Jacob (James) Dakota/ Lakota New Testament

JACOB TAWOWAPI KIN

WICOWOYAKE 1.

1 Jakob, Wakantanka taokiye, qa Jesus Messiya Itancan tawa kin he, wicowazi akenonpapi enanakiya eyaye cin hena wowapi wicakicaga; wookiye.

2 Mihunkawanji, taku wawiyutanyan un kin ota ayakipapi kinhan, he wowiyuškin ocowasin hdawa po:

3 Wacinyayapi iyutanpi kin he wacintankapi kaga e sdonyayapi.

4 Tuka wacintankapi kin he tohan kin tanyan hduštan kte; hecen niyuštanpi qa ocowasin yaunpi kta, qa takudan iyonitpanipi kte šni.

5 Niyepi etanhan tuwe woksape nice cinhan, Wakantanka kida kta, iye owasin iyakicuya wicaqu ece, qa iyopewicaye šni; unkan qupi kta.

6 Tuka takudan cetunhda šni wacinyan kida kta; tuwe wacetunhda kin he miniwanca taja kin iyececa, tateyanpa kaškanškan qa kahoya ehpeye cin.

7 Wicašta kin he Itancan kin etanhan taku icu kta kecin kta iyecece šni.

8 Wicašta tawacin nonpa kin he tacanku owasin ohna kaktihanhan un ece.

9 Hunkawanjinkiciyapi wahpanica kin yuwankan iyeyapi kinhan, heon iyuškin kta.

10 Tuka wijica un kin yuwahpanicapi kinhan, on iyuškin kta; peji hca kin he iyecen tokan aye kte cin heon.

11 Anpetu wi kin hinanpe ca kata aya eca, wato kin šnišya ece, qa wahca ihpaye ca owanyake wašte kin he atakuni šni ece; he iyecen wicašta wijica kin iye tohan kin en awihnuni kta.

12 Wicašta iyutanyanpi kin he yawaštepi ece: tohan tanyan yukcanpi kinhan, hehan wiconi watešdake, Itancan kin tona waštedakapi iwahowicaye ciqon, hee icu kta.

13 Tuwe iyutanyanpi kinhan, Wakantanka iyutanmayan ce, eye kte šni: Wakantanka taku šica on iyutanyanpi kta okihi šni, qa nakun tuwedan iyutanye šni.

14 Tuka wicašta otoiyohi iye cantiheye šice cin on iyutanpi qa iyakapeyapi ece.

15 Hehan wocantiheye šice cin icage cinhan woahtani kaga; qa woahtani yuštanpi eca, wiconte icahya ece.

16 Mihunkawanji wašte, icihnayanpi šni po.

17 Taku wicaqupi wašte qa yuštanpi kin owasin wankantanhan un, qa iyoyanpa Ateyapi kin eciyatanhan kun u ece; iye qe tokeca šni, qa yuhomnipica šni hinca.

18 Iye tawacin kin eciyatanhan, wowicake oie kin on cinca unkagapi, hecen taku kage cin ehna unkiye waskuyeca tokaheya iyeuncecapi kta.

19 Heon etanhan, mihunkawanji wašte, wicašta otoiyohi wanahon ohanko kta, ie kapin kta, qa wacintanka kte:

20 Wicašta šinhdapi kin he Wakantanka toowotanna kin icahye šni.

21 Heon etanhan, wicowahtešni kin owasin, qa taku šica iyatahdepi kin ehpeya po; qa wicoie ninagipi niye kta okihi kin he onšiiciya ieu po.

22 Tuka wicoie kin ecen econ po, qa iye icihnayanpi, nahonpi ecedan, unpi šni po.

23 Tuwe wicoie nahon ešta ecen econ šni kinhan, he wicašta wan ihdiyomdasin on ite iwanihdake cin iyececa;

24 Iwanihdake ca tankan iyaya, unkan hehan hinnakaha ite tokeca kin he akiktonja ece.

25 Tuka tuwe wicoope on tawaiciyapi yuštanpi kin he opahta yanke ca, en un kinhan, tuwe nahon qa akiktonje cin heca šni, tuka wicohan econ kin heca, hee e taku econ kin en yawaštepi kta.

