What Now?

So, what's next? Well, we have gotten the New Testament up there for y'all to work with. We will, God willing, next begin the Old Testament in the same way. We need to get the thorough going over done to make sure it's all correct. However, we also feel like time is too short to hold off on the Old Testament while we are working on the corrections phase as it usually takes people years. Forget putting the rest of it off till then! This needs to be in the hands of the people so it can be worked on like a wiki (big smile).
God bless y'all and please keep us in your prayers! <3

JOHANNES WAYUOTANIN TAWA KIN Chapters 20-22 Revelation/ Apocalypse Dakota New Testament

JOHANNES WAYUOTANIN TAWA KIN

WAYUOTANIN. WICOWOYAKE 20.

1 Hehan mahpiya ohnihde wan mahpiya kin eciyatanhan kun u wanmdaka, he wošbe ceteta wanica tiyopa iyuhdoke kin yuhe ca, nape ohna maza icicahiha wan tanka:

2 Qa he wamduška kin iyahpaya, sintehda wanakaja tanhan un kin, Wakanšica qa Satan hee, qa kaška ehnaka, waniyetu kektopawinge hehanyan;

3 Qa wošbe ceteta wanica he en ehpeye ca onataka, qa ipuspe wan on apuspa, hecen oyate kin wicahnaye kte šni, waniyetu kektopawinge kin ihuniyanpi šni kin hehanyan. Unkan he iyohakam ptenyedan kiyuškapi kta.

4 Unkan oiyotanke kin heca wanmdaka, qa tona akan iyotankapi kin hena woyaco yuhapi. Unkan tona Jesus oyakapi kin on, qa Wakantanka oie kin on pa bawicaksapi qon, wamanica kin wakagapi ko ohodapišni, qa wowapetogton tawa kin itepi, qa napepi kin en yuhapi šni, hena nagipi kin wanwicamdaka, ake kinipi qa Messiya kin kici ounyanpi, waniyetu kektopawinge hehanyan.

5 Tuka wicate cin unmanpi kin ake kinipi šni, waniyetu kektopawinge kin henakeca šni kin hehanyan. Piya iwicacage tokaheya kin hee.

6 Tuwe piya iwicacage tokaheya kin en ope cinhan he yawaštepi qa owotanna un. Hena wiconte inonpa kin iyowicahi kte šni, tuka Wakantanka qa Messiya kin ekta wawayušnapi kin heca wicayawapi kta, qa kici ounyanpi kta, waniyetu kektopawinge hehanyan.

7 Unkan waniyetu kektopawinge kin henakeca kinhan, Satan wicakaška tipi kin etanhan kiyuškapi kta.

8 Qa oyate kin wicahnaye kta e makata tate ouye topa kin ektakiya ye kta, qa Gog Magog kici zuya u wicaši kta; hena miniwanca wiyaka sukaza kin iyecen wicota.

9 Unkan maka ohdakinyan ohna yapi, qa wicašta owotanna ewanke cin ihdukšan hinajinpi, qa otonwe wakan kin nakun. Unkan mahpiya kin etanhan Wakantanka eciyatanhan peta hiyu, qa huhnahwicaya.

10 Unkan wakanšica, hena wicahnaye cin he peta qa inyanzi mde kin en iyohpeyapi, heciya wamanica qa woitonšni wokcan kin unpi, qa anpetu han yetu ko owihanke wanin kakijapi kta.

11 Hehan oiyotanke ska tanka wan wanmdaka, qa tuwe akan iyotanke cin he ite kin etanhan maka mahpiya ko najicapi; qa tukten wanke kte cin iyeyapi šni.

12 Qa wicate ciqon, cistinpidan tankinkinyanpi ko, hena Wakantanka itokam najinpi, wanmdaka. Unkan wowapi kin yumdayapi; qa wowapi tokeca wan yumdayapi, wiconi wowapi kin hee: Qa wicate ciqon token wowapi kin en kagapi kin he iyecen wicayacopi, iye wicohan kin eciyatanhan.

13 Unkan miniwanca kin wicate cin tona en un kin hena hiyuwicaya, qa wiconte Hades ko wicate cin tona en unpi kin hena hiyuwicayapi. Qa iye wicohan kin eciyatanhan otoiyohi wicayacopi.

14 Unkan wiconte qa Hades kin hena peta mde kin en iyohpewicayapi. Wiconte inonpa kin hee.

15 Unkan tuwe wiconi wowapi kin en owapi iyeyapi šni kin he peta mde kin en iyohpeyapi ece.

WAYUOTANIN. WICOWOYAKE 21.

