Jonah

JONAH

WICOWOYAKE 1.

1 Hehan Jehovah oie Jonah Amittai cinhintku en hi kin he hecen eya:

2 Najin wo, Nineveh otonwe tanka kin he ekta ya wo, qa on eyanpaha wo: wicohan šica tawapi kin mitokam u nakaeš.

3 Tuka Jonah Jehovah ite kin etanhan Taršiš ekta nape kta najin, qa Joppa ekta apamahde iyaya: unkan wita wata wan Taršiš ekta ye kte cin iyeya, qa en ope kta hdajuju, qa mahen iyaya, Jehovah ite kin etanhan Taršiš ekta om ye kta.

4 Tuka Jehovah tate tanka wan mini kin en hiyukiya; unkan miniwanca kin ohna kihanšica tanka, hecen wita wata kin kamdecapi kta seca.

5 Hehan watopapi kin nihinciyapi, qa otoiyohi taku wakan tawapi kin hoyekiyapi, qa wita wata ohna maca kin hena minin ehpeyapi, yukapojedan kta e heon. Tuka Jonah wita wata cuwi mahen iyaya, qa iwanka, qa ištinbe hinca.

6 Hecen wahektape cin he en ye ca heciya; Ištinma nita, taku yaka he? najin wo, Taku Wakan nitawa hoyekiya wo; okinni Taku Wakan kin unkiksuyapi kta, hecen awiunhnunipi kte šni ce.

7 Hehan otoiyohi takodaku hekiciyapi; U wo, qa oeconna econkupi kta; hecen tuwe on etanhan taku šice cin de unkakipapi hecinhan sdonunkiyapi kta ce. Unkan econpidan, qa oeconna kin Jonah ahinhpaya.

8 Hehan heciyapi; Ceunniciyapi ce, taku on etanhan taku šice cin de en unkaupi he unkokiyaka po? Woecon nitawa kin tukte e he? Tokiyatanhan yau he? Nitamakoce tukte e he? Qa tukte oyate kin enitanhan he?

9 Unkan iye hewicakiya; Hebrew hemaca; qa Jehovah mahpiya Wakantanka, tuwe miniwanca qa maka puza kage cin he kowakipa ce.

10 Hehan wicašta kin wokokipe tanka on kopehdapi, qa, Tokeca decen ecanon he? eciyapi. Jehovah ite kin etanhan napa wicašta kin sdonyapi, iye owicakiyaka nakaeš.

11 Unkan heciyapi; Taku ecaunniconpi kta he; on mini unkatajapi kin amdakedan kta? mini kin škanškan qa nina taja aya nakaeš.

12 Hehan iye hewicakiya; Imacupi qa minin ehpemayan po; kinhan mini kin amdakedan iniciyayapi kta: he miye on etanhan icamna tanka kin de en niupi, he sdonwakiya ce, eya.

13 Hececa ešta wicašta kin hutata kihunnipi kta nina watopapi: tuka okihipi šni; mini kin škanškan qa nina awicataja nakaeš.

14 Hehan Jehovah hoyekiyapi qa heyapi; Ceunniciyapi ce, Jehovah ceunniciyapi, wicašta kin de nagi kin on awiunhnunipi kte šni; qa wicawe taku iyaonpepica šni kin en unkaupi šni po; niye, Jehovah, token iyonicipi kin he ohna ecanon nakaeš.

15 Hecen Jonah icupi qa minin ehpeyapi: unkan miniwanca taja aya qon he ayuštan.

16 Hehan wicašta qon hena wokokipe tanka on Jehovah kokipapi, qa Jehovah wošna wakiyusnapi, qa iciconzapi.

17 Wanna Jehovah hogan tanka wan econ ši, Jonah napce kta. Unkan Jonah anpetu yamni qa hanyetu yamni hogan tezi kin mahen yanka.

JONAH WICOWOYAKE 2.

1 Hehan Jonah hogan tezi kin etanhan, Jehovah iye Wakantanka tawa kin cekiya;

2 Qa heya; Mitoiyokišice on Jehovah hoyewakiya; Unkan iye amayupta: Hades tezi etanhan hoyewaya; Miho kin nayahon.

3 Unkan wosbe kin en enpemayaya, miniwanca cokaya; Hecen wakpa kin aohdutemayan: Minitan nitawa qa taja nitawa iyuhpa iwankam imayaya ce.

4 Hehan miye hepa; Niišta itokapa tanhan ehpemayanpi: Tuka ake tipi wakan nitawa ekta ewatonwe kta ce.

5 Mini kin aomapaskica, minagi en; Wosbe kin aohdutemayan; Psa kin mapa iyapemnipi:

6 He hute kin ekta imdamda; Maka kin tatiyopa on ohinniyan aonamakitaka: Tuka niye, Jehovah Wakantanka mitawa, Woha kin etanhan mitaniya hiyuyakiya.

7 Miye mahen minagi hanye cehan, Hehan Jehovah weksuya: Unkan wocekiye mitawa kin he en niu, Tipi wakan nitawa kin entu.

8 Tona woitonšni takušni akpatanpi kin Hena wowaonšida ehpekiyapi ece.

9 Tuka miye qe wopida ho kin on waciciyušna kta: Taku on miciconza kin he wahduecetu kta: Wowanikiye kin he Jehovah etanhan.

