Why the Delay

We hope everyone had very happy holidays! Now as the dark, cold time is upon us, we are even more thankful for God's word. There has been a small delay in our posting. Obviously the work takes time, but we also found that there were a few errors. We want the Bible to be in the best shape possible when we present it to the Lakota People. However, we decided that we would still post as we went. This stage is about removing the type and obvious errors. After this we will go back through to make certain the text is right. But, other people obviously are welcome to work on it since it is public domain. Maybe together we can make this a reality!

MARKOS WICOWOYAKE 4.

1 Hehan ake mde kin icahda waonspewicakiya; unkan wicota hinca en mniciyapi, hecen wata wan en ope ca, mini ekta iyotanka; unkan oyate kin owasin mde icahda maka akan unpi.

2 Unkan wiyacinpi on taku ota onspewicakiya; qa waonspewicakiya icunhan hewicakiya;

3 Nahon po: Iho, wicašta woju wan woju iyaya.

4 Unkan woju icunhan, apa canku icahda hinhpaya; unkan zitkatanka en ahiyahe ca temyapi.

5 Qa apa inyan ehna hinhpaya, hen maka tonana; unkan maka akantuyedan heon ohankoya hinanpa.

6 Tuka wi hinanpa hehan gu; qa hutkan nice cin heon šniš aya.

7 Unkan apa wapepeka hu kin ehna hinhpaya; unkan wapepeka kin hu uye ca aotinsya, hecen waskuyeca takudan icage šni.

8 Unkan apa maka wašte kin en hinhpaya, he waskuyeca aicaga; hinanpe ca icaga, qa suton, hunh wikcemna yamni, hunh wikcemna šakpe, qa hunli opawinge akihde aicaga ece.

9 Hehan hewicakiya; Tuwe noge winahon yukan hecinhan, ito nahon kta.

10 Unkan išnana un hehan, akenonpapi qa tona om ihdukšan unpi kin hena wiyacinpi kin he on iwangapi.

11 Unkan hewicakiya; Wakantanka tokiconze woanahbe kin hena niye sdonyayapi kta e nicupi; tuka tankan unpi kin hena taku owasin wiyacinpi kin on econpi.

12 Hecen wawanyakapi on wanyakapi kta, tuka iyukcanpi kte šni; qa winahonpi on nahonpi kta tuka okahnigapi kte šni; hecece šni kinhan okinni wicayuhomnipi kta, qa woahtani wicakicicajujupi kta.

13 Unkan hewicakiya; Wiyacinpi kin de sdonyayapi šni he? hecen token ecin wiyacinpi owasin oyakahnigapi kta he?

14 Tuwe woju kin he wicoie kin oju ece.

15 Tona canku icahda qon, tukten wicoie kin ojupi, tuka he nahonpi hehan, ecahankeya Wakanšica en hi, qa wicoie cantepi kin en ojupi qon he icu ece, iho, hena eepi.

16 Qa he iyececa, inyan ota en ojupi qon, tona wicoie kin nahonpi eca, kohanna iyuškinyan icupi ece kin hena eepi;

17 Tuka iyepi mahen hutkan nicapi heon aškayedan icaga; tohan wicoie kin on šicaya wicakuwapi qa šitkihdawicayapi icaga, hehan hinnahanka šihdapi.

18 Unkan tona wapepeka hu ehna ojupi qon, tona wicoie kin nahonpi;

19 Unkan maka kin de awacinpi, qa wijicapi on wicahnayanpi, qa taku tokeca cantiheyapi kin hena en u, qa wicoie kin yuotinza, hecen wasuton šni, hena eepi.

20 Unkan maka wašte kin en ojupi qon, tona wicoie kin nahonpi eca icupi ece, qa waskuyeca icahyapi, wikcemna yamni, wikcemna šakpe, qa opawinge akihde, iho, hena eepi.

21 Unkan hewicakiya; Petijanjan koka wan ihukuya, qa iš ohehdepi ihukuya iyeyapi kta? qa petijanjan ihupa en oštanpi kte šni, aupi he?

22 Taku akahpetonpi qa yutaninpi kte šni wanica; qa taku anahmanpi qa iyoyanpa en aupi kte šni wanica ce.

23 Tuwe noge winahon yukan hecinhan he nahon kta.

24 Unkan hewicakiya; Taku nayanonpi kin awacin po. Wiyutapi kin tukte on widutapi ece kin, he on ake winiciyutapi kta, qa tona anagoptan dukanpi kin sanpa nicupi ece e kta.

25 Tuwe wayuhe cin he sanpa taku qupi kta; qa tuwe takudan yuhe šni, taku yuhe cin hee kaeš kipi kta.

26 Unkan heya; Wakantanka tokiconze kin he wicašta wan taku su kin maka kin en iyohpeya, he iyececa;

27 Qa ištinma, qa hanyetu anpetu ko inajin; unkan su kin he hinanpe ca icage kta, tuka token icaga he sdonye šni.

28 Maka kin he iye cinka waicahya ece, ape kin he tokaheya, hehan wahuwapa, qa hehan wahuwapa en tanyan wasuton ece.

29 Unkan wanna suton hehan kohanna isan škopa kin en iyekiya, wanna kašdapi kta iyehantu nakaeš.

30 Hehan heya; Taku e Wakantanka tokiconze kin iyececa unyawapi kta he? qa wiyacinpi kin tukte e on unkiyacinpi kta he?

31 Sinape su wan iyececa, he maka kin en ehpeyapi, hehan taku su maka en un kin owasin he iyotan cistinna;

32 Tuka maka kin en ojupi, hehan uye ca wato owasin sanpa tanka icaga; adetka tankinyanyan aicahya, hecen mahpiya okinyanpi kin ohanzi ihukuya manpi ece.

