Lukas 6-8

LUKAS WICOWOYAKE 6.

1 Unkan anpetu wakan inonpa tokaheya, hehan wojupi kin ehna iyaya; unkan waonspewicakiye cin iš wahuwapa yuksapi, napopabagapi, qa yutapi.

2 Hehan Pharisee kin wanjikji hewicakiyapi; Tokeca e anpetu wakan kin en taku iyowinwicakiyapi šni kin he eca ecen ecanonpi he?

3 Unkan Jesus awicayupte ca heya; David token econ qon hee kaeš tohinni dawapi šni he ; iye qa tona om un qon wotektehdapi qehan,

4 Wakantanka tipi tawa kin en tin iyaye, ca aguyapi taninyan ehnakapi, qa wawayušnapi kin iye išnana hetanhan yutapi kte cin iyowinwicakiyapi qon, he icu, qa yute, ca om unpi qon hena iš eya hetanhan wicaqu?

5 Unkan hewicakiya; Wicašta Cinhintku kin iš nakun anpetu wakan kin Itancan ce.

6 Unkan anpetu wakan tokeca wan omniciye tipi kin en tin iyaye, ca waonspekiya: unkan wicašta wan nape etapa kin šnija e en yanka.

7 Unkan wowapi kagapi qa Pharisee kin hena anpetu wakan icunhan asniye kta hecinhan he iwanyakapi, taku iyaonpapi kta akitapi.

8 Tuka iye tawacinpi kin sdonwicaya, qa wicašta nape šnije cin he heciya; Najin qa cokaya inajin wo. Unkan najin hiyaye ca en inajin.

9 Unkan Jesus hewicakiya; Miš ito taku wanji iciwangapi kta; Anpetu wakan icunhan taku wašte, qa iš taku šica econpi kta he? wanikiyapi, qa iš wateyapi kta, unma tukte hecetu he? eya.

10 Unkan itanihdukšan owasin awicatonwe cehan, wicašta qon heciya; Nape kin hdukatin wo. Unkan ecen econ; qa nape kin unma kin iyecen iyekicetu.

11 Unkan šihdapi hince, ca iye iyakitedan Jesus token ecakiconpi kta hecinhan he iwohdakapi.

12 Unkan anpetu kin hena en Jesus paha wan ekta wocekiye eya i; qa hanyetu osan Wakantanka cekiya un.

13 Unkan wanna anpa qehan, waonspewicakiye cin wicakico, qa etanhan akenonpa wicahdahnige ca, Wahošiyapi, ewicakiya.

14 Simon he Inyan nakun eya cašton, qa he sunkaku kin Andrew, Jakob qa Johannes, Philip qa Bartholomew;

15 Mattheos qa Thomas, Jakob Alpheus cinhintku, qa Simon nakun Zelotes eciyapi;  

16 Qa Judas Jakob sunkaku, qa Judas Iskariot, nakun wiyopeye kte cin hee.

17 Hehan hena om kun hdicu, qa makomdaya en hdinajin; unkan waonspewicakiye optaye kin, qa Juda owancaya qa Jerusalem, qa mde kahdaya Tyre qa Sidon, henakiya etanhan wicota hinca, hena ia nahonpi, qa tona wayazankapi kin asniwicayapi kta e en ahi:

18 Nakun tona woniya šapa on kakijapi kin hena; unkan asniwicayapi.

19 Unkan wicota kin iyuhpa yutanpi kta akitapi; etanhan wowašake hiyu qa owasin asniwicaya ece kin heon etanhan.

20 Unkan waonspewicakiye cin awicatonwe, ca heya; Niwahpanicapi kin niš niyawaštepi ce; Wakantanka tokiconze kin he niye nitawapi.

21 Dehan wotekteyahdapi kin niš niyawaštepi ce; imnahanniyanpi kta. Dehan yaceyapi kin niš niyawaštepi ce; iyahapi kta.

22 Tohan wicašta šicenidapi, qa yuiyog iyayeniyanpi,qa iennihdepi, qa Wicašta Cinhintku kin on nicajepi kin taku šica iyecen tankan ehpeyapi kinhan, niyawaštepi ece.