1 Hehan mahpiya teca qa maka teca wan wanmdaka. Mahpiya tokaheya qa maka tokaheya kin hena yutokan iyeyapi, qa miniwanca wanica.

2 Unkan Johannes he miye e otonwe wakan kin wamdaka, Jerusalem teca kin hee mahpiya kin etanhan, Wakantanka eciyatanhan kun u, winohinca wan wicašta hihna ton kte cin on wiyeya un kin he iyececa.

3 Unkan mahpiya kin eciya\tanhan wicaho wan tanka nawahon, kaken eya, Wanyaka wo, Wakantanka wakeya tawa kin wicašta kin ehna han, qa iye hena om ti kta, qa hena e oyate tawawicaye kta, qa Wakantanka hince cin hena om un kta, qa Wakantanka tawapi kta.

4 Qa wicišta kin etanhan Wakantanka ištamnihanpe owasin wicakipakinte kta, qa hetanhan wiconte wanice kta, wicocante šica, wicaceya, wicokakije ko wanice kta, taku tokaheya un kin wanna henakeca.

5 Unkan tuwe oiyotanke kin akan kiyotanke cin he, Ito taku owasin teca wakaga ce, eya. Hehan, Wowapi ecen kaga wo, hena oie kin wicake ca owotanna, emakiya.

6 Qa ake kaken emakiya, Wanna henakeca. Alpha qa Omega, otokahe qa owihanke kin he miye ce. Tuwe ipuza kinhan he wiconi mini hdoka kin etanhan iyunwin codan yatke wakiye kta.

7 Tuwe ohiye cinhan he taku owasin tawaye kta, qa iye Wakantanka maye kta, qa miš he cinkšiwaye kta.

8 Tuka tona wikopapi, qa wicadapišni, qa wahtepi šni, qa tin wicaktepi, qa wawicihahapi econpi sa, qa wapiyapi, qa wakagapi ohodapi sa, qa oitonpišni kin hena owasin mde wan peta qa inyan zi on itkonyahe cin he ohna taku tawapi kta, wiconte inonpa kin hee.

9 Hehan mahpiya ohnihde šakowin wiyatke šakowin wicokakije ehake šakowin kin on ojudan yuhapi qon hena etanhan wanji hi, qa omakiye ca heya, U wo, winohinca wan tahcaska cinca kin tawicuye kte cin he cicipazo kta ce.

10 Unkan Woniya kin on paha wan tanka tehan wankantuya kin ekta amaye ca, otonwe tanka kin, Jerusalem wakan, mahpiya kin etanhan Wakantanka eciyatanhan kutkiya u kin he makipazo;

11 Wakantanka wowitan tawa kin yuha, qa wiyatpa kin he inyan tehika iyececa, inyan wan acahšdaya iyececa:

12 Qa ihdukšan aconkaškapi tanka qa tehan wankantu kin, qa tiyopa ake nonpa yukan, qa tiyopa kin hena en mahpiya ohnihde ake nonpa yukanpi, qa akan wicacaje owapi, Israel cincapi wicoun ake nonpa kin hena eepi.

13 Wiyohiyanpa tanhan tiyopa yamni; qa waziyapa tanhan tiyopa yamni; qa itokaga tanhan tiyopa yamni; qa wiyohpeya tanhan tiyopa yamni.

14 Qa otonwe conkaške kin teku akan he cin hena ake nonpa, qa tahcaska cinca kin yewicaši ake nonpa cajepi kin hena en un.

15 Unkan tuwe omakiye cin he mazaskazi cedihu wan yuha, on otonwe, qa tiyopa kin, conkaške ko iyute kta.

16 Otonwe kin oise torn yukan, qa ohdakinyan kin ohanske cin kici akidehankeca. Unkan cedihu kin on otonwe kin iyuta, wiyutapi kektopawinge ake nom; ohdakinyan ohanske cin obosda- tu ko akidecen han.

17 Qa conkaške kin he iyuta, wicišpa opawinge sanpa wikcemna topa sam topa, wicašta ihduta, mabpiya ohnihde ihdute cin hee.

18 Conkaške kin he iyaspis inyan tehika on kagapi, qa otonwe kin he mazaskazi ecedan, janjan ecedan iyececa.

19 Qa otonwe conkaške kin taku akan he cin he inyan tehika ocaje owasin en un. Taku akan he cin tokaheya kin he iyaspis; inonpa kin he saphiros; iyamni kin he kalkedon; itopa kin he smaragdos;

20 Qa izaptan kin he sardonis; išakpe kin he sardius; išakowin kin he krusolitos ; išahdogan kin he berulos; inapcinwanka kin he topaz; iwikcemna kin he krusophrasos ; iakewanji kin he huakinthos; qa iakenonpa kin he amathustos.

