I Thessalonica Lakota (Dakota) Wowapi Wakan Kin (I Thessalonians)

PALOS THESSALONICA OYATE WOWAPI WICAKICAGE CIN; TOKAHEYA KIN

WICOWOYAKE 1.

1 Palos, qa Silvanos, qa Timotheus, Thessalonica ekta okodakiciye kin, Wakantanka Ateyapi kin en, qa Jesus Messiya Itancan kin en un kin, wowapi wicakicagapi: Wowaonšida, wookiye ko, Wakantanka Ateunyanpi etanhan, qa Jesus Messiya Itancan kin nakun, niyepi en nicipi un nunwe.

2 Niyepi owasin on Wakantanka ohinniyan wopida unkekiciyapi, qa wocekiye unkeyapi kin en caje unniyatapi ece.

3 Qa wowacinye wicohan nitawapi kin, qa wacantkiyapi en htayanipi kin, qa Wakantanka Ateunyanpi kin itokam, Jesus Messiya Itancan unkiyapi kin en ape dukanpi kin hena ohinniyan unkiksuyapi.

4 Mihunkawanji waštedake, Wakantanka nicahnigapi kin he sdonunyanpi.

5 Wotanin wašte unkitawapi en niipi kin he wicoie ecedan en un šni, tuka wowašake nakun en, qa Woniya Wakan, qa tanyan sdonyapi kin en; niyepi ehna, qa niyepi on etanhan wicašta tounkecapi kin sdonyayapi.

6 Wicokakije ota ehna, qa Woniya Wakan wowiyuškin kin yuha wicoie kin iyacupi, hecen Itancan kin oyapapi, qa nakun unkiyepi.

7 Hecen Macedonia qa Acaia en, tona wacinyanpi kin owasin waonspekiye niyuhapi:

8 Qa niyepi kin etanhan Itancan oie kin oyakapi, Macedonia qa Acaia ekta, qa hecedan šni, tuka owancaya Wakantanka wacinyayapi kin he ieyanpahapi, qa hecen taku unkeyapi kta e iyehantu šni.

9 Hena e qe niye nicapi, qa niyepi ekta tukten canku kin ohna unkiyohpayapi kin he oyakapi, qa token wakagapi kin etanhan Wakantanka ekta nihduhomnipi, Wakantanka ni un qa wicake cin ohoyadapi kte cin heon:

10 Qa iye Cinhintku kin mahpiya eciyatanhan u ayapepi kta, he wiconte etanhan najin kiya, Jesus wocanniye u kte cin etanhan eunhdakupi kin hee.

1 THESSALONICA WICOWOYAKE 2.

1 Mihunkawanji, niyepi ekta token unkipi kin niye e sdonyayapi, ituya unkipi šni.

2 Tuka Philippi ekta kakišunyanpi, qa unkihahapike cin niye sdonyayapi; qa he iyohakam Wakantanka unkitawapi kin on wadiuntakapi, qa waakinicapi ota ehna wotanin wašte kin unkoniciyakapi.

3 Qa wowahokonkiye unkitawapi kin he wohnuni, qa woašape eciyatanhan šni, qa wohnaye en un šni;

4 Tuka token wotanin wašte kin unhapi kta e Wakantanka iyokipi kin he iyecen unkiapi ece; wicašta iyokipiwicayapi kin iyecece šni, tuka Wakantanka cante unkiyukcanpi kin he.

5 Tohinni iskuya wicoie kin unkeyapi šni e niye sdonyayapi, qa waicucupikte cin šina unkinpi šni e Wakantanka sdonya.

6 Qa wicašta kin etanhan wowitan unkakitapi šni, niyepi, qa wicašta tokeca nakun etanhan šni, Messiya yewicaši kin iyecen waeconwicunkiyapi kta iyececa tuka.

7 Tuka niyepi cokaya wahbadan unkanpi, azinkiya wan cinca icahwicakiye cin he iyecen.

8 Hecen nina cante en unniyuzapi, qa wašteunnidakapi kin heon Wakantanka tawotanin wašte kin hee, qa unnagipi kin hena ko unnicupi kta tawatenunyanpi tuka.

