Lukas 3-5

 LUKAS WICOWOYAKE 3.

1 Unkan Tiberius Cæsar wicaštayatapi un waniyetu iakezaptan, Pontius Pilate Juda en itancan, Herod Galile en itancan, qa iye sunkaku Philip Itureya qa Trakonitos en itancan, qa Lusanius Abilene en itancan;

2 Qa Annas Kaiaphas kici wošna kaga itancanpi qon he ehan, howotahedan ekta, Johannes Zacariyas cinhintku kin Wakantanka oie kin hiyohi.

3 Unkan he Jordan kahda makoce kin owancaya en u, qa woahtani kajujupi kta on iyopeiciyapi baptem wicaqupi kin he oyaka:

4 Wicašta wokcan Isaya oie wowapi kin en owapi qon he iyececa: Wicaho wan tuwe makotahedan ekta heya niyan; Itancan tacanku kin wiyeya kicaga po, ocanku tawa kin kiciyuowotan po:

5 Kaksiza owasin ojuyapi, qa heyaka paha ko owasin kahukun iyeyapi kta, qa pakšikšan kin hena yuowotanpi, qa ocanku tahtage cin hena yumdayapi kta ce;

6 Qa wicacehpi kin owasin Wakantanka wowanikiye kin wanyakapi kta ce.

7 Unkan wicota baptem wicaqu kte cin en ahi kin hena hewicakiya; Wamduška wicoicage kin, tuwe wocanniye u kte cin etanhan nape nišipi he?

8 Hecen iyopeiciyapi iyececa waskuyeca icahya po, qa, Abraham ateunyanpi ce, cante mahen ecinpi šni po; miye heciciyapi; Wakantanka inyan kin dena etanhan Abraham cinca kicage kta okihi.

9 Unkan iš eya onspe kin wanna can hute kin en ehnakapi; heon etanhan can kin tona waskuyeca wašte aicage šni kin hena owasin kawankapi qa petan ehpeyapi ece.

10 Unkan oyate kin, Hehan unkiye token econkupi kta he? eya iwangapi.

11 Waayupte ca hewicakiya; Tuwe onhdohda nonpa yuhe cinhan, he tuwe nice cin unma qu kta; qa tuwe woyute ton kinhan, iš eya ecen econ kta ce.

12 Hehan wamnayanpi kin iš nakun baptem wicaqu kta on en  hipi qa heciyapi; Waonspekiye, unkiye token econkupi kta he?

13 Unkan hewicakiya; Wakiconzapi kin isanpa kicapi šni po, eya.

14 Unkan akicita kin iš eya wiwangapi qa heciyapi; Qa unkiš token econkupi kta he? Unkan hewicakiya; Wicašta kin tuwedan wakokipe kicagapi šni, qa tuwedan oitonšniyan taku iyaonpapi šni po; qa wokajuju nicupi kin he on cante wašte po.  

15 Unkan oyate kin owasin wakta hiyeya, qa wicašta owasin Johannes on awacinpi, he Messiya kin hee, qa iš heešni hecinhan;

16 Hehan Johannes waayupte ca owasin hewicakiya; Awicakehan mini on baptem cicupi; tuka wanji mikapeya wašaka u, he iye tahanpe hankpan kin weciyuške kta iyemacece šni; he qe Woniya Wakan peta ko on baptem nicupi kta.

17 He iye wicaduge nape ohna hduhe, ca owunka tawa kin tanyan hduska kta; qa aguyapi su kin he tpahi, qa canwohnaka kin en okihnake kta; tuka ha kin e peta kasnipica šni wan on huhnahye kta ce, eya.

18 Unkan wahokonwicakiye cin en taku toktokeca nakun ota oyate kin owicakiyaka.

19 Unkan Herod wicašta itancan kin, iye sunkaku tawicu Herodias hee on, qa taku šica Herod econ kin owasin on iyopeya;

20 Hecen taku owasin sanpa akicage ca, wicakaška tipi kin en Johannes kaška hnaka.

21 Unkan oyate kin owasin baptem wicaqupi, qa Jesus iš eya baptem qupi, qa cekiya un qehan, mahpiya kin yuzamnipi;

22 Qa Woniya Wakan kin wakiyedan kahya tantonyan kun u, qa en iyahan; unkan mahpiya eciyatanhan wicaho wan hiyu, qa heya; Micinkši waštewakidake cin he niye; niye on iyomakipi hinca.