21 Tiyopa ake nonpa kin hena inyan tehika ocaje ake nom, tiyopa otoiyohi inyan tehika wanjidan; qa otonwe ocanku kin he mazaskazi ecedan janjan kin iyecen wiyatpa.

22 Qa he en tipi wakan wanica; Itancan Wakantanka Iyotan Wašake cin, qa tahcaska cinca kin hena tipi wakan kin eepi.

23 Qa otonwe kin he anpetu wi, hanyetu wi ko en iyoyanpapi kta cinpi šni; Wakantanka wowitan tawa kin iyoyanpa, qa tahcaska cinca kin he petijanjan kin hee.

24 Qa oyate kin tona ni wicayapi kin hena iyoyanpa kin he en manipi kta; qa wicaštayatapi maka akan unpi kin hena wowitan qa wootanin tawapi kin en ahipi kta.

25 Qa tiyopa kin hena anpetu icunhan ecen iyeyapi kte šni; qa heciya hanyetu wanica.

26 Oyate hiyeye cin wowitan, qa wootanin kin en ahipi kta.

27 Qa taku wišamye ašamye cin he en i kte šni, qa taku šicaya econ, qa itonšni kin ; tuka tona cajepi kin wiconi wowapi tahcaska cinca tawa kin en owicawapi kin henanapidan.

WAYUOTANIN. WICOWOYAKE 22.

1 Hehan wakpa wan wiconi mini ska kin, cahtowata iyecen ska, he makipazo, he Wakantanka qa tahcaska cinca oiyotanke tawa kin etanhan kaduza.

2 Unkan canku cokaya, qa wakpa kin anokatanhan wiconi can kin icaga, he waskuyeca ocaje ake nonpa aicaga, wi otoiyohi waskuyeca aieahya ece; qa can wapa kin hena oyate kin okizi wicaya ece.

3 Unkan heciya wicayušice wanice kta; tuka Wakantanka oiyotanke tawa kin he, qa tahcaska cinca tawa kin hen he kta, qa taokiye kin hena tawoahope kin ecen econpi kta:

4 Qa itohnake kin wanyakapi kta, qa caje kin iye itepi kin en yuhapi kta.

5 Qa heciya hanyetu wanice kta; qa petijanjan qa anpetu wi iyoyanpa kin he cinpi šni; Itancan Wakantanka iyoyamwicaya ece; qa ohinniyan owihanke wanin wicaštayatapi ounyanpi kta.

6 Hehan hecen emakiya, Wicoie kin dena wacinyepica qa wicakapi. Qa Itancan Wakantanka wicašta wokcanpi wakan tawapi kin hee, taku ecadan u kte cin hena taokiye kin owicakiyake kta e on ohnihde tawa kin u ši.

7 Iho ecadan wau kta. Tuwe wowapi kin de wowiyukcan oie kin tanyan yuhe cinhan he yawaštepi ce.

8 Unkan Johannes he miye e hena wanmdake ca nawahon. Hena nawahon, qa wanmdaka; unkan mahpiya ohnihde hena wanyagmakiye cin he siha kin en makata ehpemiciye, ohowada kta tuka.

9 Hehan hemakiya, Ihnuhan hecanon kin; miš eya ookiye cici waun, qa nihunkawanji wicašta wokcanpi kin etanhan waun, qa tona wowapi kin de oie yuhapi kin hena owicawapa; Wakantanka ohoda wo.

10 Hehan ake hemakiya, Wowapi kin de wowiyukcan oie kin hena sutaya apuspe šni wo. Wanna ecadan kta ce.

11 Tuwe owotanna šni kin ohinniyan owotanna kte šni, qa tuwe ašape cin he ohinniyan ašapa un nunwe; qa tuwe owotanna kin he ohinniyan owotanna kta, qa tuwe ecedan kin he ohinniyan ecedan un nunwe.

12 Unkan iho, kohanna wau kta, qa taku mitawa kin hduha waun, otoiyohi iye wicohan kin eciyatanhan wicawaqu kta.

13 Alpha qa Omega, tokapa qa hakakta, otokahe qa owihanke kin he miye ce.

14 Tona tawoahope kin ecen econpi kin hena wicayawaštepi, hecen wiconi can kin en ya okihipi kta, qa tiyopa kin ohna otonwe kin timahen yapi kta.