26 Tuwe niyepi kin etanhan woohodapi kin en opa se ececa hecinhan, qa ceji hdaške šni, tuka iye cante icihnaye cinhan, he woohodapi ope cin he taku šni.

27 Wakantanka qa Ateyapi kin itokam woohodapi opapi ecedan qa ašape šni kin he dee; Wamdenica qa wiwazica kakijapi eca en wicahipi, qa wicoicage kin en taku iyaonpepica šni ihduhapi kin hee.

JACOB WICOWOYAKE 2.

1 Mihunkawanji, Jesus Messiya, wowitan Itancan wacinyanpi kin, on wicašta iwandakapi kte cin he yuhapi šni po.

2 Nitomniciyepi kin en, wicašta wan mazaskazi napcupe yuhe ca wokoyake wašte kicun kin en hi kinhan; qa nakun wicašta wahpanica wan heyake šica un kin en hi kinhan;

3 Qa tuwe wokoyake wašte kicun kin he tanyan ayatonwanpi, qa heyakiyapi, Oiyotanke wašte kin de en hiyotanka wo; qa wicašta wahpanica qon, Hen najin wo, kaeš, siha wahde kin ihukuya hiyotanka wo, eyakiyapi kinhan;

4 Otoiyohi tanyan canteyeciyuzapi šni, qa wicotawacin šica eciyatanhan widukcanpi šni he?

5 Nahon po, mihunkawanji wašte; Wakantanka maka akan wahpanicapi kin hena wicakahniga he, wacinyanpi on wijicapi, qa tona iye waštedakapi wokiconze iwahowicaye ciqon he tawayapi kte cin?

6 Tuka niye wahpanicapi kin wahtewicayadapi šni. Wijicapi kin hena iyotanhan iyeniciyapi šni, qa woyaco oiyotanke kin en aniyanpi šni he?

7 Wicacaje wašte on cajeniyatapi ece kin he yašicapi šni he?  

8 Wowapi kin eciyatanhan, woope iyotan wašte, Nikiyedan un kin niye inihdacin wašteyadake kta ce, eyapi kin he ecen ecanonpi kinhan, tanyan ecanonpi kta.

9 Tuka wicašta token ihduze cin ekta eyatonwanpi kinhan, woahtani ecanonpi, qa woope kin on šicaya econ oniyakapi ece.

10 Tuwe woahope owasin yuha ešta, wanjidan kicakse cinhan, he ocowasin on yacopi.

11 Tuwe, Wawicihahapi ecanon kte šni ce, eye ciqon he iš nakun, Wamayanon kte šni ce, eya. Unkan wawicihahapi takudan ecanon šni ešta, wamayanon kinhan, wanna woope kin kiyecaksa.

12 Tona woope on tawaiciyapi kin on wicayacopi kte cin hena iyecen iapi, qa econ po.

13 Tuwe waonšida šni kin he wowaonšida wanin woyaco ecedan qupi kta; qa wowaonšida woyaco kin kapeya iyuškin ece.

14 Mihunkawanji, tuwe wacinyan keya ešta, iyecen wicohan yuhe šni kinhan, he taku iyokihi kta he? Wacinyan un kin he niyan okihi he?

15 Nihunkawanji qa nitawinohtin tancokapidan, qa anpetu iyohi woyute nicapi kinhan;

16 Qa wanji hewicayakiyapi, Wookiye on hdapo, cosiciyapi qa wipiiciya po; tuka taku wicatancan icakije cin hena wicayaqupi šni ehantanhan, taku iwaštepi kta he?

17 He iyecen wacinyanpi kin, wieohan codan kinhan, he wanna ta, išnana un kin heon.

18 Han, tuwe heye kta; Niye wacinyan yaun, qa miye wicohan mduha; hecen wacinyaye cin he niohan codan makipazo wo, kinhan miohan kin on wacinwaye cin he cicipazo kta ce.

