I Corinth 15-16 (I Corinthians)

I. CORINTH WICOWOYAKE 15.

1 Tuka, mihunkawanji, wotanin wašte unkoniciyakapi, qa iyacupi qon en ayahanpi kin he sdonye ciciyapi.

2 He eciyatanhan nakun yanipi kta, wicoie unkoniciyakapi kin on, he tinsa duhapi kinhan, qa ecinšniyan awacanipi šni kinhan.

3 Otokaheya ekta taku iwacu qon he cicupi; Waunhtanipi kin on Messiya te cin, wowapi wakan eye cin ecetu;

4 Qa hnakapi, qa anpetu iciyamni kin piya ikicage cin, wowapi wakan eye cin ecetu.

5 Qa Inyan wanhdake ca, hehan ake nonpapi kin wanhdakapi.

6 Hehan he iyohakam wancadan hunkawanjin kiciyapi opawinge zaptan wanyakapi, hena wicota nahahin ni unpi, tuka wanjikji ištinmapi.

7 Qa he iyohakam Jakoh wanhdaka; hehan yewicašipi kin owasin wanhdakapi.

8 Qa ehake miš miye wanmdaka, okaškan tonpi kin iyemaceca.

9 Yewicašipi kin miye iyotan macistinna, qa Wakantanka taokodakiciye kin šicaya wakuwa qon heon yešipi emakiyapi kte cin iyemacece šni.

10 Tuka tomakece cin Wakantanka towaonšida kin on hemaceca. Qa iye towaonšida mici un kin he taku šni wanica, tuka hena owasin iyakapeya nina htawani; qa he miye šni, Wakantanka towaonšida mici un kin hee.

11 Heon, he miš miye, kaeš iyepi kin, hecen unyaotaninpi, qa nakun hecen wicayadapi qon.

12 Unkan Messiya wiconte kin etanhan piya ikicage cin he oyakapi hecinhan, token on niyepi wanjikji, Wiconte etanhan piya wicoicage wanica ce, ehapi he?

13 Wicate cin piya wicoicage wanica hecinhan, Messiya piya ikicage šni.

14 Qa Messiya piya ikicagešni hecinhan, hehan unkoyakapi kin he taku šni qa wacinyayapi kin he nakun taku šni.

15 Qa Wakantanka en unkitonpi šni kin; Wakantanka Messiya piya najin kiye cin he unkoyakapi; tuka he najin kiye šni, wicate cin ake najinpi šni kinhan.

16 Wicate cin piya najin kiyapi kte šni kinhan, hehan Messiya nakun piya najin kiyapi šni.

17 Qa Messiya piya ikicage šni hecinhan, wacinyayapi kin he takudan okihi šni, qa nahahin wayahtanipi kin ehna yaunpi.

18 Hehan tona Messiya on ištinma iyayapi qon hena nakun takunipi šni.

19 Wiconi kin de en ecedan Messiya on ape unyakonpi hecinhan, wicašta owasin unkiye iyotan iyotanhan iyeunkiyapi ece.

20 Tuka wanna Messiya wiconte etanhan piya ikicaga, qa tona ištinmapi qon hena en taku tokaheya icage cin hee.

21 Wicašta kin eciyatanhan wiconte u kin, he iyecen wicašta kin eciyatanhan wiconte etanhan piya wicoicage kin u ce.

22 Adam en owasin tapi kin, he iyecen Messiya en owasin piya ni yapi kta.

23 Tuka otoiyohi tohan iyehantu kinhan; Messiya e tokaheya, qa hehan tona tawa kin hena, Messiya ake hi kinhan.

24 Qa hehan owihanke kta, tohan wokiconze kin Wakantanka Ateyapi kin kicu kta; wokiconze owasin, qa wicowašake owasin, qa wookihi kin ihangye cinhan.

25 Tona toka yapi kin hena owasin iye siha kin ihukun iyewicaye kte cin hehanyan ito wicaštayatapi yanke kta.

26 Qa toka ehake ihangye kte cin he wiconte kin ee.

27 He siha kin ihukuya taku owasin ekihnaka. Tuka tohan, He ihukuya taku owasin ehnakapi kin, eye cehan, tuwe he ihukuya taku owasin ehnake cin he okaptapi e tanin.

28 Qa tohan taku owasin he ihukun iyeyapi kinhan, hehan Cinhintku kin eqe tuwe taku owasin iye ihukun iyeye cin he ihukun un kta, hecen Wakantanka owasin en ocowasin un kta.

29 Wicate cin ecaca piya ikicagapi kte šni hecinhan, tona wicate cin on baptem wicaqupi kin hena taku tokonpi kta he; qa tokeca e wicate cin on baptem wicaqupi he?

30 Qa tokeca anpetu iyohi ta ikopeya unyakonpi he?

31 Jesus Messiya Itancan unkiyapi kin en widuškinpi kin en owape cin he cajemdate ca, anpetu iyohi mata ce, epa.

32 Wicašta akantu iyecen, Ephesus ekta wamanica kici weciza ešta, on taku iyomapte kta he, wicate cin piya wicoicage šni kinhan? Wauntapi, qa waunyatkanpi kta, heyakecinhan untapi kta ce.

33 Icihnayanpi šni po; kodakiciyapi šice cin hena wicohan wašte yušica ece.

34 Wicohan owotanna on ihduhicapi, qa wahtanipi šni po. Wanjikji Wakantanka sdonyapi šni. Winištecapi kte cin heon hena hecen epe.