15 Tuka šunka, qa tona wapiyapi sa, qa wiinahmanpi sa, qa wawicihahapi econpi sa, qa wakagapi ohodapi sa, qa tuwe itonšni waštedake ca econ kin hena tankan yakonpi ece.

16 Jesus he miye ce, okodakiciye kin ekta niyepi kin en hena oniciyakapi kta e heon ohnihde mitawa kin u waši. David can hutkan adetka ko he miye, qa anpao wicanhpi nina iyege cin.

17 Unkan Woniya kin tawicuyapi kin kici, Kuwa, eyapi. Qa tuwe nahon kinhan he, Kuwa, eye kta. Qa tuwe ipuza kinhan, he u kta. Qa tuwe cin kinhan he iyunwin codan wiconi mini kin icu nunwe.

18 Tona wowapi kin de wowiyukcan oie kin nahonpikin hena kaken ewicawakiya; Tuwe wicoie kin dena en taku sanpa kage cinhan, he wicokakije wowapi kin de en cajeyatapi kin Wakantanka qu kta:

19 Qa tuwe wowiyukcan wowapi oie kin dena yuaoptetu kinhan, he taku tawakte cin wiconi wowapi kin etanhan Wakantanka icu kta, qa otonwe wakan kin etanhan, qa taku tona wowapi kin de en kagapi kin he etanhan.

20 Tuwe hena yaotanin kin he kaken eya, Iho, kohanna wau kta ce. Amen. Itancan Jesus hecen yau nunwe.

21 Jesus Messiya Itancan unkitawapi kin he towaonšida kin niyepi owasin en nicipi un kta. Amen.

JESUS ITANCAN KIN TATANPI NUNWE.

Revelation/ Apocalypse 16-19 JOHANNES WAYUOTANIN TAWA KIN Dakota New Testament

JOHANNES WAYUOTANIN TAWA KIN.

 WICOWOYAKE 16.

1 Unkan tipi wakan kin etanhan wicaho wan tanka nawahon, mahpiya ohnihde šakowinpi qon hewicakiya, Yapi, qa wiyatke Wakantanka wocantiyahde tawa kin hena maka kin en akaštan po, eya.

2 Hehan mahpiya ohnihde tokaheya kin u, qa wiyatke tawa kin maka kin en akaštan. Unkan wicašta tona wamanica wowapetogton tawa kin yuhapi, qa iyacinpi kin ohodapi kin hena en šiyaka o tanka qa šica awicahinhpaya.

3 Unkan mahpiya ohnihde icinonpa kin wiyatke tawa kin miniwanca kin en akaštan; unkan he we icaga, wicate cin we kin iyececa, qa miniwanca kin en taku niyake un kin owasin tapi.

4 Unkan mahpiya ohnihde iciyamni kin wiyatke tawa kin wakpa qa wakoniya kin hena en akaštan; unkan hena we icaga.

5 Hehan mahpiya ohnihde wan mini kin yuhe cin he kaken eya, nawanon; Itancan, tuwe un, qa un qon, u kte cin he niye, oniowotanna, hecen wicadaco :

6 Wicašta owotanna, qa wokcanpi kin hena we kin wicakipapsonpi; qa hecen we yatke wicayakiya, he iyekicihantupi nakaeš.

7 Unkan wanji tokeca wahna wošnapi kin eciyatanhan kaken eya, nawahon; Itancan, Wakantanka lyotan wašaka, wadaco kin he ohinniyan owotanna qa wicaka ce.

8 Hehan mahpiya ohnihde icitopa kin wiyatke tawa kin anpetu wi kin en akaštan. Unkan he wicašta kin peta on wicagu kta e qupi.

9 Qa iyokatapi tanka kin wicašta wicagu, qa hecen Wakantanka wicokakije hena yuhe cin he caje kin oštehdapi, qa wowitan qupi kta on ihduecetupi šni.

10 Unkan mahpiya ohnihde icizaptan kin wiyatke tawa kin wamanica oyanke tawa kin en akaštan; unkan wokiconze tawa kin otpaza ojudan, qa wayazanpi on cejipi kin hdahtahtakapi.

11 Qa wicokakije qa šiyaka o kin on etanhan mahpiya Wakantanka kin yašicapi, qa iye ohanpi kin on iyopeiciyapi šni.

12 Unkan mahpiya ohnihde icišakpe kin wiyatke tawa wakpa tanka kin Euphrates, he en akaštan; unkan mini kin puza aya, hecen wicaštayatapi wiyohiyanpa tanhan au kin cankukin wicakiciyumdayapi kta.