23 Unkan Jesus iye wanna waniyetu wikcemna yamni kta, Joseph cinhintku kin hee kecinpi, he Heli etanhan,

24 He Matthat etanhan, he Levi etanhan, he Melki etanhan, he Janna etanhan, he Joseph etanhan,

25 He Mattathias etanhan, he Amos etanhan, he Naum etanhan, he Esli etanhan, he Nagge etanhan,

26 He Maath etanhan, he Mattathias etanhan, he Seme etanhan, he Joseph etanhan, he Juda etanhan,

27 He Joanna etanhan, he Resa etanhan, he Zorobabel etanhan, he Salathiel etanhan, he Neri etanhan,

28 He Melki etanhan, he Addi etanhan, he Kosam etanhan, he Elmodam etanhan, he Er etanhan,

29 He Jose etanhan, he Eliezer etanhan, he Jorim etanhan, he Matthat etanhan, he Levi etanhan,

30 He Simeon etanhan, he Juda etanhan, he Joseph etanhan, he Jonan etanhan, he Eliakim etanhan,

31 He Melea etanhan, he Menan etanhan, he Mattatha etanhan, he Nathan etanhan, he David etanhan,

32 He Jesse etanhan, he Obed etanhan, he Booz etanhan, he Salmon etanhan, he Naasson etanhan,

33 He Aminadab etanhan, he Aram etanhan, he Esrom etanhan, he Phares etanhan, he Juda etanhan,

34 He Jakob etanhan, he Isaak etanhan, he Abraham etanhan, he Thara etanhan, he Nacor etanhan,

35 He Seruk etanhan, he Ragu etanhan, he Phalek etanhan, he Eber etanhan, he Sala etanhan,

36 He Kenan etanhan, he Arphaksad etanhan, he Sem etanhan, he Nowa etanhan, he Lamek etanhan,

37 He Mathusala etanhan, he Enok etanhan, he Jared etanhan, he Maleleel etanhan, he Kanan etanhan,

38 He Enos etanhan, he Seth etanhan, he Adam etanhan, he Wakantanka etanhan.

LUKAS WICOWOYAKE 4.

1 Unkan Jesus Woniya Wakan kin ojudan, Jordan eciyatanhan hdi; qa Woniya kin makotahedan ekta iyayeya;

2 Anpetu wikcemna topa hehanyan Wakanšica wawiyutanyan. Unkan anpetu kin hena en takudan yute šni; tuka hena ihunniyan hehan wotektehda.

3 Hehan Wakanšica heciya; Wakantanka Cinhintku kin he niye hecinhan, inyan kin de aguyapi icage kta, keya wo.

4 Unkan Jesus waayupte ca heciya; Aguyapi ecedan on wicani kte šni; tuka Wakantanka oie kin owasin on wicani kta ce, eya owapi ce.

5 Hehan Wakanšica paha wan tehanwankantu ekta aye ca, wancake maka wokiconze kin owasin kipazo.

6 Unkan Wakanšica heciya; Wicowašake kin de wicookitanin ko owasin cicu kta; hena owasin yuhemakiyapi, qa tuwe wacin kinhan waqu kta.  

7 Heon etanhan niš mitokam makata ehpeniciye cinhan, owasin nitawa kta ce.

8 Unkan Jesus waayupte ca heciya; Satan, mitapetepa tanhan ya wo: Itancan Wakantanka nitawa kin, he iye itokam makata ehpeniciye kta, qa iye išnana ahoyape kta ce, eya owapi ce.

9 Hehan Jerusalem ekta ahi, qa tipi wakan inkpa kin akan elide, qa heciya; Wakantanka Cinbintku kin he niye hecinhan, hetanhan kun ehpeiciya wo.

