Malachi

MALACHI

WICOWOYAKE 1.

1 Jehovah oje Malachi nape kin eciyatanhan Israel owicakiyakapi kin dee.

2 Canteciciyapi ce, Jehovah eya: Tuka, Taku e en canteunyakiyapi he? ehapi. Esau Jacob sunkaku kin hee šni he? Jehovah eya: tuka Jacob waštewakidaka;

3 Qa Esau šicewadaka, qa he tawa kin hewoškan waka a, qa makoce tawa hewotahedan wamduška ounyanpi kin heca.

4 Unkiciyujujupi, tuka ake unhdapi kta qa otiwita kin piya unkajjapi kta ce, Edom eya kes, Jehovah ozuye hduhe cin hecen eya; Hena piya kagapi kta, tuka miye mdujuju kta: unkan, Wošice ihanke, qa, Oyate Jehovah ohinniyan canniyewicaya, ewicakiyapi kta.

5 Tuka niišta wanyakapi kta, qa niye hehapi kta; Jehovah yatankapi nunwe, Israel makoce ihanke kin etanhan.

6 Wicacinca wan atkuku kin ohokida, qa wowidake wan itancan tawa kin kokipaece. Hecen miš miye atemayanpi waun kinitokam mazawakšica kin iyecece kta, han ohomakidapi kin tukte e he? qa itancan mayanpi waun kinhan komakipapi kin tukte e he? wawayušna yaunpi, micaje wahteyadapi šni kin, Jehovah ozuye yuhe cin heniciyapi ce. Tuka, Taku e en nicaje wahteundapi šni he, ehapi.

7 Owayušna mitawa akan woyute asapapi kin wamayakiyusnapi ece. Tuka, Taku e en unniyušapapi he, ehapi. Jehovah tawahnawotapi kin he wahtešni ce, ehapi kin heon.

8 Qa taku išta on e cin he wayadušnapi kinhan, he šice šni he? qa taku huste qa wayazanka kin wayadusnapi kinhan, he šice šni he? Wanna wicaštayatapi nitawa kin qu wo; he iyokipiyaye kta he, qa niite yuwankan inicu kta he, Jehovah ozuye yuhe cin eya.

9 Heon nakaha, ceciciyapi, Wakantanka ite kin yuwinta po, hecen onsiunkidapi kta: Niye ninapepi kin etanhan dececa nakaeš: niitepi yuwankan inicupi kta he, Jehovah ozuye yuhe cin eya.

10 Niyepi kaeš etanhan tuwe tiyopa kin ecen iyeye kta he? han, wokajuju codan owayušna mitawa akan ceyatipi kte šni. Ecaca iyomayakipipi šni ce, Jehovah ozuye hduhe cin eya; qa ninapepi etanhan wošna wan iwacu kte šni.

11 Wihinanpe cin etanhan, qa wiiyaye cin hehanyan Ikcewicašta oyate kin ehnahna micaje tanka kta nakaeš; qa owanka owasin en micaje on wizinye izitapi kta, qa wošnapi ska wan: Ikcewicašta oyate kin ehnahna micaje kin tanka kta nakaeš, Jehovah ozuye yuhe cin eya.

12 Tuka niye he dašicapi, Jehovah tawahnawotapi kin yušapapi, qa tawaskuyeca, woyute tawa kin he wahtešni ce, ehapi kin heon.

13 Nakun hehapi; Ecahe, taku on mdokitapi cee: qa apoyainšinpi, Jehovah ozuye yuhe cin eya. Nakun taku yahdehdecapi, qa hušte kin, qa wayazanke cin hena ayaupi ece; hecen wošna ayahipi ecee. De ninapepi etanhan iwacu kta iyececa he, Jehovah eya.

14 Tuka tuwe optaye tawa kin en mdoka wan yuha, tuka wicahnayan, qa iciconze ca Itancan taku šica wan wakiyušna kinhan, he yašicapi kta ce: Wicaštayatapi tanka kin he miye nakaeš, qa Ikcewicašta oyate kin ehnahna micaje kin wowinihan hinca, Jehovah ozuye yuhe cin eya.

MALACHI WICOWOYAKE 2.

1 Unkan nakaha, wawayušna yaunpi, niyepi on wowasi kin dee:

2 Wanayahonpi šni, qa micaje wowitan yaqupi kta cante en enicihnakapi kte šni hecinhan, woyušice wan en aciyapi kta, qa nakun woyuwašte nitawapi kin mdušice kta, Jehovah ozuye yuhe cin eya: han, wanna hena mdašica, cante en eyecihnakapi šni kin heon.

3 Iho, wojupi nitawa iyopeciciyapi kta, niitepi kin en tacesdi awakada kta, wošnapi nitawapi tacesdi kin hee; unkan he ekta aniyanpi kta.