33 Unkan wiyacinpi hecekcen ota on wicoie kin owicakiyaka, token nahon okihipi kin he iyececa.

34 Qa wiyacinpi codan takudan owicakiyake šni. Unkan išnana yukanpi, hehan taku owasin waonspewicakiye cin hdaheya owicakiyaka ece.

35 Unkan anpetu kin he en, wanna htayetu hehan, hewicakiya; Akasanpa unyanpi kta.

36 Unkan wicota kin wanna hdewicašipi, hehan ecehna wata kin en ohnakapi: qa nakun wata cikcistinna toktokeca opapi.

37 Unkan tate tanka wan uya; qa taja wata kin apaspa, hecen wanna mini ojudan.

38 Tuka iye wahektapa tanhan ipahin wan akan ištinma wanka. Unkan yuhicapi qa heciyapi; Waonspekiye, unkowihankepi kta he etanhan initokeca šni he?

39 Unkan iyotanka, tate kin kišice ca nide kin heciya; Owanji yanka wo. Unkan tateyanpa ayuštan qa amdakedan tanka.

40 Hehan hewicakiya; Tokeca kopeyahdapi he? tokeca wi- cayadapi šni he?

41 Unkan nina kokipapi, qa iyakitedan hekiciyapi; De taku wicašta hwo, tate kin hee kaeš, mde ko anagoptanpi ece?

MARKOS WICOWOYAKE 5.

1 Unkan mde kin akasanpa ihunnipi

, hehan Gadarene makoce kin en ipi.

2 Unkan wata kin etanhan inanpa, hehan ecahankeya wicašta wan woniya šica yuha wicahnakapi etanhan itkokim hiyu:

3 He wicahnakapi kin en un ece; qa tuwedan kaška okihi šni, mazaicicahiha hee kaeš on.

4 Wanna ota kaškapi, siha on wicakaškapi mazaicicahiha ko on; tuka mazaicicahiha kin hena uwehwega ece,qa siha on wicakaškapi kin yuksaksa ece; qa tuwedan wahbadan kaga okihi šni.

5 Ohinniyan, hanyetu anpetu koya, wicahnakapi kin ehna, qa he kin ekta šicahowaya un, qa inyan on kiihdaksa ece.

6 Tuka Jesus tehan tanhan wanyaka, hehan ekta inyang ye ca ohoda.

7 Qa hotankakiya hotanin qa heya; Jesus Wakantanka Tehanwankantu Cinhintku kin, taku e unkiyotahedan un he? Taku Wakan cajeyan ceciciya, kakišmayaye kte šni.

8 Wanna, Woniya šapa, wicašta kin etanhan hinanpa wo, eciya nakaeš.

9 Unkan, Token eniciyapi he? eya iwanga. Unkan heciya; Wicota, emakiyapi ce, wiuncotapi nakaeš.

10 Unkan makoce kin he etanhan hde wicaši kte šni, nina cekiya.

11 Imnija he kin hen ikiyedan kukuše optaye wan tanka wo wicaqupi.

12 Hecen wakan šicapi kin cekiyapi qa heyapi; Kukuše kin ekta ye unši po, mahen wicunyanpi kta ce.

13 Unkan hecehnana Jesus iyowinwicakiya. Hecen woniya šapapi kin tankan hinanpapi qa kukuše kin mahen iwicayayapi. Unkan optaye kin ecehna maya hince cin en našdog eyaye ca minin iyayapi; owancaya kektopawinge nonpa ecetu, qa minin tapi.

14 Unkan tona kukuše wo wicaqupi qon hena najicapi, qa otonwe kin en makoce ihdukšan koya he oyakapi. Unkan taku econpi kin he wanyag ipi.

15 Qa Jesus en hipi, qa wicašta wakan šica yuhnaškinyan, qa wicota yuhe ciqon, wanna ogekiton qa tawacin ecetu iyotankehan yanka he wanyakapi; unkan yušinyayapi.

16 Unkan tona wanyakapi qon hena, wicašta wakan šica yuhnaškinyanpi, kukuše kin hena ko token ecawicakiconpi qon hena owicakiyakapi.

17 Hehan makoce tawapi kin etanhan hde kta e icekiyapi.

18 Unkan wata kin en okipa hehan tuwe wakan šica yuhe ciqon he cekiya, kici un kta heon.

19 Tuka Jesus iyowinkiye šni, qa heciya; Takuwicayaye cin ekta hda wo, qa taku tona Itancan kin ecanicon qa onšinida, hena owicakiyaka wo.

20 Hecen kihde ca Dekapolis en taku tona Jesus ecakicon kin he ohdaka ece. Unkan owasin yušinyayapi.

21 Unkan Jesus ake watom akasanpa ki qehan, oyate ota en mniciyapi; qa mde kin ikiyedan un.

22 Hehan iho, omniciye tipi itancanpi wanji, Jairus eciyapi, he en hi; qa wanyaka hehan siha kin en makata ehpeiciya,

23 Qa nina cekiye ca heya; Micunkši cistinna wanna te kta wanka; en u qa nape on aputake ca asniya ye; hecen ni kta ce.

24 Unkan kici iyaya; qa wicašta ota ihakam yapi qa aotinsyapi.

25 Unkan winohinca wan waniyetu ake nom hehanyan we ece iheya;

26 Qa pejihutawicašta ota on tehiya kuwapi, qa taku owasin on hdusota, qa etanhan wašte icage šni, tuka sanpa šica aya;

27 He Jesus oyakapi nahon qehan, heyata tanhan wicota ehna hiyu, qa tawokoyake yutan.

28 Tawokoyake hee kaeš mdutan kinhan, amasni kta ce, eye ciqon.

29 Unkan hecehnana we iheye ciqon anapta: qa tancan mahen he wayazan kin on wanna akisni sdonkiya.  

30 Unkan hecehnana woasni etanhan hiyu kin Jesus atayedan sdonkiya, wicota ehna ihduhomni qa heya; Mitawokoyake tuwe yutan he?