19 Taku Wakan kin wanjidan he wicayada; he tanyan ecanon; taku wakanšicapi kin iš eya wicadapi qa cancanpi ece.

20 Tuka, wicašta wacinton šni kin, wacinyanpi wicohan codan kin he ta e sdonyaye kta he.?

21 Abraham ateunyanpi kin he, cinhintku Isaac wahna wošnapi akan wahdušna qon he ehan, wicohan on yaowotanpi šni he?

22 Qa iye ohan kin kici wacinye cin token ohanye ca, wicohan on wacinye ciqon he yuštanpi e wandaka he?

23 Unkan hecen wowapi kin, Abraham Wakantanka wicada, unkan he woowotanna kiciyawapi, qa he Wakantanka takicuwa eciyapi ce, eyapi qon he yuecetupi.

24 Heon, wacinyanpi ecedan on etanhan šni, tuka wicohan kin on wicašta owotanna yawapi ece he wandakapi.

25 Nakun Rahab witkowinna kin iapiaya unpi qon hena iyowinwicakiye ca canku tokeca ohna hde wicaši qehan, iš eya wicohan on owotanna yawapi šni he?

26 Wicatancan kin woniya codan un kin he ta ece, he iyecen wacinyanpi kin wicohan codan kinhan, he nakun ta ece.

JACOB WICOWOYAKE 3.

1 Mihunkawanji, wicota waonspekiya unpi šni po; woyaco iyotan tanka unkicupi kta e sdonyayapi.

2 Owasin taku ota on waunhtanipi ece. Tuwe oie on wahtani šni kinhan, he wicašta yuštanpi qa tancan ocowasin hdaške kta okihi.

3 Wanyaka po, šuktanka anaungoptanpi kta e heon iikiyuwi i kin en iyewicunkiciyapi; qa tancanpi ocowasin wicunyuhomnipi ece.

4 Wita wata kin hena nakun wanyaka po, tankinkinyan qa tate ohitika on kaha iyeyapi ešta, iyupse yuza cistinna on token itancan kin cin eca, yuhomnipi ece.

5 He iyecen wicaceji kin taku cistinna, tuka tanka icida ece. Iho, peta cistinna keš can tanka ideya ece.

6 Wicaceji kin he peta, qa woahtani iyatahdepi; hecen wicaceji unhuhapi kin ehna un, wicatancan kin ocowasin ašamya, qa wicoicage ohomniyan aideye ca, iš eya Hades kin etanhan ideiciya.

7 Woteca ocaje owasin, qa taku kinyan unpi, taku sdohan unpi qa miniwanca mahen unpi kin, henakiya etanhan wicašta wanunyanpi wicakage ca wicayuha:

8 Tuka wicaceji kin he tuwedan yuwahbaka okihi šni; he wošice wicašta šni, pejihuta šica on wicata ece kin he ojudan.

9 He on Wakantanka Ateyapi kin unyawaštepi; qa he on wicašta akantu, Wakantanka ouncage iyecen kagapi kin hena wicunyašicapi ece.

10 Wicai wanjidan etanhan wayawaštepi qa wayašicapi kin hinanpa ece. Mihunkawanji, hena hecetu šni.

11 Miniyowe wan oenape wanjidan etanhan, mini wašte qa nakun mini pa hinca hiyuya he?

12 Mihunkawanji, suken can wan Olive waskuyeca aicaga? kaeš hastanyanka iyuwi wan suken waskuyeca okihi he? he iyecen miniyowe wan mini wašte qa nakun mini pa hinca hiyuye šni ece.

13 Enitanhanpi tuwe wicašta ksape ca wiyukcan un he? woksape wowahbadan on tanyan aihduhe cin eciyatanhan iye ohan wašte hdutanin kte.

