Lukas 14

LUKAS WICOWOYAKE 14.

1 Unkan Pharisee itancan wanji ti kin en anpetu wakan icunhan wote kta tin iyaya; unkan Pharisee kin awanyag kuwapi.

2 Unkan iho, wicašta wan dropsi ececa kin he itokam yanka.

3 Hehan Jesus waayupte ca, wicoope aiapi kin, qa Pharisee kin hena hewicakiya; Anpetu wakan icunhan waasniyanpi kte cin iyowinwicakiyapi he?

4 Tuka inina unpi. Hehan wicašta qon eyaku, qa asniye, ca hdeši;

5 Qa waayupte, ca hewicakiya ; Niyepi kin wanji tatanka qa iš šonšonna yatonpi, qa anpetu wakan icunhan makohdoka wan ohinhpaye cinhan, wancake hdicuyakiyapi šni naceca he?

6 Unkan hena on ayuptapi kta okitpanipi.

7 Unkan wicakicopi kin wiyacinpi wan owicakiyaka, oyanke tokapa ece kahnigapi kin he wanyake cehan; qa hewicakiya;

8 Tuwe tohan kiciyuzapi kin ekta nicopi kinhan, oyanke tokapa kin en iyotanke šni wo; okinni nikapeya kinihanpi wanji kicopi kta;

9 Kinhan, sakim nicopi kin he u, qa, Wicašta kin de kiyukan wo, eniciye cinhan, hehan hinakaha wowištenya oyanke hakakta kin hec ekta idotanke kta ce.

10 Tuka nicopi kinhan ye, ca oyanke hakakta kin en iyotanka wo; hecen nico kin he tohan u kinhan, Koda, wankan wapa ya wo, eniciye kta; hecen om wota idotanke cin hena niyuonihanpi kta.

11 Tuwe kašta ihduwankantu kinhan, hee yuhukun iyayeyapi kta ce; qa tuwe ihduhukuye cinhan, hee yuwankantuya ayapi ece e kta.

12 Unkan hehan kico qon he heciya; Tohan wiyotanhan wotapi, qa iš htayetu wotapi yakage cinhan, kodawicayaye, ca nihunkawanji, qa takuwicayaye cin, qa nikiyedan wijinya unpi kin, hena wicakico šni wo; iš ake okinni nicopi, qa hecen nicicajujupi kta.

13 Tuka wotapi wan yakage cinhan, wahpanicapi, qa huha ksawahanpi, qa huštepi, qa ištagongapi kin, hena wicakico wo;

14 Kinhan niyawaštepi kta ce; hena nicicajujupi kta okitpanipi nakaeš, owotanpidan kinipi kte cin ekta nicicajujupi kta ce, eya.

15 Unkan opeya wota yankapi kin etanhan wanji hena hecen eya nahon qehan, heciya; Wakankanka tokiconze kin en tuwe aguyapi yute kta hecinhan hee yawaštepi ce.

16 Unkan hehan heciya; Wicašta wan htayetu wotapi wan tanka kage, ca wicota wicakico:

17 Qa wotapi kta wanna iyehantu, hehan taokiye wan wicakicopi qon hewicakiye kta ye ši; U po, wanna taku owasin wiyeya hiyeya ce.

18 Unkan owasin okonwanjidan ihdatokanpi. Tokaheya kin he heciya; Makoce onšpa opewaton, qa he wanhdag mde kta iyececa; ceciciya ce, micunni wo.

19 Unkan wanji tokeca heya; Tatanka tazaptan opewaton, qa iwicahdute mde kta; ceciciya ce, micunni wo.

20 Unkan wanji tokeca heya; Winohinca wan mduza, hecen wan owakitpani ce.

21 Unkan hecen ookiye qon he ku, qa heyapi kin yuhe cin ecen okiyaka. Unkan hinakaha tipi tawa kin šihda, qa taokiye qon heciya; Koyahan wo, qa otonwe canku kin ekta ye, ca wahpanicapi kin, huha ksawahanpi, huštepi, ištagongapi kin, hena den awicau wo, eya.

22 Unkan ookiye qon heya; Itancan kin, ehe cin he wanna ecen econpi, tuka nahahin okan ce, eya.

23 Unkan Itancan kin ookiye qon heciya; Ocanku hince cin, qa mahinatake ektakta ye, ca uwicakiya wo, hecen wati kin ojudan kta.

24 Heciciya ce; Wicakicopi qon wanjidan kaeš wowahe cin etanhan onšpadan yutapi kte šni ce, eya.

25 Unkan wicota hinca kici yapi; hehan ihduhomni qa hewicakiya;

26 Tuwe ekta mahi, qa atkuku, hunku, tawicu, cinca, sunkaku, tawinohtin kin, hena, qa iye ni kin heeš koya šicekida šni ehantanhan, waonspewicawakiye cin wanji ee kta okitpani ce.

27 Qa tuwe kašta cansusbeca kin kicin, qa miyahna u šni ehantanhan, waonspewicawakiye cin wanji ce kta okitpani ce.

28 Niyepi kin wanji conkaške yakagapi kta kecannipi ehantanhan, ito tokaheya idotankapi, qa yahduštanpi kte cin iyena yatonpi hecinhan, he iyahdukcanpi šni he?

29 Hecanonpi šni kinhan, okinni oahehde kin he wanna eyahnakapi, qa yahduštanpi kte cin oyakitpanipi kinhan, tona wanyakapi kinhan owasin inihapi, qa heyapi kta;

30 Wicašta kin de taku kage kta, tuka hduštan kta okihi šni ce.

31 Qa nakun wicaštayatapi wan wicaštayatapi tokeca azuye kte cinhan, ito tokaheya iyotanke, ca iye kektopawinge wikcenma wicayuhe cin hena on, tuwe kektopawinge wikcemna nonpa yuha takpe u kin he itkokipa okihi kta hecinhan, he ihdukcan šni naceca he?

32 Kaeš, unma kin hinahin itehan un, tuwe ekta ye ši, qa wokiyapi kida naceca.

33 Iho, he iyecen niyepi kin tuwe taku yuhe cin owasin tpagan šni ehantanhan, waonspewicawakiye cin wanji ee kta okitpani ce.

34 Miniskuya he wašte; tuka miniskuya woskuye cin en un šni ehantanhan, taku ecin on skuya kagapi kta he?

35 Maga qa watušekšeca paha kin unmana on wašte šni; tuka tankan ehpeyapi ece. Tuwe noge winahon yukan hecinhan, nahon kta ce.