Mattheos 14-23

Hey, y'all. Really funny days we're living in. Did anyone notice the moon these last two months?

Don't you hate it when a professor has no sense of humour? Honestly, not all academic writing has to be dry as old bones. Through all my years of studying, the academic articles (peer-reviewed and in respected journals) that I have remembered the most have been the ones that represented the material well, yet had a bit of (or a lot of) humour in them. And having to grade hundreds of papers, you'd think they'd appreciate something a little different. Alas, no. And buddy, the nasty ones will epic fail you on principle even if everything else is covered adequately. Hope that small-minded person doesn't hurt my chances at getting into Harvard (LOL- as if...) 

Okay, the name of the New Testament over at Amazon is Dakota Wowapi Wakan Kin, and last I checked they still had some in stock. When we first found them, there were only 7 and only one order per address. Now, they're more abundant and more expensive. But, worth it. I hope you all are blessed this day and that your teachers and professors this next semester are real folks that have a happy teaching style and that we all learn a lot! (-=

Here's the next bit. 

MATTHEOS WICOWOYAKE 14.

1 Unkan anpetu kin hena en Herod wicaštayatapi kin Jesus oyakapi kin he nahon;

2 Qa tahokšidan kin hewicakiya; Johannes baptem wicaqu ece kin he dee; tapi kin etanhan kini, heon etanhan wicohan tanka econ ece.

3 Herod Johannes yuze ca kaska, qa conkaške en ehnaka, Herodias iye sunkaku Philip tawicu qon heon.

4 Duhe kta iyecece šni ce, Johannes eciye ciqon.

5 Unkan heon kte kta cin, tuka oyate kin kowicakipa; hena e wicašta wokcan heca kecinpi.

6 Tuka Herod anpetu en tonpi qon he ake hiyohipi, hehan Herodias cunwintku kin wicacokaya waci, qa Herod iyokipiya.

7 Heon etanhan, taku wakan cajeyate ca, taku kida kta hecinhan, awicakehan qu kta, keciya.

8 Unkan he itokam hunku onspekiya, heon heya; Wanna Johannes baptem wicaqu ece qon he pa kin wakšica wan ohna maqu ye.

9 Unkan wicaštayatapi kin iyokišice hinca, tuka wakanyan wacajeyate cin heon, qa tona om wota iyotanke cin hena on, he qu wicaši.

10 Hecen ekta ye wicaši, qa conkaške mahen Johannes pa baksa.

11 Unkan pa kin he wakšica ohna akupi, qa wikoška kin qupi; unkan iye iyoepta hunku qu.

12 Unkan waonspewicakiye cin hena en hipi, qa tancan kin eyakupi qa hapi; hehan yapi qa Jesus okiyakapi.

13 Unkan Jesus he nahon qehan, hetanhan watom iyaye ca, išnana hewoskan makoce wan ekta i. Unkan oyate kin he nahonpi qehan, otonwe etanhanhan huinyun ihakam yapi.

14 Unkan huta ekta ihunni qehan, wicota wanwicayaka; qa onšiwicakida, qa tona tehiya unpi kin hena asniwicaya.

15 Unkan wanna htayetu hehan waonspewicakiye cin en hipi qa heyapi; Makoce kin de hewotahedan, qa wanna htayetu, heon oyate kin hde wicaši wo, hecen otonwe ciqadan kin en yapi kta, qa taku yutapi opeicitonpi kta.

16 Tuka Jesus hewicakiya; Hdapi kta iyecece šni; ito niye taku yutapi wicaqu po.

17 Unkan heciyapi; Aguyapi kagapi zaptan qa hogan nonpa, henana den unhapi ce.

18 Unkan heya; Hena makau po.

19 Unkan oyate kin wato en iyotanke wicaši, qa aguyapi zaptan qa hogan nonpa nakun icu, qa mahpiya ekta etonwan, hehan yawašte, qa yušpašpa qa waonspewicakiye cin wicaqu, unkan waonspewicakiye cin iš oyate kin wicaqupi.

20 Unkan owasin wotapi qa imnanpi; unkan oyaptapi etanhan pahipi, makanopiye akenonpa ojudan.

21 Unkan tona wotapi kin hena wicašta kektopawinge zaptan ecetu, nakun winohinca šiceca koya.

22 Hehan ecahankeya Jesus waonspewiyakiye cin wata wan en ope wicaši, iye itokam akasanpa yapi kta, oyate kin hde wicaši icunhan.

23 Unkan wanna oyate kin hde wicaši, hehan išnana paha wan ekta cekiya iyaya. Wanna otpaza tuka išnana ekta yanka.

24 Tuka wata kin wanna mde kin cokaya un, taja on iyotanhan iyekiyapi, tatohekiya yapi nakaeš.

25 Unkan hanyetu en itopa kiktapi hehan Jesus mini kin amani en wicaya.

26 Unkan waonspewicakiye cin mini kin amani wanyakapi qehan, yušinyayapi qa heyapi; He wanagi; qa kokipapi on šicahowayapi.

27 Tuka Jesus kohanna owicakiye ca heya; Cante wašte po; de miye ce; kopehdapi šni po.

28 Unkan Inyan ayupte ca heya; Itancan he niye hecinhan, ekta mini kin amani u maši wo.

29 Unkan ; U wo, eciya. Hecen Inyan wata kin etanhan kun iyaye ca Jesus ekta ye kta mini kin amani.

30 Tuka wohitiya tateyanpa wanyaka, hehan kokipa. Qa spaye kta iyaya, hehan šicahowaya, qa heya; Itancan, nimayan wo.

31 Unkan Jesus ecahankeya nape ekta yekiye ca yuwankan icu, qa heciya; Cistinna wacinyaya, tokeca wacetunyahda he?

32 Unkan wata kin en opapi hehan amdakedan icu.

33 Hehan wata en unpi kin en hipi, makata ehpeiciyapi qa heciyapi; Awicakehan Wakantanka Cinhintku kin he niye.

34 Unkan akasanpa ihunnipi hehan Geneseret makoce kin en hipi.

35 Unkan wicašta makoce kin he en unpi kin hena iyekiyapi, qa ihdukšan wanke cin owancaya hoši wicakayapi. Unkan tona tehiya unpi kin owasin en awicahipi;

36 Qa cekiyapi, tašina opapun heceedan kaešyutanpi kta heon; unkan tona yutanpi kin owasin tanyan asnipi.

MATTHEOS WICOWOYAKE 15.

1 Hehan Jerusalem etanhan wowapi kagapi qa Pharisee kin Jesus en hipi qa heyapi;

2 Tokeca waonspewicayakiye cin hunkawicayapi woope oyakapi qon acakšinpi he? qa aguyapi yutapi kte cinhan nape hdujajapi šni.

3 Unkan iye waayupte ca hewicakiya; Qa niš nakun tokeca woope odakapi kin on Wakantanka toope kin acayakšinpi he?

4 Wakantanka heya econ wicaši; Niyate nihun kici wicahduonihan wo; nakun; Tuwe atkuku hunku kici wicayašice cinhan wiconte on te kta ce.

5 Tuka niye hehapi; Tuwe atkuku qa iš hunku kin heciye kta iyececa; Taku on ociciye kte cin he wanna wošnapi ce; qa hecen atkuku hunku kici wicahduonihan šni ece;

6 Hecen woope odakapi kin on Wakantanka toope kin dutakunipišni.

7 Wananicihmanpi, niyepi on Isaya tanyan woyake ca heye ciqon;

8 Oyate kin de i on mikiyedan upi, qa ilia on mayaonihanpi ; tuka cantepi kin hena mitehan unpi ece.

9 Wicašta wicoope kagapi kin hena woope keya onspewicakiyapi, qa on mayuonihanpi kte cin he takudan okihi šni ece.

10 Hehan oyate kin wicakico qa hewicakiya; Nahonpi qa okahniga po:

11 Taku wicai kin ohna iyaye cin he wicašta kin yušape šni; tuka taku wicai kin etanhan hiyu kin he wicašta yušape cin ee.

