Habakkuk

(Picture Courtesy of Nasa)

HABAKKUK

WICOWOYAKE 1.

1 Woyake wakan Habakkuk wicašta wokcan okiyakapi qon he dee.

2 Jehovah, tohanyan hoyewaye kta, qa niye nayahon kte šni he: wošice on hoyeciciya, tuka waniyakiye šni ece.

3 Tokeca wicohan šica wanyagmayakiya, qa woiyokišice ayatonwan he? Woihangye qa wošice mitokam yanka: nakun kicigepi qa kicizapi wankan ihdoya ece.

4 Heon etanhan woope kin tansag aya,qa woyaco tohinni inanpe šni: taku šica wicašta owotanna ihdukšan hiyeya; heon etanhan woyaco skoskopa hiyaya ece.

5 Ikcewicašta ehna tanhan wanyaka po, qa awacin po, qa yusinyayapi on yusinyaya po: nitaenpetu kin en wicohan wan ecamon kta, he oniciyakapi e ta wicayadapi kte šni.

6 Iho, Chaldi oyate kin icahwicawakiya, oyate wohitika qa ohanko, maka ohdakinyan omani kta, ounyanpi tawapi šni qon hena tawaye kta.

7 Hena wawinihan qa wokokipe hinca: woyaco qa wowitan tawapi kin iye etanhan hiyu kta.

8 Nakun šuktanka tawapi kin inmutanka kin isanpa duzahanpi, qa htayetu šunktokeca kin isanpa onankopi: qa šuktanka akan yotankapi tawa kin wahanhanicidaya nawankapi ece; qa nakun šuktanka akan yotankapi tawa kin tehantanhan au kta, hena kinyan upi kta; wanmdi watemye inahni kin iyececa.

9 Ocowasin waihangya u kta; ozuye itepi kin tokatawapa yanka; qa wayaka mnawicaye kta, wiyaka iyececa.

10 Qa wicaštayatapi iwicahaha kta,qa wicašta itancanpi kin wowihahayawa kta; conkaške suta otoiyohi on iha kta, maka mdu kin en eju, qa icu kta nakaeš.

11 Hehan hiyaye kta, tate iyececa, qa iyoopta iyaye kta, qa wahtam kta: towašake kin de taku wakan tawa kecin.

12 Jehovah Wakantanka mitawa, Wanji Wakan mitawa, niye otokaheya wanica etanhan yaun šni he? Unkiye untapi kte šni. Jehovah, he woyaco on yeconza; qa, Imnija, he woiyopeye kta on eyahnaka.

13 Išta niška hinca, hecen taku šica wandake kta iyonicipi šni, qa wicohan šica ayatonwe kta iyececešni: Tokeca wicahnayan ohanyanpi kin awicayatonwan he; wicašta šica tuwe isanpa owotanna kin temya ešta inina nunke kta he?

14 Qa miniwanca hogan kin iyececa wicašta wicayakaga he, maka asdohanpi kin iyececa, en itancan wanice cin hena.

15 Hena iyuhpa hinskijupi on icupi kta: ho wan on mnawicayapi kta; qa hogan icuwa kin on yuzapi kta: heon etanhan wiyuškin kta, qa pida kta

16 Heon etanhan ho kin wakiyusnapi, qa hogan, icuwa tawapi kin en wizite izinyapi ece; hena on taku tawayapi kin cepa, qa woyute ota nakaeš.

17 Heon etanhan ho kin hducokaka kta, qa ohinniyan oyate kin wicakte ayuštan kte šni he?

HABAKKUK WICOWOYAKE 2.

1 Owanyake mitawa kin ohna nawajin kta, qa conkaške  kin akan emicihnake kta, qa taku emakiye kta hecinhan ekta etonwan manke kta, qa woiyopeye mitawa on token amdupte kta hecinhan.

2 Unkan Jehovah amayupte ca heya; Wowanyake kin he owa wo, qa cannidaska akan taninyan kaga wo, hecen tuwe inyanka ešta yawa kta.