4 Unkan woahope kin de cicahipi he sdonyakiyapi kta, wicotakuye mitawa kin he Levi kici un kta e heon, Jehovah ozuye yuhe cin eya.

5 Wicotakuye mitawa kin he wiconi qa wookiye on kici un: unkan wokokipe on hena waqu, hecen komakipe kta, qa micaje itokam nihinciye kta e heon.

6 Wowicake woope kin he iye i kin ohna yanka, qa iha en wohnaye takudan iyeyapi šni nakaeš: iye qe wookiye qa woyuecetu yuha mici mani, qa wicota woahtani etanhan wicayuhomni ce.

7 Wawayušna iha kin wosdonye kpatan kta nakaeš, qa iye i kin etanhan woope kin akitapi kta iyececa: Jehovah ozuye yuhe cin wahosiye tawa kin hee nakaeš.

8 Tuka niyepi canku kin icunonpa idadapi; wooue kin en wicota nasnawicayakiyapi; Levi wicotakuye tawa kin he dušicapi ece, Jehovah ozuye yuhe cin eya.

9 Heon etanhan miš eya oyate owasin ehnahna wahtešni qa sica cicagapi; mitacanku kin yapatanpi šni, tuka woope kin en wicite iwandakapi ecee kin he iyececa.

10 Owasin ateyapi wanjidan unhapi šni he? Wakantanka wanjidan icahunyanpi šni he? hecen tokeca hunkakewicunyanpi wicotakuye tawapi yušicapi kin on, wicašta otoiyohi iye sunkaku en šicaya unkokicihanyanpi he?

11 Judah šicaya ohanyan, qa wowahtešni wan Israel qa Jerusalem en econpi ece; Jehovah tipi Wakan waštekidake cin he Judaj yušica, qa taku wakan tokeca cunwintku kin yuza nakaeš.

12 Wicašta tuwe hecon kin he Jehovah ihangye kta, tuwe kikta un, qa tuwe waayupte, Jacob tawakeya kin etanhan, qa tuwe Jehovah ozuye yuhe cin wošna wan wakiciyušna kinhan.

13 Unkan de inonpa ecanonpi, Jehovah owayušna tawa kin istamnihanpe, qa ceyapi, qa šicahowayapi on ayakahpapi; hecen wošnapi kin icimana ekta etonwe šni, qa ninapepi etanhan woiyokipi kin icu šni.

14 Tuka, Tokeca he? ehapi. Jehovah waayatanin yanka, niye qa nitawin hokšiwinna duze ciqon otahedan, he en šicaya oyecihanyan nakaeš: Tuka he qe nitawin, qa winohinca en niciconze cin hee.

15 Unkan wanjidan kage šni he? Woniya wookapte kin hduha tuka qon. Unkan tokeca wanjidan he? Wakantanka tawicoicage kin akita heon. Heon etanhan nilaniyapi kin awanhdaka po; qa tuwedan tawicu hoksiwinna yuze cin he šicaya okicihanye kte šni.

16 Ehpekiciyapi kin he šicewadakace, Jehovah Israel Wakantanka tawa kin eya: nakun tuwe tawicu on wošice ahdahpa, Jehovah ozuye yuhe cin eya. Heon etanhan nitaniyapi kin awanhdaka po, šicaya oyahandapi kte šni e heon.

17 Nioiepi kin on Jehovah dasihinpi ece. Tuka, Taku e on unyasihtinpi he, ehapi. Tohan, Tuwe taku šica econ kin otoiyohi Jehovah išta kin en wašte, qa hena iyowicakipi ce, ehapi kinhan: Qa, Woyaco Wakantanka kin tukten un he, ehapi kinhan.

MALACHI WICOWOYAKE 3.

1 Iho, wahoši mitawa yewaši kta, unkan iye mitokam canku kin yuwiyeye kta: Hehan Itancan oyakidepi kin he ihnuhanna u kta, tipi wakan tawa kin ekta; han, wicotakuye wahosiye wašteyakidapi kin hee; iho, iye hi kta ce, Jehovah ozuye yuhe cin eya.

2 Tuka anpetu en hi kinhan he tuwe okihi kta he? qa ihdutanin kinhan tuwe najin kta he? wadoye peta tawa kin iyececa, qa wayujaja wipajaja tawa kin iyececa nakaeš.

3 Qa mazaska sdoye ca yuecedan iyotanke kta; qa Levi cinca kin wicayuecedan kta, qa mazaskazi mazaska ko iyecen wicayucan kta; hecen woowotanna en wošna wan Jehovah wakiyusnapi kta.