12 Hehan waonspewicakiye cin en hipi qa heciyapi; Wicoie kin de Pharisee kin nahonpi qa šihdapi, he sdonyaya he.

13 Unkan waayupte ca heya; Taku oiupi kin, tona Ate mahpiya ekta un kin oju šni kinhan, hena owasin yujunpi kta.

14 Awicayuštan po; istagongapi istagongapi awicayapi kin hena hecapi. Unkan tuwe ištagonga istagonga wan yus aye cinhan, napin makohdoka en ohinhpayapi kta.

15 Hehan Inyan ayupte ca heciya; Wiyacinpi kin de unkokiyaka miye.

16 Unkan Jesus heya; Niš nakun hinahin oyakahnigapi šni he?

17 Taku wicai kin ohna iyaye cin he wicatezi kin ekta i ece, qa hehan hetanhan tankan ehpeyapi ece; he hinahin oyakahnigapi šni he?

18 Tuka taku wicai kin etanhan hiyu kin hena wicacante kin eciyatanhan u ece; qa wicašta yušape cin hena ee.

19 Wicacante kin eciyatanhan wicotawacin šica hiyu ece ; tinwicaktepi, wawicihahapi, wiinahmanpi,

, wamanonpi, woitonšni qa wicayašicapi kin.

20 Wicašta yušape cin dena ee; tuka nape hdujaja šni wotapi kin he wicašta kin yušape šni.

21 Hehan Jesus hetanhan tokan iyaye ca, Tyros qa Sidon makoce ihdukšan wanke cin he ekta i.

 22 Unkan iho, Kanan winohinca wan makoce kin hetanhan hiyu, qa hoyekiye ca heya; Itancan, Dawid Cinhintku, onšimada ye, micunkši wakan šica yuhnaškinyan, šicaya un.

23 Tuka iye oie wanjidan ayupte šni. Unkan waonspewicakiye cin en hipi, cekiyapi qa heyapi; Hdeši wo, unkihakam šicahowaya ece.

24 Tuka iye waayupte ca heya; Israel tiyohnaka tahinca wanunyanpi nunnipi kin henana ekta umašipi ce.

25 Hehan winohinca qon en hi, makata ehpeiciye ca heciya; Itancan, omakiya we.

26 Tuka iye ayupte ca; Hokšiyopa aguyapi tawapi kin icupi qa šunka wicaqupi kin he hecetu šni ce, eya.

27 Unkan iye; Han, Itancan; tuka šunka kin iye wicayuhapi wahna wotapi tawapi kin etanhan ošnašna hinhpaye cin hena etanhan yutapi ece, eya.

28 Hehan Jesus ayupte ca heciya ; Winohinca, wacinyaye cin he tanka; token yacin kin he enicicetu nunwe. Unkan wihiyayedan oape kin he hetanhan cunwintku kin asni.

29 Unkan Jesus hetanhan iyaye ca Galile mde kin ikiyedan u; qa paha wan ekta iyaye ca akan iyotanka.

30 Unkan wicašta ota en hipi, tona huštepi, ištagongapi, ia okitpanipi, hu bawicaksapi, qa toktokeca ota en awicahipi, qa Jesus siha kin en ewicahnakapi; unkan asniwicaya.

31 Hecen wicota yušinyayapi, ia okitpanipi qon hena iapi, hu bawicaksapi qon hena tokecapi šni, huštepi qon hena manipi, qa ištagongapi qon hena tonwanpi wamwicayakapi, heon etanhan; qa Israel Taku Wakan tawapi kin he yatanpi.

32 Hehan Jesus waonspewicakiye cin wicakico qa hewicakiya; Oyate kin onšiwicawakida, wanna yamni can taku yute šni mici unpi; qa wote šni hdewicawaši kta tawatenwaye šni, okinni tahepi ihpayapi kta.

33 Unkan waonspewicakiye cin heciyapi; Makoce hewotahedan kin de en tokiyatanhan aguyapi iyenakeca unhapi qa oyate hinsko tanka imnawicunyanpi kta he?

34 Unkan Jesus hewicakiya; Aguyapi kagapi tona duhapi he? Unkan; Šakowin qa hoganstinna tonana nakun, eyapi.

35 Unkan oyate kin makata iyotanke wicaši;

36 Qa aguyapi šakowin icu, hogan kin hena nakun, qa yawašte, hehan kiyušpašpa qa waonspewicakiye cin wicaqu; unkan waonspewicakiye cin oyate kin wicaqupi.

37 Unkan owasin yutapi qa imnanpi; qa oyaptapi kin hena pahipi, makanopiye šakowin ojudan.  

38 Wotapi kin hena wica ece kektopawinge topa, nakun winohinca šiceca koya.

39 Hehan oyate kin hdewicaši, qa wata wan en ope ca Magdala makoce kin en hi.

MATTHEOS WICOWOYAKE 16.

1 Unkan Pharisee qa Sadukee etanhan en hipi, qa mahpiya eciyatanhan wowapetokeca wan wicakiyutanin šipi, iyutanyanpi kta.

2 Tuka iye waayupte ca hewicakiya; Tohan htayetu eca, Mahpiya šaša heon owaštecake kta ce, ehapi ece.

3 Qa hanhanna eca, Ecin ošicecake kta, mahpiya šaša qa šapšapa, heon etanhan. Wananicihmanpi, mahpiya ite kin he yukcan onnispepi, tokeca anpetu kin dena wowapetogton oyakahnigapi šni he?

4 Wicoicage šice ca wawicihahapi econ sa kin he wowapetokeca wan da; tuka wowapetokeca wanjidan qupi kte šni; Jonas wicašta wokcan tawowapetokeca kin heceedan. Unkan ehpewicaya iyaya.

5 Unkan waonspewicakiye cin akasanpa ipi, qa aguyapi icu akiktonjapi.

6 Hehan Jesus hewicakiya; Pharisee qa Sadukee on napohyapi tawapi kin he iwanyakapi qa kokipa po.

7 Unkan iye iyakitedan akinicapi qa heyapi; Aguyapi unkicupi šni, heon etanhan, heya ce.

8 Tuka Jesus he sdonye ca hewicakiya; Cistinna wacinyayapi kin, tokeca niye iyakitedan ayakinicapi he, aguyapi iyacupi šni heon?

9 Hinahin oyakahnigapi šni, wicašta kektopawinge zaptan qa aguyapi zaptanna, qa makanopiye ojudan tonakeca yapahipi he yeksuyapi šni he?

10 Nakun wicašta kektopawinge topa qa aguyapi šakowin, qa makanopiye ojudan tonakeca iyacupi he?

11 Tokeca oyakahnigapi šni he, Pliarisee qa Sadukee on napohyapi tawapi kin he kokipe cišipi, he aguyapi on heciciyapi šni?

12 Hehan aguyapi on napohyapi kin he kokipe wicaši šni, tuka Pharisee qa Sadukee woonspe tawapi kin hee kokipapi kta, he okahnigapi.

13 Jesus Kesarea Philippi makoce kin en i qehan waonspewicakiye cin wivvicawange ca heya; Wicašta Cinhintku kin miye, matuwe kin, wicašta keyapi he?

14 Unkan heyapi; Apa Johannes baptem wicaqu qon; qa apa iš; Elias; qa toktokeca; Jeremias, qa iš wicašta wokcan wanji.

15 Qa niš matuwe kehapi he, ewicakiya?

16 Unkan Simon Inyan ayupte ca; Messiya Wakantanka ni un Cinhintku kin he niye, eya.

17 Unkan Jesus ayupte ca heciya ; Simon Jona cinhintku niyawaštepi ce; wicacehpi qa wicawe kin he oniciyake šni, tuka Ate mahpiya ekta un kin he oniciyaka.

18 Qa miš nakun heciciya; Inyan he niye, qa imnija kin de akan okodakiciye mitawa wakage kta; qa wakanšica tatiyopa kin he yujuju kte šni.

19 Unkan mahpiya wokiconze iyuhdoke kin he cicu kta; hecen taku maka akan yakaške cinhan he mahpiya ekta kaškapi kta; qa taku maka akan yakiduške cinhan he mahpiya ekta kiyuškapi kta.

