Haggai

HAGGAI

WICOWOYAKE 1.

1 Darius wicaštayatapi kin tawaniyetu inonpa, wi išakpe, anpetu tokaheya en, Haggai wicašta wokcan nape eciyatanhan, Jehovah oie Zerubbabel Šealtiel cinhintku, Judah wicaštayatapi, qa Jošua Josedech cinhintku wawayušna itancan kin hena en hi, qa heya:

2 Jehovah ozuye yuha hewoyake ca hecen eya; Oyate kin de kaken eyapi ece; Hinyahin iyehantu šni, tohan Jehovah tipi kagapi kte cin hinyahinke šni ce.

3 Hehan Jehovah oie Haggai wicašta wokcan nape eciyatanhan u kin he hecen eya:

4 Niye tipi ayuco hduštanpi kin ohna yatipi kta iyenihantupi, qa tipi kin de jujuwahan yanke kta he?

5 Heon etanhan wanna Jehovah ozuye hduhe cin he hecen eya; Nitacankupi kin awakicin po.

6 Ota oyajupi, tuka tonana ayahdipi ece: wayatapi, tuka winipipi šni; wadatkanpi, tuka yatkanpi on initnnanpi šni; wokoyake kodakapi, tuka tuwedan icoza šni; qa tuwe wokamna wicacaje qa wowitan wicawecage kta ce.

7 Jehovah ozuye hduhe cin he hecen eya; Nitacankupi kin awakicin po.

8 He kin ekta ya po, qa can icu po, qa tipi kin kaga po; kinhan on iyokipimiciye kta qa inihduwitan kta ce, Jehovah eya.

9 Taku ota duhapi kta kecannipi, tuka iho, tonana: unkan ayahdipi hehan awapogan. He tokeca he? Jehovah ozuye hduhe cin eya. Tipi mitawa jujuwahan wanka heon etanhan, qa niyepi otoiyohi tipi ekta inyang yahdapi ece.

10 Heon etanhan niwankamtu mahpiya kin cu anakipte; qa niaka kin waskuyeca tawa anakipta ece.

11 Unkan miye makopuza weco, maka kin akan, qa he kin akan, qa wojupi kin akan,qa miniša teca kin akan, qa wihdi kin akan.qa taku maka etanhan icaga ece kin akan, qa wicašta akan, qa woteca akan, qa wicanape htani kin iyunpa akan.

12 Hehan Zerubbabel Šealtiel cinhintku, qa Jošua Josedech cinhintku, wawayušna itancan kin, oyate okaptapi kin owasin koya, Jehovah Wakantanka tawapi ho kin anagoptanpi, qa Haggai wicašta wokcan Jehovah Wakantanka tawapi u si oie kin hena; qa oyate kin Jehovah itokam kokipapi.

13 Hehan Haggai Jehovah u si kin he woyake ca, Jehovah oyate taku wahowicaye cin en hecen eya; Miye cicipi waun ce, Jehovah eya.

14 Unkan Jehovah Zerubbabel Šealtiel cinhintku Judah itancan taniya kin yuhica, qa Jošua Josedech cinhintku wawayušna itancan taniya kin, qa oyate okaptapi owasin taniya wicayuhica: Hecen upi, qa Jehovah ozuye hduha Wakantanka tawapi tipi kin en htanipi ece:

15 Darius wicaštayatapi kin tawaniyetu inonpa, wi išakpe, qa anpetu wikcemna nonpa sanpa topa kin en.

HAGGAI WICOWOYAKE 2.

1 Wi išakowin, anpetu wikcemna nonpa sanpa wanjidan en, Jehovah oie Haggai wicašta wokcan nape kin eciyatanhan u kin he hecen eya:

2 Wanna, Zerubbabel Šealtiel cinhintku Judah itancan, qa Jošua Josedech cinhintku wawayušna itancan, qa oyate okaptapi kin hena om wohdaka, hewicakiya wo:

3 Onieaptapi kin etanhan tuwe tipi kin de towitan tokaheya kin en wandakapi he? qa wanna token wandakapi he? hekiciiwanyakapi niistapi kin en wanna takušni iyecece šni he?

4 Tuka nakaha, Zerubbabel, waika wo, Jehovah eya; qa Jošua Josedech cinhintku wawayušna itancan kin, wašaka wo; qa makoce kin en oyate ocowasin, wašaka po qa htani po; miye cicipi waun nakaeš, Jehovah ozuye hduhe cin eya.  

