LUKAS
WOTANIN WAŠTE TAWA
LUKAS WICOWOYAKE 1.
1 Taku tona
cetunhdašniyan wicaundapi kin hena wicota hdaheya oyag utapi;
2 Tona otokahe
ehantanhan išta on wanyakapi qa wicoie oyakapi ece kin hena token unkokiyakapi
qon he iyececa:
3 Heon etanhan
miš eya, taku kin hena owasin otokahe hinca ehantanhan tanyan owakahnige cin on,
Theophilus iyotan wašte, hena hdaheya wowapi cicage kta iyomakipi.
4 Hecen taku
onspeniciyapi qon hena wicakapi e tanyan sdonyaye kta.
5 Herod Juda wicaštayatapi
taanpetu kin en wawayušna wan Zacariyas eciyapi, Abia optaye kin hetanhan; qa
tawicu kin iš Aaron cunwintkupi kin etanhan; unkan he Elisabeth eciyapi.
6 Hena sakim
Wakantanka itokam owotanpidan, qa Itancan tawoahope qa wicoope tawa kin owasin
omanipi, iyaonpepica šni unpi.
7 Unkan
Elisabeth hokšin yuhe šni un, qa hecen cinca nicapi; unkan sakim wanna kanpi.
8 Unkan iye
optaye kin ohna wošna wicohan kin Wakantanka itokam econ eca,
9 Tipi wakan
Itancan tawa kin timahen iyaya eca, waazintonpi econ šipi ece, wošna wicohan
econpi kin eciyatanhan.
10 Unkan waazintonpi
icunhan, oyate kin owasin itankan cekiya hiyeya.
11 Unkan
Itancan taohnihde wan en taniniciya, qa wahna azintonpi kin etapa tanhan hinajin.
12 Unkan
Zacariyas he wanyake cehan, wacin iyokišice ca wakokipe hinca.
13 Tuka ohnihde
wakan kin heciya; Wakokipe šni wo, Zacariyas; wocekiye nitawa kin nahonpi; qa
nitawin Elisabeth hokšidan wan niciyuhe kta, unkan he Johannes eya cašyakiton
kta.
14 Qa he on
wowiyuškin wopida ko duhe kta, qa tonpi kin on wicota iyuškinpi kta.
15 Qa iye
Itancan kin itokam tanka kta; qa miniša miniwakan ko takudan yatke kte šni; qa
hunku ikpi kin etanhan Woniya Wakan kin on ojudan kta.
16 Unkan iye
Israel cinca kin wicota Itancan Wakantanka tawapi kin ekta wicayahomni kta.
17 Qa Elias
toksape qa towašake kin yuha itokam ye kta, qa atewicayapi cincawicayapi kin
kici cante wicayuokonwanjidan, qa wanahonpi šni kin hena owotanna unpi
wicoksape kin ekta wicayuhomni kta; qa oyate wan Itancan on ihduštanpi kin wiyeya
kicihnake kta e heon etanhan.
18 Unkan
Zacariyas ohnihde wakan kin heciya; Wanna wimacahinca, qa mitawin wanna kan;
hecen taku on de sdonwaye kta he?
19 Unkan
ohnihde wakan kin waayupte ca heciya; Gabriel, Wakantanka itokam najin kin he miye;
qa ociciye ca, wotanin wašte kin de sdonyeciciye kta e u mašipi.
20 Unkan iho,
mioie kin tohan iyehantu kinhan yuecetupi kte cin he wicayada šni kin he on,
tohanyan yuecetupi šni kin hehanyan, ie šni, qa ia okitpani yaun kta ce.
21 Unkan oyate
kin Zacariyas ape hiyeye, ca tehan tipi wakan kin ohna yanke cin on etanhan
inihanpi.
22 Unkan tankan
hdicu qehan, owicakiye kte cin okitpani: unkan namwicakicawin, qa ie šni un; on
etanhan tipi wakan kin ohna taku wakan wanji wanyaka e iyukcanpi.
23 Unkan
wicohan econ ece kin anpetu kin wanna ihunnikiya, hehan iye ti kin ekta kihda.
