Last of Mark (Markos)

MARKOS WICOWOYAKE 12.

1 Hehan wiyacinpi on wowicakiyaka; Wicašta wan hastanhanka iyuwi wojupi wan oju, qa ohomni natake ca, miniša iyuškice wan en qe ca, cowahe tehan wankantu wan kaga; qa kicanyanpi kte cin owicaqu, qa makoce wan tokeca ekta icimani iyaya.

2 Qa wanna iyehantu qehan taokiye wan kicanyanpi kin ekta ye ši, kicanyanpi kin etanhan hastanhanka ojupi kin waskuyeca icu kte cin heon etanhan.

3 Unkan he yuzapi, qa apapi, qa cokadan hde šipi.

4 Unkan ake taokiye wanji tokeca ekta ye ši; tuka e qe inyan on kininpi, qa pa kahdecapi, qa tehiya kuwapi hde šipi.

5 Unkan ake wanji tokeca ekta ye ši; qa he qe ktepi: unkan nakun wicota, hunh awicapapi qa hunh wicaktepi.

6 Hehan cinhintku wanjidan waštekidake cin he hinahin hduha; unkan he ehake ekta ye ši, qa; Micinkši yuonihanpi kta ce, eya.

7 Tuka kicanyanpi kin hekiciyapi; Tawa kte cin he dee; iho po, unktepi kta; hecen he unkitawapi kta ce.

8 Unkan hecen yuzapi qa ktepi, qa wojupi kin etanhan tankan ehpeyapi.

9 Heon hastanhanka ojupi yuhe cin he taku econ kta he? En hi qa kicanyanpi kin hena ihangwicaye kta, qa hastanhanka ojupi kin wicašta tokeca owicaqu kta.

10 Wowapi kin de dawapi šni he; Ticagapi inyan wan ehpeyapi qon he oise en pa icaga ce.

11 He Itancan kin econ, qa unkištapi kin en taku wowinihan?

12 Hehan yuze wacinpi, tuka oyate kin kowicakipapi; wiyacinpi kin de iye wicaka e heya sdonyapi. Unkan ehpeya kihdapi.

13 Hehan Pharisee qa Herodian etanhan wanjikji ekta ye wicašipi; taku eye cin on yuzapi kta.

14 Unkan hena en hipi qehan heciyapi; Waonspekiye, iewicayaka qa tuwedan koyakipe šni sdonunyanpi; wicašta tancan ekta eyatonwe šni ece, tuka awicakehan Wakantanka tacanku kin odaka ece; Kesar wamnayanpi qupi kta iyececa he?

15 Unqupi kta, qa iš unqupi kte šni he? Tuka iye wohnaye hduhapi sdonye ca hewicakiya; Tokeca iyutanmayayapi he? Kašpapidan wanji makau po, wanmdake kta ce.

16 Unkan kahipi. Hehan hewicakiya; Wicite qa wowapi kin de tuwe tawa he? Unkan, Kesar tawa ce, eciyapi.

17 Hehan Jesus waayupte ca; Kesar taku tawa kin kicu po; qa Wakantanka taku tawa kin kicu po, ewicakiya. Unkan heon inihanpi.

18 Hehan Saddukee kin, piya iwicacage kte cin wanica keyapi, hena etanhan en hipi; qa wiwangapi qa heyapi;

19 Waonspekiye, Moses wowapi unkicagapi, wicašta wan tawicu ehpeya te ca, cinca nice cinhan, sunkaku winohinca kin he hduze kta, qa cincu qon cinca kicage kta ce.

20 Hunkawanjinkiciyapi šakowin; unkan tokapa kin winohinca wan yuze ca, cinca codan ta.

21 Hehan iyokihe kin he hduze ca nakun ta, qa cinca nica; unkan iyamni kin iš nakun.

22 Unkan ecen šakowinpi kin hduzapi, qa cinca nicapi: ehake winohinca kin iš eya ta.

23 Hecen piya iwicacage cin en inajinpi kinhan, wanji tukte tawicuyapi kta he: šakowin hduzapi tuka.

24 Unkan Jesus waayupte ca hewicakiya; Wowapi wakan kin sdonyayapi šni, qa nakun Wakantanka towašake kin, heon yanunipi.

25 Wiconte etanhan piya wicoicage kinhan tawicu tonpi šni qa hihnaku yuhapi šni; tuka mahpiya ekta ohnihde unpi kin iyececapi.

26 Unkan tona tapi kin hena piya icagapi kta, on Moses tawowapi kin en dawapi šni he; can opamna etanhan Wakantanka okiye ca heya; Abraham Wakantanka tawa, qa Isaak Wakantanka tawa, qa Jakob Wakantanka tawa kin he miye ce?

