Psalm Wowapi 64-75

PSALM 64

Dowan itancan kin kicagapi. David tadowan.

1 Wakantanka, wocekiye mitawa en miho nahon wo; Toka kokipapi kin etanhan wiconi mitawa yapatan kte.

2 Wicašta šica takodakiciyapi etanhan namayahbe kta; Šicaya econpi oqoyapi kin etanhan.

3 Hena, mazasagye iyecen, ceji hdumanpi; Wanhinkpe iyecen, oie pa kin ekatapi;

4 Wicašta ecetu kin nahmana kutepi kte; Ihnuhanna kutepi kta, qa kokipapi kte šni.

5 Wicoie šice cin en wasagiciyapi kta; Nahmana on hmunkapi eonpapi kin he ohdakapi kta; Tuwe wanwicayake kta he, eyapi.

6 Wicohan šica nina akitapi; Wiyeya unkanpi; tanyan yuštanpi ce: Unkan mahen wicašta tawacin qa cante kin temahentu.

7 Tuka Wakantanka ihnuhanna wanhinkpe on wicakute: Hen taopi wicayukan.

8 Hecen nasna wicakiyapi; iye cejipi kin en wicahdi; Tona opawicahtapi kin owasin najicapi kta.

9 Heon wicašta owasin nihinciyapi kta; Qa Wakantanka ohan kin he oyakapi kte; Qa taku econ kin awacinpi kta.

10 Wicašta owotanna Jehovah en iyuškin kta, Qa he wacinye kta; Qa tona cante ecetupi kin owasin witanpi kta.

PSALM 65

Dowan itancan kin kicagapi. Psalm odowan, David tawa.

1 Wakantanka, Zion en ainina yatanpi kin he nitawa; Qa taku iwahoyapi kin nicupi kte.

2 Wocekiye nayahon ece kin, Niye ekta wicacehpi owasin u kte.

3 Woahtani wicoie kin iyakapemayanpi; Taku šica econkupi kin hena niye yakajuju kta.

4 Tuwe yakahnige ca kiyedan ayau kin he cante waite; Tihocoka nitawa kin en ounye kta; Yati wowašte on iunmnanpi kte; Tipi wakan nitawa kin he.

5 Woowotanna en taku wowitonpe on unkayaduptapi kta, Wakantanka Wanikiya unkitawapi; Niye maka ihanke kin owasin wacinniyanpi; Qa ioiih ininiwanca ekta tehan unpi kin.

6 Towašake on he kin šutaya ehde; Wookihi ipiyagkiton kin heon.

7 Miniwanca sa kin yuinina; Taja sa qa oyate owodutaton kin.

8 Nakun tona ihanke ekta dpi kin Hena wowapetokeca nitawa kin kokipapi; Wiinanpe qa wiiyaya oenape kin hena dowanyakiye kta.

9 Maka kin en yahi qa aininilaiiyaya: Wašte hinca yakage kta; Wakantanka tawakpa kin mini ojudan: Aguyapi icahwicayeciciye kta; Wiyeya yakaga nakaeš.

10 Maka yumdupi kin duspaya; Cankuyetonton kin boyamdaya; Magaju on panpanna yakaga; Taku aicaga ece kin he dawašte kta.

11 Nitowašte omaka kin watcsdag yecaton; Qa nitacanku wasna sbuya.

12 Tinta makoška  ntu kin sbuya; Qa pajodan kin wowiyuiskin ipiyagkiton.

13 Tahin optaye kin cincota ogekiton; Qa omdaye kin aguyapi aihdafipa: Wowiyuškin on iyašapi kta; Han, dowanpi kta.

PSALM 66

Dowan itancan kin kicagapi. Woyatan odowan.

1 Maka kin ocowasin, Wakantanka on iyasa po.

2 lye caje wowitan kin idowan miye; lye yatanpi wowitan kin qu po.