35 Tuka okinni tuwe heye kta; Wicate cin token piya ieahyapi, qa taku tancan kin yuha hiyupi he?

36 Winitkotkoka, taku oyaju kin he te šni kinhan, icage šni ece.

37 Qa taku oyaju kin he tancan icage kte cin he oyaju šni, tuka su ecedan, aguyapi kaeš taku toktokeca naceca.

38 Tuka Wakantanka token iyokipi kin hecen tancan qu, qa su ocaje otoiyohi tancan tawa kin kicu ece.

39 Cehpi owasin cehpi okonwanjidan šni, tuka wicacehpi kin he wanji ee, qa woteca cehpi kin wanji hee, qa hogan cehpi kin wanji hee, qa zitkadan cehpi kin wanji hee.

40 Unkan mahpiyata tancan, qa makata tancan kin heca yukan. Tuka mahpiyata un kin he towitan kin wanjidan, qa makata un kin he towitan kin tokeca.

41 Anpetu wi towitan kin wanjidan, qa hanyetu wi towitan kin he tokeca, qa wicanhpi towitan kin he nakun tokeca; qa wicanhpi wanji wicanhpi tokeqa kici wowitan en akidecece šni.

42 He iyecen wicate cin piya wicoicage. Tancan hwin ojupi, tuka hwin kte šni ekicetu yapi.

43 Wowihahaya ojupi, tuka wowitan ekicetu yapi. Wowašake šni yan ojupi, tuka wowašagya ekicetu yapi.

44 Wicacehpi tancan ojupi, tuka wowakan tancan ekicetu yapi. Wicacehpi tancan yukan, qa wowakan tancan kin yukan.

45 Kaken wowapi en kagapi qon, Adam wicašta tokaheya kin he wicanagi ni un kin heca kagapi, qa Adam ehake un kin he Woniya Wanikiye cin hee.

46 Tuka taku wakan un kin he tokaheya šni, tuka taku cehpi kin hee, qa iyohakam taku wakan kin.

47 Wicašta tokaheya kin he maka etanhan un, qa maka kin heca; Wicašta iyokihe kin he Itancan mahpiya eciyatanhan un kin hee.

48 Maka kin heca un qon, tona maka hecapi kin hena hececapi; qa mahpiya tanhan un qon, tona mahpiya tanhan un kin hena hececapi.

49 Unkan makata un kin touncage kin unhapi kin, he iyecen mahpiya tanhan un kin touncage kin unhapi kta.

50 Milmnkawanji kaken epa; Wicacehpi qa wicawe kin Wakantanka tokiconze kin tawapi kta okihipi šni, qa nakun wicahwin wicahwin kte šni kin tawa kte šni.

51 Wanyaka po, wowiyukcan wan ociciyakapi; owasin unkištinmapi kte šni, tuka owasin unyutokecapi kta.

52 Ihnuhanna, išta kakpapi se en maza yahotonpi tanka ehake kin tanin kinhan; maza yahotonpi tanka kin he yahotonpi kta, qa wicate cin hwin šni yan najin wicakiyapi kta, qa unkiye unyutokecapi kta.

53 Taku hwin kte cin de wicahwin šni koyake kta, qa te kte cin de tepica šni koyake kta.

54 Qa tohan taku hwin kte cin de wicahwin šni koyake ca, tancan wiconte kin de wiconi kin ogeton kinhan, hehan wicoie kin wowapi en kagapi qon ecetu kta; Wiconte kin he woohiye kin e ocowasin iocokaya.

55 Wiconte, wicape nitawa kin tokiya un he? Wicahnakapi, woohiye nitawa kin tokiya un he?

56 Wiconte icape kin he woahtani ee, qa woahtani wowašake kin he woahope kin ee.

57 Tuka Wakan tanka woohiye unqupi, Jesus Messiya Itancan unkiyapi kin eciyatanhan, he wopida yuha nunwe.

58 Hecen mihunkawanji wastecicidapi kin, sutaya yahanpi, qa pahoho šni yaunpi nunwe; qa ohinniyan Itancan ohan kin en aiciciya po, Itancan kin on htayanipi kin he taku šni wanice kta sdonyayapi kin heon etanhan.

I. CORINTH. WICOWOYAKE 16.

1 Wicašta owotanna un kin hena taku wicakicamnanpi kte cin, token Galatia ekta okodakiciye kin econ wicawaši qon, he iyecen niš econ po.

2 Anpetu tokaheya kin en niyepi otoiyohi token oyakihipi kin, iyacinyan eyahnakapi kta, hecen wau kinhan, wamnayanpi wanice kta.

3 Qa wau kinhan, tona wowapi on wicayaknhnigapi kin, hena wicaqupi nitawapi kin he Jerusalem ekta aye wicawa kta.

4 Qa miye ekta mde kte cin he wašte kta naceca hecinhan hena om mde kta.

5 Unkan Macedonia opta mde cinhan, hehan ekta ciupi kta: qa Macedonia opta mde kte cin he hecetu.

6 Qa okinni cicipi waun kta, han, waniyetu ihunniwaye kta naceca; hecen hetanhan tokiya mde cinhan niye amayadapi kta.

7 Nakaha tahepi wanciyakapi kte šni, tuka Itancan kin iyokipi kinhan, cicipi owanji manke kta wacanmi.

8 Tuka anpetu iwikcemna zaptan kin hehanyan Ephesus en owanjidan manke kta.

9 Tiyopa tanka wawokihi kin makiyuhdokapi, qa tona wakinicapi kin hena ota.

10 Unkan Timotheus ekta i kinhan, kokipešniyan en ninnpl kta e akita po: He nakun miye ecamon kin iyecen Itancan tohtani kin econ ece.

