Daniel Towapi Kin 1-5

DANIEL TAWOWAPI KIN

WICOWOYAKE 1.

1 Jehoiakim Judah wicaštayatapi tawaniyetu iyamni kin en, Nebuchadnezzar Babylon wicaštayatapi kin he Jerusalem ekta hiyu, qa ihdukšan aonataka.

2 Unkan Itancan kin Jehoiakim Judah wicaštayatapi kin he iye nape kin en qu, Wakantanka tipi ohna wakšica kin apa nakun. Unkan hena Šinar makoce kin ekta akiyahda, iye taku wakan tawa tipi kin ekta: qa wakšica kin hena taku wakan tawa mazopiye kin en ahdi.

3 Unkan wicaštayatapi kin Ašpenaz iye eunuch tawa kin wicayuhe cin he, Israel cinca kin etanhan awicaku kta keciya, wicaštayatapi cinca, qa wicašta itancanpi kin etanhanhan:

4 Koška tokeca šni unpi, tuka owanyag waštepi, qa wokšape owasin en wayupikapi, qa wosdonye sdonyapi, qa wookahnige okahnigapi, qa tona wicaštayatapi ti kin en najin okihipi kta; qa hena Chaldeani tawowapi qa iapi koya onspewicakiyapi kta.

5 Unkan wicaštayatapi kin, anpetu iyohi iye tawoyute etanhan hena ongege wicaqu ece, qa minisa hdat.ke cin etanhan: hecen waniyetu yamni icahwicakiye kta, qa hena ihuniyanpi kinhan wicaštayatapi kin itokam inajinpi kta

6 Unkan Judah cinca kin etanhan Daniel, Hananiah. Mišael qa Azariah hena en opapi.

7 Unkan eunuch unpi kin en itancan kin he hena caje wicaqu; Daniel he Beltešazzar qu, qa Hananiah, Šadrach; qa Mišael, Mešach; qa Azariah, Abed-nego.

8 Tuka Daniel wicaštayatapi tawoyute onge on, qa miniša hdatke cin on, iye cante mahen ihdusape kte šni kecin: Heon etanhan ihdusape kte šni e eunuch unpi itancan kin kida.

9 Unkan eunuch unpi kin en itancan kin he Daniel tanyan cantekiyuze ca waštekidaka, he Wakantanka kaga.

10 Hehan eunuch unpi kin en itancan kin Daniel heciya; Itancan mitawa wicaštayatapi woyute woyatke ko nieupi ecee kin he kowafcipa: tokeca koška obe nitawapi kin ehna isanpa ite iyokišica wanniyakapi kta he? kinhan wicaštayatapi kin ekta pa iyaco mayakiyapi kta.

11 Hehan Daniel, eunuch unpi en itancan kin, Melzar, Daniel, Hananiah, Mišael qa Azariah wicayuhekiye ciqon he heciya;

12 Ceciciya ce, wowidake nitawa anpetu wikcemna hehanyan iwicayuta ye: qa omnica etanhan unqupi kta, qa mini ece yatkeunkiyapi kta.

13 Hchan nitokam itohnake iwanunyakapi kta, qa koška wicaštayatapi tawoyute ongege yutapi kin hena iš eya itohnake wanyakapi kta: unkan iwandake cin he eciyatanhan wowidake nitawa kin ecawicakicon ye, eya.

14 Unkan wicoie kin de en anawicagoptan, qa anpetu wikcemna hehanyan iwicayukcan.

15 Unkan anpetu wikcemna owihanketa koška owasin wicaštayatapi tawoyute ongege yutatapi ecee kin kici iciwankiciyakapi kin iye itohnake sanpa owanyag wašte, qa cehpi isanpa cepapi.

16 Hecen Melzar woyute ongege qa miniša yatkanpi kte ciqon hena ewicakiciyaku: qa omnica ecee wicaqu.

17 Unkan koška topapi kin dena Wakantanka wosdonye wicaqu, qa woonspe wokšape ko owasin en wowiyukcan: qa Daniel wowanyake wowihanmde ko owasin okahniga.

18 Unkan anpetu tona en awicau kta wicaštayatapi keye ciqon hena wanna henakeca, hehan eunuch unpi wicayuhe cin he hena Nebuchadnezzar itokam hiyuwicaya.

19 Unkan wicaštayatapi kin hena om wohdaka; qa iyuhpa owicapeya tuwedan Daniel, Hananiah, Mišael qa Azariah iyececa iyeyapi šni: heon etanhan hena wicaštayatapi kin itokam inajinpi.

20 Unkan wokšape wicoie qa wowiyukcan tona wicaštayatapi kin iwicawange cin hena is, wicašta ksapa owasin qa wicanhpi iwanyakapi ecee kin iye tatnakoce owancaya unpi, dena wikcemna akihde isanpa wašte iyewicaya.

21 Unkan Daniel Cyrus wicaštayatapi tawaniyetu tokaheya kin hehanyan en un.

DANIEL TAWOWAPI KIN WICOWOYAKE 2.

1 Unkan Nebuchadnezzar wicaštayatapi un tawaniyetu inonpa en, Nebuchadnezzar wowihanmde ihanmna, on taniya kin ihniyanyan qa ištinbe cin akiciyuštan.

2 Hehan wicaštayatapi kin wicašta ksapapi, qa wicanhpi iwanyakapi, qa wapiyapi, qa Chadeani kin hena wicakico wicaši, wicaštayatapi tawowihanmde kin okiciyakapi kta. Hecen hena en upi qa wicaštayatapi kin itokam inajinpi.