23 Anpetu kin he en wiyuškinpi, qa wopida on škehanhan po; iho, mahpiya ekta wokajuju tanka duhapi; atewicayapi kin iš eya iyecen wicašta wokcanpi wicakuwapi qon.

24 Tuka winijicapi kin niš wotehi niciyankapi ece! wicocante wašte kin he wanna yahduhapi.

25 Winipipi kin niš wotehi niciyankapi ece! wotekteyahdapi kta. Dehan iyahapi kin niš wotehi niciyankapi ece! wašinyahdapi qa yaceyapi kta.

26 Tohan wicašta owasin tanyan eniciyapi kinhan, wotehi niciyankapi ece! atewicayapi kin hecen wicašta wokcan itonšni wicakuwapi qon.

27 Tuka nahon dukanpi kin heciciyapi ce, Tokaniyanpi kin hena cantewicakiya po, qa šicenidapi kin hena tanyan ecawicakicon po;

28 Niyašicapi kin wicayawašte po, qa wawicanksiya nicuwapi kin hena wocekiye ewicakiciya po.

29 Qa tuwe iyoha sam kin en anipe cinhan unma eciyatanhan kipazo wo; qa tuwe šina inicicu kinhan, onhdohda kin nakun tehinda šni wo.

30 Wicašta otoiyohi taku nicida kin qu wo; qa tuwe woyuha nici kinhan, ake kica šni wo.

31 Qa wicašta kin token ecaniconpi yacinpi kin, he iyecen ecawicakicon po.

32 Tona waštenidapi kin henana waštewicayadapi kinhan, wopida tukte e duhapi kta he? wahtanipi sa kin eepi kaeš tona cantewicakiyapi kin iš itkom cantewicakiyapi ece.

33 Qa tona tanyan ecaniconpi kin henana tanyan ecawicayeconpi kinhan, wopida tukte e duhapi kta he? wahtanipi sa kin iš iyecen econpi ece.

34 Qa ake nicupi kta kecannipi kin henana owicayaqupi hecinhan, wopida tukte e duhapi kta he? wahtanipi sa kin iš wahtanipi sa owicaqupi ece, iyacinyan wicakicupi kta heon.

35 Tuka niš tona tokaniyanpi kin cantewicakiya po, taku wašte econpi qa owicaqu po, ake taku nicupi kta kecinpi šni po; kinhan wokajuju tanka duhapi kta, qa lyotan Wankantu kin he cinca yaunpi kta: he iye tona pida ni qa šicapi kin cantewicakiya ece.

36 Hecen Niyatepi kin iš token waonšida kin niš eya he iyecen waonšida po.

37 Wayacopi šni po, kinhan niyacopi kte šni: owawicakiyepi šni po, kinhan owaniciyepi kte šni: wicakicicajuju po, kinhan nicicajujupi kta:

38 Wicaqu po, kinhan nicupi kta; wiyutapi wašte, paotinzapi, paipuskicapi qa apašboka, hecen wicašta kin maku kin an nicupi kta. Wiyutapi on widutapi kin hee on winiciyutapi ece e kta.

39 Unkan wiyacinpi wan owicakiyaka: Ištagonge cin ištagonga napata yus aya okihi he? napin oškokpa kin en iyohpayapi kte šni he?

40 Waonspekiyapi kin he waonspekiye cin itokapa šni; tuka tuwe yuštanpi kin otoiyohi waonspekiye tawa kin iyecece kta.

41 Qa tokeca nisunka išta kin ohma sukaza yanke cin he wandaka; tuka niye niišta kin ohna cankaga wanke cin he wanyahdake šni he?