3 Wakantanka heciyapo; Niohan wowinihan hinca ce; Nitowašake tanka on tokaniyanpi kin Niye en itonpi kte šni:

4 Maka kin ocowasin ohonidapi kta, Qa inidowanpi kta; Nicaje kin idowanpi kte. Selah.

5 U miye, Wakantanka ohan kin wanyaka po; Wicašta cinca kin en wowinihanyan ohanyan.

6 Miniwanca kin he puza kaga; Wakpa kin opta huinyun yapi kta: Hen iye on unkiyuškinpi kte.

7 Towašake on ohinniyan iye wicaštayatapi; Iye ista Ikcewicašta kin iwanwicayaka: Wahanhanicidapi kin wankan yeiciyapi kte šni. Selah.

8 Oyatepi, Wakantanka unkitawapi yawašte po; lye yatanpi ho kin nahon wicakiya miye.

9 Unnagipi wiconi en ehnaka; Qa unsihapi hicahe kta iyowinkiye šni.

10 Wakantanka, niye iyutananyayapi; .Mazaska sdoyapi iyecen unyaduecepidan.

11 On hmunkapi kin en unkayaupi; Pakšin unkitawapi en wokakije eyahnaka.

12 Pa unkitawapi akan wicašta yanke wicayakiya; Peta qa mini ehna unhiyupi: Hehan taku utkanna en inanpe unyakiyapi.

13 Peta wošnapi kin yuha yati en hibu kte; Taku iwahociye cin hena cicieajuju kta.

14 Miiha hdaotanin qon hena; Qa makakija en mii taku eye ciqon.

15 Cepa peta wošnapi waciciyu ia kta, Tahcaska mdoha wašna kin iyahna: Tatanka sus wanica hekinškayapi kici wamdušna kta. Selah.

16 U miye, tona Wakantanka koyakipapi kin, nanon po; Unkan taku minagi ecakicon kin he ociciyakapi kte.

17 Mii on hoyewakiya; Qa woyatan miceji ihukuya un.

18 Micante en woahtani awacanmi kinhan, Itancan kin nahon kte šni.

19 Tuka awicakehan Wakantanka nanon; Wocekiye mitawa ho kin he anagoptan.

20 Wakantanka yawaštepi nunwe, Wocekiye mitawa yutokan iyeye šni, Qa iye tocantekiye kin emicihdaku šni.

PSALM 67

Neginoth on dowan itancan kin. Psalm kaeš odowan.

1 Wakantanka onšidakapi qa unyawaštepi kte; Qa iye ite on iyounyanpapi nunwe. Selah.

2 Hecen maka akan nitacanku sdonyapi kte; Wiconi nitawa, oyatepi owasin ehna.

3 Wakantanka, oyatepi kin wopida eniciyapi kta; Oyatepi owasin wopida eniciyapi kte.

4 Oyatepi wiyuškinpi qa iyasapi kta; Oyate kin owotanna wicadaco kta heon; Qa maka akan oyatepi yuš awicade kta. Selah.

5 Wakantanka, oyatepi kin wopida eniciyapi kte; Oyatepi iyuhpa wopida eniciyapi kta.

6 Maka kin waskuyeca aicage: Wakantanka, Wakantanka unkitawapi unyawaštepi kte:

7 Wakantanka unyuwaštepi kta; Qa maka ihanke owasin iye kokipapi kte.

PSALM 68

Dowan itancan kin kicagapi. Psalm kaeš odowan David tawa.

1 Wakantanka inajin kta; Tokayapi kin hena enanakiya yapi kta; Qa tona šicedapi iye itokapatanhan najicapi kta.

2 Šota kahboka he iyecen wicayakahape kta; Peta en canšin sdo kin he iyecen, Wicašta šica Wakantanka itokam taninpi kte šni.

3 Unkan wicašta owotanna pidapi kta; Wakantanka itokam iyasapi kte; Qa wowiyuškin  on iyuškinpi kte.

4 Wakantanka idowan po, iye caje kin yatan miye; Time hewoškan sunka wakan akan ye cin he canku kicaga po; He Jah eciyapi, heon itokam wiyuškin po.

5 Wamdenica ateyapi, qa wiwazica wayaco tawapi, Wakantanka hee, wowakan oyanke tawa ohna.

6 Tona tanšnana unpi kin hena Wakantanka tipi en owicahnaka; Tona kaška yakonpi kin hena wowašte en hiyu wicakiya ece: Tuka toka kin hena makoce puza en ounyanpi kta.