31 Unkan waonspewicakiye cin heciyapi; Wicašta ota aotinaniyanpi he wandaka, qa, Tuwe mayutan he, eha he?

32 Unkan tuwe hecon kin he wanyake kta e ohomni awicatonwan.

33 Tuka winohinca kin taku ecakiconpi kin sdonkiya, hecen kokipeyahan cancanyan en hi, qa itokam makata ehpeiciye ca owasin awicakehan okiyaka.

34 Unkan heciya; Cunš, wacinyaye cin he asniniyan; wookiye hda wo, qa waniyazan qon okizi un wo.

35 Unkan iahan icunhan omniciye tipi itancan ti kin eciyatanhan upi qa heyapi; Nicunksi wanna ta ; tokeca sanpa Waonspekiye cin nagiyeyaya he?

36 Tuka Jesus taku eyapi nahon qehan, hecehnana omniciye tipi itancan kin heciya; Kokipe šni wo, wicada wo ecedan.

37 Unkan tuwedan kici ye kta iyowinkiye šni, Inyan, qa Jakob, qa Johannes Jakob sunkaku, henananpidan.

38 Unkan omniciye tipi itancan ti kin he en hi, qa owodutaton kin he wanyaka, tona ceyapi qa nihinciyapi kin hena koya.

39 Unkan en i qehan hewicakiya; Tokeca owodutaton yakagapi qa yaceyapi he? wicinyanna kin te šni, tuka ištinma ce.

40 Unkan nina ihapi. Tuka owasin tankan iyewicaya, hehan wicinyanna atkuku qa hunku, qa tona om un kin hena iwicacu, qa wicinyanna wanke cin en i;

41 Qa wicinyanna kin nape yuze ca heciya; Talitha kumi, Wicinyanna najin wo, eciciya, eyapi kin he kapi.

42 Unkan ecahankeya wicinyanna kin najin qa mani; wanna waniyetu akenonpa. Unkan nina hin yušinyayapi.

43 Hehan nina oyake šni wicaši; qa taku yutapi qupi kta, kewicakiya.

MARKOS WICOWOYAKE 6.

1 Unkan hetanhan iyoopta iyaye ca iye tamakoce kin ekta ki; qa waonspewicakiye cin hena opapi.

2 Unkan wanna anpetu wakan hehan omniciye tipi kin ohna waonspewicakiya. Qa wicota nahonpi qehan yušinyayapi qa heyapi; Tokiyatanhan dena yuha he? qa taku woksape qupi he? qa token iye nape on wicohan tanka dececa econpi he?

3 Cankajipe cin, Mary cinhintku, qa Jakob, qa Joses, qa Judas, qa Simon cincu kin he dee šni he? qa tawinohtin kin hena owasin den unkicipi unpi šni he? Unkan he on canniyeyapi.

4 Tuka Jesus hewicakiya ; Wicašta wokcan iye tamakoce en, qa iye takuwicaye cin ehna, qa iye ti kin ohna, ecedan yuonihanpi šni ece.

5 Unkan heciya wicohan tanka takudan econ okihi šni; tuka wayazankapi tonana nape on awicaputake ca asniwicaya.

6 Unkan wicadapi šni kin heon yušinyaya. Qa otonwe ihdukšan wanke cin ektakta waonspewicakiya iyaya.

7 Unkan akenonpapi kin wicakico, qa nom nom yewicaši; qa woniya šapa on wowašake wicaqu;

8 Qa wahokonwicakiya, icimani yapi kte cin on takudan icupi kte šni, cansagye ecedan; wojuha, qa waneya, qa mazaša opiye ohna hduhapi kte šni.

9 Tuka hanpokihanpi kta; qa onhdohda nom kicunpi kte šni.

10 Unkan hewicakiya; Tukten tipi wanji mahen yaipi kinhan, tohanyan hetanhan iyoopta dapi šni, hehanyan hen yukan po.

11 Qa tona iyowinniciyapi šni qa ananigoptanpi šni kinhan, tohan hetanhan dapi kinhan, owicadakapi kta e heon watušekšeca siha etanhan yahdatatapi kta. Awicakehan heciciyapi; Woyaco anpetu kin en, otonwe kin he kakije kte cin Sodom qa Gomorrah ahecece kta.

12 Unkan iyayapi, qa wicašta ihduecetupi kta e woyakapi.

13 Qa taku wakan šica ota napewicayapi, qa wayazankapi kin ota wihdi on sdawicayapi qa asniwicayapi.

14 Unkan Herod wicaštayatapi kin hena nahon; caje kin tankaya oyakapi nakaeš; hehan heya; Johannes baptem wicaqu qon he tapi kin etanhan kini, heon etanhan wicohan tanka econ ece.