42 Qa, Misunka, sukaza išta ohna niyanke cin he ito ciciyušdoke kta ce, token nisunka eyakiye kta he, qa icunhan niye niista kin ohna cankaga wanke cin he wanyahdake šni. Wanayakihbe cin, niš tokaheya cankaga išta ohna niwanke cin he ito tokan ehpeya wo; qa hehan hinakaha nisunka išta kin ohna sukaza yanke cin he yeciyušdoke kta mdesya wandake kta ce.

43 Can wanji wašte kin waskuyeca šica icahye šni; qa nakun ean wanji šice cin he waskuyeca wašte icahye šni.

44 Can kin otoiyohi waskuyeca tawa kin on sdonyapi ece: wicašta kin taspanhu kin etanhan suken pahipi šni, qa iš eya tokahu kin etanhan hastanhanka pahipi šni.

45 Wicašta wašte kin he cante woyuha wašte kin etanhan taku wašte icahya ece; qa wicašta šice cin he cante woyuha šice cin etanhan taku šice icahya ece: wicacante taku iyakicuya ohnaka kin he etanhan i kin eciyatanhan enapeya ece, eya.

46 Unkan tokeca, Itancan, Itancan, emayakiyapi ece, qa taku epe cin ecen ecanonpi šni he.

47 Tuwe ekta mahi, qa mioie nahon, qa ecen econ kin he tuwe kicica hecinhan he ito ociciyakapi kta.

48 Wicašta wan tipi kaga; unkan temahentu maka qe, ca oahehde kin imnija wan akan ehde: unkan minitan aye cehan, wakpa kin tipi kin he en nina kaduza, tuka kahuhuze kta okitpani, imnija akan ehdepi nakaeš, he iyececa.

49 Tuka tuwe nahon tuka ecen econ šni kinhan, wicašta wan oahehde codan maka akan tipi kage cin he iyececa; unkan he en wakpa kin nina kaduza, qa hecehnana hinhpaya; qa tipi kin he woatakunišni tanka.

LUKAS WICOWOYAKE 7.

1 Unkan oyate nahon hiyeye cin en iapi kin dena owasin wanna ecen yaštan qehan, Kapernaum en i.

2 Unkan akicita opawinge wicayuhe cin wanji taokiye wan tehinda kin he wayazanke ca wanna te kta.

3 Unkan he wanna Jesus on nahon qehan, Juda hunkayapi kin hena ekta ye wicaši, u kta qa taokiye kin asniye kte cin he icekiya.

4 Unkan hena Jesus ekta hipi qehan, awicakehan cekiyapi, qa, Hecakiconpi kte cin wicašta kin he iyececa ce;

5 Unkoyatepi kin cantewicakiye ca, omniciye tipi wanji wanna unkicagapi ce, eyapi.

6 Unkan Jesus hena om hda. Unkan wanna tipi kin itehan šni qehan, akicita opawinge wicayuhe ciqon he iš kodawicaye cin hena ekta yewicaši, qa heciya; Itancan kin, nagiyeiciye šni wo, wati kin en tin yahidu kte cin iyemacece šni ce:

7 Heon etanhan miye ekta ciu kta nakun iyececa micida šni: tuka oie kin ecen eya wo, kinhan mitaokiye kin asni kta.

8 Miš eya wicašta wicookihi ihukuya hnakapi kin hemaca, qa mihukuya akicita wicamduha; qa wicašta kin de, Ya wo, ewakiya eca, ya ece; qa wanji tokeca, U wo, ewakiya eca, u ece; qa mitaokiye kin, Decon wo, ewakiya eca, ecen econ ece, eya.

9 Unkan Jesus hena nahon qehan, on yušinyaye ca, ihduho- mni, qa oyate ihakam unpi kin hewicakiya ; Israel hee kaeš en wowacinye hinsko tanka kin iyewaye šni, eciciyapi ce.

10 Unkan ye wicašipi qon icicawin tiyata kipi qehan, ookiye wayazanke cin he wanna asni iyeyapi.

11 Unkan ianpetu qehan otonwe wan Nain eciyapi kin en i; unkan waonspewicakiye cin etanhan ota qa oyate ota hena kici yapi.