11 Heon tuwedan ihaha kte šni; tuka wookiye yuha au po, ekta mahiyu kta; he hunkawanjin kiciyapi kin om u kta ape manka.

12 Apollos mihunkawanji, he hunkawanjin kiciyapi kin om niyepi ekta niipi kta e nina cinwakiya; tuka iye dehan ekta ye kta ecaca cin šni, tuka tohan cin kinhan ekta i kta.

13 Kiktahan un po, wowacinye en sutaya han po, wicašta iyecen ohanyan po, wašaka po.

14 Taku nitawapi kin owasin wacantkiyapi on econpi nunwe.

15 Mihunkawanji, ceciciyapi ce; Stephanas tiyohnaka kin sdonyayapi, he Achaia en waskuyeca tokaheya icage cin hee, qa wicašta owotanna owicakiyapi kin en ye ieiyapi ece kin;

16 Tona hececapi, qa tona wawokiyapi, qa htanipi kin hena owasin wicihukuya ye niciyapi kta.

17 Stephanas qa Fortunatus qa Akaicus hipi kin heon imduskin; hena e taku ecamiyeconpi šni kin he ecetu miciciyapi.

18 Qa minagi kin magaga mayanpi, qa nitawapi nakun. Heon etanhan tona hececapi kin hena wicayuonihan po.

19 Asia ekta okodakiciye kin hena nape niyuzapi. Aquila qa Priscilla Itancan kin on sutaya nape niyuzapi, qa okodakiciye iye tipi ohna un kin hena koya.

20 Hunkawanjin kiciyapi kin owasin nape niyuzapi. liputakapi wakan kin on otoiyohi i ikiciputaka po.

21 Palos he miye nape kiciyuzapi kin de miye minape kin on wakaga.

22 Tuwe Jesus Messiya Itancan kin waštedake šni kinhan, he anathema maranatha un nunwe.

23 Jesus Messiya Itancan unyanpi towaonšida kin nicipi un nunwe.

24 Jesus Messiya on wacanwakiye cin niyepi owasin en nicipi un nunwe. Amen.

I Corinth 9-14 (Love Chapter 13) I Corinthians

1 CORINTH WICOWOYAKE 9.

1 Yewicašipi kin hemaca šni he? tawa miciye šni he? Jesus Messiya Itancan unkiyapi be wanmdake šni he? Itancan kin en miohan kin he niyepi šni he?

2 Wicašta tokeca ekta yewicašipi kin henmca šni ešta, niyepi kin ekta hemaca. Yewicašipi kin en opeya waun kin ipuspe kin he niyepi, Itancan kin en.

3 Tona wimawangapi kin hena kaken awicamdupta ece:

4 Unkiye wauntapi qa waunyatkanpi unkokihipi šni he?

5 Yewicašipi kin tokeca, qa Itancan hunkawanjinwicaye cin, qa Inyan iyececa, unkiye tankšiwicunyanpi wanji hdus unkaynpi unkokihipi šni he?

6 Kaeš, miš miye Barnabas kicišnana, wicohan ayuštan owakihi šni he?

7 Tohantu kašta tuwe iyunwin codan zuya iyaya he? tuwe hastanhanka iyuwi kin huhde qa etanhan waskuyeca yute šni he? qa tuwe tahinca optaye wan hduhe ca optaye kin etanhan asanpi yute šni he?

8 Wicašta akantu eciyatanhan hena hecen epa he? qa woope kin he hena hecen eye šni he?

9 Moses toope kin en kaken kagapi, Tatanka aguyapi napan kin he iohmus icu yaye kte šni ce. Wakantanka tatanka ihawicakta he?

10 Kaeš unkiyepi kin on hena hecen eya he? Unkiyepi kin on he wowapi en kagapi; hecen tuwe mahyumdu kinhan woape en mahyumdu kta, qa tuwe woape yuha aguyapi kapan kinhan he kici woape en okicipe kta.

11 Unkiye ninagipi kin on taku unkonicijupi hecinhan, taku wicacehpi kin nitawapi kin he mnaunyanpi kte cin he taku tanka he.?

12 Wicašta tokeca niyepi ekta wookihi kin de en okicipapi kinhan, unkiye unkiyotanpi šni he? Tuka wookihi kin he unkunpi šni; taku owasin unkapaspapi, Messiya tawotanin wašte kin anaunptapi kte šni kin heon.

13 Tona tipi wakan kin en kicanyanpi kin hena tipi wakan kin etanhan nipi ece sdonyayapi šni he? qa tona wahna wošnapi kin ekta ohanyanpi kin hena wošnapi kin etanhan wotapi ece?

14 Hecen nakun Itancan kin woope kaga; tona wotanin wašte oyakapi kin hena wotanin wašte kin on nipi kta.

15 Tuka hena taku kin takudan iwacu šni, qa hecen ecamiconpi kte cin heon hena hecen wowapi wakage šni; miye mate kte cin hee wašte, qa tuwe imawinkta kin de ecetu šni miciciye kte cin he šica.

16 Wotanin wašte kin omdaka keš, he wowinkta wahdawa šni; waecon makiyapi, qa wotanin wašte omdake šni ehantanhan wokakije micihan.

17 Qa he iyokipiya ecamon kinhan on iyunwin mduhe kta, tuka iyomakipi šni ešta taku econmakiyapi wan maqupi.

18 Hecen taku mduhe kta he? Wotanin wašte omdake cinhan, Messiya tawotanin wašte kin iyunwin codan ewahde, qa hecen wotanin wašte kin en wowakihi kin tanyan mduhe kta.

