JOHANNES WAYUOTANIN TAWA KIN, Revelation/ Apocalypse Chapters 12-15

JOHANNES WAYUOTANIN TAWA KIN

WAYUOTANIN. WICOWOYAKE 12.

1 Unkan mahpiya kin ekta wowapetokeca tanka wan tanin: Winohinca wan anpetu wi kin koyake ca, hanyetu wi kin siha kin ihukuya, qa pa kin en wicanhpi ake nonpa wapaha kiya.

2 He ihdušake ca, hokšiksuye ca howaya, cinca ton kta e wayazanka.  

3 Unkan hehan mahpiya kin ekta wowapetokeca tokeca wan tanin; wamduška duta tanka wan, he pa šakowin, qa he wikcemna yuha, qa pa šakowin kin en watešdake šakowin tešdaka.

4 Qa sinte kin on mahpiya wicanhpi iyamnimni kin lwicacu, qa maka kin ekta ehpewicaya. Unkan wamduška kin he winohinca hokšiksuye cin itokam najin, cinca ton kinhan temye kta.  

5 Hehan cinca ton, wica kin, oyate hiyeye cin owasin maza icapsinte wan on wicayuhe kte cin hee. Unkan hokšiyoqopa kin he Wakantanka, qa iye oiyotanke kin ekta eyakupi.

6 Unkan winohinca kin he hewoskan makoce kin ekta napa, heciya Wakantanka taku wiyeya ekicihnaka, qa hen anpetu kektopawinge sanpa opawinge nonpa sam wikcemna sakpe hehanyan wonyapi kta.

7 Hehan mahpiya kin ekta ozuye kagapi; Michael qa iye taohnihde kin wamduška kin kici kicizapi. Unkan wamduška kin qa iye taohnihde kin kicizapi;  

8 Qa ohiwicayapi šni; hecen hetanhan mahpiya kin ekta tuktedan wicakiyukanpi šni.

9 Unkan wamduška tanka kin, wamduška wanakaja tanhan un kin hee, Wakanšica qa Satan eciyapi, wicašta hiyeye cin owasin wicahnaye cin hee, makata ehpeyapi, qa tona ookiye wicaye cin hena nakun kici tankan iyewicayapi.

10 Unkan mahpiya kin eciyatanhan wicaho wan tanka nawahon, hecen eya, Wanna unkita Wakantanka wiconi tawa, qa towašake qa tokiconze kin u; qa Messiya wicookihi tawa kin nakun; tuwe hunkawanjin wicunkiyapi kin taku iyawicaonpe cin, Wakantanka unkitawapi kin itokam, anpetu hanyetu ko awicaie cin hee kun ehpeyapi kin heon etanhan.

11 Unkan hena tahcaska cinca we kin he on, qa waayataninpi oie tawapi kin he on ohiyapi, qa wiconte hehanyan wiconi tawapi kin waštekidapi šni.

12 Heon etanhan, mahpiya kin iyuškin po, qa tona ohna tipi kin. Tuka tona maka kin miniwanca ko ekta yakonpi kin hena wicokakije yuhapi kta; niyepi kin ekta wakanšica kun iyaye ca wošihda tanka yuha, aškayedan kta e sdonkiye cin heon etanhan.

13 Unkan wamduška kin maka kin ekta ehpeyapi kin he wanhdaka, hehan winohinca cinca ton qon he šicaya kuwa.

14 Unkan winohinca kin he wanmdi tanka hupahu tawa nom qupi, on hewoskan makoce tukten ti kte cin heci kinyan iyaye kta, heciya waniyetu yamni qa wanji hanke hehanyan wonyapi kta, wamduška itohnake kin itehanyan.

15 Unkan wamduška kin iye i kin etanhan mini hiyuya, wakpa wan iyececa, qa winohinca kin ihakam hiyayeya, minin teye kta e heon.

