Wicoicage (Genesis) 36 - 40

WICOICAGE WICOWOYAKE 36.

1 Esau, Edom hee, wicowazi tawa kin dee.

2 Esau Caanan cunwintku kin etanhan winohinca nom wicayuza, Elon Heti kin cunwintku Adah, qa Zibeon Hivi kin cunwintku Anah he cunwintku Aholibama henioza.

3 Qa Išmael cunwintku Bašemath, Nebajoth tankšitku he nakun yuza.

4 Unkan Adah he Esau kiciton Eliphaz hee: qa Bašemath he Reuel ton.

5 Qa Aholibama he Jeuš, qa Jaalam, qa Korah, wicaton. Esau cinkšiwicaye cin, Caanan makoce kin en wicatonpi kin hena eepi.

6 Hehan Esau iye tawicu kin iwicacu, qa cincawicaye cin wica winyan ko, qa tiyohnaka tawa wicanagi owasin, qa tawanuyanpi taku yuhe cin ko owasin, taku tawa Caanan makoce en ton kin iyuhpa, qa sunkaku Jacob ltohnake kin etanhan ya makoce tokeca wan ekta. '

7 Taku yuhapi kin he odota, heon witaya iyotankapi kin okitpanipi, wanuyanpi ota yuhapi km heon, makoce kin en ounyanpi kte cin iyowinwicakiye

8 Unkan Esau Seir he kin en iyotanka, Esau he Edom eciyapi.

9 Qa Seir he kin en Edom oyate ateyapi Esa wicoicage kin dee.

10 Esa cinkšiwicaye cin cajepi kin dena ee, Eliphaz Esau tawicu Adah he cinhintku, qa Reuel Esau tawicu Bašemath he cinhintku.

11 Unkan Eliphaz cinkšiwicaye cin dena eepi; Teman, Omar, Zepho, Gatam, qa Kenaz.

12 Unkan Eliphaz Esau cinhintku Timna nanmana yuze cin he Amalek Eliphaz kiciton. Esau tawicu Adah cinkšiwicaye cin hena eepi.

13 Unkan Reuel cinkšiwicaye cin dena eepi; Nahath, qa Zerah, qa Šammah, qa Mizzah. Esau tawicu Bašemathh cinkšiwicaye cin hena eepi.

14 Unkan Aholibamah Zibeon cunwintku Ana he cunwintku kin Esau yuza: unkan he Esau cinca kiciton kin dena eepi; Jeuš, qa Jaalam, qa Korah.

15 Esau cinca kin itancan unpi kin dena eepi. Esau cinhintku tokapa Eliphaz cinkšiwicaye cin, Teman itancan, Omar itancan, Zepho itancan, Kenaz itancan,

16 Korah itancan, Gatam itancan, Amalek itancan. Edom makoce kin en Eliphaz itancanyan unpi kin hena eepi, qa hena Adah cinkšiwicaya.

17 Unkan Esau cinhintku Reuel cinca kin dena eepi: Nahath itancan, Zerah itancan, Šammah itancan, Mizzah itancan, Reuel itancanyan unpi kin hena eepi, Edom makoce kin en, Esau tawicu Bašemath hena cinkšiwacaya.

18 Unkan Esau tawicu Aholibamah he cinca kin dena eepi; Jeuš itancan, Jaalam itancan, Korah itancan, Anah cunwintku Aholibamah Esau yuze cin itancan ton kin hena eepi.

19 Esau, Edom hee, cinkšiwicaye cin hena eepi, qa itancan yuhapi kin heepi.

20 Makoce kin he en iyotankapi qon Seir Hori kin cinca dena eepi; Lotan, qa Šobal, qa Zibeon, qa Anah,

21 Qa Dišon, qa Ezer, qa Dišan: Sehir cinkšiwicaye cin, Edom tamakoce kin en, Hori kin itancanyan unpi kin hena eepi.

22 Unkan Lotan cinkšiwicaye cin Hori, qa Heman, qa Lotan tawinontin kin Timna ee.

23 Unkan Šobal cinkšiwicaye cin dena eepi; Alvan, qa Manahath, qa Ebal, qa Šepho, qa Onam.

24 Unkan Zibeon cinkšiwicaye cin dena eepi, Ajah qa Anah; Anah kin de atkuku Zibeon tasunka šonšonna wihan wicakiye cehan hopuza en wakoniya kata iyeya.