19 Wicašta owasin ekta wowidake šni waun tuka owasin wowidake mayuhe wicawakiya, wanjikši okihiwicawaye kte cin heon hecamon.

20 Juda oyate kin wicehna, Juda wicašta kin hemaca, Juda oyate kin owicawakihi kte cin heon. Tona woope kin ihukuya un kin hena ekta woope yuha unpi kin hemaca, tona woope yuhapi kin hena owicawakihi kta.

21 Qa tona woope nicapi kin hena ekta woope codan unpi kin hemaca; (Wakantanka ekta woope codan waun šni tuka Messiya on woope yuha waun;) tona woope nicapi kin hena owicawakihi kta.

22 Tona wašake šni kin hena en wašake šni se emaceca, tona wašake šni kin hena owicawakihi kta. Wicašta owasin en taku owasin un kin hemaceca, wanjikji ni wicawaye kte cin heon.

23 Wotanin wašte kin he on hecamon ece; hecen he en miš eya owape kta.

24 He de sdonyayapi šni he? Tona oinyanke kin en inyankapi kin hena owasin inyankapi, tuka wicašta wanjidan oqipe kin yekiya ece: Niš yeyakiyapi kta e iyecen inyanka po.

25 Tuwe kašta kici econ kte cinhan taku owasin iyatahde iciye šni un. Hena watešdake atakuni kte šni kin yekiyapi kta, tuka unkiye watešdake ohinniyan un kte cin he unkakitapi.

26 Heon etanhan miš hecen waimnanka, toketu tannin šni kin he iyecece šni; hecen nape on econ waun, tuwe okaduza ape cin iyecece šni;

27 Tuka mitancan kin suta micicage ca tinsmiciya; okinni wicašta tokeca wotanin wašte kin owicawakiyaka ešta, miye qe heyata iyemayanpi kte cin he kowakipa.

1 CORINTH WICOWOYAKE 10.

1 Mihunkawanji he de sdonye šni yaunpi kta wacin šni, hunkake wicunyanpi kin owasin mahpiya šapa kin ihukuya yukanpi, qa owasin miniwanca kin opta hiyupi.

2 Qa owasin mahpiya šapa qa miniwanca kin en Moses baptem wicaqu.

3 Qa owasin woyute wakan wanjidan etanhan yutapi.

4 Qa owasin woyatke wakan wanjidan etanhan yatkanpi. Imnija wakan kin wicihakam iyaye ciqon he etanhan yatkanpi. Imnija kin he Messiya hee.

5 Tuka hena wicota Wakantanka iwicayuškin šni, hecen makoskan ihpayapi.

6 Unkan hena e waonspekiya unkitawapi kin eepi, hecen taku šica cantiheunyanpi kte šni, iš iye cantiheyapi qon iyececa.

7 Qa wakagapi ohoyadapi kte šni, iš iyepi wanjikji heconpi qon iyececa. Kaken wowapi en kagapi, Oyate kin wota qa wayatke iyotankapi, qa škan najin hiyayapi.

8 Qa wiinahmanpi kin econkupi kte šni, iš iyepi wanjikji econpi qon iyececa; qa anpetu wanjidan en kektopawinge wikcemna nonpa sanpa kektopawinge yamni ihpayapi.

9 Qa Messiya iyutan unyanpi kte šni, hena wanjikji iyutan yanpi qon iyececa; unkan wamduška ihangwicayapi.

10 Qa wawiyahnupi kte šni, iš iyepi wanjikji wawihnupi qon iyececa, qa waihangye cin on yutakunipi šni.

11 Hena taku kin owasin waonspekiyapi on en wicahiyahde, qa unkiyepi wicoicage owihanketa unyakonpi kin wahokonunkiyapi kte cin heon wowapi en kagapi.

12 Hecen tuwe tinsa najin kecin kinhan, he wakta un nunwe, okinni ihpaye kta.

13 Wowiyutanyan wan wicašta sdonyapi šni ece kin en aniupi šni. Wakantanka wacinyepica, hecen wawoyakihipi kin isanpa iyutanniyanpi kta iyowinye kte šni, tuka wowiyutanyan kin he enakiye kta, hecen oyakihipi kta.

14 Heon etanhan waštecicidapi kin, wakagapi ohodapi kin nakicipa po.

15 Wicašta wacin ksape cin hena hecen ewicawakiya, token epe cin niš iyukcan po.

16 Woyawašte wiyatke unyawaštepi kin he Messiya we kin en kodakiciyapi kin hee šni he? Aguyapi unkiyuspapi kin he Messiya tancan kin en kodakiciyapi kin hee šni he?

17 Unkiye unkotapi, tuka aguyapi unwanjipidan, qa tancan unwanjipidan; unkiye owasin aguyapi wanjidan en akiptan unkopapi.

18 Wicacehpi eciyatanhan Israel oyate kin ekta ewicatonwan po. Tona wošnapi kin etanhan yutapi kin hena wahna wošnapi kin en opapi šni he?

19 Heon token epe kta he? Wakagapi kin he taku, kaeš taku wakagapi wakiyušnapi kin he taku tanka he?

20 Tuka taku Ikcewicašta kin wayušnapi ece kin hena wakanšica wakiyušnapi, qa Wakantanka wakiyušnapi šni. Unkan taku wakanšicapi kin en oyecipapi kta wacin šni.

21 Itancan tawoyatke qa nakun taku wakanšicapi tawoyatke kin yatkan oyakihipi šni. Itancan kin wahna wotapi tawa kin en oyapapi, qa nakun taku wakanšicapi wahna wotapi tawapi kin en oyapapi kta oyakihipi šni.