15 Tuka toktokeca heyapi; Elias hee. Qa toktokeca iš; He wicašta wokcan, qa iš wicašta wokcan wanji iyececa ce, eyapi.

16 Tuka Herod nahon qehan heya; Johannes pa bawakse ciqon hee, wiconte etanhan kini ce.

17 Herod atayedan yewicaši, qa Johannes yuze ca haška hna- ka, Herodias iye sunkaku Philip tawicu qon heon etanhan; he yuza nakaeš.

18 Unkan Johannes; Nisunka tawicu duze cin he hecetu šni ce, Herod eciya.

19 Heon etanhan Herodias canniyekiye ca kte kta cin tuka okihi šni.

20 Herod Johannes kokipa, wicašta owotanna qa wašte sdonya, heon itonpa; qa oie nahon eca taku ota ecen econ, qa iyuškinyan nahon ece.

21 Tuka anpetu iyehantu qehan, Herod anpetu en tonpi qon he ehan, wicašta itancanpi wicayuhe ca, akicita tancan tankapi, qa Galile en wicašta tokaheya kin hena, htayetu wotapi wan wicakicaga.

22 Unkan Herodias cunwintku kin en hi, qa waci, qa Herod tona om un kin hena koya iyokipiwicaya, hehan wicaštayatapi kin heciya; Taku yacin kinhan makida wo, hecen cicu kta.

23 Nakun taku wakan cajeyan heciya; Taku mayakida kinhan cicu kta, mitokiconze hanke hehanyan.

24 Unkan tankan iyaye ca hunku heciya; Taku wakida kta he? Unkan iš, Johannes baptem wicaqu ece pa kin, eya.

25 Hehan ecahankeya inahniyan wicaštayatapi ekta tin hiyu qa heya kida; Johannes baptem wicaqu pa kin, wakšica ohna kohanna mayaqu kta wacin ce, eya.

26 Unkan wicaštayatapi kin nina iyokišica, tuka taku wakan cajeyan heye cin heon, qa tona om wota iyotanke cin hena on, he ipida kta tawatenye šni.

27 Unkan hecehnana wicaštayatapi kin wicakte wan ekta yeši, qa pa kin aku ši: Unkan he ekta iyaye ca, wicakaška tipi kin ohna pa baksa;

28 Qa wakšica wan ohna pa kin ahdi, qa wikoška kin qu; unkan wikoška kin iš iyoopta hunku kin qu.

29 Unkan iye waonspewicakiye cin hena, he nahonpi qehan, en hipi qa tancan ehdakupi, qa ohna hnakapi wan en hnakapi.

30 Unkan tona yewicaši qon hena Jesus en hdipi, qa taku owasin okiyakapi, taku econpi qa taku oyakapi ko.

31 Hehan hewicakiya; Niye ito icunonpa hewotahedan ekta u po, qa cistiyedan oziiciya po. Wicota upi qa hdapi ece, qa hecen wotapi kta hee kaeš okihipi šni.

32 Unkan heon hewoskan makoce wan ekta išnana watom iyayapi.

33 Tuka yapi kin wicašta ota wanyakapi, qa he iye iyekiyapi: qa otonwe owasin etanhan ekta inyang iyayapi, qa kawicapapi, qa en i kte cin hen mniciyapi.

34 Unkan Jesus ekta ihunni, hehan wicota wanwicayaka, qa onšiwicakida, tahinca wanunyanpi tuwedan wicayuhe šni kin iyececapi heon, qa hecen taku ota onspewicakiya.

35 Unkan wanna wi kucedan hehan, waonspewicakiye cin en hipi qa heciyapi; De hewotahedan makoce qa anpetu kin wanna

owihanke :

36 Hde wicaši wo, hecen makoce ihdukšan, qa otonwe kin ektakta yapi, qa woyute opeicitonpi kta; taku yutapi takudan yuhapi šni.

37 Tuka iye waayupte ca hewicakiya ; Niš ito wo wicaqu po. Unkan heciyapi; Unyanpi qa kašpapi opawinge nonpa aguyapi iyopeunyanpi, qa wo wicunqupi kta he?

38 Aguyapi španyanpi kin tona duhapi he? ito wanyaka po, ewicakiya. Unkan sdonyapi hehan; Zaptan qa hogan nonpa, eyapi.

39 Unkan owasin wato kin akan optayetonton iyotangkiye wicaši.

40 Unkan optayeton iyotankapi, opawingege qa wikcemna zaptanptan.

41 Unkan aguyapi zaptan qa hogan nonpa hena icu, hehan mahpiya ekta etonwe ca yawašte, qa aguyapi yušpašpa, qa waonspewicakiye cin wicaqu, oyate kin wicaqupi kta heon; nakun hogan nonpa kin hena owasin wicakipamni.

42 Unkan iyuhpa wotapi qa imnanpi.

43 Qa oyaptapi kin etanhan makanopiye akenonpa ojudan pahipi, nakun hogan kin etanhan.

44 Unkan aguyapi yutapi kin hena kektopawinge zaptan ecetu.

45 Hehan ecahankeya waonspewicakiye cin wata kin en okipe wicaši, qa tokaheya akasanpa Bethseda ekta yapi kta, kewicakiya; icunhan iye wicota kin hde wicaši kta.

46 Unkan hena hde wicaši, hehan paha wan ekta wocekiye eya iyaya.

47 Wanna htayetu hehan, wata kin mde kin cokaya un, qa iye išnana maka akan un.

48 Unkan watopapi iyotanhan iyekiyapi wanwicayaka; tatohekiya yapi nakaeš. Unkan hanyetu en awanyakapi itopa hehan, mini amani ekta wicaya.

