Obadiah

OBADIAH

l Obadiah towanyake kin. Edom on Itancan Jehovah kaken eya ce: Jehovah etanhan wicowoyake wan naunhonpi, qa wahosiye wan oyate wicehna yešipi; Najin po, qa he kici unkicizapi kta on inaunjinpi kta ce.

2 Iho, Ikcewicašta ehna cistinna cicaga; nina wahtenidapi šni yaun.

3 Imnija otkoka ohna, oyanke tehanwankantu kin en yati, nicante towahanicida kin he nihnayan ece: cante mahen, Tuwe e makata ehpemaye kta he? eha ece.

4 Wamdi iyecen wankan iyeniciya, qa hohpi nitawa wicanhpi kin ehna eyehnaka ešta,hetanhan kun ehpeciye kta ce, Jehovah eya.

5 Wamanon sa kin heca, kaeš wabotica hanyetu en nihipi kinhan; hehehe nitakuni šni; tohanyan imnanpi hehanyan manonpi kte ni he? hastanhanka yuspipi kin en nihipi unkans, iyage wanjikji okaptapi kte šni he?

6 Esau taku tawa kin kahipi hinca! taku anakihbe cin hena akitapi hinca!

7 Wicašta okodakiciye nitawa etanhan owasin heyata iyeniyanpi; wicašta wookiye en nici unpi kin hena nihnayanpi, niktepidan; aguyapi nitawa wohnaye ee niciyapi: wookahnige takudan en un šni.

8 Anpetu kin he en Edom etanhan wicašta ksapa awihnuniwicawaye kte šni he, qa wowiyukcan Esau he kin etanhan? Jehovah eya.  

9 Teman, wicašta waditaka nitawa kin hena nihinciyapi kta, hecen Esau he kin etanhan wicaktepi on owasin ihangyapi kta.

10 Jacob nisunka kiunniyaye cin on etanhan wowištece anicahpe kta, qa ihanšniyanpi kta owihanke wanica.

11 Anpetu kin en iyotakons inayajin; anpetu en tawahpaya toka kin akiyahdapi, qa wicašta tokeca iye tatiyopa kin ohna iyayapi, qa Jerusalem on oeconna econpi qehan, hehan niye qe iyewicaceca yaun.

12 Nisunka taanpetu kin en opayakihte kte šni tuka: anpetu en ihangyapi qon he ehan Judah cinca kin iwankam widuskin kte šni tuka: nakun woiyokišice anpetu kin hehan i yakapa kte šni tuka qon.

13 Anpetu en atakunipi šni qehan mitaoyate tatiyopa kin ohna idade kte šni; han, anpetu en atakunipi šni qehan niye qe kakisyapi kin en eyatonwe kte šni; qa anpetu en atakunipi šni qehan tawowijice kin ekta nape yeyaye kte šni tuka.

14 Nakun tona etanhan najicapi qon hena ihangwicayaye kta on canku ipawege en inayajin kte šni tuka: qa woiyokišice anpetu kin en, tona iye etanhan okaptapi kin hena hiyuwicayaye kte šni tuka.

15 Jehovah taanpetu kin Ikcewicašta oyate owasin wicikiyedan nakaeš: niye token ecanon kin he iyecen ecaniconpi kta: niohan kin nipa kin en nihdi kta.

16 Niye he wakan mitawa akan wadatkanpi kin he iyecen Ikcewicašta kin iyuhpa ohinniyan wayatkanpi kta; han, wayatkanpi qa wanapcapi kta, qa tohinni unpi šni iyecen unpi kta.

17 Tuka Zion he kin akan woehdaku yuke kta; unkan he wakan kta; qa Jacob tiyohnaka taku tawayapi qon hena ehdakupi kta.

18 Unkan Jacob tipi kin he peta kta, qa Joseph tipi kin he ide heca kta; qa Esau tipi kin he aguyapi hu kin ee kta; unkan ehna ideyapi kta qa huhnahyapi kta; hecen Esau tipi kin etanhan okaptapi wanice kta: Jehovah hecen oyaka nakaeš.

19 Hehan okagatanhan kin Esau he kin yuhapi kta, qa Philistine i omdaye kin: Nakun Ephraim tamas a qa Samaria makoce kin yuhapi kta; qa Benjamin Gilead yuhe kta.

20 Qa Israel cinca wayaka unpi wicota kin de Canaan oyate om unpi kin hena Zarephath hehanyan yuhapi kta; qa Jerusalem etanhan wayaka unpi, tona Sepharad en unpi kin hena itoka; a otonwe kin yuhapi kta.

21 Qa wanikiya kin heca Zion he kin ekta upi kta, Esau he kin yacopi kta: Unkan wokiconze kin he Jehovah tawa kta ce.