13 Unkan wamduška i kin etanhan, qa wamanica i kin etanhan, qa woitonšni wokcan kin he i kin etanhan, taku wakan šica yamni, hnaška iyececa, hena hiyu wanmdaka.

14 Hena taku wakanšicapi taniyapi kin hecapi, wowapetokeca econpi, qa maka sitomniyan wicaštayatapi kin, qa wicoicage ocowasin ekta yapi, Wakantanka lyotan wašake cin anpetu tawa tanka kin en zuya awicaupi kta e heon.

15 Iho, wamanon sa wan iyecen wau ce. Tuwe kiktahan un, qa wokoyake kpatan kin he yawaštepi ece, hecen tancodan mani kte ni, qa wištece cin wanyakapi kte šni.

16 Unkan Hebrew iapi kin eciyatanhan tukten Armageddon eciyapi, hen witaya u wicaya.

17 Hehan mahpiya ohnihde icišakowin kin wiyatke tawa kin okaduze cin en akaštan. Unkan mahpiya kin ekta tipi wakan kin etanhan, qa oiyotanke kin etanhan, wicaho tanka wan tanin, qa heya, Wanna henakeca.

18 Unkan iho wicaho taninpi, qa wakinyan hotonpi, qa wakanhdi tanin, qa maka škanškan wan tanka, wicašta kin maka akan iwicacage cin ehantanhan maka škanškan iyecen tanka wanica.

19 Qa otonwe tanka kin he yamni kiyušpapi; qa otonwe Ikcewicašta tawapi kin hena hinhpayapi. Qa Babylon tanka kin he Wakantanka itokam kiksuyapi, wocanniye ohitike cin miniša wiyatke kin qu kta heon.

20 Unkan wita kin owasin najica, qa he kin hena tuktedan iyeyapi šni.

21 Unkan mahpiya kin eciyatanhan wasu tanka wicašta kin awicahinhe, otoiyohi taku tke utapi opawinge wanjidan inskokeca. Unkan wasu vvicokakije kin on wicašta kin Wakantanka yašicapi ece, he wokakije iyotan tanka kin heon.

WAYUOTANIN. WICOWOYAKE 17.

1 Hehan mahpiya ohnihde šakowin wiyatke šakowin yuhapi qon etanhan wanji u, qa omakiye ca hemakiya, Deciya u wo, wawicihahapi econ sa tanka mini ota akan iyotanke cin he token yacopi kin cicipazo kta ce.

2 He kici wicaštayatapi maka akan unpi kin wawicihahapi econpi ece, qa tona maka akan unpi kin wawicihahapi tawa miniša kin on witkopi ce.

3 Hehan woniya kin on hewoskan makoce ekta amayan. Unkan winohinca wan wamanica duta wan akan iyotanke cin he wanmdaka; he waoštehdapi wicacaje kin ojudan, qa pa šakowin, he wikcemna ko ikoyaka.

4 Unkan winohinca kin he taku stan duta ko koyake ca, mazaskazi, inyan tehika, oinpidan ko hena on wiyatpa un, qa nape kin ohna mazaskazi wiyatke wan yuha waoštehdapi, wawicihahapi ko ašamyapi kin on ojudan.

5 Qa ite kin en caje wan owapi, Woanahbe kin, Babylon tanka, maka kin akan wawicihahapi, qa wayašicapi hunku kin hee.

6 Unkan wicašta owotanna we kin winohinca kin he iwitko wanmdaka, qa tona Jesus yaotaninpi kin hena we kin on. He wanmdake ca nina imanihan waun.

7 Hehan mahpiya ohnihde kin he, Tokeca e ininihan he? emakiya; Winohinca woanahbe kin be ociciyake kta, qa wamanica akan iyotanke cin, pa šakowin, qa he wikcemna hduhe cin he nakun.

8 Wamanica wandake cin he un qon, qa un šni kin; qa wošbe cetete wanica etanhan hiyu kta, qa wicotakuni šni ekta hde kta. Qa tona maka akan unpi, maka kagapi kin ehantanhan, cajepi kin wiconi wowapi kin en owapi šni, hena wamanica kin wanyakapi kinhan yušinyayapi kta, he un qon, qa un šni, qa hinahin un kin heon etanhan.

