Psalm Wowapi 40-49

PSALM 40

Dowan itancan kin on. David tadowan.

1 Apepi on Jehovah ape waun; Unkan anohmakiye ca hoyewaye cin namakihon.

2 Nakun wicotakunišni woha wan etanhan hiyu makiya, upšija hinca etanhan; Qa misiha imnija wan ahan makiye; mioye miciyušuta.

3 Qa odowan teca wan mii kin en ohnaka; Wakantanka unkitawapi yatanpi kin: Wicota wanyakapi qa kokipapi kta; Qa Jehovah wacinyanpi kte.

4 Wicašta wan cante wašte hinca, Jehovah wowinape yuhe cin hee; Qa tona wahanhanicidapi kin, Woitonani opapi kin hena koya ekta etonwe šni.

5 Jehovah mita Wakantanka taku ota ecanon; Niohan wakan qa unkiycpi on nitawacin kin, Hena owecinhan niciyawapi kte šni; Cajemdate ca omdake kta ešta, hena yawapica šni.

6 Wcsnapi qa wawicaqupi kin hena iyonicipi šni; Noge mayakiduhdoka: Wahuhnahyapi qa woahtani on wošnapi kin yada šni.

7 Hehan hepa; Watiyaka wo, wau ce; Tawowapi wanzi kin en hecen omiciwapi:

8 Wakantanka mitawa nitawacin ecen ecamon kta iyomakipi; Qa nitoope kin micante mahen un.

9 Omniciye tanka kin en woowotanna eyanwapaha: Wanyaka wo, miiha wakpatan kte šni; Jehovah niye sdonyaya,

10 Nitoowotanna micante mahen nawahbe šni; Wacinniyepica qa waniyakiya omdaka; Nitowaonšida qa nitowicake omniciye tanka kin etanhan nawahbe šni.

11 Jehovah niye, Nitowaonšida temiyecihda kte šni; Nitocantekiye qa nitowicake ohinniyan mapatan kte.

12 Taku šica yawapica šni aohdutemayanpi; Wawahtani kin hena emihdegapi, Qa hecen wawanyaka owakihi šni; Hena mapa hin isanpa ota; Qa on cante mawanica.

13 Jehovah, emahdaku iyonicipi nunwe; Jehovah, omakiya inahni ye.

14 Tona minagi ihangya akitapi kin hena witaya cante toketu taninšni qa htecapi kte; Tona šicaya waun kta cinpi kin hena hekta hdicupi qa htecapi kte.

15 Tona, Hoho, hoho, emakiyapi kin hena wowištece on atakunipi kte šni.

16 Tona anicitapi kin hena owasin cante waštepi qa iniciyuškinpi kte; Tona wiconi nitawa waštedapi kin hena, Jehovah yatankapi nunwe, eyapi kte.

17 Tuka miye onma ke ca mawahpanica; Itancan kin amawacin un kta: Tuwe omakiye ca emahdaku kin he niye; Wakantanka mitawa yutehan šni ye.

PSALM 41

Dowan itancan kin on. David tadowan.

 1 Tuwe wicašta on ka en ewacin kin he cante wašte; Anpetu šice cin en Jehovah ehdaku kte.

2 Jehovah awanhdake cu nikiye kta; Maka akan tanyan un kte; Qa tokayapi tawacin kin en wicayaqu kte šni.

3 Wowayazan ohe akan Jehovah yuwašake kta; Wayazanka icunhan towinja ocowasin piyaya.

4 Miye hepe; Jehovah onšimakida wo; Minagi asniyan wo; wacicihtani kin heon.

5 Tokamayanpi kin hena taku šica emakiyapi kta; Tohan te kta qa caje atakuni kte šni he?

6 Qa wanmayag hi kinhan woitonšni oyaka ece kta; Cante mahen woahtani mnakiya; Tokiya ye kte ca oyake kta.

7 Tona sleemadapi owasin witaya amajijipi kta; Hena šicaya cante makiyuzapi kta.

8 Taku šice hinca wan aokaštanpi ce: Qa tuwe makata wanke cin he ake kinajin kte šni.

9 Han, wicašta kici wowakiye, wacinwakiye ciqon, Aguyapi mitawa yute cin he siyete on namahtaka.

10 Tuka, Jehovah niye, onšimada qa najinmakiya wo; Hecen wicawecicajuju kta.

11 Detanhan waštemayadaka sdonwakiya; Tokamaye cin maktedan šni kin heon.

12 Unkan miye, mitoecetu kin en mayadusuta; Qa ohinniyan niite itokam najin mayakiya.

13 Jehovah, Israel ta Wakantanka, yawaštepi nunwe; Otokahe wanica qa owihanke wanica. Amen qa amen.

PSALM 42

Dowan itancau kin, Korah cinca wahokonwicakiyapi.