10 Hehan Jehovah hogan qon econ ši: unkan he puzata ekta ake Jonah hiyuya.

JONAH WICOWOYAKE 3.

1 Hehan Jehovah oie Jonah inonpa en hi kin hecen eya:

2 Najin wo, Nineveh otonwe tanka kin ekta ya wo, qa taku eye ciši kin he en eyanpaha wo.

3 Hecen Jonah najin, qa Nineveh ekta iyaya, Jehovah oie kin iyececa. Unkan Nineveh otonwe tanka, Wakantanka ekta, anpetu yamni imanipi.

4 Unkan Jonah anpetu wanji imani hehanyan otonwe mahen i, hehan eyanpaha qa heya; Ehake anpetu wikcemna topa hehan Nineveh ihangyapi kta ce.

5 Hecen Nineveh wicašta kin Wakantanka wicadapi, qa wote šni unpi wan ieyanpahapi, qa wakihdaka ogekitonpi, wicatanka etanhan wicacištinna hehanyan.

6 Unkan wicoie kin de Nineveh wicaštayatapi kin en hi, qa iš eya oiyotanke tawa kin etanhan najin hiyaya, qa tašina wašte kin ekihnaka, qa wakihdaka aihdahpa, qa cahota en iyotanka.

7 Hehan Nineveh ehna eyanpaha qa hecen oyake wicakiya, wicaštayatapi hee qa wicašta itancan wicayuhe tawokonzepi eciyatanhan, hecen eyapi; Ihnuhan wicušta qa woteca, tatanka qa tahinca wanunyanpi, taku yute cinhan; takudan yutapi kte šni qa mini yatkanpi kte šni:

8 Tuka wakihdaka ogekitonpi kta, wicašta qa woteca nakun; qa nina hin Wakantanka hoyekiyapi kta: han, otoiyohi iye tacanku šice cin etanhan, qa napepi ohna woyušice kin etanhan ihduhomnipi kta:

9 Tuwe sdonya he, okinni Wakantanka kin hdicu kta, qa iyopeiciye kta, qa tocanteptanye wohitike cin etanhan ihduhomni kta, hecen ihangiinyanpi kte šni ce?

10 Unkan wicohan tawapi kin Wakantanka wanyaka, tacankupi šice cin etanhan ihduhomnipi: hecen Wakantanka iš eya taku šica ecawicakicon kta keye cin etanhan ihduhomni, qaecen econ šni.

JONAH WICOWOYAKE 4.

1 Tuka Jonah he šicedake hinca, qa nina canteptanyan.

2 Qa Jehovah cekiye ca heya; Hehehe wanna, Jehovah, mitamakoce en waun qehan, mioie qon he dee šni he? Heon etanhan tokaheya Taršiš ekta nawapa: Wakantanka canwašte qa waonšida, wacantkiye hinca qa wawacinkta yuza tanka, qa taku šica on iyopeiciya ecee kin henica sdonwaye ciqon:

3 Hecen wanna, Jehovah, ceciciya ce, minagi kin emiciyaku wo; mate kte cin hee wašte, wani kte cin isanpa nakaeš.

4 Unkan Jehovah heciya; Canteniptanyan kin he tanyan ecanon he?

5 Hehan Jonah otonwe kin etanhan tankan iyaye ca otonwe iwiyohiyanpatanhan iyotanka; qa hen canwapa okeya wan icicaga, qa ohanzi kin en iyotankehan yanka; otonwe kin taku iyahde kte cin he wanyake kta.

6 Unkan Jehovah Wakantanka kikion wanji econši,qa he Jonah iwankam icahkiciya, pa kin aohanzi kiye kta, toiyokišice anakicipte kta heon etanhan. Heceti Jonah kikion kin on nina iyuškin hinca.

7 Tuka ihanhanna anpao kta hehan Wakantanka warnduška wan econši, unkan he kikion icage cin he kiunniya, hecen šniš aya.

8 Unkan kaketu, wihinanpa hehan wiyohiyanpa tanhan tate kata wan Wakantanka ukiya; unkan anpetu wi kin Jonah pa kin nina akanya, hecen ihpaya, qa iye nagi ekta te kta cin; qa, Miite kte cin he wani kin isanpa wašte kta ce, eya.

9 Hehan Wakantanka Jonah heciya; Kikion he on canteni-ptanyan kin he wašte he? Unkan, Mate kte cin hehanyan cantemaptanyan kin he wašte kta ce, eya.

10 Hehan Jehovah heya; Niye kikion kin, on htayani šni qa icahyakiye ni ešta, tuka hanyetu wanjidan en icaga, qa hanyetu wanjidan en atakunišni qon he onsiyakida:

11 Qa miš miye Nineveh otonwe tanka kin,ohna wicašta nape etapa qa catka kin kinukankiya ohdahnigapi šni, kektopawinge wikcemna eceh akenonpa sanpa yukan, qa nakun wanuyanpi ota hinca, he onsiwakida kte šni he?