MARKOS WICOWOYAKE 10.

1 Hetanhan najin hiyaye ca, Jordan akasanpatanhan, Juda makoce kin en hi: unkan ake oyate kin en witaya kata iheya; qa econ ece qon he iyecen ake wowicakiyaka.

2 Unkan Pharisee kin en hipi qa wiwangapi, Wicašta tawicu ehpeye kta iyececa hecinhan? he iyutanyanpi.

3 Unkan waayupte ca hewicakiya; Moses token econ nišipi he?

4 Unkan; Moses kpaganpi wowapi kage ca ehpeye kta iyowinyan ce, eyapi.

5 Unkan Jesus waayupte ca hewicakiya; Cante nitehipi kin heon Moses woope kin he nicagapi.

6 Tuka wicoicage otokaheya tanhan Wakantanka hena wica winyan ahna wicakaga.

7 Heon etanhan wicašta wan atkuku hunku ko ehpewicaye kta, qa tawicu en iyaihdaške kta:

8 Qa henaoza wicacehpi wanjidan kta ce. Hecen hetanhan nonpapi šni, tuka wicacehpi wanjidan.

9 Heon taku Wakantanka yuokonwanjidan kin he ihnuhan tuwe yujuju kinhan.

10 Unkan ti mahen yukanpi, hehan waonspewicakiye cin he akta wiwangapi.

11 Unkan hewicakiya; Tuwe winohinca ehpekiye ca wanji tokeca yuze cinhan, he wawicihahapi ecakicon ece.

12 Qa winohinca wan hihnaku ehpeye ca wanji tokeca hihnaye cinhan, he nakun wawicihahapi econ ece.

13 Hehan hokšiyoqopa en awicahipi, wicayutan kta heon; tuka waonspewicakiye cin tona awicaupi kin iyowicakipi šni.

14 Tuka Jesus he wanyaka, hehan nina iyokišice ca hewicakiya; Hokšiyoqopapi en maupi kta iyowinwicakiya po, qa tehindapi šni po; tona dececapi kin Wakantanka tokiconze kin eepi ce.

15 Awicakehan heciciyapi; Tuwe Wakantanka tokiconze kin hokšiyoqopa iyecen icu šni kinhan he mahen ye kte šni.

16 Hehan poskin wicayuza, qa nape awicaputake ca wicayawašte.

17 Unkan canku kin ohna iyaye cehan, wanji inyang u, qa en canpeška makehde inajin, qa wiwanga; Waonspekiye wašte, wiconi owihanke wanice cin he ohimiciye kta e on taku ecamon kta he?

18 Unkan Jesus heciya; Tokeca wašte emayakiya he? tuwedan wašte šni; Wakantanka išnana.

19 Woahope kin sdonyaya; Wawicihahapi econ šni wo, Tinwicakte šni wo, Wanmnon šni wo, Woitonšni oyake šni wo, Wawicaki šni wo, Niyate nihun kici wicahduonihan wo.

20 Unkan waayupte ca heciya; Waonspekiye, dena owasin homakšiyopa ehantanhan ecamon ece.

21 Hehan Jesus atonwe cehan waštekidake ca heciya; Taku wanji ninica; hde ca taku duhe cin wiyopeya, qa wahpanicapi kin wicaqu wo, kinhan mahpiya ekta wowijice duhe kta; hehan ku, can susbeca kicin, qa mihakam u wo.

22 Unkan oie kin he on iyokišica, qa cante šica hda; taku ota yuha nakaeš.

23 Unkan Jesus ihdukšan etonwe ca waonspewicakiye cin hewicakiya; Tona watonpike cin hena Wakantanka tokiconze kin en yapi kte cin he tehika ce!

24 Unkan oie kin on waonspewicakiye cin yušinyayapi. Tuka Jesus ake waayupte ca hewicakiya; Hokšiyoqopa, tona wowijice wacinyanpi kin hena Wakantanka tokiconze kin en yapi kte cin he tehike hinca!

25 Wicašta wijica Wakantanka tokiconze kin en ye kta he tehika, qa kamel wan tahinšpaciqadan ohdoka ohna ye kte cin he aoptetu.

26 Unkan heon nina yušinyayapi qa hekiciyapi; Hehan tuwe ni kta he?

27 Jesus awicatonwe ca heya; Wicašta ekta he okihipica šni, tuka Wakantanka ekta hecece šni; Wakantanka ekta taku owasin okihipica ece.

28 Hehan Inyan heciya; Iho, unkiye taku owasin ehpeunyanpi, qa nihakam unyakonpi.

29 Jesus waayupte ca heya; Awicakehan heciciyapi, tuwe, miye qa wotanin wašte kin on, tipi qa hunkawanjitku, qa tawinohtin, qa atkuku, qa hunku, qa tawicu, qa cinca, qa makoce ehpeye cinhan;

30 Nakaha wiconi kin de en opawinge akihde icu kta; tipi, qa hunkawanjitkupi, qa tawinohtin, qa hunkupi, qa cincapi, qa makoce ko, wošitkihdapi  iyahna; qa wiconi u kte cin he en wiconi owihanke wanica yuhe kta.