3 Unkan wicaštayatapi kin hewicakiva; Wowihanmde wan iwahanmna, unkan mitaniyaihniyanyan, wowihanmde sdonkiye kta e heon.

4 Hehan Chadeani kin Syriak iapi kin on wicaštayatapi kin heciyapi; Wicaštayatapi, ohinniyan ni un nunwe: wowidake nitawa wowihanmde kin owicakiyaka ye, kinhan ieska unkoyataninpi kta ce.

5 Wicaštayatapi kin waayupte ca, Chaldeani kin hewicakiya; Wicoie kin tokan imakiyaya: wowihanmde kin he, qa ieska yaotaninpi kin nakun omiyeciyakapi šni kinhan, niye nicakšakšapi kta, qa yatipi kin ocesdi paha kagapi kta:

6 Tuka wowihanmde kin he qa ieska yaotaninpi kin nakun omiyeciyakapi kinhan, miye etanhan taku wicaqupi, wocinyopeyapi qa woytionihan tanka iyacupi kta: heon etanhan wowihanmde qa ieska yuotaninpi kin nakun omiciyaka po.

7 Hena ake ayuptapi qa heyapi; Wicaštayatapi kin wowidake tawa wowihanmde kin owicakiciyake kta, kinhan ieska oyakapi kin unyaotaninpi kta ce.

8 Wicaštayatapi kin waayupte ca heya; Anpetu yutehan wacannipi awicakehan sdonwaya, wicoie kin lokan imakiyaya wandakapi nakaeš.

9 Tuka wowihanmde kin he omiyecidakapi šni kinhan woyaco wanjidan niciyankapi: woitonšni qa wicoie waašape mitokam odakapi kta yakagapi, anpetu yutokecapi kta hehanyan: heon etanhan wowihanmde kin he omiciyaka po, kinhan ieska oyakapi kin he yaotanin oyakihipi sdonwaye kta ce.

10 Chaldeani kin wicaštayatapi kin itokam waayuptapi qa heyapi; Wicašta maka akan unpi tuwedan wicaštayatapi toie kin oyaka okihi kte šni: heon etanhan wicaštayatapi, wicašta itancan qa wowidake wicayuhe cin tuwedan wicašta ksapa, wicanhpi iwanyakapi ecee kin, qa Chaldeani kin wicoie hececa wicakida šni.

11 Qa wicaštayatapi kin taku tehike hinca wan da,qa tuwedan tokeca wicaštayatapi kin itokam he oyake kte šni, taku wakan wicacehpi en tipi šni kin henana okihipi ce.

12 Heon etanhan wicaštayatapi kin sinhda qa canteptanye hinca, qa Babylon en ksapapi kin iyufipa wicaktepi kta konza.

13 Unkan ksapapi kin wicaktepi kta keya wokonze kin he yaotaninpi. Unkan Daniel qa iye takodawicaye cin om wicaktepi kta e owicadepi.

14 Hehan Daniel, Arioch wicaštayatapi taakicita tancan, Babylon en wicašta ksapa owasin wicakte kta iyaye cin he, wokšape qa wowiyukcan on ayupte:

15 Waayupte ca Arioch wicaštayatapi taakicita tancan kin heciya; Tokeca wokonze kin wicaštayatapi kin etanhan inahni he? Hehan Arioch wicoie kin Daniel okiyaka.

16 Hehan Daniel tin iyaye ca wicaštayatapi kin anpetu qu kta kida, hecen ieska yaotaninpi kin he wicaštayatapi kin kipazo kta.

17 Hehan Daniel iye tipi kin ekta kihda, qa taku kin he Hananiah, Mišael qa Azariah, iye tawašitkupi kin owicakiyaka:

18 Hena woinahbe kin de on Mahpiya Wakantanka tawa kin itokam wowaonšida kidapi kta; hecen Daniel qa iye tawašitkuwicaye cin Babel en wicašta ksapa unmapi kin om ihangyapi kte šni.

19 Hehan hanyetu wowanyake wan en woinahbe kin he Daniel okiyakapi. Hehan Daniel Mahpiya Wakantanka tawa kin yawašte.

20 Daniel waayupte ca heya; Wakantanka caje kin he yawaštepi kta, otokaheya wanica qa owihanke wanica; wokšape qa wowašake kin hena iye tawa nakaeš.

21 Qa iye omaka qa waniyetu kin yutokeca ece; wicaštayatapi heyata iyeya, qa wicaštayatapi wankan ehde; ksapapi kin hena wokšape wicaqu, qa tona wowiyukcan sdonyapi kin hena wosdonye wicaqu ece.

22 Iye taku temahentu qa nahmana un kin hena yuotanin: taku otpaza en un kin he sdonya, qa iyoyanpa kin he iye kici ti.

23 Atewicawaye Wakantanka tawapi, wopida eciciya qa ciyatan, wokšape qa wookihi maya qu, qa taku unnicidapi kin he sdonyemayaya: wicaštayatapi toie kin he sdonyeunyakiyapi nakaeš.

24 Heon etanhan Daniel Arioch, wicaštayatapi Babel en ksapapi kin ihangwicaye ši qon he ekta iyaya: Ekta ye ca kaken eciya; Babel en wicašta ksapapi kin ihangwicaye šni wo: wicaštayatapi kin itokam amayan wo, kinhan ieska yaotaninpi kin he wicaštayatapi kin wakipazo kta ce.

25 Hehan Arioch inahni hinca, Daniel wicaštayatapi kin itokam ahi qa heciya; Judah eciyatanhan wayaka unpi cinca kin etanhan wicašta wan iyewaya, he qe ieska yaotaninpi kin wicaštayatapi kin sdonyekiye kta ce, eya.