3 Wowanyake kin he ehake anpetu yuštanpi kte cin hehanyan kta nakaeš; tuka owihanke ekta inahni kta, qa itonšni wanice kta: ihdutehan kinhan ape tin wo; awicakehan u kta nakaeš, hanhi kte šni ce.

4 Iho, wahanicida kin he nagi owotanna šniyanka: tuka tuwe owotanna kin he iye wacinye cin on ni kta.

5 Nakun miniša on wahanhanicida nakaeš, wicašta watankaicida kin heca, qa owanji yanke kte šni: hades iyececa nagi hdutanka, qa wiconte iyececa, qa tohinni imnan šni, tuka Ikcewicašta oyate iyuhpa mnakiye, qa oyate owasin yuhe kta e wicapahi.

6 Dena iyuhpa he on wiyacinpi wan, qa wowihaha odowan wan yawankan iyeyapi kta, qa heyapi kta; Hehehe, tuwe taku tawa šni kamna ece! Tohanyan kta he? Tuwe taku icazowicakiya iye en mnakiya ece!

7 Tona niyahtakapi kte cin hena ihnuhanna najinpi kte šni he; qa nagiyeniyanpi kte cin hena kiktapi kta; qa woiyahpaye tawapi kin he niye kta ce?

8 Niye oyate ota wawicayaki ece, he iyecen oyate okaptapi kin owasin wanicipi kta: wicašta weyapi kin on, qa woihangye makoce otonwe ko en, qa en ounyanpi kin owasin on etanhan.

9 Hehehe tuwe iye tipi kin en wokamna šica wan kamna kinhan, hohpi wankan eicihnake kta, taku šica nape kin etanhan eihdaku kta e heon.

10 Oyate ota ihangyapi kin on yati en taku wowištece wan niye nicicaga, qa ninagi en wanicihtani.

11 Hecen conkaške etanhan inyan kin houye kta, qa can kin etanhan inatake kin ayupte kta ce.

12 Hehehe tuwe weyapi kin on otonwe kaga, qa otonwe tanka taku šica econpi kin on yušuta kinhan.

13 Iho, oyate kin peta hinca en htanipi kta; han, takušnišni on oyate kin mdokite iciyapi kte cin he Jehovah ozuye yuhe cin hetanhan šni he?

14 Jehovah towitan sdonyapi kin he maka kin ojudan kta nakaeš, miniwanca mini akahpe cin iyececa.

15 Hehehe tuwe tikiyedan un wayatkekiye cinhan; janjan nitawa etanhan oyecicaštan,qa nakun witko yakaga; hecen tancodan unpi kin ayatonwe kta.

16 Wowitan cekiya wowištece on winipi hinca: nis eya wayatkan wo, qa tanconikadan kin hdutanin wo: Jehovah nape etapa wiyatke kin he niye en ihdoye kta, qa nitowitan akan wowištece ihdepapi yuke kta.

17 Lebanon wokakisye tawa kin he anicahpe kta nakaeg, qa wamanica waihangye cin wakokipe wicakicaga ecee kin hena; wicašta weyapi kin on, qa woihangye makoce qa otonwe kin ohna, qa en ounyanpi kin owasin on etanhan.  

18 Wakagapi bagopi kin tuwe bago hecinhan he taku okihi kta he; wakagapi sdoyapi, qa woitonšni onspewicakiye cin, hecen wakagapi kage cin he wacinkiye kta he, wakagapi ia okitpani kin heca kage kta?

19 Hehehe, tuwe can kin, Kikta wo, eciye cinhan; tuwe inyan ia okihi šni kin ihduhice: I kinhan, He waonspekiye kta he! Wanyaka wo, he mazaskazi mazaska ko on akahpapi, tuka mahen oniya ecaca takudan en un šni.