9 Unkan wicotawacin wicoksape yuhe cin he den un. Pa šakowin kin hena paha šakowin winohinca kin akan iyotanke cin hee;

10 Qa wicaštayatapi šakowin kin heepi, zaptan wanna hinhpayapi, qa wanji nahahin en yanka, qa wanji iš hinahin hi šni; he hi kinhan ptecedan he kta.

11 Qa wamanica wandake ciqon he mi qon, qa un šni kin, he icišahdogan kin ee, šakowinpi kin he etanhan, qa wicotakuni šni ekta hde kta.

12 Qa he wikcemna wandake ciqon hena wicaštayatapi wikcemna kin eepi, nahahin wokiconze yuhapišni, tuka wihiyayedan wancadan ape cin wicaštayatapi iyecen wamanica kin kici wicowašake icupi kta.

13 Hena wicotawacin wanjidan yuhapi, qa wicowašake wicookihi ko tawapi kin wamanica kin qupi.

14 Qa hena tahcaska cinca kin kici ki-cizapi kta, tuka tahcaska cinca kin wicaktedan kta, he itancanpi kin Itancan,qa wicaštayatapi kin en Wicaštayatapi kin hee, qa tona om un kin hena wicakicopi, qa wicakahnigapi, qa wicakapi.

15 Hehan hecen emakiya, Mini wandake ciqon tukten wawicihahapi econ sa iyotanke cin he oyate, qa wicota, qa wicašta, qa iapi kin eepi.

16 Qa he wikcemna wandake ciqon, wamanica ikoyake cin hena, wawicihahapi econ sa kin šice kidakapi kta, qa hewoskantuya tancodan iyaye yapi kta, cehpi kin temyapi, qa peta on huhnahyapi kta.

17 Hena e Wakantanka tawacin kin ecen econpi kta, qa wicotawacin wanjidan unpi kta, qa wokiconze tawapi kin wamanica qupi kta e wacin yus wicakiya, Wakantanka oie kin yuecetu kte cin hehanyan.

18 Qa winohinca wandake ciqon he otonwe tanka kin makata wicaštayatapi kin iwicadake cin hee.

WAYUOTANIN. WICOWOYAKE 18.

1 Unkan hena taku kin iyohakam mahpiya ohnihde wan mahpiya kin eciyatanhan kutkiya u wanmdaka, wicowašake tanka yuha; qa he towitan kin on maka kin iyoyanpa.

2 Unkan he wašagya hotankakiya hotanin, qa heya, Hinhpaya ce, Babylon tanka kin he hinhpaya; qa taku wakanšicapi en ounyanpi, qa wanagi ašape cin owasin he otipi, qa zitkadan šice cin šicedapi kin owasin he hohpi yapi ce.

3 Wawicihahapi wocantiyahde miniša tawa kin hetanhan oyate hiyeye cin owasin yatkanpi; qa he kici wicaštayatapi maka akan unpi kin wawicihahapi econpi, qa taku tehika ota yuhe cin on wopeton maka akan unpi kin wijiniciyapi ce.

4 Hehan mahpiya eciyatanhan wicaho wan tokeca nawahon, kaken eya, Mitaoyate kin tankata inanpa po, hecen woahtani tawa kin ehna yaunpi kte šni, qa wicokakije tawa kin en oyapapi kte šni.

5 He wahtani kin mahpiya kin ekta iyahdeya, qa takumšica econ kin hena Wakantanka kiksuya un.

6 Token ecaniconpi qon he iyecen ecakicon po, qa iye ohan kin etanhan nonpa akihde kicu po, wiyatke ojudan ye cin heohna nonpa akihde okicicaštan po.

7 Token wahanicida qa takudan icakije šni un qon he iyecen wicokakije, qa iyokišicapi kin qu po. Iye cante kin ekta kaken eya; Wicaštayatapi winohinca heca iyotankehan waun, qa wiwazica hemaca šni, qa iyokišicapi kin icimana wanmdake kte šni ce.

8 Heon etanhan anpetu wanjidan en wicokakije tawa kin hiyahde kta, wiconte, qa iyokišicapi, qa wicaakihan, qa ocowasin peta on huhnage kta; tuwe yaco kin Itancan kin Wakantanka hee wašaka ce, heon etanhan.

9 Unkan wicaštayatapi maka ohnaka kin kici wawicihahapi econpi, qa takudan icakije šni unpi kin hena he aceyapi kta, qa nihinciyapi kta, he huhnage cin šota kin wanyakapi kinhan;

10 Wicokakije kin ikopapi kin

on itehanyan inajinpi, qa heyapi kta, Hehehe, hehehe, Babylon otonwe tanka kin, otonwe wašake cin, ihnuhanna niyacopi kin anihinhpaya ce.

