Hebrew (Hebrews) 1-7 Lakota/ Dakota New Testament

HEBREW OYATE WOWAPI WICAKICAGE CIN

WICOWOYAKE 1.

1 Ehanna, Wakantanka toktogye, otakiya wicašta wokcanpi kin eciyatanhan hunkake wicunyanpi kin wowicakiyake ciqon, he, anpetu ehake kin dena icunhan, iye Cinhintku kin eciyatanhan wounkiyakapi;

2 He on woicage kin owasin kage ca, he taku owasin tawaye kta e ehde:

3 He iye towitan okitanin, qa ouncage okagapi hince cin hee, iye towašake oie kin on taku owasin hduha yanka, he iš iye eciyatanhan waunhtanipi wopakinte kage cehan, Taku iyotan tanka wankan yanke cin he etapa kin en kiyotanka.

4 He iye caje wan mahpiya ohnihde kin isanpa wašte aihpeyapi qa yuhe cin, he iyecen sam iyeya wašte.

5 Micinkši kin he niye, anpetu kin de cinca cicaga ce, mahpiya ohnihde kin tukte wanji eciya he? Qa ake, He atemaye kta, qa miye cinkšiwaye kta ce?

6 Unkan, tokapa kin he wicoicage kin ekta hiyuye cehan hecen eya, Wakantanka ohnihde wicaye cin owasin he itokam canpeška makehde enajin kta ce.

7 Qa mahpiya ohnihde kin hena on kaken eya, He tateyanpa kin ohnihdeye ca, peta ide kin wowidakeya ece.

8 Tuka Cinhintku kin heciya, Wakantanka, oiyotanke nitawa kin he owihanke wanica; nitokiconze mazasagye kin he mazasagye owotanna;

9 Woowotanna wašteyadake cin heon Wakantanka, nita Wakantanka kin, tona nitawaši kin hena isanpa wowiyuškin wihdi on sdaniyan ce.

10 Qa, Itancan, otokahe ekta maka ahe cin eyahde, qa ninape kage cin mahpiya kin hee;

11 Hena yutakuni šni aye kta, tuka niye ecen yaun; owasin onhohda wan iyecen kuke kta;

12 Qa šina wan iyecen pehan eyahnake ca, hecen yutokecapi kta; tuka niye okonniwanjidan, qa waniyetu nitawa kin owihanke kte šni ce.

13 Tuka ohnihdewicaye cin tukte wanji e, Mietapa kin en iyotanka wo, tona toka niyanpi kin hena nisiha woahe kin en ewicawahnake kta ce, eciya he?

14 Hena owasin taku wakan wawokiya, tona wiconi aihpewicayapi, qa tawapi kte cin hena owicakiyapi kta e u wicašipi qon hena eepi šni he?

HEBREW WICOWOYAKE 2.

1 Heon etanhan taku nahonpi kin hena tohinni unkikusepi kte šni e on sutaya awauncinpi kta.

2 Wicoie mahpiya ohnihde oyakapi qon he suta, qa tona anagoptan šni, qa he kašeye cin hena owasin iyacinyan woyaco owotanna icupi hecinhan;

3 Unkiye wiconi hinsko tanka kin unkaktapi šni kinhan, token naunpapi kta he; he tokaheya Itancan kin oyake ca, tona nahonpi kin hena atayedan unkokiyakapi:

4 Wakantanka iš eya, iye tawacin kin eciyatanhan, wicakiciyaotanin, wowapetokeca taku on yušinyewicaye cin hena ko, wašagya econpi ota, qa Woniya Wakan wicakipamni kin hena on etanhan?

5 Wicoicage u kte cin cajeunyatapi kin he mahpiya ohnihde kin yuhewicakiye šni.

6 Tuka wanji tukten yaotanin qa heya, Wicašta kin he taku he, on yeksuye kta he? kaeš wicasta cinhintku kin, hecen awanyahdaka he?

