Hebrew (Hebrews 8-13) Lakota/Dakota New Testament

HEBREW WICOWOYAKE 8.

1 Taku nakaha unkeyapi yuptahnakapi kin he dee; Wawayušna Itancan kin hececa unhapi, mahpiya ekta Otancanke oiyotanke etapa kin en kiyotanka;

2 Tipi wakan kin he, qa wakeya wicakapi kin, Itancan ticaga qa wicašta akantu econpi šni, kin he en ookiye kin hee.

3 Wawayušna otoiyohi taku kicicupi, wošnapi ko wayušna kta e kagapi; heon wicašta kin de iš eya taku wayušna hduhe kta e hecetu.

4 Maka akan un unkanš, Wawayušna kin heca kte šni; wawayušna woope kin eciyatanhan taku kicicupi kin wayušnapi ece kin hena yukanpi kin heon.

5 Hena oowa, qa taku mahpiyata un kin ohanzi kin en ohanyanpi ece; Moses wakeya qon kage kta hehan Wakantanka okiye ca, Awacin wo, he kin ekta token wanyag niciyapi qon he iyecen owasin yakage kta ce, eciya.

6 Tuka nakaha iye wawokiyapi iyotan wašte wan yuha, wicotakuye wašte hinca, wahoyapi iyotan wašte kin en ahe cin he en wiciyotahedan un kin, heon etanhan.

7 Wicotakuye tokaheya kin he iyaonpepica šni unkanš, iyokihe kin he tuktedan kiyukanpi kte šni tuka.

8 Hena taku iyawicaonpe ca heya, Wanyaka wo, anpetu kin u kta, hena en Israel tiyohnaka, qa Juda tipi kin wicotakuye teca wicawecage kta, Itancan kin eya.

9 Egypta makoce kin etanhan awicawau kta e hena hunkakewicayapi kin nape wicamduze ciqon anpetu kin he en, wicotakuye wicawecage ciqon he iyecece šni; wicotakuye mitawa kin he miciyuhapi šni; qa heon miš ihawicawakta šni ce, Itancan kin eya.

10 Anpetu kin hena iyohakam wicotakuye wicawecage kte cin he dee; Hena wicotawacin kin en mitoope kin wicawaqu kta, qa cantepi kin akan owawa kta, qa miye Wakantanka mayanpi kta, qa miš hena mitaoyate wicawaye kta;

11 Qa wicašta otoiyohi tuwe ikiyadan ti, qa otoiyohi hunkawanjitku kin onspewicakiyapi, qa, Itancan kin sdonya wo, eyapi kte šni; tuka owasin sdonmayanpi kta, wohakakta tankinkinyanpi ko:

12 Taku ecinšniyan econpi kin hena onšiwicawada kta, qa wahtanipi, wicohan šica econpi ko, icimana wicaweciksuye kte šni ce, Itancan kin eya.

13 Taku teca cajeyate cin he tokaheya kin yutanina kin heon heya. Unkan taku tanina, qa takuni šni aye cin, he tanin šni iyaye kta kiyadan ihan.

HEBREW WICOWOYAKE 9.

1 Hehan awicakehan tokaheya qon he en woohoda wicohan kin yukan, qa nakun makata tipi wakan.

2 Wakeya wan kagapi, tokaheya kin he ohna petijanjan ihupa, qa wahna wotapi, qa aguyapi taninyan ehnakapi kin, he tipi wakan eciyapi.

3 Qa ti cokahnakapi icinonpa mahen tanhan, he wakeya kin iyotan wakan eciyapi:

4 Hen mazaskazi oizinyapi kin, qa wicotakuye can koka kin akapatanhan owancaya mazaskazi akalipeton, hee ohna mazaskazi cega manna ohnakapi kin, qa can sakadan Aaron tawa kin hca aye ciqon, qa wicotakuye inyan mdaska kin hena.

5 Qa he iwankapatanhan, wowitan cherubim wowaonšida  ohe kin aohanziyapi; hena on nakaha atayedan taku unkeyapi kte šni.

6 Hena taku kin hecen yuštanpi qehan, wawayušnapi kin wakeya tokaheya kin en yapi, qa ohodapi wicohan kin econpi ece.

7 Tuka icinonpa kin he en wawayušna itancan kin ecedan, waniyetu otoiyohi wancadan mahen i, qa we codan i šni, he iš iye atayedan on, qa oyate taku ecinšniyan econpi ko on en ai.

