Lukas 11-12

LUKAS WICOWOYAKE 11.

1 Unkan tukten cekiya un, qa ayaštan qehan waonspewicakiye cin wanji heciya; Itancan, wocekiye eya onspeunkiya po, Johannes waonspewicakiye cin onspewicakiye ciqon he iyececa.

2 Unkan hewicakiya; Ceyakiyapi kinhan kaken eya po; Ateunyanpi mahpiya ekta nanke cin, nicaje wakandapi nunwe: Nitokicionze kin u kte: Mahpiya ekta nitawacin econpi kin he iyecen maka akan econpi nunwe.

3 Anpetu otoiyohi anpetu woyute unqu po.

4 Qa waunhtanipi kin unkicicajuju miye, unkiš tona šicaya ecaunkiconpi wicunkicicajujupi  kin he iyececa. Qa taku wawiyutanyan un kin en unkayapi šni po; tuka taku šice cin etanhan eunhdaku po.

5 Unkan hewicakiya; Niyepi kin wanji tuwe kodayayapi, qa hanye cokaya ekta yaipi, qa heyakiyapi; Koda, aguyapi yarani omaqu wo:

6 Mitakoda wanji icimani hi, tuka taku itokam ewahnake kta takudan mduhe šni ce?

7 Hehan iye timahen tanhan waayupte, ca heye kta; Nagiyemaye šni wo; tiyopa wanna natakapi, qa micinca om mahen imunka; hecen nawajin qa cicu kta owakitpani ce.

8 Heciciyapi; He kodaya on etanhan najin qa qu kte šni qeyaš, nina kitan kin heon etanhan, najin qa tona cin kinhan qu kta ce.

9 Nakun heciciyapi; Da po, kinhan nicupi kta; akita po, kinhan iyeyapi kta; katoto po, kinhan niciyuhdokapi ece e kta.

10 Tuwe da eca he icu ece; qa tuwe akita eca he iyeya ece; qa tuwe katoto eca he kiciyuhdokapi ece e kta.

11 Cinca niyukanpi kin, wanji tukte cinhintku aguyapi kida kinhan, inyan wan qu kta he? kaiš hogan wan da kinhan, hogan on wamduška wan qu kta he?

12 Kaiš witka wanji da kinhan sintehda wan qu kta he?

13 Hecen niš nišicapi kin, nicincapi taku waštešte wicayaqupi kte cin he onnispepi ehantanhan, iš iyotan mahpiya Ateyayapi kin tona Woniya Wakan kidapi kinhan wicaqu kta ce, eya?

14 Hehan wakan šica wanji tankan iyayeya, unkan ia okitpani. Unkan wakan šica kin wanna tankan hinape cehan, ia okitpani qon hehan ia; hecen oyate kin inihanpi.

15 Tuka apa heyapi; Beelzebub wakan šice itancan kin he eciyatanhan wakan šice napewicaya ece.

16 Qa apa toktokeca iš iyutanyanpi kta on mahpiya eciyatanhan wowapetokeca kidapi.

17 Tuka tawacinpi kin sdonwicaye ca hewicakiya; Wokiconze kin tona iye iyakitedan kicipajinpi kin hena atakuni šni ece; qa tipi wanji iye icipajin kinhan he jujuwahan ece.

18 Qa Satan iš iye icipajin kinhan tokiconze kin he token ecin ecen he kta he? Beelzebub eciyatanhan wakan šice napewicawaya ece, kehapi kin heon etanhan.

19 Unkan miye Beelzebub eciyatanhan wakan šice napewicawaya ehantanhan, niye nicincapi kin hena tuwe eciyatanhan napewicayapi he? hecen iyepi kin niciyukcanpi kta.

20 Tuka miye Wakantanka  napsukaza on wakan šice napewicawaya ehantanhan, Wakantanka tokiconze kin awicakehan nihiyohipi ce.

21 Wicašta wan wašake ca wipe ton ti awanhdake cinhan, hecen woyuha tawa kin tanyan hiyeya ece.

22 Tuka wanji ikapeya wašake cin he takpe hi, qa ktedan kinhan, tawipe wacinkiye ciqon he owasin ekiciyaku, hehan taku tawa qon pamni ece.