25 Anah cinhintku kin Dišon hee, qa Aholibamah Anah cunwinku kin ee.

26 Qa Dišon cinkšiwicaye cin dena eepi, Hemdan qa Ešban, qa Ithran, qa Cheran.

27 Unkan Ezer cinkšiwicaye cin dena eepi, Bilhan, qa Zaavan, qa Akan.

28 Dišon cinkšiwicaye cin dena eepi, Uz qa Aran.

29 Hori kin itancanyan unpi kin dena eepi; Lotan itancan, Šobal itancan, Zibeon itancan, Anah itancan,

30 Dišon itancan, Ezer itancan, Dšian itancan; Hori kin itancanyan unpi kin, token Seir makoce kin en itancan wicayawapi kin hena eepi.

31 Israel cinca kin nahahin wicaštayatapi wanica, Edom makoce kin wicaštayatapi wicayawapi kin dena eepi.

32 Beor cinhintku Bela Edom en wicayuhe cin, qa otonwe tawa Dinhabah eciyapi.

33 Qa Bela ta, unkan hee kiya Zerah cinhintku Jobab Bozra etanhan wicaštayatapi yawapi.

34 Qa Jobab ta, unkan hee kiya Hušam Teman makoce kin etanhan, wicaštayatapi yawapi

35 Qa Hušam ta, unkan hee kiya Hadad Bedad cinhintku wicaštayatapi yawapi. lye Midian oyate kin wicakastaka, Moab tinta kin ohna qa otonwe en ti kin Avith eciyapi.

36 Qa Hadad ta, unkan hee kiya Samlah, Masrekah etanhan, wicaštayatapi yawapi.

37 Qa Samlah ta, unkan hee kiya Saul, Rehoboth watpa kin ohna wanke cin he etanhan, wicastayatapi yawapi.

38 Qa Saul ta, unkan hee kiya Baal-hanan Achbor he cinhintku wicaštayatapi yawapi.

39 Qa Baal-hanan Achbor cinhintku kin ta, unkan hee kiya Hadar wicaštayatapi yawapi. Otonwe tawa Pau eciyapi, qa tawicu kin Mehetabel eciyapi, Matred cunwintku Mezahab cunwintku.

40 Esau itancan wicayawapi kin hecen ewicakiyapi, wicowazipi kin iyececa, qa tonwanyanpi kin iyecen cajewicayatapi; Timna itancan, Alvah itancan, Jetheth itancan,

41 Aholibamah itancan, Elah itancan, Pinon itancan,

42 Kenaz itancan, Teman itancan, Mibzar itancan,

42 Magdiel itancan, Iram itancan: Edom itancan wicayawapi kin hena eepi, tonwanyanpi kin iyecen, tamakocepi kin en; Edom Esau ate yapi.

WICOICAGE WICOWOYAKE 37.

1 Unkan Caanan makoce kin en Jacob atkuku unhdaka un  qon, makoce kin he en Jacob iyotanka.

2 Jacob wicoicage wowapi kin dee, Joseph wanna waniyetu ake šakowin, hehan wanuyanpi wihan wicakiya cinye wicaye cin om, qa Bilhah qa Zilpah napin atkuku wicayuze cin, hena cinksi wicayapi kin om, hokšidan kin un qa taku šica eyapi kin ateyapi kin en ahda.

3 Unkan Israel, cinkšiwicaye cin owasin sam iyeya, Joseph waštekidaka wanna wicahinca ehan kicitonpi kin heon etanhan, qa onhdohda hanska wan Joseph kicaga.

4 Unkan ateyapi kin, cinkšiwicaye cin owasin sam iyeya Joseph waštekidake cin he cincu wanhdakapi, qa wokiya okiyapi kte cin okihipi šni.