24 Unkan anpetu
kin hena iyohakam tawicu Elisabeth hokšin itpihnaka; unkan wi zaptan hehanyan
inalibe, ca heya;
25 Anpetu kin
en, Itancan kin wicašta kin taku i en mahdepi qon he emiciyaku kta on ahimatonwe
cehan, decen ecamicon ce.
26 Unkan wi išakpe
kin en, Gabriel ohnihde wakan kin Wakantanka etanhan u šipi; Galile ekta,
otonwe wan Nazareth eciyapi kin hetu;
27 Wikoška wan wicašta
wan Joseph eciyapi, David wicowazi tawa kin etanhan, yuze kte cin he ekta;
unkan wikoška kin Mary eciyapi.
28 Unkan
ohnihde wakan kin he en hi qa heciya; Wiyuškin wo, wašteya yaun kin; Itancan
kin niciun, winohinca owicapeya niye niyawaštepi ce.
29 Unkan he
wanyake cehan, oie kin on inihan, qa okiyapi kin de taku kta hecinhan he awacin
un.
30 Unkan
ohnihde wakan kin heciya; Mary, wikope šni wo; Wakantanka ekta wowašte iyeyaya.
31 Qa iho, hokšin
itpiyahnake ca hokšidan wan yaton kta, qa JESUS eya cašyakiton kta.
32 Iye tanka
kta, qa Iyotan Wankantu kin Cinhintku kin eciyapi kta; qa atkuku David tohe kin
Wakantanka Itancan kin hduhekiye kta.
33 Qa Jakob ti
kin he ohinniyan idake kta; qa wokiconze tawa kin okiciwihanke kte šni ce, eya.
34 Hehan Mary
ohnihde wakan kin heciya; Wicašta sdonye šni waun kin heon, de token on iyecetu
kta he?
35 Unkan ohnihde
wakan kin waayupte ca heciya; Woniya Wakan kin en niu kta, qa Iyotan Wankantu
towašake kin aohanziniye kta, qa hecen taku wakan wan yaton kte cin he
Wakantanka Cinhintku kin eciyapi kta.
36 Unkan inyun,
Elisabeth icepanšiyaye cin, he wakanka tuka iš eya wanna hokšin itpihnaka ce,
qa hokšin yuhe šni eciyapi qon, he wanna wi kin de šakpe.
37 Wakantanka
ekta taku okihipica šni wanica ce.
38 Unkan Mary
heya; Itancan ookiyemaye cin wanmayaka we; nioie kin iyecen ecamiconpi nunwe.
Hehan ohnihde kin ehpeya kihda.
39 Unkan anpetu
kin hena en Mary inajin, qa koyahanna hoški makoce kin, Juda otonwe wan ekta
iyaya:
40 Qa Zacariyas
ti kin en tin iyaye, ca Elisabeth okiya.
41 Unkan
Elisabeth Mary ia nahon qehan, itpi mahen hokšiyoqopa kin škehanhan; hehan Elisabeth
Woniya Wakan kin ojudan:
42 Qa
hotankakiya hotanin, qa heya; Winohinca opeya niye niyawaštepi, qa niitpi kin
etanhan icage kte cin he yawaštepi ce.
43 Qa Itancan
mitawa hunku kin ekta mahi kte cin de token kapi he?
44 Inyun, iyae
cin noge iyohpemaye cehan, hecehnana miitpi mahen hokšiyoqopa kin wowiyuškin on
škehanhan.
45 Unkan tuwe
wicada qon he yawaštepi: Itancan kin taku eciye ciqon hena ecen yuštanpi kta
ce, eya.
46 Unkan Mary
heya; Minagi kin Itancan kin yatan;
47 Qa mitaniya
kin he Wakantanka Wanikiya mitawa kin on iyuškin ece.
48 Taokiye kuya
un kin ekta ahimatonwan on etanhan inyun, detanhan wicoicage kin owasin yawaštepi
emakiyapi kta ce.
49 Tuwe wašake
cin he taku hinca ecamicon; unkan caje kin wakan ce.
50 Tona
kokipapi kin hena wicoicage qa wicoicage kin onšiwicakida ece.
51 lye isto kin
on wowašake hdutanin; witantanpi kin hena taku cante mahen wacinyuzapi kin en
wicayuomdeca.