26 Wicaštayatapi kin waayupte ca Daniel, nakun Beltešazzar eciyapi kin he heciya; Wowihanmde wanmdake cin he omiyeciyake kta oyakihi he, nakun ieska yaotaninpi kin?

27 Daniel wicaštayatapi kin itokam waayupte ca heya; Woinahbe wicaštayatapi da kin he wicašta ksapapi, wicanhpi iwanyakapi, wowapi kagapi qa wapiyapi econpi kin hena wicaštayatapi kin okiciyakapi kta okihipi šni:

28 Tuka mahpiya ekta Wakantanka wanji yanka, he woinahbe yuotanin ece, qa anpetu ehake kin en taku u kte cin hena wicaštayatapi Nebuchadnezzar okiyaka. Wowihanmde nitawa qa nipa makata nunka taku wanyake ciqon dena ee:

29 Niye wicaštayatapi, nitowinja akan, nitawacin wankan u, taku tokata anpetu kin en u kte cin hena; qa tuwe woinahbe yuotanin ecee kin he taku u kte cin hena sdonyeniyan.

30 Tuka miye qe, ni unpi kin owasin isanpa wokšape mduhe cin on woinahbe kin de omakiyakapi šni; tuka ieska yaotaninpi kin he wicaštayatapi kin okiciyakapi kta, qa nicante oyuze kin sdonyakiye kta e heon etanhan.

31 Wicaštayatapi, niye opahta nanka, unkan inyun wakagapi tanka wan. Wakagapi tanka, oiyege wašte hinca he nitokam han; qa owanyake kin he wowinihan hinca.

32 Wakagapi kin de pa kin mazaskazi wašte heca; maku qa išto hena mazaska; tezi qa šican kin hena mazazi;

33 Huha kin mazasapa; siha kin onspa mazasapa qa onspa maka.

34 Opahta nanka ecen inyan wanji nape codan baspapi, he wakagapi kin šiha mazasapa qa maka kin en iyapa, qa hena kamdemdeca.

35 Hehan mazasapa kin, maka kin, mazazi kin, mazaska kin, qa mazaskazi kin okonwanjidan kamdemdecapi, qa mdoketu okapanpi ha kin iyececa icaga; qa tate kin hena okahbog iyeya, hecen tukten wanke kte iyeyapi šni: tuka inyan wakagapi kin iyapa qon he he tanka icaga, qa maka ocowasin ojuya.

36 Wowihanmde kin hee: unkan ieska yaotaninpi kin he wicaštayatapi kin itokam unkoyakapi kta.

37 Wicaštayatapi, niye wicaštayatapi en wicaštaniyatapi: Mahpiya Wakantanka tawa kin he wokiconze wan nicu, wookihi, qa wowašake, qa wowitan:

38 Qa tukte etu wicašta cinca tipi kin, tinta woteca qa mahpiya zitkadan kin hena ninape en nicu, qa hena owasin iwankam itancan nicaga. Mazaskazi pa kin he niye.

39 Qa niye onihakam wokiconze wan tokeca nihukutu inajin kta; qa wokiconze tokeca wan wiciyamni kin he mazazi; he qe maka kin ocowasin iwankam ounye kta.

40 Unkan wokiconze itopa kin he mazasapa iyecen wašake kta: mazasapa taku owasin kamdemdeca qa ohiya nakaeš: qa mazasapa dena iyuhpa kamdemdece cin he iyecen iš eya wakamdemdece ca wakamdumdu kta.

41 Qa nakun siha qa siyukaza kin onspaspa maka upsija kin heca, qa onspaspa mazasapa wandake ciqon, wokiconze kin he kiyušpapi kta: tuka mazasapa wowašake kin en un kta, mazasapa maka upsija kici icicahiyapi wandake nakaeš.

42 Qa šiha šipinkpa kin hena hanke mazasapa qa hanke maka heca, he iyecen wokiconze kin he hanke šuta kta qa hanke wankadan kta.

43 Nakun mazasapa maka upšija kici icicahiyapi wandake ciqon, hena wicašta akantu oicaje kin kici icicahi iciyapi kta; tuka en askamkiciyapi kte šni, mazasapa maka upšija kin kici tanyan icicahiyapi šni nakaeš.

44 Unkan wicaštayatapi kin dena taanpetu kin en, Mahpiya Wakantanka tawa kin he wokiconze wan tohinni ihangyapi kte šni kin heca yuwankan ehde kta: unkan wokiconze kin he oyate tokeca aihpewicayapi kte šni: wokiconze kin owasin kamdumdu kta qa yutakuni kte šni; tuka he qe owihanke wanin un kta.

45 Qa nakun inyan wan he kin etanhan nape codan baspapi wandaka, qa he mazasapa kin, mazasa kin, maka kin, mazaska kin, qa mazaskazi kin hena kamdemdeca; hecen Wakantanka tanka kin he taku tokata u kte cin hena wicaštayatapi kin sdonyekiya: unkan wowihanmde kin he wowicake, qa ieska yaotaninpi kin he wacinyepica ce.

46 Hehan Nebuchadnezzar wicaštayatapi kin ite makipusdiya ehpeiciye ca Daniel ohoda, qa wošna wan womna waštemna iyahna wakiyusna wicaši.

47 Wicaštayatapi kin Daniel ayupte ca heya; Wowicake tawa taku he, Wakantanka nitawapi kin he taku wakan ehna Wakantanka hee, qa wicaštayatapi ehna Itancan, qa woinahbe yuotanin ece kin heca, woinahbe kin de yaotanin oyakihi nakaeš.