11 Qa heon wopeton maka akan unpi kin nihinciyapi, qa ceyapi kta, hetanhan maza tawapi kin tuwedan opewicakicaton kte šni:

12 Maza kin he mazaskazi, qa mazaska, qa inyan tehika, qa oinpidan, qa minihuha wašte, qa šina to, qa minihuha zipzipedan, qa šina sa, qa can waštemna ocaje owasin, qa huhu wakšica owasin, qa can tehika, qa mazazi, qa mazasapa, qa inyan ska wakšica;

13 Qa canha ša, qa taku waštemna, qa pejihuta pa, qa canšin, qa miniša, qa wihdi, qa aguyapi mdu, qa woteca, qa tahin wanuyanpi, qa šuktanka, qa canpahmihma, qa wicatancan, wicanagi ko henakiya.

14 Waskuyeca kin ninagi cantahde cin he wanna henakeca, qa woyute napin qa taku wicimdeza, hena owasin aniyuštan, qa hena ake tohinni iyeyaye kte šni.

15 Unkan wopeton tona taku hececa wiyopeyapi ece, qa on wijiniciyapi kin hena itehanyan inajinpi kta, he wokakije kin ikopapi, nihinciyapi, qa ceyapi;

16 Qa heyapi; Hehehe, hehehe, otonwe tanka kin minihuha wašte, ša stan, ša ko koyake ca, mazaskazi, inyan tehika oinpidan ko kohdaka; qa ihnuhanna wiwicajica tanka kin he yutakuni šni.

17 Unkan tona wita wata iyupse yuzapi, qa tona ohna yapi, qa tona watopapi, qa tona miniwanca ohna wopetonpi ece kin hena owasin itehanyan inajinpi;

18 Qa he huhnage cin šota kin wanyakapi qehan, hotaninpi qa heyapi; Otonwe kin tukte wanji e otonwe tanka kin he iyececa he!

19 Qa pa kin akan maka ahdatapi, qa hotaninyan nihinciyapi, qa ceyapi, qa heyapi; Hehehe, hehehe, otonwe tanka kin he eciyatanhan tona miniwanca kin ohna wita wata yuhapi kin hena owasin watonpika, taku tehika opeton qon heon, he ihnuhanna hewoskan kagapi ce.

20 Heon, mahpiya kin, iyuškin wo, qa ohnihde owotanna yaunpi, qa wokcanpi kin nakun, niyepi kin on Wakantanka tokicon kin he etanhan.

21 Hehan mahpiya ohnihde wašake hinca wan, inyan wan, inyan wiyutpan tanka iyececa, he icu, qa miniwanca kin en ehpeye ca heya, Hecen wowašake on Babylon otonwe tanka kin jujuwahan ehpeyapi kta, qa tohinni iyeyapi kte šni ce.

22 Unkan niye kin en candowankiyapi sa, qa dowanpi sa, qa cotanka yajopi sa, qa maza yahotonpi sa wicaho kin tohinni nahonpi kte šni; qa taku kage sa, ocaje owasin, niye kin en iyeyapi kte šni, qa wiyutpan hmun kin niye en hetanhan tohinni nahonpi kte šni.

23 Qa petijanjan ojanjan kin icimana iyoyamniye kte šni, qa niye en hihnayanpi qa tawicuyapi wicaho kin tohinni nahonpi kte šni. Wicašta wopeton nitawa kin hena maka akan wicašta itancanpi kin hecapi; qa wicayahmunge cin on oyate kin owasin wicayahnayan.

24 Unkan he ohna wicašta wokcanpi wicašta owotanna ko we kin iyeyapi, qa tona maka akan ktepi kin hena nakun.

WAYUOTANIN. WICOWOYAKE 19.             

1 Unkan hena iyohakam mahpiya kin ekta wicota hotankakiya hotaninpi nawahon, kaken eyapi, Jehovah yatan po, niwicaye ca, wowitan, qa wootanin, qa wowašake, Itancan Wakantanka unkitawapi kin he tawa nunwe.

2 Wayaco kin owotanna qa wicaka; witkowin tanka, wawicihahapi econ kin on maka kin yušice cin he yaco, qa taokiye kin hena we kin he nape kin en tokicon.

3 Hehan inonpa heyapi, Jehovah yatan po. Unkan he šota kin owihanke wanin wankantkiya iyaya.

4 Hehan hunkawicayapi wikcemna nonpa sanpa topa, qa taku ni un topa kin hena makata epeiciyapi, qa Wakantanka oiyotanke kin akan kiyotanke cin he ohodapi, qa heyapi, Amen, Jehovah yatan po.