22 Itancan kin šihda unyanpi kta he? Iye sam iyeya waunšakapi he?

23 Taku owasin iyemicihantu, tuka owasin taku wašte icahye šni. Taku owasin iyemicihantu, tuka owasin waonspekiye ni.

24 Tuwedan išnana taku amnaiciye kte šni, tuka otoiyohi taku tokan tawa kte cin he akicicite kta.

25 Taku owasin tihocoka kin ekta wiyopeyapi kin he yuta po, qa wiyukcanpi kin on takudan iwangapi šni po.

26 Maka kin de taku ohnaka ko Itancan kin tawa.

27 Wicašta wicadapi šni kin wanji nicopi, qa ekta dapi tawatenyayapi kinhan, taku nitokam ehdepi kin he yuta po, qa wiyukcanpi on wiwangapi šni po.

28 Tuka tuwe, De wakagapi wakiyušnapi ce, eniciyapi kinhan, yutapi šni po, tuwe oniciyakapi qa wiyukcanpi kin hena on. Maka kin de taku ohnaka ko Itancan kin tawa.

29 Wiyukcanpi kin cajemdata, niye nitawa šni tuka tokan tawa kin he waka. Tokeca tawa miciye cin he wicašta tokeca tawiyukcan kin on mayacopi kta he?

30 Wowašte on en owape cinhan, tokeca e taku on wopida epe cin he on mayašicapi he?

31 Heon wayatapi qa wadatkanpi, qa taku kašta ecanonpi  kin owasin Wakantanka yatanpi kta e on econ po.

32 Juda oyate, qa Helenes oyate, qa Wakantanka taokodakiciye tuwedan icanšinyayapi kte šni.

33 Qa miye taku owasin on owasin iyokipi wicawaye cin he iyececa, taku mduhe kte cin he awakite šni, tuka taku wicota yuhapi kte cin, hecen nipi kta.

1 CORINTH WICOWOYAKE 11.

1 Miye omicipa po, Messiya opeya waun kin iyececa.

2 Mihunkawanji, ciyatanpi ce, taku owasin on miyeksuyapi, qa woope cicupi qon ecehin duhapi kin heon etanhan.

3 Tuka he de sdonyayapi kta wacin; Wicašta otoiyohi en pa kin he Messiya ee; qa winohinca pa kin he wicašta kin ee; qa Messiya pa kin he Wakantanka ee.

4 Wicašta otoiyohi pa akanpe ton cekiye ca wiyukcan kinhan, he iye pa kin wowištenya ece.

5 Tuka winohinca otoiyohi pa akanpe ton šni cekiye ca, wiyukcan kinhan, he iye pa kin wowištenya; he paha yušdapi kin kici akidececa.

6 Winohinca iš pa akahpe ton šni kinhan paha yušdapi kta. Tuka winohinca paha yušdapi, kaeš hdasanpi kin he wowištece kinhan, pa akahpe ton un kte.

7 Wicašta kin iš pa akahpe ton un kin he hecetu šni, he Wakantanka touncage qa towitan kin hee; qa winohinca kin wicašta towitan kin hee.

 8 Wicašta kin he winohinca kin etanhan šni; tuka winohinca kin he wicašta kin etanhan un.

9 Qa wicašta kin he winohinca kicagapi šni, tuka winohinca kin iš wicašta kin kicagapi.

10 Heon winohinca kin pa kin akan wowašake hduhe kta, mahpiya ohnihde cin hena on etanhan.

11 Tuka nakun wicašta kin winohinca codan un šni, qa winohinca kin iš wicašta codan un šni, Itancan kin en.

12 Unkan winohinca kin he wicašta kin etanhan un kin, he iyecen wicašta kin iš winohinca kin eciyatanhan u; qa taku owasin Wakantanka etanhan un.

13 Ni niyepi kin he iyukcan po; winohinca pa akahpe ton šni Wakantanka cekiye cinhan he hecetu he?

14 Taku oiyokipi kin hee kaeš he onspeniciyapi šni he; wicašta kin puha hanskaska hecinhan he wowištece?

15 Tuka winohinca kin iš paha hanskaska koyake cinhan he wowitan kin ee; paha kin he woakahpe qupi.

16 Tuka tuwe waakinin un kinhan, wicohan kin de iyececa takudan unhapi šni, qa nakun Wakantanka taokodakiciye kin.

17 Unkan he de omdake ca ciyatanpi šni; taku sanpa wašte kin on mniniciyapi šni; tuka taku aoptetu kin heon etanhan.

18 Tokaheya okodakiciye mniniciyapi eca yuomdecapi dukanpi keyapi nawahon; qa onšpa wicawada.

19 Waakinicapi niyepi en un kta, hecen tona owotanna iniyukcanpi kin tanin kta.

20 Heon witaya mniniciyapi eca, he htayetu wotapi Itancan tawa kin yutapi kte cin hee šni;

21 Wotapi kin en otoiyohi taku yute kte cin tokaheya icu ece; unkan wanji wotektehda qa wanji iš witko ece.

22 Tokeca, tipi ohna wayatapi, qa wadatkanpi kte cin yahduhapi šni he? Wakantanka taokodakiciye kin ayaktapi šni, qa tona taku yuhapi šni kin hena ištenwicayayapi he? Token eciciyapi kta he? Heon ciyatanpi kta he? Hiya, ciyatanpi šni.

23 Miye taku Itancan maqu qon he cicupi, Jesus Itancan kin, hanyetu wan iyopeyapi qon he en, aguyapi icu;

24 Qa wanna wopida eye cin hehan kiyušpe ca heya; Icupi qa yuta po ; mitancan kin niyepi on kiyušpapi kin he dee; decen miksuya econ po.