7 Mahpiya ohnihde kin kitanna ihukuya yakage ca, wowitan, woyuonihan ko watešdake yecaton, qa taku nape on yakage cin hena yuheyakiya:

8 Qa iye siha kin ihukuya taku owasin eyahnaka. Taku owasin iye ihukuya ehnake cin, hecen taku ihukuya ehnakapi šni kin takudan okapte šni. Tuka nakaha nahahin taku owasin ihukuya ehnakapi kin wanunyakapi šni.

9 Tuka Jesus wiconte kakijapi kin on, mahpiya ohnihde kin kitanna ihukuya kagapi kin he wowitan, woyuonihan ko watešdag kiton kin he wanunyakapi, hecen iye, Wakantanka towaonšida kin eciyatanhan, wicašta kin owasin on wiconte sdonye kta.

10 Tuwe iye tan tanhan taku owasin un, qa iye on taku owasin un kin he cinca ota wowitan ekta wicahdoye kte cin on, wiconi tawapi kte cin mdetahunka kin he wokakije on ecedan kage kta e iyokipi.

11 Hecen tuwe wicayuecedan, qa tona yuecepidan kin hena owasin okonwanjipidan; heon etanhan hena hunkawanjin wicakiya kewicakiye kta ištece šni:

12 Qa hecen eya, Nicaje kin mihunkawanji owicawakiyake kta, qa okodakiciye kin cokata icidowan kta ce.

13 Qa ake, He wacinwaye kta ce. Qa ake, Iho, miye, qa cinca Wakantanka maqu kin hena.

14 Cinca kin hena wicacehpi, qa wicawe kin en opapi kin heon iš iye hena en opa; hecen tuwe wiconte wowašake yuhe cin, wakanšica hee, e ihangye kta;

15 Qa tona tohanyan ni unpi kin hehanyan wiconte ikopapi kin on wowidake unpi kin hena ewicahdaku kta.

16 Awicakehan mahpiya ohnihde kin he koyake šni, tuka Abraham cinca kin hecen ihduza.

17 Heon etanhan taku owasin en, iye hunkawanjinwicaye cin iyecen ikicage kte cin he hecetu; hecen taku Wakantanka tawa kin en, Wawayušna Itancan waonšida, qa wicake kta, qa oyate wahtanipi kin on wookiye wicakicage kta.

18 Iye, iyutanyanpi kin on, atayedan kakije cin, heon etanhan tona iyutanwicayapi kin hena ewicahdaku kta okihi.

HEBREW WICOWOYAKE 3.

1 Heon, mihunkawanji wakan, mahpiya tanhan wicakico kin en oyapapi kin, wounhdakapi kin on Jesus Messiya yešipi qa Wawayušna Itancan kin he awacin po.

2 Moses tipi ocowasin ohna owotanna un kin, he iyecen iye qe tuwe econ ši qon owotanna ecakicon.

3 Tuwe ticage cin he tipi kin sam iyeya yuonihanpi ece kin, he iyecen he qe Moses kapeya wowitan tanka yuha.

4 Tipi otoiyohi tuwe kaga; tuka tuwe taku owasin kage cin he Wakantanka ee.

5 Moses wowidake un kin heca, tipi tawa ocowasin ohna wacinyepica un, taku oyakapi kte cin hena yaotanin kte cin heon.

6 Tuka Messiya, iye tipi kin ocowasin ohna, Cinhintkuyapi kin iyececa; tipi tawa kin he unkiyepi, waditagya wounhdakapi, qa wowiyuškinyan wacinunyanpi kin he owihanketa tinsa unhapi kinhan.

7 Heon etanhan, (Woniya Wakan kin kaken eya, Anpe dehan iye ho kin nayahonpi kta hecinhan;

8 Cante ihdutehipi šni po, hepuza en, anpetu wawiyutanyan un kin en, wawakipajinpi qon iyecen;

9 Nihunkakepi iyutanmayanpi, qa mayukcanpi, qa waniyetu wikcemna topa hehanyan miohan kin wanyakapi ce.

10 Heon etanhan wicoicage kin he on iyomayake ca, hepa, Cantepi kin ekta ohinniyan nunipi, qa mitacanku kin sdonyapi šni ce.

