Lukas 23-24

LUKAS WICOWOYAKE 23.

1 Unkan wicota kin owasin najin hiyayapi, qa Pilate kayapi.

2 Hehan hinnakaha wiyaonpapi, qa heyapi; De oyate kin owicayušice, ca Cæsar wamnayanpi qupi kin he tehinda iyeunyanpi; qa iye Messiya Wicaštayatapi kin heca keiciya ce, eyapi.

3 Unkan Pilate wiwange ca heya; Juda Wicaštayatapi kin he niye he? Unkan ayupte, ca, Niye ecen eha ce, eya.

4 Hehan Pilate wawayušna itancanpi qa oyate kin hena hewicakiya; Wicašta kin de on taku šica iyewaye šni ce.

5 Unkan hecen iyotan wohitipike ca heyapi; Oyate kin owodutatonwicaya ece, qa Galilee etanhan Juda makoce kin owancaya dehan oiyahdeya waonspekiya ece.

6 Unkan Pilate Galilee eyapi nahon qehan, wicašta kin he Galilee wicašta kin heca hecinhan he iwicawanga.

7 Unkan Herod taoyate kin hetanhan e Pilate sdonya, hehan Herod ekta iyayeya; he qe wanna Jerusalem en un.

8 Herod Jesus wanyake cehan nina iyuškin; taku ota on nanon kin heon wanakajatanhan wanyaka cin; qa wowapetokcca wanji econ wanyake kta kecin.

9 Hehan iapi ota un wiwanga; tuka takudan ayupte šni.

10 Unkan wawayušna itancanpi, qa wowapi kagapi kin, hena inajinpi, qa wohitiya wiyaonpapi.

11 Unkan Herod ozuye wicašta wicayuhe cin oui takuda šni, qa ihaha kuwa, qa šina wan ayucopi in kiye, ca ake Pilate ekta iyayeya.

12 Unkan anpetu kin he en Herod Pilate kici kiciyuwaštepi; he itokamya tokakiciyapi.

13 Unkan Pilate wawayušna itancanpi, qa itancanwicakiyapi, qa oyate kin hena witaya wicakico qehan, hewicakiya;

14 Wicašta kin de oyate kin owicayušice cin wan iyecen mayakahipi; unkan iho nitokam iwanindaka, tuka taku iyayaonpapi kin hena on, taku šica wicašta kin de en takudan iyewaye šni.

15 Qa nakun Herod hee kaeš, ekta aye cišipi; unkan iho, to kte cin iyecece cin takudan ecakiconpi šni.

16 Hecen wakapsinpsinte, ca wakimduške kta ce, eya.

17 Wotapi kin he icunhan wicašta wanji wicakiciyuške kta e heon.

18 Unkan owasin okonwanjidan heya niyanpi; De tokan aya wo; qa Barabbas hee unkiciyuška miye.

19 He qe otonwe kin en wokipajin kage, ca tinwicakte on etanhan kaška wicahnakapi tipi kin en ohnakapi.

20 Pilate Jesus kiyuške wacin kin heon ake iyecen ewicakiya.

21 Tuka howayapi qa heyapi; Icipaweh okatan wo, icipaweh okatan wo.

22 Unkan iyamni hewicakiya; Tokeca, tukte ecin taku šica econ he? On etanhan te kte cin iyececa takudan iyewaye šni; hecen wakapsinpsinte, ca wakimduške kta ce, eya.

23 Unkan hotankakiya kitanpi, icipaweh okatanpi kta e he kapi. Unkan iye hopi kin, wawayušna itancanpi kin om iyakapeyapi.

21 Hecen token cinpi kin he iyecen Pilate kiconza.

25 Qa tuwe cinpi kin wokipajin kage, ca tinwicakte qon, hee wicakiciyuške; tuka iye tawacinpi kin en Jesus wicaqu.

20 Unkan tokan yus ayapi qehan, Cyrene wicašta wan Simon cciyapi makoce kin eciyatanhan u kin he yuzapi, qa cansusbeca kin he Jesus ihakam qin kta e aihpeyapi.

27 Unkan oyate kin wicota hinca winohinca ko iyahna yapi, qa wašihda aceyapi.

28 Tuka Jesus ekta ihduhomni qa hewicakiya; Jerusalem cunwintkupi kin, miye amaceyapi šni po; tuka niyepi qa nicincapi kin aiciceya po.