48 Hehan wicaštayatapi kin Daniel wicašta tanka kaga, qa taku wicaqupi tanka ota qu, qa Babylon makoce kin ocowasin en itancan kin, qa Babylon en ksapapi kin iyuhpa iye iyotan tanka.

49 Hehan Daniel wicaštayatapi kin kida, unkan Šadrach, Mešach qa Abed-nego Babel makoce kin en taku eeonpi kin awanyag wicaši. Tuka Daniel wicaštayatapi tatiyopa kin en un.

DANIEL TAWOWAPI KIN WICOWOYAKE 3.

1 Nebuchadnezzar wicaštayatapi kin mazaskazi wakagapi wan ka a, obosdatu kin he wicišpa wikcemna šakpe qa ohdakinyan wicišpa šakpe: Babylon makoce Dura makouidaya kin ohna bosdan ekihde.

2 Hehan Nebuchadnezzar wicaštayatapi kin he, wicašta ihdawapi kin, wicašta itancanpi kin, qa akicita tancanpi kin, wayaco itancanpi kin, mazaska awanyakapi kin, woope aiapi kin, woope sdonyapi qa makoce kin en itancanpi kin iyuhpa yuwitaya hiyuwicakiyapi kta ye wicaši; waka api Nebuchadnezzar wicaštayatapi kin bosdan ekihde kin yuwakanpi kta ekta upi kta.

3 Hohan wicašta ihdawapi kin, wicašta itancanpi kin, qa akicita tancanpi, wayaco itancanpi kin, mazaska awauyakapi kin, woope aiapi kin, woope sdonyapi, qa makoce kin en wicašta itancanpi kin owasin witaya mniciyapi, wakagapi Nebuchadnezzar wicaštayatapi bosdan ekihdo kin yuwakanpi kta ekta: unkan hena Nebuchadnezzar wakagapi bosdan ekihde kin he itokani inajinpi.

4 Hehan eyanpaha wan wasagya eyanpaha, Wicašta, oyate, qa iapi yaunpi kin, niyepi kaken econ nišipi ce:

5 Tohan hekinškayapi he yajopi, cotanka, candowankiyapi, sakbut, cancega, mazayahotonpi, qa dowankiyapi ocaje owasin, hena ho kin nayahonpi kinhan, hehan mazaskazi wakagapi Nebuchadnezzar wicaštayatapi bosdan ekihde kin he en makata ehpeniciyapi qa ohoyadapi kta.

6 Qa tuwe makata ehpeiciye šni qa ohoda šni hehantudan hin peta ide oceti wan cokaya ehpeyapi kta ce.

7 Heon etanhan hehantudan, oyate kin iyuhpa hekinškayapi he yajopi, cotanka, candowankiyapi, sakbut, cancega, mazayahotonpi, qa dowankiyapi ocaje owasin, hena ho kin nahonpi qehan, wicašta iyuhpa, oyate kin, qa iapi kin hena makata ehpeiciyapi, qa mazaskazi wakagapi Nebuchadnezzar wicaštayatapi bosdan ekihde kin he ohodapi.

8 Tuka hehan Chaleadni wanjikji kiyadan upi qa Judah wicašta kin wiyawicaonpapi.

9 Hena woyakapi qa Nebuchadnezzar wicaštayatapi kin heciyapi; Wicaštayatapi, ohinniyan ni un nunwe.

10 Niye, wicaštayatapi, wokonze wan yakaga, wicašta owasin hekinškayapia ho yajopi, cotanka, candowankiyapi, sakbut, cancega, mazayahotonpi qa dowankiyapi ocaje owasin hcna ho kin naJion kinhan, makata ehpeiciye ca mazaskazi wakagapi kin ohoda kta:

11 Qa tuwe makata ehpeiciye šni qa ohoda šni kinhan peta ide oceti wan cokaya iyohpeyapi kta ce.

12 Judah wicašta wanjikji Babylon en wicohan awanyagwicayakiya, Šadrach, Mešach, qa Abed-nego; wicaštayatapi, wicašta dena en eniwacinpi šni: taku wakanpi nitawa kin en wowidagiciyapi šni, qa mazaskazi wakagapi bosdan eyehde kin he ohodapi šni ece.

13 Hehan Nebuchadnezzar sinhda qa canteptanyan on Šadrach, Mešach qa Abed-nego auwicaši. Hecen wicašta kin dena wicaštayatapi kin itokam awicahipi.

14 Nebuchadnezzar ie ca hewicakiya; He wicakapi he, Šadrach, Mešach, qa Abed-nego, taku wakanpi mitawa kin hena en wowidašniciyapi šni, qa mazaskazi wakagapi bosdan ewehde kin he ohoyadapi šni he?

15 Wanna wiyeya yaunpi kinhan, tohantu hekinškayapi he yajopi, cotanka,candowankiyapi, sakbut, cancega, mazayahotonpi qa dowankiyapi ecaje owasin ho kin nayahonpi, hehan makata ehpeniciyapi qa wakagapi wakage cin he ohoyadapi kta: Tuka ohoyadapi šni kinhan, wihiyayedan oape kin he en peta ide oceti wan cokaya iyohpeniyanpi kta: qa Wakantanka tukte e he minape etanhan eniyakupi kta he?

16 Šadrach, Mešach, qa Abed-nego waayuptapi qa wicaštayatapi kin heciyapi; Nebuchadnezzar, wicoie kin dc on unkaniyuptapi kta iyccece šni.

17 He hecetu kinhan, Wakantanka unkitawapi, en wowidagiciya unyakonpi kin he peta ide oceti kin etanhan eunyakupi kta okihi, qa eqe, wicaštayatapi, ninape etanhan eunyakupi kta.