5 Egypta etanhan yahinapapi qon he ehan, niyepi kin en mioie miciconze cin he iyececa, Mitaniya kin nicipi un: wakokipapi šni po.

6 Jehovah ozuye hduhe cin he hecen eya ce: Ehake wancadan, wanna ecadan kta, hehan miye mahpiya kin mduškanškan kta, qa maka kin, qa miniwanca kin, qa hopuza kin:

7 Nakun oyate kin owasin mduškanškan kta, qa oyate owasin cantiheyapi kin he u kta: Qa tipi kin de wowitan on ojuwaye kta ce, Jehovah ozuye hduhe cin eya.

8 Mazaska kin he mitawa, qa mazaskazi kin he mitawa ce, Jehovah ozuye hduhe cin eya.

9 Tipi ehake kin de wowitan tawa kin he tokaheya qon isanpa tanka kta, Jehovah ozuye hduhe cin eya: Nakun oyanke kin de en wookiye wicawaqu kta ce, Jehovah ozuye hduhe cin eya.

10 Wi inapcinwanka anpetu wikcemna nonpa sanpa topa, Darius tawaniyetu inonpa en, Jehovah oie Haggai nape kin eciyatanhan u kin he hecen eya:

11 Jehovah ozuye hduhe cin he hecen eya ce; Wanna woope kin on wawayušna kin wiwicawanga qa heya wo:

12 Tuwe tado yuwakanpi kin he tasina opapun kin ohna qin aye ca, tasina on aguyapi, qa taku ohanpi, qa miniša, qa wihdi, qa woyute taku kašta, kahtake cinhan he wakan kta he? Unkan wawayušna kin ayuptapi qa, Hiya, eyapi.

13 Hehan Haggai heya; Tuwe taku ta on ašape cin he taku hececa yutan kinhan i ašape kta he? Unkan wawayušna kin ayuptapi qa, He asape kta ce, eyapi.

14 Hehan Haggai waayupta qa heya; Wicašta kin dena hececa, qa oyate kin de mitokam hececa, Jehovah eya: qa wicohan nape on econpi kin owasin hececa, qa hen taku wayušnapi kin hena yu apapi ece.

15 Heon etanhan, ceciciyapi ce, anpetu kin de etanhan qa hektapa de awakicin po; Jehovah tipi tawa kin en inyan wan inyan akan ehnakapi šni qon itokamtu;

16 Hena etanhan, tuwe paha wan wikcemna nonpa kta en hi qehan wikcemnana en un; miniša iyuskice en hi, iyuskice kin etanhan wikcemna zaptan ikikcu kta, tuka wikcemna nomnana en un ece.

17 Woyušnije, qa aa, qa wasu kin on, taku ninape econpi kin owasin en acipapi; tuka miye en nihduhomnipi šni, Jehovah eya.

18 Wanna nicantepi en awacin po, anpetu kin de etanhan qa tokata wapa, wi inapcinwanka en anpetu wikcemna nonpa sanpa topa etanhan, Jehovah tipi wakan tawa ahdehe cin ehnakapi kin hetanhan awacin po.

19 Wojupi kin hinyahin mazopiye kin ohna yanka he: han, hinyahin hastanhanka iyuwi, qa witanšna hu kin, qa taspantanka su ota, qa wihdi can kin Inkmhtu aicage šni: anpetu kin detanhan ciyuwaštepi kta ce.

20 Unkan wi kin en anpetu wikcemna nonpa sanpa topa kin en, Jehovah oie kin inonpa Haggai en hi kin he hecen eya:

21 Zerubbabel Judah itancan kin he kici wohdake ca heya wo; Miye mahpiya kin qa maka kin mduškaškan kta;

22 Qa wokiconze oiyotanke kin mduptanye kta, qa Ikcewicašta wokiconze wowašake kin ihangwayekta: qa canpahmihrna kin hena mduptanye kta, tona en iyotankapi kin hena koya; qa šuktanka qa tona akan iyotankapi kin hena hinnpayapi kta, otoiyohi iye takodaku tamazasagye kin on.

23 Anpetu kin he en, Jehovah ozuye hduhe cin he hecen eya, Zerubbabel mitaokiye, Šealtiel cinhintku kin, niye icicu kta, qa woipuspe wan iyececa cicage kta ce, Jehovah eya: Miye cicahniga nakaeš, Jehovah ozuye hduhe cin eya.