52 Wašakšakapi
kin oyanke etanhan kun hdicuwicaye ca, kuya unpi qon hena wankan wapa awicaya.
53 Wotektehdapi
kin hena taku waštešte on imnahanwicaye, ca wijicapi kin iš cokakadan tokan yewicaši.
54 lye towaonšida
kiksuye cin on taokiyeye cin Israel he iciya ece.
55 Hunkakewicunyanpi
owicakiye ciqon iyececa, Abraham iye cinca kin om, owihanke wanica.
56 Unkan wi
yamni ecetu hehanyan Mary Elisabeth kici un, qa hehan iye ti ekta kihda.
57 Elisabeth
cinca ton kte cin wanna iyehantu; unkan hokšidan wan ton.
58 Unkan
ikiyedan unpi kin hena, icepanwicaye cin koya, Itancan kin nina onšikida nahonpi;
hecen kici iyuškinpi.
59 Unkan anpetu
išahdogan qehan, hokšiyoqopa kin bahdayapi kta on hipi; unkan atkuku Zacariyas
caje kin he icajekiyapi.
60 Unkan hunku
kin waayupte ca heya, Hiya; tuka Johannes eciyapi kta.
61 Unkan
heciyapi; Takuwicayaye cin tuwedan hecen eciyapi šni ce.
62 Unkan atkuku
kin iš token eya cajeyate kta hecinhan, he iyuteya iwangapi.
63 Unkan iš
wowapi akan kagapi wan da, qa; Johannes he caje kin ee ce, eya owa. Unkan
owasin inihanpi.
64 Unkan
hecehnana i kin yukawapi, qa ceji kin kiyuškapi; unkan ie, ca Wakantanka yatan.
65 Unkan okšan
tipi kin owasin wikopapi: unkan iapi kin kin dena owasin Juda hoški kin owancaya
yaotaninpi.
66 Unkan tona
nahonpi kin owasin cante mahen awacin unpi, qa heyapi; De taku hokšiyoqopa kta
he? Unkan Wakantanka nape kin he kici un.
67 Hehan atkuku
Zacariyas Woniya Wakan ojudan, qa wokcan qa heya;
68 Itancan
Wakantanka Israel tawa kin he taoyate kin wanna wicahiyohi, qa opewicakiton, on
etanhan yawaštepi nunwe:
69 Taokiye David
ti kin en wanikiyapi he wan yuwankan eunkicihdepi ce:
70 Maka kin
tokaheya icagc cin ehantanhan, wicašta wokcan wakan tawa ipi kin eciyatanhan,
oie kiton kin hena iyecetu:
71 Hecen
tokaunyanpi qa unkiyušepi kin hena napepi kin etanhan niunkiyapi kta;
72 Wowaonšida
hunkakewicunyanpi cajewicakiyate ciqon, he ecen econ kta, qa wokiyapi wakan
tawa kin he kiksuye kte;
73 Abraham
ateunyanpi kin he taku wakanyan eciye ciqon he hee kta ce;
74 Decen ionšiunkidapi
kta, tona tokaunyanpi nape kin etanhan unkiyušpapi kinhan, wokokipe codan
ohoundapi kta,
75 lye itokarn,
wicoowotanna qa wicoecetu kin en, tohanyan unnipi kin hehanyan.
76 Qa niye, hokšiyoqopa,
Wicašta wokcan Iyotan Wankantu tawa kin eniciyapi kta; Itancan tacanku kin
wiyeya yecage kta on ite kin itokain de kta;
77 Taoyate
woahtani wicakicicajujupi kin eciyatanhan wanikiyapi sdonyapi kte cin he wicayaqu
kta;
78 Wakantanka
unkitawapi canteunkiyapi kin heon etanhan: qa heon wankan tanhan anpao kin
hiyounhipi ce;
79 Hecen otpaza
qa wiconte ohanzi kin ehna iyotankapi kin hena iyoyamwicaye kta; qa unsihapi
kin wookiye canku kin ohna unkayapi kta ce, eya.
80 Unkan hokšiyopa
kin icage, ca tawacin kin wašaka aya; unkan Israel en taniniciye kte cin
hehanyan, makoskan en ece un.
WICOWOYAKE 2.