18 Tuka hecon ni ešta, taku wakanpi nitawa en wowidagunkiciyapi kte šni, qa mazaskazi wakagapi bosdan eyehde kin he ohoundapi kte šni, wicaštayatapi, he sdonya wo.

19 Hehan Nebuchadnezzar wocanteptanye on ojudan, qa Šadrach, Mešach, qa Abed-nego on ite tokeca hinhda: ie ca oceti kin kanyapi wanyakapi ecee qon isanpa šakowin akihde kanye wicaši:

20 Qa iye taakicita obe kin wicašta iyotan wašakapi kin, Šadrach, Mešach, qa Abed-nego pawicahtapi kta, peta ide oceti kin en iyohpewicayapi kta, kewicakiya.

21 Hehan wicašta kin bona akan unpi tawapi, taonhdorida, tasina koya, qa wokoyake tokeca ecehnana pawicahtapi, qa peta ide oceti kin cokaya iyohpewicayapi.

22 Heon etanhan wicaštayatapi oie kin wainahni, qa oceti kin nina kata hinca, heon tona Šadrach, Mešach, qa Abed-nego iwicacupi qon wicašta kin hena peta ide kin wicakte.

23 Unkan dena wicašta yamni, Šadrach, Mešach, qa Abednego pawicahtapi ecen peta ide oceti kin cokaya hinhpayapi.

24 Hehan Nebuchadnezzar wicaštayatapi kin nina yusinyaya, qa ohankoya najin hiyaya ie ca wicašta waaiewicakiye cin hena hewicakiya; Wicašta yamni pahtapi peta cokaya iyohpewicunyanpi šni he? Hena waayuptapi qa wicaštayatapi kin heciyapi; Wicaštayatapi, he hecetu ce.

25 Iye waayupte ca heya; Inyun, wicašta topa kaške šni unpi peta cokaya manipi wanmdaka, qa tuktedan kiunniyanpi šni: unkan itopa owanyake kin he Wakantanka Cinhintku kin iyececa ce, eya.

26 Hehan Nebuchadnezzar peta ide oceti tiyopa kin ikiyedan u; ie ca heya: Šadrach, Mešach qa Abednego, Wakantanka Iyotan Wankan taokiye; niye tankan u po,qakuwapo. Hehan Šadrach, Mešach qa Abednego peta kin cokaya tanhan hdicupi.

27 Unkan wicašta ihdawapi, wicašta itancanpi, qa akicita tancanpi, qa wicaštayatapi woope aiewicakiye cin hena witaya unpi wicašta kin dena wanwicayakapi, tancanpi en peta takudan okihi šni, qa paha wanjidan gu šni, qa akan unpi tawapi kin yutokeca šni, qa iyepi akan peta gumna kin iwicayaye šni.

28 Nebuchadnezzar ie ca heya; Šadrach, Mešach, qa Abed-nego Wakantanka tawapi kin he yawaštepi nunwe; eqe taohnihde wakan kin u ši, qa wowidagwicaya wacinyanpi kin hena wicaštayatapi oie kin yutokecapi, qa iye Wakantanka tawapi ecedan en wowidagieiyapi, qa taku wakan tokeca ohodapi kte šni e tancan kpaganpi kin hena ewicahdaku.

29 Heon etanhan wokonze wan wakaga, Oyate owasin, wicašta qa iapi kin, Šadrach, Mešach, qa Abed-nego Wakantanka tawapi kin on tuwe taku šica eye cinhan, he kicakšakšapi kta, qa tipi tawapi kin ocesdi paha kagapi kta: taku wakan tokeca decen waehdaku okihi kta wanica nakaeš.

30 Hehan wicaštayatapi kin Šadrach, Mešach, qa Abed-nego, Babylon makoce kin en itancan wicakaga.

DANIEL TAWOWAPI KIN WICOWOYAKE 4.

1 Nebuchadnezzar wicaštayatapi kin, wicašta owasin, oyate qa iapi maka kin ocowasin en ounyanpi kin, Wookiye niciyuotapi nunwe.

2 Wowakta wowapetokeca ko Wakantanka wankan ecamicon kin hena nidaotanin kta iyomakin.

3 Wowakta tawa kin hena tanka! qa wowapetokeca tawa kin hena wawokihi wašake! wokiconze tawa kin he wokiconze owihanke wanica, qa wicaštayatapi un kin he wicoicage qa wicoicage hehanyan.

4 Nebuchadnezzar miye wati ohna owanji manka,qa tipi wašte mitawa ohna icah amayan.

5 Wowihanmde wan on kopewahda kin he wanmdaka, qa mitowinja akan mitawacin qa mapa towanyake kin hena cancanmakiya.

6 Heon etanhan wokonze wan wakaga, Babylon en wicašta ksapa iyuhpa mitokam awicaupi kta, wowihanmde ieska yaotaninpi kin omiciyakapi kta heon.

7 Hehan wicašta ksapapi kin, wicanhpi iwanyakapi kin, Chaldeani, qa wapiyapi kin hena en hiyupi. Unkan hena wicitokam wowihanmde kin owahdaka; tuka ieska yaotaninpi kin he omiciyakapi šni.

8 Tuka unhanketa Daniel mitokam hiyu, he nakun Beltešazzar eciyapi, taku wakan mitawa caje kin iyececa, he taku wakanpi wakan hinca taniya kin en un: Unkan he itokam wowihanmde kin owahdaka:

9 Beltešazzar, wicašta ksapapi itancan, taku wakanpi wakan hinca taniya kin on niun sdonwaya, qa taku woinahbe takudan nagiyeniye šni, heon wowihanmde wowanyake wanmdake cin hena omiciyaka wo, qa nakun ieska yaotaninpi kin.