9 Mihunkawanji, unkohanyanpi qa htaunnipi kin yeksuyapi, hanyetu anpetu ko htaunnipi, wotanin wašte Wakantanka tawa unkoniciyakapi kin he icunhan, tuwedan tkeya waqinunniciyapi kte šni uncinpi kin heon etanhan.

10 Niye sdonyayapi, qa Wakantanka nakun, tona wicayadapi kin en, wakanyan, owotanna, qa iyaonpepica šni unyakonpi.

11 Qa wicašta cinca wahokonkiye cin he iyecen, niyepi otoiyohi wahokonunniciyapi, qa token unnicihnapi qa econ unnišipi kin he sdonyayapi;

12 Wakantanka iye tokiconze, qa towitan kin en nicopi kin, he iyokipiya mayanipi kte cin heon.

13 Qa heon ohinniyan Wakantanka wopida unkekiciyapi; Wakantanka oie kin unkiyepi etanhan nayahonpi, qa iyacupi qehan, wicašta oie kin iyecen iyacupi šni, tuka awicakehan Wakantanka oie kin hee, niye tona wicayadapi kin en ohanyan ece kin iyececa.

14 Mihunkawanji, niš niyepi kin Wakantanka taokodakiciye, Juda makoce kin ekta, Jesus Messiya en un kin hena owicayecipapi; niš niye takuwicayayapi kin eciyatanhan kakišniyanpi kin, iš iye Juda oyate kin eciyatanhan kakišwicayapi qon iyececa:

15 Hena e qe Jesus Itancan kin ktepi, qa wicašta wokcanpi wicayuhapi qon hena nakun, qa unkiye šicaya unkuwapi, Wakantanka iyokipiyapi šni, qa wicašta owasin kašewicayapi:

16 Qa Ikcewicašta nipi kte cin iwahokonwicunkiyapi kta he tehindapi, qa hecen ohinniyan wahtanipi kin hduštanpi kta. Wocantiyahde owihanke aiyahdeya wanna en awicau.

17 Tuka mihunkawanji, unkiš niyepi kin etanhan ptecedan eunyakupi, itohnake kin on, cante kin he wake šni, heon nitohnake wanunniyakapi kta nina cantokpaniyan unkakitapi.

18 Heon etanhan ekta unnikupi kta uncinpi, Palos miye hinca, wancadan qa nonpa, tuka Satan iyounkipi šni.

19 Woape, qa wowiyuškin, qa wowinkta watešdake unkitawapi kin he taku he? he niš niyepi šni he; Jesus Messiya Itancan unkiyapi hi kinhan he itokam?

20 Wowitan qa wowiyuškin unkitawapi kin he niyepi.

1 THESSALONICA WICOWOYAKE 3.

1 Heon etanhan sanpa tinsiciya unkokihipi šni qehan, Athenas ekta unkišnana unyakonpi kta e iyounkipipi:

2 Qa Timotheus hunkawanjin unyanpi, Wakantanka taokiye, qa Messiya tawotanin wašte kin en unkitawašipi kin hee, ye unšipi, sutaya icahniyanpi, qa wacinyayapi kin eciyatanhan wahokonniciyapi kte cin heon.

3 Qa hecen wicokakije kin dena on tuwedan pahohopi kte šni, hena ehna eunhdepi kin niye sdonyayapi.

4 Unkan niyepi kin opeya unyakonpi qehan, wokakije unhapi kta unkoniciyakapi, qa he ecetu kin sdonyayapi.

5 Heon etanhan tinsmiciye kta owakitpani, hehan token wacinyayapi kin sdonwaye kta e on he ekta ye waši, okinni taku wawiyutanyan un kin iniyutanpi naceca, qa hecen htaunnipi kin taku šni ye kta.

6 Tuka nakaha Timotheus niyepi kin etanhan en unhdipi, qa wacinyayapi wacanyakiyapi ko on wotanin wašte unkahipi, qa nakun ohinniyan wašte unyadakapi kin heon wanunyadakapi kte hinca, unkiš wanunniyakapi kte cin iyececa;

7 Heon etanhan, mihunkawanji, wokakije wicocante šica ko unhapi kin owasin ehna niyepi on unkicicanptapi, wacinyayapi kin heon.