8 Heon Woniya Wakan kin hecen oyaka, Wakeya tokaheya kin nahahin ecen he cin icunhan, tipi iyotan wakan kin ekta canku kin nahahin yuotaninpi šni:

9 He ito kayehan wiyacinpi un, qa en taku wicaqupi wošnapi ko aipi, tuka hena e tuwe hecon kin nagi kin yuecedan kta okihi šni.

10 Hena e woyuecetu kte anpetu kin hehanyan, woyute, qa woyatke, qa woyujaja ota, econ wicašipi kin.

11 Tuka Messiya, taku wašte u kte cin en, Wawayušna Itancan ihdutanin, wakeya iyotan wašte qa yuštanpi, nape, on kagapi šni, wicoicage kin de etanhan šni, kin he ohna;

12 Tatokadan qa ptejicadan we kin yuhe šni, tuka wopekitonpi owihanke wanin kage ca, iye we kin hduha wancadan tipi iyotan wakan kin timahen iyaya.

13 Hecen tatanka qa tatokadan we kin, qa pte heyuktanna cahota aniniumipi kin, tona waašape cin wicayuecedan, qa wicacehpi yuska kta e okihi hecinhan;

14 Sam iyeya Messiya; Woniya owihanke wanice cin eciyatanhan, Wakantanka en iyaonpepica šni waihdušna qon, he iye we kin, wiconte wicohan kin etanhan nagi nipakintapi kta, Wakantanka ni un kin wowidag niyanpi kte cin heon.

15 Qa heon etanhan, Wicotakuye Teca kin en Iyotahedan un kin he iye, hecen wicotakuye tokaheya ihukuya wahtanipi qon hena kajuju kta e on te cin, he eciyatanhan tona wicakico kin owihanke wanin taku tawapi kte cin iwahowicayapi qon he yuhapi kta.

16 Tukten wicotakuye wanji yukan hecinhan, hen wicotakuye kage cin he wanna ta e yutaninpi.

17 Taku tapi kin hena on wicotakuye wowapi kin suta ece; tuka wicotakuye kage cin nahanhin ni un kinhan, he takudan okihi šni.

18 Unkan heon wicotakuye tokaheya qon he we codan yuecepidan šni.

19 Woope kin eciyatanhan, Moses woahope kin owasin oyate kin owicakiyaka yaštan qehan, ptejicadan, qa tatokadan we kin icu, qa mini, tahinca hin duta, peji hota ko, qa wowapi kin oyate kin owasin ko, awicamnimni;

20 Qa heya, Wicotakuye Wakantanka econ nišpi kin we kin he dee ce.

21 Qa nakun wakeya kin, taku wakšica wowinyunyanpi kte cin owasin ko we amnimni.

22 Woope kin eciyatanhan taku owasin se we on pakintapi; qa we papsonpi šni ehantanhan wokajuja wanica.

23 Heon etanhan, hena taku kin on, taku mahpiya ekta un iyacinpi kin pakintapi kta e hecetu; tuka taku mahpiya ekta un kin hena e qe taku sanpa wašte wošnapi kin on.

24 Messiya tipi wakan nape on kagapi kin he mahen i šni, tipi wakan hinca iyacinpi kin hena ee; tuka mahpiya kin e qe mahen, qa heciya unkiyepi on Wakantanka itokam ihdutanin kta.

25 Qa wawayušna itancan kin he owanka wakan kin en, taku tokeca we kin yuha, waniyetu otoiyohi wancadan mahen i ece kin he iyecen ota akihde waihdušna kta iyecece šni;

26 He iyececa unkanš, maka kagapi kin ehantanhan, wanna ota akihde kakije kta tuka; tuka nakaha woicage ihanke kin en, iye waihdušna kin eciyatanhan, woahtani yutokan iyeye kta e on taniniciya.

27 Unkan wicašta kin wancadan tapi kte cin he iwahowicayapi, qa he iyohakam woyaco kta:

28 He iyecen Messiya, wicota wahtanipi kin yuhe kta e wancadan wayušnapi; unkan, tona he wanyakapi kta ape yukanpi kin hena niwicaye kta e, woahtani codan, inonpa ihdutanin kta.