10 Mitowinja akan mapa towanyake kin hena kaketu; Opahta manka, unkan iho, maka kin cokaya can wan, qa obosdatu kin he tanka hinca.

11 Can kin he tanka icage ca wašaka aya, qa ohanske cin mahpiya iyapato, qa wanyakapi kin maka ocowasin ihanke kin hehanyan:

12 Ape kin hena owanyag wašte, qa waskuyeca tawa kin ota hinca, qa ohna taku owasin woyute wicakiciun: he ihukuya tinta woteca kin ohanzi yubapi, qa mahpiya okinyanpi kin hena adetka kin ehna tipi, qa taku cehpi owasin hetanhan woyute tonpi ece.

13 Mitowinja akan mapa towanyake kin en, opahta manka, unkan iho, waawanyake wan qa taku wakan wan mahpiya kin eciyatanhan kun u:

14 He wasagya eyanpaha qa kaken eya; Can kin kawanka po, qa taadetka kin kakšakša po, ape kin kašnašna po, qa tawaskuyeca kin kahnahna po; woteca kin ihukuya tanhan yapi kte, qa taku kinyanpi kin adetka kin etanhan.

15 Tuka canpaksa hutkan kin he maka kin en ayuštan po, qa mazasapa mazasa ko iyuskite wan kici, tinta wato wankadan kin ehna: nakun mahpiya cu kin on spayeyapi kta, qa taku tawa kte cin he maka wato kin en woteca kin om un kta:

16 lye cante kin wicacante etanhan yutokecapi kta, qa woteca cante kin qupi kta; qa omaka dakowin akan iyaye kta.

17 Wokunze kin de waawanyakapi yacopi kin eciyatanhan, qa taku kin de tona wakanpi oie kin etanhan: tona ni unpi kin Iyotan Wankan un kin he wicašta tokiconzepi kin en wicaštayatapi ee e sdonyapi kta, qa token cin eca wicaqu ece, qa wicašta on ika heca yuhekiya ece.

18 Wowihanmde kin de miye, wicaštayatapi kin, wanmdaka. Hehan niye, Beltešazzar, ieska yaotaninpi kin oyaka wo: Mitokiconze kin en tona ksapapi kin iyuhpa ieska yaotaninpi kin omiciyaka okihipi šni: tuka niye oyakihi, taku wakanpi wakan hinca Taniya kin en niun nakaeš.

19 Hehan Daniel, he nakun Beltešazzar eciyapi, wihiyayedan oape wanjidan yušinyaya, qa tawacin en ihniyanyan. Wicaštayatapi kin ie ca heya; Beltešazzar, wowihanmde qa ieska yaotaninpi kin unmana yusinycniye šni nunwe. Beltešazzar wuayupte ca heya; Itancan mitawa, wowihanmde kin he tona šicenidapi, qa ieska yaotaninpi kin he tona tokaniyanpi kin en wicahi nunwe.

20 Can wandake ciqon, tanka ica e ca wašaka aya, ohanske kin mahpiya ekta iyahde, qa maka ocowasin ihanke kin hehanyan wanyakapi;

21 Ape kin owanyag waštešte, qa tawaskuyeca ota hinca, qa taku owasin en woyute wicakiciyanka: ihukuya tinta woteca kin ounyanpi, qa adetka kin mahpiya okinyanpi kin en tipi qon;

22 Wicaštayatapi, he niye, tanka inicajra qa wašaka aniyan; nitanka kin he icajie ca mahpiya ekta iyahde, qa wicaštayatapi yaun kin he maka ihanke kin ekta.

23 Qa nakun wicaštayatapi kin waawanyake wan qa wanji wakan kin mahpiya eciyatanhan kun u wanyaka, qa he hecen eya; Can kin kawankapi qa ihangya po; tuka canpakša hutkan kin he maka kin en kpatan po, qa mazasapa mazasa ko iyuskite wan ahna, tinta wato wankadan kin ehna; qa mahpiya cu kin on spayeyapi kta, qa taku tawa kte cin he tinta woteca kin om un kta, omaka šakowin akan iyaye kta hehanyan ce:

24 Wicaštayatapi, ieska oyakapi kin he dee, qa Iyotan Wankan un tawokonze, itancan mitawa wicaštayatapi kin akan u kte ciqon he dee:

25 Wicašta etanhan kaham iyeniyanpi kta, qa tinta woteca kin om ounyaye kta. qa tatanka iyecen wato ece yunniciyapi kta, qa mahpiya cu kin on spayeniyanpi kta, qa waniyetu šakowin akan iniyaye kta, ecen Iyotan Wankan un kin wicašta tokiconzepi kin en wicaštayatapi un, qa token cin eca wicaqu ecee sdonyaye kta ce.

26 Unkan nakun canpaksa hutkan kin he kpatanpi kta keyapi, hecen nitokiconze kin wicakeyahan niciyanke kta, tohan mahpiya kin he Itancan yanka e sdonyaye cinhan.

27 Heon etanhan, wicaštayatapi, wowahokonkiye mitawa kin iyonicipi nunwe, qa woowotanna on wayahtani etanhan ihduspa; wo, qa taku šica ecanon kin etanj han, wahpanicapi onsiwicakidapi kin on; okinni woozikiye nilawa niciyuhanskapi kta naceca ce.

28 Taku kin de ocowasin Nebuchadnezzar wicaštayatapi kin i en u.

29 Wi akenonpa ihuniyanpi hehan Babylon wokiconze tipi wašte kin uhiia mani un.

30 Wicaštayatapi kin ie ca heya; Mitowašake wawokihi kin on, qa mitowitan yuonihanpi on Babylon tanka waka; a, mitokiconze tipi kin he dee šni he? eya.