29 Iho, anpetu hiyohi kte cin hena en heyapi kta; Hokšin yuhapi šni, qa wicitpi tohinni cincaton šni, qa aze tohinni azinpi šni kin hena yawaštepi ce.

30 Hehan hinnakaha he kin, Unkahinhpaya po, qa paha kin, Unkahpa po, eciyapi ece e kta.

31 Qa can teca kin en decen econpi kinhan, can šeca kin en token econpi kta he? eya.

32 Unkan wicašta tokeca nonpa, ohan šicapi kin, hena wicaktepi kta e kici awicayapi.

33 Unkan tukten Wicapahu eciyapi kin wanna ehan ipi qehan, hen icipaweh okatanpi, qa nakun wicohan šica econpi qon hena, unma iye etapa eciyatanhan,qa unma kin iš catka tanhan.

34 Hehan Jesus heya; Ate, wicakicicajuju wo; taku tokonpi kin sdonkiyapišni ce. Unkan tawokoyake kin kicipamnipi, qa oeconna econpi.

35 Unkan oyate kin opahta najin hiyeya: Qa itancanwicakiyapi kin iš eya hena om ihahapi qa heyapi; Wicašta tokeca niwicaya ece qon; iye atayedan niiciya ešta šni, Messiya Wakantanka hdahnige cin hee hecinhan.

36 Unkan akicita kin iš eya ihahapi, en au, qa miniskuya kipazopi;

37 Qa heyapi; Juda wicaštayatapi kin he niye hecinhan, niiciya wo.

38 Unkan iwankam wowapi kin de, Helenes qa Roma qa Hebrew iapi henakiya en owapi; JUDA WICAŠTAYATAPI KIN HE DEE CE.

39 Unkan ohan šicapi en owicakatanpi qon wanji šicaya owakiye ca heya; Messiya he niye hecinhan niiciya wo, qa unkiš nakun.

40 Tuka unma kin waayupte ca kišice ca heya; Wakantanka koyakipe šni he? wicayacopi okonwanjidan kici en yaun:

41 Qa unkiye kin en he owotanna; taku econku eciyatanhan unkakipa ece; tuka iye qe taku šica takudan econ šni ce.

42 Unkan hehan Jesus heciya; Itancan, wokiconze nitawa kin en yaku kinhan, miksuya wo.

43 Unkan Jesus heciya; Anpetu kin de en wowašte makoce kin en mici yaun kta ce, awicakehan eciciya.

44 Wanna wihiyayedan oape šakpe hehantu; unkan makoce kin owancaya aotpaza, napcinwanka apa hehanyan.

45 Qa anpetu wi kin otpaza icu, qa tipi wakan kin en minihuha ozanzan hiyeye cin he cokaya okinahdeca.

46 Unkan Jesus hotankakiya hoyekiye cehan, hehan heya; Ate, ninape kin en minagi kin owehnaka ce. Unkan hecen eye cehan ta iyaya

47 Unkan akicita opawinge wicayuhe cin he token econpi qon he wanyake cehan, Wakantanka yaonihan, qa heya; Awicakehan wicašta owotanna he de heca ce.

48 Unkan oyate kin witaya he wanyag ahi qon, hena owasin token econpi qon hena wanyakapi qehan, maku kin ohnahna aicipapi, qa kihdapi.

49 Unkan tona sdonyapi qon hena owasin itehan inajinpi, qa winohinca Galilee etanhan ihakam upi qon hena taku kin dena wanyakapi.

50 Unkan iho, wicašta wan Joseph eciyapi, wahokonwicakiya ece kin heca, wicašta wašte qa owotanna;

51 He iye kin wakiconzapi qa ohanpi qon wicawicada šni: Arimathea, Juda totonwepi kin wanji hee etanhan; iš eya Wakantanka tokiconze kin he ape un.

52 He Pilate ekta ye ca Jesus tancan kin kida.

53 Unkan kun eyaku, qa minihuha ska opazunte, ca imnija kahdokapi wicašta hnakapi wan en ohnaka; he itokam tuwedan en ohnakapi šni.