1 Unkan anpetu
kin hena en, Kesar Agustus, maka kin owancaya wicašta owicawapi kta, wakiconza.
2 Kurenios
Suria en wicaštayatapi yanke cin he ehan tokaheya owicawapi kin de yuštanpi.
3 Unkan owasin
toketken tonwanyanpi qon owicawapi kta e ektakta kipi.
4 Unkan Joseph,
David ti qa wicowazi tawa kin hetanhan, heon iš eya, Galile en Nazareth otonwe
kin etanhan ye ca, Bethlehem David totonwe kin ekta ki;
5 Mary tawicuye
kte cin he kici owapi kta; he wanna cinca ton kta ikiyedan.
6 Unkan hen
yukanpi kin icunhan, anpetu en cinca ton kte cin wanna iyehantu.
7 Hecen
cinhintku tokapa kin ton, qa šina on hduskite ca, wanunyanpi en wotapi wan en
ohnaka; timahen owicakan šni heon etanhan.
8 Unkan makoce
kin he en tahincaska awanwicayakapi kin heca hanyen optaye tawapi kin
awanwicahdakapi.
9 Unkan iho,
Itancan taohnihde wan en wicahi, qa Itancan tawookitanin kin ohomni iyojanjan
wicaya; unkan nina wikopapi.
10 Unkan
ohnihde wakan kin hewicakiya ; Wikopapi šni po; iho, wopida tanka wootanin wašte
oyate kin owancaya ecen ye kte cin, he eca hoši cicahipi ce.
11 Anpe dehan David
totonwe kin en Wanikiya wan nicitonpi, Messiya Itancan kin he hee.
12 Qa on
sdonyayapi kte cin he dee; Hokšiyoqopa kin šina on yuskiskitapi qa wanunyanpi
en wotapi wan ohna wanka iyeyayapi kta ce.
13 Unkan ihnuhanna
mahpiya ekta unpi kin wicota ohnihde wakan kin kici hiyeya, Wakantanka yatanpi
qa heyapi;
14 Iyotan
wankantu ekta Wakantanka wowitan yuha nunwe, maka akan wookiye qa wicašta ekta
wicokiciyuwašte.
15 Unkan
mahpiya ohnihde kin hena ehpeya wicakiyahdapi qehan, wicašta tahincaska awanwicayakapi
kin hekiciyapi; Wanna Bethlehem ekta unyanpi, qa taku hiyohi Itancan unkokiyakapi
kin de wanunyakapi kta ce.
16 Hecen
koyahanna upi, qa Mary Joseph kici, qa hokšiyoqopa kin wanunyanpi en wotapi wan
ohna wanka iyeyapi.
17 Unkan
wanyakapi qehan, hokšiyoqopa kin on iapi nahonpi qon, he owancaya yaotaninpi.
18 Unkan
tahincaska awanwicayakapi taku yaotaninpi kin he tona nahonpi kin owasin yušinyayapi.
19 Tuka Mary
wicoie kin dena owasin cante mahen okihnake ca awakicin un.
20 Unkan
tahincaska awanwicayakapi kin hena kihdapi, qa taku nahonpi qa wanyakapi kin on
Wakantanka yaonihanpi qa yatanpi; taku owicakiyakapi qon he iyececa.
21 Unkan wanna
anpetu išahdogan, hokšiyoqopa bahdayapi kta hehan JESUS eciyapi; nahahin
itpihnakapi šni he ehan mahpiya ohnihde kin hecen cašton.
22 Unkan Moses
woope kage cin iyecen, anpetu en ihdukašote kte šni hena wanna henakeca, hehan
Itancan kin qupi kta e Jerusalem ekta hdoupi.
23 Itancan woope
tawa kin en owapi qon iyececa; Tona tokapapi, wica eca, otoiyohi Itancan kin
ekta wakan eciyapi kta ce.
24 Qa nakun
wawayušnapi kta, token Itancan toope kin en eyapi qon he iyececa; Wakiyedan
tawanjidan, qa iš wakiyedan cinca nonpa ce.
25 Unkan iho,
Jerusalem en wicašta wan Simeon eciyapi; he wicašta owotanna qa cekiya ece kin
heca, qa Israel Wokicanpte kin ape un; unkan Woniya Wakan kin kici un.