8 Nakaha unnipi, niš niyepi kin Itancan en sutaya yaunpi kinhan.

9 Unkan niyepi kin on, Wakantanka unkitawapi kin itokam, wowiyuškin owasin on unkiyuškinpi kin he on, ake niyepi on, taku wopida Wakantanka eciya unkokihipi kta he;

10 Hanyetu anpetu ko nina ceunkiyapi, nitohnake kin wanunniyakapi kta, qa wacinyayapi kin en taku nahahin ocowasin šni un kin he tanyan unniciyuštanpi kta.

11 Wakantanka iš iye, Ateunyanpi kin, qa Jesus Messiya Itancan unkiyapi kin, niyepi ekta canku kin ohna tanyan ye unyanpi nunwe.

 12 Qa otoiyohi wašteyecidakapi, qa owasin waštewicayadakapi kin he en, Itancan kin icahniyanpi, qa niciyuotapi nunwe, unkiš wašteunnicidakapi kin he iyececa.

13 Qa heon wowakan en nicantepi kin iyaonpepica šni niciyusutapi kta, Wakantanka Ateunyanpi kin itokam, tohan Jesus Messiya Itancan unkiyapi kin tona wicayuwakan kin owasin om hi kinhan.

1 THESSALONICA WICOWOYAKE 4.

1 Unkan mihunkawanji, Jesus Itancan kin on etanhan cinunniciyapi qa ceunniciyapi, token mayanipi,qa Wakantanka iyokipiyayapi kte cin, unkiyepi etanhan iyacupi qon he iyecen sanpa iyoniptapi kte.

2 Jesus Itancan kin etanhan woahope kin tona unnicupi kin sdonyayapi.

3 Wakantanka niyuecepidan kin he tawacin kin he dee, wiinahmanpi kin en nihdoyapi kte šni;

4 Tuka otoiyohi nitancanpi kin yuecepidan, qa yuonihanpi kin en, yahduhapi kte cin sdonyakiyapi kta.

5 Qa wicotawacin šica cantiheyapi kin he en unpi kte šni; Ikcewicašta Wakantanka sdonyapi šni kin hena iyececapi.

6 Taku en tuwedan hunkawanjitku kin kape ca hnaye kte šni; tona heconpi kin owasin Itancan kin tokicon ece, unkoniciyakapi qa unniciyaotaninpi qon iyececa.

7 Waašapapi kin ekta Wakantanka unkicopi šni, tuka unyuecepidan kte cin heon.

8 Hecen tuwe waaktašni kinhan, he wicašta paha iyewicaye šni, tuka Wakantanka iye Taniya Wakan unqupi kin hee aktašni.

9 Hunkawanjinkiciyapi waštekicidakapi kin on wowapi cicagapi kta iyecece šni. Otoiyohi wašteyecidakapi kta he niš niyepi Wakantanka etanhan onnispepi.

10 Qa Macedonia owancaya hunkawanjinkiciyapi kin owasin hecawicayeconpi ece. Tuka mihunkawanji ceunniciyapi ce, nakun sanpa nina ecanonpi kte.

11 Ito owanji dukanpi kta, qa taku tin nicihe cin he yahduštanpi, qa niye ninapepi kin on htayanipi kta e aiciciya po, econ unnišipi qon iyecen;

12 Hecen tona tankan unpi kin hena itokam owotanna mayanipi kta, qa takudan icakije šni yaunpi kta.

13 Tuka mihunkawanji, tona ištinmapi kin hena on sdonye šni dukanpi kta, qa iyonicišicapi kta, wicašta tokeca wowacinye nicapi kin iyececa, e he wacin šni.

14 Jesus te ca ake piya ikicage cin he wicaundapi kinhan, he iyecen tona Jesus en ištinmapi kin hena iye kici Wakantanka uwicakiye kta.

15 Unkan Itancan oie kin eciyatanhan he de unkoniciyakapi, unkiye tona unnipi, qa Itancan hi kte cin iyounhipi kinhan, tona ištinmapi kin hena wicitokam unyanpi kte šni.

16 Iyašapi wan qa mahpiya ohnihde itancan wan ho kin, qa Wakantanka maza yahotonpi tanka tawa ko Itancan kin hduha, mahpiya kin eciyatanhan kun u kta; unkan tona Messiya en tapi qon hena tokaheya najinpi kta.