5 Unkan Joseph wowihanmde wan ihanmna, qa cincu owicakiyaka; unkan sam iyeya šicekidakapi.

6 Unkan, Ihopo wowihanmde wan iwahanmde cin de nahonpo.

7 Maga ekta aguyapi paunhtapi, unkan inyun pawahte cin bosdan najin hiyaya, unkan payahtapi kin ihdukšan najin hiyaye ca, pawahte cin itokam makata ehpeiciyapi, ewicakiya.

8 Unkan cinyewicaye cin heciyapi, Ehan qon tawaunyayapi kta he? kaeš wowidake unyaduhapi kta he? Qa iyakapeya šicekidakapi, wihanmde ciqon oie ko heon.

9 Unkan ake wowihanmde tokeca wan ihanmde ca, ake cincu kin owicakiyaka. Ake wiwahanmde ca inyun anpetu wi, hanyetu wi, qa wicanhpi ake wanji mitokam makata ehpeiciyapi, ewicakiya.

10 He atkuku cincu ko owicakiyaka; unkan atkuku he iyopekiye ca, Wowihanmde wan iyahanmde cin de taku hwo? Miye qa nihun nicinye ko owasin nitokam makipušdiya ehpeunkiciyapi kta he? eciya.

11 Unkan cincu kin icekinpi, tuka atkuku kin wicoie kin he awakicin un.

12 Hehan cincu kin ateyapi tawanuyanpi kin wihan wicakiyapi kta e Šechem ekta ipi.

13 Unkan Israel Joseph heciya, Nicinye Šechem ekta wawihan kiya unpi šni he? Iho wo hena ekta ye cisi kta ce. Unkan, Ho miye ce, eciya.

14 Unkan, Iho ekta de ca nicinye wanuyanpiko zaniyan yakonpi hecinhan wanhdake ca, hoši makalidi wo, eciya. Unkan Hebron kaksiza kin etanhan iyaye ca Šechem ekta i.

15 Qa tinta onuni; unkan wicasta wan wanyake ca, Den taku ayakita he? eyaiwanga.

16 Unkan, Cinyewicawaye cin awicawakita ce. Ceciye tukten wihan wicakiyapi kin omakiyaka wo, eya.

17 Unkan wicašta qon, Wanna detanhan iyayapi; Dothan ekta unyanpi kta ce, eyapi nawahon ce, eya. Unkan Joseph cinye wicaye cin wicihakam ye ca Dothan en iyewicaya.

18 Unkan tehantanhan wanyakapi qa wicikiyedan u ni kin itokam, nahmana te yapi kta awacinpi.

19 Qa otoiyohi hunka wanjitku kin hekiciyapi, Wanyaka po; wihantndeša kin de wanna u.

20 Ihopo dehan unktepi, qa makohdoka wan ohna ehpeunyanpi kte ca, Wamanica ocin šica wan he temya ce, unkeyapi kinhan, wihanmde ciqon toketu kte cin wanunyakapi kta ce, ekiciyapi.

21 Reuben he nahon qa, napepi kin etanhan ehdaku kta e, Unktepi kte šni, eya.

22 Napepi kin etanhan ehdaku kte ca, atkuku kin en akiyahde kta e Reuben hewicakiya; Weyapi šni po. Woha newoskantuya wanke cin de ohna iyeyapo, tuka ninapepi on apapi šni po.

23 Unkan kaketu, Joseph iye cincunajinpi kin en hi qehan, taonhdohda yušdokapi, ouhdohda hanska un kin hee;

24 Qa Joseph icupi, qa woha wan en iyohpeyapi, tuka woha kin takudan ohnaka šni, mini wanica.

25 Qa aguyapi yutapi kta e I iyotankapi, qa pa yuwankan ikikcupi qa, Išmaeli optaye wan Gilead eciyatanhan u kin wauwicayakapi, camo yuhapi kin taku waštemna canlin pejihuta koya qinpi, Egypta ekta kun yapi kta.

26 Unkan Judah hunka wanjin wicaye cin hewicakiya, De sunka unyanpi unktepi kinhan, we kin naunhmanpi ešta taku unkihdamnapi kta he?

