abihu, Eleazer qa Ithamar.

2 Qa wokoyake wakan wowitan on owanyag wašte hinca nicinye Aaron yecage kte.

3 Qa tona cante ksapapi woniya ksapa ojun wicawaye cin owasin Aaron yuwakanpi kte on wamiciyušna kta e wokoyake kicagapi kta, ewicayakiye kte.

4 Qa wokoyake kagapi kta dena ee; maku akahpe, qa amdo akahpe, qa nitoške, qa mahen unpi hdeskaška, paipahte, qa ipiyaka, hecen wokoyake wakan nicinye Aaron, qa iye cinca wicakicagapi kte; unkan wayušnapi ece omakiyapi kte.

5 Unkan mazaskazi kin, qa minihuha ska kin, qa to kin,qa štan kin, qa, duta kin hena icupi kta

 6 Qa amdo akahpe kin kagapi kta, mazaskazi qa minihuha ska nonpa kahmupi to qa štan qa duta kazuntapi kin he kagapi kta.

7 Hiyete icaške nonpa yuke kta, ihanke nonpa kin ekta hecen ikoyag yapi kta.

8 Qa amdo akahpe ipiyaka kin he akan un kin he iyecen mazaskazi qa minihuha ska qa to qa štan qa duta on kagapi kte.

9 Unkan inyan wicašake iyececa nonpa iyacu kta, qa hena akan Israel cinca cajepi kin yapago kta.

10 Cajepi kin šakpe inyan tokaheya kin akan, qa cajepi unman šakpe inyan inonpa kin akan, token icagapi kin he iyecen.

11 Inyan apagopi iyecen ipuspe akan owapi he iyecen, Israel cinhintku cajepi kin inyan nonpa kin akan apago kta, mazaskazi ozapi en taspuyapi kta e hena yakage kta.

12 Qa inyan nonpa kin amdo akahpe hiyete akan eyahnake kta, wokiksuye inyan Israel cinca on, qa wicakiksuye kta e Aaron iye hiyete anokatanhan akan cajepi Jehovah itokam yuha kta.

13 Qa mazaskazi ozapi yakage kta.

14 Qa mazaskazi hecedan maza icicahiha yuhmunpi nonpa yakage kta, kazuntapi qa maza icicahiha yuhmunpi kin ozapi kin ekta ikoyag yaye kta.

 15 Unkan woyaco inaku akahpe kin yakage kta, amdo akahpe kagapi kin he iyecen, mazaskazi qa minihuha ska nonpa kahmupi, to qa stan qa duta kazuntapi kin he yakage kte.

16 Topa omdoton kta, icitakihna, ohanske cin napapasdecapi, qa ohdakinyan kin napapasdecapi kta.

17 Qa inyan taspuyapi cankuye topa he ohna ojuyaye kta, sardius qa topaz qa petaga canku tokaheya kin hee kta.

18 Qa cankuye inonpa kin he emerald, qa sapphire, qa inyan paksa;

19 Qa canku iyamni kin he ligure, agate, qa amethyst;

20 Qa cankuye itopa kin beryl qa inyan wicasake iyececa, qa jasper, qa mazaskazi ozapi ohna hena taspuyapi kta.

21 Qa inyan kin hena Israel cinca akenonpa cajepi kin hena iyececa ipuspa pagopi kin he iyecen wicoun akenonpa cajepi kin otoiyohi akan pagopi kta.

 22 Qa maku akahpe kin akan mazaskazi ecedan ikan maza icicahiha yuhmunpi yakage kta.

23 Qa maku akahpe kin mazaskazi napcupe nonpa yecage kta, qa maza napcupe nonpa kin hena maku akahpe ihanke nonpa en koyag yaye kta.

24 Qa mazaskazi ikan nonpa kin maza napcupe nonpa maku akahpe oise nonpa akan unpi kin hena ohna iyeyaye kta.

25 Qa ikan nonpa ihanke nonpa ozanpi nonpa kin en koyag yaye kta, qa amdo akahpe hiyete kin akan itankan eyahnake kta.

26 Qa mazaskazi napcupe nonpa yakage kta, qa hena maku akahpe oise nonpa opapun en ikoyag yaye kta, amdo akahpe mahentuya iyotakonza.

27 Qa mazaskazi napcupe nonpa yakage kte amdo akahpe opapun nonpa kin ihukuya tanhan itokam en ikoyag yaye kta, icikoyagyapi lyotakons, maku akahpe ipiyaka kin iwankapatanhan.

28 Qa maku akahpe kin maza napcupe tawa kin on aindo akahpe napcupe kin en iyakaškapi kte, hahonta to wan on, hecen amdo akahpe ipiyaka kin akan yanke kta, qa maku akahpe kin amdo akahpe kin etanhan yukinukan kte šni.

 29 Unkan Aaron Israel cinhintku cajepi kin iye cante kin akan yuha kta, woynco maku akahpe ohna, tipi wakan en ya eca, Jehovah itokam ohinniyan wokiksuye kte.

30 Unkan iyoyamwicaye cin qa yustanwicakiye cin hena woyaco maku akahpe kin ekta ikoyag yaye kta, qa Aaron Jehovah itokam u eca hena cante kin akan yanke kta, hecen Aaron Israel cinca woyacopi kin iye cante kin akan ohinniyan Jehovah itokam yuha kta.

31 Unkan amdo akahpe nitoske kin ocowasin to yakage kta.

32 Qa he cokaya pa i kin yuke kta, qa i kin ihdukšan apahdate kazuntapi maku akahpe i kin iyececa kta, hecen nahdece kte šni.

33 Unkan upi akan taspan tanka seca, to qa štan qa duta yakage kta, opapun ihdukšan, qa mazaskazi hdahda hena otahedan.

34 Mazaskazi hdahda wan, qa taspan tanka seca wan, mazaskazi hdahda wan, qa taspan tanka seca wan, nitoške opapun akan ihdukšan.

35 Qa Aaron omakiye kta e he koyake kta, qa Jehovah itokam, tipi wakan en u eca,qa tankan inanpa eca he sna kin nahonpi kta, hecen te kte šni.

36 Qa mazaskazi ecedan mdaška wan yakage kta, qa ipuspe pagopi kin he iyecen, he akan JEHOVAH WAKAN DA WO, yapago kta.

37 Qa ikan to wan ikoyag yaye kta, hecen pa iyuskite akan un kta, pa iyuskite itokapatanhan kta.

38 Qa Aaron ite kin akan un kta, Israel cinca taku yuwakanpi, woqupi yuwakanpi kin hena owasin woahtani kin yuha kta, qa Jehovah iyokipi yapi kta e he ite kin akan ohinniyan yanke kta.

39 Unkan mahenunpi minihuha hdehdega yakazonte kta, qa minihuha ska pa iyuskite yakage kta, qa ipiyaka ipatapi yakage kta.

40 Unkan Aaron cinca kin mahenunpi wicayecage kta, qa ipiyaka wicayecage kta, qa wapaha, owanyag wašte qa wowitan on yakage kta.

41 Qa hena nicinye Aaron iye cinca kici koyag wicayaye kta, qa napepi kin ojudan wicayakiye kta, hecen wamiciyušnapi kta e wicayaduwakan kta.

42 Qa minihuha onzeoge wicayecage kta, on cehpi istecapi akahpapi kta, wicapakšin etanhan wicaceca ekta iyohiye kta.

43 Qa Aaron qa iye cinca kin hena koyakapi kta, itkokipapi wakeya ekta upi eca.qa tipi wakan ohna omakiyapi kta e owayušna ikiyedan upi eca, hecen woahtani yuhapi kte šni, qa tapi kte šni; iye, qa tona iye etanhan icagapi kte, wicoope kin he owihanke wanin yuhapi kte.

HDANAPAPI WICOWOYAKE 29.

1 Unkan wamiciyušnapi kta wicaduwakan kta e taku ecawicayecon kte cin dee, bullock wan, pte wanunyanpi cinca, qa tahcaska mdoka wanunyanpi nonpa owasin wašte icu wo.

2 Qa aguyapi napohye codan, qa aguyapi hmiyanyanna onapohye codan, wihdi icicahiyapi, qa aguyapi ceguguyapi napohyapi šni, wihdi on sdayapi; hena owasin aguyapi mdu on yakage kta.

3 Qa makanopiye wanjidan en oyahnake kta, qa hena makan opiyedan ohna, qa bullock kin, qa tahcaska mdoka nonpa kin ikiyedan awicayahi kta.

4 Qa itkokipapi wakeya tiyopa ikiyedan, Aaron qa iye cinca awicayahi kta, qa mini on wicadujaja kta.

5 Qa wokoyake kin iyacu kta, qa mahen unpi kin, qa amdo akahpe nitoske kin, qa amdo akahpe kin, qa niaku akahpe kin, hena owasin Aaron koyag yaye kta, qa amdo akahpe ipiyaka kin ipiyag yaye kta.

6 Qa pa iyuskite cin pa akan payahte kta, qa watešdake wakan kin pa iyuskite akan.

7 Qa wihdi on sdayapi kin he iyacu kta, qa pa akan yakaštan kta, hecen he sda yaye kta.

 8 Qa cinhintku kin ikiyedan awicayahi kta, qa mahenunpi kin koyag wicayaye kta.

 9 Qa ipiyake on ipiyag wicayaye kta, Aaron qa cinhintku, qa wapaha kin iyawicayakicaske kta, hecen wawayušna hecapi kta, wicoope owihanke wanin, hecen Aaron iye cinca ko napepi ojudan wjcayaye kte.

10 Qa bullock qon itkokipapi wakeya kin itokam ikiyedan ayahi kta, qa Aaron iye cinca koya napepi kin bullock pa kin akan aputakapi kta;

11 Qa bullock qon yakte kta, Jehovah itokam, itkokipapi wakeya tiyopa ekta.

12 Qa bullock we kin onge iyacu kta, qa owayušna he kin akan ehpe yaye kta, ninapsukaza on, qa we kin ocowasin owayušna sicu kin ekta oyakaštan kta.

13 Qa watejikšija kin ocowasin, qa pizi pi kin ikoyake cin he, qa pakšin nonpa kin wasin ikoyake cin iyahna, qa owayušna izin yaye kta.

14 Tuka bullock qon cehpi kin, qa ha kin, qa tacesdi kin owanka iheyata peta on huhnah yaye kta, woahtani wošna hee.

15 Unkan tahcaska mdoka tokaheya kin he iyacu kta, unkan Aaron qa iye cinca kin napepi kin tahcaska mdoka pa aputakapi kta.