12 Unkan otonwe tiyopa kin he ikiyedan wanna ehan i qehan, inyun, wicašta wan ta tankan aupi; hunku kin wiwazica heca, qa cinhintku hecedun. Unkan otonwe kin etanhan wicota opapi.

13 Unkan he Itancan kin wanyake cehan, onsšida qa heciya; Ceye šni wo.

14 Unkan canakiyuhapi kin en u, qa yutan. Unkan akiyuhapi qon iš owanji najinpi. Unkan heya; Koška, bosdan yanka wo, eciciya ce, eya.

15 Unkan te ciqon iyotanke, ca ia. Unkan hunku kin kicu.

16 Unkan owasin nina wikopapi, qa Wakantanka yatanpi qa heyapi; Waayate wanji tanka unkiyopeyapi icaga ee, qa Wakantanka taoyate kin wanna wicahiyohi ce, eyapi.

17 Unkan Juda makoce qa okšan makoce wanke cin owancaya he yaotaninpi.

18 Unkan Johannes waonspewicakiye cin dena taku kin owasin okiyakapi.

19 Hehan Johannes waonspewicakiye cin nom wicakico, qa Jesus ekta ye wicaši, qa heya; Tuwe u kte ciqon he niye, qa iš wanji tokeca unkapepi kta he?

20 Unkan wicašta kin hena wanna ekta hipi qehan, heyapi; Johannes baptem wicaqu ece qon he niye ekta unkušipi, qa, Tuwe u kte ciqon he niye he? qa iš tuwe tokeca unkapepi kta he? eya ce.

21 Unkan hehantudan hinca wayazankapi, qa makošica ececapi, qa woniya šikšica ececapi, hena wicota asniwicaya; qa isšagongapi kin heca ota tonwewicaya.

22 Hehan Jesus waayupte ca hewicakiya; Hda po, qa taku wandakapi qa nayahonpi kin hena Johannes okiyaka po: Ištagongapi kin hena tonwanpi, qa huštepi kin iš manipi, qa lepros ececapi kin iš wicayuskapi, qa nogetpapi kin iš wanahonpi, qa tapi kin iš kiniwicakiyapi, qa wahpanicapi kin iš wootanin wašte kin he owicakiyakapi.

23 Qa tuwe miye on šinhda šni kin he yawaštepi ce.

24 Unkan Johannes wahošiyapi tawa kin wanna kihdapi, hehan Johannes on oyate kin hewicakiya; Taku e makotahedan ekta wanyag yaipi he? Cedi hu wan tate kahuhuze cin heca he?

25 Tuka taku e wanyag yaipi he? Wicašta wan wokoyake panpanna koyake cin heca he? Iho, tona wašteya wakoyakapi, qa tanyan nipi kin hena wicaštayatapi tipi kin en unpi ece.

26 Tuka taku e wanyag yaipi he? Wicašta wokcan he? Han, eciciyapi, qa wanji wicašta wokcan išanpa tanka.

27 Iho, wahošiya mitawa kin he niite itokam ye waši, nitokam canku wiyeya nicicage kta ce, eya owapi qon he dee.

28 Qa miye heciciyapi; Winohinca eciyatanhan wicatonpi kin wicašta wokcan tuwedan Johannes baptem wicaqu qon išanpa tanka šni: tuka Wakantanka tokiconze kin en tuwe iyotan cistinna kin he he kapa ce.

29 Unkan oyate kin qa wamnayanpi kin tona nahonpi owasin Wakantanka yaowotanpi, Johannes baptem wicaqu kin en opapi.

30 Tuka Pharisee kin, wicoope aiapi kin om, Wakantanka wahokonwicakiye cin en iyapatoiciyapi, Johannes baptem wicaqu šni nakaeš.