49 Tuka mde kin amani wanyakapi qehan, he wanagi kecinpi, qa šicahowayapi.

50 Owasin wanyakapi qa yušinyayapi. Unkan hecehnana owkakiye ca hewicakiya; Cante wašte po, he miye, kokipapi šni po.

51 Unkan ekta wicaya, wata kin en; hehan tate kin ayuštan. Hecen nina yušinyayapi qa ihniyanyanpi.

52 Aguyapi econ qon he awacinpi šni; cantepi kin aotpasyapi nakaeš.

53 Unkan akasanpatanhan ipi, hehan Gennesaret makoce kin en yapi,qa hutata ihunnipi.

54 Unkan wata kin etanhan inanpapi, hehan hecehnana iyekiyapi;

55 Qa makoce kin he owancaya inyang yapi, qa tukten un nahonpi kinhan, wicašta wayazankapi kin owinja akan wicayuhapi, qa en awicayapi.

56 Unkan otonwe ciqadan, qa otonwe tanka, qa ihdukšan makoce wanke cin, tukte en ya eca, canku ohna wayazankapi kin ahiwicahnakapi qa cekiyapi; tawokoyake opapun hee kaeš yutanpi kta; unkan tona yutanpi kin hena asnipi ece.

MARKOS WICOWOYAKE 7.

1 Hehan Pharisee qa wowapi kagapi wanjikji, Jerusalem etanhan upi qa en ahimniciya;

2 Qa iye waonspewicakiye cin wanjikji nape šapa, nape hdujajapi šni he kapi, aguyapi yutapi wanyakapi qehan wicabapi.

3 Pharisee kin Juda wicašta ko owasin tanyan nape hdujajapi šni kinhan wotapi šni ece, qa wicahincapi tawoahope kin opapi.

4 Qa mazopiye etanhan hiyupi eca ihdujajapi šni ehantanhan wotapi šni. Unkan taku hececa ota opapi kta icupi, miniyatke, qa can koka, qa cega, ohehdepi ko yujajapi ece.

5 Hehan Pharisee kin wowapi kagapi ko wiwangapi; Tokeca waonspewicayakiye cin wicahincapi  tawoahope kin ahopapi šni he, tuka nape hdujaja šni aguyapi yutapi ece?

6 Unkan waayupte ca hewicakiya; Wananicihmanpi, niyepi on Isaya tanyan woyake ciqon, hecen wowapi en kagapi; Oyate kin de ihapi kin on mayaonihanpi, tuka cantepi kin mitehanyan un ece.

7 Tuka wicašta akantu tawoahope kin hena woonspe eekiyapi, qa oyakapi ece kin heon ohomadapi kin he taku šni.

8 Wakantanka tawoahope kin ehpeyayapi, qa wicašta akantu toope kin duhapi, cega qa wakšica yujajapi kin; qa taku hececa ota ecanonpi ece.

9 Unkan hewicakiya; Wicašta akantu toope duhapi kta e heon Wakantanka tawoahope kin ehpeyayapi, he tanyan ecanonpi he.

10 Moses hecen eya; Niyate nihun kici wicahduonihan wo. Nakun; Tuwe atkuku, qa iš hunku kin hdašice cinhan, he wiconte on te kta ce.

11 Tuka niye hehapi; Wicašta wan atkuku, qa iš hunku; He wohduze, tokan wicaqupi he kapi, hecen on ociciye kte šni, eciye cinhan he hecetu ce.

12 Hecen atkuku qa hunku taku sanpa owicakiye kta iyoyakipi šni;

13 Qa niye woope yakagapi qa wicayaqupi kin on Wakantanka tawoahope kin dutakunipi šni: qa taku hececa ota ecanonpi ece.

14 Unkan oyate kin owasin wicakico, hehan hewicakiya; Owasin anamagoptan po, qa okahniga po.

15 Wicašta tankan tanhan taku mahen iyaye cin takudan yušica okihi šni; tuka tona mahen tanhan hinape cin wicašta yušice cin hena ee.

16 Tuwe noge winahon yukan hecinhan he nahon kta.

17 Unkan wicota wicehna tanhan ti mahen iyaye cehan, waonspewicakiye cin wiyacinpi kin he on wiwangapi.

18 Unkan hewicakiya; Niš eya oyakahnigapi šni he? Taku kašta tankan tanhan wicašta mahen iyaye cin he yušape kta okihi šni e idukcanpi šni he;

19 Hena cante kin en i šni, tuka tezi mahen, qa hehan tankan ehpeyapi, hecen woyute owasin yuecetupi?

20 Unkan heya; Taku wicašta kin etanhan hinanpe cin he wicašta kin yušapa ece.

21 Mahentanhan, wicacante kin etanhan wicotawacin šica hiyu; wawicihahapi, wiinahmanpi, tinwicaktepi,

22 Wamanonpi, waicucupikte, wošice, wohnaye, wowihaha, ištašica, wayašicapi, wahanicidapi, witkotkokapi:

23 Dena taku šice cin owasin mahentanhan hiyu, qa wicašta yušape cin hena ee.

24 Unkan hetanhan najin hiyaye ca, Tyre qa Sidon makoce opapun kin en i, qa tipi wanji timahen iyaya: unkan tuwedan sdonye kte šni cin, tuka anahmanpi kta okihipi šni.

25 Winohinca wan cunwintku cistinna woniya šapa yuhe cin he nalion qehan, en hi qa siha kin en makata ehpeiciya.

26 He Hellenes winohinca kin heca, Syropheniciya oyate kin etanhan; unkan taku wakan šica cunwintku kin etanhan hinanpe ši kta e icekiya.