20 Hehan waonspewicakiye cin Jesus Messiya kin he iye, he tuwedan okiyake šni wicaši.

21 Hetanhan Jesus waonspewicakiye cin wowicakiyaka, Jerusalem ekta ye kta iyececa, qa wicahincapi, wošnapi kagapi, wowapi kagapi ko on taku ota kakije kta, qa ktepi kta, qa anpetu iciyamni hehan ake kini kta, hena owicakiyaka.

22 Hehan Inyan Jesus icu qa iyopeye ca heya; Itancan, hecetu šni; dena ayakipe kte šni.

23 Tuka iye ihduhomni qa Inyan heciya; Satan mihektapa tanhan ya wo, tokamayaya; Wakantanka taku tawa kin awacanni šni, tuka wicašta taku tawapi kin.

24 Hehan Jesus waonspewicakiye cin hewicakiya; Tuwe miyahna u kta cin kinhan, waipiicida kta, qa cansusbeca ehdaku qa mihakam un kta.

25 Tuwe kašta wiconi tawa kpatan kinhan, he toki ehpekiye kta; qa tuwe miye on wiconi tawa kin kpagan kinhan, he iyeye kta.

26 Wicašta wan maka kin ocowasin kamna, qa nagi kin toki ehpeye cinhan he taku okihi kta he? qa wicašta nagi kin taku iyopekiye kta he?

27 Wicašta Cinhintku kin iye Atkuku towitan hduha taohnihdewicaye cin om u kta; hehan wicašta otoiyohi iye olianpi kin eciyatanhan wicaqu kta.

28 Awicakehan heciciyapi; Tona den najinpi kin etanhan wanjikji wiconte utapi kte šni, eccn Wicašta Cinhintku kin iye tokiconze kin en u wanyakapi kta.

MATTHEOS WICOWOYAKE 17.

1 Unkan iyohakam anpetu šakpe hehan Jesus Inyan qa Jakob, qa iye sunkaku Johannes, hena iwicacu, qa paha wan  tehanwankantu ekta awicaya;

2 Qa wicitokam yutokecapi; ite kin anpetu wi kin iyecen iyega, qa tawokoyake kin iyoyanpa iyecen ska.

3 Unkan iho, Moses qa Elias en ihdutaninpi qa kici wohdakapi.

4 Hehan Inyan ayupte ca Jesus heciya; Itancan, den unyakonpi kin he wašte; yacin kinhan, den wakeya yamni ti unkagapi kta, wanji unnicagapi kta, qa Moses Elias kici wanjikji wicunkicagapi kta.

5 Iahan icunhan iho, iyoyanpa mahpiya wan aowicahanzi, qa iho, mahpiya kin eciyatanhan wicaho wan heya; Micinkši waštewakidake ca on iyomakipi hince cin he dee ce; anagoptan po.

6  Unkan waonspewicakiye cin he nahonpi hehan makipusdiya ehpeiciyapi, qa nina kokipapi.

7 Tuka Jesus en

wicahi, qa wicayutan qa heya; Inajin po, qa kokipapi šni po.

8 Unkan išta yuwankan ikikcupi hehan, tuwedan wanyakapi šni, Jesus ecedan.

9 Unkan paha kin etanhan kun hdicupi, hehan Jesus wahokonwicakiye ca heya; Wowanyake kin he tuwedan okiyakapi šni po, Wicašta Cinhintku kin wiconte etanhan piya ikicage šni hehanyan.

10 Unkan waonspewicakiye cin wiwangapi qa heciyapi; Wowapi kagapi kin, Elias tokaheya hi kta ce, eyapi kin, tokeca heyapi hwo?

11 Unkan Jesus waayupte ca hewicakiya; Awicakehan Elias tokaheya hi kta, qa taku owasin yuecetu kta.  

12 Tuka heciciyapi; Elias wanna hi tuka iyekiyapi šni, qa token cinpi qon ecakiconpi. He iyececa Wicašta Cinhintku kin iyepi eciyatanhan kakije kta.

13 Hehan waonspewicakiye cin okahnigapi, Johannes baptem wicaqu qon e he ke ca heon hewicakiya.

14 Unkan wicota en hdipi qehan, wicašta wan en hi qa canpeška makehde inajin,

15 Qa heya; Itancan, micinkši onšimicida ye, hanyetu wi ihnaškinyan qa šicaya un; otakiya peta en ihpaye ca otakiya mini en iyohpaya ece:

16 Qa waonspewicayakiye cin wicawakahi, tuka asniyanpi kta okihipi šni.

17 Hehan Jesus ayupte ca heya; Wicoicage wacinye šni qa wacin tehike, tohanyan cicipi waun kta he? tohanyan iyowin- ciciyapi kta he; den makau po.

18 Unkan Jesus iyopeya, qa hecen wakan šice cin tankata hinanpa; unkan wihiyayedan oape kin hetanhan hokšidan kin asniyanpi.

19 Hehan waonspewicakiye cin Jesus išnana yanke cin en hipi qa heyapi; Tokeca unkiye he napeunyanpi kta unkokihipi šni he?

20 Unkan Jesus hewicakiya; Wacinyayapi šni heon; awicakehan heciciyapi; Sinape su wanjidan hinskokeca wacinyayapi unkanš, paha kin de, Detanhan tokan iyaya wo, eyakiyapi kta; unkan tokan iyaye kta, qa taku oyakitpanipi wanice kta.

21 Tuka taku decece cin he cekiyapi qa wote šni unpi ecedan on tankan hinanpa ece.

22 Unkan Galile en unpi icunhan Jesus hewicakiya; Wicašta Cinhintku kin wanna ecadan wicašta napepi kin en wicaqupi kta.

23 Unkan ktepi kta, qa anpetu iciyanmi kinhan ake piya ikicage kta ce, eya. Unkan nina iyokišicapi.

24 Hehan Kapernaum en hipi qehan, tona mazaska mnayanpi ece kin Inyan en hipi qa heyapi; Waonspeniciyapi kin he mazaska mnayanpi en iyohpeye kta he?

25 Unkan, Han, eya. Hehan tin hdicu qehan Jesus tokaheya ie ca heciya; Simon token idukcan he? maka akan wicaštayatapi kin tokiyatanhan mazaska mnayanpi he? iye cincapi etanhan, qa iš wicašta tokecapi kin etanhan?

26 Wicašta tokecapi etanhan, Inyan eya. Unkan Jesus heciya; Hehan cincapi kin wicakaškapi šni ece:

27 Tuka šihda wicunyanpi kte šni, e heon niš mde kin ekta ye ca hinškijupi wan minin iyeya wo, qa hogan tokaheya hiyu kin he icu wo; he i kin dukawa kinhan ohna kangi kagapi wan iyeyaye kta; he icu qa miye qa niye on wicaqu wo.

MATTHEOS WICOWOYAKE 18

1 Unkan hehan waonspewicakiye cin Jesus en hipi qa heciyapi; Mahpiya wokiconze kin en tuwe iyotan tanka he?

2 Unkan Jesus hokšiyoqopa wan kico qa wicacokaya ehnaka;

3 Qa heya; Awicakehan heciciyapi; Nihduhomnipi šni, qa hokšiyoqopa iyenicecapi šni kinhan, mahpiya wokiconze kin en yaipi kte šni.

4 Tuwe ihduhukuye ca hokšiyoqopa kin de iyecen canteyuze cinhan, mahpiya wokiconze kin en iyotan tanka kin hee.

5 Qa tuwe hokšiyoqopa dececa wan, micaje on, iyowinkiye cinhan, he miye iyowinmakiya ece.

6 Qa tuwe hokšiyoqopa kin dena, wacinmayanpi kin, wanji waiitanikiye cinhan, he inyan wiyutpan wan tahu en iyakaškapi, qa iye miniwanca ošbe kin en iyohpeyapi unkanš wašte kta tuka.

7 Wahtaniwicayapi kin on oyate kin wotehi yuhapi kta! eya wahtanikiyapi yuke kta iyececa; tuka wicašta tuwe wahtaniwicaya hecinhan, he wotehi yuhe kta!