7 Wakantanka, nitaoyate wicitokam idade ciqon; Hewoškan makoce kin ehna mayani qehan; Selah.

8 Maka kin kanškan; Han, mahpiya kin sbuyapi, Wakantanka itokam; Šina kin de, Wakantanka itokam, Israel ta Wakantanka kin.

9 Wakantanka, taku ituhanpi kin magajuyaya: Nitaoyate qa mdokita kin he niye duwašaka.

10 Optaye nitawa kin hen ounyanpi; Wakantanka, nitowašte on wicašta onšika taku wicayecamna kta.

11 Itancan kin wicoie kin wicaqu kta: Tona eyanpahapi kin wicota hinca.

12 Ozuye wicaštayatapi kin najicapi kta, najicapi kta; Unkan winohinca nidogyanke cin he taku icupi kin painni kta.

13 Tohan makoce opapun kin en inunkapi kinhan, Wakiyedan hupahu mazaska apawintapi kin iyenicecapi kta; Qa sun kin mazaskazi on wiyatpatpa.

14 Hen lyotan Wašake cin wicaitayatapi najice wicaye cehan, Salmon en wapa iyececa.

15 Bašan paha kin he Wakantanka paha tawa; Bašan paha kin he imnija he kin heca.

16 Paha imnija kin, tokeca aiksinya eyatonwanpi he; Paha ohna Wakantanka ti kta hdahnige cin hee; Han, Jehovah ohinniyan en ounye kta.

17 Wakantanka canpahmihma tawa kin hena woyawa tanka nonpa, kektopawinge yuotapi; Itancan kin he en owicapa; Tawokeya wakan kin šina en un.

18 Wankan wapa yakiyahda; Wayaka awicahdapi kin hena ayahdi; Wicašta kin ehna taku wicaqupi kin iyacu; Han, tokapi kin ehna; Jehovah Wakantanka en ounye kte.

19 Anpetu qa anpetu Itancan kin yawaštepi nunwe: Waqinunkiyapi, tuka lyotan Wašake cin niunkiyapi kin hee. Selah.

20 Taku Wakan kin de wiconi Wakantanka unkitawapi kin hee; Qa wiconte oenape kin hena Jehovah Itancan tawa.

21 Han, Wakantanka tona tokayapi pa wicakahdehdece kte; Tuwe woahtani en mani un paha kin.

22 Itancan kin heya; Bašan etanhan awicawaku kte; Miniwanca osbe kin etanhan awicawahdi kta:

23 Hecen nisiha toka we kin en sayapi kta; Nitasunke ceji kin he nakun.

24 Wakantanka, iniyopte cin he wanyakapi; Mita Wakantanka iyoopte cin; Wicaštayatapi mitawa, owanka wakan kin ohna.

25 Tona dowanpi kin hena tokaheya yapi; Hektam candowankiyapi kin; Wicihdukšan wikoška  cancega kabupi.

26 Omniciye kin en Wakantanka yawašte po; Itancan kin, Israel minihdoka kin etanhan.

27 Benjamin cistinna kin hen un, ohiwicaya; Judah itanoanpi kin, inyan on wakininpi; Zebulun itancanpi; Naphtali itancanpi kin.

28 Nita Wakantanka nitowašake kiconza; Wakantanka, taku unkoyecihanyanpi kin he yuwašaka wo.

29 Jerusalem en tipi wakan nitawa kin on, Wicaštayatapi kin taku nicahipi kta.

30 Woteca psa ehna unpi kin hena niye iyopewicaya wo; Wicota wašakapi kin, oyate ptejicadan om; Mazaska onšpašpa yuha ahi patujapi kin; Oyate okicize waštedapi kin wicayuomdeca wo.

31 Egypta etanhan wicašta cepa upi kta; Ethiopia Wakantanka ekta nape hdugate kta.

32 Maka wokiconze kin, W'akantanka yatan po; Itancan kin idowan miye: Selah.

33 Tuwe mahpiya kin akan iyotanka, Mahpiya wanakaja kin; Inyun, ho hdaotanin, wowašake ho kin.

34 Wakantanka yawašaka miye; lye towitan Israel akan un, Qa towašake kin mahpiya kin ekta.

35 Wakantanka, oyanke wakan nitawa etanhan wowinihan yaun; Israel ta Wakantanka; Wowašake qa wookihi kin oyate wicaqu ece. Wakantanka yawaštepi nunwe.