31 Wicoie kin he hinyahin wicaštayatapi i kin ohna yanka icunhan, wicaho wan mahpiya eciyatanhan hiyu; Nebuchadnezzar wicaštayatapi, niye heniciyapi ce; Wokiconze kin he aniyuštan;

32 Unkan wicašta etanhan kaham iyeniyanpi kta, qa tinta woteca kin om ounyaye kta: tatanka iyecen wato ece yunniciyapi kta, qa waniyetu šakowin akan iniyaye kta, ecen Iyotan Wankan un kin wicašta tokiconzepi kin en wicaštayatapi un,qa tuwe cin eca qu ece e sdonyaye kta ce.

33 Wihiyayedan oape kin hee en wicoie kin he Nebuchadnezzar kiciyuštanpi: Unkan wicašta etanhan kaham iyeyapi, qa tutanka iyecen peji yuta, qa iye tancan kin mahpiya cu on spaya, ecen hin kin wanindi tawa iyececa icaga, qa sake zitkadan tawa iyececa.

34 Unkan anpetu kin hena hena keca hehan, Nebuchadnezzar miye mahpiya ekta išta yuwankan iwekcu, unkan wowakahnige ciqon he ake en mahdi, qa Iyotan Wankan un kin he mdawašte, qa tuwe ohinniyan ni un kin he mdatan qa mdaonihan, eqe wicaštayatapi un kin wicaštayatapi unpi heca owihanke wanica, qa tokiconze kin he wicoicage qa wicoicaiye hehanyan:

35 Qa maka akan ounyanpi kin owasin takušni wicayawa: qa mahpiya ozuye kin en iye tawacin kin eciyatanhan econece,qa maka akan ounyanpi kin ehna: qa tuwedan nape pakam iyeya, qa, Taku ecanon he? eciye kta okihi šni.

36 Hehantudan hin wowakahnibe ciqon he en mahdi, qa mitokiconze wowitan on mitoyuonihan qa mitohnake wašte kin ake en mahdi: unkan woope aiewicawakiye ciqon hena, qa wicašta itancan mitawa qon hena omakidepi; hecen mitokiconze kin en sutaya mihduštanpi, qa wowinihan oiyokipi hinca en akihde mayanpi.

37 Nebuchadnezzar miye, wanna Mahpiya Wicaštayatapi tawa kin he mdatan, qa mdatanka, qa mdaonihan, iye tohan kin owasin wowicake, qa towiyukcan kin woyuecetu: qa tona wahanicidaya manipi kin hena yuhukun iyewicaye kta okihi ece.

DANIEL TAWOWAPI KIN WICOWOYAKE 5.

1 Belšazzar wicaštayatapi kin wohanpi tanka wan wicašta ihdawa kektopawinje wicayuhe cin wicakica u, qa kektopawinge kin hena wicitokam miniša yatkan.

2 Belšazzar miniša yatkan uta icunhan, mazaskazi qa mazaska wakšica, iye tunkankišitku Nebuchadnezzar Jerusalem en tipi wakan etanhan ahdiyaku qon hena en au wicaši: hecen wicaštayatapi kin iye, qa wicašta ihdawa wicayuhe, tawicupi qa winohinca wicayuhe cin hena om, etanhan wayatkanpi kta.

3 Hehan mazaskazi wakšica Wakantanka ti tipi wakan Jerusalem ekta yanke cin etanhan eyakupi qon hena ahipi: Unkan wicaštayatapi iye, qa wicašta ihdawa wicayuhe cin, tawicupi qa winohinca wicayuhe cin hena etanhanhan wayatkanpi.

4 Miniša yatkanpi qa taku wakanpi mazaskazi, qa mazaska, mazasa, mazasapa, can qa inyan on kagapi kin hena yatanpi.

5 Wihiyayedan oape kin hee hinca en wicanape napsukaza kin hiyu, qa petijanjan ihupa iyotakons wicaštayatapi ti kin en tipi unnaptanyan apušpapi kin akan wowa: unkan nape inkpa wowa kin he wicaštayatapi kin wanyaka.

6 Hehan wicaštayatapi itohnake wašte kin tokeca hinhda, qa tawacin kin yušinyeiciya, qa nite ipiyake kin kiyuškapi, qa hupahu iciyapapi.

7 Wicaštayatapi kin nina pan, wicanhpi iwanyakapi, Chaldeani qa wapiya econpi kin hena en awicaupi kta. Wicaštayatapi kin ie ca Babylon en ksapapi kin hewicakiya; Tuwe kašta wowapi kin de yawa, qa ieska yaotaninpi kin omakiyake cinhan, wokoyake duta koyake kta, qa mazaskazi wanapin wan napin kiye kta, qa wokiconze kin en wicašta ihdawa wiciyarnni ee kta ce.

8 Hehan wicašta ksapa wicaštayatapi wicayuhe cin iyuhpa en hipi; tuka wowapi kin he yawa okihipi šni, qa ieska yaotaninpi kin wicaštayatapi kin sdonyckiyapi šni.

9 Hehan Belšazzar wicaštayatapi kin nina yušinyeyapi,qa itohnake tokeca hinhda, qa wicašta ihdawa wicayuhe cin hena iš eya yušinyayapi.

10 Wicaštayatapi qa wicašta ihdawa wicayuhe cin oiepi kin on wicaštayatapi winohinca kin he woyatke tipi kin en tin hiyu: Wicaštayatapi winohinca kin ie caheya; Wicaštayatapi ohinniyan ni un nunwe: nitawacin kin yušinyeniciye kte šni, qa nitohnake tokeca hinhda šni nunwe.

