Nahum

NAHUM

WICOWOYAKE 1.

1 Nineveh on woyake kin. Nahuin Elkoši kin tawowanyake wowapi kin dee.

2 Wakantanka winawizi qa watokico i ecee kin Jehovah hee: Jehovah watokicon qa wohitika: Jehovah tona kipajinpi kin towicakicon kta, qa tona tokayapi kin wosiuhda wicakiyuhe kta.

3 Jehovah wawacinkta yuza tanka, tuka wašake hinca, qa iyaonpepica ni wicayawa kte šni: Jehovah tacanku kin tateiyumni qa kihanšica ohna wanka, qa watusekšeca iye siha askape cin mahpiya sapa kin hena ee.

4 Miniwanca kin kišica qa kapuza, qa wakpa owasin oyaheya ece: Bašan qa Carmel šnis aya; qa Lebanon wahca kin šnija.

5 lye itokata he kin cancan, qa paha kin skan aya; nakun maka kin škanškan, iye itokapatanhan: han, maka qa en oimyaiipi kin owasin koya.

6 Iye tosinhda kin itokam tuwe najin okihi kta he: qa tocanniye wohitike cin tuwe en un kta he: iye towohitike kin peta iyecen kastanpi, qa iye eciyatanhan imnija kamdemdecapi ece.

7 Jehovah wašte, wonihinciye anpetu kin en he wowinape yapi kin heca: qa tona wacinyanpi kin hena sdonwioakiya ece.

8 Tuka minitan apasboka on owanka kin he ocowasin ihangye kta: qa tokawicaye cin hena otpaza kuwa awicaye kta.

9 Taku e Jehovah on awacannipi he? woihangye kage kta; wokakije kin he inonpa hinanpe kte šni.

10 Wapepeka iyececa icihmunpi kes, qa miniša tawapi on witkopi ešta, peji puze hinca iyecen huhnahyapi kta ce.

11 Tuwe Jehovah on taku šica awacin, wiyukcan wicaštašni kin heca, he niye etanhan hinanpa.

12 Jehovah hecen eya ce; lhdustanpi qa decen otapi qeyas hecen wicakasdapi kta, tohan iye iyopta ye cinhan. Kakišciya tuka ake icimana kakisciye kte šni.

13 Unkan nakaha iye tawanapin kin niye etanhan ciciyukse kta, qa on nicaškapi kin mduwehwege kta ce.

14 Nakun niye on Jehovah wakiconza, nicaje etanhan icimana ojupi kte šni: Taku wakan nitawa tipi kin etanhan wakagapi bagopi qa wakagapi sdoyapi kin ihangwaye kta: woha cioicage kta, niwahte šni nakaeš.

15 Wanyaka wo, tuwe he akan wotanin wašte au siha kin, wookiye eyanpaha! Judah, wohanpi wakan nitawa hduštan wo; wahoyaye cin hduecetu wo: Tuwe wicaštašni kin he ake icimana en niu kte šni; he ocowasin ihangyapi nakaeš.

NAHUM WICOWOYAKE 2.

1 Waihangye kin he nitkokim hiyu: Conkaške kin acankaska wo, canku kin awanhdaka wo, nite hduwašaka wo, wowašake kin he nina hdusuta wo.

2 Jehovah Jacob towitan kin tokan iyeya, Israel towitan qon iyececa: wawicaki sa kin hena wawicakipi, qa iyuwi adetka tawapi kin ihangyapi nakaeš.

3 Wicašta waditaka tawa tawahacanka kin sayapi, wicašta wašakapi kin hena wokoyake duta unpi: anpetu en piiciya eca maza wiyakpakpa kin canpahmihma ikoyagyapi,qa wahukezakin koskozapi ece.

4 Canpahmihma kin cankuohna witkotkoya skanpi, otonwe canku kin ohna icicawin nawankapi: wanyakapi kin petuspe seececa, wakanhdi iyecen iyoyam hinhda kta.

5 Taakicita tancan kin hena owicawa kta: hena manipi kinhan hicahanpi kta; ihdukšan conkaške kin ekta inahni yapi kta, qa woakahpe kin ehdepi kta.

6 Wakpa tiyopa kin hena yuhdokapi, qa tipi wašteste kin hena škan aya.

7 Qa Huzzab, tancodan ehpeyapi, wayaka ayapi, qa wikoška tawa kin hena maku en aicipapi wakiyedan ho kin on iyecen yuš ayapi kta.

8 Anpetu wanakajatanhan Nineveh mini kiwitayapi kin iyececa. Tuka najicapi kta: Inajin po, inajin po, eyapi: Tuka tuwedan hakikta šni.

9 Mazaska kin icu po, mazaskazi kin icu po: taku mnayanpi kin yusotepica šni; wakšica okah wašte kin owasin wopteca šni nakaeš.

10 Kastanpi, qa yucokapi, qa yutakunipi šni: qa wicacante kin skan aya, qa wicahupahu kin icicakog hinhdapi, qa wicanite kin otoiyohi nina yazan hda, qa wicaite owasin samya icupi ece.