16 Unkan niye tahcaska mdoka kin yakte kta, qa we kin iyacu kta, qa owayušna akan ihdukšan ehpeyaye kta.

17 Qa tahcaska mdoka kin yapate kta wobaspe iyececa, qa supe kin huha kin ko dujaja kta, qa hena wobaspe kin qa pa kin ekta eyahnake kta.

18 Qa tahcaska mdoka kin ocowasin on owayušna izin yaye kta. Jehovah wokicihuhnagapi wan hee; woomna wiciyokipi wan Jehovah kicagapi hee.

19 Unkan tahcaska mdoka inonpa kin iyacu kta, qa Aaron, qa iye cinca kin napepi kin tahcaska mdoka pa kin aputakapi kta.

20 Qa niš tahcaska mdoka kin yakte kta, qa we kin etanhan iyacu kta, qa Aaron noge inkpa akan, qa cinhintku nogepi inkpa akan eyahnake kta, etapa kin eciyatanhan, qa napepi etapa hunka akan qa sipahunkepi etapa akan, qa we kin owayušna akan ihduksan ehpe yaye kta.

21 Qa we owayušna akan un kin he etanhan iyacu kta, qa wihdi on sdawicayapi kin he etanhan, qa hena Aaron iyakiun kta, tawokoyake ko, qa cinhintku tawokoyakepi koya, hecen Aaron duwakan kta, qa tawokoyake, qa cinhintku tawokoyakepi koya.

22 Qa tahcaska mdoka etanhan wasin kin iyacu kta, qa sinte, qa watejikšija kin he, qa pi pizi kin, qa pakšin napin, qa wasin hena akan un kin, qa hiyete etapa kin, tahcaska mdoka wicayuštan kin hee.

 23 Qa aguyapi wanji, qa aguyapi hmiyanyanna wihdi icicahiyapi wanjidan, qa aguyapi ceguguyapi wanji aguyapi napohye codan makan opiye kin Jehovah itokam yanke cin hetanhan.

24 Qa hena owasin Aaron nape kin en eyahnake kta, qa cinhintku napepi kin en, apa Jehovah itokam hena yakoze kta, wokozapi wan hee.

25 Qa napepi kin etanhan hena iyacu kta, qa owayušna kin izin yaye kta, wohuhnanyapi woomna wiciyokipi Jehovah itokam, peta wošnapi wan Jehovah kicagapi hee.

26 Qa tahcaska mdoka Aaron on yuštanpi kin he maku kin iyacu kta, qa Jehovah itokam he yakoze kta, qa obaspe kin he nitawa kta.

27 Hecen tahcaska mdoka on Aaron ojunyapi, qa iye cinca nakun ojun wicayapi kin he maku kozapi qa hiyete yuwintapi, taku kozapi, qa taku yuwintapi kin he duwakan kta.

28 Qa he Aaron qa cinhintku tawapi kta, Israel cinca kin etanhan wicoope owihanke wanice kta, he yuwintapi heon Israel cinca wopida wošnapi etanhan he yuwintapi kta, Jehovah ekta yuwintapi kta.

29 Unkan wokoyake wakan Aaron tawa kin he cinhintku, iye iyohakam tawapi kta, hena ohna sdawicayapi kta, qa napepi kin ojun wicayapi kta.

30 Cinhintku etanhan tuwe heekiya wawayušna kta, qa tipi wakan ohna omakiye kta e itkokipapi wakeya ekta hi kinhan, anpetu šakowin hena koyake kta.

31 Unkan tahcaska mdoka ojunwicaye cin he iyacu kta, qa cehpi kin oyanke wakan kin ohna oyahe kta.

32 Unkan Aaron qa cinhintku tahcaska mdoka cehpi kin yutapi kte, aguyapi makan opiye ohna un kin he nakun, itkokipapi wakeya tiyopa kin ekta.

33 Taku on woakahpe kagapi napepi ojun wicayapi, wicayuwakanpi kte cin, hena yutapi kta, tuka tuwe tokeca hena yute kte šni, nakaeš hena wakan.

34 Unkan ojun wicayapi cehpi kin onge oyaptapi kinhan qai aguyapi kin onge ihunhanna hehanyan, taku oyaptapi kin he huhuah yaye kta hee wakan heon yutapi kte šni.

35 Unkan Aaron qa cinhintku hecen ecawicayecon kta, token econ ciši kin owasin iyecen, anpetu šakowin napepi kin ojun wicayaye kta.

36 Qa woakahpapi on anpetu otoiyohi bullock woahtani wošnapi yapate kta, hecen owayušna kin duteca kta, woakahpe akan yakage cin on, qa duwakan kta e sdayaye kta.

37 Anpetu šakowin owayušna on woakahpe yakage kta, qa he duwakan kta, hecen owayušna kin wakan hinca kta, taku kašta he yutan kinhan wakan kta.

38 Unkan owayušna akan taku wadusna kte cin dee; tahcaska cincapi waniyetu wanjidan, nonpa anpetu otoiyohi ohinniyan.

39 Hanhanna eca tahcaska cinca tokaheya yapate kta, qa tahcaska cinca inonpa kin ohtayetu otahedan yapate kta.

40 Qa tahcaska cinca wanji kici aguyapi mdu iyutapi iwikcemna, qa wihdi bopanpi hin itopa kin icicahiyapi qa woakaštan qupi miniša hin itopa kin.

41 Unkan tahcaska cinca inonpa kin ohtayetu otaheiian yapate kta hanhanna minha kin qa woakaštan kin he iyecen ecayecon kta peta wošnapi woomna Jehovah iyokipi ye kta.

42 Jehovah itokam itkokipapi wakeya tiyopa kin ekta wicoicage nitawapi kin yeye cin he peta wošna wan ohinniyan un kte; hen ociciye kta e heciya itkocicipapi kta.

43 Qa hen Israel cinca kin itkowicawakipe kta, qa mitowitan kin he yuwakanpi kta.

 44 Qa itkokipapi wakeya kin, qa owayušna kin mduwakan kta, qa wamiciyušnapi kta e Aaron cinhintku ko wicamduwakan kla.

 45 Qa Israel cinca kin wicehna ounwaye kta, qa Wakantanka kin he miye kta.

46 Qa Jehovah Wakantanka uhapi Egypta makoce etanhan hdinanpe wicaye cin he miye sdonyapi kta, wicehna ounwaye heon etanhan; Jehovah Wakantanka uhapi he miye.

HDNAPAPI WICOWOYAKE 30.

1 Unkan taku waštemna izin yapi kta e wizinya owayušna wan yakage kta, šittim can on yakage kta.

2 Ohanske cin he wicišpa wanjidan kta, qa ohdakinyan kin wicišpa wanjidan, topa omdoton kta, qa obosdatu wicišpa nonpa, he kiyuke kta.

3 Qa mazaskazi ecedan on ayapawinte kta, toakahpe kin, qa cuwi kin ihdukšan, qa he kin; qa ihdukšan mazaskazi watešdake wan yecage kta.

4 Qa mazaskazi napcupe nonpa yecage kta, watešdake ihukuya cuwi nonpa akan anokatanhan hena yakage kta, qa hena to u on akiyuhapi icupi kta e yuke kta.

5 Qa šittim can tosu kin yakage kta, qa mazaskazi ayapawinte kta.

6 Qa cokaya ozanpi kin itokam woyaatanin can ohnaka iyota: kons, tukten itkocicipe kta, wokajuju iha woyaatanin can wohnake kin akan yanke cin he itokam eyahde kta.

7 Qa he akan Aaron pejuta waštemna izinye kta, hanhanna otoiyohi petijanjan pikiya eca he izinye kta.

8 Qa Aaron petijanjan wankan ehnaka eca ohtayetu otahedan taku waštemna he akan izinye kta, ohinniyan Jehovah itokam nitoicagepi yeye cin.

9 He akan wizinyapi tokeca, qa wohuhnahyapi, qa minha huhnah yaye kte šni, qa woakaštan; ayakaštan kte šni.

10 Tuka he kin akan ptanyetu otoiyohi wancadan Aaron woakahpe kage kta; nitoicagepi yeye cin ptanyetu eca wancadan woahtani kajujupi we on he akan waakahpe kta. He Jehovah tawa wakan hinca.

11 Unkan Jehovah ie ca Moses heciya,

12 Tohan Israel cinca kin wicadawa eca, wicayawapi kta e wicašta otoiyohi nagi kin on woakahpe Jehovah qu kta, wicayawapi icunhan, hecen wicayawapi icunhan makošice awicakipe kte šni.

13 Hecen qupi kta, tona wicayawapi kin iyoopta ya otoiyohi šeqel hanke tipi wakan šeqel iyej ceca (gerah wikcemna nonpa šeqel ee ce) šeqel hanke Jehovah qu kta.

14 Tona wicayawapi iyoopta ya wica waniyetu wikcemna nonpa qa iwankam owasin woahi Jehovah qupi kta.

15 Tuwe wijica ešta šeqel hanke yuota kte šni, qa tuwe onšika ešta yuoptetu kte šni, ninagipi on hdajujupi kta woahi wan Jehovah qupi eca.

16 Qa woakahpe mazaska kin Israel cinca etanhan iyacu kta, qa itkokipapi wakeya kicanyanpi on yaqu kta, qa Israel cinca wokiksuye yapi kte, Jehovah itokam ninagipi kin on wokajuju kta.

17 Unkan Jehovah ie ca Moses heciya;

18 Nakun mazasa koka wan yakage kta, qa mazasa cetetahe kin, ekta ihdujajapi kta, qa itkokipapi wakeya qa owayušna otahedan eyahde kta, qa he ohna mini oyakaštan kta.

19 Unkan Aaron iye cinca koya hetanhan napepi sihapi ko ihdujajapi kta.

20 Itkokipapi wakeya kin en yapi eca mini on ihdujajapi kta ece, hecen tapi kte šni, qa tohan Jehovah okiyapi owayušna ikiyedan upi, peta wošna izin kiyapi ece kta.

21 Napepi sihapi ko ihdujajapi kta, hecen tapi kte šni; he wokage owihanke wanice kta, iye qa cinca kin wicoicagepi ecen econ kta.