PSALM 69.

Šošannim on dowan itancan kin. David tawa.

1 Wakantanka, nimayan wo; Mini kin minagi ee kaeš hiyohi, heon.

2 Upšija temahentu mahen imdamde, Tukten najinpica šni; Mini sma kin en wau; Qa mini kin iwankam imayaya.

3 Waceya on mihdušihtin; dote masaka; Wakantanka mitawa ape waun kin on išta mayazan.

4 Tona taku on etanhan šni šicemadapi kin hena mapa hin isanpa ota; Tona ihangmayanpi kta, Tokamayanpi itonpišni kin hena wašakapi; Taku iwacu šni kin he wicawecu kta.

5 Wakantanka, wimatkotkoke cin he sdonyaya; Qa wawahtani kin hena nanicihmanpi šni.

6 Tona anipepi kin hena miye on ištecapi šni nunwe; Itancan Jehovah Sabaoth: Tona anicitapi kin hena miye on ištenwicayapi šni nunwe Israel ta Wakantanka kin.

7 Niye on amaiapi waun; Wowištece ite amakahpa.

8 Mihunkawanji ehna togmahdapi waun; Qa ina cincawicaye cin hena om wicašta matokeca.

9 Yati cantokpanipi kin he mayutakuni šni; Qa tona iyopeniyanpi wawiyopeyapi kin he amahinhpaya.

10 Unkan waceya, minagi wotešni un; Qa he nakun on amaiapi ece.

11 Unkan wakihdaka ogeweton; Qa heon oweštepi makagapi.

12 Otonwe tiyopa en iyotankapi kin hena amaiapi; Qa tona woyatke suta yatkanpi kin hena dowanpi.

13 Tuka, Jehovah, miye wocekiye eciciya; Woiyokipi anpetu kin en, Wakantanka, nitowaonšida untkana on; Namahon wo, wiconi nitawa wowicake kin on.

14 Upsija kin etanhan emayaku ye, Qa mahen imdamde kta iyowinmaye šni ye; Tona šicemadapi kin etanhan emayakupi nunwe, Mini sma kin etanhan.

15 Mini tanka kin aomakahpe šni nunwe; Qa mini sma kin namapce šni nunwe; Qa woha kin aokibe maye šni nunwe.

16 Jehovah, namahon ye, nitowaonšida wašte kin on; Wawacinkta duza tanka ota kin on miye ekta ihduhomni ye.

17 Qa niite nitaokiye nakicihbe šni wo: Makakija he on namahon inahni wo.

18 Minagi ikiyedan u wo, he opekiton ye; Tokamayanpi kin on etanhan makiyuska wo.

19 Amaiapi qa ištenmayanpi qa iyopeniayanpi kin, niye sdonyaya; Tokamayanpi owasin nitokam yakonpi.

20 Waaiapi kin micante kakša; heon wamayazan; Unkan onsimadapi kta ape waun, tuka wanica; Qa cantohnagmayanpi kta, tuka tuwedan iyewaye šni.