8 Heon etanhan, ninape qa nisiha wahtaniniyanpi hecinhan, hena hdakse ca ehpeya wo; huha kaksapi wiconi en yai kta hee wašte, qa nape nonpa qa siha nonpa hduha peta owihanke wanica en iyohpeniyanpi kte cin he šica.

9 Qa niišta wahtaniniye cinhan, hdušdoke ca ehpeya wo; išta wanjidan hduha wiconi en yai kte cin he wašte, qa išta napin hduha peta owihanke wanica en iyohpeniyanpi kte cin he šica.

10 Ihnuhan dena cikcistinpidan wanjidan ešta šiceyadake cinhan; heciciyapi ce; Mahpiya ekta ohnihdewicayapi tawapi kin hena Ate mahpiya ekta un kin ite ohinniyan wanyakapi ece.

11 Wicašta Cinhintku kin taku atakunišni qon he niye kta on hi.

12 Hecen token idukcanpi he? Wicašta wan tahinca wanunyanpi opawinge wicayuhe, ca etanhan wanjidan kitaninšni hecinhan, wikcemna napcinwanka sanpa napcinwanka hena owanjidan ewicahnake ca he kin ekta iyaye ca wanji taninšni kin he okide šni he?

13 Qa iyeye cinhan, awicakehan heciciyapi; hee on iyuškin, qa wikcemna napcinwanka sanpa napcinwanka tokiya iyayapi šni kin hena on iyuškin šni ece.

14 He iyececa, dena cikcistinpidan wanjidan ešta toki ehpeyapi kta, Niyatepi mahpiya ekta un kin hecen tawacin šni.

15 Tuka nisunka wanicihtani kinhan, ekta ye ca iye niye kicišnana he okiciyaka ye; nanihon kinhan nisunka ake yahduhe kta.

16 Tuka ananigoptan šni kinhan, hehan wanji qa iš nonpa om de kta; hecen waayatanin nonpa, qa iš yamni ipi kin on wicoie owasin yusutapi kta.

17 Tuka hena nakun anawicagoptan šni kinhan, hehan okodakiciye kin owicakiyaka wo; unkan okodakiciye kin anawicagoptan šni kinhan, hehan Ikcewicašta qa wamnayanpi kin iyecen yahdawa kta.

18 Awicakehan heciciyapi; Taku maka akan yakaskapi kinhan, he mahpiya ekta kaškapi kta; qa taku maka akan yakiduškapi kinhan, he mahpiya ekta kiyuškapi kta.

19 Akeš heciciyapi; Tuwe nom maka akan taku wanjidan yadapi kta e wayeconzapi kinhan, Ate mahpiya ekta un kin he ecen ecawicakicon kta.

20 Tukten nom yamni, micaje on mniciyapi kinhan, hen wiciyopeya waun ece.

21 Hehan Inyan en hi qa heciya; Itancan, misunka tona wamicihtani qa wecicajuju kta he? šakowin hehanyan he?

22 Jesus heciya; Šakowin hehanyan kta, eciciye šni, tuka wikcemna šakowin ece šakowin.

23 Heon etanhan mahpiya wokiconze kin wicaštayatapi wan iyececa,he wowidake wicayuhe cin wicakiciyawa kta:

24 Unkan wicakiciyawa icunhan wanji mazaska tkeutapi tanka kektopawinge wikcemna iyohiye šni kin he ahipi.

25 Unkan on kajuju kta takudan yuhe šni, hecen yuhe cin he tancan wiyopeyapi kta, qa tawicu, qa cinca, qa taku yuhe cin owasin, qa kajujupi kta, keya.

26 Heon wowidake un kin he en makipusdiya ehpeiciya, cekiye ca heya; Itancan, amakipe ye, owasin cicicajuju kta.

27 Hehan yuhe cin he wowidake tawa kin onšikida, kiyuška qa ikicazo qon kicicajuju.

28 Tuka wowidake un kin he tankan iyaye ca om idakapi kin wanji, kašpapidan opawinge ikicazo kin he iyeya, qa iyahpaye ca poskin yuze ca heciya; Tona imiyecazo kin micicajuju wo.

29 Hehan kici idakapi un kin he siha en ehpeiciya, cekiye ca heya; Amakipe ye, kinhan owasin cicicajuju kta.

30 Unkan wicada šni; tuka iyaye ca conkaške mahen kaškahnaka, oicazo hdajuju kta hehanyan.

31 Unkan kici wowidake unpi kin hena taku econpi kin wanyakapi qehan, nina iyokišicapi: heon en hipi qa wicayuhe cin taku econpi kin owasin okiyakapi.

32 Hehan yuhe cin he ake kico qa heciya; Wowidake nišice hinca, icazopi hinsko tanka qon he cicicajuju, cemayakiye cin heon.

33 Hecen miye onšicida kin he iyecen kici wowidake yaun kin iš eya onšiyakida kta iyecece šni he?

34 Unkan yuhe cin šihda qa kakišyapi kte cin en wicaqu, tona iyohiye šni qon ocowasin hdajuju kta hehanyan.

35 He iyecen, Ate mahpiya ekta un kin ecaniconpi kta, otoiyohi cante eciyatanhan nisunkapi tona wanicihtanipi kin wicayecicajujupi šni kinhan.

MATTHEOS WICOWOYAKE 19.

1 Unkan Jesus wicoie kin hena heya ayaštan, hehan Galile makoce kin etanhan iyaye ca Juda makoce, Jordan wakpa akasanpa tanhan he en hi:

2 Qa wicašta ota hinca ihakam unpi; unkan hen asniwicaya.

3 Pharisee kin iš nakun en hipi, qa iyutanyanpi kta heciyapi; Taku owasin on wicašta tawicu ehpekiye kta iyececa he?

4 Unkan waayupte ca hewicakiya; Tuwe otokahe ekta wicakage cin he wica winyan ahna wicakaga, he tohinni dawapi šni he:

5 Qa heya ; Heon etanhan, wicašta atkuku hunku ko ehpewicaye kta, qa tawicu kin en iyaihdaške kta; qa henaoza cehpi wanjidan kta?

6 Heon, hetanhan nonpapi šni, tuka wicacehpi wanjidan ece. Heon, taku Wakantanka yuokonwanjidan kin he ihnuhan wicašta kiyušpe cinhan.

7 Hehan heciyapi; Itancan, Moses kpaganpi wowapi wan qu kta, qa ehpeye kta, tokeca heconwicaši hwo?

8 Unkan hewicakiya; Nicantepi suta kin heon winohinca ehpewicayayapi kta, Moses iyowinniciyapi; tuka otokaheya tanhan hecetu šni.

9 Qa miš heciciyapi ce; Tuwe, wawicihahapi econ kin on etanhan šni, tawicu ehpekiye ca wanji tokeca yuze cinhan, he wawicihahapi econ ece; qa tuwe winyan ehpeyapi kin yuze cinhan, he nakun wawicihahapi econ ece.

10 Unkan waonspewicakiye cin heciyapi; Wicašta winohinca kici hecetu kinhan, tawicu tonpi kin he wašte šni.

11 Tuka hewicakiya; Wicoie kin he owasin okihipi šni, tona wicaqupi kin henana okihipi.

12 Yunokos heca yukan; hunh hunku tezi kin etanhan heca icagapi; qa hunh wicašta on heca wicakagapi ; qa hunh mahpiya wokiconze kin on heca icicagapi. Tuwe he icu okihi kinhan he icu kta.

13 Hehan hokšiyoqopa en awicahipi, nape awicaputake ca cekiye kta e heon; unkan waonspewicakiye cin tehindapi.

14 Tuka Jesus heya; Hokšiyoqopa en mahipi kta iyowinwicakiya po, qa tehindapi šni po; mahpiya wokiconze kin he hetanhanpi ece.

15 Unkan nape awicaputake ca hetanhan tokan iyaya.

16 Unkan iho, wanji en hi qa heciya; Waonspekiye wašte, taku wašte ecamon kta, on wiconi owihanke wanica mduhe kta, tukte e he?