27 Wicašta tapi kin Wakantanka tawapi šni, tuka ni unpi kin Wakantanka tawapi: heon etanhan sogya yanunipi.

28 Hehan wowapi kagapi wanji en hi, qa akinicapi kin nahon, qa tanyan awicayupta iyukcan heon etanhan, Woahope tokaheya kin tukte e he, eya iwanga.

29 Unkan Jesus ayupta; Israel nahon po, Jehowa Wakantanka unkitawapi kin he Itancan wanjidan, woahope owasin tokapa kin hee ce.

30 Unkan Jehowa Wakantanka nitawa kin he nicante ocowasin on, qa ninagi ocowasin on, qa nitawacin ocowasin on, qa nitowašake ocowasin on, wašteyakidake kta ce; woahope tokaheya kin hee.

31 Qa inonpa kin he he iyececa; Nikiyedan un kin he niye inihdacin wašteyadake kta. Woahope dena isanpa tanka wanica.

32 Unkan wowapi kage cin he heciya; Han, Waonspekiya, wowicake ecen eha, Taku wakan wanjidan, qa icunonpa tanhan wanica.

33 Qa wicacante ocowasin on, qa wicotawacin ocowasin on, qa wicanagi ocowasin on, qa wicowašake ocowasin on waštedakapi, qa wicikiyedan unpi kin wiciye ihdacin waštewicadapi kin, peta on wošnapi qa ikce wošnapi owasin, he isanpa tanka ece.

34 Unkan he wacinksamya ayupta Jesus wanyaka, hehan heciya; Wakantanka tokiconze kin itehan yaun šni. Unkan hetanhan tuwedan sanpa wiwanga tawatenye šni.

35 Hehan Jesus tipi wakan kin ohna wowicakiyaka icunhan waayupte ca heya; Wowapi kagapi kin Messiya he David Cinhintku ce, tokeca heyapi he?

36 David iye qe Woniya Wakan on heya; Itancan kin Itancan mitawa heciya; Mietapa ekta iyotanka wo, tona tokaniyanpi kin hena siha oahe nitawa kin wakage kta hehanyan.

37 Heon etanhan David iye qe Itancan eciya; hecen token cincaya he? Unkan oyate ikceka kin wiyuškinyan nahonpi.

38 Unkan wowicakiyaka icunhan hewicakiya; Wowapi kagapi kin kowicakipa po, hena wokoyake hanskaska kicun waštedakapi, qa wopeton tipi kin ohna owicakiyapi kta nakun:

39 Qa omniciye tipi kin en oiyotanke tokapapi, qa wotapi kin en oyanke waštešte kin:

40 Hena e wiwazica tipi kin temyapi, qa ihdutaninpi on wocekiye hanska eyapi ece: hena woyaco iyotan tanka yuhapi kta.

41 Unkan Jesus mazaska opiye kin iyotakons iyotanka, qa token oyate kin mazaska opiye kin en, mazaska ehpeyapi kin he wanyaka. Unkan wicota wijicapi kin hena odota en ehpeyapi.

42 Unkan wiwazica wahpanica wan en hi, qa mazaša onšpadan nom en ehpeya, he mazaša wanjidan yawapi.

43 Unkan waonspewicakiye cin hena wicakico qa hewicakiya; Dena owasin mazaska opiye kin en ehpeyapi, tuka wiwazica wahpanica kin de owasin isanpa en ehpeya, awicakehan eciciyapi.

44 Dena owasin taku ota tonpi kin eciyatanhan en ehpeyapi ece; tuka iye qe nice cin etanhan taku yuhe cin ocowasin en ehpeya, on ni kte cin ocowasin.

MARKOS WICOWOYAKE 13.

1 Unkan tipi wakan kin etanhan kinanpa hehan waonspewicakiye cin wanji heciya; Waonspekiya, inyan tankinyanyan kin dena, qa tipi kagapi kin dena wanyaka wo!

2 Unkan Jesus waayupte ca heciya; Tipi tankinyanyan kin dena owasin wandaka he? Inyan wanji inyan itakihna wanke kte šni, owasin jujuwahe kta.

3 Unkan Oliwe Paha kin akan iyotanka, tipi wakan kin iyotakons, hehan Inyan qa Jakob qa Johannes qa Andrew nahmana wiwangapi;

4 Tohan hena hecetu kta he? qa dena owasin iyecetu kta e wowapetokeca tukte e hecinhan, unkokiyaka po?

5 Unkan Jesus waayupte ca hewicakiya; Iwanihdaka po, okinni tuwe nihnayanpi kta.

6 Wicota micaje on hipi qa; He miye ce, eyapi kta, qa wicašta ota wicahnayanpi kta.

7 Unkan tohan wicokicize qa kicizapi kta oyakapi kin nayahonpi kinhan, nihinciyapi šni po: hena hecetu kta, tuka owihanke kin hinahinke šni.

