Wicoicage (Genesis) 1-25

WICOICAGE

WICOWOYAKE 1.

1 Otokahe ekta Wakantanka mahpiya kin maka kin ahna kaga

2 Unkan maka kin tanton šni, qa takudan ohnaka šni, qa otpaza osbe kin akan wanke ca, Wakantanka Taniya kin mini kin aman.

3 Unkan Wakantanka, Ojanjan kta, eya. Unkan ojanjan.

4 Unkan ojanjan wanke cin, he Wakantanka wašte e wanhdake ca, Wakantanka ojanjan kin otpaze cin kici yukinukan ehnaka.

5 Qa Wakantanka ojanjan kin, Anpetu eciya, otpaze cin iš, Hanyetu eciya. Unkan ohtayetu, qa ohanhanna he anpetu tokaheya kin hee.

 6 Unkan, Okotonyan wanke kte, mini kin okitahedan, qa mini kin mini kin yukinukan kte, Wakantanka eya.

7 Unkan okotonyan kin Wakantanka kage ca, mini okotonyan kuyatanhan kin, qa mini okotonyan akantanhan kin kici yukinukan. Unkan ecetu.

 8 Unkan okotonyan kin he Wakantanka, Mahpiya eciya. Unkan ohtayetu, qa ohanhanna anpetu icinonpa kin hee.

 9 Unkan, Mahpiya kin ihukuya mini wanke cin icunonpa kawitaya kte, ca taku puze cin taninyan wanke kte, Wakantanka eya. Unkan ecetu.

10 Unkan taku puze cin he Wakantanka, Maka eciye ca, mini kiwitaya kin he, Miniwanca eciya, qa he Wakantanka wašte e wanhdaka.

11 Hehan Wakantanka heya, Maka kin wato icahye kte, peji kin he su icahye kte. waskuyeca can kin he waskuyeca icahye kte, waskuyeca mahen su yuke kte, ocaje otoiyohi su kin icahye kta, maka akan, Wakantanka eya. Unkan ecetu.

12 Unkan maka kin wato aicaga, peji kin ocaje otoiyohi su aicage ca, can kin waskuyeca aicaga otoiyohi mahen su kin yukan ece. Unkan he wašte e Wakantanka wanhdaka.

13 Unkan ohtayetu, qa ohanhanna he anpetu iciyamni kin hee.

14 Unkan Wakantanka heya, Mahpiya okotonyan kin ekta taku iyoyanpa yuke kte, on anpetu hanyetu kici yukinukanyan un kte ca, heon woyaka unpi kte, makoncage, anpetu, omaka, henakiya.

15 Qa mahpiya okotonyan kin ekta hena iyoyanpa un kte, maka kin iyoyan ye kte, eya. Unkan ecetu.

16 Wakantanka wiiyoyanpa nom tankinyanyan kaga, tuka uman iyotan tanka kin he anpetu en ounye kte ca uman aoptetu kin he hanyetu en ounye kte; wicanhpi nakun.

17 Hena mahpiya okotonyan kin ekta Wakantanka ehnaka, maka kin iyojanjan kta e hecon.

18 Anpetu hanyetu ko ohinniyan ounye wicakiya, qa ojanjan kin otpaze cin kici yukinukanyan ounye kiya. Unkan he wahike e Wakantanka wanhdaka.

19 Unkan ohtayetu, qa ohanhanna he anpetu icitopa kin hee.

20 Unkan Wakantanka heya, Mini kin taku niyake ota icahye kta, qa taku kinyan maka kin iwankam mahpiya okotonyan kin ohna okinyanpi kte.

21 Hecen Wakantanka hogan tankinyanyan oicahye, ca taku niyake, taku mini oicage cin ocaje hiyeye cin owasin, hena mini icahkiye ca, taku kinyan hupahu tonyan ocaje otoiyohi. Unkan he Wakantanka wašte e wanhdaka.

22 Hena Wakantanka yawašte qa hecen ewicakiya, lcagapi qa ihduotapo,qa miniwanca kin ojudan yakon po, qa taku kinye cin maka akan ihduotapi kte.

23 Unkan ohtayetu, qa ohanhanna he anpetu icizaptan kin hee.

24 Hehan Wakantanka heya, Maka kin taku niyake oicage cin iyecen icahye kte; woteca, watutka, wamanica, henakiya ocaje otoiyohi, eya. Unkan ecetu.

25 Hecen wamanica ocaje otoiyohi, woteca ocaje otoiyohi, qa taku maka asdohan owasin ocaje otoiyohi, henakiya Wakantanka wicakage, ca he wašte e Wakantanka wanhdaka.

26 Hehan Wakantanka hecen eya, Unkiye iyeuncecapi qa ouncage unkitawapi kin en wicašta unkagapi kta, qa miniwanca ekta hogan oicage cin wicayuhe kte, mahpiya ekta taku kinye cin nakun, qa woteca qa maka kin ocowasin, qa watutka taku maka akan sdohan, ocaje owasin yuhe kta.

27 Wakantanka eyaya iye iyececa wicašta wan kaga, Wakantanka ouncage iyececa kaga; wica winyan kici wicakaga.

28 Qa Wakantanka wicayawašte qa, lcagapi, qa ihduotapo, qa maka kin ojudan iciyapo, qa denakiya wicayuha yaunpi kta, miniwanca ekta hogan oicage, ca mahpiya ekta taku kinye cin, qa taku niyake maka aškanškan oicage cin owasin, tawa wicaya po; Wakantanka ewicakiya.

29 Unkan, Ito taku maka akan waicahya suton wojupi owasin cicupi, can waskuyeca suton oicage cin owasin, hena nakun; hena woyute yayapi kta.

30 Tuka taku maka akan ni un kin, mahpiya taku okinye cin, qa taku maka aškanškan kin, taku niya un kin owasin, hena peji wato owasin woyute wicawaqu, Wakantanka eya. Unkan ecetu.

31 Unkan Wakantanka taku kage cin owasin wanhdaka; unkan iyotan wašte. Unkan ohtayetu qa ohanhanna he anpetu icišakpe kin hee.

WICOICAGE WICOWOYAKE 2.

1 Hecen mahpiya kin maka kin iyahna, qa taku ohnaka hiyeye cin owasin tanyan yuštanpi.

2 Unkan anpetu icišakowin , Wakantanka tohtani kage cin owasin ayustan, qa anpetu icišakowin kin en tohtani kage ciqon etanhan okihpa.

 3 Qa Wakantanka anpetu icišakowin kin he hdawašte, qa hduwakan. Tohtani Wakantanka kage cin owasin anpetu kin he en ayuštan, qa okihpa, heon etanhan.

 4 Mahpiya maka ko kagapi kin, Jehovah Wakantanka maka mahpiya ko kage cin, anpetu kin he en, woicage oyakapi kin dee.

5 Can hiyeye cin owasin maka kin en he šni itokam, peji tinta oicage cin owasin uye šni itokam, Jehovah Wakantanka nahahin maka kin amagaju ye šni, qa wicašta maka kicanye kte cin wanica.

6 Qa maka kin etanhan po wankantkiya u, qa maka itohnake kin owancaya acuya.

7 Hehan Jehovah Wakantanka, maka mdu kin etanhan, wicašta wan kage, ca poge ondoka ohna ipoh iyeya hecen wicašta nagi ni un kin icaga.

8 Unkan Jehovah Wakantanka, Eden heciya wihinanpe cin ekta, wojupi wan kage ca wicašta kin he en ehnaka.

9 Qa Jehovah Wakantanka can kin owasin tona owanyag wašte, qa tona woyute wašte aicage cin, maka kin etanhan icahya, qa wojupi kin cokaya, can wiconi wan kage ca, can wan on taku wašte taku šica ko sdonyapi kin he nakun en icahya.

10 Unkan can wojupi kin hpan ye kta e, watpa wan Eden etanhan uye ca hetanhan ointpa torn icaga.

11 Ointpa tokaheya kin Pison eciyapi; he Havilah makoce kin owancaya ohomniya.

12 Heciya mazaskazi yuke, ca mazaskazi makoce kin he en iyeyapi kin he wašte. Heciya Bedola, qa ihe wicašake iyececa.

13 Watpa inonpa Gihon eciyapi; he Ethiopia makoce kin ohna iyaya.

14 Qa watpa iyamni kin Hiddekel eciyapi; he Assyria makoce kin wiyohiyanpata kiya kaduza. Qa watpa itopa kin Euphrates hee.

15 Unkan Jehovah Wakantanka Adam icu, qa Eden wojupi kin he kicanye ca awanyake kta e, en ehnaka.

16 Qa Jehovah Wakantanka wicašta kin hecen eciya, Can wojupi kin owasin etanhan icakiš iciye šni yate kta.

17 Tuka can wan, taku wašte taku šica ko on sdonyapi kin de etanhan yate kte šni; tohan hetanhan yate cinhan anpetu kin he en nite kta.

 18 Hehan Jehovah Wakantanka, Wicašta kin de išnana un kin he šica, wanji iye iyececa wecage kta, eya.

 19 Wanna Jehovah Wakantanka, maka kin etanhan tinta wamanica owasin wicakaga, mahpiya etkiya taku kinye cin ko owasin, qa Adam en u wicakiya, token cas wicaton kte cin sdonye kta e heon. Unkan token Adam owasin cas wicaton, hecen taku ni un kin otoiyohi caje wicayatapi.

20 Hecen Adam woteca owasin cas wicakiton, mahpiya ektakiya taku kinye cin ko owasin, tinta wamanica nakun owasin; tuka Adam ookiye iye iyececa wanjidan iyeyapi šni.

 21 Unkan Jehovah Wakantanka woistima tanka wan Adam ahinhpaye ya, unkan ištima. Unkan Wakantanka cutuhu kin wanji yujon icu, qa conica kin ecen paohduta iyeya.

 22 Qa Jehovah Wakantanka cutuhu kin, wicašta etanhan icu qon on winyan wan kage, ca wicašta kin en kai.

23 Unkan, Mihu kin etanhan de hu ye ca, micehpi kin etanhan cehpi ya. De wicašta kin etanhan icupi kin, heon de winohinca eciyapi kta, Adam eya.

24 He etanhan wicašta atkuku hunku kici awicayustan, qa tawicu kin en ikoyag iciye kta, hecen cehpi wanjipidan kta.

25 He ehan Adam tawicu kici napin oge iciton šni yakonpi; tuka istecapi šni.

WICOICAGE WICOWOYAKE 3.

1 Wanna wamanica hiyeye cin owasin Jehovah Wakantanka wicakage cin, wamduška kin hecedan ksapa: qa wamduška kin winyan kin heciya, Can wojupi kin en can otoiyohi etanhan yatapi kte šni awicakehan Wakantanka eya he?

2 Unkan winyan kin wamduška kin heciya, Can wojupi en can waskuyeca aicage cin hena untapi kta ce.

3 Tuka can wanjidan wojupi cokaya he cin, he taku aicage cin heceedan, Ihnuhan yatapi qa odutanpi kin, hecanonpi kinhan nitapi ktace, Wakantanka eya ce.

4 Unkan wamduška kin winohinca kin hecen eciya, Nitapi kte šni tuka heya ce;

 5 Anpetu kin en he yatapi kinhan niš eya ista nimdezapi, qa taku wakan iyenicecapi, taku wašte taku šica ko sdonyayapi kte cin he Wakantanka sdonya, he etanhan heya ce.

 6 Unkan can kin waskuyeca woyute wašte, owanyag wašte, qa wicimdeza ksam wicaye kte cin he, winohinca wanyake cehan waskuyeca kin icu, qa yute ca hihnaku kin qu, qa iš eya yuta.

7 Unkan napin išta mdezapi, qa tancodan yakonpi kin, hehan sdonkiciyapi, qa suken can ape heca kagegepi, qa on oge icitonpi.

8 Unkan anpetu kin cu šni hehan, Jehovah Wakantanka ho kin wojupi kin ohna mani kin he nahonpi, qa Wakantanka itohnake kin etanhan wojupi can kin ehna naicihmanpi.

 9 Hehan Jehovah Wakantanka Adam kipan, qa heciya, Tukten yaun he?

10 Unkan Adam ayupte ca, Niho kin nawahon qa kowakipe ca namicihbe, tancodan waun kin heon etanhan, eya.

11 Unkan tancodan yaun kin tuwe oniciyaka he? Can wanjidan etanhan yute šni cisi qon, hetanhan yata he? eya.

12 Unkan Adam heya, Winohinca mayaqu hee, qa mici un kin, iye can kin etanhan maqu, qa wata ce.

 13 Unkan Jehovah Wakantanka winohinca kin heciya, Tokeca hecanon he? Unkan, Wamduška kin mahnaye ca wata ce, winohinca kin eya.

14 Unkan Jehovah Wakantanka wamduška kin hecen eciya, Niye decanon, qa heon woteca watutka ko owasin, niš nana niyašicapi. Itpi kin on maka kin asdohan yaun qa tohan yani kin hehanyan maka ece yate kta.

15 Qa detanhan niš winohinca kin kici toka kiciya yaunpi kta, qa winohinca cinhintku kin nicinca kici toka kiciya yaunpi kta. He pa kin nicuwa kta, qa nis he siyete kin heyakuwa kta.

16 Hehan winohinca kin heciya, Iyonicišice ca ihdunišake cin nina mduota kta. Iyokisinya cinca yaton, qa nihihna cantiheyaye ca iye wowidag niye kta.

17 Unkan wicašta kin heciya, Nitawin kin token eniciye cin anayagoptan, qa can wan etanhan yute šni ciši qon, etanhan yate cin heon niye on etanhan maka kin yašicapi. Taku aicage cin on htayani qa hecen yate kta, tohan yani kin hehanyan.

18 Wapepeka toka hu ko icah niciye kta, qa peji maka aicage cin yate kta.

 19 Niite tenimni kin on aguyapi yahdute kta, maka inicu kte cin hehanyan. Maka kin etanhan inicagapi nakaeš, maka mdu kin henica qa maka kin ekta icicawin yahde kta.

20 Hehan Adam iye tawicu kin, Eve eya cas kiton; taku ni un kin owasin he ina yanpi kin he on etanhan.

21 Unkan Jehovah Wakantanka Adam tawicu kin kici wakihdaka okde wicakicage ca oge wicakicaton.

22 Qa Jehovah Wakantanka heya, Wicašta kin wanna unkiye wanji he iyeuncecapi, taku wašte taku šica ko sdonya, heon ihnuhan nape yekiye ca wiconi can kin etanhan icu, qa yute ca owihanke wanin ni kte cin.

23 Heon Jehovah Wakantanka wicašta kin Eden wojupi kin etanhan iyog iyeya; maka kin etanhan icage cin he kicanye kta ece.

24 Hecen wicašta kin tankan iyeya, qa can wiconi canku kin awanyake kta e, Eden wojupi wiyohiyanpa tanhan Cherubim mazasagye ideya škanškan un ko ewicahde.

WICOICAGE WICOWOYAKE 4.