31 Unkan Itancan kin heya; Wicašta wicoicage kin de taku e imdacin kta he? qa taku iyececapi he?

32 Šiceca iciyopekiciyapi kin en iyotankapi, qa hoyekiciyapi qa heyapi; Unniciyajopi, tuka wayacipi šni; wašinunnicihdapi, tuka yaceyapi šni ce, eyapi kin he iyececapi ce.

33 Johannes baptem wicaqu qon he aguyapi yute šni, qa miniša yatke šni u; unkan, He taku wakan šica yuha ce, ehapi.

34 Wicašta Cinhintku kin he wote ca wayatke hi; unkan hehapi; Wan, wicašta wan wote sa, qa miniša yatke sa, wamnayanpi qa wahtanipi sa takodawicaya ece.

35 Tuka Woksape iye cinca kin owasin on yaowotanpi ece.

36 Unkan Pharisee wanji kici wote kta e cinkiya. Hecen Pharisee ti kin en tin iyaye ca, wote kta iyotanka.

37 Unkan iho, otonwe kin en winohinca wahtani sa kin heca, he, Pharisee ti kin en wota iyotanka sdonye cehan, inyan opiye ihepi ohna yuha en hi;

38 Qa tapetepa tanhan siha kin en ceya najin, qa išta minihanpe kin on siha kiciyujaja, qa paha kin on kicipakinta ca, siha kin ikiciputake, ca ihepi qon on sdakiciciya.

39 Unkan Pharisee kico qon he wanyake cehan, cante mahen awacin qa heya; Wicašta kin de wicašta wokcan unkanš, yutan kin he tuwe qa taku winohinca kin sdonye kta tuka; he wahtani sa kin heca.

40 Unkan Jesus waayupte ca heciya; Simon taku eciciye kta mduha ce. Unkan iš, Waonspekiya, katinyan eya wo, eya.

41 Wicašta wan wicašta nonpa oicazo wicaqu: unma kin kašpapi opawinge zaptan iyohiye šni, qa unma kin iš wikcemna zaptan.

42 Unkan taku on hdajujupi kte cin yuhapi šni qehan, wancake sakim wicakicicajuju ce. Hecen unma tukte iyotan waštedake kta hecinhan, he omakiyaka wo?

43 Simon waayupte ca; Tuwe ota kicicajuju hee nace epca ce, eya. Unkan, Tanyan idukcan ce, eciya.

44 Hehan winohinca qon ekta ihduhomni, qa Simon heciya; Winohinca kin de wandaka he? Yati kin en wahi, unkan mini on siha wahdujaja kta mayaqu šni; tuka iye kin išta minihanpe kin on siha mayujaja, qa paha kin on pakinta.

45 I imayaputake šni; tuka winohinca kin de wahi kin ehantanhan siha imaputaka ayaštan šni.

46 Pa kin wihdi on sdamayaye šni; tuka winohinca kin de ihepi on siha sdamayan ce.

47 Hecen on hecieiya ce, Wahtani kin hena ota ešta kicicajujupi; he nina waštedaka nakaeš: tuka tuwe waniqadan kicicajujupi kin he iwaštedan waštedaka ece.

48 Hehan winyan qon heciya; Niohan šice cin hena nicicajujupi ce.

49 Unkan tona kici wota iyotankapi kin hena hehan cante mahen heyapi; De tuwe e woahtani nakun kajuju he?

50 Unkan winohinca qon heciya; Wacinyaye cin he niniyan ce; wookiye on hda wo.

LUKAS WICOWOYAKE 8.

1 Unkan he iyohakam, otonwe tankinkinyan otonwe cikciqadan ko, owasin iyaza un, qa wootanin wašte Wakantanka tokiconze ahna yaotanin. Unkan akenonpapi kin kici unpi:

2 Qa winohinca wanjikji taku wakan šica yuhapi qa wayazankapi, tuka ašniwicayapi, Mary he Magdalene eciyapi, he etanhan wakan šica sakowin hinanpapi qon hee;

3 Qa Joanna, Cuza Herod waawanyagkiye ciqon he tawicu, qa Susanna, qa nakun toktokeca ota, hena woyuha yuhapi kin on okiyapi ece.