 1 Tatokadan mini wakpadan cantokpani, He iyecen, Wakantanka, minagi cantonikpani ece.

2 Wakantanka on minagi ipuza, Wakantanka ni un kin; Tohan wau qa Wakantanka ite kin en mihdutanin kta he?

3 Istamnihanpe amau kin hena woyute waye, anpetu hanyetu koya; Nita Wakantanka tukten un he, ohinniyan emakiyapi heon.

4 Dena weksuye ca minagi amihdapson kta; Wicota om imdamde cinhan; Hena om Wakantanka tipi kin ekta wai; Wowiyuškin  qa woyatan ho kin yuha; Wicota anpetu wakan opapi kin hena om.

5 Minagi, tokeca pamahdedan yaun, Qa tokeca miye mahen iyonici ca he? Wakantanka wacinyan wo, ake mdatan kte, Miite omakiye ca mita Wakantanka kin hee.

6 Mahentanhan minagi iyokišica un; Heon ciksuye kta, Jordan niakoce kin etanhan, Qa Hermon he, paha Mizar kin hetanhan.

7 Mini tanka nitawa ho kin on, mini sma kin mini sma kipan; Taja nitawa qa mini ihaha nitawa owasin miwankam iyaya.

8 Anpetu icunhan Jehovah towaonšida kin ekihde kta; Qa hanyetu eca iye tadowan kin mici un; Wakantanka uimaye cin he cewakiye kte.

9 Wakantanka imnija mitawa hewakiye kta; Tokeca amiyektotvja he; Tokeca wašihda imdamda he, Toka šicaya makuwapi kin on.

10 Tokamayanpi kin iyopemayanpi, mahuhu kasugujapi kin iyececa; Anpetu otoiyohi, Nita Wakantanka toki un he, emakiyapi kinhan.

11 Minagi, tokeca pamahdedan yaun? Qa tokeca miye mahen iyonicišica he? Wakantanka wacinyan wo, ake mdatan kta, Miite omakiye ca Wakantanka mitawa kin hee.

PSALM 43.

 1 Wakantanka mayaco qa imakiya wo; Oyate wacantkiye šni kin on; Wohnayan wicašta qa wahtani sa etanhan emayahdaku kte.

2 Wakantanka conkaške mitawa kin he niye; Tokeca ehpemnyaya he? Tokeca wašihda miye iyaya kta he, Toka šicaya makuwapi kin on?

3 Iyoyanpa nitawa qa wowicake nitawa u kiya wo; Hena yuš amaye kte; Paha wakan nitawa kin en hi makiye kte; Qa nakun wokeya nitawa ekta.

4 Hehan Wakantanka owayusna tawa ekta wau kte; Taku Wakan mitowiyuškin tanka ekta. Unkan candowankiyapi on icidowan kta, Wakantanka, Wakantanka mitawa.

5 Minagi, tokeca pamahdedan yaun? Qa tokeca miye mahen iyonicišica he? Wakantanka wacinyan wo, ake mdatan kta; Miite omakiye ca Wakantanka mitawa kin hee.

PSALM 44

Dowan itancan kin on. Korah cinca wahokonwicaklyapi.

 1 Wakantanka, noge on naunhonpi, Atewicunyanpi unkokiyakapi, lye taanpetu kin en wicohan ecanon qon, Wanakaja anpetu kin en.

2 Niye ninape on Ikcewicašta hamwicayaya, Qa iyepi en owicayakiju; Oyatepi kin ihangwicayaya, Qa iye icahwicayakiya.

3 Mazasagye tawapi on makoce kin icupi šni; Qa iye išto kin he on eicihdakupi šni; Tuka ninape etapa, qa niišto, qa niite iyoyanpa kin; Niye cantowicayahnake cin heon.