HEBREW WICOWOYAKE 10.

1 Taku wašte u kte cin ohanzi kin he woope kin en un, qa hena atayedan taku kin ouncage kin hee šni; heon etanhan, waniyetu otoiyohi wošnapi ohinniyan aipi kin he tona en hipi kin wicayuecedan kta okihi šni.

2 He okihi unkanš hena taku kin wayušnapi ayuštanpi kte šni he? Tona en opapi wancadan pakintapi kinhan icimana woahtani sdonkiyapi kte šni tuka.

3 Tuka hena on waniyetu otoiyohi woahtani kiksuyapi ece.

4 Tatanka mdoka tatokadan kici hena we kin woahtani yutokan iyeye kta okihipica šni.

5 Heon etanhan, makata hi qehan, Wošnapi, taku wicaqupi ko yacinšni, qa tancan wan miyecaga ce, eya.

6 Peta wošnapi, qa woahtani on wošnapi kin hena iyonicipi šni;

7 Hehan, Ito wau, wowapi tanka en miye on hecen owapi ce; Wakantanka, nitawacin kin ecen ecamon kta ee, epa.

8 Wankan, Wošnapi, taku wicaqupi, peta wošnapi, qa woahtani on wošnapi kin; woope eciyatanhan ahi wayušnapi kin; hena yacin šni, qa iyonicipi šni, eye cehan;

9 Hehan nakun, Wakantanka, nitawacin kin ecen ecamon kta wau ce, eye cin. Tokaheya kin he yutokan iyeya, icinonpa kin he hdusuta kte cin heon.

10 He iye tawacin kin ee on unyuecepidan, Jesus Messiya tancan wancadan wayušnapi kin he eciyatanhan.

11 Wawayušna otoiyohi anpetu iyohi, en ohoda inajin, qa ohinniyan taku wošnapi ece kin hena ake ecekcen wayušna, hena woahtani kajuju kta tokadan okihi šni.

12 Tuka wicašta kin de, woahtani on wona wanjidan wahdušna, hehan Wakantanka etapa kin eciyatanhan owihanke wanin kiyotanka ;

13 Qa hetanhan tona toka yapi kin hena owasin iye siha kin ihukun iyewicayapi kta ape yanka.

14 Wošnapi wanjidan on etanhan tona wicayuecepidan kin hena owihanke wanin wicahduštan.

15 Woniya Wakan kin he nakun unkiciyaotaninpi; tokaheya eye ciqon he iyohakam;

16 Anpetu kin hena iyohakam, wicotakuye wicawecage kte cin he dee kta, Itancan kin eya; Mitoope kin hena iye cantepi kin en wicawaqu kta, qa tawacinpi kin en owakiwa kta;  

17 Qa iye wahtanipi, taku ecinšniyan econpi ko, icimana weksuye kte šni.

18 Hena owasin kajujupi kinhan, woahtani on wošnapi kin wanice kta.

19 Heon, mihunkawanji, Jesus we kin eciyatanhan tipi iyotan wakan kin en waditagya unyanpi kte;

20 Canku wan teca qa ni un, ti cokaya hnakapi, iye cehpi kin hee, ohna unkicagapi kin he eciyatanhan.

21 Qa Wakantanka tipi kin ohna Wawayušna Itancan wan unhapi;

22 Heon cante wicake hinca hduha šogya wacinunyanpi qa ikiyedan unkupi kta, wicanagi šice cin etanhan uncantepi kin unkamnimnipi;

23 Qa mini ska kin on untancanpi kin unyujajapi; qa wacinunyanpi unhdaotaninpi kin he yuhohopi šni unhduhapi kta; (tuwe wahounyanpi kin he wacinyepica:)

24 Qa otoiyohi awaunkicicinpi kte, wacantkiyapi, qa wicohan wašte en iyounkicipaštakapi kte cin heon.

25 Qa wanjikji econpi kin iyeceh mniunkiciyapi ece kin he unkayuštanpi kte šni; tuka wahokonunkiciciyapi kta; qa anpetu kin he kiyadan u wandakapi kinhan, sanpa nina ecanonpi kta.