 22 Unkan Jehovah ie ca Moses heciya,

 23 Nakun niš pejuta waštemna itancan icu wo, myrrh sbusbu šeqel opawinge zaptan, qa canhasa waštemna he hanke, opawinge nonpa sanpa wikcemna zaptan, qa sinkpe tawote waštemna opawinge nonpa sanpa hanke,

24 Qa kasia opawinge zaptan, tipi wakan šeqel ohna iyutapi kta, qa can ihdi hina wanjidan.

25 Qa hena sdayapi wakan wihdi yakage kta, pejuta wicašta taku waštemna kagapi kin he iyecen, sdayapi wakan wihdi waštemna hee kta.

26 Qa he on itkokipapi wakeya kin sdayaye kta, qa woyaatanin canwohnaka kin,

27 Qa wahna wotapi kin, qa wakšica tawa kin owasin, qa petijanjan ihupa, qa on kicanyanpi kin.qa izin yapi owayušna kin.

28 Qa wohunnahyapi owayušna kin, qa taku on kicanyanpi owasin, qa koka kin qa tacetetahe koya.

29 Hecen hena duwakan kta, qa wakanhincapi kta, taku kašta hena yutan kinhan wakan kta.

 30 Unkan Aaron qa iye cinca kin sdawicayaye kta,qa wamiciyušnapi kta e wicaduwakan kta.

31 Qa Israel cinca kin hecen ewicayakiye kta, wakan sdayapi wihdi mitawa kin dee kta, nitoicagepi yeye cin ohna.

32 Wicašta cehpi kin akan he akaštanpi kte šni qa he icicahiyapi kin, qa taku on kagapi iyecen yakagapi kte šni, hee wakan, qa wakanyan yadapi kte.

33 Tuwe he iyecen wihdi waštemna ye cin, qa tuwe wicašta tokeca akan he akaštan kinhan, oyate tawa kin etanhan kaspapi kta.

34 Unkan Jehovah Moses heciya, Taku waštemna icu wo, stache qa onycha waštemna, qa galbanum oomna suta, qa frankincense ska, otoiyohi iakedenakeca.

35 Qa hena wizinyapi yakage kta, pejuta wicašta taku icicahiyapi kin he iyecen yakage kta miniskuya ecedan icicahiyapi wakan kta.

36 Qa hetanhan boyapan kta, mduhinca yakage kta, qa onge woyaatanin itokam itkokipapi wakeya ohna tukten itkocicipe kta eyahnake kta, he wakanhinca dawapi kta.

37 Qa taku waštemna kin de yakage cin he iyecen takudan nicicagapi kte šni; he Jehovah tawa, he wakan dawa kta.

38 Tuwe omna kta e taku he iyecen kage cinhan, oyate tawa kin etanhan kaspapi kta.

HDNAPAPI WICOWOYAKE 31.

1 Unkan Jehovah ie ca Moses heciya,

2 Iho wo Bezaleel Uri cinhintku, Hur cinhintku, Judah wicoun etanhan caje kin on weco.

3 Qa Wakantankatoniya on ojuwaya wokšape qa wookarinige, qa wosdonye on, qa wohtani owasin en.

4 Taku wayupiya kagapi iyukcan kta, mazaskazi, qa mazaska, qa mazasa on kage kta.

5 Qa inyan ojuyapi kin pago kta, qa can pago kta, qa taku kagapi owasin kage kta.

6 Qa he kici miš miye Aliohab Ahisamach  cinhintku, Dan wicoun kin etanhan waqu: qa tona cante ksapapi cantepi ohna wokšape wicawaqu, hecen taku kah cisi kin owasin kagapi kta.

 7 Itkokipapi wakeya kin, qa canwohnake woyaatanin on, qa he akahpe cin, wokajuju iha kin, qa taku wakeya kicanyanpi owasin.

8 Qa wahna wotapi wakšica tawa iyahna, qa petijanjan ihupa ecedan kin, qa taku on kicanyanpi owasin, qa wizinyapi owayušna kin.

 9 Qa wohuhnahyapi owavusria kin, qa taku on kicanyanpi owasin, qa maza koka kin, qa tacetetahe kin.

10 Qa sina ozanpi kin,qa Aaron wawayušna tawokoyake wakan kin, qa cinhintku tawokoyakepi ohna wayušnapi kte.

11 Qa wihdi on sdayapi kin, qa wizinyapi waštemna kin tipi wakan kin on; token econ cisi kin owasin iyecen econpi kta.

12 Unkan Jehovah ie ca Moses heciya,

13 Niš Israel cinca kin hecen ewicakiya wo, Tokešta anpetu wakan mitawa kin yapatanpi kta, nakaš nitoicagepi yeye cin niyepi qa miye unkiotahedan, he wowapetokeca on ciyuwakanpi; Jehovah he miye sdonyapi kta.

14 Qa anpetu okihpapi kin he yapatanpi kta, nakaš niyepi on he wakan, tuwe he yusape cinhan he ktepi kta, heon tuwe he icunhan wohtani taku kašta econ kin he taoyate kin cokayatanhan kaspapi kta.

15 Anpetu šakpe wohtani econpi kta, tuka anpetu išakowin kin he anpetu wakan, okihpapi wakan Jehovah tawa, tuwe kašta anpetu okihpapi en wohtani econ kinhan he awicakehan ktepi kta.

16 Heon Israel cinca kin anpetu okihpapi kin he patanpi kta, wicoicagepi yeye cin wicotakuye owihanke wanica, anpetu okihpapi kin kagapi kta.

17 Miye qa Israel cinca unkiotahedan he wowapetokeca owihanke wanice kta, nakaš anpetu šakpe en Jehovah mahpiya kin qa maka kin kage ca anpetu išakowin kin en okihpe ca oziiciye.

18 Unkan Sinai he kin ohna Moses kici okiye enakiye cehan inyan mdaska woyaatanin qu, inyan mdaska nonpa Jehovah napsukaza on owapi.

HDNAPAPI WICOWOYAKE 32.

1 Unkan oyate kin Moses he kin etanhan apamahdeya hiyu hdutehan kin he wanyakapi qehan, oyate kin Aaron en mniciyapi, qa heciyapi, Najin wo, taku wakan unkiyepi itokam yapi kta unkicicagapo. Ecan Moses wicašta Egypta makoce etanhan hinanpe unyanpi kin he toki an kin sdonunyanpi šni ce.

2 Unkan Aaron hewicakiya, Mazaskazi oinpi kin nitawinpi qa nicincapi wica winyan ko, nogepi ikoyakapi kin hena yuksapi qa en makahipo.

3 Unkan oyate kin owasin mazaskazi oinpi kin nogepi kin etanhan hduksapi, qa Aaron en kahipi.

4 Unkan Aaron hena napepi kin etanhan icu, qa ojuha wan en pahta qa ptejicadan sdoyapi wan kaga. Unkan, Israel taku wakanpi nitawa Egypta makoce etanhan hinanpe niyanpi kin dena ee ce, eyapi.

5 Unkan Aaron wanyakn ca he itokam owayušna wan kage ca, Heyakecinhan Jehovah wakan wokicihanpi kta, Aaron ieyanpaha, eya.

6 Unkan ihanhanna hin kiktapi, qa wohuhnahyapi huhnahyapi, qa wopida wošnapi ahipi, qa oyate kin wotapi qa wayatkanpi kta e iyotankapi, qa skatapi kta e najinpi.

7 Unkan Jehovah Moses heciya, Kun hda, oyate nitawa Egypta makoce etanhan hinanpe yaye cin wanna ihduhowinpi ce.

8 Canku wan ope wicawasi qon he etanhan kohanna ihdutokanpi, ptejicadan sdoyapi wan ici cagapi, qa ekta pakicapsanpi, qa wakiciyušnapi, qa Israel taku wakanpi yada, Egypta makoce etanhan hdinanpe niye cin dena ee ce, eyapi.

9 Unkan Jehovah Moses heciya, Oyate kin de wanmdake ca inyun oyate tahu patin hecapi.

10 Qa wanna micuni wo, hecen mitocanniye kin awicakate kta, qa ihang wicawaye kta, qa niš oyate tanka cicage kta ce.

11 Unkan Moses Jehovah taku iye Wakantanka cin kiye ca heya, Jehovah, tokeca oyate nitawa kin canniye yaya he, hena Egypta makoce etanhan hdinanpe wicayaya, wowašake tanka on, qa nape wašaka on?

12 Tokeca Egypti heyapi kta, Taku šica on inanpe wicaya, he kin ohna wicakte kta, qa maka ite kin etanhan awihnuni wicaye kta heon etanhan, eyapi kta; nitocanniye kate cin etanhan ihduhomni, qa oyate nitawa en taku šice cin de on iyope iciya ye.

13 Nitaokiye Abraham, qa Isaac, qa Israel wicakiksuya ye, token caje nihdate ca konze hewicayakiya, Nicincapi kin mduota kta, mahpiya wicanhpi kin iyenakecapi kta, qa makoce kin de cajemdate cin ocowasin nicincapi kin wicawaqu kta,qa owihanke wanin tawayapi kta.

14 Unkan Jehovah taku šica taoyate kin ecawicakicon kta, eye ciqon on iyope iciya.

15 Unkan Moses ihdamna, qa he kin etanhan apamahdeya hda, qa woyaatanin inyan mdaska nonpa qon nape kin ohna hdohda, inyan mdaska kin hena anokatanhan owapi, deciyatanhan qa unman eciyatanhan nakun, inyan mdaska owapi ce.

16 Inyan mdaska kin hena Wakantanka kaga, qa owapi kin he Wakantanka owa ce, inyan mdaska kin akan pago.

17 Unkan Jošua oyate oqoyapi kin nahon qa, Owanka ohna kicizapi iyecen oqoyapi ce, Moses eciya.

18 Unkan, Wicašta ohiyapi, qa panpanpi ho kin hee šni, qa wicašta wicaktepidan howayapi kin hee šni ce, tuka wicašta dowanpi ho kin nawahon, eya.

19 Qa owanka kin ikiyedan u qehan, qa ptejicadan, qa wacipi kin wanyake cehan, Moses šinhda, qa inyan mdaska qon nape etanhan ehpeya, qa kamdeca, he kin ihukuya.

20 Qa ptejicadan kagapi qon he icu qa peta on huhnaga, qa yukpan, hecen mdu kage ca mini kin akada; qa Israel cinca. kin yatke wicakiya.

 21 Unkan Moses Aaron heciya, Oyate kin de taku ecannionpi kin on woahtani tanka kin de awicayakahi he?

22 Unkan Aaron heya, Itancan, ihnuhan sinyahda kin: niš oyate kin de šicapi ce, sdonwicayaya.

23 Qa hemakiyapi; Taku wakanpi unkitokam yapi kta unkicicagapo, Moses wicašta kin he Egypta makoce kin etanhan, itanwankanhde mani unyanpi kin,tuktee he sdonunyanpi šni ce.