14 Tuka winawizipi pa hinca, qa wakinicapi nicantepi kin en duhapi kinhan, ihnuhan widuškinpi qa wowicake kin on iyatonpi šni kin.

15 Wicoksape kin he wankantanhan u šni; tuka maka kin etanhan, wicacehpi etanhan, qa wakanšica iyececa.

16 Tukten winawizipi qa wakinicapi yuke cinhan, wicotoketu tanin šni qa wicohan šica owasin hen un ece.

17 Tuka woksape wankantanhan un kin he tokaheya ecedan, hehan wokiyapi kaga, wahbadan, waanagoptan, wowaonšida qa waskuyeca wašte on ojudan, owotanna wiyukcan qa owotanna wohdaka ece.

18 Unkan tona wookiye kagapi kin hena woowotanna waskuyeca kin wookiye en owicakicijupi ece.

JACOB WICOWOYAKE 4.

1 Niyepi ekta wicokicize qa wakinicapi kin tokiyatanhan u he? Cantiheyayapi šica nihuhapi en wakis un kin hena eciyatanhan šni he?

2 Cantiheyayapi tuka duhapi šni; wicayaktepi qa yuhe wacannipi, tuka icu oyakihipi šni; wicayakizapi qa zuya dapi, tuka taku duhapi šni, yadapi šni kin heon etanhan.

3 Yadapi tuka iyacupi šni ece, ecinšniyan yadapi kin on, cantiheyayapi šica on dusotapi kte cin heon.

4 Wiinayahmanpi qa wawicihahapi ecanonpi kin, wicoicage kin de waštedapi kin he Wakantanka šicedaka e sdonyayapi šni he? Heon tuwe wicoicage kin de wotakuye wacin kinhan, he Wakantanka tokaya.

5 Wowapi Wakan kin, Woniya en unyakonpi kin he winawizipi cantiheya ce, ituya eya idukcanpi he?

6 Tuka sanpa wowaonšida wicaqu ece; heon heya, Wakantanka wahanicidapi kin wicakipajin, tuka tona onšikihanpi kin hena wowaonšida wicaqu ece.

7 Heon etanhan, Wakantanka ihukuya iyeiciya po. Wakanšica kipajin po, kinhan nanicipapi kta.

8 Wakantanka ikiyedan u po, hecen iš nikiyepidan u kta. Wahtanipi sa, nape hdujaja po; qa wacin ninonpapi kin, cante hduecepidan po.

9 lyokišicapi, wašihdapi qa ceya po; iyahapi kin he wicaceya ee kta, qa widuškinpi kin he woiyokišice kta.

10 Itancan kin itokam makata ehpeiciya po, kinhan yuwankan inicupi kta.

11 Mihunkawanji, otoiyohi akiciiapi šni po. Tuwe hunkawanjitku aie ca hunkawanjitku hdaco kinhan, he woope kin aie ca woope kin yaco; tuka woope kin daco kinhan, woope kin ecen econpi kin henica šni, tuka wayaco kin henica.

12 Woope kage cin he Wanjidan, he wanikiye ca nakun waihangya okihi. Wicašta tokeca daco kin niš nituwe he?

13 Iho po, nakaha tona hehapi; Dehan, kaeš heyakecinhan, otonwe kin kae ekta unyanpi qa waniyetu wanji en unyakonpi kta, wopeuntonpi qa wiyopenyanpi qa taku unkamnanpi kta ce.

14 Tuka heyakecinhan taku u kte cin sdonyayapi šni; yanipi kin he taku he, opo wan cistiyedan tanin qa hehan atanin šni kin he heca.

15 Kaken ehapi kta iyececa; Itancan kin iyowinunkiyapi qa unnipi kinhan, decen kaeš kaken econkupi kta ce.

16 Tuka nakaha wahannicidapi kin on iduškinpi; hecen wiyuškinpi kin owasin ca.

17 Heon etanhan, tuwe taku wašte econ kta sdonkiya tuka econ šni eca, he woahtani icicaga ece.

JACOB WICOWOYAKE 5.