25 Nakun iš eya iyecen wanna yatkan qehan, wiyatke kin icu qa heya; Mawe kin en wicotakuye teca kin he dee ce; decen econ po, tohanhan datkanpi eca, miksuya po.

26 Hecen tohan aguyapi kin de yatapi, qa wiyatke kin de datkanpi kinhan, henakiya Itancan te cin he duotaninpi ece, tohanyan hi šni kin hehanyan.

27 Heon etanhan, tuwe aguyapi kin de iyacin šni yute ca, Itancan tawiyatke kin de yatke cinhan, he Itancan kin tancan, we ko, on yacopi. .

28 Tuka wicašta kin wihdukcan kta, hecen aguyapi kin de yute ca, wiyatke kin de etanhan yatke kta.

29 Tuwe iyacin šni yute ca yatke cinhan, he woyaco hdute ca hdatkan, Itancan tancan kin iyukcan šni kin heon.

30 Heon etanhan niyepi ekta wicota wašakapi šni, qa wayazanpi sa, qa hunh ištinmapi.

31 Unkiye unkihdukcanpi kinhan, tokan tanhan unkiyukcanpi kte šni.

32 Qa unkiyukcanpi kinhan, Itancan kin wahokonunkiyapi, hecen wicoicage kin om unyacopi kte šni.

33 Hecen mihunkawanji tohan wota mniniciyapi kinhan, otoiyohi akicipe po.

34 Qa tuwe wotektehda kinhan, he tiyata wote kta; hecen woyaco en witaya yaipi kte šni. Qa taku nahahin ihe cin hena tohan wan kinhan, wiyeya ewahnake kta.

1 CORINTH WICOWOYAKE 12.

1 Mihunkawanji, taku wakanyan wicaqupi kin iyukcan šni yaunpi kta wacin šni.

2 Ikcewicašta kin henicapi, wakagapi iapi okitpani kin en aniyanpi, ye niyanpi qon iyececa, he sdonyakiyapi.

3 Heon he sdonye ciciyapi; Tuwedan Wakantanka Taniya kin eciyatanhan ie ca, Jesus yašice kte šni; qa nakun tuwedan Jesus e Itancan eciye kta okihi šni, tuka Woniya Wakan ecedan eciyatanhan okihi ece.

4 Unkan taku wicaqupi kin hena okonwanjidan šni, tuka Woniya kin e wanjidan.

5 Qa waeconpi kin okonwanjidan šni, tuka Itancan kin e wanjidan.

6 Qa wicohan toktokeca; tuka Wakantanka kin e okonwanjidan, iye owasin en taku owasin owicakicihan.

7 Qa otoiyohi on iyopta ye kte cin heon Woniya yuotaninpi kin wicaqupi ece.

8 Woniya kin wicašta wan woksape wicoie kin qu ece; qa wanji iš wosdonye wicoie kin, hena Woniya wanjidan etanhan.

9 Qa Woniya kin he wanji tokeca wowacinye qu ece; qa wanji tokeca iš wawokiziyapi qu ece, qa hena Woniya wanjidan etanhan.

10 Qa wicašta wan wowapetokeca econpi, qa wanji tokeca wiyukcanpi, qa wanji tokeca taku wakan iyukcanpi, qa wanji tokeca iapi ocaje ota, qa wanji tokeca iapi ieska oyakapi kin hecekcen wicaqupi ece.

11 Tuka hena owasin Woniya wanjidan qa okonwanjidan un kin he ohanye ca, token cin kin hecen wicašta otoiyohi kipamni wicaqu ece.

12 Wicatancan kin he wanjidan tuka wicahuha ota yukan; qa tancan kin en huha kin hena ota qeyaš tancan wanjidan; Messiya kin iš he iyececa.

13 Woniya wanjidan on, unkiye owasin wicatancan wanjidan kta e baptem unqupi, Juda qa Helenes oyate, wowidake un kin, tona tawa iciyapi kin hena koya; qa owasin Woniya wanjidan kin he en wayatke unkiyapi.

14 Wicatancan kin he huha wanjidan šni, tuka ota.

15 Hehan wicašiha kin he, Wicanape kin he miyešni heon wicatancan kin en opeya waun ni ce, eye cinhan, heon etanhan wicatancan kin en ope šni he?

16 Qa wicanoge kin he, Wicaišta kin he miye šni qa heon wicatancan kin en opeya waun šni ce, eye cinhan, ehantanhan wicatancan kin en ope šni he?

17 Wicatancan kin ocowasin išta kin ee unkanš, winahonpi kin tokiya un kta he? qa ocowasin winahonpi kin ee unkanš, waomnapi kin tokiya un kta he?

18 Tuka nakaha Wakantanka token iyokipi kin hecen wicahuha kin otoiyohi wicatancan kin en ehde.

19 Qa hena iyuhpa wicahuha wanjidan unkanš, tancan kin tokiya un kta he?

20 Tuka nakaha wicahuha ota ešta, tancan wanjidan.

21 Hecen išta kin he, Cicin šni ce, nape kin eciya okihi šni; qa nakun pa kin he, Cicin šni ce, siha kin eciye kte šni.

22 Qa nakun sanpa, wicatancan en wicahuha kin tona wašake šni se un kin hena iyotan.

23 Qa wicatancan ekta tona yuonihan šni undakapi kin hena iyotan unhduonihanpi ece; qa tona owanyag šice cin hena iyotan woiyokipi ece.

24 Tona wašte unyukanpi kin hena takudan sanpa cinpi šni; tuka Wakantanka wicatancan kin icikoyagya kage ca, tukten iyokpaniyan un kin he en yuonihanpi tanka kaga.