21 Nakun wate kta on pizi maqupi; Qa imapuza hehan miniskuya yatkemakiyapi.

22 Wicitokam wahna wotapi kin he wohmunke eekiyapi nunwe; Qa tanyan yukanpi kin he mazahtakiyapi kte.

23 Išta tawapi aotpasyapi nunwe; Wawanyakapi kte šni; Qa nitepi ohinniyan patuswicakiya wo.

24 Nitocanniye kin awicakastan wo; Qa wosihda kata nitawa iyahdewicaya nunwe.

25 Hocoka tawapi kin he otiwota ehpeyapi kte; Qa tawakeyapi ohna tuwedan ti šni nunwe.

26 Tuwe yakaštake cin he šicaya kuwapi; Qa wicayapahdoke iyokišicapi kin he oyakapi ece,

27 Wahtanipi on woahtani wicaqu wo; Qa nitoowotanna kin en upi šni nunwe.

28 Wiconi wowapi kin etanhan wicapajujupi nunwe; Qa wicašta owotanna om owicawapi kte šni.

29 Tuka miye iyomakišice ea makakija; Wakantanka, wiconi nitawa wankan emahde kte.

30 Odowan wan on Wakantanka caje kin mdatan kta; Woyatan dowanpi on mdatanka kta.

31 Unkan he Jehovah iyokipi kta, Tatanka wosdohan kaeš tatanka susu wanica, he šake ko yuhe cin isanpa.

32 Wicašta wahbadan he wanyakapi, qa iyuškinpi kta; Qa Wakantanka ayakitapi kin niye nicantepi ni kte:

33 Tona onšiice cin hena Jehovah nawicahon; Qa wicakaškapi tawa kin hena šice wicadake šni.

34 Mahpiya qa maka kin he yatanpi nunwe; Miniwanca qa taku ohna škanškan owasin.

35 Wakantanka Zion nikiye kta; Qa Judah hotonwe kin hena piya kage kta: Hecen en ounyanpi kta qa tawayapi kta.

36 Nakun iye taokiye cinca kin tawapi kta; Qa tona iye caje waštedapi kin hena hen tipi kta.

PSALM 70

Dowan itancan kin kicagapi, David tawa, Wokiksuye kta.

1 Wakantanka, emahdaku wo: Jehovah, omakiya inahni wo.

2 Tona minagi odepi kin hena token cante yuzapi taninšni qa ištecapi nunwe; Tona šicaya waun kta cinpi kin hena namnipi qa ištenwicayapi kte.

3 Ištecapi on namnipi kta; Tona, Hoho, hoho, eyapi kin.

4 Tona anicitapi kin owasin iyuškinpi qa pidapi kte; Qa, Jehovah yatanknpi nunwe, ohinniyan eyapi kta; Tona wiconi nitawa waštedapi kin hena.

5 Tuka miye makakije ca onmašika; Wakantanka en mahi inahni wo; Tuwe omakiye ca emahdaku kin he niye; Jehovah yutehan šni ye.

PSALM 71

1 Jehovah niye wacinciya; Icimana ištenmayanpi šni nunwe.

2 Nitoowotanna on eniayahdaku qa inapemayakiye kta: Anohmakiye ca nimayan wo.

3 Tokin imnija tipi ciciyuhen, ohinniyan en waku kte; Nimakiyapi kta econwicayaši: Imnija mitawa qa conkaške mitawa kin he niye.

4 Mita Wakantanka, wicašta šica nape etanhan emahdaku wo; šicaya ohanye ca wahte šni kin napcokaya etanhan.

5 Itancan, wowacinyeciya heon etanhan; Jehovah, homakšiyopa ehantanhan wacinciya.

6 Wicatamni etanhan niye en imunka; Ina tezi kin etanhan yus amau kin he niye; Niye en ohinniyan mitadowan.

7 Wicota wowinihan mayanpi; Tuka wowinape suta mitawa kin he niye.

8 Niyatanpi kin on mii ojudan kta; Qa, anpetu osan, nitowitan kin on.

9 Wimacahinca kinhan ehpemaye šni ye; Wasuke šni amayan en amayuštan šni wo.

10 Tokamayanpi kin. hena amaiapi; Qa tona minagi iyapepi kin hena witaya wohdakapi;

11 Qa heyapi; Wakantanka ehpeya ce; Kuwa aye ca yuza wo, tuwedan eyaku kte šni.

12 Wakantanka, mitehanyan un Šni ye; Mita Wakantanka omakiya inahni wo.

13 Tona minagi tokayupi kin, Hena ištecapi qa atakunipi šni nunwe; Tona šicaya waun kta cinpi kin, Hena waaiapi qa wowištece koyakapi nunwe.