 1 Unkan Adam tawicu kin Eve sdonya, unkan ihdu ake ca Cain he ton, qa, Jehovah etanhan wicašta wan mduha ce, eya.

2 Qa ake ihdušake ca sunkaku Abel ton. Unkan Abel tahcaska wanuyanpi wihan wicakiya, qa Cain maka kin kicanyan.

3 Unkan omaka ihanke kin hehan Cain waskuyeca maka aicage cin hee Jehovah wakiyušna.

 4 Unkan Abel tahcaska wanuyanpi tawa tokaheya tonpi wan, ihdi koya wošna. Unkan Jehovah Abel taku wakiyušna kin ko akicitonwan:

5 Tuka Cain taku wakiyušna ko akieikta šni. Unkan Cain canteptanye ca itohnake tokeca.

 6 Unkan Jehovah Cain heciya, Tokeca canniniye? ca itohnake enicetu šni?

7 Tanyan ecanon kinhan ihaniktapi kte šni he? Tuka tanyan ecanon šni kinhan woahtani tiyopa kin en yanka. Tuka niye qe cantiheniye kta qa niš wowidake yaye kta.

8 Unkan Cain sunkaku Abel okiya, qa wojupi ekta napin yakonpi qehan najin hiyaye ca sunkaku Abel kikte.

 9 Unkan Jehovah Cain heciya, Nisunka Abel tukte ehe? Unkan, Sdonwaye šni. Ecin miš unka kin he awanhdag waun he heya?

10 Unkan token yanan he? Nisunka we kin maka kin etanhan ho umakiya.

11 Qa wanna maka kin nisunka we kin ninape etanhan icu kta e i kin hdukawa kin he etanhan niyašicapi ce.

 12 Detanhan maka kin yakicanyan ešta, taku ota icah niciye kte šni. Maka kin de akan onuniyan qa najica yaun kta ce, eya.

13 Unkan Cain Jehovah heciya, Wawahtani kin he tanka kin kajujupica šni.

14 Anpetu kin dehan maka kin detanhan iyog iyemayaya, qa nitoye kin inahbe wakiye kta, maka kin akan onuniyan qa najica waun kta, qa tuwe kašta iyemaye cinhan makte kta.

15 Tuka Jehovah heciya, Tuwe Cain kte kinhan, šakowin akihde wošice akipe kta. Qa Jehovah Cain wapetog ton, hecen on tuwe wanyaka ešta ktepi kte šni.

16 Unkan Cain Jehovah itoye kin etanhan inapa, Eden wiyohiyanpa tanhan makoce wan, Nod eciyapi kin, he en ounyan.

17 Qa Cain tawicu kin sdonya, unkan ihdušake ca Enoch ton. Unkan Cain otonwe wan kage ca Enoch eya cas kiton, cinhintku caje kin iyecen.

18 Unkan Enoch cinca wan kicitonpi, Irad hee. Unkan Irad Mehujael cinksiya. Unkan Mehujael Methusael cinksiya. Unkan Methusael Lamech cinksiya.

19 Unkan Lamech winohinca nom wicayuza. Tokaheya kin Ada eciyapi, qa iyokihe Zillah eciyapi.

20 Unkan Ada Jabel ton; he tona wakeya otipi, qa wanuyanpi awanhdakapi kin, hena ateyapi.

21 Qa sunkaku Jubal eciyapi. Tona candowankiyapi cotanka ko, yahotaninpi kin, hena he ateyapi.

22 Unkan Zillah he Tubal-Cain ton. Taku mazazi on kagapi, qa mazasapa on kagapi ko owasin, iye onspe qa kaga. Qa Tubal-Cain tawinohtin Naamah hee.

23 Unkan Lamech tawicu Ada Zillah kici hewicakiya, Miho kin nahonpo, Lamek tawicu kin mioie kin anagoptanpo. Wicašta wan wakte, on camapapi,qa koška  wan on kiunimiciya ce.

24 Cain šakowin akihde tokiconpi kinhan, Lamek wikcemna šakowin sanpa šakowin tokiconpi kta ce, eya.

25 Unkan ake Adam tawicu kin sdonya; unkan cinca wan ton, qa, Wakantanka cinca tokeca wan maqu, Abel Cain kte qon hee kiya, eye ca Seth eya cas kiton.

26 Unkan Seth iš eya cinca wan kicitonpi, qa Enos eya cas kiton. Hehan tokaheya wicašta kin Jehovah caje kin hoyekiyapi.

WICOWOYAKE 5.

1 Adam wicowazi wowapi kin dee. Wakantanka Adam kage cehan, Wakantanka ouncage iyecen icah kiya.

2 Wica winyan ko wicakage ca wicayawašte, qa wicakage cehan Adam eya cas wicaton.

3 Unkan Adam waniyetu opawinge sanpa wikcemna yamni ni, qa cinca wan iye ouncage iyecen kicitonpi, qa Seth eya cas kiton.

4 Qa Seth tonpi kin he iyohakam, Adam waniyetu opawinge sahdogan ni, qa cinca wica winyan ko kicitonpi.

 5 Hecen anpetu owasin Adam ni un kin hena waniyetu opawinge napciwanka sanpa wikcemna yamni, hehan ta.

 6 Unkan Seth waniyetu opawinge sanpa zaptan ni, qa Enos kicitonpi.

7 Qa Seth Enos tonpi kin iyohakam waniyetu opawinge šahdogan sanpa šakowin ni, qa cinca wica winyan ko kicitonpi.

8 Hecen anpetu owasin Seth ni un kin hena waniyetu opawinge napciwanka sanpa ake nonpa, hehan ta.

9 Unkan Enos waniyetu wikcemna napciwanka ni, qa Cainan kicitonpi.

10 Qa Cainan tonpi kin iyohakam Enos waniyetu opawinge šahdogan sanpa wikcemna sanpa zaptan ni, qa cinca wica winyan ko kicitonpi.

11 Hecen anpetu owasin Enos ni un kin hena waniyetu opawinge napciwanka sanpa zaptan, qa hehan ta.

12 Unkan Cainan waniyetu wikcemna šakowin ni, qa Mahalaleel kicitonpi.

13 Qa Cainan Mahalaleel tonpi kin iyohakam waniyetu opawinge šahdogan sanpa wikcemna topa ni, qa cinca wica winyan ko kicitonpi.

14 Hecen anpetu owasin Cainan ni un kin hena waniyetu opawinge napciwanka sanpa wikcemna, hehan ta.

 15 Unkan Mahalaleel waniyetu wikcemna šakpe sanpa zaptan ni, qa Jared kicitonpi.

16 Qa Mahalaleel Jared tonpi kin iyohakam waniyetu opawinge šahdogan sanpa wikcemna yamni ni, qa cinca wica winyan ko kicitonpi.

 17 Hecen anpetu owasin Mahalaleel ni un kin hena waniyetu opawinge šahdogan sanpa wikcemna napciwanka sanpa zaptan, hehan ta.

18 Unkan Jared waniyetu opawinge sanpa wikcemna šakpe sanpa nonpa ni, qa Enoch kicitonpi.

19 Qa Jared Enoch tonpi kin iyohakam waniyetu opawinge šahdogan ni, qa cinca wica winyan ko kicitonpi.

20 Hecen anpetu owasin Jared ni un kin hena waniyetu opawinge napciwanka sanpa wikcemna šakpe sanpa nonpa, hehan ta.

21 Unkan Enoch waniyetu wikcemna šakpe sanpa zaptan ni, qa Methuselah kicitonpi.

 22 Qa Enoch Methuselah tonpi kin iyohakam waniyetu opawinge yamni Wakantanka opeya mani, qa cinca wica winyan ko kicitonpi.

 23 Hecen Enoch anpetu tawa owasin waniyetu opawinge yamni sanpa wikcemna šakpe sanpa zaptan.

 24 Qa Enoch Wakantanka opeya mani, qa en un šni, Wakantanka he ikikcu nakaeš.

25 Unkan Methuselah waniyetu opawinge sanpa wikcemna šakowin sanpa šahdogan ni, qa Lamech kicitonpi.

26 Qa Lamech tonpi kin iyohakam Methuselah waniyetu opawinge šakowin sanpa wikcemna šahdogan sanpa nonpa ni, qa cinca wica winyan ko kicitonpi.

 27 Hecen anpetu owasin Methuselah ni un kin hena waniyetu opawinge napciwanka sanpa wikcemna šakpe sanpa napciwanka, hehan ta.

28 Unkan Lamech waniyetu opawinge sanpa wikcemna šahdogan sanpa nonpa ni, qa cinca wan kicitonpi.

29 Qa,Jehovah maka kin yašice cin he nape on unkicanyanpi, qa htaunnipi kin en unkikiyapi kte cin dee ce, eye ca Noah eya cas kiton.

30 Qa Lamech Noah tonpi kin iyohakam waniyetu opawinge zaptan sanpa wikcemna šakowin sanpa zaptan ni, qa cinca wica winyan ko kicitonpi.

31 Hecen anpetu owasin Lamech ni un kin hena waniyetu opawinge šakowin sanpa wikcemna šakowin sanpa šakowin , hehan ta.

32 Unkan Noah wanna waniyetu opawinge zaptan, hehan Šem, Ham, qa Japeth, kicitonpi.

 WICOICAGE WICOWOYAKE 6.

1 Hehan wicašta maka akan ota ayapi, qa cunwintkupi kicitonpi.

2 Unkan Wakantanka cinkšiwicaye cin wicašta cunwintkupi kin hena e wašte wanwicayakapi, qa tona cinpi kin hena etanhan, winohinca wicayuzapi.

3 Unkan Jehovah heya, Wicašta kin wicacehpi kin heca heon wantanipi en mitaniya he kici owitianke wamni ounye kte šni, tuka anpetu tawa kin hena waniyetu opawinge sanpa wikcemna nonpa kta.

 4 Unkan anpetu kin hena icunhan, maka kin akan wazise yakonpi, qa Wakantanka cinkšiwicaye cin wicašta cunwintkupi kin wicayuzapi, qa cinca kicitonpi kin, hena eepi he iyohakam wicašta wašakapi, wanakaja tanhan wicašta nina caje wicayatapi.

5 Unkan wicašta maka akan wahtanipi kin ota e, Jehovah wanyaka, anpetu osan wicocante oze okah otoiyohi ecedan šica.

 6 Unkan wicašta maka akan icah wicaye cin heon, Jehovah iyopeiciye ca cante iyokišin ici.

7 Qa, Wicašta icah wicawaye cin, maka itohnake kin otanhan wicawakahinte kta; wicašta, qa woteca, qa watutka, qa taku mahpiya ektakiya kinyan un kin henakiya icah wicawaye cin heon iyopemiciya ce, Jehovah eya.

8 Tuka Jehovah Noah wanyake ca wacin en yuza.

9 Noah wicoicage oyakapi kin dee. Noah wicašta ohan owotanna, qa hecetu wicoicage tawa kin hen, qa Noah Wakantanka opeya mani.

10 Qa Noah cinca yamni kicitonpi, Šem, Ham qa Japeth.

11 Unkan Wakantanka itokam maka kin honwin ce, qa maka owancaya nina waboticapi.

12 Unkan Wakantanka maka kin wanyaka, unkan honwin; wicacehpi owasin maka akan iye tacankupi kin honwin kiyapi ce.

13 Unkan Wakantanka Noah heciya, Taku cehpi yukan owasin owihanke kin mitokam u ce iyepi kin on maka kin waboticapi on ojudan; qa maka kin etanhan Lhang wicawaye kta.

14 Wazi can on wata wan icicaga wo. Mahentu kin oskiskeya yakage kta, qa mahen tanhan akapa tanhan ko, canšinapawinta wo.

 15 Qa hecen yakage kta. Wata ohanske cin wicišpa opawinge yamni, ohdakinyan kin wicišpa wikcemna zaptan, qa obosdatu kin wicišpa wikcemna yamni kta.

16 Qa wata kin en ojanjan hdepi yakage kta, qa wankantuya wicišpa wanjidan en yahduštan kta. Wata tiyopa kin cuwi kin ekta yakage kta. owanka tokaheya, inonpa, qa iyamni yakage kta.

17 Wanna miye maka akan mini tan waye kta, heon taku cehpi yuke cin niyake iyeye cin owasin mahpiya ihukuya, ihang waye kta. Taku maka akan un kin owasin te kta.

18 Tuka wicotakuye mitawa kin niye en nidi wahdusuta kta, wata kin en oyape kta nicinca om, nitawin, nicinca tawicupi kin, henana om.

19 Qa taku niya un kin owasin, taku cehpi yukan hiyeye cin ocaje otoiyohi, nom nom mdoka wiye iyahnahna, en owicayahnake kta; ni wicayaye kta e niye kici wata kin en upi kta.

20 Taku kinye cin token ocaje, woteca token ocaje, warnanica maka akan unpi kin token ocaje, owasin ocaje otoiyohi nom nom niyake wicaduhe kta e niye en upi kta.

21 Qa niye taku yutapi kin ocaje otoiyohi etanhan icu, qa mnayan wo; hecen taku yutapi anihduhe, ca woteca kin iš iyacinyan wicayakihduhe kta.

22 Unkan Noah Wakantanka token eciye cin, owasin anagoptan, qa ecen econ.

WICOICAGE WICOWOYAKE 7.

1 Unkan Jehovah Noah heciya, Niye, tiyohnaka nitawa kin owasin om, wata kin en opa wo; wicoicage kin de en mitokam owotanna yaun kin wanciyaka ce.

2 Woteca waka šote šni ocaje otoiyohi mdoka wiye ahnahna šakowin win iyacu kta, qa woteca waasapapi kin, hena nom nom mdoka wiye kici iyacu kta.

 3 Taku mahpiya ektakiya kinye cin nakun šakowin win, mdoka wiye ahnahna maka akan aicagapi e niyake wicaduhe kta.

 4 Ehake anpetu šakowin , hehan maka kin amagaju waye kta, qa taku ni un, wakage cin owasin maka kin owancaya etanhan wakahinte kta ce.

 5 Unkan Noah, Jehovah token eciye cin owasin ecen econ.

6 Noah tonpi kin ehantanhan waniyetu opawinge šakpe hehan maka kin akan minitan.

7 Qa Noah cinkšiwicaye om, qa iye tawicu, cinkšiwicaye cin tawicupi ko, hena owasin om minitan mini kin itokapa tanhan wata kin en opa.

 8 Woteca waka šote šni, qa woteca waasapapi kin, taku kinye cin, taku maka ašdohan unpi ko owasin,

9 Nom nom mdoka wiye ahnahna Noah en hipi, wata kin en; Wakantanka Noah econ ši qon he iyecen.

 10 Unkan anpetu šakowin hehan maka kin akan minitan aya.

11 Waniyetu opawinge šakpe hehanyan Noah ni un kin, wi icinonpa, anpetu iake šakowin kin, hehan he tanka kin wakoniya hiyeye cin owasin yuomdecapi, qa mahpiya owanyeye hdepi kin owasin yuzamni ehdepi.

12 Qa anpetu wikcemna torn, hanyetu wikcemna torn, hehanyan maka kin ahinheya.

13 Anpetu kin he en Noah, qa Šem, qa Ham, qa Japeth, Noah cinkšiwicaye cin, Noah tawicu kin nakun, cinca tawicupi yamui om, wata kin en hiyupi;

14 Hena qa wamanica ocaje owasin, woteca ocaje owasin, watutka tona maka ašdohan unpi ocaje owasin, taku kinyan ocaje owasin, zitkadan owasin taku sun yukan owasin,

15 Nom nom hipi, Noah ekta wata kin en, taku cehpi yuke cin woniya niyake yuke cin owasin,

16 Hena en hiyupi; mdoka wiye ahnahna taku cehpi yuke cin owasin etanhan upi; Wakantanka econ ši qon he iyecetu. Unkan Jehovah tiyopa kin onataka.