26 Wowicake sdonyapi kin unkicupi kin he iyohaham iyokipiya waunhtanipi kinhan, woahtani on wošnapi kte cin wanica.

27 Tuka woyaco inihanyan apepi kin he, qa wocanniye ide kin, tona tokayapi kin hena ihangwicaye kta.

28 Tuwe Moses toope kin akta šni, nonpa kaeš yamni yaotaninpi kinhan, he onšidapi šni ta ece;

29 Hecen tuwe Wakantanka Cinhintku we kin amani, qa wicotakuye we kin on yuecepidan qon he wakan šni dake ca, Wowašte Woniya kin he taku i en hiyeye cinhan, he wokakije iyotan tanka hiyahde kte šni kecannipi he?

30 Tokiconpi kin he mitawa, towicawecicon kta ce, Itancan kin eya ce, tuwe eye ciqon he sdonunyanpi. Qa ake, Itancan taoyate kin wicayaco kta ce.

31 Wakantanka ni un nape kin en ohinhpayapi kin he wokokipe.

32 Anpetu tokaheya kin kiksuya po, hena en iyoyamniyanpi, qa hehan wicokakije okicize tanka wan iyahdeniciyapi.

33 He icunhan waaiapi, wicokakije ko on iwanniyakapi kta enihdepi; qa nakun tona hecawicakiconpi kin hena tawaši wicayayapi.

34 Miye makaškapi kin icunhan onšimayakidapi, qa woyuha duhapi qon nicipi kin he on widuškinpi, mahpiya ekta woyuha iyotan wašte ohinniyan ye kte cin he duhapi sdonyakiyapi kin heon etanhan.

35 Wadinitakapi qon he ayuštanpi šni po, he woyuha tanka okihi kta.

36 Wacinnitankapi kta iyececa; hecen Wakantanka tawacin kin ecen ecanonpi kinhan, taku iwahounyanpi kin he iyacupi kta.

37 Wanna aškadan tuwe u kte cin he hi kta, qa yutehan kte šni.

38 Tuwe owotanna un kin he wacinyan un kin on ni kta. Tuka tuwe namni kinhan he minagi kin iyokipi kte šni ce.

39 Tuka tona wicotakuni šni ekta icicawin hdapi kin heuncapi šni; tona wacanagi ni kta e on wicadapi kin hena unkiyepi.

HEBREW WICOWOYAKE 11.

1 Wacinyanpi kin he taku apepi oahe kin ee, qa taku wanyakapi šni un yuotanin kin hee.

2 He on hunka wicayapi kin yuonihanyan ihdaotaninpi qon.

3 Wacinyanpi kin eciyatanhan, Wakantanka oie kin on woicage kin icahyapi kin he sdonunyanpi, taku wanyakapi un kin hena taku tanin kin etanhan kagapi šni.

4 Wacinyanpi kin eciyatanhan Abel Cain kape ca, wošnapi iyotan wašte wan Wakantanka wakiyušna qon he on owotanna e hduotanin; Wakantanka nakun hecen yaotanin, taku qu kin heon, qa he eciyatanhan ta keš nahahin ia ece.

5 Wacinyanpi kin eciyatanhan Enoch wiconte wanyake kte šni e tokan ayapi, qa tuktedan iyeyapi šni, Wakantanka tokan aye cin heon. Tokan ayapi šni itokam Wakantanka iyokipiye cin he okiyakapi.

6 Tuka wacinyanpi codan tuwedan iyokipiye kta okihi šni. Tuwe en u kinhan he Wakantanka ni un, qa tona aiciciya akitapi kin hena iyunwin wicaqu ece kin he wicada kta.

7 Wacinyanpi kin eciyatanhan Noah Wakantanka ihamna, taku nahahin wanyakapi šni kin hena, qa itonkipa un kin heon tiyohnaka tawa ni kte cin on wata tanka wan kaga; qa iye ohan kin on oyate kin wicayaco, qa hecen woowotanna wacinyanpi eciyatanhan un kin he tawa kta e icaga.

8 Wacinyanpi kin eciyatanhan Abraham, makoce wan yuhe kte cin he ekta ye šipi qehan, anagoptan, qa tokiya ye kte cin tanyan sdonkiye šni iyaya.