8 Oyate wan oyate tokeca on najin kta, qa wokiconze wan wokiconze tokeca on; qa tuktekten maka škanškan yuke kta, qa wicaakihan qa wicokicize yuke kta. Dena wicoiyokišice tokaheya kin ee.

9 Tuka iwanihdaka po; omniciye tanka kin en aniyanpi kta; qa omniciye tipi kin ohna nicaštakapi kta; qa miye on wicašta itancanpi wicaštayatapi ko en aniipi kta, owicayakapi kta heon.

10 Tuka tokaheya wotanin wašte kin he oyate owasin owicakiyakapi kta.

11 Tuka tohan aniyanpi qa wicanicupi kinhan, itokam taku ehapi kta awacinpi šni po, qa on cante šicapi šni po; tuka wihiyayedan oape kin he en taku nicupi kin he ohna eya po; eye kte cin he niyepi šni, tuka Woniya Wakan kin hee kta.

12 Hunkawanjinkiciyapi wiconte en kicicupi kta, qa wicašta wan iye cinca nakun; qa wicacinca inajinpi kta qa hunkakewicayapi kin tewicayapi kta.

13 Unkan miye on owasin šicenidapi kta; tuka tuwe owihanke kin hehanyan ope cinhan he ni kta.

14 Tuka tohan wošice woihangye, Daniel wicašta wokcan cajeyate ciqon, tukten najin kta iyecece šni, hen wandakapi kinhan, tuwe yawa kinhan okahnige kta, hehan tona Juda makoce kin en unpi kin he kin ekta najicapi kta:

15 Qa tuwe tipi akan yanke cin he kun ku, qa timahen tanhan takudan ehdaku kte šni:

16 Qa nakun tuwe magata un kinhan, wokoyake ehdaku kta on hdicu kte šni.

17 Tuka anpetu kin hena en tona ihdušakapi qa hokšiyoqopa azinwicakiyapi kin hena tehiya unpi kta!

18 Unkan waniyetu icunhan nayapapi kte šni e icekiya po.

19 Anpetu kin hena en wicokakije yuke kta, tokaheya Wakantanka taku kage cin ehantanhan, qa dehanyan takudan iyecece šni, qa nakun tokata ekta iyecece kte šni.

20 Unkan Itancan kin anpetu kin hena yuptecedan šni kinhan, wicacehpi takudan ni kte šni; tuka wicakahnigapi tona wicakahnige cin hena on anpetu kin hena yuptecedan.

21 Unkan hehan tuwe; Iho, Messiya hen yanka ce, qa iš; Kan yanka ce, eniciyapi ešta, wicadapi šni po.

22 Messiya itonpišni qa wicašta wokcan itonpi šni kin heca icagapi kta, qa wowapetokeca taku wowinihan ko econpi kta, okihipica unkanš wicakahnigapi kin hena eepi kaeš wicahnayanpi kta tuka.

23 Tuka iwanihdaka po; iho, itokam hena ociciyakapi.

24 Tuka anpetu kin hena en, wicokakije kin iyohakam, anpetu wi kin aotpasyapi kta, qa hanyetu wi kin iyoyanpa kte šni;

25 Qa mahpiya wicanhpi kin hinhpaye kta, qa mahpiya ekta wowašake kin yuhuhuzapi kta.

26 Unkan hehan Wicašta Cinhintku kin wowašake tanka wowitan ko hduha mahpiya šapa akan u wandakapi kta.

27 Unkan hehan ohnihdewicaye cin hena ye wicaši kta, qa tate ouye topa kin etanhan, maka ihanke kin etanhan qa mahpiya ihanke kin hehanyan, wicakahnige ciqon hena witaya wicakpahi kta.

28 Suken can kin etanhan wiyacinpi kin de okahniga po: Can intpa kin hinahin wankadan, qa etanhan ape icage cinhan, hehan mdoketu wanna ikiyedan sdonyayapi ece.

29 He iyececa, niš tohan dena owasin iyecetu wandakapi kinhan, wanna ikiyedan, tiyopa kin etu, e sdonya po.

30 Awicakehan heciciyapi, wicoicage kin de tokan iyaye šni, ecen dena owasin econpi kta.

31 Mahpiya maka ko tokan iyaye kta, tuka mioie kin hena tokan iyaye kte šni.

32 Tuka anpetu kin he, qa wihiyayedan oape kin he tuwedan sdonye šni, mahpiya ohnihde kin heepi kaeš, qa nakun Cinhintkuyapi kin; tuka Ateyapi kin ecedan sdonya.