16 Unkan maka kin winohinca kin he okiye ca, i hdukawa, qa wakpa wamduška i kin etanhan hiyuye cin he yahepa.

17 Unkan wamduška kin he winohinca kin on šinhda, qa winohinca cinca wicaye cin, tona Wakantanka tawoahope kin ahopapi, qa Jesus Messiya wootanin tawa yuhapi kin hena azuwicaya.

WAYUOTANIN. WTCOWOYAKE 13.

1 Unkan hehan miniwanca kahda wiyaka kin en nawajin. Qa miniwanca kin etanhan wamanica wan hiyu wanmdaka, pa šakowin, qa he wikcemna yuha, qa he kin akan wacinhe wikcemna, qa pa kin akan waoštehdapi caje kin.

2 Unkan wamanica wanmdake cin he inmu tanka iyececa, qa siha kin hena wahanksica siha kin iyececa, qa i kin mnaja i kin iyececa. Unkan wamduška qon towašake kin he qu, qa oiyotanke tawa kin, qa wicookihi tanka.

3 Unkan wanmdake ca, ito pa kin wanji kiuniyanpi, on te kta tuka; unkan kiuniyanpi kin on te kte cin he okizi, qa wicašta kin owasin wamanica kin on yušinyayapi.

4 Qa wamduška kin towašake kin wamanica qu qon he ohodapi, qa wamanica kin he nakun ohodapi, qa heyapi, Tuwe wamanica kin iyececa he? qa tuwe he kici kicize kta okihi he?

5 Unkan i wan qupi, he on taku tanka, qa iapi šice cin eye kta, qa wowašake qupi, wi wi- kcemna topa sanpa nonpa hehanyan, ozuye econ kte cin heon.

6 Unkan i hdukawa qa Wakantanka yašica, caje, qa wakeya tawa kin, qa tona mahpiya kin ekta etipi kin hena taku awicakicaga.

7 Qa tona owotanna un kin hena azuwicaye ca wicaktedan kta e qupi, qa wicowazi, qa iapi kin, qa oyate kin owasin wicayuhe kta e wowašake qupi.

8 Unkan tona maka akan unpi cajepi kin wiconi wowapi tahcaska cinca, maka kagapi kin hehantanhan wošnapi qon, he tawa kin en owapi šni kin hena owasin wamanica kin ohodapi.

9 Tuwe noge yukan hecinhan, he nahon kta.

10 Tuwe wayaka awicahdi kinhan he wayaka ayapi kta, qa tuwe mazasagye on wicakte kin he mazasagye on ktepi kta ce. He en wicašta owotanna apepi qa wacinyanpi kin tanin.

11 Unkan wamanica wan tokeca maka kin etanhan hiyu kin he wanmdaka; he he nom yuha tahin wanuyanpi cincadan iyececa, qa wamduška iyecen ia.

12 Unkan wamanica tokaheya kin he towašake kin oeowasin yuha, qa maka kin, tona akan un kin hena ko wamanica tokaheya kin kiuniyanpi, qa on te kta, tuka okizi kin he ohodawicakiya.

13 Qa wowapetokeca tanka econ, wicašta wicitokam mahpiya kin eciyatanhan peta maka kin ahinhpaye ya.

14 Qa tona maka akan unpi kin wicahnayan, wowapetokeca wamanica kin itokam econ kta e qupi qon hena on. Qa tona maka akan unpi kin wamanica mazasagye on capapi tuka kini qon he iyacinpi wan kagapi kta e iwahokonwicakiya.

15 Qa wamanica iyacinpi kin he oniya qu okihi, hecen on wamanica iyacinpi kin ie kta, qa tona iyacinpi kin ohodapi šni kin hena wicakte kta okihi.

16 Unkan owasin, cistinpidan tankinkinyanpi ko, wijicapi qa wahpanicapi, tona ihduhapi, wowidake unpi kin hena ko, nape etapa kin en, kaeš itepi kin en wowapetogton tawa kin yuhe wicakiya.

17 Unkan tuwedan wopeton kte šni, tuka tona wamanica towapetogton, caje kin, qa caje ihdawa kin he wanji tukte e yuhe cin henana.