11 Nitokiconze kin en wicašta wan taku wakanpi wakan hinca taniya kin en un: qa nitunkanši taanpetu qon en, wosdonye, qa wookahni e, qa wokšape, taku wakan toksape kin iyececa, en un iyeyapi qon; he qe niate Nebuchadnezzar wicaštayatapi kin, wicaštayatapi niate he wicašta ksapapi, wicanhpi iwanyakapi, Chaldeani wapiyapi kin en itancan kaga:

12 Unkan woniya wan iyotan wašte, qa wosdonye, qa wookahnige,

wowihanmde yaotaninpi, qa wicoie tehika iyukcanpi, qa woiyakaške yakcapi kin hena Daniel eqe en iyeyapi, heon etanhan wicaštayatapi kin he Beltešazzar eya caston. Wanna Daniel kicopi kte, kinhan ieska yaotaninpi kin oyake kta ce, eya.

13 Hehan Daniel wicaštayatapi kin itokam ahipi. Wicaštayatapi kin ie ca Daniel heciya; Judah wicašta wayaka unpi cinca, miate wicaštayatapi kin Judah makoce kin etanhan awicahdi qon hetanhan Daniel he niye he?

14 Niye on nawahon, taku wakanpi taniya kin en niun, wosdonye. qa wookahnige, qa wokšape wašte hinca en niun iyeyapi keyapi:

15 Unkan nakaha ksapapi kin, wicanhpi iwanyakapi kin hena mitokam awicahipi, wowapi kin de yawapi kta, qa ieska yaotaninpi kin omakiyakapi kta e heon: tuka wicoie kin he ieska yaotaninpi kin oyaka okihipi šni:

16 Tuka niye qe ieska yaotaninpi kin odake kta, qa woiyakaške wicoie dakca kta oyakihi keyapi nawahon. Wanna wowapi kin de dawa, qa ieska yaotaninpi kin omayakidake kta oyakihi kinhan, wokoyabe duta kodake kta, qa mazaskazi wanapin wan napin niciyapi kta, qa wokiconze km en wicašta ihdawa wiciyanini yaun kta ce.

17 Hehan Daniel waayupte, qa wicaštayatapi kin itokain heya; Taku niayaqu kte cin hena niye yahdube kta, qa woiyopeye nitawa tokan wicayaqu kta; tuka wowapi kin he wicaštayatapi kin weciyawa kta, qa ieska yaotaninpi kin sdonyewakiye kta.

18 Wicaštayatapi niye, Wakantanka Iyotan Wankan un kin he wokiconze, qa wowašake, qa wowitan, qa woyuonihan niate Nebuchadnezzar qu:

19 Qa wowašake qu kin heon wicašta owasin, oyate qa iapi kin hena itokain cancanpi qa inihanpi: tuwe cin eca kte ece, qa tuwe cin eca nikiya ece: tune cin eca yuwankan ehde, qa tuwe cin eca kun ehpeya ece.

20 Tuka cante wankan iyeiciya, qa tawacin wahanicidaye kta e ihdušuta qehan wicaštayatapi toiyotanke kin etanhan kin ukiyapi, qa towitan kin he ekiciyakupi:

21 Qa wicašta cinca kin etanhan kiiham iyeyapi; qa iye cante kin woteca iyececa kagapi, qa šonšonna itu unpi kin om ounyan: tatanka wosdohanpi iyecen peji yunkiyapi, qa tancan kin mahpiya cu kin on spayekiyapi, ecen Wakantanka Iyotan Wankan un kin he wicašta tokiconze kin ohna wicaštayatapi yar.ka sdonya, qa tuwe cin eca he en ounyekiya ece.

22 Qa niye Belšazzar, cincaniyan, de ocowasin sdonyaya qeyas, nicante yahduwahhadan šni:

23 Tuka Mahpiya Itancan kin itokain wankan iyeniciya: qa iye tipi kin etanhan wakšica kin hena nitokam ahipi, qa niye, qa wicašta ihdawa wicaduha, nitawinpi qa winohinca wicaduhe cin hena etanhan miniša datkanpi: qa taku wakanpi mazaska qa mazaa skazi, mazasa, mazasapa, can qa inyan heca, wawanyake šni qa wanahon šni, qa wasdonye šni kin hena daonihan; tuka Wakantanka nape ohna nitaniya yanka,qa nitacanku iyuhpa niciyuhe cin hee duonihan šni:

24 Hehan iye itokapatanhan nape inkpa kin hiyuyapi; qa wowapi kin de owapi.

25 Unkan wowapi owapi qon he dee; MENE, MENE, TEKEL, UPHARSIN.

26 Qa wicoie ieska yaotanihpl kin he dee; MENE; Wakantanka nitokiconze kin niciyawa qa ihunnikiya.

27 TEKEL; Aspeyetonpi kin on tke iniyutapi, qa iyotpani niyawapi.

28 PERES; Nitokiconze kin he kiyuspapi, qa Media, Persi kici wicaqupi.

29 Hehan Belšazzar econwicaši, unkan Daniel wokoyake duta koyagyapi, qa mazaskazi wanapin wan napinkiyapi, qa on eyanpahapi, wokiconze kin en wicašta wiciyamni un kta ce.

30 Hanyetu kin he en Belšazzar Chaldeani en wicaštayatapi kin be ktepi.

31 Unkan Darius Media kin he wokiconze kin icu; wanna waniyetu wikcemna šakpe sanpa nonpa ecetu.