33 Iwanihdaka po, wakta unpi qa cekiya po; tohan iyehantu kte cin sdonyayapi šni nakaeš.

34 Wicašta wan icimani ye kte cin, tipi elipeye ca taokiyewicaye cin taku econ wicaši, otoiyohi wicohan wicaqu, qa tiawanyake cin he awanyake ši, he iyececa.

35 Heon etanhan waktaya un po; tipi ohna itancan kin tohan hdi kta sdonyayapi šni, htayetu, qa hanye cokaya, qa anpaohotonna hoton, qa iš hanhanna kinhan.

36 Okinni ihnuhanna hdi kinhan ništinmapi iyeniyanpi kta.

37 Unkan taku eciciyapi kin he owasin ewicawakiya ece, Waktaya un po.

MARKOS WICOWOYAKE 14.

1 Anpetu nonpa iyohakam hehan woacakšin qa aguyapi napohyapi šni: Unkan wošnapi kagapi wowapi kagapi ko token hnayan yuzapi kta akitapi, ktepi kta e heon.

2 Tuka heyapi; Wošnapi anpetu kin hehantu kte; okinni oyate kin owodutaton kta.

3 Unkan Bethani etu, Simon lepros ececa qon he ti kin en wota iyotanka, hehan winohinca wan inyan opiye wan wihdi waštemna tehike hinca he yuha hi, qa opiye kin yuhdoke ca iye pa kin akaštan.

4 Unkan hen wanjikji cante mahen iyokipipi šni qa heyapi; Tokeca wihdi waštemna kin hecen yutakunipi šni he?

5 Wihdi waštemna kin de kašpapi opawinge yamni sanpa iyopeyapi qa wahpanica wicaqupi kta tuka. Hecen winohinca qon icaptapi.

6 Unkan Jesus heya; Ayuštan po; tokeca nagiyeyayapi he? Wicohan wašte wan ecamicon.

7 Wahpanicapi kin ohinniyan wicayahduhapi, qa tohan yacinpi kinhan tanyan ecawicayeconpi kta oyakihipi; tuka miye ohinniyan mayaduhapi šni.

8 Taku okihi kin ecen econ; mitancan hapi kte cin on itokam sdaye kta on hi.

9 Awicakehan heciciyapi; Maka kin owancaya tukten wotanin wašte kin de oyakapi kinhan, winohinca kin de nakaha taku econ kin he oyakapi kta, wokiksuye kta e heon.

10 Unkan Judas Iskariot, akenonpapi kin wanji ee, wošnapi kagapi kin ekta ya, he hnayan wicaqu kta heon.

11 Unkan he nahonpi qehan wiyuškinpi, qa mazaska qupi kta keciyapi. Unkan token tanyan hnayan wicaqu kta he akita.

12 Unkan aguyapi napohye šni anpetu tokaheya en wošna ktepi ece kin hehantu, waonspewicakiye cin heciyapi; Tukten woacakšin wošnapi yate kta wiyeya eunhnakapi kta yacin he?

13 Unkan waonspewicakiye cin nom ye wicaši, qa hewicakiya; Otonwe kin en ya po, kinhan wicašta wan mini ohna wakiškotpa wan qin itkonicipapi kta, he ihakam ya po.

14 Qa tukte en tin kihde cinhan, tipi tawa kin heciya po; Waonspekiye cin heya ce; Wankan tipi kin tukten waonspewicawakiye cin om wošnapi kin wate kta tukte e he?

15 Unkan wankan tipi wan tanka, tanyan yuštanpi qa wiyeya yanka, nicipazopi kta; hen wiyeya eunkicihnaka po.

16 Unkan waonspewicakiye cin iyayapi, qa otonwe kin en ipi, qa token ewicakiye cin hecen iyeyapi; unkan wošnapi kin wiyeya ehnakapi.

17 Unkan wanna htayetu hehan akenonpapi kin om en hi.

18 Unkan wota iyotankapi icunhan Jesus heya; Awicakehan heciciyapi: Mici wayatapi kin wanji wiyopemayayapi kta.

19 Hehan iyokišica hinhdapi, qa otoiyohi heciyapi; He miye he? qa ake wanji, He miye he? eyapi.

20 Unkan hewicakiya; Akenonpapi kin etanhan wanji wakšica ohna mici oputkan kin hee ce.

21 Wicašta Cinhintku kin awicakehan token wowapi en kagapi qon he iyecen iyoopta ya, tuka wicašta kin tuwe Wicašta Cinhintku kin wiyopeye cinhan, he wotehi yuhe kta! wicašta kin he tohinni tonpi šni unkanš wašte kta tuka.

22 Unkan wotapi icunhan Jesus aguyapi icu, yawašte, qa kiyušpa, qa wicaqu, qa heya; Icupi qa yuta po; mitancan kin he dee.