11 Hecen šinwahda qa, Okihpapi mitawa kin en yapi kte šni ce, eya wakonza.)

12 Mihunkawanji, wakta po, oki mi cante wicada šni, qa šice cin en niunpi, on Wakantanka ni un kin aduštanpi kta.

13 Tuka anpetu otoiyohi wahokonkiciciya po, anpe dehan eyapi kin hehanyan; okinni woahtani wohnaye kin on wanji tukte niyutehipi kta.

14 Tokaheya wicaundapi kin he owihanketa sutaya unhapi kinhan, Messiya en ounpapi.

15 Anpe dehan, iye ho kin nayahonpi kinhan, cante hdutehipi šni po, wawakipajinpi qon en iyececa ce, eyapi kin hehanyan.

16 Tona nahonpi qon hena kipajinpi he: tuka Moses tona Egypta etanhan awicau qon hena owasin šni he.

17 Tona waniyetu wikcemna topa hehanyan iyoyakeyapi qon hena tuwepi he? tona wahtanipi, qa hepuza en tancan ihpayapi qon hena eepi šni he?

18 Qa okihpapi tawa kin en yapi kte šni, konza kewicakiye ciqon hena tuwepi he, tona wicadapi šni qon hena eepi šni he?

19 Hecen wicadapi šni kin heon en yapi kta okihipišni e wanunyakapi.

HEBREW WICOWOYAKE 4.

1 Hecen okihpapi kin de en unkopapi kta e iwahounyanpi kin, heon niyepi kin wanjikši iyoyahipi kte šni se ececa e ikounpapi kta.

2 Wotanin wašte kin unkokiyakapi, iš iyepi kin iyececa; tuka wicoie nahonpi qon he owicakiye šni, tona nahonpi kin wowacinye icicahiyapi šni kin heon etanhan.

3 Tuka tona wicaundapi kin okihpapi kin en ounpapi kta: heye ciqon iyececa; Šinwahda on okihpapi mitawa kin en opapi kte šni ce, epa ce; maka icage cin hehantanhan wicohan kin yuštanpi tuka.

4 Tukten anpetu išakowin kin he ke ca hecen eya, Anpetu išakowin kin he Wakantanka okihpa, taku kage cin owasin etanhan.

5 Qa hen ake, Okihpapi mitawa kin en opapi kte šni.

6 Heon etanhan, hunh en opapi kte cin he tokata ihan, qa tona tokaheya wotanin wašte owicakiyakapi qon hena wicadapi šni kin heon en opapi šni.

7 Ake anpetu wan ke ca David en heya, Anpe dehan, iye ho kin nayahonpi kinhan, cante hdutehipi šni po.

8 Jošua okihpe wicakiya unkanš, he iyohakam anpetu tokeca caje yate kte šni tuka.

9 Hecen Wakantanka taoyate kin okilipapi wan wicakicihan.

10 Tuwe okihpapi en ope cin he wanna tohtani kin ayuštan, Wakantanka iye tawa ayuštan qon iyececa.

11 Heon etanhan wookihpe kin he en unkopapi kta e amniheunkiciyapi kta, okinni wicadapi šni qon he iyecen tuwe ihpaye kta naceca.

12 Wakantanka oie kin he ni un, wawokihi, qa mazasagye anog ope kin he isanpa pe hinca, wicanagi, wicaniya kici iyotahedan capa iyaye ca, okihepi cupe ko kicakse ca, wicotawacin wicacante Wacin yuze cin hena koya iyukcan ece.

13 Qa taku kagapi kin takudan iye išta kin en anahbepica šni; tuwe oicazo unqupi kin he išta kin en taku owasin tancodan qa šdayehnahan yanka.

14 Heon Wawayušna Itancan tanka wan, Jesus Wakantanka Cinhintku, mahpiya kin ekta iyaye cin hee unhapi kin heon wounhdakapi kin he sutaya unhduzapi kta.