23 Tuwe micica šni kin he makipajin; qa tuwe miciwapahi šni kin he wayumdeca ece.

24 Woniya šapa kin wicašta wan etanhan hinanpa eca makoce puze cin en ece un, qa oziiciye kta akita; tuka takudan iyeye šni kinhan, hehan heya; Wati etanhan wahinawape ciqon he ake ekta wahde kta ce.

25 Unkan en hdi eca, wanna kahintapi qa ayuco yuštanpi iyekiya ece.

26 Hecen tokiya ye ca, woniya toktokeca iye kin išanpa wicaštapišni šakowin ewicayaku, qa hena en yapi, qa otipi: hecen wicašta kin he otokahe kin isanpa oehake kin he šica ece.

27 Unkan hena hecekcen eya icunhan, wicota kin etanhan winohinca wan ho wankan yeye ca heciya; Wicitpi etanhan inicage cin he, qa aze dazoke cin hena yawaštepi ce.

28 Tuka iye heya; Han, tuka tona Wakantanka oie kin nahonpi, qa ecen econpi kin hena iš iyotan wicayawaštepi ce.

29 Unkan oyate kin wanna en himniciyapi qehan, hewicakiya; Wicoicage kin de šica; wowapetokeca akitapi, tuka wowapetokeca takudan wicaqupi kte šni; Jonas waayate ciqon wowapetokeca tawa kin heceedan.

30 Nineveh oyate kin Jonas wowapetokeca yuhapi qon, he iyecen wicoicage kin de Wicašta Cinhintku kin wowapetokeca yuhapi kta.

31 Woyaco kin ekta itokaga wicaštayatapi winohinca qon he wicoicage kin de itkom nawicajin, qa wicayaco kta; he iye maka owihanke tanhan Solomon toksape kin nahon hi; unkan iho, wanji Solomon isanpa tanka den un ce.

32 Woyaco kin ekta Nineveh wicašta kin hena wicoicage kin de on inajinpi kta, qa yacopi kta; he iye Jonas wowicakiyake cin on iyopeiciyapi; unkan inyun, wanji Jonas isanpa tanka den un ce.

33 Tuwedan petijanjan wan ideya eca nahmana ehde šni, qa iš ohna wiyutapi kin iyahdapšinyan hnake šni; tuka petijanjan ihupa wan akan ehde ece; qa hecen tona en hipi kinhan ojanjan kin wanyakapi kte.

34 Wicatancan iyoyanpa kin wicišta kin hee: heon etanhan niišta kin hecetu kinhan, nitancan kin iš eya iyoyanpa ojudan ece; tuka niišta kin he šica eca, nitancan kin iš eya ocowasin otpaza ojudan ece.

35 Hecen iyoyanpa en niun kin he otpaze kte šni e wakta wo.

36 Heon nitancan kin ocowasin iyoyanpa ojudan, qa tuktedan otpaze šni ehantanhan, petijanjan wan yehya ide iyoyamniyan kin he iyecen ocowasin iyoyanpa ojudan kta ce.

37 Unkan heya icunhan Pharisee wan kico: hecen en i, qa wote kta iyotanka.

38 Unkan wote šni itokam ihdujaja šni kin he Pharisee qon wanyake cehan, inihan.

39 Unkan Itancan kin heciya; Niye Pharisee kin, miniyatkan wakšica ko akapatanhan duskapi ece; tuka mahen tanhan wawicakipi wicohan šica ko onijupidan ece.

40 Winitkotkopike cin, akapatanhan un kin he tuwe kaga hecinhan, he iš mahen un kin nakun kage šni he?

41 Tuka taku duhapi kin etanhanhan wicaqu po; kinhan taku owasin niciskapi kta ece.

42 Tuka Pharisee kin niyepi wotehi niciyankapi ece! ceyakata, wacanga, wahpe waštemna ko owasin etanhan iwikcemnamna wicayaqupi ece; tuka wicohan owotanna Wakantanka waštedakapi ko, hena acayakšinpi ece; dena e iš ecen ecanonpi kta, qa unma qon oyakaptapi kte šni tuka.

43 Pharisee kin niyepi wotehi niciyankapi ece! omniciye tipi kin en oyanke waštešte kin hena wašteyadakapi ece, nakun wopeton tipi kin ekta yaonihanyan oniciyapi kin.

44 Wowapi kagapi qa Pharisee, wanaicihmanpi kin, wotehi niciyankapi ece! wicašta hnakapi tannin šni hiyeye ca wicašta kin sdonye šni amanipi kin henicecapi ece.