27 Ihopo, Išmaeli kin dena j en wiyopeunyanpi kte. De sunka unyanpi qa kici cehpi unwanjipidan kin heon, nape on unkatapi kte šni, eya. Unkan hunka wanjin wicaye cin anakigoptanpi.

28 Hehan wicašta wopeton hecapi Midiani en hiyayapi. Unkan Joseph yuzapi, qa woha qon etanhan yuwankan ehdakupi, qa mazaska wikcemna nonpa on Joseph wiyopeyapi. Unkan Išmaeli kin Joseph opetonpi, qa Egypta ekta ayapi.

29 Unkan Reuben woha qon ekta hi, unkan Joseph en un šni, heon tawokoyake hdupota,

30 Qa hunkawanjitku kin en wicahdi qa, Hokšidan kin tanin šni  ce, miš toki imdamde kta hwo? ewicakiya.

31 Unkan Joseph taonhdohda qon icupi qa tatokadan mdoka wan ktepi, qa we kin on oputkanpi;

32 Hehan hiwe onhdohda hanske cin ahde šipi qa ateyapi kin kahipi qa heciyapi; De iyeunyanpi ce. Ito de nicinkši onhdohda tawa kaeš tawa šni uman tukte hecetu hecinhan iyukcan wo.

33 Unkan iyekiye ca, Micinkši taonhdohda qon dee. Wamanica šica wan he temya. Ehanqon Joseph wanna yapotapi ce, eya.

34 Unkan Jacob tawokoyake hdupote ca, wasihda qa anpetu ota cinhintku kin akiceya.

35 Unkan cincawicaye cin owasin wica winyan ko magagaye wacinpi, tuka iš magaga yapi cin šni, qa, Iyomakišica ecen micinkši en wicahapi ekta mde kta ce, eye ca cinhintku kin akiceya

36 Unkan Midiani kin Egypta en Joseph wiyopeyapi ; unkan Potiphar Pharoah taakicita tancan opeton.

WICOICAGE WICOWOYAKE 38.

1 Hena owasin hecetu, unkan Judah hunka wanjin wicaye cin etanhan apamahdeye ca, Adullami wicašta wan Hirah eciyapi ekta i;

2 Qa hen Judah Caanani wicašta wan, Šuah eciyapi, he cunwintku wanyake ca yuze ca en i.

3 Unkan ihdušake ca cinca wan ton; unkan Er eya caš kiton.

4 Unkan ake ihdušake ca, cinca wan ton qa, Onan eya caš kiton.

5 Qa ake cinca wan ton qa, Šelah eya caš kiton. He ton kin ehan Chezib en un.

6 Unkan Judah iye cinhintku tokapa kin Er, winohinca wan, Tamar eciyapi yuš kiya.

7 Unkan Er Judah cinhintku

tokapa kin he šica e Jehovah wanyake ca, Jehovah he te ya.

8 Hehan Judah Onan heciya, Nicinye tawicu qon ekta ye ca, he yuza wo. Hecen nicinye cinkši ye kte cin yakage kta ce.

9 Unkan cinca kin he iye tawa yawapi kte šni Onan sdonye, ca cincu cinca kicage kte šni e cincu tawicu qon en i eca, maka kin atpapson.

10 Unkan taku econ kin he šica e Jehovah wanyake ca, he nakun te ya.

11 Hehan Judah iye takosku kin Tamar heciya, Wiwazica niyate ti kin en yanka wo, micinkši Šelah tanka icage cin hehanyan. Okini i nakun cinye wicaye cin iyecen te kta kecin, heon hecen eya. Unkan Tamar kihde ca atkuku ti kin en yanka.

12 He iyohakam anpetu ota, qa Šuah cunwintku Judah tawicu kin wanna ta; unkan Judah wanna magaga yapi, qa Timnath ekta tahin wanuyanpi tawa yusdapi kin ekta itawankanhde ya, iye takodaku Hirah Adullami kin kicica.