10 Kaken wowapi en kagapi qon; Ohnihdewicaye cin hena niye on econ wicaši, niyuhapi kta;

11 Qa napepi kin ohna yuwankan niyuzapi kta; qa hecen tukten inyan kin en siha ibonito kte šni, eya owapi ce, eya.

12 Unkan Jesus waayupte ca heciya; Itancan Wakantanka nitawa kin he iyutanyaye kte šni ce, eya owapi qon.

13 Unkan Wakanšica wowiyutanye kin owasin yuštan qehan, tona can ehpeya kihda.

14 Hehan Jesus Woniya towašake kin yuha Galile en hdi; unkan ihdukšan makoce wanke cin owancaya he oyakapi.

15 Unkan omniciye tipi tawapi kin ohnahna waonspekiya ece, hecen owasin yuonihanpi.

16 Unkan Nazareth en icahyapi qon he ekta hdi; qa econ ece kin he iyecen, anpetu wakan icunhan, omniciye tipi kin en tin iyaye ca, wowapi yawa kta inajin.

17 Unkan Isaya wicašta wokcan tawowapi kin qupi. Unkan wowapi kin yumdaye cehan, decen owapi kin iyeya;

18 Itancan Woniya tawa kin he akan maun; heon wahpanicapi kin wotanin wašte kin owicawakiyake kta e sdamakiya; tona cante psakawahanpi kin asniwicawaye kta on u maši; wayaka unpi kin wicakiyuškapi kta, qa ištagongapi kin ake tonwanpi kte cin omdake kta; tona kahdehdecapi kin hena wicawakiyuške kta;

19 Qa Itancan omaka oiyokipi tawa kin omdake kta ce.

20 Unkan wowapi kin ecen eyaku, qa ookiye kin he kicu, qa iyotanka. Unkan omniciye tipi kin ohna hiyeye cin owasin opahtapi.

21 Unkan hehan hewicakiya; Anpetu kin de ninogepi kin en wowapi kin de yuecetupi ce.

22 Unkan owasin yaotaninpi, qa wowaonšida oie iye i kin etanhan inanpe cin on yušinyayapi; qa heyapi; Joseph cinhiatku kin he dee šni he?

23 Unkan hewicakiya; Awicakehan iapi kin de ecen emayakiyapi kta: Niye pejihuta wicašta kin, asniiciya wo: Kapernaum ekta token ecanon naunhonpi kin, makoce nitawa kin den nakun ecen econ wo.

24 Unkan heya; Awicakehan heciciyapi: Wicašta wokcan tuwedan iye tamakoce kin en iyowinkiyapi šni ece.

25 Tuka awicakehan heciciyapi; Elias taanpetu kin en, waniyetu yamni sanpa wi šakpe hehanyan mahpiya kin natakapi; qa makoce kin owancaya wicaakihan hince ciqon he ehan, Israel in wiwazica ota.

26 Tuka hena wanjidan

Elias ekta ye šipi šni; Sidon en Sarepta otonwe kin en, winohinca wiwazica wan heceedan ekta ye šipi.

27 Nakun Elisha wicašta wokcan ni un qehan, lepros ececa wicota Israel en unpi, tuka hena wanjidan yuskapi šni, Naeman Suriya wicašta kin heceedan ce.

28 Unkan omniciye tipi ohna hiyeye ciqon hena nahonpi qehan, owasin šihdapi hinca;

29 Qa najin hiyayapi qa otonwe kin itankan iyayeyapi, qa paha akan otonwe hdepi kin he matete ekta ayapi, qa kun ehpeyapi kta.

30 Tuka iye wicacokaya tanhan iyoopta iyaye ca kihda.

31 Qa Galile en Kapernaum otonwe kin he ekta hi, qa anpetu wakan eca waonspewicakiya ece.

32 Unkan waonspewicakiye cin on inihanpi; oie kin he wowašake kicica nakaeš.

33 Unkan omniciye tipi kin ohna wicašta wan wakan šica šapa woniya kin yuha; qa he hotankakiya hoyeya;

34 Qa heya; Hanta wo, Jesus Nazareth, niye qa unkiye taku unkicicapi he? ihangunyayapi kta yahi he? Wakantanka Taku Wakan Wanji tawa kin he niye e sdonciya ce.

35 Unkan Jesus kišice ca heciya; Inina un, qa wicašta kin etanhan tankan hinapa wo, eya. Unkan wakanšice cin wicašta qon wicacokam ehpeye cehan, etanhan tankan hinapa; tuka ksuweye šni.

36 Unkan owasin inihanpi, qa iyakitedan hekiciyapi; De taku oie kin; wicookihi wicowašake ko on woniya šape cin econ wicaši eca, tankan hinanpapi ece.