9 Wacinyanpi kin eciyatanhan makoce iwahoyapi qon he en ounyan, makoce tawa šni kin en iyececa, Isaac qa Jakob taku iwahoyapi qon om tawaye kte cin hena om wakeya ohna ti ece.

10 Otonwe wan taku ahde kin ahe cin he ape yanka, ticage ca icahye cin he Wakantanka kin ee.

11 Wacinyanpi kin eciyatanhan, Sara iye qe cinca yuhe kta e wowašake icu, qa wanna waniyetu ece kin sanpa hiyu tuka cinca ton, tuwe iwahoye ciqon he wicaka e awacin yanke cin heon.

12 Heon wanjidan etanhan, qa he ta nun seca, tuka he etanhan wicota icaga, mahpiya wicanhpi kin iyenaka, qa minivvanca kahda wiyaka sukaza kin iyecen yawapica šni.

13 Dena owasin wacinyan tapi, taku iwahowicayapi qon nahahin icupi šni, tuka tehan tanhan wanyakapi, qa wicadapi, qa adoksohan icupi, qa maka akan oyate tokeca qa unhdaka unpi kin heca ihdaotaninpi.

14 Tona taku hececa eyapi kin hena makoce wanji akitapi e taninyan ohdakapi.

15 Unkan awicakehan makoce kin etanhan hiyupi qon he wacin en yuzapi unkanš, heciya ake ekta hdapi kta okihipi tuka.

16 Tuka nakaha wanji iwotan wašte mahpiya ekta wanke cin hee akitapi. Heon etanhan Wakantanka hena Wakantanka tawapi kin eciyapi kta ištece šni, qa otonwe wan wiyeya ewicakicihnaka.

17 Wacinyanpi kin eciyatanhan, Abraham, iyutanyanpi qehan, Isaac wahdušna, qa tuwe taku iwahoyapi qon wicada kin he cinhintku ecedan kin wahdušna.

18 Isaac etanhan wicoicage nitawa kin cajeyatapi kta ce, eciyapi tuka qon.

19 Wiconte ee kaeš etanhan Wakantanka ekicetuya okihi he wicada; qa hetanhan nakun wiyacinpi on ehdaku.

20 Wacinyanpi kin eciyatanhan Isaac, Jakob qa Esua wicahdawašte, taku u kte cin heon.

21 Wacinyanpi kin eciyatanhan Jakob, wanna te kta hehan, Joseph cinhintku napin wicahdawašte, qa cansagye oinkpa kin akan wocekiye eya.

22 Wacinyanpi kin eciyatanhan Joseph, wanna te kta hehan, Israel cincapi kin hetanhan hdapi kte cin he caje yate ca, iye huhu kin aye wicaši.

23 Wacinyanpi kin eciyatanhan, Moses tonpi kin, hehan hunkakepi kin wi yamni hehanyan anakihmanpi, hokšidan wašte e wanhdakapi, qa wicaštayatapi toope kin kokipapi šni.

24 Wacinyanpi kin eciyatanhan Moses wanna tanka icage cehan, Pharoah cunwintku cinca eciyapi kta wicada šni;

25 Wakantanka taoyate kin om kakija un kte cin he hdahniga, qa woahtani woiyokipi kin he ptenyedan yuhe kta e cin šni;

26 Messiya on aiapi kin he, woyuha Egypta en un kin sam iyeya wowijice tanka daka; wokajuju iyunwin kin he awacin kin heon etanhan.

27 Wacinyanpi kin eciyatanhan Egypta makoce kin ayuštan, qa wicaštayatapi tocanniye kin kokipe šni. Tuwe wanyagpica šni kin he wanyaka se ape yanka.

28 Wacinyanpi kin eciyatanhan wošnapi wohduze, qa we amnimnipi kin hena kaga, tuwe cinca tokapapi kin ihangwicaye cin he iye owicayutan kte šni heon.

29 Wacinyanpi kin on Miniwancaša kin he opta iyayapi, puze cin iyecen. Unkan Egypta oyate kin hecon utapi qehan, minin tapi.