13 Unkan Tamar heciyapi, lho nitunkan tahin wanuyanpi tawa hdusda kta e Timnath ekta itawankanhde ya ce, eyapi.

14 Unkan Tamar iyoyakeca wokoyake hdusdoke ca, ite ahahpe on aihdahpe ca, Timnath canku iyahde kin he icahda taninyan iyotanka; Šelah wanna tanka, tuka qupi šni he wanyaka, heon hecon.

15 Judah he wanyaka ite aihdahpe cin heon winohinca wihomni heca kecin;

16 Qa canku kin etanhan ekta i, (qa takosku kin hee kin sdonye šni heon,) Tokin unwanken, eciya. Unkan unwanke ca, taku mayaqu kta he? eya.

17 Unkan, Miš wanuyanpi kin etanhan tatokadan cincadan wan nicahipi waye kta, eya. Unkan, An wicayakiye cin itokam taku inayaqu kinhan, eya.

18 Unkan, He cicu kta e sdonyaye kte cin on etanhan taku e nakaha cicu kta yacin he? eya. Unkan, Maza huhu duhe cin ikan iyahna, qa nakun nitacanhpi ninape ohna duhe cin, eya. Unkan hena qu qa, kici wanka; unkan iye etanhan ihdušaka.

19 Qa najin qa hde ca ite akahpe hdušdoke ca ake wasihda.

20 Unkan Judah taku qu qon, winohinca nape kin etanhan ehdaku kta e, takodaku Adullami kin tatokadan cincadan aye ši, tuka iye winohinca qon iyeye šni.

21 Qa wicašta heciya yakonpi kin iwicawanga; Witkowin canku ohna taninyan iyotanke ciqon tukte e he? eya. Unkan, Tohini witkowin wan deciya yanke šni, eyapi.

22 Unkan ihdainna, qa Judah ekta i qa heciya; Winohinca qon iyewaye šni qa, nakun wicašta heciya yakonpi kin, Witkowin wanjidan tohini deciya un šni ce, eyapi.

23 Unkan, Yuha un nunwe. Tatokadan cincadan kin de aye ciši tuka iyeyaye šni; sanpa unkakite cinhan, okini wowihaha unke kta, Judah eya.

24 Unkan hetanhan wi yamni hehan, Nitakos Tamar wawicihaha econ, qa wanna wawicihaha kin etanhan ihdušaka ce, Judah eciyapi. Unkan, Tankan aupo; huhnage kta ce, eya.

25 He aupi kin icunhan tunkanku hecen wahoya, Tokin maza huhu kin de ikan iyahna, qa canhpi kin de, dena tuwe tawa imiyecidukcan. Tuwe dena tawa ye cin, wicašta kin he etanhan ihdumašaka ce, eya.

26 Unkan Judah hena iyekiye ca, Winohinca kin he ohan owotanna miš hemacece šni; he micinkši Šelah waqu šni kin heon etanhan, eye ca hetanhan icimana winohinca qon sdonye šni.

27 Unkan wanna cinca ton kte cehan, inyun tezi mahen cekpa yukan.

28 Qa tonpi kin icunhan, wanji nape kin qu; unkan cinca tonkiye cin he nape kin icu, qa taku duta iyakaške ca, De tokaheya hinanpe kta ce, eya.

29 Unkan nape kin ehdaku, hehan inyun cincu hiyu. Unkan winohinca kin heya, Token payahdeca; Opahdeca kin de anicipe nunwe, eye ca, Pharez eya cašton.

30 Hehan sunkaku taku duta nape kin akan yuhe cin he hiyu; unkan he Zarah eya cašton.

WICOICAGE WICOWOYAKE 39.

1 Unkan Išmaeli kin Joseph Egypta ekta ayapi. Unkan Potiphar Egypti wicašta kin heca, Pharoah taakicita tancan kin he aupi kin Joseph opewicakicaton.