37 Unkan ihdukšan makoce wanke cin owancaya he oyakapi.

38 Unkan omniciye tipi kin etanhan hdicu, qa Simon ti kin en tin iyaya. Unkan Simon kunku kin he tancan wicakata ececa hinca; hecen on cekiyapi.

39 Unkan en inajin, qa tancan kata kin he kišica; unkan asni hinhda: qa hecehnana najin hiyaye ca, owicakiya.

40 Unkan wi iyaya hehan, woyazan ocaje ota on wicayazan tona wicayuhapi kin hena en awicahipi; unkan otoiyohi nape awicahnake ca asniwicaya.

41 Qa wakan šica iš eya ota wicota etanhan hinanpapi, qa heya niyanpi; Wakantanka Cinhintku Messiya kin he niye ce. Unkan iye wicakišice ca, Messiya hee sdonyapi kin he, eyapi kta iyowicaki šni.

42 Unkan wanna anpao hinape cehan tokan iyaye, ca makotahedan ekta ya; unkan oyate kin odepi, qa yanke cin ekta ahi, qa ehpeya iwicayaye kte cin iyanaptapi.

43 Unkan hewicakiya; Wakantanka tokiconze kin otonwe toktokeca nakun ohna omdake kta; heon etanhan u mašipi ce.

44 Hecen Galile omniciye tipi kin hena ohnahna woyaka ece.

LUKAS WICOWOYAKE 5.

1 Unkan oyate kin Wakantanka oie kin nahonpi kta e aohduteyapi qehan, Geneseret mde kin icahda inajin.

2 Qa mde kin en wata nonpa wanka wanyaka; tuka hokuwapi kin iš wanna tokan iyayapi, qa ho kin hdujajapi.

3 Unkan wata unma Simon tawa kin he en ope ca, kitanna canan wapa iyayeye kta cin. Hehan en iyotanke ca, wata kin etanhan oyate kin waonspewicakiya.

4 Unkan wanna ayaštan qehan Simon heciya;  Mini šbe kin ekta iyaye ca ho kin minin iyohpeya wo.

5 Unkan Simon waayupte, ca heciya; Waonspekiye cin, hanyetu osan htaunnipi, qa takudan unktepi šni; tuka nioie kin on ho kin iyohpewaye kta ce.

6 Unkan heconpi qehan, hogan utkanna yuzapi; unkan ho kin papsakapi.

7 Unkan tawašitkupi wata unma en opapi qon hena namwicakicawinpi, en upi qa owicakiyapi kta. Unkan en hipi qa wata napin ojukiyapi, hecen iyujimnana hiyeya.

8 Unkan Simon Inyan he wanyake cehan, Jesus hupahu kin en makata ehpeiciye ca heya; Itancan, ehpeya imayaya wo, wicašta wahtani sa hemaca ce.

9 He iye qa tona om un qon hena hogan yuzapi kin on etanhan owasin inihanpi.

10 Unkan Jakob qa Johannes Zebede cinhintku kin hena oza, Simon tawašitkuwicaya, iš eya inihanpi. Unkan Jesus Simon heciya; Wikope šni wo, detanhan wicašta kin wicaduze kta ce.

11 Unkan wata qon hutata ahdihunipi qehan, owasin ehpekiyapi, qa iyahna yapi.

12 Unkan otonwe wan en un qehan, iho, wicašta wan lepros ececa hinca, he Jesus wanyake cehan, ite makipuskin ehpeiciye ca, cekiye ca heya; Itancan, yacin kinhan mayaduska kta oyakihi.

13 Unkan nape yekiye, ca yutan, qa heya; Wacin ce: ska un wo, eya. Unkan wancake lepros ececa qon asni hinhda.

14 Unkan tuwedan okiyake šni ši; tuka wawayušna kin ekta ye ca wanyagiciye kta, qa wayuskapi  kta on token Moses econ wicaši qon he ecen econ kta, keya; hecen wowicakiyake  kta.

15 Tuka heon iyotan tankaya wicohan kin he oyakapi; hecen wicota en mniciyapi, nahonpi kta, qa wayazankapi wicayuhapi kin asniwicaye kte cin heon.