30 Wacinyanpi kin eciyatanhan Jeriko conkaške kin makata ihpaya, anpetu šakowin ohomni unpi qehan.

31 Wacinyanpi kin on, Rahab witkowinna kin, tona anagoptanpi šni kin om ihangyapi šni, makoce iwanyag hipi kin hena wookiye on iyowinwicakiye cehan.

32 Qa taku sanpa epe kta he? Gideon, qa Barak, qa Samson, qa Jephthah, qa David, qa Samuel, qa wicašta wokcanpi kin owasin owicamdake kta anpetu kin iyehankeca šni.

33 Hena wacinyanpi kin eciyatanhan wokiconze kin ohiyapi, wicohan owotanna ohanyanpi, wahoyapi kin icupi, mnaja kin iohmusyapi;

34 Peta wohitike cin kašnipi, mazasagye ope kin nakicipapi, wowašake šni etanhan wašagiciyapi, okicize en waditaka icicagapi, qa Ikcewicašta ozuye kin napewicayapi.

35 Winohinca kin cinca kitapi kin ekicetuyapi ewicahdakupi. Qa wanjikji nina kakišyapi, tuka etanhan elidakupi kta cinpi šni, woekicetu iyotan wašte kin yuhapi kte cin heon etanhan.

36 Qa wanjikji waaiapi, qa nina wicakaštakapi kin on iyutanpi, qa nakun maza icicahiha, kaška wicahnakapi ko on.

37 Inyan on wicakininpi, canibakse on bawicaksapi, iyutanwicayapi, mazasagye on wicaktepi; tahinca ha qa tatokadan ha koyag manin unpi; taku owasin icakijapi, kakijapi un qa šicaya wicakuwapi.

38 Hena maka kin de iyewicakicihantu šni; hewoskan manin unpi, he kin akan, taku itu unpi otipi, qa makohdoka kin ohna.

39 Hena owasin wacinyanpi kin eciyatanhan tanyan ihdutaninpi, qa taku wahoyapi kin ocowasin icupi šni.

40 Wakantanka taku sam iyeya wašte unkiyepi on ehnaka, hecen hena e unkicunonpa tanhan wicahdustanpi kte šni.

HEBREW WICOWOYAKE 12.

1 Heon etanhan waayataninpi mahpiya šoka wan hinsko tanka aohdute unyanpi kin, hecen taku tkeya qinpi kin owasin eunhnakapi kta, woahtani ohiunyanpi ece kin he koya, qa oinyanke unkitokam wanke cin he wacin tankaya unkinyankapi kta.

2 Qa Jesus wacinunyanpi kin toka kage ca hduštan kin hee ekta euntonwanpi kta. He iye, wowiyuškin itokam ehdepi qon he on, cansusbeca kin hee kaeš iyowinkiye ca, wowištece kin he taku da šni, qa Wakantanka oiyotanke etapa kin eciyatanhan kiyotanka.

3 Tuwe wahtanipi sa taku i en hiyeyapi kin he iye en wahbayedan iyowinye ciqon he awacin po, hecen nitawacinpi kin ekta iconimnipi kte šni, qa wacin iboyašakapi kte šni.

4 Woahtani kici yecizapi kin en nahanin we kin ekta aiyahdeya ecanonpi šni.

5 Qa wowahokonkiye cinca iyecen oniciyapi kin he ayektonjapi he; Micinkši, Itancan wicakapsinpsinte cin he šice dake šni wo, qa iyopeniye cinhan wacin ibošake šni wo, eye cin.

6 Itancan kin wicašta waštekida kinhan, he iyopekiye ca, cinca iyowinwicakiye cin otoiyohi hdapsinpsinta ece.

7 Wiyopeniyanpi kinhan, cinca kin iyecen Wakantanka ecaniconpi; tukte cinca kin he atkuku iyopekiye šni he?

8 Tuka owasin en opapi ece kin iyecen iyopeniyanpi šni kinhan, tuwe cinca tanin šni kin henicapi, qa cinhintkuyapi un kin henicapi šni.

9 Unkan, wicacehpi eciyatanhan atewicunyanpi kin hena iyopeunkiyapi ece, unkan wicunhduonihanpi hecinhan, sam iyeya wicanagi Ateyapi kin he anaungoptanpi kte ca on unnipi kta.