17 Unkan anpetu wikcemna torn maka kin ahinheye ca, minitan tanka aya; unkan wata kin okapon maka kin iwankam iyaya.

18 Unkan mini kin wašagya aye ca maka kin akan nina ihduota, unkan wata kin mini kin aokapota.

19 Unkan mini kin nina hin wašagya, maka kin akan, heon he pajodan owasin, tona mahpiya ihukuya un kin hena aminitan.

20 Wici pa ake zaptan iwankam mini kin aye, ca paha kin aminitan.

21 Unkan taku cehpi yuke cin owasin, taku maka aškanškan un kin, taku kinyan, qa woteca, wamanica, qa watutka tona maka kin akan šdohanpi kin owasin tapi, wicašta iyuhpa nakun tapi.

22 Taku maka puze cin akan ni, taku poge on niya un kin, owasin tapi.

23 Unkan taku hiyeye cin maka akan un kin owasin kahintapi, wicašta, woteca, watutka, mahpiya zitkadan, owasin maka kin etanhan wicakabinta, qa Noah išnana qa tona wata kin ohna om un kin henana okaptapi.

24 Anpetu opawinge sanpa wikcemna zaptan mini kin maka kin akan wašagya.

WICOICAGE WICOWOYAKE 8.

1 Hehan Wakantanka Noah kiksuye, ca wamanica woteca ko owasin, iye kici wata ohna yakonpi kin hena; qa Wakantanka tate wan maka kin akan iyayupte ya, qa mini kin ayuštan.

2 Qa minihdoka owahinapeye cin onatakapi, mahpiya owanyeye kin hena koya, qa magaju mahpiya etanhan kin he ayuštan.

3 Unkan mini kin maka kin etanhan kihda, anpetu opawinge sanpa wikcemna zaptan, hehan mini kin oyahe aya.

4 Wi išakowin , anpetu iake šakowin wi kin en, hehan wata kin Ararat he kin en azi.

5 Unkan mini kin iyoopta ye ca oyahe aya, wi iwikcemna kin hehanyan; wi iwikcemna kin anpetu tokaheya kin he en, he paha kin taninyan hiyeya.

6 Unkan anpetu wikcemna torn henakeca, hehan Noah wata kin owanyeye kage ciqon, he yuhdoka.

 7 Qa kangi wan tankan iyaye ya, unkan iyaye ca ohnihdeya un, mini kin maka kin etanhan oyahe kin hehanyan.

8 Mini kin maka itohnake kin etanhan wanna pus aya, wanyake kta e wakiyedan wan nakun tankan iyaye ya.

9 Tuka wakiyedan kin tukten sicuha iyahe hte cin iyeye šni, mini kin maka km owancaya akan un nakaeš: qa Noah en wata kin ekta hdi; unkan nape kin kiyugate ca wata kin en ikikcu.

10 Qa ake anpetu šakowin ape, qa hehan ake wakiyedan wan wata kin etanhan iyaye ya.

11 Unkan htayetu he ehan wakiyedan kin hdi, qa wihdi can ape wan yapa hdi; unkan Noah mini kin maka kin etanhan wanna pus aye cin sdonya.

12 Unkan ake anpetu šakowin tokeca ape, qa hehan wakiyedan wan tankan iyaye ya, unkan icimana hdi šni.

13 Unkan Noah tonpi kin ehantanhan waniyetu opawinge šakpe qa itokaheya kin, wi tokaheya, qa anpetu tokaheya, hehan mini kin maka kin akapatanhan puza, unkan Noah wata kin akahpe ciqon yuhdoke ca, maka itohnake kin wanna puza wanyake.

 14 Wi inonpa kin, anpetu iake šakowin kin, hehan maka kin puza.

15 Unkan Wakantanka Noah okiye ca,

16 Wata kin etanhan ya wo, niye, qa nitawin, qa nicinca, qa nicinca tawicupi kin niye kici;

17 Taku niyake niye kici un kin ko owasin, taku cehpi yukan owasin, taku kinyan, woteca, watutka tona maka asdohan unpi kin owasin, tankan awicayaku kte, hecen maka akan cincakagapi kte ca icagapi, qa ihduotapi kta ce, eciya.

18 Unkan Noah tankan iyaye ca, cinca nakun, tawicu, cinca tawicupi koya.

19 Taku niyake owasin, wamanica owasin, qa taku kinyan owasin, taku maka akan sdohan tin kin owasin, ocaje otoiyohi wata kin etanhan inanpapi.

20 Unkan Noah wahna wošnapi wan Jehovah kicaga qa, woteca wakašote šni otoiyohi etanhan, qa taku kinyan wakašotešni ocaje otoiyohi etanhan icu, qa wawicayušna, qa huhnah wicaya, wahna wošnapi kin akan.

21 Unkan Jehovah waštemna kin ohna, qa Jehovah cante kin ekta heya, Wicašta kin heon maka kin ake mdašice kte ni; ehaes wicašta kin hokgiyoqopa kin ehantanhan cante oze šica ece, tuka icimana taku niya un kin owasin ihang waye kte šni, hecamon qon iyecen.

22 Tohanyan maka kin wanke cin hehanyan wojupi qa coyapi, qa šni qa didita, qa mdoketu qa waniyetu, qa anpetu qa hanyetu hena ayuštanpi kte šni ce.

WICOICAGE WICOWOYAKE 9.

 1 Unkan Wakantanka Noah, cincawicaye cin ko, wicayawašte qa, Icagapi qa ihduotapi, qa maka kin owancaya ojudan yapo;

 2 Qa taku maka aškanškan, taku mahpiya okinye cin ko owasin, maka watutka owasin, qa mini owanca hogan owasin, itonnipapi qa ikonipapi kta, hena owasin ninape kin en nicupi ce.

3 Taku niya, qa škanškan kin owasin woynte nitawapi kta; peji wato iyecen hena owasin cicupi.

4 Tuka we, cehpi wiconi kin hee, yatapi kte šni.

5 Qa awicakehan wc nitawapi kin on yanipi kin awakite kta, wamanica otoiyohi nape kin etanhan awakite kta, wicašta nape kin ko etanhan, otoiyohi hunka wanjitku nape kin etanhan wicašta wiconi kin he awakite kta.

6 Wakantanka iye ouncage iyecen wicašta kin kaga; heon tuwe wicašta weye cinhan, he wicašta eciyatanhan weyapi kta.

7 Qa niyepi icagapi, qa maka kin owancaya ounyanpi, qa he ohna ihduotapo, ewicakiya.

8 Qa Wakantanka Noah, cinca wicaye cin ko, owicakiye ca;

9 Iho miye wicotakuye mitawa ciciyašuta qa nicinca nihektam unpi kte cin om.

10 Nakun taku niya un kin, niyepi om unpi kin, taku kinyan, woteca, qa maka wamanica owasin, tona niye om wata kin etanhan inanpapi kin, taku maka akan ni un kin owasin om.

11 Niyepi om wicotakuye mitawa wakaga, qa taku cehpi yukan owasin mini tan mini on icimana awihnuni waye kte šni, qa detanhan maka ihang ye kta on, icimana minitan kte šni, ewicakiya.

12 Qa, Wicoicage owasin, hehanyan niyepi en, qa taku ni un kin owasin en, wicotakuye wakage cin wowakta kin dee.

13 Mitinazipe kin mahpiya oka en ewehnake ca he wicotakuye maka kin waqu kin, wowakta kin hee kta.

14 Qa tohan maka kin mahpiya šoka wan ahanzi waye cinhan, mahpiya šoka kin ekta mitinazipe kin tanin kta.

 15 Qa wicotakuye mitawa weksuye kta, niyepi om, qa taku šni un kin owasin om, qa taku cehpi yuke cin owasin awihnuni kta e, detanhan icimana minitan kte šni.

16 Itazipa kin mahpiya soke cin en yanke kta, qa wicotakuye Wakantanka kici, qa taku maka akan niya un kin taku cehpi yuke cin owasin om,owihanke šniyan un kte cin, he weksuye kta e itazipa kin wanwahdake kta ce, Wakantanka eya:

17 Qa, Taku cehpi yuke cin maka akan owasin, wicotakuye wicawaqu kin wowakta kin hee kta, Wakantanka Noah eciya.

18 Unkan Noah cinca wicaye cin, wata qon etanhan inanpapi kin deepi, Šem, qa Ham, qa Japeth. Unkan Ham Caanan atkuku kin hee.

19 Hena yamni Noah cinca kin eepi, qa hena etanhan maka kin owancaya enanakiya iyayapi.

20 Unkan, Noah maka kin kicanyan aye ca hastanhanka iyuwi hu hde.

21 Qa hetanhan miniša yatke ca witko, qa wakeya ohna tancodan un.

22 Unkan Ham Caanan atkuku kin hee, atkuku tancodan un kin he wanhdake ca cincu nom tankan yakonpi kin, owicakiyaka.

23 Unkan Šem Japeth kici, sina wan icupi, qa napin hiyetepi kin akan ehnakapi, qa iheyata manipi, qa ateyapi tancodan un kin akahpapi; itepi kin iheyata unpi, hecen ateyapi tancodan un kin wanhdakapi šni.

24 Unkan Noah, miniša kin etanhan kikta, qa cinhintku hakakta kin taku ecakicon qon sdotkiya;

 25 Qa heya, Caanan yašicapi kta. Wowidake wowidag yapi kta, cinye wicaye cin he yuhapi kta.

26 Jehovah Šem Wakantanka tawa kin yawaštepi nunwe. Caanan wowidake yuhapi kta.

 27 Wakantanka Japeth yuota kta, qa Šem tawakeya kin ohna Japeth ounye kta, qa Caanan wowidake yuhapi kta.

 28 Unkan Noah, minitan qon iyohakam, waniyetu opawinge yamini sanpa wikcemna zaptan ni.

29 Hecen Noah anpetu tawa owasin, waniyetu opawinge napciwanka sanpa wikcemna zaptan hehan ta.

WICOICAGE WICOWOYAKE 10.

1 Noah wicowazi kin dee. Noah cinca kin, Šem, Ham, qa Japeth: Unkan minitan qon iyohakam, hena cinca kicitonpi.

2 Japeth cinca kin Gomer, qa Magog, qa Madai, qa Javan, qa Tubal, qa Meshech qa Tiras.

3 Unkan Gomer cinca kin, Aškenaz, qa Riphath, qa Togarmah.

4 Unkan Javan cinca kin, Ehšah, qa Taršiš, Kittim, qa Dodanim.

5 Hena Ikcewicašta wita tawapi kin wicakicipamnipi, makoce tawapi kin en, otoiyohi iapi kin, token wicowazi kin, hecen oyate kin en.

 6 Ham cinca kin, Cuš, qa Mizraim, Phut, qa Caanan.

 7 Unkan Cuš cinca kin, Seba, qa Havilah, qa Sabta, qa Raamah, qa Sabteca. Unkan Raamah cinca kin Šeba, qa Dedan.

 8 Unkan Cuš Nimrod kicitonpi, he tokaheya maka akan wašaka aya.

9 lye waayatesa Jehovah itokam wašake cin hee; heon etanhan, Waayatesa wašaka Jehovah itokam, Nimrod iyecen, eyapi kin.

10 Unkan wokiconze tawa tokaheya kin Babel hee, qa Erech, qa Accad, qa Calneh, Šinar makoce kin en unpi.

11 Makoce kin he etanhan iyaya, qa Asšur, Niniyeh kage ca Rehoboth h otonwe Calah nakun;

12 Qa Nineveh Calah kici otahedan Resen otonwe tanka wan hee.

13 Unkan Mizarim kicitonpi kin Ludim, qa Anamim, qa Lehabim, qa Naphtuhim,

 14 Qa Pathrusim, qa Casluhim, (hetanhan Philisti,) qa Caphtorim inanpapi.

15 Unkan Caanan cinca kicitonpi Zidon, he tokapa, qa Heth,

 16 Qa Jebusi kin, qa Amori kin, qa Girgisi kin,

17 Qa Hivi kin, qa Arki kin, qa Sini kin,

18 Qa Arvadi kin, qa Zemari kin, qa Hamati kin; qa hehan Caanani wicowazi kin yuomden iyayapi.

19 Qa Caanani makoce tawapi kin dee, Zidon etanhan Gerar ektakiya de ein Gaza etu, qa hetanhan Sodom, qa Gomorrah, qa Adma, qa Zeboim Laša ekta.

20 Ham cinca wicaye cin hena eepi, wicowazipi kin iyececa, oyatepi tamakocepi kin en, iapi kin iyecen.

21 Unkan Japeth tokapa kin sunkaku Šem, he cinca kicitonpi, Eber cinca wicaye cin owasin ateyapi kin hee.

 22 Šem cinca wicaye cin, Elam, qa Asšur, qa Arphaxad, qa Lud, qa Aram.

23 Unkan Aram cinca wicaye cin Uz, qa Hul, qa Gether, qa Maš.

 24 Unkan Arphaxad Salah kicitonpi, qa Salah Eber kicitonpi.

25 Unkan Eber cinca nonpa kicitonpi; tokapa anpetu tawa kin en maka kin akipam icupi kin heon Peleg eciyapi, qa sunkaku kin Joktan cajeyatapi.

26 Joktan cinca wicaye cin Almodad, qa Šeleph, qa Hazarmaveth, qa Jerah;

27 Qa Hadoram, qa Uzal, qa Diklah;

28 Qa Obal, qa Abimael, qa Šeba;

29 Qa Ophir, qa Havilah, qa Jobab, hena owasin Joktan cinkši wicaya.

30 Mešah etanhan de cin, Sephar he wan wiyohiyanpata wanke cin, hehanyan ounyanpi.

31 Šem cinca wicaye cin hena eepi; wicowazipi, qa wicoie hduhapi kin iyecen oyatepi kin tamakocepi kin en ounyanpi.

32 Noah cinca wicaye cin wicowazipi kin heepi, oyatepi kin en. Hena etanhan maka kin owancaya oyate enanakiya iyayapi minitan qon iyohakam.

WICOICAGE WICOWOYAKE 11.

1 Hehan maka kin owancaya wicaiha wanjidan, qa iapi ko wanjidan.

2 Qa wiyohiyanpata ihdaka unpi, qa Šinar makoce kin he en, omdaye wan iyeyapi, qa en eyakonpi.

3 Qa otoiyohi takodaku hekiciyapi, Ihopo, maka omdoton unkagapi, qa span unkiyapi kta ce, eyapi. Hecen inyan hee kiya maka omdoton kin he icupi, qa upsija hee kiya bitumen icupi.

 4 Qa ake hekiciyapi, Ihopo, otonwe wanji unkagapi kte ea nakun conkaške  wan, he ointpa kin mahpiya iyahdeye kta, qa caje unkicagapi kte; heconkupi šni kinhan, maka kin owancaya omdecaheya unkiyayapi kta.

5 Unkan, Jehovah otonwe kin, inatake ko, wicašta cinca wicaye cin kagapi kin wanyake kta e kun hiyu.

 6 Qa, Iho, oyate wanjidan, qa owasin iapi wanjidan yuhapi, qa de tokaheya econpi, qa detanhan taku kaga kecinpi owasin takudan tehike dapi kte šni.