24 Unkan, Tuwe mazaskazi onge yuhe cinhan hdukše kta, ewicawakiya, unkan he maqupi, unkan petan ehpewaya, qa ptejicadan kin de inanpa ce.

25 Hehan oyate kin sdokahanpi e Moses wanyaka, nakaš tokawicayapi iwicahahapi kta Aaron wicayusdoka;

 26 Qa owanka tiyopa kin ohna Moses najin qa, Tuwe Jehovah ope cin en mahi wo, eya. Unkan Levi cinca kin owasin en kawitayapi.

27 Unkan hewicakiya, Wicašta otoiyohi tamazasagye kihnake kta, ceca akan qa owanka ohna tiyopa iyaza ye kta, qa wicašta otoiyohi iye sunkaku qa takodaku, qa tuwe iye ikiyedan ti kin wicakikte kta, Jehovah Israel wakandapi kin he eya ce.

28 Unkan Levi cinca kin Moses eye cin he iyecen econpi; unkan anpetu kin he oyate kin etanhan wicašta kektopawinge yamni ecetu ihpayapi.

29 Nakaš Moses hewicakiye ciqon, Jehovah on anpetu kin de ninapepi kin ojunkiyapo, wicašta iye cinhintku qais sunkaku kin on, hecen anpetu kin de woyawašte wan nicupi kta ce.

30 Unkan ihanhanna Moses oyate kin hewicakiya,Woahtani tanka wan wayahtanipi, heon wanna itanwankanhdeya mde kta, Jehovah ekta, okini wayahtanipi kin akahpe waye kta ce.

 31 Qa Moses icicawin Jehovah ekta ye ca heya, Hehe, oyate kin de woahtani tanka wahtanipi, qa mazaskazi taku wakanpi icicagapi;

 32 Qa wanna tokin wahtanipi kin wicakiciyutokan-; qa hecetu šni kinhan wowapi wan oyakiwa kin hetanhan mapajujuye, ceciciya.

33 Unkan Jehovah Moses heciya, Tuwe amawahtani kin he wowapi mitawa kin etanhan wapajuju kta ce.

34 Qa wanna ekta hda, tokiya caje mdata qon heciya oyate kin awicaya wo, ito ohnihde miye cin he nitokam ye kta, tuka, tohan en wahi eca wahtanipi kin awicawahi ece kta.

35 Unkan Jehovah ptejicadan kagapi on, Aaron kage cin hee, on etanhan oyate kin wicakaštaka.

HDNAPAPI WICOWOYAKE 33

 1 Wanna Jehovah Moses hecen eciye ciqon, Hunktiya detanhan itan yankan hdeya ya wo, niš qa oyate Egypta makoce etanhan hdinanpe wicayaye cin, makoce wan nicinca kin he waqu kta ce, Abraham, qa Isaac, qa Jacob iwicawakonze ciqon he ekta.

2 Qa ohnihde cin he nitokam ye waši kta, qa nitokapatanhan Caanani kin, qa Amori kin, qa Hitti kin, qa Perizzi kin, qa Hivi kin, qa Jebusi kin:

3 Makoce wan asanpi qa canhanpi tiktica kaduze cin he ekta; oyate tahu patin henicapi heon niyepi cokaya mde kte šni, okini tahepi tem ciyapi kta.

 4 Unkan oyate kin wicoie šice cin he nahonpi, qa iyokisin iciyapi, qa tuwedan oinpi kin ikoyag kiye šni.

5 Nakaš Jehovah Moses heciye ciqon, Niš oyate tahu patin henicapi, ihnuhanna niyepi cokaya inawape kte ca ihang ciyapi kta; heon wanna oinpi nitawa kin niye etanhan makata ehpe kiya wo, hecen taku ecacicon kta sdonwakiye kta, Israel cinca kin ewicakiya wo.

 6 Hecen Israel cinca kin oinpi kin hdusdokapi, Horeb he kin ihukuya.

7 Unkan Moses wakeya kin icu, qa owanka kin itankan ehde, owanka kin itehan, qa itkokipapi wakeya kin, eya cajeyata. Unkan tona Jehovah akitapi kin hena owasin itkokipapi wakeya kin ekta owanka kin itankan inanpapi.

 8 Unkan Moses wakeya kin ektakiya inanpa eca oyate kin owasin najinpi ece, otoiyohi tawakeya tiyopa kin ekta qa Moses ihakam etonwanpi wakeya kin ekta i kin hehanyan.

9 Unkan Moses wakeya kin ekta i eca mahpiya soka bosdata kin kun hiyu, wakeya tiyopa kin ekta, qa Moses okiya ece.

10 Unkan oyate kin owasin mahpiya bosdata qon, wakeya tiyopa kin ekta najin e wanyakapi, qa oyate kin owasin najinpi qa cekiyapi, otoiyohi tawakeya tiyopa ekta.

11 Unkan Jehovah Moses kici wohdaka, kaicitkokim, wicašta wan takodaku kici wohdaka he iyececa, unkan owanka kin ekta kihda, qa taokiye Jošua Nun cinhintku koška kin, tuka mahpiya bosdata wakeya cokaya.tanhan tokan ye šni.

12 Unkan Moses Jehovah heciya, Iho oyate kin de itainvankanhdeya awicaya wo, eha tuka tuwe mici ye yasl kta sdonye mayakiye šni, tuka nicaje on sdon ciya, qa nakun miišta kin iyokipi yaya ce, eha.

13 Qa wanna niišta kin iyokipi waye cinhan nitacanku kin sdonye makiya ye; hecen niišta kin ohna woiyokipi iyewaye cin he sdotciye kta, qa oyate kin de oyate nitawa kin ee, awacin wo.

14 Unkan, Miite kin ye kta qa oziciciye kta ce, eya.

15 Unkan heciya, Niite kin ye šni kinhan, detanhan itanwankanhdeya unkayapi šni ye.

16 Qa wanna niišta kin ohna woiyokipi iyewaye, miye qa oyate nitawa kin tokiyatanhan sdonyapi kta he? unkicipi idade cin hee šni he? hecen miye qa oyate nitawa kin oyate maka itohnake akan unpi kin owasin etanhan unyukinukanpi kta.

17 Unkan Jehovah Moses heciya, Taku ehe cin he nakun ecamon kta, nakaš miišta kin ohna woiyokipi iyeyaya, qa nicaje kin on sdonciya.

18 Unkan, Tokin nitowitan he wanyag makiya ye, eya.

19 Unkan, Mitowašte kin owasin niite kin itokam iyaye wakiye kta, qa Jehovah caje kin eyanwapaha kta, nitokam, qa tuwe cante wakiye cin he cante wakiye kta, qa tuwe onsiwada kin he onsiwakidake kta ce.

20 Tuka miite kin wandaka oyakihi šni, nakaš wicašta tuwe wanmayake cinhan ni kte šni ce, eya.

21 Nakun Jehovah heya, Inyun oyanke wan mikiyedan, qa imnija kin akan ayahe kta.

22 Qa mitowitan kin ahiyaye cin hehan imnija ohdoka wan ohdateya ecihde kta, qa awahimdamde cin icunhan minape on akanpe ciye kta.

23 Qa minape kin mihdutokan kta, hecen mitapete tanhan wandake kta, tuka miite wanyakapi kte šni.

HDNAPAPI WICOWOYAKE 34.

1 Unkan Jehovah Moses heciya, Inyan mdaska nonpa kakan wo, tokaheya qon he iyececa, qa inyan mdaska tokaheya ya kamdeca, oie akan un qon, hena inyan mdaska kin akan owawa kta.

2 Qa hanhanna on ihduwiyeya wo, qa hanhanna Sinai he kin ekta itanwankanhdeya yau kta, qa heciya he paha kin akan iyamiyecihe kta.

3 Qa wicašta tuwedan niciu kte šni, qa nakun he kin owancaya wicašta tuwedan ihdutanin kte šni; nakun optaye qa optaye kin he kin he icahda winanpi kte šni.

4 Unkan inyan mdaska nonpa kakan, tokaheya qon hena iyececa, qa Moses hanhannahin kikta, qa Sinai he kin ekta itanwankanhdeya i, Jehovah econši qon he iyecen, qa inyan mdaska nonpa kin nape kin ohna yuha.

5 Unkan Jehovah mahpiya šoka ohna kun hiyu, qa kici hen iyahan, qa Jehovah caje kin ieyanpaha.

6 Qa Jehovah he itokam ahiyaye ca ieyanpaha, Jehovah, Jehovah Wakantanka, waonšida, qa wacantkiya, tehan šihda šni, tocantekiye, towicake ko ota.

7 Wicoicage yeye kektopawinge cantewicakiya ece, wicohan šica qa wokipajin qa woahtani kajuju ece, tuka ohinniyan kajuju kte šni, ateyapi wicohan šicapi cincapi qa sanpa cincapi kin en awicahi ece, wicoicage iyamni qa itopa kin hehanyan.

 8 Unkan Moses inahni, qa makata pakicapsan, qa cekiya.

 9 Qa heya, Itancan wanna niišta kin ohna woiyokipi iyewaye cinhan, Itancan kin unkiyepi cokaya ye kta ceciciya, qa wicohan šica unkitawapi, qa waunhtanipi kin unkicicajuju miye, qatawa unkiya miye,nakaš oyate kin tahu patin hecapi.

10 Unkan heya, Inyun miye wicotakuye wakaga, oyate nitawa kin owasin itokam, wicohan wowinihau ecamon kta, hena iyececa maka kin owancaya ikcewicašta owasin ehna tuwedan tohini econ šni, qa oyate wicehna yaun kin he owasin Jehovah ohan kin wanyakapi kta nakaš taku wokokipe hinca nici ecamon kta.

11 Taku nakaha econ cisi kin awacin wo. Ito nitokapa tanhan Amori kin, qa Caanani kin qa Hitti kin qa Perrizi kin, qa Hivi kin, qa Jebusi kin nape wicawaye kta.

12 Waktaya wo. Ihnuhan oyate makoce ekta idade cin he ounyanpi kin om wicotakuye yakage cinhan okini he niyepi cokaya wihmunke kta.

13 Tuka owayušnapi tawapi kin ihang ya yapi kta, qa wakagapi tawapi kin yakamdecapi kta, qa can pasdatapi kin hena yakawankapi kta.