23 Nakun wiyatke kin icu; qa yawašte hehan wicaqu. Unkan owasin etanhan yatkanpi.

24 Unkan hewicakiya; Wicotakuye teca kin en, mawe kin he dee, wicota on papsonpi.

25 Awicakehan heciciyapi; Detanhan wiyuwi waskuyeca etanhan icimana mdatke kte šni, anpetu wan en Wakantanka tokiconze kin en teca mdatke kte cin hehanyan.

26 Unkan odowan wan ahiyayapi hehan Oliwe Paha kin ekta iyayapi.

27 Hehan Jesus hewicakiya; Hanyetu kin de miye on iyuhpa nihicahanpi kta; kaken wowapi en kagapi qon, Waawanhdake kin he awape kta, hecen tahinca wanunyanpi kin mdecahanpi kta ce.

28 Tuka ake wakini iyohakam, Galile ekta nitokam imdamde kta.

29 Tuka Inyan heciya; Owasin hicahanpi ešta, miye qe ecamon kte šni.

30 Unkan Jesus heciya; Awicakehan heciciya; Anpetu kin de, hanyetu kin de en, anpaohotonna nonpa hoton šni, ecen yamni akihde anamayakihbe kta.

31 Hehan iyotan nina kitan hinca; Cicimata ešta anacicihbe kte šni. Iyuhpa nakun iyecen eyapi.

32 Unkan wojupi wan en ipi, Gethsemane eciyapi; hehan waonspewicakiye cin hewicakiya; Den iyotanka po, icunhan cewakiye kta.

33 Unkan Inyan qa Jakob qa Johannes hena iwicacu, hehan inihan qa nina iyokišica hinhda;

34 Qa hewicakiya; Minagi nina iyokišice hinca, mate kta iyececa; den yukanpi qa waktaya un po.

35 Unkan hetanhan kitan ecinyan iyoopta ye ca, makata ihpaye ca cekiya, okihipica kinhan, wihiyayedan oape kin he tokan iyaye kta.

36 Unkan heya; Abba, Ate, niye ekta taku owasin okihipica; wiyatke kin de emiciyaku wo; tuka miš taku wacin kin hee kte šni, taku yacin kin he hecetu kta.

37 Hehan en hdi, qa ištinmapi iyewicaya, unkan Inyan heciya; Simon ništinma he? wihiyayedan oape wanjidan kiktahan yaun kta oyakihi šni he?

38 Kiktahan unpi qa cekiya po; okinni taku wawiyutanyan un kin en yaipi nun ce; wicanagi kin he awicakehan wicada, tuka wicacehpi kin wašake šni.

39 Unkan ake iyaye ca cekiya, qa wicoie un qon hena ake ecen eya.

40 Unkan ake en hdi qehan, ake ištinmapi iyewicaya, išta hbapi hinca, unkan token ayuptapi nun tannin šni.

41 Unkan iciyamni en hdi, qa hewicakiya; Ištinma po qa oziiciya po; wanna henakeca, wihiyayedan oape kin wanna iyehantu; wanyaka po, Wicašta Cinhintku kin wahtanipi sa napepi kin en hnayan wicaqupi.

42 Najin po, unyanpi kta; iho, tuwe mahnaye cin he wanna kiyedan u ce.

43 Unkan ecahankeya, iahan icunhan, Judas hi, akenonpapi kin wanji ee, qa kici wicota hinca, mazasagye can otoza ko yuhapi, wošnapi kagapi, wowapi kagapi, qa wicahincapi kin etanhan upi.

44 Unkan tuwe hnayan wicaqu kte cin he iwaktawicaye ca; Tuwe i iwaputake cinhan hee kta; yuzapi qa tanyan akiyahda po, eya.

45 Unkan en hi qehan, ecahankeya en ye ca, Itancan, Itancan, eciye ca, i itputaka.

46 Hehan nape ahnakapi qa yuzapi.

47 Unkan wanji en najinpi kin mazasagye ehdaku, qa wošnapi kagapi itancan taokiye wanji ape ca noge bašpa.

48 Unkan Jesus waayupte ca hewicakiya; Wamanon sa takpe hipi iyececa, mazasagye can otoza ko yuha mayaduzapi kta on yahipi he?

49 Anpetu eca tipi wakan kin ohna ocipani qa waonspekiya waun, tuka mayaduzapi šni; tuka wowapi wakan kin yuecetupi kta.

50 Hehan owasin ehpeya najicapi.

51 Unkan koška wan ihakam ya, tancodan un tuka minihuha ska tancan iyakipemni. Unkan koškapi kin hena yuzapi:

52 Hehan minihuha ska kin he ehpeya, qa tancodan kihda.

53 Unkan Jesus wošna kagapi itancan kin ekta ayapi; qa hen wošnapi kagapi, wicahincapi, wowapi kagapi ko owasin mniciyapi.