7 Ihopo, kun unyanpi,qa iapi kin icicahi unyanpi kta; kinhan iyakitedan iapi nakicihonpi kte šni, Jehovah eya.

8 Qa hetanhan Jehovah, maka kin owancaya, yuomden ye wicaya; unkan otonwe kagapi qon ayuštanpi.

9 He etanhan caje kin Babel eciyapi; heciya Jehovah maka kin owasin iapi kin yuicicahi, qa hetanhan maka kin owancaya yuomden enanakiya ye wicaya.

10 Šem wicowazi wowapi kin dee. Šem waniyetu opawinge sanpa nonpa ni, qa hehan Arphaxad kicitonpi, minitan qon iyohakam waniyetu nonpa.

11 Šem Arphaxad tonpi kin iyohakam, waniyetu opawinge zaptan ni, qa cinca wica winyan ko kicitonpi.

12 Unkan Arphaxad waniyetu wikcemna yamni sanpa zaptan ni, qa Salah kicitonpi.

13 Qa Arphaxad, Salah tonpi kin iyohakam, waniyetu opawinge torn sanpa yamni ni, qa cinca wica winyan ko kicitonpi.

 14 Unkan Salah waniyetu wikcemna yamni ni, qa hehan Eber kicitonpi.

 15 Qa Salah Eber tonpi kin iyohakam, waniyetu opawinge torn sanpa yamni ni, qa cinca wica winyan ko kicitonpi.

 16 Unkan Eber waniyetu wikcemna yamni sanpa topa ni, qa Peleg kicitonpi.

17 Qa Peleg tonpi kin iyohakam, Eber waniyetu opawinge torn sanpa wikcemna yamni ni, qa cinca wica winyan ko kicitonpi.

18 Unkan Peleg waniyetu wikcemna yamni ni, qa Reu kicitonpi.

19 Qa Peleg, Reu tonpi kin iyohakam, waniyetu opawinge nonpa sanpa napciwanka ni, qa cinca wica winyan ko kicitonpi.

20 Unkan Reu waniyetu wikcemna yamni sanpa nonpa ni, qa Serug kicitonpi.

21 Qa Serug tonpi kin iyohakam, Reu waniyetu opawinge nonpa sanpa šakowin ni, qa cinca wica winyan ko kicitonpi.

 22 Unkan Serug waniyetu wikcemna yamni ni, qa Nahor kicitonpi.

 23 Qa Nahor tonpi kin iyohakam, Serug waniyetu opawinge nonpa ni, qa cinca wica winyan ko kicitonpi.

24 Unkan Nahor waniyetu wikcemna nonpa sanpa napciwanka ni, qa Terah kicitonpi.

25 Qa Nahor Terah tonpi kin iyohakam, waniyetu opawinge sanpa wikcemna sanpa napciwanka ni, qa cinca wica winyan ko kicitonpi.

26 Unkan Terah waniyetu wikcemna šakowin ni, qa Abram, qa Nahor, qa Haran kicitonpi.

 27 Tera wicowazi wowapi kin dee. Tera iye Abram, Nahor, qa Haran kicitonpi. Unkan Haran Lot kicitonpi.

28 Unkan Haran, iye atkuku, Tera itokam ta, Ur Chaldea heciya, makoce en tonpi kin he en ta.

29 Unkan Abram, qa Nahor winohinca yuzapi. Abram tawicu caje kin Sarai, qa Nahor tawicu caje kin Milcah eciyapi. Haran he cunwintku iye Milka Isca ko ateyapi.

30 Tiika Sarai cinca ton šni un, cinca wanica.

31 Unkan Tera iye cinhintku Abram ikikcu, qa takojatpaku, Lot he Haran cinhintku, qa takosku Sarai iye cinhintku Abram tawicu kin hee. Hena cin Ur Chaldea etanhan iyaya, Caanan makoce kin kta ye kte, ca Haran ehan hipi qa hen hiyakonpi.

32 Qa Terah anpetu tawa kin waniyetu opawinge nonpa sanpa zaptan henakeca, qa Haran hen Terah ta.

WICOICAGE WICOWOYAKE 12.

1 Unkan Jehovah Abram heciya, Nita makoce kin etanhan ya wo, nitakuye etanhan, qa niyate ti kin etanhan, makoce wan wanyag ciciye kte cin he ekta ya wo.

2 Kinhan oyate tankaicahciye, ca ciyawašte, qa nicaje kin tanka wakage kta; qa wowašte yaun kta;

3 Qa tona niyawaštepi kin hena wicamdawašte, qa tuwe niyašice cin he mdašice kta, qa niye en wicowazi tona maka akan unpi kin owasin yawaštepi kta ce.

4 Unkan Abram iyaya, Jehovah eciye ciqon he iyecen, qa Lot opa. Abram wanna waniyetu wikcemna šakowin sanpa zaptan, Haran etanhan iyaye cehan.

5 Qa Abram tawicu Sarai ikikcu, qa iye cincu cinhintku Lot nakun, qa taku icihdepi, taku tonpi kin owasin, wicanagi tona Haran en wicatonpi ko, qa unhdaka yapi, Caanan makoce kin ektakiya, qa Caanan makoce kin en hipi.

6 Qa Abram makoce kin ohna ya, Sichem ounye cin etu, Moreh utuhu kin en. Unkan hehan Caanani kin makoce kin en unpi.

7 Unkan Jehovah Abram en tanin iciye ca, Wicowazi nitawa kin makoce kin de waqu kta ce, eciya. Unkan Abram hen wahna wosapi wan,Jehovah tanin iciye cin he kiciga.

8 Qa hetanhan unhdaka ya Bethel iwiyohiyanpatanhan he wan wanke cin, Bethel wiyohpeyata, qa Hai wiyohiyanpata otahedan en e wakeya, qa heci wahna wošnapi wan kage ca Jehovah caje kin hoyekiya.

9 Qa ake Abram unhdaka itokam kiya ihdaka ya.

10 Unkan makoce kin he en wicaakihan, qa Abram Egypta ekta apamahde ya, hen yanke kta, makoce en un qon nina wicaakihan nakaeš.

11 Qa Egypta ekta wanna hi kte cehan, tawicu Sarai heciya, Winohinca owanyag wašte henica sdonwaya;

 12 Qa Egupton oyate kin wanniyakapi kinhan, De tawicu kin ee ce, eyapi, kta, qa miye maktepi kta qa niye niniyanpi kta.

13 Ceciya ce, tawinohtin ciya keya wo; hecen tanyan waun kte ca, niye eciyatanhan minagi kin ni kta.

14 Qa Abram Mizarim, Egypta hee, en hi qehan, Egypta oyate kin tawicu kin owanyag wašte hinca e wanyakapi.

15 Unkan Pharoah taakicita tancan winohinca kin wanyakapi, qa Pharoah en yatanpi, qa winohinca kin Pharoah ti kin en un kte cin icupi.

16 Qa iye kin on Abram tanyan ecakiconpi; unkan tahin wanuyanpi yuha, oxen nakun, qa šuktanka šonšonna mduka wiye ko qa ookiye wica winyan ko, qa camo hena owasin.

17 Unkan Jehovah Pharoah oyutan, Sarai Abram tawicu kin on etanhan, Pharoah tiyohnaka tawa kin koya wowayazan tanka on wicakaštaka.

18 Unkan Pharoah Abram kico, qa heciya,Tokeca hecamiyeeon? He nitawin kin tokeca omayakidake šni he?

19 De mitankši ce, ehe ciqon he tokeca heha he? Hecen miš mduze kta iwacu tuka. Tuka nitawin wanhdaka wo. Ehdaku qa hunktiya wo.

20 Qa Pharoah wicašta tawa kin hena he iwahokonwicakiya, unkan hde šipi, tawicu taku yuhe cin ko owasin.

WICOICAGE WICOWOYAKE 13.

1 Unkan Abram Egypta etanhan iyaya, iye tawicu kici, qa taku yuhe cin ko owasin, Lot nakun opa, itokah makoce kin etu.

2 Qa Abram wijica hinca, wanuyanpi, mazaska, qa mazaskazi ota yuha.

3 Qa itokah makoce kin oti qon ohna ihdaka ku, Bethel etu, wakeya iticage ciqon Bethel qa Hai otahedan heciya;

4 Tokag ehan wahna wošnapi kage ciqon he ekta, qa hen Abram Jehovah caje kin hoyekiya.

5 Unkan Lot Abram kici ihdaka un kin he optaye, qa optaye, qa wakeya ko yuha.

 6 Qa witaya tonwanyanpi kte cin makoce kin iyowinwicakiye šni, ehaeš wanuyanpi ota yuhapi, heon witaya ounyanpi kta okitpanipi.

 7 Unkan Abram wanuyanpi wihan wicakiyapi kin qa Lot wanuyanpi wihan wicakiyapi kin akinicapi. Unkan hehan Caanani kin, Perizi kin ko makoce kin en ounyanpi.

8 Unkan Abram Lot heciya, Unhdokinica kte šni, wihan wicakiya mitawa kin, qa wihan wicakiya nitawa kin nakun akinicapi kte šni, hunka wanjin unkiciye cin.

9 Makoce ocowasin nitokam wanke šni he? Ceciciya ce, miye etanhan kinukankiya ya wo. Niš catka tanhan de cinhan miš etapa tanhan, qa niš etapa tanhan kinhan miš catka tanhan mde kta ce.

10 Unkan Lot wankan etonwe, ca Jordan iyomdaye kin ocowasin Zoar itato owancaya mini yukan, Sodom Gomorrah kici Jehovah ihangye cin itokam, Jehovah tamaga kin iyecen, qa Egypta makoce kin iyecen.

11 Qa Lot Jordan ohna makoce kin owasin kahnige ca, Lot wiyohiyanpata kiya unhdaka ya, hecen otoiyohi hunka wanjiku kin etanhan kinukankiya iyayapi.

12 Abram Caanan makoce kin en ounyan, qa Lot omdaye kin otonwe kin en ounye, ca Sodom en wakeya iticaga.

13 Unkan Sodom wicašta kin wicaštapi šni, qa Jehovah en nina wahtanipisa.

14 Unkan Lot Abram etanhan kinukankiya iyaye cin, he iyohakam Jehovah Abram heciya, Išta kin yuwankan ikikcu, qa toki yaun kin ihdukšan etonwan wo; waziyata, qa itokaga, qa wiyohiyanpata, qa wiyohpeyata.

15 Makoce kin de wandake cin šitomniyan cicu kte ca, wicowazi nitawa nakun owihanke niyan.

16 Qa wicoicage nitawa kin niaka wiyaka sukaza iyenaka wakage kta. Wicašta wan maka wiyaka sukaza yawa okihi, hecinhan wicoicage nitawa nakun yawapi kta ce.

17 Najin qa makoce kin ohanske cin, qa ohdakinyan kin ecen omani wo, he cicu kta ce, eya.

18 Unkan Abram ihdiike ca Mamre mdaye kin he Hebron en wanke cin ekta i, qa en ounye ca hen wahna wošnapi wan Jehovah kicaga.

WICOICAGE WICOWOYAKE 14.

1 Unkan Amraphel Šinar en wicaštayatapi ounye cin he ehan, iye qa Arioch Ellasar en wicašta yatapi, qa Chedorlaomer Elam en wicašta yatapi, qa Tidal oyatepi en wicaštayatapi ozuye kagapi.

 2 Bera Sodom en wicaštayatapi, qa Birša Gomorrah en wicaštayatapi, qa Šinab Admah en wicaštayatapi, qa Šemeber Zeboiim en wicaštayatapi, qa nakun Bela, Zoar nee, he en wicaštayatapi, hena owasin azuwicayapi.

 3 Siddim mdaye kin, mini skuya irnle kin hee, en hena owasin ecipapi.

4 Waniyetu ake nom, hehanyan Chedorlaomer wowidake wicaya, tuka iake yamni kin hehan kipajinpi.

5 Unkan waniyetu iake topa, hehan Chedorlaomer qa wicaštayatapi owicape ciqon owasin upi, qa Rephaim kin Ašteroth Karnaim en wicaka taka, qa Zuzim kin Ham en, qa Enimi kin Šaveh Kirathaim mdaye kin en, hena owasin wicaka takapi.

6 Hori kin nakun, Seir he tawapi kin en El-paran utuhu kin hetu, he hopuza kin en un.

7 Qa hdicupi, En-mišpat wakoniya, Kadeš hee en, qa Amaleki tamakocepi kin owasin awihnunipi, Amori kin tona Hazazon-tamar en ounyanpi kin nakun.

8 Hehan Sodom en wicaštayatapi, qa Gomorrah en wicaštayatapi, qa Adma en wicašta yatapi, qa Bela Zohar he en wicaštayatapi, qa Zeboim en wicaštayatapi hena owasin zuya iyayapi, qa Siddim mdaye kin en kicizapi.

 9 Chedorlaomer Elam en wicaštyatapi, qa Tidal oyatepi en wicaštayatapi, qa Amraphel Šinar en wicaštayatapi, qa Arioch Ellasar en wicaštayatapi, wicaštayatapi ece, uman topa uman zaptan ecipapi.

10 Unkan Siddim mdaye kin ohna bitumen woha ota, qa Sodom en wicaštayatapi Gomorrah en wicaštayatapi najicapi, qa ohinhpayapi, qa umanpi kin, tona nipi kin, he onapapi.

11 Unkan Sodom Gomorrah ko woyuha, taku yutapi ko yuhapi qon, owasin icupi qa kihdapi.

12 Lot Abram cincu cinhintku kin Sodom en un kin nakun, taku tawa ko owasin icupi, qa hecen hdapi.

13 Unkan wicašta wan okicize etanhan u, qa Abram Hebrew kin wokiciyaka, utuhu oju Mamre Amori tawa kin en un; Mamre Ešcol Aner kici hunka wanjin wicaye cin, qa hena Abram kici dakon kiciyapi.

14 Unkan Abram sunkaku wayaka ahdapi kin he nakihon, hehan wicašta opawinge yamni sanpa wikcemna sanpa šahdugan, iye tipi kin en icagapi, qa onspewicakiyapi kin hena awicaye ca wicaštayatapi qon, Dan hehanyan wicakuwa.

15 Qa hanyen taokiye kici anawicatan, qa wicakaštake ca owicakuwa, Hobah Damascus icatka tanhan wanke cin hehanyan.

16 Qa woyuha qon owasin eyaku; sunkaku Lot, qa taku tawa ko owasin, winohinca oyate ko owasin ahda.

 17 Qa Chedorlaomer, qa wicaštayatapi owicape ciqon wicakaštakapi kin etanhan hdi kin, hehan Sodom wicaštayatapi kin itkokim ya; Kaksiza Šaveh mdaye kin ekta Wicaštayatapi takaksiza kin hee.

18 Unkan Melkizedek Salem en wicaštayatapi, Wakantanka otancanke wakiyušnapi kin, he aguyapi miniša ahna Abram kahi;

19 Qa yawašte, qa heya, Wakantanka otancanke mahpiya maka ko ocowasin tawa kin, he Abram yawašte nunwe.

20 Qa Wakantanka otancanke kin, tuka niyanpi kin nape kin en onihnake cin he yawaštepi nunwe, eya. Unkan taku owasin etanhan iwikcemna kin qu.