18 De en woksape yukan. Tuwe ksape cin he wamanica tona ihdawa kin he yawa kta. He wicašta iyawapi kin hee, ihdawa kin he opawinge šakpe sanpa wikcemna šakpe sanpa šakpe.

WAYUOTANIN. WICOWOYAKE 14.

1 Hehan wanmdake ca, iho, tahcaska cinca wan Zion Paha kin akan najin, qa kektopawinge opawinge sanpa kektopawinge wikce- mna topa sam kektopawinge topa kici najinpi, iye Atkuku caje kin itepi kin en owapi qon.

2 Unkan mahpiya kin eciyatanhan wicaho wan nawahon, mini ota ihaha kin iyececa, qa wakinyan tanka hoton kin iyececa. Qa dowankiyapi sa candowankiyapi on dowanpi wicahotanin nawahon.

3 Qa oiyotanke kin itokam, qa taku ni un topa kin, qa hunkawicayapi kin wicitokam odowan teca se ahiyayapi. Odowan kin he tuwedan onspe kta okihi šni, tuka kektopawinge opawinge sam kektopawinge wikcemna topa sam kektopawinge topa maka kin etanhan opewicatonpi qon hena.

4 Winohinca on ašamwicayapi šni kin hena eepi, tanšna unpi nakaeš. Tona tahcaska cinca kin tokiya ye cinhan iyahna yapi kin hena eepi. Wicašta kin etanhan Wakantanka qa tahcaska cinca kin ekta opewicatonpi tokaheya kin hena eepi

5 Qa hena ipi kin en wohnaye takudan iyeyapi šni; qa Wakantanka oiyotanke kin itokam takudan iyaonpepica šni unpi.

6 Hehan mahpiya ohnihde tokeca wan mahpiya cokaya kinyan iyaye cin he wanmdaka, wotanin wašte owihanke wanin un kin, tona maka akan unpi kin, wicašta kin, qa wicowazi, qa iapi, qa oyate hiyeye cin owasin ieyanpaha owicakiyake kta yuha iyaya.

7 Qa hotankakiya heya, Wakantanka kinihanpi qa wowitan qu po; woyaco anpetu kin wanna hi ce; qa tuwe mahpiya, maka, minivvanca, qa wakoniya kin kage cin he itokam canpeška makehde inajin po.

8 Unkan mahpiya ohnihde icinonpa kin he ihakam ye ca heya, Hinhpaya ce, Babylon otonwe tanka kin he hinhpaya; wawicihahapi wocantiyahde miniša tawa kin etanhan oyate hiyeye cin owasin yatke wicakiye cin he dee.

9 Unkan mahpiya ohnihde iciyamni kin he hena wicihakam ye ca hotankakiya heya, Tuwe wamanica, qa iyacinpi kin ohoda, qa wowapetogton tawa kin ite, kaeš nape kin en yuhe cinhan;

10 He Wakantanka wocantiyahde miniša tawa kin wocanteptanye miniyatke tawa kin en okaštan kin hetanhan yatke kta, qa mahpiya ohnihde owotannaun kin hena wicitokam, qa tahcaska cinca kin itokam, peta, cahdi ko en kakišyapi kta.

11 Qa kakišwicayapi šota kin owihanke wanin wankan iyaya ece; qa tona wamanica iye iyacinpi ko ohodapi, qa tuwe he caje wapetogtonpi yuhe cin hena anpetu hanyetu ko oziyapi wanin unpi.

12 Wicašta owotanna apepi kin he de en un, qa tona Wakantanka tawoahope opapi qa Jesus wacinyanpi kin hena.

13 Hehan mahpiya kin eciyatanhan wicaho wan nawahon, hecen emakiya, Wowapi ecen kaga wo; Detanhan wicate cin tona Itancan kin en tapi kin hena wicayawa tepi ece. Han, Woniya kin eya, Wicohtani kin ayuštanpi kta, qa wicohan kin wiciyahna iyaya ece.