5 Hehan oiyotanke kin etanhan wicaho wan taninyan heya, Taokiye niyanpi kin owasin, qa tona cekiyapi ece, cistinpidan tankinkinyanpi ko, Wakantanka nitawapi kin yatan po.

6 Unkan nawahon, wicota hotaninpi kin iyececa, qa mini ota ihaha kin iyececa, qa wakinyan tanka hotonpi kin iyececa, kaken eyapi, Jehovah yatan po: Itancan Wakantanka Iyotan Wašake cin he Wicaštayatapi un.

7 Heon etanhan piundapi, qa unkiyuškinpi kta, qa wowitan unqupi kta; tahcaska cinca kin tohan tawicu ton kte cin wanna iyehantu, qa winohinca kin taku owasin wiyeya ekihnaka.

8 Unkan he minihuha ska wiyatpa kin heca koyake kta e qupi; minihuha ska kin he tona wašte woowotanna yuhapi kin hee.

9 Hehan hecen emakiya, Kaken wowapi kaga wo, Tona tahcaska cinca kin winohinca yuze kta omniciye kin en wicakicopi kin hena wicayawaštepi ce. Hehan ake hecen emakiya, Wakantanka oie wicake cin hena ee.

10 Unkan hehan he siha hdepi kin en makata ehpemiciye ca ohowada kta; tuka iye hemakiya, Ihnuhan hecanon kin, miš cici ookiye waun, qa nihunkawanji Jesus yaotanin yuhapi kin hemaca; Wakantanka ohoda wo. Jesus yaotanin kin he wokcanpi woniya kin hee.

11 Unkan mahpiya kin yuzamnipi e wanmdaka,qa ito šuktanka ska wan, qa tuwe akan iyotanke cin he Wicake ca Owotanna eciyapi, he owotanna wicayaco qa ozuye econ ece.

12 Išta kin peta ide kin iyececa, qa pa kin akan watešdake ota yukan; qa caje kin owapi, tuka he tuwedan sdonye šni, iye išnana sdonkiya.

13 Qa wokoyake we en oputkanpi kin heca koyaka: Qa Wakantanka Oie kin eciyapi.

14 Unkan mahpiya wicobe kin owasin he ihakam yapi, šuktanka ska akan iyotankapi qa minihuha wašte, ska, qa wakašote šni kin heca koyakapi.

15 Qa iye i kin etanhan mazasagye anog ope kin hiyu, heon oyate kin awicape kta, qa maza icapsinte wan on wicayuhe kta; qa Wakantanka Iyotan Wašake cin he wocantiyahde ohitike cin miniša iyuškice kin he naškica.

16 Qa onhohda ceca sani ko akan caje kin owapi, Wicaštayatapi kin en Wicaštayatapi, qa itancanpi kin Itancan kin he dee.

17 Hehan mahpiya ohnihde wan anpetu wi kin en najin kin he wanmdaka; he hotankakiya hotanin, qa taku kinyanpi kin owasin, okotonyan kin en kinyan unpi kin hena hewicakiya; Upi qa Wakantanka he wotapi tanka tawa kin en mniciya po;

18 Wicaštayatapi cehpi kin yatapi kta, qa wicašta itancanpi cehpi kin, qa tona wašakšakapi cehpi kin he, qa šuktanka cehpi, qa tona akan iyotankapi kin, wicacehpi ocaje owasin, wowidake unpi, qa ihduhapi kin, cistinpidan tankinkinyanpi koya.

19 Unkan wamanica kin wanmdaka, qa wicaštayatapi maka akan unpi kin akicita wicayuhapi ko witaya mniciyapi, qa tuwe šuktanka akan iyotanke cin akicita wicayuhe cin ko, kici kicizapi kte cin heon.

20 Hehan wamanica kin he niyake yuzapi, qa woitonšni wokcan kin he nakun, he wamanica kin itokam wowapetokeca econ, qa on tona wamanica wowapetogton tawa yuhapi, qa iyacinpi kin ohodapi kin hena wicahnaye cin hee. Unkan hena napin niyake peta mde wan inyan zi on itkonyahe cin he en iyohpewicayapi.

21 Unkan unmanpi kin owasin tuwe šuktanka akan iyotanke cin he mazasagye tawa kin on wicaktepi, mazasagye he i kin etanhan hiyu qon hee on. Unkan hena cehpi kin on taku kinyan un kin owasin imnanpi.