21 Unkan Sodom wicaštayatapi kin Abram heciya, Oyate kin micu wo, qa woyuha kin he owasin icu, qa yuha un wo.

22 Unkan Abram Sodom wicaštayatapi kin heciya, Jehovah Wakantanka otancanke kin mahpiya maka ko ocowasin tawa kin, he ekta nape ye wakiya.

23 Taku nitawa kin etanhan hahonta wanjidan, hantpa wanjidan ešta iwacu kte šni, qa Abram wawokihi wakaga ehe kte šni.

24 Tuka koška  taku yutapi kin hecehnana, qa Aner Ešcol qa Mamre wicašta omicipapi kin hena eepi, onšpa tawapi kin ikikcupi nunwe, eya.

WICOICAGE WICOWOYAKE 15.

1 Hena henakeca hehan, owanyake wan en Jehovah oie kin Abram en hi, qa heciya, Abram ihnuhan koyakipe cin; wahacanka nitawa qa taku iyotan tanka yahduhe kte cin he miye ce.

2 Unkan Abram heya, Jehovah Itancan taku mayaqu kta he, miš micinca manica qa wati kin taku ohnaka kin Eiezer Damascus he yuha?

3 Qa Abram heya, Miye cinca mayaqu šni, qa wicašta wan wati kin en tonpi kin, he taku mitawa owasin yuhe kta.

4 Unkan Jehovah oie kin hoyekiya, De taku nitawa owasin yuhe kte šni ce. Tokešta nitezi kin etanhan inanpe kte cin he taku nitawa kin owasin yuhe kta ce, eya.

5 Qa tankan u ši, qa heciya, Mahpiya ekta etonwe ca wicanhpi kin yawa oyakihi hecinhan hena yawa wo. Qa nicinca kin he iyenakecapi kta ce, eciya.

 6 Unkan Abram Jehovah oie kin wicada, qa he woowotanna kiciyawapi.

 7 Unkan Jehovah heciya, Makoce kin de cicu, qa yahduhe kta e Ur Chaldea etanhan u ciciye cin, Jehovah he miye ce.

 8 Unkan, Jehovah Itancan, tokiya tanhan wahduhe kte cin sdonwakiye kta he? eya.

9 Unkan, Pte wan waniyetu iyamni, qa hekinškayapi wan waniyetu iyamni, qa tahcaska mdoka wan waniyetu iyamni, hena owasin imicu wo, qa wakiyedan wan nakun, tin wakiyedan wan iyahna.

10 Unkan hena owasin ikikcu, qa cokaya okiwicakasdece ca wobaspe kin owasin iciyotakons ehnaka, qa zitkadan kin hena baspe ni.

11 Unkan taku kinye cin woteca wieakte qon akan kun upi, unkan Abram ham wicaya.

12 Unkan anpetu wi aisinyan iyaye kte cin, hehan woistima tanka wan Abram ahinhpaye ca nakun otpaza wohitike hinca.

13 Unkan Abram heciya, Wowicake eciyatanhan he sdonya wo, nicinca makoce wan tawapi šni e en waniyetu opawinge torn ounyanpi kte, unkan wowidag wicayapi, qa iyoyag wicayapi kta.

 14 Unkan oyate wan wicayuhe kte cin he mdaco kta, unkan hehan woyuha ota yuha hinanpapi kta.

15 Tuka niye hunkake wicayaye cin ekta tanyan yahde kte ca, pa niska wašte kinahan nihapi kta.

16 Qa wicoicage itopa kin, hehan deciya hdipi kta ce. Amori kin woahtani kin nahahin iyatahdepi šni ce.

17 Unkan wi iyaya hehan nina otpaza, qa oceti izita wan, petijanjan ideya wan ko, taku okicasdece ciqon itoopteya iyaya.

18 Anpetu kin he en Jehovah wicotakuye wan Abram kicage ca heya, Makoce kin de Egypta watpa etanhan, watpa tanka Euphrates eciyapi hehanyan nicinca wicawaqu kta.

19 Keni kin, qa Kenizi kin, qa Kadmoni kin,

20 Qa Hitti kin, qa Perizi kin, qa Repaim kin,

 21 Qa Amori kin, qa Caanani kin, qa Girgasi kin, qa Jebusi kin.

WICOICAGE WICOWOYAKE 16.

 1 Unkan Abram tawicu kin Sarai cinca kiciton šni, qa Egypti wikoška wan yuha, Hagar eciyapi.

 2 Qa Sarai Abram heciya, Iho Jehovah miye onamataka; ceciye, wikoška wan mduhe cin he ektayaye; okini cinca miciton kta, eya. Unkan Abram Sarai oie kin anagoptan.

 3 Unkan Sarai Abram tawicu kin, he wikoška tawa, Hagar Egupton kin icu, qa Abram hihnaku kin tawicu kta e qu; wanna waniyetu wikcemna hehanyan, Abram Caanan makoce en un qehan hecon.

4 Unkan Abram Hagar en i, unkan ihdušake ca, wanna ihdušaka wanhdake cehan, yuhe cin he išta kin on ihakta šni.

 5 Unkan Sarai Abram heciya, Šicaya ecamiconpi kin he niye en oiyanihde. Miye wikoška wan mduhe cin he cicu, nimaku kin ekta, unkan ihdušaka wanhdake ca išta kin on ihamakta šni, miye niye kici unkiyotahedan Jehovah yaco kta ce.

6 Unkan Abram Sarai heciya, Tokešta wikoška nitawa kin he ninape kin ohna un, token iyonicipi ecen ecakicon wo. Unkan Sarai iyoyag ya; unkan najica iyaya.

7 Unkan Jehovah taohnihde wan Hagar tinta kin en iyeya, mini hdoka wan ikiyedan, Šur canku kin ohna mini hdoka he cin hee.

8 Qa heya, Sarai tawikoška Hagar, tokiya tanhan yau he? qa toki da he? Unkan, Sarai mayuha itoye kin etanhan nawajica ce, eya.

 9 Unkan Jehovah taohnihde kin heciya, Niyuhe cin ekta icicawin hde, ca nape kin ihukuya eicihde wo.

10 Kinhan nicinca ota wakage kta, qa ota kin heon yawapi kte šni, Jehovah taohnihde kin Hagar eciya.

11 Qa, Iho ihdunišake cin cinca wanji yaton kte, ca Išmael eya cas yakiton kta; nicakije cin Jehovah nanihon kin heon etanhan.

12 Kinhan iš ikce wicašta kin heca kta. Wicašta owasin nape apaha wicayanke kta, qa is wicašta owasin nape apaha yankapi kte, ca hunka wanjin wicaye cin owasin itokam ounye kte, Jehovah ohnihdeye cin eciya.

13 Unkan Wakantanka wanmayake cin he deciya awakita he? eye ca, Jehovah okiye cin, he Wakantanka wanmayadake cin, eya cašton.

14 Heon wakoniya kin he, Tuwe ni qa wannmyake cin tawakoniya eciyapi; he Kadeš qa Bered otahedan wanka.

15 Unkan Hagar Aheram cinca wan kiciton, qa Abram cinca Hagar ton kin he Išmael eya cas kiton.

16 Abram wanna waniyetu wikcemna Šahdogan sanpa šakpe, Hagar Išmael Abram kiciton kin hehan.

 WICOICAGE WICOWOYAKE 17.

1 Unkan Abram wanna waniyetu wikcemna napciwanka sanpa napciwanka, hehan Jehovah Abram en tanin iciye ca, Wakantanka iyotan wašake cin he miye; mitokam omani qa iyaonpepica šni un wo.

 2 Kinhan odakonciciye kta qa, iyakicuya ciyuota kta, eciya.

3 Unkan Abram pustag ehpeiciya; unkan Wakantanka okiye ca heya,

4 Odakonciciya qa oyate ota ate niyanpi kta;

5 Qa detanhan Abram eniciyapi kte šni, tuka Abereyam nicaje ee kta; oyate ota ate niyanpi kte cin cicaga ce.

 6 Qa nina yuota ciciye ca, oyate cicage kta, niye etanhan wicaštayatapi inanpapi kta.

7 Qa miye niye kici wicotakuye cicage kta, qa taku nitawa nihektam u kte cin hena koya, hecen wakage kta, tohanhanyan wiconi kte cin, hehanhanyan hecetu kta, hecen wakan mayada kta, qa nicinca nihektam u kte cin hena owihanke wanin wakan madapi kta.

8 Makoce en ihdaka yaun kin, Caanan makoce kin he owasin cicu kta, qa tona enitanhan u kte cin hena, qa owihanke wanin tawayapi kta qa Wakantanka mayanpi kta.

9 Qa, niye wicotakuye mitawa kin yahduhe kta, niye, nicinca nihektam upi kte cin hena koya, wicoicage tawapi kin en.

 10 Qa wicotakuye rnitawa miye, qa niye kici, qa nicinca nihektam u kte cin hena koya, yahduhapi kte cin he dee ce. Tona wica un kinhan hena bakihdayapi kte.

11 Ce inkpa ha kin banicihdayapi kta qa odakonciciyapi wowapetokton kin hee kta.

12 Wicoicage nitawapi kin tona wica owasin yatipi kin ohna tonpi,qa nicinca etanhan šni ešta, tuka oyate tokeca cinca, qa mazaska on opetonpi kin owasin, cincatonpi ehantanhan anpetu išahdogan bahdayapi kta.

13 Tuwe yati kin ohna tonpi qa rnazaska nitawa on opetonpi kin he bahdayapi kta, qa odakonciyapi, nicehpi kin en he wicotakuye owihanke wanice kta.

14 Tuwe wica bahdayapi šni, ce inkpa ha kin bakihdayapi ni kinhan, wicotakuye mitawa nakša, heon wicašta kin he oyate tawa kin etanhan baspapi kta, Wakantanka Abraham eciya.

15 Qa detanhan Sarai nitawin kin Sarai cajedate kte šni, Sarah caje kin hee kta ce.

16 Qa he mdawašte kte ca, hetanhan cinca wan cicu kte ca, cinca niciton kte cin he nakun mdawašte kte ca, oyate ota nakun wicaštayatapi tanka hetanhan inanpapi kta, Wakantanka Abraham eciya.

17 Unkan Abraham pustag ehpeiciye ca iha, qa cante kin mahen heya, Wicašta waniyetu opawinge cinca kicitonpi kta he? qa Sara waniyetu wikcemna napciwanka cinca wan ton kta ho?

18 Hehan, Tokin Išmael nitokam ni un, Abraham Wakantanka eciya.

19 Unkan Wakantanka heya, Han; awicakehan Sarah nitawin cinca wan niciton kta, qa Isaac eya cas yakiton kta, qa wicotakuye mitawa kin he kici wahdusuta kta; cinca wicaye kte cin ihektam u kte cin, hena koya wicotakuye owihanke sniyan.

20 Išmael on nakun nacihon, on mdawašte kta, cinca ota icahye wakiye ca iyakicuya yuota wakiye kta, wicaštayatapi ake nom kicitonpi kte ca, oyate tanka icahye wakiye kta.

21 Tuka Isaac kici wicotakuye mitawa kin wahdusuta kta, detanhan omaka wanjica kinhan, makoncage kin de en Sarah ton kta.

22 Wakantanka ie ca ohinikiye cin, hehan Abraham itokam wankan ikiyopta.

23 Unkan Abraham cinhintku Išmael ikikcu, qa nakun tona iye ti kin ohna wicatonpi kin, tona mazaska iye tawa on opewicaton kin hena koya owasin, tona wica iye ti kin ohna yakonpi kin hena, anpetu kin he en ce inkpa ha kin bawicakihdaya, Wakantanka eciye cin he iyecen.

24 Abraham wanna waniyetu wikcemna napciwanka sanpa napciwanka hehan iye ce inkpa ha kin bakihdayapi.

25 Qa cinhintku Išmael waniyetu ake yamni hehan ce inkpa ha kin bakihayapi.

26 Abraham cinhintku Išmael kici, anpetu wanjidan en bawicahdayapi.

27 Qa tiyohnaka wicašta owasin, tipi kin ohna wicatonpi, qa oyate tokeca etanhan opewicatonpi kin hena koya, owasin Abraham kici bawicahdayapi.

WICOICAGE WICOWOYAKE 18.

1 Unkan Mamre utuhu kin heciya, Abraham wakeya tiyopa kin ekta iyotankehan yanke, ca wiyotanhan hehan Jehovah tanin iciya.

2 Unkan Abraham wankanetonwan, qa wicašta yamni itokam najinpi wanwicayake ca, wakeya tiyopa kin etanhan itkowicakipe kta e inyang iyaye ca, maka kin en canpeška makehdeya inajin.

3 Qa, Itancan ni išta kin iyokipi ciya hecinhan ceciciya ce, nitaokiye kin etanhan sam iyaye šni wo.

 4 Mini onge aupi on siha hdujajapi, qa can kin ihukuya ozi iciyapo.

 5 Kinhan aguyapi onsjja cicaupi kta. Nicantepi kin iwakišakapo, heon nitaokiyepi kin en yahipi, qa hehan idadapi kta ce, eya. Unkan token ehe cin ecen econ wo, eyapi.

6 Unkan Abraham wakeya kin en ohankoya hda, Sarah tipi kin ekta qa, Aguyapi iyutapi yamni kohanna icu qa pasuta qa aguyapi hmiyanyan kaga wo, eya.

7 Hehan Abraham wanuyanpi ekta inyang ye ca, ptejincadan wan cepa qa wašte ikikcu, qa he koška  wan qu; unkan inahniyan pata.

 8 Unkan pte asanpi qa pte asanpi ihdi, qa ptejineadan pata qon ikikcu, qa wicitokarn ehde, qa iye wicikiyedan najin can kin ihukuya. Unkan wotapi.

 9 Qa Sarah nitawin kin toki un he? eciyapi. Unkan, Wakeya ohna yanka ce, eya.

10 Unkan, Detanhan omaka akihde kinhan, ake niye en cihi kta qa awektunje kte šni, Hehan nitawin Sara cinca wan ton kta. Unkan Sara wakeya tiyopa kin ohna wicašta kin ihektam yanka tuka he nahon.

11 Wanna Abraham Sara kici wanaka wotapi, napin kanpi; winohinca ayakonpi kin he, Sarah wanna ecece šni un.

12 Heon Sara cante mahen iha qa, Wamakanka hehan, qa mayuha iš nakun wicahinca ešta imdu, kin kta he? eya.

13 Unkan Jehovah Abraham heciya, Tokeca e Sara iha qa, Awicakehan wamakanka hehan cinca waton kta he? eya he?

14 Jehovah taku wanji okitpani tukte e he? Tohantu kte cin ake niye en cihi, qa Sara hokšidan wan ton kta.

15 Hehan Sara kokipe ca heon anakihbe ca, lwaha šni ce, eya. Unkan, Hiya, iyaha ce, eya.

16 Hehan wicašta qon heciya tanhan najinpi, qa Sodom ektakiya etonwanpi; unkan Abraham awicaye kta e om iyaya.

17 Unkan Jehovah heya, Taku ecamon kte cin he Abraham anawakihbe kta he;

18 Abraham iš oyate tanka, qa wašaka un kte ca iye eciyatanhan oyate maka ohnaka owasin yawaštepi kta?

19 Qa de sdonwakiye, cinca wicaye cin, tiyohnaka kin iyahna taku owotanna qa ecetu econ wicaši kta, qa Jehovah tacanku kin okicipapi kta, hecen Jehovah Abraham token wahoye cin owasin kicicahi kta.