4 Unkan wicota mniciyapi, qa otonwe otoiyohi etanhan en ahi qehan, wiyacinpi on wowicakiyaka:

5 Woju heca wan taku su kin oju iyaya. Woju, unkan apa canku icahda hinhpaya; unkan naatinzapi, qa mahpiya okinyanpi  kin temyapi

6 Unkan apa imnija wan ahinhpaya; unkan uye cehan, spaye šni on wancake šnija.

7 Unkan apa wapepeka ehnahna  hinhpaya; unkan wapepeka opeya uye, ca aotinsya.

8 Unkan apa iš maka wašte ahinhpaya; unkan uye, ca opawingege suton, eya. Unkan hena hecekcen eye cehan, heya niyan; Tuwe noge winahon yukan hecinhan, ito nahon kta ce, eya.

9 Unkan waonspewicakiye cin wiwangapi, qa heciyapi; Wiyacinpi kin de toketu he?

10 Unkan heya; Niyepi Wakantanka tokiconze woanahbe kin hena oyakahnigapi kta nicupi; tuka tokan kin iš wiyacinpi ece: hecen etonwanpi keš wanyakapi kte šni, qa wanahonpi keš okahnigapi kte šni ce.

11 Wiyacinpi kin he dee: Su kin he Wakantanka oie kin ee.

12 Canku icahda qon he tona nahonpi kin heepi; hehan wakanšica cin en hi, qa wicoie kin cantepi kin etanhan eyaku ece, awacinpi qa niwicayapi kte šni heon.

13 Tona wicoie nahonpi eca iyuškinyan icupi ece kin hena imnija akan un qon hena ee; hena hutkan nicapi, qa cistiyedan wicadapi, tuka taku iyutanwicayapi hehan ayuštanpi ece.

14 Qa tona wanna nahonpi, qa hehan tokiya yapi, qa wiconi kin de woawacin kin, qa wowijice, qa wowiyuškin kin, hena on aotinzapi, qa hecen tanyan sutonpi šni kin hena wapepeka ehna hinhpaye ciqon eepi ce.

15 Tuka tona wanna wicoie nahonpi eca, cante wašte qa owotanna mahen yuha unpi, qa wacintankaya sutonpi kin hena maka wašte akan un qon hena eepi ce, eya.

16 Wicašta kin tuwedan petijanjan wan ideye, ca wakšica wan iyahdapšinyan ehpeye šni, qa nakun owinja wan ohdateya ehnake šni ece; tuka petijanjan ihupa akan ehde ece: hecen tona en ipi kinhan, ijanjan kin wanvakapi kta.

17 Taku anahmanpi qa yuotaninpi kte šni wanica; qa nakun taku yutaninšniyan hnakapi qa yutaninyan eyakupi kte šni wanica ce.

18 Heon token nayahonpi  hecinhan itonpa po; tuwe wayuhe cin he nakun qupi kta; qa tuwe wayuhe šni kin he taku yuha kecin kin hee ikicicupi kta ce, eya.

19 Hehan hunku qa hunkawanjitku  kin hena en hipi, qa wicota kin on ikiyedan upi kta okihipi šni.

20 Unkan okiyakapi qa heyapi; Nihun qa nihunkawanji  tankan najinpi, qa wannihdake kta cinpi ce.

21 Unkan waayupte, ca hewicakiya; Wakantanka oie nahonpi, qa ecen econpi kin dena ina qa mihunkawanji eepi ce, eya.

22 Unkan anpetu kin hena wanji en, waonspewicakiye cin om wata wan en opa; qa hewicakiya; Mde kin akasanpa unyanpi kta ce. Hecen canan eyaya.

23 Tuka šina watopekiyapi  icunhan iye ištinma: unkan tate iyumni wan mde kin en u; qa mini ojudan yakonpi, hecen tapi kta kokipapi.