17 Hehan unkiye tona unnipi, qa he iyounhipi kinhan, hena om mahpiya šapa ekta eunhdakupi kta, okotonyan kin ehna Itancan kin itkounkipapi kta; qa hecen ohinniyan Itancan kin kici unyakonpi kta.

18 Wicoie kin hena on otoiyohi wahokonkiciciya po.

1 THESSALONICA WICOWOYAKE 5.

1 Mihunkawanji, omaka qa makoncage kin on wowapi cicagapi kta yacinpi šni;

2 Hanyetu en wamanon sa kin he iyecen Itancan taanpetu kin u, niš niyepi kin tanyan sdonyayapi.

3 Tohan, Wokiyapi qa tanyan yukanpi ce, eyapi kinhan, hehan ihnuhanna wicotakuni šni en awicau kta, winohinca cinca ton kte cin yazan hinhde cin he iyececa, qa najicapi kte šni.

4 Tuka mihunkawanji, niš niyepi kin otpaza ehna yaunpi šni, qa hecen anpetu kin he wamanon sa iyecen en nihipi kte šni.

5 Niyepi owasin, iyoyanpa cinca kin henicapi qa anpetu cincapi kin. Unkiyepi hanyetu otpaza kici unketanhanpi šni.

6 Heon etanhan wicašta tokeca iyecen unkištinmapi kte šni; tuka kiktahan witko šni unyakonpi kta.

7 Tona ištinmapi kinhan, hena hanyetu icunhan ištinmapi; qa tona witkopi kinhan, hena hanyetu en witko unpi ece.

8 Tuka unkiye anpetu kin unketanhanpi, qa heon witko šni unyakonpi kta, wowacinye wacantkiyapi ko maku akanpe kin unkicunpi kta, qa wiconi apepi kin he maza wapaha unyanpi kta.

9 Wakantanka wocanteptanye en eunhdepi šni, tuka Jesus Messiya Itancan unkiyapi kin eciyatanhan wiconi unkicupi kte cin.

10 He iye, unkiyepi on ta, hecen kiktahan unyakonpi, kaeš unkištinmapi, unma tukte kata, kici unnipi kta.

11 Heon etanhan otoiyohi wahokonkiciciyapi, qa onspekiciciya po, ecanonpi kin hececa.

12 Hunkawanjin unniyanpi kin, ceunniciyapi ce; tona niyepi en htanipi, qa Itancan kin on awanniyakapi, qa wahokonniciyapi kin hena sdonwicaya po.

13 Qa wiconan yuhapi kin on etanhan, wacantkiyapi on sutaya cante en wicayuza po. Okiciciya yakon po.

14 Hunkawanjin unniyanpikin, ceunniciyapi ce; tona yuškiškeya unpi kin hena iyopewicaya po, tona wacin cistinna kin hena wicakihna po, tona wašake šni un kin hena owicakiya po, qa wicašta owasin on wacin tanka po.

15 Ihnuhan tuwe taku šica on itkom taku šica econ kinhan, tuka ohinniyan niš niyepi kin otoiyohi on, qa wicašta owasin on taku wašte ecedan akita po.

16 Ohinniyan wiyuškin po.

17 Ayaštan šni cekiya po.

18 Taku owasin on wopida eya po. He niyepi on Jesus Messiya en Wakantanka tawacin kin hee.

19 Woniya kin kasnipi šni po.

20 Wiyukcanpi kin ihahapi šni po.

21 Taku owasin iyukcanpi, qa taku wašte kin he tinsa yuha po.

22 Taku šica ocaje owasin nakicipa po.

23 Qa wookiye Wakantanka kin niyepi ocowasin niyuecepidan nunwe; hecen ninagipi kin ocowasin, qa nitawacinpi, qa nitancanpi kin iyaonpepica šni niyuhapi kta, Jesus Messiya Itancan unkiyapi kin hi kte cin hehanyan.

24 Tuwe nicopi kin he wacinyepica, qa ecen econ kta.

25 Mihunkawanji, unkiyepi kin on cekiya po.

26 Iiputakapi wakan kin on hunkawanjin kiciyapi kin owasin i iwicaputaka po.

27 Itancan kin on hecon cišipi, hunkawanjin kiciyapi wakan kin owasin ekta wowapi kin de yawapi kta.

28 Jesus Messiya Itancan unkiyapi kin towaonšida kin nicipi un nunwe. Amen.