54 Unkan Inyan itehnn ihakam u, qa wošna kagapi itancan ti kin en hi; qa ookiyewicayapi kin om iyotanke ca peta kin en cosiciya.

55 Unkan wošnapi kagapi qa omniciye ocowasin tuwe Jesus on taku oyakapi kta odepi, ktepi kta e heon, tuka takudan iyeyapi šni.

56 Wicota itonšniyan woyakapi, tuka taku oyakapi kin ocitkonze šni.

57 Hehan wanjikji inajinpi, qa itonšniyan taku iyaonpapi, qa heyapi;

58 Unkiye, Tipi wakan nape on kagapi kin de ihangwaye kta, qa anpetu yamni hehan wanji tokeca nape codan kagapi kin he wakage kta ce, eya naunhonpi ce.

59 Tuka iš eya taku oyakapi kin ocitkonze šni.

60 Hehan wošna kagapi itancan kin wicacokaya inajin, qa Jesus iwange ca; Dena taku iyanionpapi kin takudan adupte šni he? eya.

61 Tuka iye inina un qa takudan ayupte šni. Ake wošna kagapi itancan kin wiwange ca heciya; Messiya, lyotan Wašte Cinhintku kin he niye he?

62 Unkan Jesus heya; He miye; qa Wicašta Cinhintku kin wowašake etapa eciyatanhan iyotanke ca, mahpiya šapa akan u wandakapi kta ce.

63 Hehan wošna kagapi itancan kin wokoyake hdupote ca heya; Taku on woyakapi sanpa uncinpi kta he?

64 Wayašice cin he niye nayahonpi: token idukcanpi he? Unkan owasin, te kta iyececa, yacopi.

65 Hehan wanjikji atagošapi qa ite ogekicitonpi, qa apapi qa; Wokcan wo, eciyapi. Unkan ookiye unpi kin iš eya nape on apapi.

66 Unkan Inyan ihukuya tipi kin ohna yanka; hehan wošna kagapi itancan winyan wowidagwicaye cin wanji en hi;

 67 Qa Inyan petiškan yanka wanyake cehan en etonwe ca heya; Qa niš eya Jesus Nazareth kici yaun qon.

68 Tuka anakihbe ca heya; Taku ehe cin he sdonwaye šni, qa nakun owakahnige šni ce. Hehan tankan ohanzi hdepi

kin ekta iyaya: unkan anpaohotonna wan hoton.

69 Unkan ake wikoška wan wanyake ca, tona en najinpi kin hewicakiya; De iš nakun hetanhan.

70 Unkan iš ake anakihman. Hehan kitan ecinyan iyohakam tona en najinpi kin ake Inyan heciyapi; Awicakehan niš henitanhan; Galile wicašta henica; qa iyae cin he iyececa ce.

71 Tuka iye wayašice ca taku wakan cajeyata; Wicašta kin de cajedatapi kin ecaca sdonwaye šni ce, eya.

72 Hehan inonpa anpaohotonna kin hoton. Unkan hehan Inyan Jesus taku eciye ciqon; Anpaohotonna nonpa hoton šni, yamni akihde anamayakihbe kta ce, wicoie kin he kiksuya. Unkan he awakicin hehan ceya.

MARKOS WICOWOYAKE 15.

1 Unkan wanna anpao hehan wošnapi kagapi qa wicahincapi, wowapi kagapi ko omniciye ocowasin om he aiapi, qa Jesus kaškapi, qa ekta ayapi qa Pilate qupi.

2 Unkan Pilate wiwanga; Juda oyate Wicaštayatapi kin he niye he? Unkan Jesus ayupte ca, Niye ecen eha ce, eya.  

3 Unkan wošnapi kagapi kin taku ota iyaonpapi; tuka takudan ayupta šni.

4 Unkan Pilate ake wiwange ca; Takudan adupte šni he? iho, taku ota iyanionpapi ce, eya.

5 Tuka Jesus takudan ayupte šni; hecen Pilate yušinyaya.

6 Wošnapi kin de ekta wicakaškapi wanji wicakiciyukca ece, wanji tukte cinpi kinhan.

7 Unkan wanji Barabbas eciyapi, he tona om inajin qon kaškapi yanka, he inajinpi qehan nakun tinwicakte.

8 Unkan oyate kin, token econ ece qon he iyecen ecawicakicon kta, panyehan keciyapi.

9 Tuka Pilate awicayupte ca; Juda Wicaštayatapi kin he ciciyukcapi kta yacinpi he?

10 Wošnapi kagapi kin winawizipi on kahipi e sdonya.

11 Tuka wošnapi kagapi kin oyate kin wahokonwicakiyapi, Barabbas he wicakiyukca kta e heon.

12 Unkan Pilate ake awicayupte ca; Hehan tuwe Juda Wicaštayatapi eyakiyapi kin he token ecamon kta yacinpi he? ewicakiya.