54 Unkan anpetu en ihduwiyeyapi ece kin he hee, qa anpetu wakan kin wanna ikiyedan.

55 Unkan winohinca Galilee etanhan kici upi qon hena ihakam iyayapi, ohna hnakapi kin he, qa tankan

kin token hnakapi kin hena wanyakapi.

56 Qa hetanhan kihdapi, qa pejihuta waštemna ihepi ko wiyeya ehnakapi. Hehan woahope kin eciyatanhan anpetu wakan kin okihpapi.

LUKAS WICOWOYAKE 24.

1 Unkan anpetu wakan en anpetu tokaheya, hanhanna hinca, hehan wicašta hnakapi kin ekta, pejihuta waštemna wiyeya ehnakapi qon hena yuha en upi; qa toktokeca nakun owicapapi.

2 Unkan wicašta hnakapi kin etanhan inyan kin wanna tokan iyeyapi e wanyakapi:

3 Qa mahen ipi, tuka Jesus Itancan tancan kin he iyeyapi šni.

4 Unkan token iyukcanpi nun tannin šni qehan, iho, wicašta nonpa wokoyake wiyatpatpa unpi icahda nawicajinpi.

5 Unkan kokipapi, qa ite kin makipuskin ehpeiciyapi qehan, hewicakiyapi; Tokeca e tapi kin wicehna ni un kin ayakitapi he?

6 Den un šni; tuka kini ce. Nahanhin Galilee en un qon ehan token eniciyapi qon he kiksuya po:

7 Wicašta Cinhintku kin wicašta šica napepi kin en wicaqupi kta, qa icipaweh okatanpi kta; tuka anpetu iyamni kinhan kini kta ce, eya ce.

8 Unkan hecen eye ciqon he kiksuyapi.

9 Unkan wicašta hnakapi kin etanhan kihdapi, qa akewanjipidan unmapi ko hena owasin owicakiyakapi.

10 Unkan wahošiyapi kin hena hecen owicakiyakapi qon, Mary Magdalene, qa Joanna, qa Mary Jakob hunku kin, qa toktokeca om unpi qon hena eepi.

11 Unkan oiepi kin ikcekceya hitunkakanpi kin iyececa dakapi, qa wicawicadapi šni.

12 Hehan Inyan najin hiyaye ca wicašta hnakapi kin ekta inyang iyaya; qa en eyokasin qehan minihuha wokoyake kin išnana ehnakapi wanyaka; hehan hdicu qa cante mahen taku econpi kin on inihanyan awacin un.

13 Unkan iho, anpetu kin he en, iyepi kin etanhan wicašta nonpa otonwe wan Emmaus eciyapi kin he ekta yapi, Jerusalem etanhan maka iyutapi wikcemna šakpe ecetu.

14 Unkan taku hiyohi kin dena owasin on wohdakapi.

15 Unkan wohdakapi, qa iyukcan awacinpi icunhan, Jesus iye hinca kiyedan u, qa om wicaya.

16 Tuka išta on iyekiyapi kte šni wicayapi.

17 Unkan hewicakiya; Wicoie kin dena tukte e he, mayanipi icunhan woyahdakapi qa iyokišin yaunpi kin?

18 Unkan unma Kleophas eciyapi kin he waayupte ca heciya; Jerusalem en yaun šni ece, dehan en taku hiyohi kin dena sdonyaye šni he?

19 Unkan hewicakiya; Hena taku he? Unkan heciyapi; Jesus Nazareth etanhan kin on, he wicašta wokcan, wicohan wicoie ko on wašaka, Wakantanka qa oyate kin owasin wicitokam.

20 He wawayušna itancanpi qa itancanwicunkiyapi kin hena te kta kiconzapi qa icipaweh okatanpi.

21 Tuka Israel opewicakiton kte cin hee unkiš unkecinpi tuka; unkan heconpi kin ehantanhan wanna anpetu kin de iyamni.

22 Nakun unkanpi kin etanhan winohinca wanjikji hanhanna hinca wicašta hnakapi kin ekta ipi, qa inihanunyanpi:

23 lye tancan kin iyeyapi šni qehan, hdicupi qa ohnihde wakan kin heca wanwicayakapi, qa hena he ni un keyapi ce, eya unkokiyakapi.

24 Hehan om unkanpi kin wanjikji wicašta hnakapi kin ekta ipi, qa winohinca oyakapi qon iyececa hinca iyeyapi: tuka iye kin wanyakapi šni ce.