15 Wawayušna itancan kin, unkiye unkakijapi kin en unkicanptapi kta okihi šni kin heca unhapi šni, tuka iye taku owasin on iyutanyanpi, unkiye iyeuncecapi, tuka woahtani codan un.

16 Heon etanhan wowašte oiyotanke kin en waditagya unkupi kta, hecen wowaonšida  unkicupi kta, qa tohan uncinpi eca wowašte wawokihi kin iyeunyanpi ece e kta.

HEBREW WICOWTOYAKE 5.

1 Wawayušna itancan otoiyohi, wicašta etanhan icupi kin, he Wakantanka taku tawa kin en, wicašta on etanhan ehdepi, taku kicicupi, woahtani on wošnapi kin hena ko wayušna kta e heon.

2 Tona onspepi šni, qa canku icunom yapi kin hena onšiwicada kta okihi, iš iye wookihi šni aohduteyapi nakaeš.

3 Qa heon oyate kin on wošna ece kin, he iyecen iš iye woahtani econ kin on taku wayušna ece kta.

4 Qa tuwedan iye cinka wowitan kin de icu šni, tuka, Aaron iyecen, Wakantanka tuwe kico kin hecedan.

5 He iyecen, Messiya iš eya wawayušna itancan kta e ihdutan šni; tuka tuwe, Micinkši kin he niye, anpe dehan cinca cicaga ce, eciye ciqon hee hecon.

6 Qa nakun tokan en kaken eya; Melkizedek ouncage kin iyecen wawayušna owihanke šni kin henica ce.

7 He qe anpetu wicacehpi en un qehan, wocekiye, wokidapi ko eye ca, išta mnigaga nina hoyekiye ca, tuwe wiconte etanhan ehdaku kta okihi kin he cekiye ca, kokipeyahan un kin, heon nahonpi.

8 Qa Cinhintku kin hee kaeš, taku token kakije cin on woanagoptan onspeiciciya.

9 Qa iye yuštanpi kin heon tona anagoptanpi kin owasin owihanke wanin wiconi kin wicakicaga.

10 Melkizedek ouncage kin iyecen, Wawayušna Itancan, Wakantanka keciye cin.

11 Wicašta kin he on taku ota unkoniciyakapi kta, tuka oyakapi tehika, wanahon yahunkapi šni nakaeš.

12 Hinnakaha waonspekiya henicapi kta, tuka nahahin tuwe Wakantanka oie oowa tokaheya kin hena akta onspeniciyapi kta e iyenihantupi, qa tona asanpi ece cinpi, qa waconica yun okihipi šni kin hee en iyoniptapi.

13 Tuwe kašta asanpi ece yute cinhan, he wicoowotanna wicoie kin en wayupike šni, nahahin hokšiyoqopa nakaeš.

14 Tuka tona tankapi, qa wanna taku utapi on tanyan ihduštanpi, taku wašte, taku šica ko iyukcanpi kin, hena waconica yutapi ece.

HEBREW WICOWOYAKE 6.

1 Heon etanhan Messiya woonspe tokaheya tawa kin he hekta ehpeunkiyapi, qa woyuštan ekta unyanpi kta; wiconte wicohan on iyopeiciyapi, qa Wakantanka wacinyanpi kin taku ahe cin akta eunhdepi kte šni;

2 Baptem eyapi woonspe kin, qa nape on awicaputakapi, qa wicate cin ekicetuwicayapi, qa woyaco owihanke wanice cin hena koya.

3 Unkan Wakantanka iyowinunkiyapi kinhan, hecen econkupi kta.

4 Tona wancadan iyoyanpapi, qa mahpiya tanhan taku wicaqupi kin he utapi, qa Woniya Wakan kin etanhan okinipi;

5 Qa Wakantanka oie wašte kin he utapi, wiconi u kte cin wowašake kin nakun;

6 Hena ayuštanpi hecinhan, ake piya iyopeiciye wicakiyapi kte cin he okihipica šni; iye atayedan Wakantanka Cinhintku cansusbeca en piya okatanpi, qa taninyan wowištenyapi kin heon etanhan.