20 Unkan Jehovah heya, Sodom qa Gomorrah ceyapi kin he tanka, qa wahtanipi kin tehika e nawahon, heon

21 Nakaha kun rnde ca ceyapi kin mahiyohi kin ocowasin iyececa econpi kinhan sdonwaye kta, qa ecece šni kinahan sdonwaye kta ce, eya.

22 Unkan wicašta qon hetanhan iyayapi, qa Sodom en ipi, qa Abraham nahahin Jehovah itokam yanka.

23 Qa Abraham ikiyadan hinajin qa, Tona ohan owotanna wahtanipisa om ihang wicayaye kta he?

24 Okini wicašta owotanna wikcemna zaptan otonwe kin en unpi e ta ihang yaye kta he; Wicašta owotanna wikcemna zaptan kin hena on, otonwe en unpi kinhan, otonwe kin itonyape kte šni he?

25 Wicašta ohan owotanna wahtanipisa om ihang wicayaye kta seca; tokadan hecanon kte im; tona owotanna wahtanipisa iyecen ecawicakiconpi kin he iyonicipi šni. Maka kin owancaya Wayaco un kin he woyaco econ kte šni he? eya.

26 Unkan Jehovah heya, Wicašta owotanna wikcemna zaptan Sodom otonwe en iyewaye cinhan, hena on otonwe kin ocowasin itonwape kta ee.

27 Unkan Abraham ayupte ca, Maka mdu qa cahota hemaca qeyaš mayuhe cin taku ewakiye kta on iapi iwacu.

28 Okini wicašta owotanna wikcemna zaptan kin en zaptan ope kte šni seca; zaptanna kin hena on otonwe kin ocowasin ihang yaye kta he? eya. Unkan, lhang waye kte šni, hen wikcemna torn sanpa zaptan iyewaye cinhan, eya.

29 Unkan ake ie kta e hda, qa, Okini hen wikcemna torn iyewicayapi kta, eya. Unkan, Wikcemna topapi on ecamon kte šni, eya.

30 Unkan, Mayuha ceciciye canniye maye šni wo; iwae kta ce. Okini wikcemna yamni hen iyeyapi kta seca, eya. Unkan, Wikcemna yamni hen iyewicawaye cinhan ecamon kte šni, eya.

31 Unkan, Tokin Mayuhe cin taku ewakiye kta e epen. Okini wikcemna nonpa hen iyeyapi kta seca, eya. Unkan wikcemna nonpa on ihang waye kte šni ce, eya.

32 Unkan, Itancan ceciciye canniye maye šni wo; wancadan iwae kta ce. Okini wikcemna en iyeyapi kta seca, eya. Unkan wikcemna on ihang waye kte šni ce, eya.

 33 Unkan Jehovah Abraham okiya ohinikiye cin hehan toki iyaya, qa Abraham ekta hda.

WICOICAGE WICOWOYAKE 19.

1 Unkan htayetu ehan ohnihde wicaye cin nom Sodom en hipi; he icunhan Lot Sodom tiyopa kin en iyotankehan yanka, unkan Lot wanwicayake ca itkowicakipe kta najin hiyaya, qa wicitokam patus inajin.

2 Qa hewicakiya, Itancan ceciciyapi, wati kin en yapo, he wowidake mayaduhapi, heon hanyetu kin de wati kin en yukanpo. Siha kin hdujaja po, qa hanhanna yektapi, qa tokiya dapi hecinhan ekta katinyan yapo, ewicakiya. Unkan, Hiya, ocanku kin de ohna hanyetu osan unyakonpi kta, eyapi.

3 Tuka nina cinwicakiya; unkan kici kipi. Tipi kin ti mahen ipi, unkan aguyapi napohye codan span ye ca nakun wowicakihan; unkan yutapi.

4 Iwankapi kta itokam, Sodom otonwe wicašta kin owasin tipi kin he aohduteyapi, hokšidan wicahinca ko owasin, otonwe ihanke anokatanhan, henana otonwe ohnaka kin owasin kawitaya iheya.

5 Qa Lot kipanpi, Wicašta nom hanyetu kin de yati en hipi kin tukte epi he? Tankan u wicaši wo; sdonwicunyanpi kte, eyapi.

 6 Unkan Lot tipi kin etanhan inanpe, ca tiyopa kin ecen icu,

7 Qa, Hunka wanjin ciyapi, ceciciyapi ce, ihnuhan hecen šicaya ecanonpi kin.

8 Micunkši nonpapi kin nahahin wicašta sdonye šni yakonpi, heniyos cicupi, qa token yacinpi ecen wicayakuwapi kta, tuka wicašta kin dena conkaške  mitawa ohanzi ihukuya hipi kin heon takudan ecawicakiconpi šni po, ewicakiya.

9 Unkan, Tokan hiyaya wo, Wicašta kin de oyate tokeca, tuka den un kta wacin, qa hi qa he unyacopi wacin. Heon ihomeca niye iyotan šicaya unnicuwapi kta, oyate kin eyapi, qa Lot nina pa kicapi qa tiyopa kin kaptujapi kta e en yapi.

 10 Unkan ohnihde unpi kin tiyopa kin yuganpi, qa Lot tipi mahen hdicu yapi, qa tiyopa kin onatakapi.

11 Unkan oyate kin wicašta cistina wicašta tanka ko, oyate otonwe ohnaka kin owasin, tiyopa kin en hiyeye cin hena ištagonge wicayapi, heon tiyopa kin yutantan akitapi.

12 Unkan ohnihde unpi kin Lot heciyapi, Nakun den takuyaya yukan he? takos yaye cin nicinkši, nicunkši, qa taku tona otonwe kin ohna duhe cin, de etanhan om tankata inanpa wo.

13 Otonwe kin de ihang unyanpi kta, heon unhipi; oyate kin de owasin woahtani hoyapi, qa Jehovah itokam oiyahde iciyapi, heon otonwe kin de owihanke ye unhipi.

14 Unkan Lot tankata inanpe, ca wicašta takoš wicaye kte cin, hena hewicakiya, Otonwe kin de etanhan tankata inanpapo; Jehovah otonwe kin de ihanke ye kta ce. Tuka takoš wicaye kte cin Lot cetunhdapi.

15 Anpao hinanpa, unkan ohnihde unpi kin Lot inahni yapi, qa, Najin wo; nitawin ehdaku wo, qa nakun nicunkši nonpa den unpi kin, okini otonwe wahtani kin en awihnuniniyanpi kta nace.

16 Tuka ihduwiyeyapi šni; unkan ohnihde unpi nape etanhan wicayuzapi, Lot, qa tawicu, qa cunwintku nonpa nape kin wicayuzapi; Jehovah hena ongiwicakida, he etanhan otonwe kin tankan ewicayayapi.

17 Otonwe tankan awicaipi qa uman heciya, Napa wo, ni iciya wo. lhnuhan nihektam eyatonwe cin. Omdaye kin ohna tuktedan inajin šni. He kin heciya onapa wo; hecen yani kta ce.

18 Unkan Lot hewicakiya, Hiya, Itancan ceciciya ce:

19 Wowidake yaya nitokam wopida iyeiciya, qa nitowaon ida kin icantoyahnake cin he miye. Tuka he onawape kle cin owakitpani kta. Okini taku šica hiyohimaye ca mate kta, kowakipa.

20 Heon ceciciya, otonwe wan cistina den aškadan he cin, hee iyowahi kta owakihi kta. Ceciciya, heci ye mayan wo; (cistina tuka hecen?) qa minagi kin ni kta.

 21 Unkan, He wopida kin aciyupte kta; otonwe cistina kin he ihang waye kte šni.

22 Onapa wo; hinahni wo. Tohan ehan yai šni hehanyan token wahan kte šni, eciya. He etanhan otonwe kin he Zoar eciyapi.

23 Anpetu wi toka hinanpa hehan Lot Zoar iyohi.

24 Unkan hehan Jehovah magaju ya, Sodom Gomorrah heniyoza kiya inyan zi peta ko Jehovah mahpiya eciyatanhan ahinhe wicaya.

25 Otonwe kin hena owihanke wicaya, omdaye ko ocowasin, qa tona otonwe kin en nunyanpi, qa makoce kin hen peji koya.

 26 Tuka Lot tawicu kin hakikta, unkan tancan kin tokeca hinhde ca miniskuya icu.

27 He icunhan.hanhanna Abraham kikta, qa Jehovah okiye ciqon en etkiya ya.

28 Qa Sodom, Gomorrah, makoce ihdukšan koya atonwan; unkan makocekin he etanhan šota wan, maza sdoyapi oceti šota iyececa, wankantkiya inanpe tin wanyaka.

29 Jehovah omdaye otonwe kin hena, owikanke ye cin he icunhan, Abraham kiksuye ca otonwe ohna Lot ounye cin ihang wicaye cin hetanhan Lot tankan iyaye ya.

30 Unkan Lot Zoar etanhan itawankanhde ye, ca he wan akan cunwintku napin om e ounyan, Zoar he en un kte cin he wikopa heon, qa makohdoka wan cunwintku napin om oti.

 31 Unkantokapa kin he tankaku kin hecen eciya, Ate unye cin wanna wicahinca, qa maka ohnaka wanna wicašta wanica, maka akan econpi qon iyecen, tuwedan unkiye en hi kte šni.

32 Iho we, ate miniša yatke unkiye kta, qa kici unwanke kte; hecen on ate etanhan wicoicage unhdoyapi kta.

33 Hanyetu, unkan atkuku miniša yatke kiyapi. Tokapa kin Ije tokaheya atkuku kici iwanka, tuka atkuku kin cunwintku en hiwanke cin he sdotkiye šni, nakun kikia kin.

34 Ihanhanna tokapa kin he tankaku kin heciya, Hinhan ate kici imunka; ecin ake hanyetu kinhan, minima yatke unkiye kte ca niš ito kici nunke kte, hecen on ate etanhan wicoicage unhdoyapi kta.

35 Unkan ake ihanyetu, unkan atkuku miniša yatke kiyapi; iš ito hakaktakin atkuku kici iwanka. Iš ake cunwintku en hiwanke cin sdotkiye flnl, qa kikta kin nakun.

36 Hecen Lot cunwintku napin atkuku etanhan hokšin itpihnakapi.

37 Tokapa kin hokšidan wan ton qa Moab eya cas kiton. He Moab oyate ate yapi anpetu kin dehan aiyahdeya.

38 Unkan hakakta kin iš eya hokšidan wan ton qa, Ben-ammi eya cas kiton. He Ammon cinca kin anpe dehan aiyahdeya ate yapi.

 WIOICAGE WICOWOYAKE 20.

1 Hehan Abraham makoce itokaga kin ekta ihdaka ye ca, Kadeš qa Šur otahedan iyotanke ca Gerar en ounyan.

2 Qa Abraham tawicu Sarah ke ca, Mitankši kin dee ce, eya. Unkan Gerar wicaštayatapi Abimelech, he ekta ye wicaši qa Sarah icu.

3 Unkan hanyen, Wakantanka Abimelech ekta hi, qa wowihanmde wan en heciya, Iho nite, winohinca iyacu kin he wicašta wan tawicu kin heca nakaeš.

4 Tuka Abimelech nahahin Sarah ikiyedan wanke šni, qa heya; Itancan oyate owotannawan he nakun te wicayaye kta he?

5 Mitankši kin dee, emakiye šni he? qa winyan kin iš, Hunkawanjitku waya ce, emakiye; Micante kin ecedan qa minape iyecetu kin on hecamon.

6 Unkan Wakantanka wowihanmde kin en heciya, Miš nakun nicante ecedan kin en hecanon kin sdonwaya qa, heon ecihdaku, miye en wayahtani kte šni, qa dutan kte cin iyowin ciciye šni.

 7 Qa wanna, iho, wicašta, qon tawicu kin kicu wo, iš wicašta wokcan kin heca, kinhan niye on cekiye kta, hecen yani kta; tuka ake yecu šni kinhan nite kte ca nakun taku nitawa kin owasin, he sdonya wo.

8 Unkan Abimelech hanhanna hin kikta, qa ookiye wicayuhe cin owasin wicakico, qa hena owasin owicakiyaka: Unkan wicašta kin nina kokipapi.

 9 Unkan Abimelech Abraham kico qa, Tokeca e hecaunyeconpi? Qa niye en wawahtani kin tukte e on woahtani tanka wan miye qa oyate mitawa ko iyahde unyayapi? Woecon wan econpi kta iyecece šni tuka hecamiyecon, eciya.

10 Qa, Taku wandaka on hecen ecanon he? Abimelech Abraham eciya.

11 Unkan Abraham heya, Tuwedan deciya Wakantanka ohoda šni qa mitawin on maktepi kta kepce cin heon hecamon;

12 Qa awicakehan tankši waya ce. Ate waye cunwintku kin hee, tuka ina tawa šni, qa mitawin ee kta mduza.

13 Qa Wakantanka ate tipi kin etanhan ihdaka ye maye cehan winyan qon hewakiya; Taku wašte ionsimayada kte cin dee ce. Makoce owasin tokiya kašta en unki kinhan, Hunkawanjitku emakiya wo, epe ciqon, eya.

14 Hehan Abimelech tahin wanuyanpi ikikcu, qa oxen qa hokšidan wicinyanna ko lwicakikcu qa Abraham qu; tawicu Sarah nakun kicu.

15 Qa Abimelech heya, Mitamakoce nitokam wanka ce; tukten niišta iyonicipi kinhan hen iyotanka wo.

16 Qa Sara heciya, Iho nitimdo mazaska kektopawinge waqu; iho he niišta akahpe kte cin ee, tonanici unpi kin owasin en, qa tokan nakun owasin en; hecen Sarah iyopeyapi.

17 Hehan Abraham Wakantanka icekiya; unkan Wakantanka Abimelech asni yan, tawicu kici qa wikoška yuhe cin owasin. Unkan cinca tonpi.

18 Jehovah, Sara Abraham tawicu kin on etanhan, Abimelech tiyohnaka tawa owasin tamnipi kin suksuta onawicataka tuka qon.

WICOICAGE WICOWOYAKE 21.

1 Unkan Jehovah heye ciqon, he iyecen Sarah ekta hi, qa Jehovah, eciye ciqon, he iyecen ecakicon.

2 Unkan Sara ihdušake ca Abraham okanta cinca wan kiciton; Wakantanka eye ciqon iyehantu qehan.

3 Unkan Abraham cinhintku kicitonpi, Sara ton kin he, Isaac eya cas kiton.

4 Qa Abraham Isaac bakihdaya anpetu išahdogan tonpi kin ehantanhan, Wakantanka econ ši qon iyecen.

5 Abraham wanna waniyetu opawinge, hehan cinhintku Isaac kicitonpi.

6 Unkan Sarah heya, Wakantanka iha mayan, qa tona nahonpi kin imiciyuštanpi kta.

 7 Qa Sarah hokšiyoqopa azin kiye kte cin, tuwe Abraham eciye kta he? wicahinca tuka cinca weciton kin, eya.

8 Unkan hokšidan kin tanka aye ca azin ayastan kiyapi. Unkan Isaac azin ayastan kiyapi anpetu kin he en, Abraham wohe ca wicota wicakico.