10 Hena e anpetu tonana hehanyan, token iyokipipi kin hecen iyopeunkiyapi; tuka he qe unwaštepi kte cin he on, hecen iye towakan kin en ounpapi kta.

11 Wiyopewicayapi kin owasin en icunhan woiyokipi šni, tuka woiyokišice; tuka ihakam tona hecawicakiconpi kin en wicoowotanna waskuyeca wookiye kin icahwicakiya ece.

12 Heon etanhan wicanape kaozezeya un kin hena yuwankan icu po, qa hupahu wašake šni kin hena koya;

13 Qa nisihapi canku mdaya kicaga po, taku huste kin he ieunonpa iyeyapi kte šni, tuka okiziyapi kte cin heon.

14 Owasin en wookiye akita po, qa nakun wowakan kin, he tuwe yuhe šni kinhan Itancan kin wanyake kte šni.

15 Qa tuwe Wakantanka towaonšida kin iyohi kte šni naceca, heon aiciciya iwanihdaka po, okinni can hute paza icage ca, nagiyeniyanpi kta, qa hecen wicota ašamyapi kta.

16 Okinni wicawihomni wan yuke kta, qa taku wakan ohoda šni, Esua iyececa, he watokapa kin taku yutapi onšpadan iyopekiya.

17 Qa iyohakam woyawašte kin

hduhe kta, tuka heyata iyeyapi, he sdonyayapi, qa token tawacin yutokeca kte cin he iyeye šni, ištamnihanpe on nina akita tuka.

18 Paha oyutanpica, qa peta on ide qon he ekta yahipi šni, qa taku iyotan samya wanke cin, qa otpaza, qa nina icamna kin;

19 Qa nakun mazayahotonpi tanka hoton, wicoie ho kin hena koya; he tona nahonpi qon wicoie kin he akta owicakiyakapi kte šni e icekiyapi.

20 Taku econ wicašipi qon he okitpanipi; Woteca wan hee kaeš paha kin yutan kinhan he inyan on kininpi kta, kaeš wanhinkpe on katpa iyeyapi kta ce.

21 Unkan he wanyakapi kin nina wowinihan, qa heon Moses, Nina mahniyanyan qa macancan ce, eya.

22 Tuka Zion Paha kin ekta yahipi, Wakantanka ni un otonwe tawa kin, Jerusalem mahpiya tanhan u kin, qa ohnihde unpi kin kektopawinge ota ekta;

23 Omniciye tanka, qa tokaheya wicatonpi okodakiciye kin, mahpiya ekta caje owicawapi kin hena, qa Wakantanka owasin wicayaco kin he, qa wicašta owotanna yuštanpi nagipi kin hena ekta;

24 Qa Jesus wicotakuye teca kin en iyotahedan un kin hee ekta, qa we amnimnipi kte cin, Abel sam iyeya taku wašte eye cin he ekta.

25 Ihnuhan tuwe ie cin anayagoptunpi šni kinhan; tona tuwe maka akan ie ciqon he anagoptanpi šni qon hena najicapi šni hecinhan, sam iyeya unkiye naunjicapi kte šni, tuwe mahpiya tanhan ie cin ihaunktapi šni kinhan.

26 lye ho kin he ehan maka kin yahuhuza, tuka nakaha wahounyanpi qa heya, Ake wancadan maka ecedan mdahuhuza kte šni, tuka nakun mahpiya kin.

27 Unkan, Ake wancadan, eye cin he taku tona yahuhuzapi kte cin hena taku kagapi kin iyecen yutokan iyeyapi kta, hecen taku tona yahuhuzapica šni kin hena ecen he kta, he kapi.

28 Heon etanhan wokiconze yuhohopica šni kin unkicupi, wowaonšida unhapi kta, hecen woyuonihan, wokokipe ko yuha Wakantanka iyokipiya ohoundapi kta.

29 Wakantanka unkitawapi kin he peta wahuhnahye cin heca.

HEBREW WICOWOYAKE 13.

1 Hunkawanjinkiciyapi waštekicidapi kin he ecen un nunwe.

2 Oicimani kin wonwicaya akiktonjapi šni po; heconpi kin on wanjikši mahpiya ohnihde kin sdonwicaye šni won wicayapi.

3 Tona kaška wicahnakapi kin hena om nicaškapi kin iyecen wicakiksuya po; qa tona kakišyapi un kin hena koya, wicatancan kin ohna dukanpi kin heon.