13 Unkan ake panyehan heyapi; Icipawen okatan wo.

14 Hehan Pilate hewicakiya; Tokeca, taku šica econ kin tukte e he? Unkan hehan iyotan nina; Icipaweh okatan wo, panyehan eyapi.

15 Unkan Pilate oyate kin iyokipiwicaye kta cin, heon Barabbas wicakiciyukca, qa Jesus kapsinpsinta hehan icipaweh okatanpi kta wicaqu.

16 Unkan akicita kin tipi wan tanka, Pretorium eciyapi, he ekta ayapi; qa wicobe ocowasin wicakicopi.

17 Unkan šina duta wan inkiyapi, qa wapaha wan wapepeka on kazontapi qa unkiyapi.

18 Qa hehan okiyapi, Iho, Juda Wicaštayatapi kin!

19 Qa cedi tanka wan on pa kin en apapi, qa atagošapi, qa canpeška makehde inajinpi, qa ohodapi.

20 Unkan hecen ihahapi, hehan šina duta kin ikicicupi, qa iye tawokoyake qon ake kicunkiyapi. Hehan icipaweh okatanpi kta e ekta ayapi.

21 Unkan Simon, Kurene wicašta, en hiyaya, he Alexander qa Ruphus atkuku kin, makoce kin etanhan u kin he can susbeca tawa kin kicicinkiyapi.

22 Unkan Golgotha owanka kin en ahipi, he, Wicapahu makoce, eyapi kin he kapi.

23 Unkan miniša pejihuta icahiyapi kin he yatke kta e qupi; tuka wicada šni.

24 Unkan wanna icipaweh okatanpi, hehan tawokoyake qon kicipamnipi, qa on oeconna econpi, wicašta otoiyohi taku icupi kta.

25 Unkan wanna wihiyayedan oape yamni, hehan icipaweh okatanpi.

26 Unkan taku iyaonpapi wowapi iwankam owapi kin, JUDA WICAŠTAYATAPI KIN, hee.

27 Unkan kici wamanon sa nom icipaweh owicakatanpi, wanji etapa eciyatanhan, qa unma catka eciyatanhan.

28 Hecen wowapi kagapi qon yuecetupi; Qa wahtanipi sa om yawapi ce, eya. 

29 Unkan tona en hiyayapi kin hena yašicapi, poptanptanpi qa heyapi; Iho, tipi wakan kin ihangyaye kta, qa anpetu yamni ake piya yakage kta:

30 Ito, niiciya wo, qa cansusbeca kin etanhan kun ku wo.

31 Nakun wošnapi kagapi kin ihahapi, qa wowapi kagapi om iye iyakitedan hekiciyapi; Wicašta tokeca niwicaya ece, tuka iye atayedan niiciye kta okihi šni.

32 Messiya Israel Wicaštayatapi kin, ito cansusbeca kin etanhan kun hdicu kta, hecen wanunyakapi qa wicaundapi kta. Unkan tona kici icipaweh owicakatanpi qon iš eya ihahapi.

33 Unkan wihiyayedan oape išakpe, hehan maka kin owancaya otpaza, oape inapcinwanka hehanyan.

34 Qa wihiyayedan oape inapcinwanka, hehan Jesus hotankakiya panyehan; Eloi, Eloi, lama sabakthani, eya? Wakantanka mitawa, Wakantanka mitawa, tokeca ehpemayaya he? eyapi kin he kapi.

35 Unkan en najinpi wanjikji he nahonpi qehan heyapi; Iho, Elias kipan.

36 Unkan wanji inyang ye ca, mini iyuhepe wan miniskuya en oputkan, qa can icam yatkekiye kta, qa heya; Hinnakahan po, Elias kun eyaku kta on hi kinhan wanunyakapi kta.

37 Unkan Jesus hotankakiya hotanin, qa taniya hiyuya.

38 Unkan tipi wakan cokaya ozanpi qon he owangya okinahdece ca, wankan tanhan qa kun ihanke kin aiyahdeya.

39 Unkan akicita opawinge wicayuhe cin iyotakons najin, he hecen pan qa taniya hiyuya wanyaka, hehan heya; Awicakehan wicašta kin de Wakantanka Cinhintku kin hee.

40 Nakun winohinca itehan tanhan wanyag yukanpi; Mary Magdalene, qa Mary, Jakob cistinna qa Joses hunku kin, qa Salome, hena opapi.