4 Wakantanka, Wicaštayatapi mitawa kin he niye; Jacob woehdaku kiconza wo.

5 Niye on tokauuyanpi kin paha. iyewicunyanpi kta.; Nicnje on tona itkounkipapi kin nawicunpanpi kta.

6 Mitinazipe wacinwakiye kte šni; Qa mazasagye mitawa nimaye kte šni.

7 Tuka niye tokaunyanpi kin etanhan eunyahdakupi; Qa tona šiceundapi kin ištenwicayaya.

8 Anpetu osan Wakantanka unkidowanpi; Qa nicaje ohinniyau unyatanpi kta. Selah.

9 Hececa ešta, ehpeunyayapi qa wowištece unyakagapi; Qa ozuye unkitawapi kin om de kte šni.

10 Toka kin itokapatanhan hdicuunyayapi kta: Qa tona šiceundapi kin hena wakte hdapi.

11 Tahinca wanunyanpi yutapi kte cin iyececa unyakagapi kta: Qa Ikcewicašta ehna enanakiya iyeunyayapi.

12 Nitaoyate inyunwin codan wiyopeyakiye kta: Qa iyopeyapi on takudan yakamna šni.

13 Unkikiyepidan unpi kin en wowištece unyakagapi kta; Unkihdukšan unpi kin en wowihahaunyanpi qa poptanptanunkiyapi.

14 Ikcewicašta ekta oweštepi unyakagapi kta; Oyatepi en pomnamnaunkiyapi kte.

15 Anpetu osan istenmayanpi kin mitokam un; Qa miite ištece cin he amahdahpa:

16 Tuwe wawiyopeye ca wayašica bo kin on; Toka ite qa waihangye cin on etanhan.

17 Dena owasin unkakipapi, tuka unkaniktonjapi šni; Qa wicotakuye nitawa unhnayanpi šni.

18 Uncantepi hekta hdicu šni; Qa unkoyepi nitacanku icunonpa ye šni.

19 Unktehi owanka kin en unyakawehwegapi; Qa wiconte on unkayakahpapi.

20 Wakantanka unkitawapi caje unkakiktonjapi, Qa taku wakan tokeca ekta nape unhdugatapi kinhan;

21 Wakantanka he ode kte šni he? Wicacante woinahbe kin hena iye sdonya nakaeš.

22 Niye on anpetu osan unktepi unyakonpi; Tahcaska wanunyanpi wicaktepi kte cin iyecen unyawapi.

23 Itancan, ihduhica wo, tokeca nistinma he; Kikta wo, hecehin ehpeunyanpi šni po.

24 Tokeca niite nayakihbe kta he; Iyounkišicapi qa slcaya unkuwapi kin ayektonje kta he?

25 Unnagipi watusekseca ekta patus yanka; Untancanpi maka kin ahdaskin wanka.

26 Ounyakiyapi kta on inajin wo; Qa nitowaonšida on opeunkiton po.

PSALM 45

Dowan itancan kin on. Korah cinca wahokonwicakiyapi. Alamoth odowan.

 1 Micante wicoie wašte on ipiga; Miohan wicaštayatapi kin owakimdake; Wowapi icage wowapi kaga wayupika tawa miceji kin hee.

2 Wicašta cinca ehna niye iyotan owanyag niwašte; Niiha en wowašte okastanpi; Heon Wakantanka ohinniyan niyawašte.

3 Iyotan wašaka, mazasagye nitawa ceca en iyahdaika wo; Nitowitan qa nitoiyokipi ahna:

4 Qa nitowitan hduha šuktanka akan iyoopta ya wo; Wowicake qa woowotanna onšike cin hena on; Unkan nape nietapa taku wowinihan onspeniciye kta.

5 Wanhinkpe nitawa pepe hinca; Nitokam oyatepi hinhpayapi kta; Tona wicaštayatapi tokayapi cantepi kin en.

6 Wakantanka, oiyotanke nitawa ohinniyan qa owihanke wanica; Nitokiconze sagye kin he woowotanna sagye.

7 Woowotanna wašteyadaka, qa woahtani šiceyadaka; Heon Wakantanka, nita Wakantanka kin, Wowiyuškin wihdi on sdaniciya, Kodawicayaye cin isanpa.

8 Nitawokoyake owasin cansin, qa canhasa, qa pejihuta waštemna; Huhu tipi wašte kin etanhan wiyuškinniyanpi.

9 Wicaštayatapi cunwintkupi kin winohinca waštešte nitawa om iinpi; Wicaštayatapi tawicu kin nietapa ekta najin, Mazaskazi Ophir etanhan en.