17 Unkan heciya ; Tokeca wašte emayakiya he? tuwedan wašte šni, wanji heceedan wašte, Wakairtanka hee. Tuka wiconi en yai kta yacin kinhan woahope kin hena ahopa wo.

18 Hehan heciya; Tukte e he? Unkan Jesus heya ; Dena, Tinwicayakte kte šni; Wawiciha- hapi ccanon kte šni; Wamayanon kte šni; Woitonšni odake kte šni;

19 Niyate nihun kici wicahduonihan wo; qa, Niye inihdacin nikiyedan un kin wašteyadake kta.

20 Koška kin he heciya; Imacaga ehantanhan dena owasin ecen ecamon ece; taku hinahin iyotpani waun he?

21 Jesus heciya; Owotanna yaun kta yacin kinhan, hde ca taku nitawa wiyopeye ca wahpanicapi kin wicaqu wo; kinhan mahpiya ekta woyuha duhe kta; hehan ku qa mihakam un wo.

22 Tuka koška kin he wicoie kin de nahon qehan iyokišica kihda: taku ota ton kin heon etanhan.

23 Unkan Jesus waonspewicakiye cin hewicakiya; Awicakehan heciciyapi; Tuwe wijica un kin he kitan se mahpiya wokiconze kin en i kta.

24 Qa ake heciciyapi ; Kamel wan tahinšpaciqadan ohdoka ohna iyaye kte cin he tehike sui, qa wicašta wijica Wakautanka tokiconze kin en ye kte cin he tehika.

25 Waonspewicakiye cin he nahonpi, hehan nina yušinyayapi qa heyapi; Tuwe hehan ni okihi kta he?

26 Unkan Jesus ekta etonwe ca hewicakiya; Wicašta ekta he okihipica šni; tuka Wakantanka ekta taku owasin okihipica ece.

27 Hehan Inyan ayupte ca heciya; Iho, taku owasin ehpeunyanpi qa nihakam unyakonpi; hecen taku unhapi kta he?

28 Unkan Jesus hewicakiya ; Awicakehan heciciyapi; Niyepi tona teca ni en wicatonpi kin de en omayapapi kin, tohan Wicašta Cinhintku kin wowitan oiyotanke tawa kin en kiyotanke cinhan, niš eya oiyotanke akenonpa akan idotankapi kta, qa Israel wicoun akenonpa wicadacopi kta ce.

29 Qa tuwe kašta, tipi, qa hunkawanjitku, qa tawinohtin, qa atkuku, qa hunku, qa tawicu, qa cinca, qa maga, micaje on etanhan ehpeye cinhan, he opawinge akihde hduhe kta, qa nakun owihanke wanin wiconi mnaiciye kta.

30 Tuka tokaheya unpi kin wicota ehake unpi kta; qa ehake unpi kin hena tokaheyapi kta.

MATTHEOS WICOWOYAKE 20.

1 Mahpiya wokiconze kin he wicašta wan tipi yuhe cin he iyececa, he hanhanna hinca hastanhanka iyuwi ojupi tawa kicanyanpi kte cin wicašta opeton iyaya.

2 Unkan wicašta anpetu eca kašpapidan wanjidan on opewicaton, hehan hastanhanka iyuwi ojupi tawa kin en yewicaši.

3 Unkan wihiyayedan oape yamni, hehan ake tankan iyaye ca toktokeca tihocoka en taku tokon šni najinpi wanwicayaka;

4 Qa hewicakiya; Niš eya hastanhanka iyuwi ojupi kin en ya po; kinhan token owotanna cicupi kta ce. Unkan en iyayapi.

5 Ake oape išakpe qa inapcinwanka  hehanhan tankan iyaye ca ake iyecen econ.

6 Hehan oape iakewanji ecetu, ake tankan iyaye ca toktokeca taku tokon šni najinpi wanwicayaka, qa hewicakiya; Tokeca anpetu osan taku tokon šni nayajinpi he?

7 Unkan, Tuwedan opeuntonpi šni ce, eciyapi. Hehan hewicakiya; Nis eya hastanhanka iyuwi ojupi kin en ya po, kinhan taku owotanna iyacupi kta.

8 Wanna htayetu hehan, hastanhanka iyuwi ojupi yuhe cin iye taokiye itancan kin heciya; Wicašta htanipi kin wicakico qa wokajuju wicaqu wo, ehake hipi kin hena tokaheya, ecen tokaheya hipi qon wicayeciyuštan kta ce.

9 Unkan tona oape wanjidan htanipi kin hena hipi, qa otoiyohi  kašpapidan wanji icupi.

10 Tokaheyapi kin hena en hipi qehan, sanpa yuhapi kta kecinpi, tuka iš eya otoiyohi kašpapidan wanji icupi.

11 He icupi hehan tipi tawa kin bapi;

12 Qaheyapi; Ehake hipi kin dena oape wanjidan htanipi, tuka unkiye anpetu osan, wi kata ešta htaunnipi, iycuncecapi wicayakaga ece.

13 Unkan iye waayupte ca wanji heciya; Koda, taku šica ecacicon šni; kašpapidan wanjidan on htamiyecini kta kemayakiye šni he?

14 Taku nitawa kin ehdaku qa hda wo; ehake hi kin de niye cicu kin iyecen waqu ece e kta.

15 Miye mitawa kin token wacin kin ecen ecamon kta iyecece šni he? miye mawašte kin heon etanhan išta nišica he?

16 Hecen ehake unpi kin hena tokaheyapi kta; qa tokaheya unpi kin hena ehake unpi kta; wicota wicakicopi, tuka tonana wicakahnigapi ece.

17 Unkan Jesus Jerusalem ekta itanwankanhde ya, hehan waonspewicakiya akenonpa kin canku kin icunonpa išnana awicaya, qa hewicakiya;

18 Iho, Jerusalem ekta itanwankanhde unyanpi, qa Wicašta Cinhintku kin wošnapi kagapi wowapi kagapi ko nape en wicaqupi kta; unkan te kta on yacopi kta,

19 Qa ihahapi kta, kapsinpsintapi kta, qa icipaweh okatanpi kta on Ikcewicašta iyoopta wicaqupi kta; unkan anpetu iciyamni hehan kini kta ce.

20 Hehan Zebedee cinca hunkupi kin en hi, cinhintku napin om, cekiye ca taku wanji kida.

21 Unkan iye heciya; Taku yacin he? Hehan heciya; Micinkši kin denaoza wokiconze nitawa en, unma nietapa ekta iyotanke kta, qa unma iš canitka en iyotanke kta, keya ye.

22 Tuka Jesus waayupte ca heya; Taku yadapi kin sdonyakiyapi šni. Wiyatke etanhan mdatke kte cin he etanhan yatkan oyakihipi he; qa baptem maqupi kte cin he niš eya nicupi kta oyakihipi he? Unkan, Unkokihipi ce, eciyapi.

23 Hehan hewicakiya; Awicakehan wiyatke mitawa kin etanhan datkanpi kta,qa baptem maqupi kte cin heon niš eya baptem nicupi kta; tuka ematapa qa camatka tanhan iyotankapi wicaqupi kte cin he miye mitawa šni; tuka Ate tona wiyeya wicakiciyuštan kinhun hena tawapi kta.

24 Unkan wikcemnapi kin hena he nahonpi qehan sunkakiciyapi nom on šihdapi.

25 Tuka Jesus wicakico qa heya; Ikcewicašta ekta tona itancanpi kin hena oyate wicayuhapi, qa wicašta tankinyanyanpi kin oyate wowidakewicayapi ece, he sdonyayapi.

26 Tuka niyepi ekta hecece kte šni; tuka wanji tukte tanka yaunpi kta yacinpi kinhan, he ookiye duhapi kta:

27 Qa tuwe niyepi en tokapa un kta hecinhan, wowidake nitawapi kin hee kta.

28 He iyececa, Wicašta Cinhintku wowidake wicayuhe kta on hi šni, tuka idakapi kta, qa wiconi tawa wokajuju kta wicota on wicaqu kta heon hi.