45 Unkan hehan wicoope aiapi kin heca wanji waayupte, ca heciya; Waonspekiye cin, hecen eha eca, unkiš eya ienunyahdepi ece.

46 Unkan heya; Wicoope aiapi kin niš eya wotehi niciyankapi ece! waqinpi qinpi tehika wicasta qinwicayakiyapi ece qa niyepi kin napsukaza wanjidan on waqinpi kin dutanpi kte šni.

47 Wotehi niciyankapi ece! wicašta wokcan wicahnakapi kin hena niye yakagapi, qa niyatepi kin hena wicaktepi qon.

48 Atewicayayapi ohanyanpi qon iyowinwicayakiyapi e awicakehan nihduotaninpi; he iye hena wicaktepi e wicakapi, qa niye wicašta hnakapi kin wicayecagapi ece.

49 Heon iš eya Wakantanka toksape kin heya; Waayatapi qa wahošiyapi heca ekta yewicawaši kta ce; unkan apa wicaktepi, qa onšiya wicakuwapi kta;

50 Hecen maka kagapi kin ehantanhan wicašta wokcanpi we papsonpi kin he owasin wicoicage kin de iwicawangapi kta;

51 Abel we kin hetanhan, qa Zacariyas tipi wakan wahna wošnapi kin okitahedan awihnuni qon he we kin iyahdeya: Awicakehan heciciyapi, He wicoicage kin de etanhan iwicawangapi kta ce.

52 Niye wicoope aiapi kin wotehi niciyankapi ece; niš wosdonye iyuhdoka yutokan edakupi, qa niye ohna idadapi šni, qa tona ohna iyayapi kte cin hena anawicayaptapi ece.

53 Unkan hena hecekcen ewicakiya icunhan, wowapi kagapi qa Pharisee kin taku ota eyekiyapi kta e nina hin nagiyeyapi:

54 Taku iyaonpapi kta akitapi, heon taku i kin etanhan inanpe kta on hmunkapi kta iyapepi. 

LUKAS WICOWOYAKE 12.                   

1 Unkan wicota hinca en ahimniciya, hecen akicihanpi ece, hehan waonspewicakiye cin hewicakiya; Tokaheya Pharisee kin on napohyapi tawapi kin he itonpa po, he wanaicihmanpi kin hee ce.

2 Taku akahpetonpi qa yuzamnipi kte šni wanic; qa nakun taku anahmanpi qa yuotaninpi kte šni wanica ce.

3 Hecen otpaza ehna taku token ehapi kin he anposkantuya nahonpi kta; qa onahbe tipi kin ohna wicanoge kin en token ehapi kin he tipi akan ieyanpahapi kta.

4 Qa kodamayayapi kin, niš heciciyapi; Wicatancan ktepi qa sanpa takudan okihipi šni kin hena kowicakipapi šni po.

5 Tuka tuwe koyakipapi kte cin he ito kanyehan ociciyakapi kte:  Tuwe wicakte, qa hehan wakanšica tipi kin en ehpewicaya okihi kin he eca kokipa po; han, Hee kokipa po, eciciyapi ce.

6 Zitkadan zaptan mazašadan nonpa iyopewicayapi šni he: heca ešta Wakantanka hena wanjidan kaeš akiktonje šni.

7 Tuka niyepi kin paha ee kaeš owasin niyawapi ece. Heon etanhan wikopapi šni po; zitkadan ota isanpa niyawapi ece.

8 Qa nakun heciciyapi ce; Tuwe kašta wicašta kin wicitokam miye mayaotanin kinhan, Wicašta Cinhintku kin Wakantanka taohnihde kin hena itokam he yaotanin kta.

9 Tuka tuwe wicašta kin wicitokam amakta šni kinhan, Wakantanka taohnihde kin hena itokam, he aktapi kte šni.

10 Qa tuwe kašta Wicašta Cinhintku kin itkom wicoie wanji eciye cinhan, kicicajujupi kte; tuka tuwe Woniya Wakan waoštehda kinhan, kicicajujupi kte šni.

11 Tohan omniciye tipi kin en anihipi kinhan, qa wicaštayatapi wowašake ko ekta, taku qa token aduptapi kta, qa taku ehapi kte cin awacinpi šni po.