4 Hehan Judah qa Jerusalem tawošna kin Jehovah iyokipi kta, hekta anpetu kin en, qa tanihan waniyetu qon en iyececa.

5 Tuka woyaco on nikiyepidan wau kta: qa inahniyan waamdatanin kta, wakan kagapi kin en, qa wawicihahapi econpi kin en, qa tona wohnaye on iciconzapi kin en, qa tona wicašta opetonpi, wiwazica wamdenica ko iyopeye tawapi wicakipi ece, qa oyate tokeca kin wicakiyusepi, qa komakipapi šni kin hcna en, Jehovah ozuye yuhe cin eya.

6 Jehovah he miye, mihdutokeca šni; heon etanhan, Jacob cinca, ihansniyanpi šni ce.

7 Nihunkakepi anpetu tawapi kin ehantanhan mitawoahope etanhan icunom idadapi, qa hena yapatanpi šni ece. Miye en ihdou po; kinhan niyepi en mihdoku kta ce, Jehovah ozuye yuhe cin eya. Tuka, Taku on unkihdoupi kta he? ehapi.

8 Wicašta wan Wakantanka wamakinon kta he? Tuka niye mayakinonpi ece. Tuka, Taku e maunnicinonpi he? ehapi. Wikcemnamna qa wošnapi kin hena.

9 Woyašice on niyušicapi, tuka wamayakinonpi ece, oyate kin de ocowasin.

10 Wikeemnamna kin iyukpa mazopiye tipi kin en au po, hecen wati ohna woyute yuke kta, qa heon wanna imayukcan po, Jehovah ozuye yuhe cin eya; kinhan mahpiya owanyeye kin ciciyuftdokapi kta, qa woyuwašte wan acicaštanpi kta, yuhepica ni hehanyan.

11 Nakun niyepi on watemye kin he iyopewaye kta, hecen maka nitawapi oicage kin ihangye kte šni; qa nitamaga en hastanhanka iyuwi kin štunkaka ehpeye kte šni, Jehovah ozuye yuhe cin eya.

12 Hehan oyate owasin niyawaštepi kta; woiyokipi makoce kin he niyepi kta nakaeš, Jehovah ozuye yuhe cin eya.

13 Miye on nioiepi kin wohitipika hinca, Jehovah eya. Tuka, Taku e šicaya unkeniciyapi he? ehapi.

14 Wakantanka ohodapi kin he takušni ce, ehapi: qa tawoahope unkiciyuhapi, qa Jehovah ozuye yuhe cin itokam iyokisinya maunnipi kin etanhan wokajuju tukte e he?

15 Qa wanna wananicidapi kin hena wicunyawaštepi ece: han, tona taku šica econpi ece kin hena icahwicayapi; han, tona Wakantanka iyutanpi kin hena niwicayapi cee.

16 Hehan tona Jehovah kokipapi kin otoiyohi wokiciyakapi ecee: unkan Jehovah anohya yanke ca nahon, qa iye itokam wokiksuye wowapi wan kagapi, tona Jehovah kokipapi qa iye caje awacinpi ece kin hena on.

17 Unkan hena mitawa kta ce, Jehovah ozuye yuhe cin eya; anpetu en wohdamna micica e cinhan; qa hena cantewicawakiye kta, wicašta wan cinhintku wowidagye cin cantekiye cin iyececa.

18 Hehan yahdicupi kta, qa iwandakapi kta, wicašta owotanna qa wicašta šica kici, tuwe Wakantanka wowidagye, qa tuwe wowidagye šni kin otahedan.

MALACHI WICOWOYAKE 4.

1 Iho, anpetu kin u, mazaoceti kin iyecen ide kta: unkan tona wahanicidapi qa tona šicaya econpi kin iyuhpa aguyapi hu kin heca kta; qa anpetu u kte cin he huhnahwicaye kta, hecen hutkan qa adetka wanin ehpewicaye kta ce, Jehovah ozuye yuhe cin eya.

2 Tuka niyepi, micaje koyakipapi kin, Woowotakna Wi kin anihinanpapi kta, qa tahupahu kin en wookiziye yuke kta: hecen tankan dapi kta, qa ptejicadan tatanka tipi kin etanhan, iyecen psipsin yaunpi kta.

3 Qa šica pi kin hena awicayahanpi kta; hena e nisihapi sicuha ihukuya caftota kin heca kta, anpetu kin en decen ecamon kinhan . Jehovah ozuye yuhe cin eya ce.

4 Israel ocowasin on Moses mitaokiye toope Horeb he kin akan econwicawasi qon he kiksuya po, wowaši qa woyaco kin hena.

5 Iho, Jehovah taanpetu tanka qa wohitike cin he u šni  itokam, Elijah wicašta wokcan kin he niyepi en uwaši kta.

6 Unkan he qe wicaatkuku wicacinca kin ekta cante wicakiyuhomni kta, qa wicacinca kin iš wicaatkuku cante en yušwicakiye kta ecee: hecece ni kinhan, wau qa maka kin woya ce wan on awape kta ce.