29 Unkan Jeriko etanhan iyooptapi, hehan wicota ihakam unpi.

30 Unkan iho, wicašta ištagonga nonpa canku icahda iyotankapi, Jesus en hiyaya nahonpi, hehan howayapi qa heyapi; Itancan, Dawid Cinhintku onšiunkida miye.

31 Unkan wicota kin tehindapi qa inina yanke wicašipi; tuka iš hehan heon iyotan howayapi qa heyapi; Onšiunkida po, Itancan, Dawid Cinhintku.

32 Unkan Jesus owanji najin qa wicakico qa heya; Taku ecaciconpi kta yacinpi he?

33 Itancan išta unhdukawapi kta ye, eciyapi.

34 Hehan Jesus onšiwicakida qa išta wicayutan; unkan ecahankeya išta on tonwanpi qa ihakam unpi.

MATTHEOS WICOWOYAKE 21.

1 Unkan Jerusalem ikiyedan yapi, qa Bethpage ehan ipi, Oliwe paha kin etu, hehan Jesus waonspewicakiye cin nom yewicaši;

2 Qa hewicakiya; Dukanpi kin otonwe iyotakons wanke cin he ekta ya po; kinhan kohanna šonšonna wan cinca iyahna han iyeyayapi kta; kiyuškapi qa makaku po.

3 Qa tuwe taku eniciyapi kinhan, Itancan kin hena cin ce, eya po; kinhan kohanna awicau nišipi kta.

4 Dena owasin econpi, wicašta wokcan oie qon yuecetupi kta, he kaken eya;

5 Zion cunwintku kin heciya po; Iho, Wicaštayatapi nitawa en niu, wahbadan qa šonšonna wan akan iyotanka, šukcinca wan, šonšonna cinca kin akan u ce.

6 Unkan waonspewicakiye cin yapi, qa Jesus econ wicaši kin ecen econpi;

7 Qa šonšonna cinca iyahna awicahipi, qa iye tašina akan ehpeyapi, qa hena iakan Jesus ehnakapi.

8 Unkan wicota canku ohna šina ehpeyapi; qa apa canwapa kaksapi qa canku ohnahna owinšyapi.

9 Qa wicota tokata yapi, qa tona ihakam upi kin, howayapi qa heyapi; Dawid Cinhintku woohiye yuha nunwe. Tuwe Itancan caje on u kin yawaštepi nunwe: Mahpiya ekta woohiye yuha nunwe.

10 Unkan Jerusalem en hi qehan otonwe kin ocowasin škanškanpi, qa heyapi; De tuwe he?

11 Unkan wicota kin heyapi; Jesus wicašta wokcan Galile en Nazareth otonwe kin etanhan he dee.

12 Unkan Jesus tipi wakan Wakantanka tawa kin en i, qa tipi wakan ohna wiyopeyapi ece, wopetonpi ko, hena tankan iyewicaya; qa mazaska tokiyopeyapi ahna econpi kin hena yuahdapsšinyan ehpeya, tona wakiyedan wiyopeyapi oiyotanke tawapi koya;

13 Qa hewicakiya; Tipi mitawa kin he wocekiye tipi eciyapi kta, eya wowapi en kagapi; tuka niye wamanon tipi yakagapi.

14 Hehan ištagongapi huštepi ko tipi wakan kin en hipi; unkan okiziwicaya.

15 Unkan wošnapi kagapi wowapi kagapi ko taku wowapetokeca econ kin hena wanyakapi, qa hokšiyoqopapi tipi wakan kin ohna, Dawid Cinhintku kin woohiye yuha nunwe, eya howayapi, hehan nina šihdapi:

16 Qa heciyapi; Dena taku eyapi kin nayahon he? Unkan Jesus hewicakiya; Han; Hokšiyoqopa, tona azinpi ko ipi kin etanhan wowitan duštan ce, eyapi kin he tohinni dawapi šni he?

17 Hehan awicayuštan, qa otonwe kin etanhan tankan iyaye ca Bethani ekta i, qa hen wanka.

18 Unkan hanhanna hinca otonwe kin ekta icicawin hda, unkan wotektehda;

19 Qa suken can wanji canku ohna han wanyake cehan, he en i, tuka takudan iyeye šni, ape eceedan aicaga; unkan heya; Icimana waskuyeca ainicage šni nunwe. Unkan suken can kin kohanna šnija aya.

20 Unkan waonspewicakiye cin he wanyakapi qehan yušinyayapi qa heyapi; Ehanqon suken can kin kohanna šnija aya!

21 Jesus waayupte ca hewicakiya ; Awicakehan heciciyapi; Wowacinye duhapi qa wacetunyahdapi šni kinhan, taku suken can kin de ecakiconpi kin heceedan ecanonpi kte šni, tuka paha kin de, Tokan iyaye ca miniwanca kin en iyohpeniyanpi nunwe, eyakiyapi kinhan, ecetu kta.

22 Qa taku tona wocekiye eya yadapi, qa wicayadapi kinhan, hena owasin duhapi ece e kta.

23 Unkan tipi wakan kin en hi, qa waonspewicakiya icunhan, wošnapi kagapi, qa oyate kin en wicašta tankapi ko, en hipi qa heciyapi; Wicookihi tukte e on dena ecanon he? qa tuwe wicookihi kin de nicu he?

24 Unkan Jesus waayupte ca hewicakiya; Miš eya taku wanji iciwangapi kta; he omayakidakapi kinhan, hehan wicookihi kin tukte on dena ecamon kin ociciyakapi kta.

25 Johannes baptem wicaqu qon he tokiyatanhan he? mahpiya eciyatanhan qa iš wicašta eciyatanhan? Unkan he iyakitedan aiapi qa hekiciyapi; He mahpiya eciyatanhan, unkeyapi kinhan; Tokeca he wicayadapi šni he, eye kta?

26 Tuka, He wicašta eciyatanhan, unkeyapi kinhan, oyate kin kowicunkipapi; owasin Johannes wicašta wokcan heca kecinpi.

27 Unkan ayuptapi qa Jesus heciyapi; Sdonunyanpi šni ye. Unkan iš hehan hewicakiya; Miš nakun wicookihi tukte on dena ecamon kin ociciyakapi kte šni.

28 Tuka token idukcanpi he? Wicašta wan cinhintku nonpa; unkan tokapa kin en hi qa heciya; Cinš, anpetu kin de hastanhanka iyuwi ojupi mitawa kin en htani ya wo.

29 Unkan ayupte ca heya; Ecamon kte šni ye. Tuka iyohakam iyopeiciye ca iyaya.

30 Unkan hakakta kin en hi, qa iyecen eciya; Unkan iye ayupte ca; Itancan, mde kta ce, eya. Tuka ye šni.

31 Denaoza unma tukte atkukupi tawacin kin ecen econpi he? Unkan, Tokapa kin, eciyapi. Hehan Jesus hewicakiya; Awicakehan heciciyapi; Wamnayanpi qa wawicihahapi econpi sa niyepi nitokam Wakantanka tokiconze kin en yapi kta.

32 Johannes wicoowotanna canku kin ohna en niupi, tuka wicayadapi šni; tuka wamnayanpi qa wawicihahapi econpi sa, hena wicadapi; he wandakapi ešta nakun iyohakam wicayadapi kta e on nihduhomnipi šni.

33 Wiyacinpi wan tokeca nahon po; Wicašta wan tipi yuhe cin he hastanhanka iyuwi ojupi wan oju, qa ihdukšan natake ca ohna iyuškice wan qe ca nakun cowahe wan en kaga; qa wicašta kicanyanpi kta owicaqu, hehan icimani iyaya.

34 Unkan wanna waskuyeca suton kta, hehan wowidake wicayuhe cin wicašta kicanyanpi kin ekta yewicaši; waskuyeca etanhan icupi kte cin heon.

35 Unkan wicašta kicanyanpi kin wowidake unpi kin hena wicayuzapi; wanji apapi, wanji ktepi, qa wanji inyan on kininpi.

36 Akeš wowidake toktokeca ota ekta yewicaši; unkan iš iyecen wicakuwapi.

37 Hehan ehake iye cinhintku kin ekta yeši, qa heya; Micinkši yuonihanpi kta.

38 Tuka maga kicanyanpi kin cinhintku wanyakapi, hehan hekiciyapi; Tawa kte cin he dee; iho po, unktepi kta, hehan taku yuhe cin he unkicupi kta.