25 Unkan hewicakiya; Witkotkokapi qa wicašta wokcan taku oyakapi qon hena owasin wicada cante hunkapi šni kin:

26 Messiya dena decekcen ito kakije ca wowitan tawa kin en hde kte cin he hecetu šni he?

27 Unkan hecen Moses e tokaheya, qa hehan wicašta wokcan owasin, taku iye kin on wowapi en kagapi qon hena owasin owicakiyaka.

28 Unkan otonwe ekta yapi qon he wanna ikiyedan ehan ipi qehan, iye sanpa ye kta se ececa.

29 Tuka iyakapeyapi, qa heyapi: Unkicipi un wo, wanna htayetu aya, qa anpetu kin wanna owihanke kta. Unkan om un kta e ti mahen iyaya.

30 Unkan om wota yanke cehan, aguyapi eyaku, qa yawašte, qa yušpašpa, qa wicaqu.

31 Hehan išta kin wicakiciyukawapi, qa iyekiyapi: unkan atanin šni iyaya.

32 Unkan hekiciyapi; Canku kin ohna wounkiyakapi qa wowapi wakan kin unkiciyuzamnipi qon he ehan cante unkata šni he?

33 Unkan wihiyayedan oape kin he en najin hiyayapi, qa Jerusalem ekta hdapi, qa akewanji tona om unpi ko hena witaya yukanpi iyewicayapi;

34 Qa heyapi; Ehanqon Itancan kin kini, qa Simon en taniniciya ce.

35 Hehan iye canku kin ohna tokenketu, qa aguyapi yušpašpa kin on iyekiyapi qon, hena he, cekcen owicakiyakapi.

36 Unkan hena hecen eyapi icunhan, Jesus iye hinca wicacokaya hinajin qa hewicakiya; Wookiye nicipi un nunwe.

37 Unkan inihanpi, qa kokipapi, qa wanagi wanyakapi kecinpi.

38 Unkan hewicakiya; Tokeca e iyonicišicapi he? qa tokeca cante mahen taku cetunyahdapi he?

39 Minape misiha ko, de miye hinca e wanmayaka po: mayutanpi qa iyukcan po; cehpi huhu waton wandakapi kin wanagi kin iyecen ton šni ece.

40 Unkan hecen eye cehan, nape siha ko wicakipazo.

41 Unkan wowiyuškin on wicadapi šni, qa hinyahin inihanpi, hehan hewicakiya; Den taku yutapi duhapi he?

42 Unkan hogan pasnonpi onšpa tuhmaga canhanpi ahna qupi.

43 Unkan icu, qa wicitokam yuta.

44 Qa hewicakiya; Nahahin om ciunpi qon ehan, wicoie ociciyakapi qon he dee ce; Moses wicoope tawa, qa wicašta wokcan, qa odowan kin, henakiya en miye on taku token owapi qon owasin ecen yuštanpi kta iyececa ce, eya.

45 Unkan hehan tawacinpi kin wicakiciyuzamni, qa hecen wowapi kin okahnigapi kte.

46 Unkan hewicakiya; Hecen owapi, qa Messiya hecen kakije ca, anpetu iyamni kinhan ake kini kte ciqon, he hecetu:

47 Qa hecen iye caje kin on ihduecetupi qa woahtani kajujupi kin, oyate kin owasin en oyakapi kta, Jerusalem en tokaheya kta.

48 Qa taku kin dena oyakapi kte cin he niyepi ce.

49 Unkan iho, Ate taku iwahowicaye ciqon he niyepi kin en uwakiye kta; tuka tohanyan wankantanhan wowašake yuheniciyapi šni kin hehanyan Jerusalem otonwe kin en ece yukan po.

50 Hehan tankan awicaya, Bethany hehanyan; unkan nape wicakiyuwinta qa wicayawašte.

51 Unkan wicayawašte icunhan, yutokan ewicakiciyakupi, qa wankan mahpiya kin ekta ayapi.

52 Unkan iye ohodapi, qa wowiyuškin tanka yuha Jerusalem ekta kipi:

53 Qa ohinniyan tipi wakan kin ohna ece yukanpi, Wakantanka yatanpi qa yawaštepi ece.  Amen.