27 Tuka Jesus heciya; Wicacinca kin hena tokaheya wotapi kta; wicacinca aguyapi tawapi  kin icupi, qa šunka wicaqupi  kta he hecetu šni.

28 Unkan iye waayupte ca heciya; Han, Itancan; tuka wahna wotapi kin ihukuya hokšiyopa yušnapi kin šunka yutapi ece.

29 Unkan heciya; Wicoie kin de on ekta hda wo, taku wakan šica nicunkši etanhan hinanpa ce.

30 Unkan iye ti kin ekta ki, hehan taku wakan šica tankan iyaye ca, cunwintku ohehdepi kin akan wanka e wanhdaka.

31 Unkan ake Tyre makoce kin ehpeye ca, Sidon opta, Dekapolis makoce kin cokaya omani, qa Galile mde kin ekta ki.

32 Unkan wicašta wan noge tpa qa ia okitpani he en ahipi, qa nape ahnake kta icekiyapi.

33 Unkan wicota etanhan išnana icunonpa aya, qa nape noge ohna iyeye ca, tagoša qa on ceji yutan:

34 Hehan mahpiya ekta etonwe ca comnihdazi qa heciya; Ephphatha, yuhdokapi nunwe, eyapi kin he kapi.

35 Unkan ecahankeya noge yuhdokapi, qa ceji ikan kin yukcapi, qa hdaheya ia.

36 Hehan he tuwedan okiyake šni wicaši; tuka taku ewicakiye cin on etanhan sanpa nina oyakapi ece.

37 Qa nina yušinyayapi qa heyapi; Taku owasin tanyan econ ece; noge tpapi kin winahonwicakiye ca, nakun ia okitpani iewicakiya ece.

MARKOS WICOWOYAKE 8.

1 Unkan anpetu kin hena en nina wicota hinca, qa takudan yutapi šni, hehan waonspewicakiye cin wicakico qa hewicakiya;

2 Wicota kin onšiwicawakida, wanna yamni can mici unpi, qa taku yutapi takudan yuhapi šni.

3 Qa wotešni hde wicawaši kinhan, okinni tahepi ihpayapi kta; hunh tehan tanhan hipi nakaeš.

4 Unkan waonspewicakiye cin ayuptapi; Makoce hewotahedan kin den, tokiya tanhan dena aguyapi imnahan yute wicakiyapi kta he?

5 Unkan, Aguyapi kagapi tona duhapi he, eya iwicawanga? Unkan iš, Šakowin, eyapi.

6 Unkan oyate kin maka akan iyotanke wicaši; qa hehan aguyapi šakowin qon icu, yawašte qa yušpašpa qa waonspewicakiye cin wicaqu, iyoopta wicaqupi kta; unkan iš oyate kin wicakipamnipi.

7 Nakun hogan tonana yuhapi; hena yawašte qa wicaqupi kta, keya.

8 Hecen wotapi qa imnanpi; unkan aguyapi oyaptapi kin etanhan makanopiye šakowin pahipi.

9 Tona wotapi kin hena kektopawinge topa ecetu; hehan hde wicaši.

10 Hehan ecahankeya wata wan en opa, waonspewicakiye cin om, qa Dalmanutha makoce kin ekta i.

11 Unkan Pharisee kin en hipi, qa iyutanyan wiwangapi, qa mahpiya eciyatanhan wowapetokeca kida.

12 Unkan iye cante ekta comnihdazi qa heya; Tokeca wicoicage kin de wowapetokeca akita he? Awicakehan heciciyapi; Wicoicage kin de wowapetokeca takudan qupi kte šni.

13 Hehan ehpewicaye ca wata kin en okipe ca akasanpa hda.

14 Unkan aguyapi icupi kta akiktonjapi, qa wata ohna aguyapi wanjidan sanpa yuhapi šni.

15 Hehan wahokonwicakiye ca heya; Wahyaka po, qa on napohyapi Pharisee tawapi qa Herod tawa kin he kokipa po.

16 Hecen iye iyakitedan hdokinicapi qa heyapi; Aguyapi unhapi šni, heon etanhan heya ce.

17 Jesus he sdonya hehan hewicakiya; Tokeca aguyapi duhapi šni on ayakinicapi he? Hinahin oyakahnigapi šni qa widukcanpi šni he? Hinahin cante aotpasniyanpi he?

18 Ista niyukanpi wandakapi šni? qa noge niyukanpi ešta nayahonpi šni? qa yeksuyapišni he?

19 Aguyapi zaptan wicašta kektopawinge zaptan wicawakipamni, hehan oyaptapi kin makanopiye ohnaka tona yapahipi he? Akenonpa, eyapi.

20 Hehan šakowin qa kektopawinge topa, hehan oyaptapi makanopiye ohnaka tona iyacupi he? Unkan, Šakowin, eyapi.

21 Hehan hewicakiya; Tokeca oyakahnigapi ni he?

22 Unkan Bethseda en hi. Hehan ištagonga wan en ahipi, qa yutan kta e icekiyapi.

23 Unkan ištagonge cin napata yuze ca otonwe kin tankan aya; qa išta kin en atagoša hehan nape kin akan ehnaka, qa taku wanyaka hecinhan he iwanga.