14 Taku wakan tokeca ekta payecapsan kte šni; Jehovah winawizi eciyapi kin he Wakantanka winawizi kin ee.

15 Okini makoce en ounyanpi kin om wicotakuye yakage cinhan, qa taku wakandapi kin okiyapi, qa taku wakandapi kin wakiyušnapi, qa nicopi qa taku wošnapi kin he yate kta.

16 Qa nicinkši kin cunwintkupi kin etanhan yus yakiya, qa cunwintkupi kin taku wakandapi okiyapi qa nakun nicinkši taku wakandapi kin okiye yapi kta.

17 Taku wakan sdoyapi kin nicicage kte šni.

18 Aguyapi napohyapi šni wohanpi kin yapatan kta. Anpetu šakowin aguyapi napohyapi šni yate kta, econ ciši kin he iyccen. Aguyapi itka hinanpa wi kin iyehantu kin hehan, nakaš aguyapi itka hinanpe cin wi kin he en Egypta etanhan yahdinanpa ce.

19 Winyan cinca tokaheya ton kin hena owasin mitawa, qa wanunyanpi nitawa, ox, kaeš tahcaska, cinca tokapa owasin mdoka kinhan.

20 Tuka šuktanka šonšonna einca tokapa kin he opeyakiton kta; tahcaska cinca kin iyope yakiye kta, qa opeyakiton kte šni kinhan tahu kin bayakse kta. Qa nicinca tokapa kin opeyakiton kta. Qa tuwedan mitokam cokadan ihdutanin kte šni.

 21 Anpetu šakpe htayani kta, qa anpetu išakowin en oziniciye kta, maga yumdupi, qa woksapi iyehantu eita oziniciye kta.

22 Anpetu wakan išakowin wohanpi kin nakun miyecagapi kta, aguyapi baksapi tokaheya ahipi kin hee, qa womnayanpiwohanpi kin, omaka ihuniyanpi kinhan.

23 Waniyetu otahedan yamni akihde nicinca wica kin owasin Itancan Jehovah Israel Wakantanka kin he itokam ihdutaninpi kta.

24 Nitokapa tanhan Ikcewicašta kin tokan ye wicawaye kta; qa nitamakoce kin mdutanka kta, qa waniyetu otahedan Jehovah itokam nihdutanin kta, yamni akihde, itanwankanhdeya idade cinhan tuwedan nitamakoce kin cin kte šni.

 25 Taku wamayakidušna we kin onapohye ayakaštan kte šni. Qa acakšin wohanpi wošna kin ihanhanna kin en yanke kte šni.

26 Maga nitawa taku tokaheya icahya tokapa kin Jehovah wakan yada ti kin ekta ayahi kta. Hekinšayapi cinca hunku asanpi kin en oyahe kte šni.

27 Unkan Jehovah Moses heciya, Wicoie kin dena owa wo; nakaš wicoie kin dena i kin iyececa wicotakuye cicicaga, Israel kici nakun.

28 Unkan Jehovah kici hen yanke anpetu wikcemna torn, qa hanyetu wikcemna tom, aguyapi yute šni, qa mini yatke šni. Unkan wicotakuye oie kin inyan mdaya kin akan owa wicoie wikcemna kin.

 29 Unkan Moses woyaatanin inyan mdaska nonpa napohna yuha apamahdeya u, qa Moses Sinai he kin etanhan apamahdeya u qehan, he kici wohdaka icunhan ite uka kin iyege ein he sdotkiye šni.

30 Unkan Aaron qa Israel cinca kin owasin Moses ite kin wanyakapi; unkan inyun ite uka kin iyega, unkan ikiyedan upi kin ikopapi.

31 Unkan Moses wicakipan, unkan Aaron qa omniciye itancan owasin en hdipi, unkan hena om Moses wohdaka.

32 Unkan he iyohakam Israel cinca kin owasin ikiyedan hipi, unkan Jehovah Sinai paha ohna taku eciye cin owasin econ wicaši.

33 Qa Moses owicakiye hdaštan kin hehanyan ite akahpe wan ite kin akan ehnaka.

34 Qa Moses Jehovah kici wohdaka en i qehan, ite akahpe kin hdutokan, tankan i kin hehanyan, qa tankan inanpe ca taku econ sipi kin owicakiyaka.

35 Unkan Israel cinca kin Moses ite kin wanyakapi, Moses ite uka kin iyega; heon Moses ite akahpe kin ake ite akan hiyuya, kici wohdake kta en i kte cin hehanyan.

HDNAPAPI WICOWOYAKE 35.

1 Unkan Moses Israel cinca omniciye ocowasin yuwitaya u wicakiye, ca hewicakiya, Wicoie Jehovah econ nisipi dena ee.

2 Anpetu šakpe wohtani ecannon kta, tuka anpetu išakowin kin he wakan yada kta, anpetu okihpapi wakan Jehovah tawa, he icunhan tuwe kašta wohtani econ kinhan te yapi kta.

3 Ounyayapi kin owasin ohna anpetu okihpapi icunhan ceyatipi kte šni.

4 Unkan Moses ie ca Israel cinca omniciye ocowasin hewicakiya, Taku Jehovah econ nišipi kin dee, qa heya;

5 Taku Jehovah ituyakihanpi kta he icupo. Tuwe cante kin iyopastaka, taku Jehovah itukihan kte cin he ahi kta, mazaskazi, qa mazaska, qa mazasa;

6 Qa to, qa štan, qa duta, qa minihuha ska, qa hekinškayapi hin;

7 Qa tahcaska mdoka ha sayapi, qa hoka ha, qa šittim can;

8 Qa wihdi petijanjan on, qa taku waštemna wihdi sdayapi kin on, qa wizin yapi waštemna on;

9 Qa inyan wicašake iyececa, qa inyan ojuyapi kta, amdo akahpe ohna, qa maku akahpe ohna.

10 Qa niyepi ehna tona cante ksapapi kin owasin upi kta, qa taku Jehovah kah ši kin owasin kagapi kta;

11 Tipi kin, tawakeya, qa toakahpe kin nakun, tamaza taspu kin, qa canmdaška kin, canhdakinyan kin, can bosdata tawa qa sicu tawa kin;

12 Can wohnake kin, qa tatosu kin, wokajuju iha kin, qa oakahpe ozanpi kin;

13 Wahna wotapi, qa tatogu kin, qa taku on kicanyanpi kin owasin, qa aguyapi itokam hnakapi kin;

14 Qa petijanjan ihupa kin, qa taku on kicanyanpi kin, qa wihdi on iyoyam yapi kin;

15 Qa wizin yapi owayušna kin, qa tosu on akiyuhapi kin, qa wihdi on sdawicayapi kin, qa taku waštemna on wizin yapi kin; qa ozanpi tipi tiyopa akahpe cin he.

16 Qa peta wošnapi owayušna kin, qa mazasa oceti tawa; qa tosu on akiyuhapi kin, qa taku on kicanyanpi kin, qa koka kin, tacetetahe iyahna;

17 Hocoka ozanpi kin, ipatan kin, qa sicu kin, qa hocoka tiyopa akaripe kin;

18 Tipi wihutipaspe kin qa hocoka wihutipaspe, qa ikan kin owasin;

19 Qa tipi wakan ohna taku wakan ohodapi kta e ohodapi wokoyake, wokoyake wakan, Aaron wawayušna kin on, qa cinhintku tawokoyakepi ohna wayušnapi kta.

20 Unkan Moses itokapa tanhan Israel cinca omniciye ocowasin inanpapi.

21 Unkan tuwe cante kin iyopaštaka, qa tuwe taniya kin iyokipi kin hena owasin upi; qa taku Jehovah itukihanpi ahipi, itkokipapi wakeya'kin kagapi kta e, qa taku kicanyanpi on, qa wokoyake wakan on.

22 Unkan wicašta qa winohinca upi, tona cantepi iyokipipi owasin maza taspudan, qa oinpi, qa mazanapcupe, qa maza sipto, mazaskazi oinpi owasin hiyuyapi; qa wicašta tona taku kosyapi kin hena owasin Jehovah mazaskazi kos yapi.

23 Qa wicašta tona hin to, qa štan, qa duta, qa minihuha ska, qa hin, qa tahcaska mdoka ha sayapi, qa hoka ha yuha iyewicayapi kin hena ahipi.

24 Qa tona mazaska qa mazasa wankan hiyuyapi kin hena Jehovah taku itukihanpi kin he kahipi, qa tuwe šittim can on taku kah wicaši kagapica he kahi

25 Qa winohinca tona cante ksapapi owasin hin to, qa štan, qa duta, qa minihuha ska napepi on kahmupi, qa taku kahmupi kin he kahipi.  

26 Qa winohinca tona cantepi kin iyowicapastakapi wokšape en, hekinškayapi hin kahmupi.

27 Unkan wicašta itancanpi kin inyan wicasake iyececa ahipi, qa inyan ojuyapi kta ahipi, amdo akahpe kin en, qa maku akahpe kin en.

28 Qa taku waštemna, qa wihdi petijanjanon,qa wihdisdawicayapi on, qa wizin yapi waštemna on.

29 Wicašta qa winohinca owasin tona cantepi kin taku kahipi kta iyowicapastake, taku kagapi Jehovah Moses nape on kah wicaši kin hena owasin on, Israel cinca kin iyokipiya Jehovah itukihanpi.

30 Unkan Moses Israel cinca kin hewicakiya, Jehovah Bezaleel Uri cinhintku Hur cinhintku Judah wicoun etanhan he caje kin on kipan.

31 Qa Wakantanka woniya ojunya, wokšape, qa wookahnige en, qa wosdonye, qa wohtani ocaje owasin en.

32 Taku wayupiya kagapi iyukcan kta, mazaskazi, qa mazaska, qa mazasa kage kta.

33 Qa inyan ojuyapi kta e pago kta, qa can pago kta, taku wayupiya kagapi kin owasin kage kta.

34 Qa waonspe kiye kta e lye cante en qu, iye qa Aholiab Ahisamach cinhintku Dan wicoun etanhan.

35 Hena cante wokšape kin ojun wicaya, wapagopi wicohan, qa taku wayupiya kagapi owasin econpi kta, qa to qa štan, qa duta, qa minihuha ska on wipatapi kta, qa kazuntapi kte, taku kagapi owasin, qa taku wayupiya econpi iyukcanpi kta.

HDNAPAPI WICOWOYAKE 36.