7 Maka kin ota amagaju kin he yuhepe ca, tona kicanyanpi kin hena on taku peji iyecetuya aicage cin he Wakantanka yuwašte.

8 Tuka taku takanheca hu, qa wapepeka aicage cin he ehpeyapi, qa yašicapi kte cin kiyadan ihan, he owihanketa huhnage kta.

9 Tuka, waštecicidapi kin, hena hecen unkeyapi ešta, niyepi kin on taku sanpa wašte qa wiconi en ope cin hena en niunpi e sdonunyanpi.

10 Wakantanka owotanna, qa heon wicohtani, qa wowašte wokicanye nitawapi, iye caje kin on ecanonpi, tona owotanna un owicayakiyapi, qa nahahin owicakiya dukanpi kin he akitonje kte šni.

11 Unkan niyepi otoiyohi owihanketa, woape woyuštan kte cin hehanyan iyecen amniheniciyapi kta uncinpi.

12 Qa nikujapi kte šni, tuka tona wicadapi, qa wacintankapi on, taku iwahowicayapi qon wanna yuhapi kin, hena owicayapapi kta.

13 Wakantanka Abraham taku iwahoye cehan, taku sanpa tanka cajeyate kta wanica, heon iye atayedan cajeihdata;

14 Qa heya, Awicakehan wowašte on ciyawašte kta, qa yuotapi kin on yuotaciye kta ce.

15 Unkan wahbayedan ape yanke cin he iyohakam taku iwahoyapi qon ekicicetu.

16 Wicašta akantu taku iyotan tanka cajeyatapi ece; qa wokonze woyusuta kte cin he waakinicapi owasin en woanapte kin hee.

17 He en, Wakantanka, tona taku iwahoyapi qon tawapi kte cin hena en, iye tawacin yuhohopica šni kin he iyotan sdonye wicakiye kta cin, qa heon wokonze on hdusuta.

18 Heon taku nom yutokecapica šni, en Wakantanka itonšni okihipica šni kin hena taku kin on etanhan, tona woape unkitokam ehdepi kin en onaunpapi kin wicakicanpte wan wašaka unhapi kta.

19 He unhapi, wicanagi taku on aspeiciya, wicakapi qa suta kin hee, taku tipi cokaya hnakapi kin mahen tanhan un kin he en aspeiciya.

20 Heciya Jesus kahin tokam ye cin unkiyepi on timahen iyaya, he Melkizedek ouncage kin iyecen Wawayušna Itancan kin heca kagapi.

HEBREW WICOWOYAKE 7.

1 Melkizedek, Salem Wicaštayatapi, qa Wawayušna Wakantanka Iyotan wankantu kin he tawa, hee, Abraham, wicatayatapi wicakaštake cin, etanhan hdicu kin he itkokipe ca yawašte.

2 Unkan Abraham taku owasin etanhan iwikcemna kin he qu. Wicašta kin he tokaheya caje oyakapi kin on, Woowotanna wicaštayatapi kin hee, qa hehan, Salem wicaštayatapi kin, he Wookiye Wicaštayatapi kin hee.

3 Atkuku wanica, hunku wanica, qa wicoicage oyakapi kin wanica, anpetu tokaheya wanice ca wiconi owihanke wanica, Wakantanka Cinhintku kin iyecen icahyapi, qa Wawayušna ohinniyan yanka.

4 Wicašta tanka kin de wanyaka po, Abraham, hunkakeyapi un kin hee kaeš, taku iwakte ahdi kin etanhan iwikcemna kin he qu.

5 Tona Levi cinca kin etanhanpi, wošnapi wicohan yuhapi kin hena, wicoope kin eciyatanhan iye hunkawanjitkupi oyate kin etanhan taku icupi kta e iwahowicayapi; hena Abraham nite kin etanhan inanpapi tuka heconpi.

