Philemon Dakota/ Lakota Wowapi Wakan Kin

PALOS PHILEMON WOWAPI KICAGE CIN

1 Palos, Jesus Messiya on, kaška hnakapi kin he, qa Timotheus sunkaunyanpi kici, Philemon wašteunkidapi qa ounkiyapi ece kin,

2 Qa nakun Apphia wašteundakapi kin, Archippus kici amakicita kin he kici, qa yati ohna okodakiciye kin, witaya wowapi unnicagapi:

3 Wowaonšida, wookiye ko, Wakantanka Ateunyanpi, qa Jesus Messiya Itancan kin etanhan, nicipi un nunwe.

4 Wocekiye epa eca, ohinniyan ciksuye ca, on Wakantanka wopida ewakiya ece:

5 Jesus Itancan kin wacinyaye ca wašteyadaka, nakun tona owotanna un kin owasin, he nawahon kin heon;

6 Hecen wacinyaye cin owicayaqu kin he sanpa wašaka aye kta, on taku wašte owasin, Jesus Messiya eciyatanhan, unkiyepi en un kin he yutaninpi kta.

7 Mihunkawanji, wacanyakiye cin heon nina unkiyuškinpi, qa unkicanptapi, tona owotanna un kin hena cantepi kin iyuškinwicayaye cin heon etanhan.

8 Qa heon taku iyokipi kin Messiya en itancanyan econ ciši kta owakihi:

9 Tuka wacantkiyapi kin eciyatanhan ceciciya ce, Palos he miye, wanna wimacahinca, qa nakaha Jesus Messiya on kaška mahnakapi waun.

10 Hecen Onesimus micinkši, makaškapi kin icunhan micinca wakage cin hee on ceciciya.

11 He ehanna takudan nicamna šni, tuka nakaha miye omakiye ca nakun niye oniciya okihi. He nakaha hde waši.

12 Niye he iyowinkiya wo, minagi kin hee kaeš iyececa.

13 He yuha waun kta wacin, wotanin wašte kin on etanhan makaškapi icunhan niye eekiya omakiye kte cin heon.

14 Tuka token yacin kin sdonye šni waun takudan ecamon kte šni; taku wašte econ nišipi kin he iyecen ecanon kte šni, tuka niye cinka econ wacani kta he wacin.

15 He iye anpetu tonana aniyuštan, ake ohinniyan yahduhe kta heon etanhan hecon naceca.

16 Wanna wowidake unpi kin iyecece šni, tuka wowidake kin ikapeya wašte, hunkawanjinkiciyapi waštekidapi kin iyecen; miš hecen wacin wakiyuze cin, niye iyotan hecen wacin yakiduze kta, wicacehpi qa Itancan kin nakun eciyatanhan hunkawanjinyaye kta.

17 Kodayapi iyecen mayaduha hecinhan, he miye iyecen ake ehdaku wo.

18 Taku icakišniye ca, taku iyohiniciciye šni hecinhan, he miciyawa wo.

19 Palos he miye, minape kin on de owawa, he miye wakajuju kta. Qa taku miyecicajuju šni, niye atayedan ocowasin yaun kin he caje mdate šni.

20 Han, mihunkawanji, Itancan kin en niye on imduškin kta; Itancan kin en micante kin iyuškinmayan wo.

21 Waanayagoptan kta imdukcan, heon wowapi cicaga; qa epe cin sam iyeya ecanon kta sdonwaya.

22 Tipi tukten manke kte cin he nakun wiyeya emicihnaka wo; wocekiye ehapi kin on etanhan niyepi on makiyuškapi kta epca waun.

23 Epaphras, Jesus Messiya on, kici makaškapi kin he nape niyuza;

24 Qa Markus, Aristarchus, Demas, qa Lukas micihtanipi kin hena nakun.

25 Jesus Messiya Itancan unkiyapi towaonšida kin ninagi kin kici un nunwe. Amen.