20 Tuka Jehovah iye tawakeya wakan kin ohna yanka; iye itokam maka kin ocowasin inina un nunwe.

HABAKKUK WICOWOYAKE 3.

1 Šigionoth on Habakkuk wicašta wokcan tawocekiye kin.

2 Jehovah, oniyakapi nawahon, kopewahda: Jehovah, waniyetu kin ehna niohan kin piya econ wo; Waniyetu ehna wayuotanin wo, Wocanniye en wowaongida kiksuya wo.

3 Teman etanhan Wakantanka hiyu; Qa Wanji Wakan kin Paran he kin etanhan. Selah. Iye tawootanin kin mahpiya kin akahpa; Qa maka kin iye towitan kin on ojudan.

4 Unkan towiyakpa kin he iyoyanpa kin iyececa: Witaninin kin iye nape kin etanhan: Qa hen towašake kin inahman ece.

5 Iye itokam makošica hiyaya; Qa oide wan iye siha kin etanhan hiyu ece.

6 Inajin, unkan maka kin cancan: Ekta etonwan, unkan oyate kin nihinciyapi: Nakun he tanina kin hena mdecahanpi, Paha wanakaja kin hena kun ehpeiciyapi: Iye tacanku kin otokahe wanica.

7 Cušan tawakeya kin wokakije en wanmdaka: Midian makoce ozanhdepi kin kahuhuza.

8 Jehovah, wakpa kin canniyaya he? Wakpa kin en nitocanteptanyan yukan he? Nitosinhda kin miniwanca kin en; Hecen šuktanka nitawa akan, Wowanikiye canpahmihma nitawa kin ohna idada he?

9 Itazipa nitawa sdayehna taninyan yanka: Wanhuheza šakowinwin kta, keya. Selah. Maka kin wakpa on niye duptuptuja ece.

10 he kin hena wanniyakapi, Škanškanpi: Mini hinhe hinca hiyaya: Minisbe kin ho hiyuya. Nape yuwankan ikikcu.

11 Anpetu wi, hanyetu wi kin iye ounyanpi kin en inajinpi: Nitawanhinkpe iyoyanpa kin on yapi ece, Wanhukeza nitawa ijanjan wiyakpakpa kin on.

12 Wošinhda hduha maka kin omayani; Wocanniye on Ikcewicašta oyate kin wicayakastaka ece.

13 Nitaoyate niwicakiya on idada; Sdayakiye ciqon ehdakupi kta e heon: Wicašta šica tipi ohna pa kin yakahuhuga; Oahe hdepi tabu kin hehanyan yuasdava eyahnaka. Selah.

14 Wanhukeza tawa on taakicita tancan pa cawicayecipa: Hena nuni makiyapi kta on tateiyumni iyecen kuwa amaupi; Wahpauicapi kin nanmana temyapi kta iyuškinpi ece.

15 Šuktanka nitawa om miniwanca kin ehna mayani; Mini tanka ejupi kin ehnahna.

16 He nawanon, unkan mitezi skanskau: Wicaho kin on iha namapapi ece: Huhu mitawa kuka aya, Qa mahen macancan hinca: Tuka wokakije anpetu kin en ozimiciye kta; Tohan oyate om anauntanpi kta upi kinban.

17 Suken can kin namdaga šni qeyaš, Qa hastanhanka iyuwi kin en waskuyeca wanica; Ohwe can kicanyanpi kin he atakunišni, Qa maga kin woyute takudan icahye šni; Tahin wanunyanpi tipi etanhan optaye kin ihangyapi, Qa tatanka tipi ohna tatanka wanica qeyaš:

18 Tuka miye qe Jehovah on imduškin kta; Wowanikiye mitawa Wakantanka kin on iyawaša kta.

19 Jehovah Itancan kin wowašake mitawa kin hee; Unkan mišiha tatokadan iyececa kage kta; Qa paha mitawa akan manimakiye kta ce. Candowankiyapi mitawa en itancan kin he de kicagapi.