14 Tuka miye ohinniyan ape waun kta; Qa niyatanpi kin owasin mdaota kta.

15 Nitoowotanna kin mii oyake kta; Anpetu osan, wiconi nitawa kin; Tonakeca sdonwaye šni nakaeš.

16 Jehovah Itancan onan wašake cin hena en wau kta; Nitoowotanna omdake kta, nitawa ecedan.

17 Wakantanka, homakšiyopa ehantanhan niye onspemayakiya: Unkan dehanyan niohan wakan kin mdaotanin kta.

18 Nakun wimacahibca qa pa maska hehanyan, Wakantanka, amayusian šni ye; Hecen niisto kin wicoicage kin de owakiyake kta; Nitowašake, tona u kta owasin en.

19 Nitoowotanna nakun, Wakantanka, tehanwankantu; Taku tanka hinca ecanon ece; Wakantanka, tuwe iyeniceca he!

20 Niye wokakije ota qa tanka wanyag unyakiyapi: Yahdicu qa niunyakiyapi kta; Qa maka osbe kin etanhan hdicu unyakiyapi kta.

21 Niye mayadutanka kte; Qa ake cante wašte mayakage kta.

22 Nakun candowankiyapi on ciyatan kta; Nitowicake on, Wakantanka mitawa: Israel Taku Wakan tawa, cotanka on ciciyajo kta.

23 Tohan ciciyajo kinhan miiha iyuškin kta; Qa minagi opeyakiton kin he nakun.

24 Nakun miceji, anpetu osan, nitoowotanna cajeyate kta: Tona tanyan waun kte šni cinpi qon, Hena istecapi, hena ite nasapi, heon.

PSALM 72

Solomon on.

1 Wakantanka, nitawoyaco wicaštayatapi kin qu wo; Qa nitoowotanna, wicaštayatapi cinhintku kin.

2 Woowotanna on nitaoyate wicayukcan kta; Qa onšikapi nitawa kin, woyaco on.

3 Hehan he kin oyate wookiye icahwicakiciye kta; Qa paha kin, woowotanna on.

4 Oyate en tona onšikapi kin on wayaco kta; Wahpanica cinca kin hena niwicaye kta; Qa tehiya wicakuwa kin he kamdemdece kta.

5 Konicipapi kta, tohanyan anpetu wi, Qa hanyetu wi kin yuke kta, Wicoicage qa wicoicage hehanyan.

6 Maga kašdapi kin amagaju he iyecen hdihe kta; Magaju maka bospaya kin he iyececa.

7 Iye taanpetu kin en wicašta owotanna icage kta; Qa wookiye untkanna, hanyetu wi henakeca kta hehanyan.

8 Unkan iye miniwanca etanhan miniwanca ekta wicaštayatapi kta; Qa wakpa kin etanhan maka ihanke kin hehanyan.

9 Iye itokam Ikcewicašta kin patujapi kta; Qa tona tokayapi kin hena maka mdu kin iputakapi kta.

10 Taršiš wicaštayatapi qa wita kin hena wopida wosna ahiyupi kta; Šeba qa Seba wicaštayatapi kin taku itukihanpi kta.

11 Han, wicaštayatapi owasin iye itokam makipusdiyapi kta; Oyatepi owasin wowidagwicaye kta.

12 Wahpanica hoyekiye cin he ehdaku kta; Qa onsike cin, qa nukun tuwe okiyapi šni.

13 Wicašta onšika wahpanica ko wicakpatan kta; Qa wahpanica nagipi kin niwicaye kta.

14 Wohnayan qa wicokicize etanhan nagi opewicakiton kta; Qa hena wepi kin tehike kta, iye išta kin en.

15 Unkan ni kta, qa mazaska Šeba etanhan qu kta; Nakun ohinniyan wocekiye ekiciye kta; Anpetu osan yawašte kta.

16 Makoce kin en wamnaheza napohnaka wanjidan ešta, he ipa kin en; Waskuyeca icage cin Lebanon iyecen kahnahnapi kta: Unkan otonwe etanhanpi kin maka wato iyecen heca aye kta.

17 Iye caje kin owihanke wanice kta; Anpetu wi itokam iye caje icage kta: Unkan iye on wicašta ihdawaštepi kta; Oyate owasin iye yawaštepi kta.