31 Tuka wicota tokaheya kin hena ehake unpi kta, qa ehake unpi kin hena tokaheyapi kta.

32 Hehan canku ohna Jerusalem ekta yapi; unkan Jesus wicitokam ya; qa iyepi qeš ihakam upi, inihanpi qa kopehdapi. Unkan akeš akenonpapi kin iwicacu, qa taku akipe kte cin hena kohan owicakiyaka:

33 Iho, Jerusalem ekta itanwankanhde unyanpi; qa Wicašta Cinhintku kin wošnapi kagapi, wowapi kagapi ko napepi kin en wicaqupi kta; unkan hena te yacopi kta, qa Ikcewicašta kin iyoopta wicaqupi kta:

34 He qe ihahapi kta qa kapsinpsintapi kta, qa atagošapi kta, qa ktepi kta; unkan anpetu iciyamni kinhan ake kini kta.

35 Hehan Jakob qa Johannes, Zebede cinhintkupi, en hipi qa heciyapi; Waonspekiye, taku uncinpi kin he ecen ecaunyeconpi kta uncinpi.

36 Unkan, Taku e ecaciconpi kta yacinpi he? ewicakiya.

37 Unkan heciyapi; Nitowitan kin en, wanji nietapa qa unma nicatka tanhan unkiyotankapi kta e unqu po.

38 Tuka Jesus hewicakiya; Taku yadapi kin sdonyakiyapi ni. Wiyatke etanhau mdatke kte cin he niš yatkan oyakihipi he? qa baptem miye maqupi kte cin he on niš eya nicupi kta oyakihipi he?

39 Unkan, Unkokihipi ce, eciyapi. Unkan Jesus hewicakiya; Awicakehan wiyatke etanhan mdatke cin niš etanhan datkanpi kta; qa baptem maqupi kin he iš nakun nicupi kta:

40 Tuka mietapa qa micatka tanhan iyotankapi kin wicaqupi kte cin he miye mitawa šni; tuka tona wiyeya wicakicihnakapi kta.

41 Unkan wikcemna kin he nahonpi qehan, Jakob qa Johannes nina canniyewicayapi.

42 Tuka Jesus wicakico qa hewicakiya; Oyate kin ekta tona itancan unpi kin wowidagwicayapi ece; qa tona tanka unpi kin hena oyate wicayuhapi ece.

43 Tuka niyepi ekta hecece kte šni; tuka tuwe iyotan tanka yaunpi kta hecinhan, he ookiye duhapi kta:

44 Qa tuwe tokaheya yaunpi kta hecinhan, he owasin wowidagyapi kta.

45 Wicašta Cinhintku kin hee kaeš waokiyapi kta hi šni, tuka waowicakiye kta, qa wicota opewicakitonpi kta on wiconi tawa ehpeye kta on hi.

46 Unkan Jeriko en hipi; qa Jeriko etanhan oyate ota qa waonspewicakiye cin om hdinanpa, hehan Bartimeus, Timeus cinhintku, ištagonge ciqon he canku icahda wada iyotanka.

47 Unkan he Jesus Nazareth etanhan hee nahon qehan, hotanin qa heya; Jesus, David Cinhintku, onšimakida wo.

48 Unkan wicota iyokipišni, inina un kta; tuka iye iyotan hotankakiya heya; David Cinhintku, onšimakida wo.

49 Unkan Jesus owanji najin qa kicopi kta, keya; hecen ištagonge cin kicopi qa heciyapi; Cante wašte wo, najin wo, wanna nico ce.

50 Unkan iye šina ehpeya najin hiyaye ca Jesus en hi.

51 Unkan Jesus waayupte ca heciya; Taku ecacicon kta yacin he? Ištagonge cin; Itancan, watonwe kta, eciya.

52 Unkan Jesus heciya; Hda wo, wacinyaye cin he asniniyan ce. Unkan hecehnana tonwe ca canku ohna Jesus ihakam ya.

MARKOS WICOWOYAKE 11.

1 Unkan wanna Jerusalem ikiyedan hipi, Bethphage qa Bethani hetu, Oliwe Paha kin en, hehan waonspewicakiye cin nom ye wicaši;

2 Qa hewicakiya; Otonwe iyotakons yanke cin en ya po; unkan wanna en yaipi kinhan, hehan šukcinca wan, tohinni wicašta akan iyotanke šni, he iyeyayapi kta; yukcapi qa aku po.

3 Qa tuwe, Taku on hecanonpi he? eniciyapi kinhan, Itancan kin cin ce, eya po. Unkan hecehnana au nišipi kta.

4 Unkan ekta iyayapi, qa canku nonpa ipaweh wanka, tiyopa wan en šukcinca kin kaška najin iyeyapi; hecen kiyukcapi.

5 Unkan hen najinpi kin wanjikji, Tokeca šukcinca kin dukcapi he? ewicakiyapi.

6 Unkan Jesus econ wicaši qon he ohna ewicakiyapi: hecen iyowinwicakiyapi.

7 Hehan šukcinca kin Jesus kahipi; qa tawokoyake akan ehnakapi; unkan iye akan iyotanka.

8 Unkan wicota canku ohna tawokoyake kin owinšyapi; qa apa can kin etanhan adetka kaksapi, qa canku ohna ehpeyapi.

9 Unkan tona tokaheyapi qa tona ihakam upi kin hena hotaninpi qa heyapi; Osanna, tuwe Itancan caje on u kinhan, he yawaštepi ce.