4 Owasin en wakan kiciyuzapi kin he woyuonihan, qa ohehdepi ašamyapi šni kin; tuka wicawihomnipi qa wawicihahapi econpi kin hena Wakantanka wicayaco kta.

5 Waicucupiktecin wanin oyahandapi kta, qa taku duhapi kin hena on iyonicipipi nunwe. Tohinni aciyuštan kte šni qa icimana ehpeciye kte šni, eye ciqon heon etanhan.

6 Heon, Itancan kin omakiye cin hee, qa he etanhan taku wicašta akantu ecamiconpi kte cin kowakipe kte šni ce, waditagya unkeyapi kta.

7 Tona awannihdakapi, Wakantanka oie kin oniciyakapi kin hena wicakiksuya po, hena wicohan ihanke kin he awacin po, qa wacinyanpi qon he en opa po:

8 Jesus Messiya, htanihan qa nakaha okonwanjidan, qa owihanke wanice kta.

9 Ihnuhan woonspe otakiya qa toktokeca on yutokan iyeniyanpi kinhan; woyute tona he awacinpi qon takudan okihiwicaye šni kin he wicacante kin yusuta šni, tuka wowaonšida  kin on yusutapi kin he wašte.

10 Wahna wošnapi wan unhapi kin he etanhan tona wakeya qon ohna ohanyanpi kin hena yutapi kta iyececapi šni.

11 Woteca, tona we kin woahtani on, wawayušna itancan kin tipi wakan kin timahen ai qon, hena tancanpi kin tihocoka kin itankan huhnahyapi ece.

12 Heon Jesus iš eya, iye we kin on oyate kin wicayuecedan kta e otonwe tiyopa kin itankan kakišyapi qon.

13 Hecen iye on aiapi qon aihpeunyanpi kin yuha ekta wicoti kin tankan unyanpi kta.

14 Deciya otonwe ohinniyan ecen he cin unhapi šni, tuka wanji u kte cin he unkakitapi.

15 Heon etanhan, iye caje on, ohinniyan Wakantanka en wowitan wošnapi kin unkaupi kta, unkihapi etanhan waskuyeca, iye caje kin on, wounhdakapi kin hee.

16 Taku wašte econpi, qa wacantkiyapi kin hena akiktonjapi šni po, hena wošnapi kin Wakantanka iyokipi ece.

17 Tona wahokonniciyapi kin hena anawicakigoptan po, qa wicihukuya yeiciya po, hena ninagipi kin on awanniyakapi, ohdakapi kte cin he iyecen; heepa wowiyuškinyan econpi kta, qa woiyokišinya econpi kte šni; he niyepi kin on wašte.

18 Wocekiye unkekiciya po; wicanagi wašte unhapi unkecinpi, taku owasin en owotanna unkohanyanpi kta uncinpi.

19 Tuka hecanonpi kta e iyotan ceciciyapi, kohanna niyepi ekta u mayanpi kte cin heon.

20 Unkan, Wookiye Wakantanka kin, Jesus Itancan unkiyapi, tahinca awanwicahdake tanka kin he, wiconte etanhan ake hiyuye ciqon he wicotakuye owihanke wanica we kin eciyatanhan,

21 Iye tawacin kin ecen ecanonpi kta e, wicohan wašte owasin en niyusutapi kte, qa taku iye išta kin en oiyokipi kin ecaniconpi kta, Jesus Messiya eciyatanhan; he wowitan owihanke wanica kicihan nunwe.

22 Mihunkawanji, ceciciyapi ce, wowahokonkiye wicoie kin iyowinkiya po, wicoie tonana on wowapi cicagapi.

23 Timotheus hunkawanjin unyanpi kin wanna kiyuškapi e sdonya po, he ecadan u kinhan kici wanciyakapi kta.

24 Tona niyepi en itancanpi kin hena owasin, qa tona owotanna un kin owasin nape wicayuza po. Italia etanhanpi kin hena nape niyuzapi.

25 Wowaonšida  kin niyepi owasin en nicipi un nunwe. Amen.