10 Cunš, anagoptan qa wanyaka qa on anohkiya wo; Qa nitaoyate niyate ti ko akiktonja wo:

11 Unkan wicaštayatapi kin nitowašte waštedake kte: He itancan nitawa, hecen itokam patuja wo.

12 Tyre cunwintku taku ituhanpi wan on niite akite kta; Oyate kin en wijicapi kin hena.

13 Ti mahen wicaštayatapi cunwintku kin ocowasin wowitan; Tawokoyake kin mazaskazi kazontapi.

14 Šina ipatapi in wicaštayatapi kin en ahipi kta; Wikoška pi takodawicaye ihakam unpi kin hena niye en awicahipi kta.

15 Wowiyuškin  qa wopida yuha en awicahipi kta; Wicaštayatapi tipitanka kin timahen hipi kte.

16 Niyatepi eekiya nicinkšipi yuke kta; Hena maka kin owancaya wicašta itancan ewicayahde kte.

17 Wicoicage qa wicoicage owasin en nicaje kiksuyewicawaye kta: Heon oyatepi kin niyatanpi kta, owihanke wanica.

 

PSALM 46

Korah cinca on; dowan itancan kin. Alamoth ehan dowanpi.

 1 Wowinape qa wowašake unkitawapi kin Wakantanka hee; Awicakehan wokakije en waokiye iyeyapi ece.

2 Heon etanhan kopeunhdapi kte šni, maka kin yutokecapi, Qa he kin miniwanca cante en ayapi ešta.

3 Mini kin hotanin qa škanškan kte; He on he kin yuhuhuzapi kte. Selah.

4 Wakpa wan adetka kin Wakantanka totonwe kin iyuškinye kta; Tipi wakan kin Iyotan Wankan un ounye cin he.

5 Wakantanka cokaya un, heon pahohopi kte šni; Anpao hinanpa hehan Wakantanka okiye kta.

6 Ikcewicašta oqoyapi, wicokiconze kin škanškanpi; lye ho hdutanin, maka kin skan kta.

7 Jehovah Sabaoth unkicipi un; Jacob ta Wakantanka wowinape unyanpi. Selah.

8 U miye, Jehovah tohan kin wanyaka po; Makoce kin en woihangye kaga ece.

9 Maka ihanke hehanyan ozuye ayuštan kiya; Itazipa kin kawege kta, qa wahukeza kakse kta; Canpahmihma kin peta on huhnahye kta.

10 Ayuštan po, qa Wakantanka kin he miye e sdonya po, Ikcewicašta ehna mayatanpi kte, maka akan mayatankapi kte.

11 Jehovah Sabaoth unkicipi un: Jacob ta Wakantanka wowinape unyanpi. Selah.

PSALM 47

Dowan itancan kin on. Odowan; Korah cinca tawapi.

 1 Oyate owasin, nape hdaškapa miye; Wowiyuškin ho kin on Wakantanka iyaša po.

2 Jehovah Iyotan Wankan kin he wowinihan; Wicaštayatapi tanka, maka kin owancaya.

3 Unkihukun wicašta kin ewicahnake kta; Qa oyatepi unsihapi ihukuya.

4 Makoce wan unkicicahnigapi kte; Jacob waštedake ciqon toiyokipi kin hee. Selah.

5 lyasapi yuha Wakantanka wankantkiya ikiyopta; Jehovah mazayahotonpi ho kin hduha.

6 Dowan po, Wakantanka idowan po; Dowan po, Wicaštayatapi unkitawapi idowan miye.

7 Wakantanka maka kin owancaya Wicaštayatapi; Wowahokonkiye wan on dowan miye.

8 Wakantanka Ikcewicašta kin wowidagwicaya; Wakantanka oiyotanke wakan kin akan kiyotanka.

9 Oyatepi en itancanpi kin mniciyapi; Abraham ta Wakantanka taoyate kin: Makoce wahacanka kin hena Wakantanka tawa: lye nina tehanwankan un.

PSALM 48

Korah cinca tawapi. Psalm odowan.