1 Iho po, tona wijica yaunpi kin, wokakije nihiyahdepi kte cin hena on ceyapi qa šicahowaya po.

2 Woyuha nitawapi kin kuka, qa nitawokoyake kin wamdudankinyan yapotapi.

3 Mazaskazi qa mazaska nitawapi kin gigi aya; qa gigi kin he niyutaninpi kta, qa nicehpipi kin ihangye kta, peta iyececa. Woyuha anpetu ehake kin amnaniciyapi.

4 Wanyaka po, tona maga nitawapi abaksapi wokajuju hnaye ayanicapi kin he howaya; qa tona aguyapi baniciksapi qon hoyeyapi kin he Sabaoth Itancan noge kin en hiyohpaya.

5 Maka akan woiyokipi imnahan yaunpi qa tanyan wayatapi ece; wapatapi anpetu kin en iyecen cante ceniyakiyapi.

6 Wicašta owotanna kin he dacopi qa yaktepi; tuka nicipajinpi šni.

7 Heon etanhan, mihunkawanji, Itancan kin hi kte cin hehanyan wacintanka po. Wanyaka po, wicašta woju ece kin he maka waskuyeca wašte aicage cin hena ape yanke ca, on tehan wacintanka, magaju tokaheya qa nakun ehake kin ahinhe kte cin hehanyan.

8 Niš eya wacintanka po; cante hdusuta po; Itancan kin u kte cin he wanna kiyedan ihan.

9 Mihunkawanji, otoiyohi okicihinyanpi šni po, okinni niyacopi kta. Wanyaka po, Wayaco kin he tiyopa kin itokam inajin.

10 Mihunkawanji, wicašta wokcanpi Itancan caje kin on iapi qon hena kakijapi qa wacintankapi on waonspekiya wicayuha po.

11 Wanyaka po, tona wacintankaya unpi kin hena wašte kecanwicunkinpi ece. Job token wacintanka qon he nayahonpi, qa Itancan owihankeye cin he wandakapi; Itancan kin waonšida qa wawacinkta yuza tanka.

12 Tuka mihunkawanji, taku owasin isanpa, Taku namahon ce, eyapi šni po, mahpiya kin he, qa maka kin de, qa taku tokeca cajeyatapi ece kin nakun; tuka, han, ehapi kin he han ecedan kta, qa, hiya, ehapi kin he hiya ecedan kta; okinni woyaco kin en iyoyahpadapi nun ce.

13 Niyepi kin etanhan wanji kakija he? wocekiye eye kta. Wanji wiyuškin he? odowan ahiyaye kta.

14 Niyepi kin ekta wanji wayazanka he? okodakiciye kin en hunkawicayapi kin wicakico kta; on cekiyapi qa Itancan caje kin on wihdi on sdayapi kta.

15 Unkan wacinyan cekiyapi kin lie wayazanke cin asniye kta; qa Itancan kin he najinkiye kta; qa woahtani econ hecinhan, hena kicicajujupi kta.

16 Wayahtanipi kin otoiyohi okiciciyakapi qa otoiyohi wocekiye ekiciciya po, hecen anisnipi kta. Wicašta owotanna nina wašagya cekiye cin he taku tanka okihi ece.

17 Elijah wicašta wacinyuza iyeuncecapi, qa wocekiye on magaju kte šni e icekiya ; unkan waniyetu yamni sanpa wi šakpe hehanyan maka kin ahinhe šni.

18 Hehan ake wocekiye eya, unkan mahpiya kin magaju hiyuye ca, maka kin waskuyeca icahya.

19 Mihunkawanji, wanji enitanhanpi wowicake kin etanhan nuni, qa tuwe he ake ekta yuhomni kinhan,

20 Tuwe wicašta wahtani sa wan canku onuni kin etanhan yuhomni kinhan, he wicanagi wan wiconte etanhan eyaku kta, qa woahtani ota akahpe kta e he sdonkiye kta.