14 Hehan wanmdake ca, iho, mahpiya ska wan, qa wanji Wicašta Cinhintku kin iyececa akan iyotanka, he mazaskazi wapaha wan wapaha kiye ca, nape etapa kin on isan škopa pe hinca yuha.

15 Unkan mahpiya ohnihde tokeca wan tipi wakan kin etanhan u, qa tuwe mahpiya ska kin akan iyotanke cin he panyanhan heciya; Isan škopa nitawa kin en iyekiye ca aguyapi baksa wo. Mnayanpi kte cin wanna iyehantu; maka woksapi kin wanna šeca ce.

16 Unkan mahpiya ska akan iyotanke cin he isan škopa tawa kin maka ekta yekiya, unkan maka kin bašdapi.

17 Hehan mahpiya ohnihde wan tokeca tipi wakan mahpiya kin ekta he cin hetanhan u, he nakun isan škopa pe hinca yuha.

18 Unkan mahpiya ohnihde tokeca wan wahna wošnapi kin etanhan u, he peta on wowašake yuha. Qa he tuwe isan škopa pe hinca yuhe cin he panyanhan hoyekiye ca heya, Isan škopa pe hinca nitawa kin ekta yekiye ca maka hastanhanka kin mnayan wo; hastanhanka iyage kin wanna sapa ce.

19 Unkan mahpiya ohnihde kin he isan škopa tawa kin maka ektayekiye ca, maka hastanhanka iyuwi kin mnaye ca, Wakantanka wocantiyahde miniša iyuškice tawa tanka kin he en iyohpeya.

20 Unkan otonwe kin itankan mini ša iyuškice kin napanpi, qa mini ša iyuškice kin etanhan we hiyu, šuktanka i iyuwi kin hehanyan, stadiya kektopawinge sam opawinge šakpe hehanyan.

WAYUOTANIN. WICOWOYAKE 15.

1 Unkan mahpiya kin ekta wowapetokeca tanka, qa wowinihan wanmdaka; mahpiya ohnihde šakowin wicokakije šakowin ehake kin yuhapi, hena en Wakantanka wocantiyahde tawa kin henakeca kta.

2 Unkan mde wan janjan peta kici icicahiyapi seca wanmdaka, qa tona ohiya, wamanica qon, iye iyacinpi kin qa wowapetogton kin, qa tona caje iyawapi kin, ohiye ciqon hena janjan mde kin akan najinpi, qa Wakantanka candowankiyapi tawa kin heca yuhapi.

3 Qa Moses Wakantanka taokiye tadowan, qa tahcaska cinca kin tadowan kin ahiyayapi, qa heyapi, Itancan, Wakantanka Iyotan wašake cin niohan kin tanka, qa wowinihan, tona owotanna un kin en Wicaštayatapi kin he niye ce, nitacanku kin owotanna qa wicaka.

4 Itancan, tuwe konicipe kte šni, qa nicaje kin inidowan kte šni he? nišnana oniowotanna; qa oyate hiyeye cin owasin upi, qa nitokam canpeška makehde enajin kta; woyaco nitawa kin wanna tanin kin heon etanhan.

5 Unkan he iyohakam wanmdake ca, iho, mahpiya kin ekta waayataninpi wakeya wakan kin he yuzamni han.

6 Qa mahpiya ohnihde šakowin wicokakije šakowin yuhapi kin hena tipi wakan kin etanhan inanpapi. minihuha ska wiyatpa kin heca koyakapi, qa mazaskazi on maku opta ihduskitapi.

7 Unkan taku ni un topa kin wanji mahpiya ohnihde šakowin kin mazaskazi wiyatke kin heca šakowin wicaqu; hena Wakantanka ohinniyan ni un wocantiyahde tawa kin on ojudan.

8 Unkan Wakantanka towitan, qa towašake kin eciyatanhan tipi wakan kin sota ojudan. Qa tipi wakan kin tuwedan timahen ye kta okihi šni, wicokakije šakowin mahpiya ohnihde šakowin yuhapi kin henakeca kte šni hehanyan.