1 Unkan Bezaleel qa Aholiab htanipi, nakun wicašta tona cante ksapapi, tona tipi wakan token Jehovah kah wicaši, taku kagapi owasin sdonyapi kta, qa kagapi kta e Jehovah wokšape qa wookahnige yuhe wicakiya.

2 Nakaš Moses Bezaleel qa Aholiab wicakipan qon, nakun tona cante ksapapi, tona cante mahen Jehovah wokšape yuhe wicakiya, tona taku kagapi kage kta e cante htani kta e iyowicapastaka owasin ikiyedan hiyu wicakiya.

3 Unkan Moses itokapa tanhan taku ituhanpi kin icupi, tipi wakan kagapi kta, qa kicanyanpi kta e taku Israel cinca kin ahipi kin, nakun nahanhin hahanna otoiyohi taku iyokipiya ahipi.

4 Unkan tona ksapapi tipi wakan wohtani econpi kin owasin wohtani econpi etanhan en hipi;

5 Qa Moses heciyapi, Taku kagapi kta, Jehovah kah unsipi kin iyehantu, qa iyakicuya oyate kin ahipi ce, eyapi.

6 Hehan Moses wicoti ohna ieyanpaha wicaši, Wicašta winohinca unmanna tipi wakan kagapi itukihanpi kta e tokata taku kage kte šni, eya, hecen oyate taku ahipi kin ayuštan wicakiya.

7 Taku kah wicaši owasin kagapi kta iyohiya qa nakun ihan.

8 Unkan tipi wakan kin htanipi wicehna tona cante ksapapi kin hena ozanpi wikcemna kagapi, minihuha ska nonpa kahmupi, qa to, qa stan, qa duta, cherubi kazuntapi hena kagapi.

9 Ozanpi wanji ohanske cin wicišpa wikcemna nonpa sanpasahdogan, qa ozanpi wanji ohdakinyan kin wicišpa topa, ozanpi owasin hinskoskocecapi.

10 Unkan ozanpi zaptan icikoyag ya, qa ozanpi zaptan icikoyagya.

11 Hahonta to sunjoyake ozanpi wanji opapun ekta kaga, apahdate etanhan icikoyag yapi en, he iyecen ozanpi unman icikoyag yapi kta e opapun apahdate ekta kaga.

12 Sunjoyake wikcemna zaptan ozanpi tokaheya en kage ca sunjoyake wikcemna zaptan ozanpi inonpa opapun ekta, tokaheya kici ikoyag yapi kta e sunjoyake kin iciyotakonzapi.

13 Unkan mazaskazi taspu wikcemna zaptan kaga, qa maza taspu kin on ozanpi wanji unman ekta ikoyag ya; hecen wakeya wanjidan.

14 Unkan hekinškayapi hin ozanpi wakeya tipi akapatanhan un kin kicaga, hena ozanpi ake wanji kaga.

15 Ozanpi wanji ohanske cin, wicišpa wikcemna yamni, qa ozanpi ohdakinyan kin wicišpa torn, ozanpi ake wanji kin owasin iyakehinskokeca.

16 Unkan ozanpi zaptan icikoyag ya, qa ozanpi šakpe icikoyag ya.

17 Unkan icikoyag yapi kta e sunjoyake wikcemna zaptan ozanpi tokaheya opapun akan kaga, qa sunjoyake wikcemna zaptan ozanpi inonpa opapun ekta ikoyag yapi kta e kaga.

18 Qa mazasa taspu wikcemna zaptan wakeya icikoyag ye kta e kaga, hecen wanjidan kta.

19 Unkan tahcaska mdoka ha sayapi woakahpe wan wakeya kin kicaga, qa he akapatanhan kta hoka ha woakahpe wan kaga.

20 Unkan tipi kin šittim can can mdaska bosdan unpi kta e kicaga

21 Can mdaska wan ohanske cin wicišpa wikcemna, qa ohdakinyan kin wicišpa wan sanpa wicišpa hanke.

22 Can mdaska ekiciyuzapi kta e otoiyohi nape nonpa kicaga, tipi can mdaska owasin hecen kicaga.

23 Unkan tipi can mdaska kin tipi onnaptan itokaga wiyotanhan ektakiya can mdaska wikcemna nonpa tipi kin kicaga.

24 Qa mazaska sicu wikcemna torn kaga, can mdaska wikcemna nonpa ihukuya, sicu nonpa, canmdaška wanji nape nonpa yuke cin on he ihukuya un kta, canmdaška otoiyohi nape nonpa kiyuke cin on, he ihukuya sicu nonpa kta.

25 Qa tipi onnaptan inonpa waziyata ektakiya canmdaška wikcemna nonpa kicaga.

26 Qa mazaska sicu wikcemna topa, canmdaška otoiyohi ihukuya maza sicu nonpa.

27 Qa tipi catku kin wiyohpeyata ektakiya kin he canmdaška šakpe kicaga.

28 Qa canmdaška nonpa tipi kal'imi catkutanhan kin hena kicaga.

29 Unkan napin iyakedececapi ihukuya tanhan, qa napin otoiyohi pa kin ekta mazaska napcupe tokaheya en ikoyagyapi, kaftmi nonpa on hena nonpa okonwanjidan.

30 Hecen canmdaška kin šahdogan, qa mazaska sicu kin ake šakpe, canmdaška otoiyohi ihukuya sicu nonpa.

31 Qa tipi onnaptan tokaheya canmdaška kin on sitim can hdakinyan zaptan kicaga.

32 Qa tipi onnaptan inonpa can-mdaska kin on canhdakinyan zaptan, qa tipi catku kin wiyohpeyata ektakiya canmdaška kin canhdakinyan zaptan kicaga.

33 Qa canhdakinyan wanji cokaya un kin he canmdaška cokaya ohna iyopte kta e kaga, ihanke wanji etanhan ihanke unman ekta kiya.

34 Qa canmdaška kin mazaskazi on apawinta, qa maza napcupe ohna canhdakinyan yakonpi kin hena mazaskazi on kaga, qa canhdakinyan kin mazaskazi apawinta.

35 Qa cokaya ozanpi kin minihuha ska, qa to, qa stan, qa duta cherubim kazuntapi he kaga.

36 Qa šittim can bosdata tom he kicage ca hena mazaskazi apawinta, qa mazaskazi yuksanpi hena kicage ca mazaska sicu torn sdoyapi kicaga.

37 Qa wakeya tiyopa kin oakahpe wan, minihuha ska. qa to qa stan, qa duta wipatapi kin he kicaga.

38 Qa he on can bosdata zaptan mazayuksanpi iyahna, qa hena pa kin, qa can icikoyagyapi kin hena mazaskazi apawinta, tuka sicu zaptan kin hena mazasa.

HDNAPAPI WICOWOYAKE 37

1 Unkan BezalEel canwohnake kin sitim can on kaga, wicišpa nonpa sanpa hanke ohanske cin, qa wicišpa sanpa hanke ohdakinyan kin, qa wicišpa sanpa hanke obosdatu kin.

2 Qa he mazaskazi ecedan on apawinta, mahentuya, qa akapatanhan, qa ihdukšan mazaskazi watešdake wan kicaga.

3 Qa mazaskazi sdoye ca maza napcupe torn he kicaga, siha topa kin akan, maza napcupe nonpa onnaptan wanji akan, qamaza napcupe nonpa onnaptan unman akan.

4 Qa šittim can tosu kageca mazaskazi on apawinta.

5 Qa canwohnake kin akiyuhapi kta e maza napcupe canwohnake anokatanhan onnaptan ikoyag yapi kin hena ohna tosu kin iyopte ya.

6 Unkan woahtani kajuju iha kin mazaskazi ecedan on kaga, ohanske cin wicišpa nonpa sanpa hanke qa ohdakinyan kin wicišpa sanpa hanke.

7 Qa cherubim nonpa kaga wanji wokajuju iha ihanke anokatanhan akan; mazaskazi pagopi hena kaga.

8 Cherub wanji ihanke deciyatanhan qa cherub unman kin ihanke kakiya tanhan, woahtani kajuju iha kin etanhan cherubi kin kaga; ihanke nonpa kin etanhan.

9 Unkan Cherubim kin wankantuya hupahu kamdah yakonpi, riupahupi on woahtani kajuju iha kin ahanzipi, qa itepi kin otoiyohi unman ekta kiya, cherubi itepi kin wokajuju iha ekta kiya yakonpi.

10 Unkan wahna wotapi šittim can on kaga, ohanske cin wicišpa nonpa, qa ohdakinyan kin wicišpa, qa obosdatu kin wicišpa sanpa hanke.

11 Qa he mazaskazi ecedan on apawinta, qa ihdukšan mazaskazi watešdake wan kicaga.

12 Nakun ihdukšan iyuskite wan nape mdaska hinskokeca kicaga; qa iyuskite akan mazaskazi watešdake wan kicaga.

13 Qa mazaskazi sdoye ca maza napcupe topa kicage ca oise topa siha topa yuke cin hena ekta maza napcupe kin ikoyag ya

14 Wahna wotapi akiyuhapi kta e maza napcupe iyuskite iyotakons kagapi, qa hena ohna tosu kin iyeyapi.

15 Unkan šittim can tosu kin kage ca mazaskazi apawinta hena on wahna wotapi kin akiyuhapi.

16 Qa taku wahna wotapi akan un taku on kicanyanpi kin, tawakšica, qa maza tukiha tawa, qa wiyatke on waakaštanpi kin hena owasin mazaskazi ecedan on kaga.

17 Unkan petijanjan ihupa kin he kaga, mazaskazi ecedan pagopi petijanjan ceca kin, taadetka kin, tawakšica kin, tapsonka kin qa tawahca kin, hena owasin he etanhan kaga.

18 Qa adetka šakpe petijanjan ihupa cuwi kin etanhan inanpapi, petijanjan ihupa cuwi wanji etanhan adetka yamni, qa petijanjan cuwi unman kin etanhan adetka yamni.

19 Adetka wanjidan en wakšica yamni hma iyececa, otoiyohi psonka wan, qa wahca wan kicica adetka wanjidan en, qa ake wakšica yamni otoiyohi hma iyececa psonka wan qa wahca wan kicica adetka wanjidan en, adetka šakpe petijanjan ihupa etanhan inanpapi, owasin hececapi.

20 Qa petijanjan ihupa en wakšica topa hma iyececa, otoiyohi psonka wan qa wahca wan kicica.

21 Hecen petijanjan adetka nonpa ihukuya psonka wanji, qa adetka nonpa ihukuya psonka wanji, qa adetka nonpa ihu kuya psonka wanji petijanjan ihupa etanhan adetka šakpe inanpapi owasin hececapi.