9 Unkan Hagar Egypti kin cinhintku Abraham kiciton kin he, wowihaha kin he Sara wanyake ca;

10 Wikoška kin de cinhintku kin iyahna tankan ye wicaya ye. Wikoška kin de cinhintku kin, micinkši Isaac kici woyuha tawaye kte šni, eya.

 11 Unkan oie kin he, Abraham išta kin en tehike hinca, cinhintku kin heon etanhan.

12 Unkan Wakantanka Abraham heciya, Wikoška duhe cin, qa hokšidan kin on etanhan, niišta kin en tehike šni nunwe. Taku Sarah eniciye cin owasin ecen ho kin anagoptan wo. Isaac he en wicoicage nitawa kin caje yatapi kta

13 Wikoška cinhintku kin nicinkši kin hee, heon he nakun oyate wan icah wakiye kta ce.

14 Unkan Abraham hanhanna hin kikta, qa aguyapi mini apahta wan ahna icu, qa Hagar qu, tabpa kin akan ehnaka, hokšidan nakun qa toki ye ši. Unkan iyaye ca Beer-šeba tinta kin onuni.

15 Unkan mini apahta kin etanhan mini wanna yahepapi, qa hokšidan kin canhaka wan ihukuya ehpekiya;

16 Qa iyaye ca iyotakons iyotanka kitana tehan, wanhinkpe kihiyeyapi hehanyan: Hokšidan te kte cin wanwahdake kte šni ce, eya; heon aisinyan iyotanke ca hoyeye ca ceya.

17 Unkan Wakantanka hokšidan ho kin nahon, qa Wakantanka taohnihde mahpiya eciyatanhan Hagar kipan, Hagar taku yaka he? Kokipe šni wo; Wakantanka he oyanke kin etanhan hokšidan ho kin nahon.

18 Najin qa hokšidan kin ikikcu qa, nape kin on hduha wo. lye oyate tanka wan icah wakiye kta ce, eya.

19 Qa Wakantanka winyan ista kin yuhdoka, unkan minihdoka wan wanyake ca ekta i, qa mini apahta kin iyatahde ye ca hokšidan kin yatke kiya.

20 Unkan Wakantanka hokšidan kin kici un; hecen tanka icage ca tinta kin en ounye ca itazipa on waoka.

21 Qa Paran tinta kin en ounye ca hunku kin Egypta makoce kin etanhan, tawicu kte cin kiciyuza.

22 Unkan hehan Abimelech qa taakicita tancan Phichol henioza Abraham heciyapi; Taku ecanon kin owasin en Wakantanka oniciya.

23 Iho hecen eya wo, Wakantanka namahon; cihnaye kte šni, nicinkši nitakoja ko wicawahnaye kte šni, taku wašte ecamiyecon kin iyecen ecacicon kta, makoce en ounwaye cin nakun.

24 Unkan, Miš ecen eya wakonze kta ce, Abraham eya.

 25 Hehan minihdoka wan Abimelech taokiye kin kipi qon, he Abraham cajeyate ca he on Abraham Abimelech iyopeya.

26 Unkan, Tuwe hecon kin sdonwaye šni, qa niš nakun omayakidake šni, nakun miš he nawahon šni, nakaha heceyedan, eya.

27 Unkan Abraham tahcaska wanuyanpi pte wanuyanpi ko ikikcu, qa hena Abimelech qu; unkan napin odakota wan kicicagapi.

28 Hehan Abraham tahcaska cinca wiyedan šakowin akipam ewicahde.

29 Unkan Abimelech Abraham heciya, Tahcaska wiyedan šakowin kinukan ewicayahde kin he taku he?

30 Unkan, Minihdoka kin de miš waqe cin he yuotaninpi kte cin, heon tahcaska wiyedan šakowin kin hena minape kin etanhan iyacu kta, eya.

31 Unkan heon etanhan makoce kin he Beer-šeba eciyapi, napin heciya Wakantanka namahon eya, ekiciyapi.

 32 Unkan Beer-šeba hen odakota wan kicicagapi; hehan Abimelech najin taakicita tancan nakun, qa Philisti tamakocepi kin ekta inlapi.

33 Unkan Abraham Beer-šeba heciya taskoju wan oju, qa hen Jehovah Wakantanka owihanke wanica hoyekiya.

34 Qa Abraham Philisti tamakocepi kin en anpetu ota ounyan.

WICOICAGE WICOWOYAKE 22.

1 Unkan hena owasin iyohakam, Wakantanka Abraham iyutan ye ca heciya, Abraham, eya houkiya. Unkan, Iho miye ce, eya.

 2 Unkan, Nicinkši heceyedan wašte yakidake cin Isaac he icu, qa Moriah makoce kin ekta ye ca heciya he wan ociciyake kte cin he akan petan wahdušna wo, eya.

 3 Unkan Abraham hanhanna hin kikta, qa šuktanka šonšonna aqin kiton, qa koška  nom iwicakikcu cinhintku Isaac nakun, can on wošna kte cin he kakse ca, najin qa hena am, makoce tukte en Wakantanka cajeyate ciqon heciya iyaya.

4 Anpetu iyamni Abraham wankan etonwe ca, tukten ke cin he tehan tanhan wanyaka.

5 Qa Abraham koška  wicayuhe cin hewicakiya, Den iyotankapo šuktanka šonšonna iyahna, qa miš hokšidan kiei kan unkipi kinhan canpeška makehdeya unkanpi, qa den dukanpi kin en unhdipi kta.

6 Qa Abraham can on wošna kte cin icu, qa cinhintku Isaac akan ehnakc ca peta isan ko nape kin en icu, qa šakim iyayapi.

7 Unkan Isaac atkuku Abraham kici okiye ca, Ate, eya. Unkan, Micinkši nawahon ce, eya. Unkan, Iho peta can ko yukan, tuka woteca kin wošnapi on tukte e he? eya.

8 Unkan, Micinkši, Wakantanka tahin wanuyanpi wakiyušnapi on okide kta, eya. Hecen sakim yapi.

9 Qa wanna tukten Wakantanka ye ši qon hen hiyohipi, qa hen Abraham wahna wošnapi wan kage ca, cinhintku Isaac iyakaške ca wahna wošnapi kin nkan ekihnaka, can kin iwankam.

10 Qa cinhintku te kiye kta e nape kiyugate ca isan kin ikikcu.

11 Hehan mahpiya kin eciya tanhan Jehovah ohnihde ye cin kipan, Abraham, Abraham, eya. Unkan, Nawahon ce, eya.

12 Unkan, Hokšidan kin ekta ninape kin ye kiye šni, qa takudan ecakicon šni wo. Wanna niye Wakantanka ikoyape cin sdonwaya ce; nicinkši heceyedan, tuka mayaqu kta wicayada he etanhan, eya.

13 Hehan Abraham wankan etonwe ca, inyun iheyata tahcaska mdoka wan otehi ohna he kin on ikoyag najin, he wanyake ca, Abraham ekta i, qa tahcaska mdoka kin icu, qa cinhintku kin hee kiya hee petan wošna.

14 Qa Abraham makoce kin he, Jehovah wiwanhdake kta, eya cašton; heon Jehovah he tawa kin akan tanin iciye kta ce, nahahin eyapi.

15 Unkan mahpiya kin eciya tanhan Jehovah ohnihde ye cin inonpa akihde Abraham kipan;

16 Miye kaeš caje mihdate Jehovah eya; Taku ecanon kin de nicinca wanjidan tuka itonyakipe šni;

17 Heon wowašte on ciyawašte kta, nicinca iyakicuya yuota wakiye kta. Mahpiya wicanhpi iyena, qa miniwanca kahda wiyaka sukaza iyeye cin iyena, taku nitawa iyacin kte ca, nicinca toka wicayapi kin otonwe tawapi kin yuhapi kta.

18 Qa mioie kin anayagoptan kin heon nicinca kin on maka kin oyate owasin wicayawaštepi kta ce, eya.

19 Unkan Abraham koška  wicayuhe ein ekta hda; unkan najinpi qa yuwitaya Beer-šeba ekta hdnpi; qa Abraham Beer-šeba en ounyan.

20 Hena owasin iyohakam Abraham hecen eya okiyakapi; Milcah he nakun nicinye Nahor he cinca kiciton.

 21 Uz tokapa kin hee, qa sunkaku Buz, qa Kemuel Aram he atkuku;

22 Qa Chesed, qa Hazo, qa Pildaš qa Jidlaph, qa Bethuel.

23 Unkan Bethuel he Rebekah kicitonpi. Hena šahdogan kin Milka he Nahor Abraham cincu kin kiciton.

24 Unkan tawicu tokeca kin, Reumah eciyapi he Tebah, qa Gaham, qa Thahaš, qa Maachah hena wicaton.

WICOICAGE WICOWOYAKE 23.

1 Unkan Sarah waniyetu opawinge sanpa wikcemna nonpa sanpa šakowin henakeca, waniyetu kin hena Sarah ni.

2 Hehan Sarah ta, Kirjath-arba otonwe kin heciya, Hebron Caanan makoce kin etu hee. Unkan Abraham Sarah on iyokišice ca akiceye kta e en hi.

3 Hehan Abraham tawicu te cin itokapa tanhan najin qa, Heth cincawicaye cin owicakiya.

4 Qa, Miš wicašta ihdaka waun qa askatudan nicipi wahimdotanka, wicašta hnakapi induhe kta e niyepi om maqiipo; kinhan makite cin mitokapa tanhan wehnake kta ce, eya.

5 Unkan Heth cincawicaye cin ayuptapi, qa Abraham heciyapi,

6 Itancan anaungoptan po: Wicaša yatapi wakan unkiyepi cokaya henica. Wicašta hnakapi unhapi kin tukten iyonicipi kin nicite cin en kihnaka wo. Unkiš wanjidan kašta wicašta hnakapi unhapi kin hen nicite cin yehnake kta e tehinda kte šni.

7 Unkan Abraham najin qa Heth cincawicaye cin oyate makoce yuhapi kin wicitokam apatuja.

8 Qa owicakiye ca, Makita mitokapa tanhan wehnake kte cin he iyonicipipi hecinhan anamagoptanpi, qa Ephron Zohar he cinhintku cin makiyapo.

9 Kinhan Machpelah imnija ohdoka yuhe cin, tamaga ihanke en un kin, mazaska iyenakeca kin heon maqu kte cinhan, niyepi cokaya wicašta hnakapi wan mduhe kta ce, ewicakiya.

10 Unkan Ephron Heth cincawicaye wicehna ounyan; qa Ephron Heti kin Abraham ayupta; Heth cincawicaye cin, otonwe tiyopa ohna upi kin hena owasin nahonpi;

11 Hiya, Itancan namakon wo. Maga kin cicu; imnija ohdoka en un kin he nakun cicu. Mitaoyate cincawicaye cin wanmayakapi he cicu. Nicite cin kihnaka wo, eya.

12 Unkan Abraham oyate makoce tawapi kin wicitokam patuja.

13 Qa ia, Iho amayadupte cinhan, namahon wo. Maga kin on mazaska cicu kta. Icu wo; kinhan makite cin wehnake kta, Ephron eciya, oyate makoce yuhapi kin hena nahonpi.

14 Unkan Epron Abraham ayupte ca heciya;

15 Itancan namahon wo. Maga kin mazaska opawinge topa iyehantu ce; tuka unkiyotahedan he taku? Nicite cin ekihnaka wo.

16 Unkan Ephron ie cin he Abraham anagoptan, qa mazaska opawinge tom wopeton icupi kin heca Abraham aspe ye ton qa qu, he Ephron Heth cincawicaye cin nahonpi cajeyate ciqon hee.

17 Unkan Ephron tamaga Machpelah en wanka, Mamre iyotakons he qu; maga kin imnija ohdoka he en wanke cin he nakun, qa can tona he en han qa tona ihdukšan he cin he nakun owasin;

18 Abraham tawa kte cin, Heth cincawicaye cin tona otonwe tiyopa kin ohna yapi kin he wanyakapi.

19 Hehan Abraham tawicu Sarah ekihnaka; Machpelah maga imnija ohdoka kin he en, Mamre ikiyedan, Hebron Caanan makoce kin etu hee.

20 Unkan maga imnija ohdoka iyahna, Abraham wicašta hnakapi on yuhe kte cin, Heth cincawicaye cin qupi.

WICOICAGE WICOWOYAKE 24.

1 Unkan Abraham wanna wicahinca omaka ota; unkan Jehovah taku owasin en Abraham yawašte.

 2 Unkan Abraham he taokiye tiyohnaka tawa tokapa kin, taku yuhe cin owasin awanyag un kin heciya; Ninape kin miceca ihukuya ekihnaka wo;

3 Kinhan, Jehovah, Wakantanka mahpiya, qa Wakantanka maka ko yuhe cin namahon, eye ciciye kta, Caanani oyate om manke cin cunwintkupi kin etanhan micinkši on winohinca iyacu kte šni.

4 Tuka mitamakoce qa mitakuye kin hena ekta de kte ca, hetanhan micinkši Isaac on winohinca iyacu kta, kehe kta ce, eya.  

5 Unkan, taokiye kin heya, Okini winohinca kin makoce kin de ekta omape kta tawatenye kte šni; hecinhan makoce etanhan yau qon, nicinkš ake ekta ye wakiye kta he?

6 Unkan, Ihnuhan micinkši icicawin heciya ye yakiye cin.

7 Jehovah Wakantanka mahpiya yuhe cin, ate tipi kin etanhan qa makoce wan en matonpi kin etanhan, imacu qa omakiye ca, Makoce kin de nicinca waqu kta ce, eya konza, he taohnihde kin nitokam ye ši kta, kinhan micinkši kin on heciya tanhan winohinca wan iyacu kta.

8 Winohinca kin onipe kta tawatenye ni, hecinhan iyakonze kin de on iyaonpepica šni yaun kta, tuka micinkši heciya ye yaye kte šni ce.

9 Unkan taokiye qon nape kin iye yuhe cin Abraham ceca kin ihukuya ekihnake ca ecen eya konza.

10 Qa ookiye kin, iye yuhe cin camo tawa kin etanhan, camo wikcemna, qa iye yuhe cin taku wašte tawa kin owasin etanhan icu, qa hena yuha iyaye ca Nahor otonwe kin ekta i, Mesopotamia watpa otahedan etu.

11 Qa otonwe kin itankan minihdoka ikiyedan, cankahu pajo kin canpeška makehdeya inajin wicakiya, htayetu mini huwe ipi eca iyehantu.

12 Qa heya, Jehovah Abraham mayuhe cin Wakan nida ceciciya, nakaha tanyan ihuni makiye ca Abraham mayuhe cin he wowašte ecakicon ye.

13 Minihdoka kin ekta nawajin; qa otonwe kin wicašta cunwintkupi kin mini huwe upi kta.

14 Qa wikoaka wan tuwe kašta hewakiye kta; Wakiškotpa nitawa kin au wo, mini mdatke kta ce; unkan, Yatkan, ye, qa cankahu pajo nitawa kin nakun yatke wicawakiye kta, eye cinhan, tokin nitaokiye Isaac yuhen yakahnige cin hee, kinhan mayuhe cin wowaonšida ecayecon sdonwayen.