39 Hecen yuzapi qa hastanhanka iyuwi ojupi kin etanhan tankan ehpeyapi qa ktepi.

40 Hecen tohan hastanhanka iyuwi ojupi tawa kin hi kinhan kicanyanpi kin hena token ecawicakicon kta he?

41 Unkan heciyapi; Wicašta sškšice cin hena tehiya ihangwicaye kta, qa kicanyanpi toktokeca tohan iyehantu eca waskuyeca kicupi ece e kta hena hastanhanka iyuwi ojupi kin owicaqu kta.

42 Hehan Jesus hewicakiya; Inyan wan tipi kagapi kin ehpeyapi qon he oise pa kin icaga; he Itancan kin eciyatanhan hecetu, qa unkištapi en taku wowapetokeca kin hee, eyapi kin he tohinni wowapi wakan kin en dawapi šni he?

43 Heon etanhan heciciyapi; Wakantanka tokiconze kin eniciyakupi kta, qa oyate wan waskuyeca icahyapi kte cin he wicaqupi kta.

44 Unkan tuwe inyan kin de ahinhpaye cinhan kamden ehpeyapi kta; qa tuwe he akan ihpaye cinhan tanyan kamdu kta.

45 Unkan wošnapi kagapi hena, qa Pharisee ko wiyacinpi tawa kin nahonpi qehan, iye wicaka e heya sdonyapi.

46 Qa heon yuze wacinpi, tuka oyate kin kowicakipapi; owasin wicašta wokcan heca kecinpi.

MATTHEOS WICOWOYAKE 22.

1 Unkan Jesus waayupte ca ake wiyacinpi on wowicakiyake ca heya;

2 Wicašta wan wicaštayatapi heca cinhintku kin wakankiciyuzapi kicage cin he mahpiya wokiconze kin iyececa.

3 Unkan wowidake wicayuhe cin hena yewicaši, tona wakankiciyuzapi en wicakicopi qon hena uwicašipi kta; tuka upi kta wicadapi šni.

4 Akeš wowidake toktokeca ekta yewicaši qa hewicakiya; Tona wicakicopi qon hena hewicakiya po; Wotapi mitawa wiyeya yanka; tatanka mitawa ptejicadan ko wanna ktepi, qa taku owasin wiyeya hiyeya; iho po, wakankiciyuzapi kin en u po.

5 Tuka ihahapi qa toki iyayapi; wanji tamaga ekta iyaye ca, wanji iš mazopiye tawa ekta iyaya.

6 Qa hunh wicakico ipi kin hena wicayuzapi, qa šicaya wicakuwapi qa wicaktepi.

7 Wicaštayatapi kin he nahon qehan nina šihda; qa taakicita ekta yewicaši, qa tinwicaktepi kin hena ihangwicaye ca totowepi kin huhnahya.

8 Hehan wowidake tawa kin hewicakiya; Wakankiciyuzapi kin wiyeya yanka, tuka tona en wicakicopi qon hena opapi kta iyececapi šni.

9 Heon etanhan canku ojate kin ektakta ya po, qa tona iyewicayayapi kin wakankiciyuzapi kin en uwicaši po.

10 Hecen wowidake unpi kin hena canku ojate kin ektakta iyayapi, qa tona iyewicayapi, šica qa wašte ko, en awicaupi; hecen wakankiciyuzapi wicašta ota en opapi.

11 Unkan wicaštayatapi kin tona wotapi kte cin hena wanwicayaka tin hiyu, qa iho, wicašta wanji wakankiciyuzapi wokoyake kin kicun šni hen wanyaka:

12 Qa heciya; Koda, tokeca wakankiciyuzapi wokoyake kicun šni en hidotanka he? Unkan takudan eye šni.

13 Hehan wicaštayatapi kin taokiyewicaye cin hewicakiya; Siha nape ko pahtapi qa detanhan aya po, qa tankan otpaza kin en ehpeya po; heciya wicaceya qa hi hdakinskinzapi yuke kta.

14 Wicota wicakicopi tuka tonana wicakahnigapi ece.

15 Hehan Pharisee kin iš yapi, qa token iapi on yuškiškapi kta aiapi.

16 Qa iye waonspewicakiyapi kin Herodian hena om ekta ywicašipi qa heyapi; Waonspekiye, iewicayaka sdonunyanpi, qa awicakehan Wakantanka tacanku kin onspeunyakiyapi ece, qa tuwedan koyakipe šni; wicašta akantu ekta eyatonwe šni nakaeš.

17 Heon token idukcan he? unkokiyaka po; Kesar mazaska qupi ece kin he owotanna he?

18 Unkan Jesus taku šica en wicaun kin he sdonya qa heya; Wananicihmanpi, tokeca iyutanmayayapi he?

19 Mazaska mnayanpi ece kin he makipazo po, eya. Unkan kašpapidan wanji kahipi.

20 Hehan hewicakiya; Wicite qa wowapi kagapi kin de tuwe tawa he?

21 Unkan, Kesar tawa ce, eyapi. Hehan hewicakiya; Heon etanhan Kesar taku tawa kin kicu po, qa Wakantanka taku tawa kin kicu po.

22 He nahonpi hehan yušinyayapi qa ehpeya hdicupi.

23 Unkan anpetu kin he en Sadukee kin en hipi, hena piya wicoicage kin wanica ce, eyapi ece, qa wiwangapi;

24 Qa heciyapi; Waonspekiye, Wicašta wan cinca yuhe šni te cinhan, tawicu qon he iye sunkaku yuze kta, qa cincu cinca icahkiciciye kta, Moses keye ciqon.

25 Unkan unkiyepi en wicašta šakowin sunkakiciyapi; unkan tokapa kin he winohinca wan yuza tuka ta; qa cinca nica heon iye iyokihe cin he tawicu aihpekiya.

26 Qa icinonpa iyecen econ, qa iyamni, qa ecen šakowinpi kin.

27 Hehan ehake winohinca qon ta.

28 Hecen piya wicoicage kin en, hena šakowinpi kin wanji tukte winohinca kin he hduhapi kta he? owasin yuzapi.

29 Jesus waayupte ca hewicakiya ; Yanunipi, wowapi wakan qa Wakantanka towašake kin sdonyayapi šni.

30 Piya wicoicage kin en winohinca wicayuzapi šni, qa hihnatonpi šni, tuka mahpiya ekta Wakantanka ohnihdewicaye cin iyececapi ece.

31 Tuka wicate cin piya icagapi kin on Wakantanka taku eniciyapi kin he davvap išni he; he kaken eya;

32 Abraham Wakantanka tawa, Isaak Wakantanka tawa, qa Jakob Wakantanka tawa kin he miye? Wakantanka wicašta tapi kin tawapi šni, tuka ni unpi Wakantanka tawapi ece.

33 Unkan oyate kin hena nahonpi hehan taku onspewicakiye cin on yušinyayapi.

34 Tuka Pharisee kin hena, Jesus Sadukee kin inina yanke wicakiya, he nahonpi hehan en mniciyapi:

35 Qa etanhan wanji woope aiekiyapi kin heca wiwange ca iyutanyan heciya;

36 Waonspekiye, woope kin en woahope kin tukte iyotan tanka he?

37 Unkan Jesus heciya; Itancan Wakantanka nitawa kin he nicante ocowasin on, qa ninagi ocowasin on, qa nitoksape ocowasin on wastcyakidake kta.

38 Woahope tokaheya qa tanka kin hee.

39 Qa inonpa kin he iyececa; Nikiyedan un kin niye inihdacin wašteyadake kta ce.

40 Woahope kin denaoza woope ocowasin wicašta wokcan ko en ikoyaka ece.

41 Pharisee kin iš en mniciyapi icunhan Jesus wiwicawange ca heya;

42 Messiya on token idukcanpi he? tuwe cinhintku he? Unkan, Dawid Cinhintku ce, eciyapi.

43 Hehan hewicakiya; Hecen token Dawid Woniya Wakan kin on Itancan, eciya he; qa heya;

44 Itancan kin Itancan mitawa heciya; Mietapa ekta iyotanka wo, tona tokaniyanpi kin siha oahe nitawa wicawakage kta, hehanyan?