22 Petijanjan ihupa tapsonka, qa taadetka okonwanjidan, mazaskazi ecedan onspadan pagopi on owasin kagapi.

23 Qa mazaskazi ecedan petijanjan šakowin petijanjan ihupa kin kicaga, nakun petijanjan iyukse qa ohna cahota icupi kin.

24 Mazaskazi ecedan woqin wanjidan on he kage ca tawakslca owasin.

25 Unkan wizinya owayušna kin šittim can on kaga; ohanske cin wicispa, qa ohdakinyan wicispa, topa omdoton, qa obosdatu kin wicišpa nonpa; he kicagapi.

26 Qa mazaskazi ecedan on apawinta iwankamqa onnaptanyan kin ihdukšan, qa he kin; qa ihdukšan mazaskazi ecedan watešdake wan kicaga.

27 Qa mazaskazi napcupe nonpa he kicaga, watešdake kin ihukuya onnaptan nonpa akan, tosu on akiyuhapi kin icupi kta e hena owayušna cuwi nonpa akan kaga.

28 Qa tosu kin šittim can on kage, ca mazaskazi on apawinta.

29 Unkan wihdi wakan on sdawicayapi kaga, nakun taku watemna on wizinyapi ecedan kin, pejuta wicašta kagapi kin iyececa.

HDINAPAPI WICOWOYAKE 38.

1 Unkan šittim can peta wo napi owayušna kin kaga, ohanske cin wicišpa zaptan, qa ohdakinyan kin wicišpa zaptan, topa omdoton, qa obosdatu kin wicišpa yamni.

2 Qa oise topa kin akan he kicaga, owayušna on he kin kaga, qa mazasa on apawinta.

3 Unkan owayušna taku on kicanyanpi kin owasin kaga; cega kin, qa maza mdaska kin, qa wakšica kin, qa mazajanjata kin, qa petaga wakšica kin, owayušna  taku on kicanyanpi kin owasin mazasa on kaga.

4 Qa mazasa oceti wan ho kagapi iyececa owayušna kin kicaga, opapun ihukuya, ohdateya cokaya ekta.

5 Qa oceti oise topa kin en mazasa doyapi napcupe torn kaga, hena ohna to u iyeyapi kta.

6 Unkan šittim can tosu kin kage, ca mazasa on apawinta.

7 Qa owayušna akiyuhapi kta e maza napcupe kin owayušna onnaptan en unpi kin ohna tosu kin iyeya; owayušna canmdaška on kaga, hdogeca.

8 Unkan mazasa koka kin he kaga, tacetetahe mazasa on kaga, winohinca itkokipapi wakeya tiyopa ekta obe itokto yuwitaya cekiyapi taihdiyomdasinpi on hena kaga.

9 Unkan hocoka kin kaga, itokall onnaptan wiyotanhan ektakiya on minihuha ska nonpa kahmupi ozanpi wan wicišpa opawinge.

10 Ipatan wikcemna nonpa, qa sicupi wikcemna nonpa, mazasa on kicaga, tuka ipatan yuksanpi kin qa satapi kin hena mazaska on kaga.

11 Unkan waziyata onnaptan ozanpi kin wicišpa opawinge, ipatan kin wikcemna nonpa, qa sicu wikcemna nonpa, mazasa on kaga, tuka ipatan yuksanpi kin, qa satapi kin hena mazaska.

12 Unkan ihanke wiyohpeyata ektakiya ozanpi kin wicišpa wikcemna zaptan, ipatan wikcemna, qa sicu kin wikcemna, tuka ipatan yuksanpi kin qa satapi kin hena mazaska.

13 Qa ihanke wihinanpe ektakiya wicišpa wikcemna zaptan.

14 Hiyete tokaheya ozanpi kin wicišpa wikcemna sanpa zaptan, ipatan yamni, qa sicu yamni.

15 Qa hiyete inonpaozanpi kin wicišpa wikcemna sanpa zaptan, ipatan yamni, qa sicu yamni, hocoka tiyopa kin anokatanhan hececa.

16 Hocoka ihdukšan ozanpi kin owasin minihuha ska nonpa kahmupi.

17 Ipatan sicupi kin hena mazasa, qa ipatan yukšanpi kin, qa satapi kin mazaska, qa ipatan pahapi kin mazaska on apawinta; qa hocoka ipatan kin owasin mazaska on icikoyag yapi.

18 Qa hocoka tiyopa toakahpe kin he minihuha ska nonpa kahmupi, qa to, qa štan qa duta ipatapi; qa ohanske cin wicišpa wikcemna nonpa, qa obosdatu ohdakinyan kin hee wicišpa zaptan hocoka ozanpi kin iyececa.

19 Qa ipatan topa, qa sicupi topa mazasa; qa yuksanpi kin mazaska; qa pahapi qa satapi kin mazaska on apawintapi.

20 Qa tipi wihutipaspe, qa hocoka ihdukšan wihutipaspe kin owasin mazasa.

 21 Tipi wakan woyakapi kin hee, woyaatanin tipi kin,Moses i kin oyaka, Levi kin kicanyanpi kta Aaron wawayušna cinhintku Ithamar ihukuya.

22 Unkan Bezaleel Uri cinhintku, Hur cinhintku, Judah wicoun etanhan, taku Jehovah Moses kah ši kin owasin kaga.

23 Qa he kici Aholiab, Ahisamach  cinhintku, Dan wicoun etanhan, he wayupiya wapago, qa wapazunta, qa wipata, minihuha ska, qa to, qa štan, qa duta on.

 24 Taku kagapi owasin tipi wakan kin on kagapi, mazaskazi ocowasin mazaskazi ituhanpi kin he woqin wikcemna nonpa sanpa napciwanka, qa šeqel opawinge šakowin , qa wikcemna yamni, tipi wakan šeqel he iyececa.

25 Qa omniciye wicayawapi I kin etanhan mazaska kin woqin opawinge, qa šeqel kektopawinge sanpa opawinge šakowin , sanpa wikcemna šakowin sanpa zaptan tipi wakan šeqel iyececa.

26 Kibaspapi wan wicapa otoiyohi on šeqel hanke kin hee, tipi wakan šeqel iyececa, tona wicayawapi kta ahiyayapi, waniyetu wikcemna nonpa qa iwankam, kektopawinge opawinge šakpe qa kektopawinge yamni, qa opawinge zaptan qa wikcemna zaptan.

 27 Unkan mazaska woqin opawinge kin hena sdoyapi qa tipi wakan sicu kin, qa cokaya ozanpi sicu kin kaga, woqin opawinge oh sicu opawinge, woqin wan on sicu wanjidan.

28 Qa šeqel kektopawinge sanpa opawinge šakowin sanpa wikcemna šakowin sanpa zaptan on ipatan papi kin, qa satapi kin apawintapi qa ipatan yuksanpi kin kaga.

29 Qa mazasa ituhanpi kin woqin wikcemna šakowin , qa šeqel kektopawinge nonpa qa opawinge topa.

30 Qa he etanhan itkokipapi wakeya tiyopa sicu kin kage ca mazasa owayušna kin, qa mazasa oceti kin,qa owayušna tawakšica kin owasin.

31 Qa hocoka ihdukšan sicu kin, qa hocoka tiyopa sicu kin, qa tipi wihutipaspe owasin, qa hocoka ihdukšan wihutipaspe owasin.

 HDNAPAPI WICOWOYAKE 39.

1 Unkan hahonta to, qa štan, qa duta on ohodapi wokoyake kin tipi wakan ohna wohtani econpi kin hena heyake wicakicagapi qa wokoyake wakan Aaron on kagapi, Jehovah Moses econ ši qon he iyececa.

 2 Unkan amdo akahpe kin kaga mazaskazi, qa hahonta to qa štan qa duta, qa minihuha ska.

 3 Qa mazaskazi kin zibzipedan kamdayapi qa basosopi, hecen hahonta to qa stan qa duta, qa minihuha ska icicahiya kazontapi kta.

4 Qa amdo akahpe kin, icikoyag yapi kta e hiyete ikan kin kicagapi, ihanke napin ekta icikoyag yapi.

 5 Qa amdo ipiyake kin he akapatanhan un kin he iyecen kagapi, mazaskazi qa hahonta to, qa štan qa duta, qa minihuha ska, nonpa kahmupi on kagapi, Jehovah Moses econ ši kin he iyecen.

6 Unkan inyan wicašake iyecen hena kicanyanpi Israel cinhintku cajepi kin hena akan apagopi, ipuspe pagopi kin he iyecen, qa mazaskazi ozepi ohna iyeyapi.

7 Qa amdo akahpe hiyete akan hena ahnaka, wokiksuye Israel cinca kin on, Jehovah Moses econ ii kin he iyecen.

8 Unkan maku akahpe kin kaga, mazaskazi, hahonta to, qa štan, qa duta, qa minihuha ska nonpa kahmupi kin hena kazuntapi, amdo akahpe kin he iyecen.

9 He topa omdoton, icitakihna he kagapi, ohanske cin napapasdecapi qa ohdakinyan kin napapašdecapi, icitakihna.

10 Qa he ohna inyan ocankuye topa ojuyapi, ocankuye wan, sardius, qa topaz qa carbuncle, ocankuye tokaheya kin hee.

11 Qa ocankuye inonpa kin he, emerald, qa sapphire, qa diamond:

12 Qa ocankuye iyamni kin he ligure, qa agate, qa amethyst;

13 Qa ocankuye itopa kin he beryl, qa inyan wicasake iyececa, qa jasper; hena ihdukšan mazaskazi ozepi en ojuyapi.

14 Qa inyan kin hena Israel cinca ake nonpa cajepi kin iyececa, ipuspe pagopi kin he iyecen, wicoun ake nonpa cajepi kin otoiyohi inyan wanji akan apagopi.

15 Qa maku akahpe kin ihanke anog ekta mazaskazi ecedan icicahiha yuhmupi kagapi.

16 Qa mazaskazi ozepi nonpa kagapi, qa mazaskazi napcupe nonpa, qa maku akahpe oise nonpa kin en, maza napcupe nonpa ikoyag yapi.