15 Unkan iš ia nahahin ayaštan šni ehan, Rebekah u, Abraham cincu Nahor tawicu Milcah he cinhintku Bethuel he cunwintku kin hee, wakiškotpa hiyeta onpe ca u.

16 Wikoaka owanyag wašte hinca, hokšiwina, qa wicašta tohini sdonye šni, minihdoka kin ekta kun ye ca wakiškotpa kin ojudan icu qa wankan hiyu.

17 Unkan ookiye qon itkokim inyang ye ca, Wakiškotpa duhe cin etanhan mini onge yatke makiya wo, eya.

18 Unkan, ltancan yatkan ye, eye ca wakiškotpa kin nape kin on kun akihde, qa yatke kiya.

19 Unkan ayaštan hehan, Cankahu pajo nitawa kin nakun hena on mini awau kta, yatkan ayaštanpi kin hehanyan, eya.

20 Qa inahni qa wakiškotpa kin cankaškotpa tanka kin okaštan, qa inyanka minihdoka kin ekta mini huwe ya heon, qa cankahu pajo kin owasin mini wicakahi.

21 Unkan wicašta kin yušinyaye ca taku eye šni, canku ohna u kin he Jehovah ohinniyan tanyan ikiyuštan kta hecinhan he sdonye kta.

22 Unkan cankahu pajo kin mini yatkan ayaštanpi, hehan wicašta qon mazaskazi maza cin tanka, mazaska hanke iyecen tke, he icu qa nakun maza huhu nom mazaska wikcemna iyecetu, hena owasin wikoška nape kin en ye kiya;

23 Qa, Tuwe hunkake yaya he? Omakiyaka wo, niyate ti kin ohna unkiwankapi kta okan he? eya.

24 Unkan, Milcah cinhintku Bethuel Nahor kiciton kin he cunwintku kin miye ce, eya.

25 Qa, Peji puze ca taku yutapi ko ota, qa nakun wankapi kta okan ce, eciya.

26 Unkan wicašta qon pamahdedan yanke ca Jehovah cekiye ca,

27 Jehovah Abraham mayuhe cin Wakantanka da kin he yawaštepi nunwe. Towicake towaonšida ko mayuhe cin ektakiya ayuštan šni, tuka mayuha hunkawanjitkupi tipi kin canku kin ohna Jehovah amau ce, eya.

28 Unkan wikoška kin duš hde ca iye hunku tipi kin en hena owasin oyaka.

29 Rebekah timdoku wan yukan, Laban eciyapi, qa Laban iš duš iyaya wicašta qon ekta minihdoka kin en.

30 Laban cin tanka, qa maza huhu tankšitku nape kin akan wanyake ca Rebekah tankšitku oie ye cin, Wicašta kin hecen emakiya eye cin he nahon qa, hehan wicašta qon minihdoka kin ekta, camo kin icahda najin kin en hi.

31 Qa heya, Jehovah he niyawašte kin u wo; tokeca tankan nayajin he? Miš tipi kin wanna wiyeya wakaga, Cankahu pajo yukanpi kte cin nakun.

32 Unkan wicašta qon tipi kin ekta hi; unkan Cankahu pajo kin kiyuške ca peji puza taku yutapi ko cankahu pajo kin qu, qa mini on šiha hdujaja kta wicašta om hi kin nakun hdujajapi kta e au.

33 Qa woyute nakun qu. Unkan, Taku on wahi kin owahdake šni kinhan onšpadan wate kte šni ce, eya. Unkan, la wo, eya.

34 Unkan, Abraham taookiye he miye:

35 Qa Jehovah he mayuhe cin nina yawašte, qa tahin wanuyanpi qu, qa pte, qa mazaska, qa mazaskazi, qa wicašta winyan ko wowindag wicaye cin, qa cankahu pajo, qa šuktanka šonšonna, hecen wicašta okinihan.

36 Qa mayuhe cin tawicu kin Sarah cinca wan ton, mayuha wanna wicahinca hehan he kiciton, unkan takuyuhe cin owasin kicu.

37 Qa Caanani makoce tawapi kin en manke cin he cunwintkupi kin etanhan micinkši on winohinca duze kte šni:

38 Tuka hunkake wicawaye cin tipi kin ekta de kte ca, takuwicawaye cin etanhan micinkši on winohinca wan duze kta ce, mayuhe cin eya konza, keyemaši.

39 Unkan, Okini winohinca kin mici u kte šni, mayuhe cin ewakiya.

40 Unkan, ohnihde wakan wada Jehovah itokam mawani kin, he taohnihde wan nici ye ši kte ca, mitakuye qa ate tipi kin etanhan, winohinca wan micinkši on duze kta e, canku yaye cin tanyan ihuni niciye kta ce.

41 Tuka taku eya konze ciciye cin nihiyahde kte šni, takuwicawaye cin ekta de cinhan, qa nicupi šni kinhan, hehan taku eya konze ciciye cin iyahde niciye kte šni, emakiya.

42 Unkan nakaha minihdoka kin ekta wahi qa hepa, Jehovah Abraham mayuhe cin he wakan nida, canku ohna wau kin tanyan ihuni mayakiya hecinhan;

43 Iho, miš minihdoka kin icahda nawajin qa wikoška wan mini huwe hiyu qa, Wakiškotpa duhe cin etanhan mini onge yatke makiya ye, ewakiye kta.

44 Unkan, Yatkan ye, qa nakun cankahu pajo nitawa kin mini wicawakahi kta ce, emakiye cinhan, winohinca wan mayuhe cin cinhintku yuze kta e Jehovah kahnige cin hee kte.

45 Miš cante mahen ia nahahin mdaštan šni, unkan inyun Rebekah hinanpe ca, minihdoka kin ekta kun i qa mini icu; unkan, Tokin yatke inayakiyen, ewakiya.

46 Unkan tawakiškotpa kin inahniyan kun ahi qa, Yatkan ye, qa cankahu pajo nitawa kin nakun woyatke wicawaqu kta ce, eya; unkan mdatke ca cankahu pajo kin nakun yatkanpi.

47 Unkan imonge ca, Tuwe cunwintku niyan he? ewakiya. Unkan, Bethuel cunwintku he miye, Nahor cinhintku Milcah kiciton kin hee. Hehan cin tanka ite kin akan ewahnaka, maza huhu nakun nape kin akan.

48 Qa pamahdedan manke ca Jehovah cewakiya, Jehovah Abraham mayuhe cin Wakantanka da kin he mayuhe cin cinhintku kin on, mayuhe cin sunkaku cunwintku iwacu kta e canku wicaka ohna amau kin he mdatan.

49 Qa niyepi wanna wowaonšida wowicake ko mayuhe cin ecayeconpi kte cinhan omakiyakapo, qa ecayeconpi kte šni kinhan omakiyakapo: etapa tanhan mduhomni kta kaeš catka tanhan, eya.

50 Unkan Laban Bethuel ko ayuptapi qa, Taku kin de Jehovah etanhan u qa taku šica kaeš taku wašte unkeniciyapi kta urikokitpanipi ce, eyapi.

51 Iho Rebekah nitokam un; icu qa hda wo. He niyuhe cin cinhintku kin yuze kta, Jehovah oie ye cin iyececa.

52 Unkan Abraham taokiye kin iapi hena nahon qehan, Jehovah ohoda kta e makata patus iyaya.

53 Hehan ookiye qon mazaska oin qa mazaskazi oin ikikcu, wokoyake nakun, qa hena Rebekah qu, timdoku hunku ko taku tenika wacaqu.

54 Hehan wotapi qa wayatkanpi, iye wicašia opapi kin hena koya. Wankapi qa hanhanna kiktapi qa, Mayuhe cin ekta hdicu mayan wo, eya.

55 Unkan timdoku hunku ko, Wiko ka unkicipi yanke kte, wikcemna can hehanyan, hehan ye kta ce, eyapi.

56 Unkan, Jehovah ii canku mitawa kin tanyan ihuni mayan heon mayutehanpi šni po. Mayuhe cin ekta kihde mayanpo, ewicakiya.

57 Unkan, Wikoška kin unkicopi qa, iye i kin etanhan unkiwangapi-kta ce, eyapi.

58 Qa Rebekah kipanpi, qa, Wicašta kin de kici de kta he? eciyapi. Unkan, Mde kta ce, eya.

59 Unkan Rebekah tawinohtinpi kin ye yapi, qa azinkiye ciqon, qa Abraham taokiye, qa wicašta tawa nakun.

60 Qa Rebekah yawaštepi qa, Unkitawinohtinpi kin he niye, kektopawinge oyawa tanka icaga wo, qa cinca wicayaye kte cin toka wicayapi otonwe kin yuhapi kte, eciyapi.

61 Hehan Rebekah najin, wikoška yuhc cin nakun, qa cankahu pajo akan iyotankapi, qa wicagta qon kici iyayapi. Hecen ookiye qon Rebekah icu qa kihda.

62 Wanna Isaac minihdoka, Tuwe ni un kin wanmayaka tawa kin hetanhan u, qa makoce puze cin en iyotanka.

63 Qa htayetu ca Isaac cekiye kta e martin ya, hehan wankan etonwe ca cankahu pajo upi kin wanwicayaka.

64 Rebekah nakun wankan etonwe ca Isaac wanyake ca cankahu pajo kin etanhan ipšica.

65 Qa ookiye kin heciya, Wicašta wan itkounkipapi hewoskan omani kin he tuwe? Unkan, Mayuhe cin hee, ookiye kin eya. Unkan ite akahpe wan icu qa aihdahpa.

66 Unkan ookiye kin, taku token econ kin owasin Isaac okiyaka.

67 Hehan Isaac iye hunku Sarah tawakeya kin mahen Rebekah tin ye ši, qa yuze ca tawicu kin wašte kidaka. Hecen Isaac iye hunku Sara te cin iyohakam iwacintonhnag yapi.

WICOICAGE WICOWOYAKE 25.

1 Hehan ake Abraham winohinca wan yuza, Keturah eciyapi.

2 Unkan cinca kiciton kin dena eepi, Zimran, qa Jokšan, qa Medan, qa Midian, qa Išbak, qa Šuah.

3 Unkan Jokšan iš Šeba qa Dedan kicitonpi. Unkan Dedan iš Asšurim, qa Letušim, qa Leummim cinkši wicaya.

4 Unkan Midian cincawicaye cin, Ephah, qa Epher, qa Hanoch, qa Abida, qa Eldaah. Hena owasin Keturah cinkšiwicaya.

5 Unkan Abraham taku yuhe cin iyuhpa Isaac qu.

6 Tuka winohinca uman cinca Abraham kicitonpi kin bena Abraham taku wicaqu, qa nahahin iye ni un kin wiyohiyanpata makoce kin ekta ye wicaši, cinhintku Isaac etanhan.

7 Abraham anpetu tawa kin waniyetu ni un kin dena ee, waniyetu opawinge sanpa wikcemna šakowin sanpa zaptan, hehanyan ni.

8 Hehan Abraham niya šni ta iyaya, pa ska wašte, qa wicahinca imna; hehan taoyate kin ekta okipa yapi.

9 Qa cinca wicaye cin Isaac Išmael kici kihnakapi; Machpelah imnija ohdoka kin en Mamre itokam, Zohar Heti he cinhintku Ephron tamaga qon en.

10 Maga wan Abraham Heth cincawicaye cin opewicakicaton, he en Abraham hnakapi, tawicu Sarah kici.

11 Unkan Wakantanka, Abraham te cin iyohakam, cinhintku kin Isaac yawašte, qa Isaac tuwe ni un qa wanmayake cin minihdoka tawa kin ekta ounyan.

12 Hagar Egypti kin Sarah tawikoška kin he Abraham cinca wan kiciton, Abraham cinhintku Išmael wicoicage tawa kin dee.

13 Išmael cincawicaye cin cajepi kin deepi, wicowazipi qa cajepi kin iyececa. Išmael cinca tokapa kin he Nebajoth, hehan Kedar, qa Adbeel, qa Mibsam;

14 Qa Mišma, qa Dumah, qa Massa:

15 Hadar, qa Tema, Jetur, Naphiš qa Kedema:

16 Hena Išmael cinkšiwicaya; toki tipi qa tonwanyanpi kin ecen eciyapi, wicaštayatapi ihdawapi ake nom, taoyatepi kin om.  

17 Išmael ni un kin waniyetu kin dena ee, waniyetu opawinge sanpa wikcemna yamni sanpa šakowin , henakeca; hehan niya šni ta iyaye ca taoyate kin ekta okipa yapi.

18 Hunkawanjin wicaye cin owasin wicehna ta. Havilah etanhan Šur itokam un kin ektakiya de cin qa hetanhan Assyria etu makoce kin he en ounyanpi.

19 Unkan Isaac Abraham cinhintku wicoicage tawa kin dee, Abraham he Isaac kicitonpi.

20 Unkan Isaac wanna waniyetu wikcemna topa, hehan Rebekah yuza, he Bethuel Syria kin he cunwintku, Padan-aram kin etanhan, Laban Syria kin tawinohtin kin hee tawicu kta e yuza.

21 Qa Isaac tawicu kin cinca ton šni kin heon, Jehovah icekiya. Unkan Jehovah anakicigoptan, hecen Rebekah Isaac tawicu kin ihdušaka.

22 Unkan hokšiyoqopa Rebekah niahen akinicapi; unkan, De taku hwo hecetu kta hecinhan token on hemaca he? eye ca Jehovah iwange kta e ekta i.

23 Unkan, Nitamni kin mahen oyate nonpa, qa nitezi kin etanhan oyate nonpa inanpapi kta, qa oyate wan wašaka kes oyate uman sanpa wašake kta, qa hakakta kin he tokapa kin wowidake yuhe kta ce, Jehovah eciya.

24 Unkan anpetu cinca ton kte cin wanna henakeca, qa inyun tamni kin mahen cekpa yukan.

25 Unkan tokapa kin hiyu owancaya gi, pte ha sina iyecen; unkan Esau eya caštonpi.

26 Hehan sunkaku kin hiyu, qa nape kin Esau siyete kin yus un; heon Jacob eya caš kiton. Hena tonpi kin ehan, Isaac waniyetu wikcemna šakpe.

27 Unkan hokšipidan tanka icagapi, qa Esau wotihni wayupika, wicašta hewoskan un kin heca, j tuka Jacob wicašta wahbadan wakeya oti.

28 Unkan Isaac Esau wašte kidaka, taku o kin yuta heon. Tuka Rebekah Jacob wašte kidaka.

29 Unkan Jacob wahanpi ohe cin icunhan Esau tinta kin etanhan u qa watuka un;

30 Qa, Akihan mate kta heon wahanpi sa kin de onge maqu wo, mdatke kta ce, Esau Jacob eciya. Heon Edom eya caje yatapi.

31 Unkan, Watonikapa kin he nakaha maqu wo, Jacob eya.

32 Unkan Esau, Wanna mate kta qa watomakapa kin de taku okihi kta he? eya.

33 Unkan Jacob, De anpetu icajeyan emakiya wo, eya. Unkan Wakan tanka icajeyan eciya. Hecen Esau watokapa tawa kin he Jacob qu.

34 Unkan Jacob omnica hanpi aguyapi kici Esau, unkan yute ea yatkan qa najin, qa toki iyaya. Hecen Esau watokapa kin ihakta šni.