Lukas 13

LUKAS WICOWOYAKE 13.

1 Unkan hehan en opapi kin wanjikji, Pilate token Galile wicašta heca we kin iye wošnapi tawapi kin kici icicahiye ciqon, he okiyakapi.

2 Unkan Jesus waayupte ca hewicakiya; Galile wicašta kin decen ecawicaonpi kin heon etanhan Galile wicašta owasin isanpa hena wahtanipi sa kecannipi he?

3 Hiya; tuka niye nihduecetupi šni ehantanhan, niš eya owasin iyecen nitakunipi kte šni, eciciyapi ce.

4 Kaiš Siloam conkaške akešahdogan awicahinhpaye, ca wicakte qon, wicašta owasin Jerusalem en unpi qon henana iyotan wicohan šicapi, kecannipi he.

5 Hiya; tuka niye nihduecetupi šni ehantanhan, niš eya owasin iyecen nitakunipi kte šni, eciciyapi ce, eya.

6 Unkan wiyacinpi kin de nakun owicakiyaka; Wicašta wan hastanhanka iyuwi maga tawa kin en suken can wanji oju; unkan en waskuyeca ode hi, tuka takudan iyeye šni.

7 Hehan hastanhanka iyuwi maga kicanye cin he heciya; Can kin de ekta omaka yamni wanna waskuyeca ode wahi, tuka ongedan iyewaye šni ece; kawanka wo; tokeca ecin maka yušagya han he?

8 Unkan waayupte, ca heciya; Itancan kin, omaka kin de nakun ayuštan wo, ecen ohomni maka waqe, ca tacesdi en ewahnake kta;

9 Okinni waskuyeca icahye kta; tuka wanice cinhan, hinnakaha hehan yahdawanke kta ce.

10 Unkan anpetu wakan icunhan omniciye tipi wan ohna waonspewicakiya yanka.

11 Unkan iho, winohinca wan waniyetu ake šahdogan hehanyan woniya wašake šni kin yuha, tancan kin wanna pako icu, qa tokadan ihduowotanna šni.

12 Jesus he wanyaka, unkan kico qa heciya; Winohinca waniyazanke cin etanhan niciyuškapi ce.

13 Hehan nape kin ahnaka, unkan wancake owotanna icu, qa Wakantanka yaonihan.

14 Unkan anpetu wakan icunhan Jesus waasniyan kin on etanhan omniciye tipi idake cin he canteptanyan; hecen waayupte, ca oyate kin hewicakiya; Wicašta kin htanipi kte cin anpetu šakpe yukan ce; hecen anpetu kin hena en u po, qa asniniyanpi kta ce; tuka anpetu wakan icunhan upi šni po, eya.

15 Unkan Itancan kin waayupte ca heciya; Wanaicihbe cin, niyepi otoiyohi, anpetu wakan, tatanka qa iš šonšonna nitawapi kin yakiduškapi qa miniyatkekiya adapi šni he?

16 Unkan winohinca kin de Abraham cunwintkuwicaye cin wanji ee, Satan iho, waniyetu ake  šahdogan hehanyan kašca hnaka, he iš anpetu wakan icunhan kiyuškapi kte šni iyececa he?

17 Unkan hena hecen eye cehan, kipajinpi qon owasin ištecapi; unkan wokitaninyan taku econ qon hena owasin on oyate owasin iyuškinpi.

18 Hehan heya; Wakantanka tokiconze kin he taku iyececa he? qa taku e imdacin kta he?

19 Sinape sukaza wanji iyececa, he wicašta wan icu, qa maga tawa kin en iyohpeya; unkan icage, ca can tanka aya; unkan mahpiya okinyanpi kin adetka kin en iyahanpi ece.

20 Unkan ake heya; Wakantanka tokiconze kin he taku e imdacin kta he?

21 On napohyapi kin he iyececa, he winohinca wan icu, qa wotpanpi wiyutapi yamni en anahman, hecen ocowasin napogan ce.

22 Unkan otonwe qa otonwe ciqadan iyaza ye ca, waonspekiya; qa Jerusalem etkiya ya.

23 Unkan tuwe heciya; Itancan, niwicayapi kte cin hena tonananpidan he? Unkan hewicakiya;

24 Tiyopa cistiyedan kin he ohna dapi kta nina akita po: wicota ohna yapi akitapi kta, tuka okihipi kte šni, eciciyapi ce.

25 Tipi tawa kin tohan wanna najin hiyaye, ca tiyopa kin ecen ikikcu, qa itankan nayajinpi, qa tiyopa yakatotopi, qa; Itancan, Itancan, unkiciyuhdoka miye, ehapi; qa iye waayupte ca, Tonitanhanpi kin sdonwaye šni ce, eniciyapi kta;

26 Hehan niš hehapi kta; Nanke cin en wauntapi, qa waunyatkanpi ece; qa niš ocanku unkitawapi kin ohnahna waonspeyakiye ciqon.

27 Tuka iye heye kta; Tonitanhanpi kin sdonwaye šni, eciciyapi ce; woowotanna šni ecanonpi ece kin owasin mitantanhan iyaya po.

28 Abraham, qa Isaak, qa Jakob, qa wicašta wokcan owasin Wakantanka tokiconze kin en opapi tohan wandakapi, qa niyepi kin tankan iyayeniyanpi kinhan, wicaceya hihdakokokapi ko yuke kta.

29 Wiyohiyanpata, wiyohpeyata, waziyata, itokaga, henakiya eciyatanhan au, qa Wakantanka tokiconze kin en iyotankapi kta ce.

30 Unkan iho, ehake yakonpi kin hena tokaheyapi kta; qa tokaheyapi kin hena iš ehake yakonpi kta ce, eya.

31 Unkan anpetu kin he en Pharisee kin wanjikji ekta hipi qa heciyapi; Detanhan ye ca tokan iyaya wo; Herod nikte kta cin.

32 Unkan hewicakiya; Yapi qa šungidan kin he heciya po; Iho, anpetu kin de qa nakun heyakecinhan, wakanšica napewicawaye ca, wayazankapi kin asniwicawaye kta, qa anpetu iciyamni kinhan mayuštanpi kta ce.

33 Takomni anpetu kin de, qa heyakecinhan, nakun iyokihe kin he en mawani kta iyececa; ecaeš Jerusalem itankan wicašta wokcan wanji te kte pica šni.

34 Jerusalem, Jerusalem, wicašta wokcan kin hena wicayakte, qa niye ekta u wicašipi qon hena inyan on wicayakininpi ece; eca ijehan anpaohotonna wan hupahu ohdateya cinca wicatpahi ece kin he iyecen niye nicinca kin wicacicipahi kta, tuka yacinpi šni!

35 Iho, yatipi kin otiwota ehpeniciyapi: qa, Tohanyan tuwe Itancan caje on u kin he yawaštepi nunwe, ehapi šni hehanyan wanmayadakapi kte šni, awicakehan eciciyapi ce.