2 Unkan Jehovah Joseph kici un. Unkan taku econ kin owasin tanyan ihuni ye ca iye yuhe cin Egypti ti kin en yanka.

3 Unkan Jehovah kici un, qa taku nape econ kin owasin Jehovah tanyan yustan kiye cin he yuhe cin wanyaka.

4 Unkan Joseph yuhe cin okiye ca iyokipi ya; unkan tiyohnaka tawa owasin awanyag ši, qa taku tawa owasin nape kin en qu.

5 Unkan tipi tawa, qa taku tawa owasin awanyag ši kin ehantanhan, Jehovah Joseph on etanhan Egypti tiyohnaka kin yawašte, qa taku ti ohnaka, qa tamaga ekta wanke cin ko owasin, Jehovah yawašte kin akan un.

6 Hehan taku tawa owasin Joseph nape kin en ehpeye ca, iš  takudan awakicin šni, aguyapi hdute cin heceedan. Unkan Joseph owanyag wašte, tancan ite ko wašte.

7 Hena owasin hecetu; unkan hehan yuhe cin tawicu kin Joseph atonwe ca, Mici wanka ye, eya.

8 Tuka wicada šni qa yuhe cin tawicu kin heciya; Hiya, mayuhe cin taku tawa owasin minape kin en qu, qa taku tipi ohnaka kin mici un kin iye sdonye šni.

9 De tipi kin ohna tuwedan iyamakapa šni; qa nihihna miye etanhan takudan tpatan šni, niš nana niyuze cin heon etanhan, qa token woahtani tanks kin de ecamon, qa Wakantanka en wawahtani kta he? eya.

10 Unkan winohinca qon anpetu owasin heciya, qa kitan hinca, tuka Joseph anagoptan šni, kici iwanke šni qa ecaca kici un šni.

11 Unkan kaketu, anpetu wan Joseph taku tokon kta e ti mahen i ehan, wicašta hen tipi kin tuwedan timahen un šni.

12 Unkan winohinca qon Joseph tašina kin iyahpaye ca, Mici iwanka ye, eya; tuka šina kin winohinca nape kin etanhan ehpeya našdog hdicu, qa tankan iyaya.  

13 Unkan nape kin etanhan šina ehpeya tankan našdog hdicu kin he winyan kin wanyake ca,

14 Hehan wicašta tona tipi kin ohna tipi kin hena wicakipan, qa hewicakiya, Wanyakape, Hebrew wicašta wan den unkahdipi, unkan wištenunyanpi cin. Manke cin en mahi qa mici wanke kte hinca, tuka ho tankakiya nina wašicahowamda.

15 Nina ho tankakiya wašicahowamde cin he nahon, qa wapan qehan, mitankiyedan šina ehpeya našdog tankan iyaya ce, eya.

16 Qa yuhe cin hdi kte cin hehanyan sina qon, itankiyedan ehnaka.

17 Qa eye ciqon owasin ake ecen okiyaka, Hebrew hokšidan unyakahdipi kin he imaha kta e mikiyadan u.

18 Qa ho tankakiya wašicahowamde cehan mitankiyedan šina ehpeya našdog tankan iyaya ce, eya.

19 Unkan yuhe cin he tawicu oie kin, Hokšidan nitawa kin hecen ecamicon, eciye cin he nahon hehan cantiyahdeya.

20 Qa yuhe cin Joseph icu, qa wicaštayatapi tona kaška wicahnake cin tipi wan en kaška wicahnakapi kin he en Joseph kaška ehnaka. Unkan wicakaška tipi kin en yanka.

21 Unkan Jehovah Joseph kici un qa, towaonšida kin hiyohiya qa wicakaška tipi kin itancan kin he Joseph wacin en yuš kiya.

22 Unkan wicakaška tipi itancan kin, tona wicakaška tipi kin en kaška wicahnakapi kin owasin, Joseph nape kin en qu. Unkan taku hen econpi kin owasin Joseph econ wicakiya.

23 Hecen Jehovah Joseph kiciun, qa taku eeon kin owasin tanyan yustan kiya; heon wicakaška tipi itancan kin, taku Joseph nape en yuhe cin hena takudan awanhdake ni.

WICOICAGE WICOWOYAKE 40.

1 Hena owasin hecetu, unkan hehan Egypta wicaštayatapi tawayatkekiye tawohekiye ko, wicayuhe cin Egypta wicaštayatapi kin en wahtanipi.