24 Unkan wankan etonwe ca heya; Wicašta wanwicamdaka, mani unpi, can kin iyececa.

25 Hehan ake nape kin išta akan ehnaka, qa ake wankan etonwekiya; unkan hehan yuecetupi, qa taku owasin tanyan wanyaka.

26 Hehan iye ti ekta hde ši, qa heya; Otonwe kin en ye šni wo, qa otonwe kin en tuwedan okiyake šni wo.

27 Unkan Jesus hetanhan Kesareya Philippi otonwe kin hena ekta iyaya, waonspewicakiye cin om. Unkan tahepi waonspewicakiye cin heya iwicawanga; Matuwe, wicašta keyapi he?

28 Unkan ayuptapi; Johannes baptem wicaqu kin; qa wanjikji; Elias; qa wanjikji; Wicasta wokcan wanji he niye, eyapi.

29 Unkan hewicakiya; Qa niye matuwe kehapi he? Unkan Inyan waayupte ca heciya; Messiya he niye.

30 Unkan he tuwedan okiyake šni wicaši.

31 Hehan wowicakiyaka, Wicasta Cinhintku kin taku ota kakije kta; wicahincapi qa wošnapi kagapi, wowapi kagapi ko heyata iyeyapi kta, qa ktepi kta; qa anpetu yamni iyohakam kini kta.

32 Unkan hena taninyan ohdaka. Hehan Inyan icu qa iyokišni.

33 Tuka ihduhomni qa waonspewicakiye cin awicatonwan, hehan Inyan iyopeye ca heya; Satan miheyata ya wo; taku Wakantanka tawa kin awacanni šni, tuka wicašta akantu taku tawa kin.

34 Unkan oyate kin waonspewicakiye cin om wicakico qehan, hewicakiya; Tuwe kašta omape kta hecinhan, waipiicida kta, qa cansusbeca kicin kta, qa mihakam u kta.

35 Tuwe wiconi tawa tehinda kinhan he toki ehpekiye kta; tuka tuwe miye on qa wotanin wašte kin on wiconi toki ehpekiye cinhan he qe wiconi hduhe kta.

36 Qa wicašta wan maka kin de ocowasin ohiya ešta, qa iye nagi kin toki ehpekiye cinhan, taku on iwašte kta he?

37 Qa taku e wicašta nagi kin tokiyopekiye kta he?

38 Heon etanhan tuwe, wicoicage wiinahman qa wahtani sa kin de en, miye qa mioie kin on ištece cinhan, tohan Wicašta Cinhintku kin iye Atkuku towitan hduha, ohnihde wakan kin om u kinhan, wicašta kin he on ištece kta ce.

MARKOS WICOWOYAKE 9.

1 Hehan hewicakiya; Awicakehan heciciyapi; den najinpi etanhan wanjikji wiconte utapi šni itokam, Wakantanka tokiconze wowašake on hi wanyakapi kta.

2 Unkan anpetu šakpe iyohakam Jesus, Inyan, qa Jakob, qa Johannes iwicacu, qa icunonpa paha wan tehanwankantu kin ekta awicaya ; qa wicitokam yutokecapi:

3 Tawokoyake kin wiyatpatpa, ska hinca, wa iyececa; maka akan wayuska kin tuwedan iyecen ska kaga okihi šni.

4 Unkan hen Elias qa Moses en ihdutaninpi; qa hena Jesus kici wohdag yukanpi.

5 Hehan Inyan waayupte ca Jesus heciya; Itancan, den unyakonpi he wašte; ito wakeya yamni ti unkicagapi kta; wanji niye on, qa wanji Moses, qa wanji Elias unkicagapi kta.

6 Taku eye kta sdonkiye šni; nina yušinyayapi nakaeš.

7 Unkan mahpiya wan aohanziwicaya; qa mahpiya kin eciyatanhan wicaho wan tanin qa heya; Micinkši waštewakidake cin he dee, he anagoptan po.

8 Hehan ecahankeya ihdukšan etonwanpi qehan, wicašta tuwedan wanyakapi šni, Jesus išnana kici unpi.

9 Unkan paha kin etanhan apamahde kupi icunhan wahokonwicakiya, taku wanyakapi kin tuwedan okiyakapi kte šni, Wicašta Cinhintku kin tapi etanhan kini šni hehanyan.

10 Unkan wicoie kin he awacinpi, qa tapi etanhan kini eyapi kin he taku kapi hecinhan he ikiciwangapi.

11 Unkan heya iwangapi; Tokeca e Elias tokaheya hi kta ce, wowapi kagapi kin eyapi he?

12 Unkan awicayupte ca heya; Awicakehan Elias tokaheya hi kta, qa taku owasin yuecetu kta; qa Wicašta Cinhintku kin token taku ota kakije kta, qa heyata iyeyapi kta e wowapi en kagapi qon, he nakun owicakiyaka.

13 Tuka heciciyapi ce; Awicakehan Elias wanna hi; unkan token cinpi kin ecen ecakiconpi, wowapi en kagapi qon iyececa.

14 Unkan waonspewicakiye cin en hdi qehan, wicihdukšan wicota ninca wanwicayaka; qa wowapi kagapi kin wiwicawangapi.

15 Unkan oyate kin iyuhpa wanyakapi qehan nina yušinyayapi, qa ekta inyang yapi qa okiyapi.

16 Unkan wowapi kagapi kin, Taku e on wiwicanungapi he? eya iwicawanga.

17 Unkan wicota etanhan wanji ayupta; Waonspekiye, micinkši woniya ie šni kin heca yuhe cin he cicahi.

18 Qa tukten eyaku eca yuhdehdeca ece; hecen i minitaga au, qa hi hdakinskinza, qa hanyan ece; unkan waonspewicayakiye cin hena tankan ehpeyapi kta kewicawakiya, tuka okitpanipi.