45 Hecen Dawid, Itancan, eciya hecinhan, token ecin cinhintkuye kta he?

46 Unkan tuwedan oie wanjidan ayupte kta okihi šni; qa anpetu kin hetanhan tuwedan ake wiwanga tawatenye šni ece. 

MATTHEOS WICOWOYAKE 23.

1 Hehan Jesus oyate kin, iye waonspewicakiye cin om wowicakiyaka :

2 Qa hewicakiya ; Wowapi kagapi Pharisee ko Moses oiyotanke tawa kin en iyotankapi ece.

3 Heon etanhan taku tona openišipi kin hena owasin opapi qa econ po; tuka iye ohanpi kin ohna econpišni po; taku eyapi, tuka iyecen econpi šni ece.

4 Waqinpi tketke qa qinpi tehika heca oheyunpi, qa wicašta tapete akan ehnakapi ece, tuka iye qe šašte on yutanpi kta tawatenyapi šni.

5 Qa wicohan econpi kin owasin wicašta wanwicayakapi kta e heon econpi ece. Watešdake tanka icicagapi, qa šina opapun hdutankapi ece.

6 Wotapi en oyanke waštešte cinpi, qa omniciye tipi kin ohna wankan iyotankapi kte cin he waštedakapi ece:

7 Qa tihocoka kin en wicayuwintapi, qa, Itancan, Itancan, wicašta ewicakiyapi kta cinpi.

8 Tuka niye, Itancan, eniciyapi kte šni; wanji mdetahunka duhapi, Messiya hee; qa niyepi owasin hunkawanjinyeciyapi.

9 Qa nakun maka akan tuwedan, Ate, eciyapi šni po; Wanji mahpiya ekta un kin he Ateyayapi.

10 Qa nakun, Waonspekiye, eniciyapi kte šni; Wanji Waonspekiye duhapi, Messiya hee.

11 Qa tukte wanji iniyotanpi kta hecinhan, he wowidake nitawapi ee kta.

12 Tuwe yuwankan iyeiciye kta hecinhan, he yuhukun ehpeyapi kta; qa tuwe ihduhukuya hecinhan, he yuwankan iyeyapi kta.

13 Tuka wowapi kagapi qa Pharisee kin, wananicihmanpi, wotehi niciyankapi nunwe! wiwazica tipi tawapi ihangyayapi ece, qa wanniyakapi kta on wocekiye hanska ehapi ece; heon etanhan woyaco tanka iyahdeniciyapi kta.

14 Wowapi kagapi qa Pharisee kin, wananicihmanpi, wotehi niciyankapi nunwe! mahpiya wokiconze kin wicašta anawicayeciptapi, niye en dapi kte šni, qa tona en yapi kta cinpi kin teyahindapi ece.

15 Wowapi kagapi qa Pharisee kin, wananicihmanpi, wotehi niciyankapi nunwe! miniwanca maka ko aokibeyayapi, wicašta wanjidan duhomnipi kta; qa ecetu kinhan, niye isanpa nonpa akihde Wakanšica cinca yakagapi ece.

16 Tokakeya mani ištagongapi kin, wotehi niciyankapi nunwe; hehapi ece; Tuwe tipi wakan kin on wakonze cinhan he taku šni; tuka tuwe tipi wakan kin en mazaskazi yuke cin, he on wakonze cinhan, he wahtani ece!

17 Winitkotkokapi qa ištanigongapi; mazaskazi, qa iš tipi wakan mazaskazi wakan kage cin unma tukte iyotan he?

18 Nakun, Tuwe owayušna kin on wakonze cinhan he taku šni; tuka tuwe wošna owayušna akan un kin he on wakonze cinhan, he wahtani ece.

19 Winitkotkokapi qa ištanigongapikin; wošnapi qa iš owayušna wošnapi kin wakan kage cin unma tukte tanka he?

20 Heon etanhan tuwe owayušna kin on wakonze cinhan, he owayušna qa taku akan un kin koya on wakonza ece.

21 Qa tuwe tipi wakan kin on wakonze cinhan, he tipi wakan, qa nakun tuwe ohna ti ece kin, hee on wakonza ece.

22 Qa tuwe mahpiya kin on wakonze cinhan, he Wakantanka oiyotanke tawa, qa nakun tuwe akan iyotanke cin on wakonza ece.

23 Wowapi kagapi qa Pharisee kin, wananicihmanpi, wotehi niciyankapi nunwe! ceyakata wahpe skuya, wacanga ko, iwikcemna kin wadušnapi ece; qa woope kin en taku tanka, woowotanna, wowaonšida qa wowacinye, hena ayaktapi šni ece; dena e ecanonpi kta, qa unma nakun econ šni yaunpi kte šni tuka.

24 Tokaheya mani ištagongapi kin, hoponkadan puskem edakupi, qa kamel heca napca iyeyayapi ece.

25 Wowapi kagapi qa Pharisee kin, wananicihmanpi, wotehi niciyankapi nunwe! wakšica wiyatke ko akantanhan duskapi ece, tuka mahen wamanonpi qa wicotawacin šica on ojugjudan.

26 Pharisee ištagonge, tokaheya wiyatke wakšica ko mahentanhan ska kaga wo, kinhan akantanhan he nakun ska kta.

27 Wowapi kagapi qa Pharisee kin, wananicihmanpi, wotehi niciyankapi nunwe! ohna wicahapi sanyanpi henicecapi; hena akantanhan owanyag wašte, tuka mahentanhan wicašta huhu qa taku šica owasin on ojugjudan ece.

28 He iyecen niyepi wicašta ekta akantanhan owotanna yaunpi seececa, tuka mahentanhan wanaicihmanpi qa woowotanna šni on onijupidan.

29 Wowapi kagapi qa Pharisee kin, wananicihmanpi, wotehi niciyankapi nunwe! wicašta wokcan ohna wicahapi kin en tipi wicayecagapi, qa wicašta owotanna ohna wicahnakapi kin hena sanyayapi ece:

30 Qa hehapi; Atewicunyanpi ni unpi he anpetu kin en unyakonpi unkanš, wicašta wokcan wicaktepi qon en ounpapi kte šni tuka ce.

31 Hecen tona wicašta wokcan wicaktepi qon cincapi kin hena niyepi e onihdakapi ece.

32 Qa nakun niye niyatepi wicohan tawapi kin hena wicayeciyuštanpi kta.

33 Wamduška henicapi, sintehda wicoicage, token wakanšica ti iwicayacopi kin nayecipapi kta he?

34 Heon etanhan iho, wicašta wokcan, wicašta ksapa, wowapi kagapi hena koya, niyepi ekta yewicawaši; unkan etanhan apa wicayaktepi kta, qa icipaweh owicayakatanpi kta; qa apa omniciye tipi nitawapi kin ohnahna wicayakapsinpsintapi kta; qa otonwe iyasyaza šicaya wicayakuwapi ece e kta.

35 Hecen maka akan wicašta owotanna wicaktepi hena we kin ocowasin niyepi en aniupi kta; Abel owotanna we kin hetanhan, Zakarias, Barakias cinhintku, tipi wakan qa owayušna kin iyotahedan yaktepi qon he we kin hehanyan.

36 Awicakehan heciciyapi; Dena owasin wicoicage kin de en awicau kta.

37 Jerusalem, Jerusalem, wicašta wokcan wicayakte sa, qa tona niye ekta yewicašipi qon hena inyan on wicayakinin ece qon, wahupakoza wan iye cinca hupahu ihukuya wicatpahi ece kin, he iyecen wanna ota nicinca wicawapahi kta wacin, tuka niye wicayadapi šni ece!

38 Iho, yatipi kin wanna otiwota ehpeniciyapi:

39 Qa heciciyapi; Detanhan tohanyan, Tuwe Itancan caje yuha u kin he yawaštepi nunwe, ehapi šni, hehanyan wanmayadakapi kte šni.