2 Hecen Pharoah akicita nom wicayuhe cin canniye wicaya, wayatkekiyapi tancan, qa wohekiyapi tancan kin henioza.

3 Qa akicita tancan tipi tawa wicakaška tipi kin tukten Joseph kaska hnakapi yanke cin he en awanyag wicakiyapi kta e ewicahnaka.

4 Unkan akicita tancan kin he Joseph hena awanwicayag kiya, unkan owicakiya. Unkan anpetu ota kaška hnakapi ecen yukanpi.

5 Hehan Egypta wicaštayatapi tawayatkekiye, tawohekiye ko, wicakaška tipi kin ohna kaska wicahnakapi, hanyetu wanjidan en kinukan wowihanmde ihanmnapi, otoiyohi wihanmnapi kin iyukcanpi kin iyecen.

6 Hehan ihanhanna Joseph en wicahi qa iyokišicapi kin wanwicayaka.

7 Qa Pharoah taakicita wicakaška tipi kin, iye yuhe cin tipi tawa kin he en iye kici unpi wiwicawanga; Tokeca nakaha ite iyoyag dukanpi he? eya.

8 Unkan wowihanmde wiunhanmnapi, tuka tuwe iyukcan kte cin den wanica ce, eciyapi. Unkan wiyukcan kin Wakantanka hee šni he? Wiyahanmnapi kin omakiyakapo, Joseph ewicakiya.

9 Hehan wayatkekiyapi tancan kin wihanmde ciqon ohdaka qa, Wiwahanmde cin en hastanhanka iyuwi wan mitokam han.

10 Qa adetka yamni wiyuwi aicage ca ape wahca ko icah ye, qa iyage hastanhanka suton yapi.

11 Hehan Pharoah wiyatke tawa kin minape ohna mduha, qa hastanhanka kin iwacu, qa Pharoah wiyatke tawa kin ohna mduskice ca Pharoah nape kin en wiyatke kin ewehde, eya.

12 Unkan Joseph heciya, Wiyahanmde cin he kaken ka. Adetka yamni qon anpetu yamni ee.

13. Ebake yamni can Pharoah nipa kin yuwankan inicu kte ca nanke ciqon ake en anihde kta; unkan tokaheya wayatkeyakiye ciqon wicohan kin ake ecen ecanon kta, Pharoah nape kin en tawiyatke kin yaqu kta.

14 Hena hecetu kinhan miksuya wo. Tokin tanyan yaun kinhan wowašte ecamiyecon, Pharoah en caje mayadaten qa tipi kin de etanhan hinanpe mayayen.

15 Awicakehan Hebrew tamakocepi kin etanhan mamanonpi, qa deciya takudan ecarnon šni on makohdoka kin den emahnakapi kta, eya.

16 Hehan wohekiyapi tancan kin wiyukcan wašte e wanyake ca Joseph heciya; Miš nakun wiwahanmde ca inyun, aguyapi makanopiye yamni mapa kin akan.

17 Qa makanopiye akantu kin ohna Pharoah tawoyute

ocaje owasin wohekiyapi kage cin. Unkan zitkadan hena temyapi, makanopiye mapa kin iwankam un kin hetanhan.

18 Unkan Joseph ayupta; He kaken ka. Makanopiye yamni kin anpetu yamni eepi.

19 Ehake yamni can Pharoah pa kin yuwankan inicu qa, can akan otke niye kta; hehan zitkadan nicehpi kin etanhan yutapi kta.

20 Unkan iyamni can, anpetu en Pharoah tonpi kin he kiksuyapi kta e wowidag wicaye cin owasin wowicakihe, ca wayatkekiyapi tancan wohekiyapi tancan henioza wowidake wicaye cin wicehna hdinanpe wicaya.

21 Qa wayatkekiyapi tancan kin wayatke wicakiye ciqon wicohan ake hecon ši; unkan wiyatke kin Pharoah nape kin en qu.

22 Tuka wohekiyapi tancan kin otke ya, Joseph iwicakiciyukban qon iyecen.

23 Unkan wayatkekiyapi tancan kin Joseph kiksuye šni, tuka akiktonja.