17 Qa maza napcupe nonpa maku akahpe oise en unpi kin hena ohna mazaskazi ikan nonpa kin iyeyapi.

18 Qa ikan nonpa ihanke nonpa maza ozepi nonpa en iyakaškapi qa amdo akahpe hiyete akan ite ekta-kiya iyakaškapi.

19 Qa mazaskazi napcupe nonpa kagapi, qa maku akahpe oise nonpa en iyakaškapi, mahentuya amdo akahpe ekta kiya opapunen.

20 Unkan mazaskazi napcupe nonpa kagapi, qa amdo akahpe hiyete nonpa en ikoyag yapi, ihukuya ite ekta kiya, icikoyag yapi iyotakons, amdo akahpe, ipiyaka iwankam.

21 Qa hahonta to wan on maku akahpe maza napcupe ekta iyakaškapi, hecen amdo akahpe ipiyaka akan yanke kta, qa maku akahpe kin amdo akahpe kin etanhan yukinukan kte šni.

22 Unkan amdo akahpe nitoske kin ocowasin to kazuntapi kin he kaga.

23 Qa nitoske i kin he nitoske cokaya, minihuha maku akahpe i kin he iyececa, i kin ihdukšan apahdan tonpi, nahdece kte šni heon etanhan.

24 Unkan nitoske upi akan taspantanka seca to, qa štan qa duta nonpa kahmupi on kagapi.

25 Unkan mazaskazi ecedan hdahda kieagapi, qa mazahdahda kin taspan tanka seca ehna kaškapi, nitoske upi akan ihdukšan taspantanka seca otahedan.

26 Mazahdahda qa taspantanka seca, mazahdahda qa taspantanka seca, nitoske ohna ohoda kin upi kin ihdukšan akan, Jehovah Moses econ si kin he iyecen.

27 Unkan mahen unpi Aaron on, qa iye cinhintku, wicakicagapi, minihuha ska kazuntapi.

28 Unkan minihuha pa ipante kin qa minihuha wapaha wašte, qa minihuha onzeoge minihuha ska nonpa kahmupi.

29 Qa ipiyaka minihuha ska nonpa kahmupi, qa to, qa stan, qa duta, ipatapi he kagapi, Jehovah Moses econsi qon he iyecen.

30 Unkan mazaskazi ecedan mdaska watešdake wakan kin kagapi, qa JEHOVAH WOWAKAN PO, akan owapi, ipuspe pagopi kin he iyecen owapi.

31 Qa hahonta to wan ekta iyakaškapi, he on pa ipahte kin akan akapatanhan iyakaškapi; Jehovah Moses econ ši qon he iyecen.

 32 Hecen itkokipapi wakeya tipi kagapi kin ocowasin yuštanpi, token Jehovah Moses econ ši kin owasin he iyecen Israel cinca kin yuštanpi.

33 Unkan tipi kin Moses ekta kahipi; wakeya kin, qa taku on kicanyanpi kin owasin, tamaza taspu, tacanmdaška, tacanhdakinyan, qa taipatan, qa tasicu kin;

34 Qa tahcaska mdoka ha šayapi on akahpe kin, qa hoka ha on akahpe kin, qa cokaya ozanpi kin;

35 Qa woyaatanin canwohnaka kin, qa tosu kin, qa wokajuiju iha kin;

36 Wahna wotapi tawakšica koya owasin, qa aguyapi itokam hnakapi kin;

37 Petijanjan ihupa ecedan kin, petijanjan kin koya, petijanjan kicanyanpi kin hena, qa taku on kicanyanpi kin owasin, qa wihdi on iyoyam yapi kin;

 38 Qa mazaskazi owayušna kin qa sdawicayapi wihdi kin, qa taku waštemna on wizin yapi kin, qa wakeya tiyopa akahpe kin;

39 Mazasa owayušna kin, qa mazasa oceti tawa kin, qa tatosu kin qa taku on kicanyanpi kin .owasin; mazasa koka kin, tacetetahe koya.

40 Hocoka ozanpi kin, can bosdata kin qa sicu kin, qa hocoka tiyopa oakahpe kin, taikan kin, qa tawihutipaspe kin qa itkokipapi wakeya ohna ohodapi kin, tawakšica koya owasin;

 41 Ohodapi wokoyake kin on tipi wakan ohna ohodapi, Aaron wawayušna tawokoyake wakan kin, qa cinhintku wokoyake unpi wawayušnapi ece kta.

42 Taku Jehovah Moses econ ši kin owasin, he iyecen Israel cinca kin taku owasin kagapi.

43 Unkan Moses taku kagapi kin owasin wanyaka; unkan in yun taku Jehovah kah wicaši kin owasin he iyecen kagapi, unkan Moses wicayawašte.

HDNAPAPI WICOWOYAKE 40.

1 Unkan Jehovah ie ca Moses heciya,

2 Wi tokaheya, anpetu tokahe ya en itkokipapi wakeya tipi kin eyahde kta.

3 Qa he ohna woyaatanin can wohnaka kin eyahnake kta, qa can wohnaka kin akapatanhan cokaya ozanpi kin otkeyaye kta.

4 Qa wahna wotapi kin he en hiyuyaye kta, qa taku akan hnakapi kin hena akan eyahnake kta, qa petijanjan ihupa kin yakahi kta, qa petijanjan kin ideyaye kta.

 5 Qa mazaskazi owayušna kin wizinyapi kta e woyaatanin can wohnaka itokam eyahnake kta, qa tipi tiyopa oakanpe otkeyaye kta.

6 Qa peta wošnapi owayušna kin itkokipapi wakeya tipi tiyopa itokam eyahde kta.

7 Qa koka kin he itkokipapi wakeya kin, qa owayušna kin otahedan eyahde kta, qa he ohna mini oyakaštan kta.

8 Qa he ihdukšan hocoka kin eyahde kta, qa hocoka tiyopa oakahpe kin otkeyaye kta.

9 Qa sdawicayapi wihdi kin he iyacu kte ca tipi kin, qa taku ohna un kin, owasin sdayaye kta, hecen he qa taku on kicanyanpi kin owasin duwakan kta, unkan wakan kta.

10 Qa peta wošnapi owayušna kin he sda yaye kta, taku on kicanyanpi nakun owasin; hecen owayušna kin duwakan kta; qa owayušna kin wakan hinca kta.

11 Qa koka kin he sdayaye kta, tacetetahe nakun, hecen he duwakan kta.

12 Unkan Aaron, iye cinhintku om, itkokipapi wakeya tiyopa kin ikiyedan hiyu wicayaye kta, qa mini on wicadujaja kta.

 13 Qa wokoyake wakan kin he Aaron koyag yaye kta, qa sda yaye kta, hecen wamiciyušna kta e duwakan kta.

14 Unkan cinhintku kin ikiyedan hiyu wicayaye kta, qa mahen unpi kin hena koyag wicayaye kta.

15 Qa atkukupi kin sda yaye ciqon he iyecen sda wicayaye kta, hecen wamiciyušnapi kta, qa sdawicayapi kin on owihanke wanin wawayušna hecapi kta, wicoicagepi yeye cin ohna.

16 Unkan token Jehovah Moses econsi kin owasin he iyecen econ.

17 Unkan kaketu wetu inonpa wi tokaheya,anpetu tokaheya kin he ehan tipi wakan kin ehdepi.

 18 Qa Moses tipi kin ehde qehan tasicu kin eju, qa tacanmdaška kin en iyeya, qa tacanhdakinyan ohna iyoopte iyeya, qa taipatan kin ehde.

19 Qa tipi lwankapatanhan wakeya kin yumdaya, qa wakeya oakahpe kin he wakeya akapatanhan iwankam yunidaya, Jehovah Moses econ ši qon he iyecen.

20 Unkan woyaatanin kin he icu, qa canwohnaka mahen ehnaka, qa tosu kin canwohnaka ekta iyeya, qa wokajuju iha kin canwohnaka akan ehnaka iwankapatanhan.

21 Qa canwohnake kin tipi kin mahen hiyuye ca cokaya ozanpi kin otkeya, hecen woyaatanin canwohnaka kin akahpa, Jehovah Moses econ si kin he iyecen.

22 Qa wahna wotapi kin he itkokipapi wakeya ohna ehde, tipi cuwi waziyata ekta kiya, cokaya ozanpi itankan.

23 Qa he akan aguyapi itokam hnakapi kin heca tanyan ehnaka, Jehovah itokam, Jehovah Moses econ ši kin he iyecen.

24 Qa petijanjan ihupa kin itkokipapi wakeya mahen ehde, wahna wotapi kin iyotakonš, tipi cuwi itokaga ekta kiya.

25 Qa petijanjan kin hena ideya, Jehovah itokara, Jehovah Moses econ ši kin he iyecen.

26 Unkan mazaskazi owayušna kin he itkokipapi wakeya mahen ehde, cokaya ozanpi kin itokam.

27 Qa he akan taku waštemna wizinyapi kin izin ya, Jehovah Moses econ ši kin he iyecen.

28 Qa tipi tiyopa akahpe kin he otkeya.

29 Qa wahuhnah. yapi owayušna kin he itkokipapi wakeya tipi tiyopa kin ikiyedan ehde, qa he akan wohuhnahyapi qa minha kin iiuhnahya.

 30 Qa koka kin itkokipapi wakeya kin, qa owayušna kin ota, hedan ehde qa mini on yujajapi kte hen okaštan.

31 Unkan hetanhan Moses qa Aaron iye cinhintku om napepi sihapi ko ihdujajapi,

32 Itkokipapi wakeya en ipi eca; qa owayušna ikiyedan ipi eca ihdujajapi ece, Jehovah Moses econ si kin he iyecen.

33 Unkan tipi kin owayušna i kin koya ihdukšan hocoka kin ehde, qa hocoka tiyopa akahpe kin otkeya, hecen Moses wohta; ni kin hduštan.

34 Hehan mahpiya soka qon itkokipapi wakeya kin akahpa, qa Jehovah towitan kin tipi kin ojunya.

 35 Unkan Moses itkokipapi wakeya en i kta okihi šni, mahpiya qon he akan ounyan qa Jehovah towitan kin tipi kin oju ya nakaš.

 36 Unkan mahpiya kin wankan iyaya eca, Israel cinca kin ihdakapi ece, unhdakapi kin owasin en hececa.

 37 Tuka mahpiya kin wankan iyaye šni kinhan, ihdakapi šni ece, wankan iyaye šni kin hehanyan.

38 Jehovah mahpiya šokakin tipi kin akan yanka, anposkantu eca, tukahanyetu ca heohnapetaicaga, Israel cinca tipi kin owasin unhdakapi owasin en he wanyakapi.