18 Jehovah Wakantanka yawaštepi nunwe; Israel ta Wakantanka kin; Išnana wowinihan wicohan econ ece.

19 Qa iye caje wakan kin ohinniyan yawaštepi nunwe; Qa iye towakan kin on maka kin ocowasin ojudan kte. Amen qa amen.

20 David Jesse cinhintku tawocekiye kin henakeca.

PSALM 73

Asaph tadowan.

1 Awicakehan Wakantanka Israel wicakiciwašte; Tona cante ecepidan kin hena.

2 Tuka miye qe mišiha nasdute kta ikeyedan; Mioye kin kaicucuya hiyeya tuka.

3 Wahanhanicidapi kin inawawizi; Wicašta šica wookiye en unpi wanmdake cehan.

4 Hena tapi kinhan wicakaškapi šni; Qa wowašake tawapi kin he cepa.

5 Wicašta iyotanhan iyekiyapi kin en opapi šni; Qa wicašta tokeca om kakijapi šni.

6 Heon etanhan wahanhanicidapi kin he wanapin kiyapi; Qa wicokicize wokoyake iyecen awicakahpa.

7 Cepapi on išta pajoya unpi; Token canteyuzapi ahinanpa ece.

8 Owehanhanpi qa taku šica eyapi; Wankantanhan wicokicize cajeyatapi ece.

9 Ipi kin mahpiya iyahdekiyapi; Qa cejipi kin maka kin omani un.

10 Heon etanhan iye taoyate dehanyan ahdi; Qa mini ojudan hdahepapi.

11 Unkanheyapi; Tokiyatanhan Wakantanka sdonye kta he: Qa Iyotan Wankan kin he wookahnige yuha he.

12 Wanyaka po, dena wicašta šicapi; Tuka ohinniyan tanyan unpi, Sanpa wijica ayapi.

13 Awicakehan ituya micante wahduska; Qa wiyaonpepicašni en nape wahdujaja.

14 Nakun anpetu otoiyohi makastakapi; Qa hanhanna eca iyopemayanpi ece.

15 Hecen omdakc kta ce, epe cinhan, Iho, nicinca wicoicage kin iyokisinwicawaye kta.

16 Unkan de okahnih awacanmi qehan, Miišta kin en tehike:

17 Tipi wakan Wakantanka tawa kin en hibu kinhan, Hehan owihankepi kin wanmdake kta.

18 Awicakehan canku sdu duta en ewicayahde kta: Woihangye en ohinhpaye wicayaye.

19 Inyun, ihnuhanna wicotakunišni en iyohpayapi: Wanna taninpi šni, wonihinciye on atakunipi šni:

20 Wihamnanpi wan ogungapi ekta he iyececa; Itancan, yekta kinhan, touncagepi kin ceyadake kta.

21 Hecen cante sinmiciya; Qa mapak u wakpaadoka:

22 Qa wimatkotkoka qa takudan sdonwaye šni; Niye en woteca iyemaceca.

23 Tuka miye hinyahin cici waun; Minape etapa kin yuš mayaun.

24 Nitowahokonkiye on yus amayade kta; Qa iyohakam wowitan iyahdemayaye kta.

25 Mahpiya ekta tuwe mduha he; Qa maka akan niye kici tuwedan wacin šni.

26 Micehpi qa micante atakuni šni; Micante imnija, qa taku ohinniyan mitawa kin Wakantanka hee.

27 Iho, tona nitehanyan unpi kin hena atakunipi kte šni; Tona ehpeniyan wicin iyayapi kin owasin ihangwicayaya.

28 Tuka miye qe Wakantanka mikiyedan u kin he wašte: Jehovah Itancan kin wacinwaye; Niohan owasin omdake kta.

PSALM 74

Maschil Asaph tawa.

1 Wakantanka, tokeca ohinniyan waayakta šni he? Tinta nitawa optaye kin en nitocanniye ide kta he?

2 Omniciye nitawa kiksuya wo, Wanakajatanhan opeyaton; Taku nitawa canšakadan opeyakiton qon; Zion Paha kin de en ounyaye cin.