24 Hehan en hipi qa yuhicapi qa heyapi; Itancan, Itancan, untakunip išni. Unkan najin hiyaye ca, tate qa mini taja ko kišica: hecen ayuštan, qa amdakedan tanka.

25 Unkan hewicakiya; Wacinyayapi kin tukte e he? Unkan iš wikopapi, inihanpi qa hekiciyapi; De taku wicašta he! tate mini kici ee kaeš okiya eca, anagoptan ece.

26 Unkan Galile itakasanpa Gadarene tamakocepi kin en ipi.

27 Unkan hen ihe cehan, wicašta wannakaja tanhan wakanšica yuhe, ca wokoyake koyake šni, qa tuktedan tipi oti šni, tuka wicašta hnakapi kin en ece un kin, heca wan otonwe kin eciyatanhan itkokipa.

28 He Jesus wanyake cehan, hoyeye ca itokam makata ehpeiciye ca hotankakiya heya; Jesus Wakantanka lyotan Winkantu Cinhintku kin, token unyakon kta he? Ceciciya ce, Kakišmaye šni wo.

29 (Taku wakan šape cin wicašta kin etanhan hinanpe ši heon etanhan. He ijehan yuza ece; unkan mazaicicahiha wicaške ko on kaška hnakapi; tuka wicaške kin yupsapsake ca, wakan šica makotahedan ekta iyayeya ece.)

30 Unkan Jesus wiwange ca heya; Token eniciyapi he? Unkan, Wicota, eya: taku wakan šice ota tan mahen ipi kin heon etanhan.

31 Unkan ošbe kin ekta ye wicaši kte šni, keya icekiyapi.

32 Unkan he kin en kukuše ota optaye wan won unpi; hecen en iwicayayapi kte cin he iyowinwicakiye kta keya cekiyapi; unkan iyowinwicakiya.

33 Hecen wakan šice cin wicašta kin etanhan tankan hinapapi, qa kukuše kin en iwicayayapi; unkan optaye maya hinca wan en apamahde nina fiin našdog iyayapi, qa mde kin en iyohpeiciyapi, qa minin tapi.

34 Unkan taku econpi kin he kukuše wo wicaqupi qon wanyakapi qehan, nakipapi, qa otonwe qa makoce kin ekta ohdag kipi.

35 Unkan taku econpi qon he wanyag ai, qa Jesus ekta ahi, qa wicašta wakan šice etanhan hinapapi qon he ogeton, qa tawacin ekicetu, qa Jesus siha kin en iyotankahan yanka wanyakapi; unkan wikopapi.

36 Tona wanyakapi qon iš eya wicašta wakan šice yuhe ciqon token asniyanpi kin he owicakiyakapi.

37 Hehan ihdukšan Gadarene tamakocepi kin owancaya taku econpi qon he nahonpi qehan, owasin nina wikopapi on etanhan cekiyapi, qa tokan yešipi. Unkan wata kin en okipe, ca icicawin kihda.

38 Unkan wicašta etanhan wakan šice cin hinanpapi qon he kici un kta keya cekiya. Tuka Jesus hde ši, qa heya;

39 Niye yati kin ekta hde, ca Wakantanka taku hinca ecanicon kin he yaotanin wo, eya. Unkan kihde, ca Jesus taku hinca ecakicon qon he otonwe owancaya ohdaka.

40 Unkan Jesus hdi qehan, oyate kin iyowinkiyapi; owasin ape hiyeya nakaeš.

41 Unkan iho, wicašta wan Jairus eciyapi kin he en u, omniciye tipi itancan kin wanji hee; unkan he Jesus siha kin en makata ehpeiciye ca, iye ti kin ekta u kta icekiya.

42 He cunwintku wanjidan, wanna waniyetu akenonpa ecetu; unkan iš wanna te kte wanka. Tuka ekta ye cin hepiya oyate kin aohduteyapi.

43 Unkan winohinca wan waniyetu akenonpa hehanyan we au, qa taku yuha owasin pejihutawicašta on