12 Woniya Wakan kin he iye iyehantudan hin taku ehapi kta iyececa he onspeniciyapi kta ce.

13 Unkan wicota kin etanhan wanji heciya; Waonspekiye cin, misunka woyuha hanke micu kta, keciya wo.

14 Unkan heciya; Wicašta kin, niwankam wiyukcan qa wapamni kte cin tuwe makaga he?

15 Unkan hewicakiya; Iwanihdaka po, qa wakonpi kin kokipa po; wicašta nipi kin he taku iyakicuya tonpi kin he en un šni ece.

16 Hehan wiyacinpi wan owicakiyake ca heya; Wicašta wijica wan tamaga kin taku ota icahya.

17 Unkan cante mahen he awacin qa heya; Token ecamon kta he; waskuyeca mitawa kin tukten wehnake kte cin mduhe šni ce?

18 Hehan heya; Kaken ecamon kta; wopiye wahdujuju kta, qa tankinkinyan wakage kta; qa hena ohna taku imicicaga woyuha mitawa ko owasin ewaju kta.

19 Qa minagi kin hewakiye kta; Minagi, taku ota yehnake cin he waniyetu ota oiyahde kta ce; ito oziiciye, ca wote, ca wayatke, ca wiyuškin wo, eya.

20 Tuka Wakantanka heciya ; Winitkotkoke cin, hanyetu kin de ninagi kin inicicupi kta; hecen wayehnake cin hena hehan tuwe tawa kta he?

21 Tuwe woyuha kihnaka, tuka Wakantanka ekta wijice šni kin he he kicica ce, eya.

22 Unkan waonspewicakiye cin hewicakiya; Hecen on heciciyapi ce; Yanipi kin on taku yatapi kte cin, qa iš tancan kin taku kodakapi kte cin, hena on nagiyeiciyapi šni po.

23 Wicani kin he woyute kin isanpa ece; qa wicatancan kin is wokoyake isanpa ece.

24 Kangi kin hena iwicayukcan po; he iye wojupi šni qa woksapi šni; qa dotopiye woha ko nicapi: unkan Wakantanka hena wo wicaqu ece. Wahupakoza kin isanpa niyawapi šni he?

25 Qa niyepi wanji awacannipi kin on wicišpa wanjidan kaeš nihduhanskapi oyakihipi he?

26 Hecen taku iyotan cistinna kin he oyakihipi šni ehantanhan, unma kin on tokeca ecin nagiyeniciyapi he?

27 Mnahcahca kin he token ieaga ece kin he iyukcan po; htani šni qa nakun wakahmun šni; tuka heciciyapi ce, Solomon token okitanin ešta, dena wanji iyecen wakoyake šni.

28 Hecen Wakantanka peji anpedehan magata hiyeya, qa heyakecinhan petan ehpeyapi kin hee qa eš wokoyake qu ehantanhan, kitanna wicayadapi kin, niš iyotan wokoyake nicupi kte šni he?

29 Qa taku yatapi qa datkanpi kte cin he ihnihdapi šni po; qa nakun wacetunhdaya wacin yuzapi šni po.

30 Maka oyate kin hena owasin hecen ihnihdapi ece; qa niye taku kin hena yacinpi kin Ateyayapi kin sdonya ece.

31 Tuka Wakantanka tokiconze kin hee tokaheya ihnihda po, kinhan dena owasin koya nicupi kta.

32 Optaye cistinna kin, wikopapi šni po; wokiconze kin hee nicupi kta e Ateyayapi kin iyokipi ece.

33 Taku yatonpi kin wiyopekiya po, qa wicaqu po. Wojuha kukaka aye kte šni, mahpiya ekta woyuha owihanke kte šni hena icicaga po; heciya wamanon sa kiyedan u šni, qa wamduškadan wayapote šni ece.

34 Woyuha tukten niciyankapi hecinhan, iš eya nicantepi kin en un ece e kta.

35 Ipiyag kiton yaunpi kta, qa petijanjan nitawapi ideyahan un kta;

36 Qa niš wicašta wicayuhe cin kiciyuzapi kin eciyatanhan hdi kta ape hiyeye cin hena iyecen un po; tohan hdi qa tiyopa hdatoto kinhan wancake kiciyuhdokapi kta.