25 Hecen wicatancan kin en yuomdecapi wanice kta; qa wicahuha kin hena otoiyohi awakicicinpi kta.

26 Qa hecen huha wanjidan iyotanhan iyekiye cinhan, he kici huha kin iyuhpa iyotanhan iyekiyapi kta; qa huha wanjidan yuonihanpi kinhan he kici huha kin iyuhpa iyuškinpi kta.

27 Messiya tancan kin he niyepi, qa otoiyohi huha yecidukanpi.

28 Unkan okodakiciye kin en Wakantanka kakenken ewicahde, tokaheya yewicašipi kin hena, qa iyokihe wokcanpi, qa iciyamni waonspekiyapi; hehan wicowašake, hehan waasniyanpi, waokiyapi, itancanpi, qa ceji toktokeca.

29 Owasin yewicašipi kin hecapi he? owasin wokcanpi he? owasin waonspekiyapi he? owasin wicowašake kin heca he?

30 Owasin waasniyanpi okihipi he? owasin ceji tokeca on iapi he? owasin ieskapi he?

31 Wookihi iyotan wašte kin hena nina akita po. Tuka hena isanpa canku wašte wan cicipazopi kta.

1 CORINTH WICOWOYAKE 13.

1 Wicašta akantu, qa mahpiya ohnihde cejipi kin on iwaa ešta, wacanwakiye šni ehantanhan maza ša snasna, qa taku ituya sna kin he iyemaceca.

2 Qa wowiyukcan mduhe ca, taku anahbeya un kin owasin, wookahnige owasin ko, sdonwaye ca, wowacinye owasin mduha, on he kin yutokan iyewaye kta owakihi ešta, wacanwakiye šni ehantanhan mataku šni.

3 Qa taku mitawa kin owasin won wicayapi kin en wahdusote ca, mitancan kin hee kaeš huhnage kta e waqu ešta, wacanwakiye šni ehantanhan takudan iciyopteya waun šni.

4 Wacantkiyapi kin he wicotawacin tanka qa wowašte ocowasin. Wacantkiyapi kin he wawinawizi šni. Wacantkiyapi kin he wahanhanicida šni, qa ihdatan šni ece ;

5 Wawištenya econ šni, qa išnana takudan amnaiciye šni, wacinko šni, qa taku šica iyawicaonpe šni;

6 Woahtani en iyuškin šni, tuka wowicake kin en iyuškin ;

7 Taku owasin kajuju; taku owasin wicada; taku owasin ape; qa taku owasin iyowinyan.

8 Wacantkiyapi kin he tohinni owihanke šni. Wokcanpi kin hena enakiyapi kta; ceji tokeca kin hena ayuštan aye kta; qa wookahnige kin hee kaeš atakuni kte šni.

9 Apadan sdonunyanpi, qa apadan unkiyukcanpi.

10 Tuka tohan woyuštan kin he hi kinhan tona woyuštan šni kin hena ihanke kta.

11 Homakšiyoqopa qehan, hokšiyoqopa iyecen iwae ca, hokšiyoqopa iyecen wimdukcan, qa hokšiyoqopa iyecen awacin waun; tuka wicašta imacaga hehan taku, hokšiyoqopa tawa kin amduštan.

12 Dehan ihdiyomdasin en iyecen aotpasya wawanunyakapi ece; tuka eqe hehan anog itohnake icitkokim wanunkiciyakapi kta. Nakaha taku kin tanyan sdonwaye šni; tuka e qe tokata sdonmayanpi kin iyecen tanyan sdonwaye kta e imicihan.

13 Unkan nakaha hena yamni en ounyan, wacinyanpi, qa apepi, qa wacantkiyapi; tuka wacantkiyapi kin he iyotan tanka.

1 CORINTH WICOWOYAKE 14.

1 Wacantkiyapi kin he okipa po, qa taku wakanyan wicaqupi kin hena cin po; tuka widukcanpi kte cin he iyotan.

2 Tuwe ceji tokeca on ie cin he wicašta kin takudan owicakiyake šni, tuka Wakantanka taku eciya; tuwedan nahon šni kin heon: hececa ešta Woniya kin eciyatanhan taku woanahbe kin oyaka tuka.

3 Tuka tuwe wiyukcan oyake cin he wicašta kin wowicakiyaka, on icahyapi qa wahokonkiyapi qa kicanptapi.

4 Tuwe ceji tokeca on ie cin he iye ksamiciya; tuka tuwe wiyukcan oyake cinhan he okodakiciye kin ksamwicaya ece.

5 Niyepi kin owasin ceji toktokeca on iyaapi kta wacin, tuka widukcanpi kie cin he iyotan wacin. Tuwe wiyukcan kin he tanka qa tuwe ceji tokeca on ie cin he ihukuya, ieska oyake šni kinhan, hecen okodakiciye kin icahyapi kta tuka.

6 Unkan nakaha mihunkawanji, ceji tokeca on iwaa en ciupi kinhan, he token oniciyapi kta he; yaotaninpi, qa wookahnige, qa wiyukcanpi, qa woonspe kin unmana eciyatanhan eciciyapi šni kinhan?

7 Unkan taku ni un šni kin hena, cotanka kaeš candowankiyapi kin hotanin kinhan, ho toktokeca šni kinhan, he taku on etanhan tukte e yajopi, qa tukte e dowankiyapi kin sdonyapi kta he?