3 Ohinniyan ihangyapi kin ekta caehde nitawa hiyuya wo; Toka taku šica owasin econ, tipi wakan nitawa ohna.

4 Tokaniyanpi nitomniciye kin en hotonpi ece; Wiyokihedan tawapi kin wiyokihedan ehdepi.

5 Tuwe contanka en onspe yuwankan ikikcu kin he sdonyapi tuka qon.

6 Tuka nakaha ayuco pagopi kin witaya onspe maziyape ko on kawankapi.

7 Tipi wakan nitawa kin ideyapi; Nicaje ohna ti qon he makata ehpeyapi.

8 Witaya ihanguuyanpi kta ce, cante mahen eyapi; Makoce kin owancaya Wakantanka tomniciye kin huhnayapi.

9 Wowakta wanunhdakapi šni; Wicašta wokcan wanica; Qa tohanyan kta hecinhan sdonya unkokihipi šni.

10 Wakantanka, tohanyan toka owehanhan kta he? Toka kin ohinniyan nicaje wahteda kte šni he?

11 Tokeca ninape, han ninape etapa kin, eyahdaku kta he; Nimaku cokaya tanhan ihanhwicaya wo.

12 Tuka Wakantanka wanakajatanhan Wicaštayatapi mitawa; Makoce cokaya wiconi kaga ece.

13 Niye nitowašake on miniwanca kin duptuja; Mini akan hogan tankinyanyan pa kin yakakšakša.

14 Niye unktehi pa kin yakahuhuga; Oyate yutapi kta wicayaqu kta, makoška  n unpi kin.

15 Niye miniyowe qa mini tanka kin dukinukan; Wakpa ohinniyan minitan kin dupuza.

16 Anpetu kin nitawa, han, hanyetu kin nitawa; lyoyanpa qa anpetu wi kin niye yakaga:

17 Niye maka opapun kin owasin eyahnaka; Mdoketu qa waniyetu, hena niye yakuga.

18 De kiksuya wo; toka wan Jehovah yašica; Qa oyate witkotkoka wan nicaje wowihahaya.

19 Wakiyedan nitawa optaye wotektehdapi kin en wicaqu šni wo; Onšika nitawa optaye kin ohinniyan akiktonje šni wo.

20 Wicotakuye kin he atonwan wo; Maka akan otpaza kin wicakipi ounyanpi kin ojudan.

21 Kiyušepi kin he išteca hdicu šni nunwe; Wicašta onšika wahpanica ko nicaje yatanpi kta.

22 Wakantanka najin wo; oihdaka wo; Anpetu osan witkotkoka niyašice cin he kiksuya wo.

23 Tokaniyanpi ho kin he akiktonje šni wo; Takpe niupi oqoyapi ohinniyan wankan ye cin.

PSALM 75

Dowan itancan kin kicagapi, Al-taschith. Asaph Psalm kaeš Odowan tawa.

1 Wakantanka, wopida unkeniciyapi; Unkiye wopida unkeyapi; Qa nicaje ikiyedan kin he niohan wakan oyakapi.

2 Tohan mniciyapi kta cajemdate cinhan, Woowotanna on miye wamdaco kta.

3 Maka kin sdo, qa tona akan tipi kin owasin; Can ipatan tawa kin hena tkeuwata. Selah.

4 Tona ihdatanpi kin, Ihdatanpi šni po, ewicawakiya; Qa wicašta šica, He hduwankan iyeyapi šni po.

5 He nitawapi hduwankan iyeyapi šni po; Qa tahu suta hduha iapi šni miye.

6 Wankan yeyapi kin he wiyohiyanpatanhan šni, Qa wiyohpeyatanhan šni; Qa hewoškan makoce kin eciyatanhan šni.

7 Tuka Wakantanka wayaco yanka; De kun ehpeye kta, qa he wankan iyeye kta.

8 Jehovah nape ohna wiyatke wan; Qa minima ipiga, pejihuta icahiyapi; Unkan hetanhan kastan ece; Ceteta en hiyeye cin henana yahepapi kta; Maka akan wicašta šica owasin yatkanpi kta.

9 Tuka miye qe ohinniyan womdake kta; Jacob ta Wakantanka iwadowan kta.

10 Qa wicašta šica he kin owasin wakaspe kte: Tuka wicašta owotanna he kin wankan icage kta.