6 Tuka tuwe hena etanhan wicoicage hdawa šni kin he Abraham etanhan taku iwikcemna kin icu, qa wahoyapi kin yuhe ciqon he yawašte.

7 Unkan he de akinicapi šni, tuwe ihukuya un kin he iyotan wašte kin on yawaštepi ece.

8 Qa deciya wicašta tapi kte cin hena taku iwikcemna kin icupi ece; tuka heciya, he ni un e yaotaninpi.

9 Unkan he de heyepica; Levi taku iwikcemna kin icu ece kin, he iš eya Abraham eciyatanhan taku iwikcemna kin wicaqu;

10 Melkizedek itkokipe cehan he nahahin atkuku nite kin mahen un.

11 Heon etanhan, Levi wošnapi wicohan yuhe cin eciyatanhan woyuštan en au unkanš; he en oyate kin wicoope yuhapi; tokiyatanhan wawayušna tokeca wan icage kta, Melkizedek ouncage kin eciyatanhan, qa Aaron ouncage kin eciyatanhan caje yatapi kte šni he?

12 Wošnapi wicohan kin he yutokecapi kinhan, heon etanhan wicoope kin nakun yutokecapi kta.

13 Qa tuwe on hena hecen eyapi qon he wicoun tokeca etanhan inanpa; he etanhan tuwedan wahna wošnapi kin ekta ohanye šni.

14 Itancan unkitawapi kin he Juda wicoun kin etanhan icaga e sdonunyanpi; qa wicoun kin he wošnapi kagapi kta e Moses takudan eye šni.

15 Qa de iyotan atanin, Melkizedek ouncage kin iyecen, Wawayušna tokeca wan icage kta;

16 He wicacehpi wicoie woope kin eciyatanhan šni, tuka wiconi owihanke wanica wowašake kin eciyatanhan icahyapi.

17 Melkizedek ouncage kin iyecen, Wawayušna ohinniyan nanka ce, eya yaotaninpi qon.

18 Unkan nakun woahope tokaheya ye cin he yutokan iyeyapi, wašake šni qa taku okihipica šni kin heon etanhan.

19 Woope kin he takudan yuštan šni, tuka wowacinye iyotan wašte kin he en au; qa heon Wakantanka kin en ikiyedan unkupi.

20 lye wokonze oie kin codan wawayušna kin kagapi šni; dena e wokonze oie codan wawayušna wicakagapi;

21 Tuka he qe wokonze wicoie kin eciyatanhan; tuwe, Melkizedek ouncage kin iyecen Wawayušna ohinniyan nanka ce, Itancan kin heye ca iyopeiciye kte šni ce, eciye ciqon hee hecon.

22 He iyecen wicotakuye iyotan wašte kin en Jesus wayuecetu wan kagapi.

23 Wiconte kin on, ohinniyan en un okitpanipi kin, heon hena wawayušna kin otapi.

24 Tuka he qe owihanke wanin yanke cin, heon wošnapi wicohan yutokecapica šni wan yuha.

25 Qa hecen tona iye eciyatanhan Wakantanka en upi kin hena owasin niwicaye kta okihi, hena wocekiye ewicakiciye kta e ohinniyan ni un kin heon.

26 Wawayušna Itancan kin hececa he iyounkipipi, wakan, iyaonpepica šni, waašape šni, qa wahtanipi sa wicicunonpa un, qa manpiya kin sanpa wankantuya icahyapi.

27 He iye, wawayušna kin hena iyecen, anpetu iyohi, tokaheya iye wahtani kin on, qa hehan oyate wahtanipi kin on etanhan wošna kte cin he iyecece šni; wancadan hecon, iye atayedan waihdušna qon he ehan.

28 Woope kin he wicašta wašakapi šni kin hena wawayušna wicakaga ece; tuka wokonze wicoie kin, woope iyohakam un kin, he Cinhintkuyapi, owihanke wanin yawaštepi kin he kaga.