8 Maza yahotonpi tanka kin ho okonwanjidan šni yahotonpi kinhan, tuwe zuyapi kta e wiyeya icicage kta he?

9 He iyecen niš niyepi, ceji on wicoie okahnih wašteste iyaapi šni kinhan, token on etanhan taku oyakapi kin he taku ee sdonyapi kta he? okaduza kin en iyaapi kta.

10 Maka kin akan ho ocaje tokeca kanakiya naceca, qa owasin taku kapi.

11 Tuka miš ho kin taku kapi: kin sdonwaye šni kinhan, tuwe ie cin he Ikcewicašta kin kecanmakin kta, qa miš eya tuwe ie cin he Ikcewicašta kin heca wadake kta.

12 Hecen wicohan wakan nina yacinpi kinhan, okodakiciye kin icahyapi kta e wadupipike kte cin he akita po.

13 Heon tuwe ceji tokeca on ie cinhan, he ieska oyake kta e icekiye kta.

14 Miye šaia cewakiye cinhan, minagi kin he cekiya; tuka mitawacin e qe takudan icahye šni.

15 Hecen toketu he? Miye minagi kin eciyatanhan cewakiye kta, qa nakun mitawacin kin eciyatanhan cewakiye kta; minagi kin on wadowan kta, qa nakun mitawacin kin on wadowan kta.

16 He hecece šni kinhan, ninngi on wopida eha eca, tuwe onspe šni en iyotanke cin he token, wopida ehe cin en, Amen eye kta he, taku ehe cin sdonye šni nakaeš.

17 Wopida tanyan eha, tuka iye kin okahnige šni.

18 Wakantanka mitawa wopida ewakiya ce, niyepi kin owasin sam iyeya ceji tokeca on iwaa ece.

19 Tuka okodakiciye kin en mitawacin kin eciyatanhan wicoie zaptanna iwae kta, on wicašta tokeca onpsewicawakiye kte cin he iyotan wašte, qa ceji tokeca on wicoie kektopawinge wikcemna iwae kte cin he aoptetu.

20 Mihunkawanji, wookahnige en hokšiyoqopa unpi šni po; tuka wicotawacin šice cin en hokšiyoqopa po, qa wookahnige kin en wicašta tanka un po.

21 Woope kin en kaken kagapi; Ceji tokeca, iha tokeca ko on oyate kin de owicaweciye kta; tuka hececa ešta, namahonpi kte šni, Itancan kin eya.

22 Hecen ceji tokeca kin hena wowakta kin hee, tona wicadapi šni kin hena eepi šni, tuka tona wicadapi kin hena on wowapetokeca kin hee.

23 Okodakiciye kin ocowasin witaya mniciyapi, qa owasin ceji tokeca on iapi kinhan, qa tona wacinton šni, wicada šni ko en hipi kinhan, winitkotkopika kecannicinpi kte šni he?

24 Tuka owasin wiyukcanpi, qa tuwe wicada šni wacinton šni un kin tin hiyu kinhan, he owasin on onspekiyapi, qa owasin on yacopi kta.

25 Qa hecen iye cante kin ekta taku anahbe cin yutaninpi kta; hehan makipusdiya ehpeiciye ca Wakantanka ohoda kta, qa Wakantanka niyepi en nicipi un kin oyake kta.

26 Heon mihunkawanji toketu he? Mniniciyapi eca niyepi otoiyohi odowan duhapi, qa woonspe duhapi, qa ceji tokeca, qa yaotaninpi wan, qa ieska oyakapi wan duhapi ece. Taku owasin waonspekiyapi kta e on econpi nunwe.

27 Tuwe ceji tokeca on ie cinhan, wancadan wicašta nomnom yamnimni, qa hena wanji itokto econpi kta, qa wanji ieska kiyapi kla.

28 Tuka tuwe ieska kiyapi kte cin wanice cinhan, okodakiciye kin en inina yanke kta; iš iye oiciciye ca Wakantanka okiye kta.

29 Qa wicašta wokcanpi kin hena nomnom qa yamnimni oyakapi kta, qa unmanpi kin wiyukcan unpi kta.

30 Qa tuwe ikiyedan iyotanke cin he taku wakanyan okiyakapi kinhan, tokaheya kin he inina yanke kta.

31 Owasin wanji itokto widukcanpi kin odakapi kta oyakihipi; hecen owasin onspekiyapi, qa owasin iwicakiyapi kta.

32 Qa wicašta wokcanpi toksapepi kin wicašta wokcanpi kin anawicakigoptanpi ece.

33 Wakantanka kin he oqoyapi kin kage šni, tuka wookiye kin he tawa, oyate wakan okodakiciye kin owasin en un kin iyececa.

34 Unkan winohinca nitawapi kin okodakiciye kin ekta inina yankapi kta. Hena ie kta e iyowinyanpi šni, tuka anagoptan yukanpi kta, woope heye cin iyecen.

35 Qa taku onspepi kta cinpi kinhan iye tipi ekta hihnakupi kin iwicawangapi kta. Okodakiciye kin en winohinca ie cin he wowištece.

36 Tokeca, niyepi kin etanhan Wakantanka oie kin hinanpa he? qa niyepi nišnanpidan ekta nihipi he?

37 Tuwe wicašta wokcan, kaeš wicašta wakan kin heca kecanicin kinhan, he taku wowapi en cicagapi kin hena Itancan tawoahope kin hee e yaotanin kta.

38 Qa tuwe iyukcan šni un kinhan, he iyukcan šni un nunwe.

39 Hecen mihunkawanji widukcanpi kte cin he akita po, qa ceji tokeca on iapi kte cin tehindapi šni po.

40 Qa taku owasin iyokipiya owotanna econpi nunwe.