26 Unkan he te šni
itokam Itancan Messiya tawa kin he wanyake kta, Woniya Wakan kin okiyaka.
27 He Woniya kin
on tipi wakan kin en tin hiyu; unkan hunkakewicaye cin hokšiyoqopa Jesus,
wicoope kin eciyatanhan ecakiconpi kta e en hdoupi;
28 Hehan
adoksohan yuze, ca Wakantanka yawašte, qa heya;
29 Mayuha,
nitaokiye kin wanna wookiye yuha iyayeyaye kta;
30 Wowanikiye
nitawa kin he miišta kin on wanmdaka ce;
31 Oyate kin
owa in wicitokam wiyeya yehnake cin he;
32 Ojanjan wan
oyate kin aojanjanwicaye kte cin, qa nitaoyate Israel wookitanin kin, he hee
ce, eya.
33 Unkan taku
eciyapi kin hena on hunku qa Joseph yušinyayapi.
34 Unkan Simeon
wicayawašte, qa hunku Mary heciya; Inyun, Israel en wicota hicahanpi, qa ake
inajinpi kte cin on hokšiyopa kin de ehdepi, qa nakun wowapetokeca ienhdepi kte
cin ee kta;
35 Qa nakun
mazasagye wan on nitaniya kin canipapi kte; qa hecen wicacanteoze ota yuotaninpi
kta ce, eya.
36 Unkan
waayate wanji Anna eciyapi, Phanuel cunwintku, qa Aser wicowazi kin etanhan; he
wanna wakanka hinca, qa hihnaton kin etanhan waniyetu šakowin hehanyan hihnaku
kici un:
37 Qa he wanna
wiwazica, waniyetu wikcemna šahdogan sanpa topa ecetu, qa tipi wakan kin en ece
un, qa wote šni unpi wocekiye eya ahna on ohoda ece.
38 Unkan he
hehantudan hin en u, qa iš eya Itancan kin yatan, qa Jerusalem en tona opewicakitonpi
kin ape unpi kin hena owasin Jesus cajewicakiyata.
39 Unkan
Itancan wicoope tawa kin owasin ecekcen yuštanpi qehan, Galile en iye otonwe
tawapi Nazareth he ekta kihdapi.
40 Unkan hokšiyopa
kin icage, ca woniya kin en wašaka aye, ca wicoksape kin on ojudan; unkan
Wakantanka towašte kin he kici un.
41 Woacakšin
wotapi eca, hunkakewicaye cin waniyetu towanakeca Jerusalem ekta ipi ece.
42 Unkan Jesus
wanna waniyetu akenonpa, hehan wotapi wicohan kin iyececa, Jerusalem ekta ipi.
43 Unkan anpetu
kin yuštanpi qehan, hdicupi, tuka hokšiyopa Jesus hekta Jerusalem en yanka;
tuka hunku Joseph kici he sdonyapi šni.
44 Tuka ptaya
hdapi kin en opa kecinpi, hecen anpetu wanjidan iyooptapi, qa takuwicayapi kici
sdonkiciyapi ko wicehna okidepi.
45 Qa iyeyapi šni,
hehan Jerusalem ekta ake icicavvin akin ipi.
46 Unkan yamni
can, hehan tipi wakan kin en waonspekiyapi kin wicacokam waanawicagoptan, qa
wiwicawanh yanka iyekiyapi.
47 Unkan wacin
ksape cin, qa waayupte cin tona nahonpi qon owasin inihanpi.
48 Unkan
wanhdakapi qehan yušinyayapi; qa hunku kin heciya; Cinš, tokeca decen unkoyakihandapi
he? iho we, niyate kici wacin iyokišinya ocide ce.
49 Unkan
hewicakiya; Tokeca omayadepi he? Atewaye cin wicohan tawa kin he ito owecipe
kta kecannipi šni he?
50 Unkan taku
ewicakiye cin he okahnigapi šni.
51 Hecen om
hde, ca Nazareth ekta ki, qa anawicakigoptan un. Unkan hunku kin wicoie kin
dena owasin cante mahen yuha un.
52 Unkan Jesus
sanpa ksape ca hanska icaga; qa Wakantanka wicašta ko ekta waštedakapi.
No comments:
Post a Comment