16 Hehan icunonpa makotahedan wan ekta ye ca wocekiye eya.

17 Unkan anpetu wan waonspewicakiya icunhan, Pharisee qa wicoope onspekiye cin hena, Galile otonwe kin owasin, qa Juda qa Jerusalem etanhan, en ahi kin hena en iyotankapi; unkan Itancan towašake kin asniwicaye kta e en un.

18 Unkan iho, wicašta wan tatake cin he owinja ohna wicašta yuha upi: qa titnahen ayapi qa itokam ehnakapi kta akitapi.

19 Tuka wicota kin on token en aipi kte šni wanyakapi qehan, tipi akan inajinpi, qa akahpe yuhdokapi eciyatanhan cokaya Jesus itokam kun hiyuyapi.

20 Unkan wacinyanpi kin he wanyake cehan, heciya; Wicašta, wayahtani kin nicicajujupi ce.

21 Unkan wowapi  kagapi qa Pharisee kin iš waakinicapi qa heyapi; De tuwe e taku šica decen eya he. Tuwe woahtani kajuju kta okihi he; Wakantanka ecedan okihi.

22 Tuka tawacinpi kin Jesus iwicayukcan, hehan waayupte ca hewicakiya; Taku e cante mahen ayakinicapi he?

23 Wayahtani kin nicicajujupi ce; qa iš Najin qa mani wo, eyapi kte cin unma tukte wašakadan he.

24 Tuka Wicašta Cinhintku kin he iš maka akan woahtani kajuju kta okihi sdonyayapi kta; hehan tatake cin he heciya; Najin qa nitowinja ehdaku qa yati kin ekta hda wo, eciciya ce, eya.

25 Unkan wancake wicitokam najin hiyaye, ca akan wanke ciqon he ehdaku, qa iye ti kin ekta hde, ca Wakantanka yatan.

26 Unkan owasin inihanpi, qa Wakantanka yatanpi; qa wikopapi hince, ca heyapi; Wicohan nakaka toktokeca wanunyakapi ce, eyapi.

27 Unkan taku kin dena iyohakam hetanhan ye, ca wamnayanpi kin heca wanji Levi eciyapi, wamnayanpi oyanke kin en iyotankehan yanka e wanyaka; qa, Miyahna u wo, eciya.

28 Unkan taku owasin ehpeye ca

, najin hiyaye ca, ihakam iyaya.

29 Unkan Levi iye ti kin en wohanpi tanka kicaga; unkan wamnayanpi kin iš wicota, qa toktokeca nakun en opeya wotapi kta iyotankapi.

30 Tuka wowapi kagapi wicayuhapi qa Pharisee kin hena waonspewicakiye cin wicakigepi, qa heyapi; Tokeca e wamnayanpi qa wahtanipi sa om wayatapi qa wadatkanpi ece he.

31 Unkan Jesus waayupte ca hewicakiya; Tona zanipi kin hena pejihutawicašta cinpi šni, tuka wayazanpi kin.

32 Owotanpidan kin hena iyopeiciyapi kta e wicakico wahi šni, tuka wahtanipi sa.

33 Unkan heciyapi; Tokeca e Johannes waonspewicakiye cin hena ijehan wote šni unpi qa wocekiye eyapi he, qa Pharisee tawapi kin iš eya; tuka nitawa kin wotapi qa wayatkanpi ece?

34 Unkan hewicakiya; Hihnaton ti kin cinca kin hena tawicu ton kin he iš owicapeya un kin icunhan wote šni wicayakiyapi kta oyakihipi he.

35 Tuka anpetu kin u kta, en tawicu ton kin he ewicakiciyakupi kta; hehan anpetu kin hena en wote šni unpi kta.

36 Unkan wiyacinpi wan owicakiyaka: Wicašta tuwedan šina teca onšpa šina tanike cin en akihdagye šni ece; heconpi kinhan teca qon iš yuhdeca ece, qa onšpa teca etanhan kin he tanike cin kicica šni ece.

37 Qa nakun wicašta tuwedan miniša teca ojuha tanike cin en okastan šni ece; heconpi kinhan miniša kin skepe kta, qa ojuha kin atakuni kte šni.

38 Tuka miniša teca kin he ito ojuha teca en ohnakapi  kta; qa sakim yutehanpi ece.

39 Iš eya wicašta tuwedan miniša tanika wanna yatke ca, hehan hinnakaha teca cin šni; Tanike cin ees wašte ce, eya ece.