19 Unkan waayupte ca hewicakiya; Wicoicage wicada šni, tohanyan cicipi waun kta? tohanyan iyowinciciyapi kta he? En makau po.

20 Hehan en kahipi. Unkan wanyag iheye cin hecehna woniya kin yuhdehdeca ; qa makata ehpeye ca, i minitaga au paptanptan iyeiciya wanka.

21 Unkan atkuku kin heya iwanga; Tohantanhan hececa he? Unkan iš; Hokšiyoqopa ehantanhan, eya.

22 Qa ota petan ehpeye ca, minin ehpeya, ihangye kta e heon; tuka niš taku oyakihi kinhan, onšiunkida po qa ounkiya po.

23 Jesus heciya; Wicada oyakihi kinhan; tuwe wicada kin he on taku owasin okihipica ce.

24 Unkan hecehnana hokšidan atkuku kin hotanin qa ceya heya; Itancan wicawada; wicawada šni kin he niye omakiya wo.

25 Jesus oyate kin en inyang hiyupi wanwicayaka, hehan woniya šapa iyopeye ca heciya; Woniya ia okitpani qa noge tpa, tankan hinanpe ca, icimana en ye šni wo, he miye e econ ciši ce, eya.

26 Unkan hotanin qa nina yuhdehdeca, qa tankata hinanpa; unkan wicašta ta iyececa, hecen, Wanna ta ce, wicota eyapi.

27 Tuka Jesus napata yuze ca yuwankan icu; unkan najin hiyaya.

28 Unkan tin hiyu qehan, waonspewicakiye cin nahmana iwangapi; Tokeca unkiye tankan ehpeya unkokihipi šni he?

29 Unkan hewicakiya; Ocaje kin de wote šni cekiyapi kin ecedan on tankan hiyu kta okihi ece.

30 Hehan hetanhan yapi qa Galile iyoopta iyayapi; qa tuwedan sdonye kte šni cin.

31 He icunhan waonspewicakiye cin wowicakiyaka qa; Wicašta Cinhintku kin wicašta napepi kin en wicaqupi, unkan ktepi kta; qa ktepi iyohakam anpetu iciyamni hehan kini kta ce, ewicakiya.

32 Tuka wicoie kin he okahnigapi šni, qa on iwangapi kta kokipapi.

33 Unkan Kapernaum en hi; qa ti mahen yanka hehan wiwicawanga; Canku ohna taku e on ayakinicapi he?

34 Tuka inina yukanpi; canku ohna wanji tukte iyotan tankapi kta e heon hdokinicapi.

35 Unkan iyotanke ca akenonpapi kin wicakico qa hewicakiya; Wicašta wan tokaheya un kta cin kinhan, hee ehake un kta, qa owasin wowidagyapi kta.

36 Hehan hokšiyoqopa wan icu, qa wicacokaya ehnaka; qa nape ohna eyaku, hehan hewicakiya;

37 Tuwe hokšiyoqopa dececa wanji, micaje on tin hiyaye cinhan, miye tin hiyumayan ece; qa tuwe tin hiyumaye cin he miye šni, tuka tuwe u maši kin he tin hiyuya ece.

38 Hehan Johannes ayupte ca; Waonspekiye, wicašta wan nicaje on taku wakan šica tankan ehpeya wanunyakapi, he unkihakam u šni; unkan unkihakam u šni kin on etanhan teunhindapi ce, eya.

39 Tuka Jesus heya; Tehindapi šni po; wicašta tuwe micaje on wicohan tanka econ kinhan, he ituya mayašice kta okihi šni.

40 Tuwe unkizapi šni kinhan, he unkicipi un ece.

41 Tuwe micaje on miniyatke ohna mini datkanpi kta nicupi kinhan, Messiya niyuhapi kin heon, he wokajuju toki ehpekiye kte šni, awicakehan eciciyapi.

42 Qa tuwe dena cikcistinpidan wacinmayanpi kin wanji wahtanikiye cinhan, tahu en inyan wiyutpan wan iyakaškapi qa miniwanca kin en ehpeyapi unkanš, he wašte kta tuka.

43 Qa ninape wahtaniniye cinhan hdaksa wo; nape ksa wiconi kin en yai kinhan hee wašte kta, qa nape napin hduha Wakanšica ti, peta icimana kasnipi kte šni kin en iyohpeniyanpi kte šni.

44 Hen wamduška tawapi kin te kte šni, qa peta kin kasnipi šni ece.

45 Nakun nisiha wahtaniniye cinhan hdaksa wo; hunište wiconi kin en yai kinhan, he wašte kta, qa siha nom hduha Wakanšica ti peta icimana kasnipi kte šni kin en iyohpeniyanpi kte šni.

46 Hen wamduška tawapi kin te kte šni, qa peta kin kasnipi šni ece.

47 Nakun niišta wahtaniniye cinhan hdušdoka wo; išta wanjidan hduha Wakantanka tokiconze kin en de cinhan, hee wašte kta, qa išta napin hduha Wakanšica ti peta kin en iyohpeniyanpi kte šni.

48 Hen wamduška tawapi kin te kte šni, qa peta kin kasnipi šni ece.

49 Wicašta otoiyohi peta on skuyeyapi kta, qa wošnapi otoiyohi miniskuya on skuyeyapi kta.

50 Miniskuya kin he wašte; tuka miniskuya kin skuye šni aye cinhan taku e on skuyeyapi kta he? Miniskuya ihduha po, qa wookiye kiciyuha po.