41 Galile en un qon he ehan ihakam unpi qa okiyapi ece kin hena eepi, qa nakun winohinca toktokeca kici Jerusalem en hipi qon.

42 Unkan wanna htayetu, Ihduwiyeyapi kta anpetu, anpetu wakan kin itokam anpetu kin hee, heon,

43 Joseph, Arimathea etanhan, woope aiekiyapi owotanna, qa nakun Wakantanka tokiconze kin ohinniyan ape un kin he u, qa waditagya Pilate en ye ca, Jesus tancan kin kida.

44 Unkan wanna ta hecinhan Pilate yušinyaya; heon akicita opawinge wicayuhe cin he kico, qa wanna wanakaja tanhan ta hecinhan he iwanga.

45 Unkan akicita opawinge wicayuhe cin he ecen okiyaka, hehan tancan kin Joseph qu.  

46 Unkan he minihuha ska wašte opeton, qa tancan kin kun eyaku, qa minihuha ska kin iyapemni, qa wicahapi ohdoka wan imnija en kagapi, he en ohnaka, qa inyan tanka wan wicahapi ohdoka i kin en eonpa.

47 Unkan Mary Magdalene qa Mary Joses hunku kin hena tukten hnakapi kin he wanyakapi.

MARKOS WICOWOYAKE 16.

1 Unkan anpetu wakan kin wanna owihanke, hehan Mary Magdalene, qa Mary Jakob hunku, qa Salome hena tancan kin sdayapi kta on pejihuta waštemna aupi:  

2 Unkan anpetu tokaheya hanhanna hinca, wicahapi ohdoka kin en hipi, wanna wi hinanpa hehantu.

3 Unkan hekiciyapi; Tuwe wicahapi ohdoka i kin etanhan inyan kin yutokan iyeunkiciciyapi kta he?

4 Unkan ekta etonwanpi, hehan inyun, inyan kin wanna yutokan iyeyapi; he tanka hinca.

5 Unkan wicahapi ohdoka kin mahen ipi, hehan koška wan etapa eciyatanhan iyotanka, wokoyake ska hanska koyaka, he wanyakapi; unkan yušinyayapi.

6 Tuka iye hewicakiya; Ihnuhan niyušinyayapi kinhan; Jesus Nazareth etanhan, icipaweh okatanpi qon he oyadepi; wanna ihduekicetu; den wanke šni; tukten hnakapi qon he wanyaka po.

7 Tuka niš hda po, qa waonspewicakiye cin, qa Inyan nakun, nitokam Galile ekta ye kta, heciya wanyahdakapi kta, eniciyapi qon iyececa, he owicakiyaka po.

8 Unkan hecen koyahanna hdicupi, qa wicahapi ohdoka kin etanhan najica kihdapi; nina cancanpi qa yušinyayapi; qa tuwedan takudan eciyapi šni, inihanpi nakaeš.

9 Unkan anpetu wakan anpetu tokaheya hanhanna hinca, Jesus ihduekicetu hehan, Mary Magdalene, etanhan taku wakan šica šakowin ehpekiciye ciqon, he tokaheya en taniniciya.

10 Hehan iye hde ca, tona om un qon iyokišicapi qa ceya yukanpi kin owicakiyaka.

11 Unkan hena, wanna kini, qa he wanyaka keya ohdaka nahonpi ešta, wicadapi šni.

12 Hehan iyohakam etanhan wicašta nom makoce ekta icimani yapi, hehan icunhan en taniniciya.

13 Hena unmapi kin hoši wicakakipi, tuka nakun wicadapi šni.

14 He iyohakam akewanjipi wota iyotankapi icunhan en taniniciya, qa wacetunhdapi qa cante sutapi on iyopewicaya; kini iyohakam tona wanyakapi kin heepi kaeš wicawicadapi šni heon.

15 Unkan hewicakiya; Maka kin owancaya ya po, qa wicašta otoiyohi wotanin wašte kin owicakiyaka po.

16 Tuwe wicada qa baptem qupi kinhan he ni kta; qa tuwe wicada šni kinhan he yacopi kta.

17 Qa tona wicadapi kin hena wowapetokeca dena yuhapi kta; Micaje kin on taku wakan šica tankan ehpeyapi kta; wicaceji tokeca on iapi kta;

18 Sintehda yuwankan icupi kta; qa pejihuta šica yatkanpi ešta etanhan itokecapi kte šni; wayazankapi kin nape awicahnakapi kta, kinhan asnipi kta ece.

19 Hecen Itancan kin owicakiya, hehan mahpiya ekta eyakupi, qa Wakantanka etapa eciyatanhan kiyotanka.