11 Mnaja wamaniti kin tukten un he, qa mnaja koška en wotapi kin, tukten mnaja, mnaja wiye, mnaja cinca ko manipi, qa tuwedan wakokipe wicakicage šni.

12 Mnaja kin he iye cinca on wawicakiyaspaspa, qa mnaja wiye tawa on wicakiyahuhuga ece, qa makohdoka tawa kin wawicakipi on ojudan kihnaka, qa wašun tawa kin taku manonpi on.

13 Iho, itkocicipe kta ce, Jehovah ozuye yuhe cin eya; qa canpahmihma tawa kin šota en huhnahwaye kta; qa mazasagye kin mnaja koška nitawa kin hena temwicaye kta: Qa maka kin etanhan taku mayanon ece kin wakaspe kta; qa wahosi yewicayasi ho kin ake icimana nahonpi kte šni ce.

NAHUM WICOWOYAKE 3.

1 Hehehe wewe otonwe kin! wohnaye qa wicayahtahtakapi kin ojudan; watnanonpi kin ayustan šni ece:

2 Icapsinte ho kin, qa canhdeška kokogya unpi, qa šuktanka nawangwankapi, qa canpahmihma ipsipšicapi ece.

3 Šuktanka wicaštapi akan iyeiciyapi, mazasagye pawiyakpapi, qa wahukeza kin wiyakpakpa: Unkan wicota wicaktepi; qa wicašta ta wanka ota hinca; qa wicata wanke cin wopteca šni; wicašta ta wankapi kin ehna naktihanhanpi ecee.

4 Witkowinna owanyag wašte wawicihahapi ota econ kin on, wakanyan econpi itancan kin hee, wawicihahapi econ kin on oyate wiyopewicaya, qa wakanyan econ kin on wicowazi wiyopeya ecee kin hee:

5 Iho, itkocicipe kta, Jehovah ozuye yuhe cin eya; sanksanica nitawa nite ekta ewahnake kta, qa tanconikadan kin he oyate kin wanyagwicawakiye kta, qa wokiconze kin nitowištece kin wanyakapi kta ce.

6 Qa taku šice hince cin aihpeciye kta, qa wahtešni cicage kta, qa owanyake on ecihnake kta ce.

7 Hehan kaketu kte, tona wanniyake cin otoiyohi nanicipe kta, qa heye kta; Nineveh ihangyapi, tuwe aceye kta he? tokiyatanhan aniceyapi kte cin owade kta he?

8 No isanpa niwašte he? he qe wakpa kin ehna iyotanka; ihdukšan mini hiyaya; towašake kin he miniwanca kin akan yanka, conkaške  tawa kin mini tanka kin en.

9 Ethiopia sanpa yuwašaka, qa Egupta; unkan hena wopteca šni; Put qa Lubim waoniciyapi.

10 Tuka he qe unhdaka iyaya, wayaka ayapi; nakun hokšiyopa tawa kin hena canku oise owasin en wicakanuhugapi; qa wicašta okinihan tawa kin on oeconna econpi, qa wicašta tanka tawa kin owasin maza on wicakagkapi.

11 Niš eya winitko kta, inahbeniciye kta; niš eya tokapi kin on wowinape ayakite kta.

12 Conkaške suta nitawa owasin suken can waskuyeca tokaheya suton kin he iyececa; yuhnapikinhan hena tuwe yute kta i ohna hinhpaye kta.

13 Iho, nitaoyate nicokaya unpi kin hena winyanpi: makoce nitawa tiyopa kin hena tokaniyanpi kin ocowasiu wicakiyuhdokapi kta: inatake nitawa peta huhnage kta.

14 Onatakapi kin on mini tokiksu wo; conkaške nitawa hdusuta wo: upšija kin en ya wo, qa maka nacoco wo, maka omdoton kin yusuta wo.

15 Hen peta temniye kta; mazasagye kin ihanšniye kta; psipsica tanka kin iyececa temniye kta: Psipsica tanka kin iyecen ihduotawo; psipsicadan kin iyececa ota icicaga wo.

16 Wicašta wopeton nitawa kin hena mahpiya wicanhpi kin isanpa yahduota:psipsica tanka kin he watemya qa kinyan iyaya ece.

17 Watešdake wicayecaton kin henapsipsicadan iyececapi, qa akicita tancan nitawa kin henapsipsica tanka kin iyececapi, anpetu šnišni conkaške  icahda wankapi ece: wi hinanpa hehan kinyan eyaya, qa tukten unpi kin sdonyapi šni.

18 Assyria wicaštayatapi, waawanyake nitawa kin hena ištinmapi: wicašta itancan nitawa makan iwankapi: nitaoyate kin he akan enanakiya iyayapi, qa tuwedan mnawicakiye šni.

19 Nicahuhugapi kin he okiziyepica šni; anipapi kin he tehike hitica: oniyakapi kin tona nahonpi kin iyufipa niye on nape hdaskaskapapi kta: Taku šica ecanon kin ohinniyan en au šni kin he tuwe he?