37 Wicayuhe cin hdi kinhan, ookiye kin tona wakta unpi iyewicakiye cin, hena wicayawaštepi; awicakehan heciciyapi ce, Wicayuhe cin iye ipiyagkiton, qa ookiye kin hena wote kta iyotangwicakiye, ca u, qa owicakiye kta ce.

38 Hecen inonpa waktapi kin en, kaiš iyamni waktapi kin iyehan hdi, qa ecen iyewicaye cinhan, ookiye kin hena wicayawaštepi ece.

39 Qa de sdonya po, tipi tawa kin wamanon sa tohan hi kta sdonya unkanš, wakta un qa tipi kin kiciyuhdokapi kte cin anapte kta tuka.

40 Heon etanhan niš eya wiyeya un po; Wicašta Cinhintku kin tohan awacannipi šni kinhan hehan u kta ce.

41 Unkan Inyan hehan heciya; Itancan, wiyacinpi kin de unkišnana unkoyakidakapi, qa iš owasin wicayaka he?

42 Unkan Itancan kin heya; Ookiye wanji waawanyagkiyapi kin he wayupike, ca okiksape cinhan, yuhe cin tiwahe kin yuhekiye kta, qa hecen iyehanyan wo wicaqu ece e kte cin he tuwe he?

43 Itancan tawa kin ku, qa taokiye wanji hecen econ yanka wanhdake cinhan, hee yawaštepi ece.

44 Awicakehan heciciyapi; Taku token tawaye cin he owasin yuhekiye kta ce.

45 Tuka ookiye kin he cante mahen, ltancan kin tehan hdi kte šni ecin; qa wicaookiye qa winyanookiye kin hena awicape, ca wote, ca wayatke, ca witkoiciye cinhan,

46 Ookiye kin he anpetu wan yuhe cin hdi ape šni, qa sdonkiye šni hehan hdi, qa kicakse, ca wacetunhdapi kin hena owicapeya ounyekiye kta.

47 Qa ookiye wanji yuhe cin tawacin kin sdonya, tuka wiyeya icihnake šni, qa tawacin kin okicipe šni kinhan, he ota apapi kta.

48 Tuka tuwe sdonye šni kinhan, he iš apapi kte cin iyecen ohanyan ešta tonana apapi kta ce. Tuwe taku ota qupi kinhan, hee taku ota iwangapi kta: qa wicašta kin tuwe taku ota yuhekiyapi ca, he iyotan ota kicapi ece e kta.

49 Maka akan peta iyayewaye kta wahi; qa token wacanmi he, wanna ideyapi ešta?

50 Tuka baptem wanji on baptem maqupi kta; qa he tohanyan yustanpi šni hehanyan aotinsmayanpi ce!

51 Maka akan wookiye wicaqu wahi kecannipi he? Hiya, tuka wicayuomdecapi kin iš ee kta, eciciyapi ce:

52 Detanhan tipi wanjidan ohna zaptan yukanpi kta, qa yuomdecapi kta, yamni nonpa om, qa nonpa yamni om kicipajinpi kta.

53 Wicašta wan iye cinhintku kin kipajin kta, qa cinhintku kin iš atkuku kin; hunku kin cunwintku kin kipajin kta, qa cunwintku kin iš hunku kin; nakun kunku kin takošku kin, qa takošku kin iš kunku kin kipajin ece e kta, eya.

54 Unkan nakun oyate kin hewicakiya; Wiyohpeyata tanhan mahpiya wanji wankan u wandakapi eca,wancake, Magaju kta ce, ehapi: unkan ecetu ece.

55 Qa itokaga tate uya eca, Odidita kta ce, ehapi: unkan ecen hiyohi ece.

56 Wanaicihmanpi kin, niš mahpiya ite kin maka ko iyukcan oyakihipi;  tuka tokeca e nakaha kin idukcanpi šni he?

57 Han, niye cinka tokeca e taku owotanna kin idukcanpi šni he?

58 Tohan tuwe icazoniciye cin kici wicoope awanyake cin ekta de cinhan, tahepi niyuškapi kte cin akite hinca wo: okinni he wayaco kin ekta aniye kta, qa wayaco kin iš akicita kin ekta nicu kta, qa hecen kaška nihnakapi kta.

59 Mazašadan ehake hince cin he tohanyan yecu šni hehanyan hetanhan yahdicu kte šni, eciciya ce, eya.