1 Jehovah he tanka, qa nina yatanpi kte; Taku Wakan unkitawapi totonwe, He wakan tawa kin en.

2 Oyanke wašte hinca, maka ocowasin wowiyuškin; Zion Paha kin, waziyata opapun ekta; Wicaštayatapi tanka totonwe kin.

3 Tipi waštešte tawa kin ohna, Wakantanka wowinape yapi kta sdonyapi.

4 Iho, maka wicaštayatapi kin mniciyapi; Witaya en hiyayapi:

5 Hena wanyakapi, unkan inihanpi; Kopehdapi qa najica iyayapi.

6 Hen cancan hinhdapi; Wayazan hdapi, wihohinca hoksiksuya iyececa,

7 Wiyohiyanpa tanhan tate kin on, Taršiš wita wata kin yakajuju kta.

8 Nannhonpi qon be iyecen wanunyakapi; Jehovah Sabaoth totonwe kin en, Wakantanka unkitawapi totonwe ohna; He Wakantanka ohinniyan hdusuta kte. Selah.

9 Wakantanka, tipi wakan nitawa ohna, Nitocantekiye kin awauncinpi.

10 Wakantanka, nicaje iyececa, Niyatanpi niaka ihanke kin hehanyan; Ninape etapa woowotanna ojudan.

11 Zion Paha kin iyuškin kte; Judah cunwintkupi cante waštepi kte; Woyaco nitawa kin on etanhan.

12 Zion ihdukšan ya miye, ohomni mani po; Canpašotka kin hena yawa po:

13 Conkaške tawa kin ekta cante yekiya po; Tipi waštešte kin hena awacin miye; Hecen wicoicage u kte cin owicayakidakapi kte.

14 Taku Wakan kin de Wakantanka unkitawapi, owihanke nica: Wiconte hehanyan yuš unkayapi kte.

PSALM 49.

Dowan itancan kin. Odowan Korah einca tawapi.

 1 Oyate owasin, de nahon miye; Maka akan ounyanpi kin owasin, anagoptan po:

2 Wicašta cinca, nakun wicašta cinca, Wijicapi wahpanicapi kin om.

3 Mii woksape oyake kta; Qa micante taku awacin kin he wookahnige.

4 Wiyacinpi wan ekta minoge yewaye kta; Candowankiyapi on mitadowan mduotanin kta.

5 Anpetu šica en tokeca kopewahda kta he; Tona amahanpi wahtanipi kin aphdutemayan kinhan.

6 lye towašakepi kin wacinkiyapi; Qn taku ota tonpi kin on ihdatanpi ece:

7 Wicašta wan iye sunkaku ecaca opekiton kte šni: On wiyopeyapi Wakantanka qu kta okihi šni.

8 (Unkan nagipi opekitonpi kin he tehika; Qa owihanke wanica okihipica ii:)

9 Hecen hinyahin ohinniyan ni un kta; Qa wicahwin wanyake kte šni.

10 Wicašta ksapa tapi kte cin he wanyake kta; Nakun witkotkoka wacintonšni ko atakunipi kte šni; Qa taku tonpi kin toktokeca aijipewicakiyapi kte.

11 Cante mahen, tipi tawapi owihanke wanice kta, kecinpi; Ohna yukanpi kin wicoicage qa wicoicage hehanyan; Makoce tawapi iye cajepi icajeyatapi ece.

12 Tuka wicašta woyuonihan en yanke kte šni; Woteca iyecen kagapi; hena atakunipi šni.

13 Hecen ohanyanpi; hecen witkotkokapi: Tuka tona ihakam upi kin hena Token eyapi qon he waštedakapi kta. Selah.

14 Optaye wan iyecen wicahapi ekta awicayapi; Wiconte wonwicaye kta; Qa wicašta owotanna, anpao kinhan, wowidagwicayapi kta: Nakun towašakepi kin wicahapi yušote kta; Iye tipi kin etanhan tawawicaya.

15 Tuka Wakantanka minagi wicahapi nape etanhan opemakiton kta; Iye emahdaku kta, heon.

16 Wicašta wan wijica icage cinhan kopehda šni wo; Tipi tawa wowitan tanka aye cinhan:

17 Tohan te cinhan takudan hduha ye kte šni; Towitan ihakam kun ye kte šni.

18 Tuka ni un icunhan nagi hdawašte kta: Nakun tanyan nicicuwa kinhan niyatanpi kta.

19 Atewicaye wieoicage kin ekta ye kta: Hena icimana iyoyanpa wanyakapi kte šni.

20 Wicašta yuonihanpi, tuka okahnige šni kin he woteca kin iyacinpi, hena atakunipi kte šni.