10 David ateunyanpi tokiconze Itancan caje kin on u kin he yawaštepi: Osanna iyotan tehan wankantu.

11 Unkan Jesus Jerusalem en ye ca, tipi wakan kin en iyaya; qa wanna taku owasin ekta etonwe ca, htayetu aya, hehan akenonpapi kin om Bethani ekta kihda.

12 Unkan ihanhanna Bethani etanhan kupi, hehan wotektehda.

13 Qa itehan suken can wan ape yuke cin he wanyaka, he en hi, okinni en waskuyeca iyeye kta; tuka en hi qehan takudan iyeye šni, ape ecedan; suken icage kta hinahinke šni.

14 Unkan Jesus waayupte ca heciya; Detanhah tuwedan waskuyeca enitanhan yute kte šni, owihanke wanica. Unkan waonspewicakiye cin he nanonpi.

15 Hehan Jerusalem en hipi; unkan Jesus tipi wakan kin en i, qa tona tipi wakan kin ohna wiyopeyapi qa wopetonpi kin hena tankan iyewicaya, qa mazaska tokiyopeyapi ahna econpi kin ahdapšinyan ehpeya, qa wakiyedan iyopeyapi can akan iyotankapi hena koya:

16 Qa tipi wakan kin ohna tuwe cega yuhe kta iyowinwicakiye šni.

17 Unkan wowicakiyake ca hewicakiya; Wati kin he oyate owasin on wocekiye tipi eciyapi kta ce, eya wowapi en kagapi šni he? tuka niye wamanon sa otipi kin yakagapi ce.

18 Wošnapi kagapi qa wowapi kagapi kin he nahonpi, unkan token ihangyapi kta akitapi; kokipapi, wicašta owasin tawoonspe kin on yušinyayapi nakaeš.

19 Unkan wanna htayetu hehan otonwe kin etanhan tankan iyaya.

20 Unkan ihanhanna en hiyayapi hehan suken can kin wanna hute hehanyan šnija e wanyakapi.

21 Unkan Inyan he kiksuye ca heciya; Itancan, wanyaka wo, suken can dašice ciqon he wanna šnija.

22 Unkan Jesus waayupte ca hewicakiya; Wakantanka wacinyanpi kin he yuha po.  

23 Awicakehan heciciyapi; Tuwe paha kin de, Tokan iyaye ca miniwanca kin en iyohpaya wo, eciye ca, cante kin en cetunhda šni, qa taku tona eye cin hena hecetu kta e wicada kinhan; he taku eye cin hena ecen yuhe kta.

24 Heon etanhan heciciyapi; Ceyakiyapi eca taku tona yacinpi kin hena iyacupi e wicada po, kinhan hena duhapi kta.

25 Unkan cekiya nayajinpi kinhan, tuwe taku on yeksuyapi kinhan kicicajuju po; hecen Ateyayapi mahpiya ekta yanke cin he wayahtanipi kin nicicajujupi kta.

26 Qa niš wayecicajujupi šni kinhan, nakun Ateyayapi mahpiya ekta yanke cin wayahtanipi kin nicicajujupi kte šni.

27 Unkan ake Jerusalem en hdipi; qa tipi wakan kin ohna mani un qehan, wošnapi kagapi wowapi kagapi wicahincapi koya en hipi ;

28 Qa heciyapi; Taku wowašake on dena taku kin ecanon he? qa tuwe dena econ niši, qa hecen ecanon he?

29 Unkan Jesus waayupte ca hewicakiya; Miš eya taku wanji iciwangapi kta, amayupta po, kinhan wowašake tukte e on dena ecamon kin ociciyakapi kta.

30 Johannes baptem wicaqu qon wicohan kin he mahpiya eciyatanhan, qa iš wicašta eciyatanhan, unma tukte he? amayupta po.

31 Unkan hdokinicapi qa hekiciyapi; He mahpiya eciyatanhan, unkeyapi kinhan, hehan; Tokeca wicayadapi šni he? eye kta.

32 Tuka, He wicašta akantu eciyatanhan, unkeyapi kinhan, oyate kin kowicunkipapi; wicašta owasin Johannes wicašta wokcan kin heca kecinpi.

33 Unkan waayuptapi qa Jesus heciyapi; Sdonunyanpi šni. Unkan Jesus waayupte ca hewicakiya; Miš eya wowašake tukte e on dena ecamon kin he nakun ociciyakapi kte šni.

 20 Unkan hena iyayapi, qa owancaya woyakapi; qa Itancan kin wicohan tanka econwicakiye cin on wicoie kin yuecetu ece. Amen.