Lukas 9-10

The work goes on. Found many cases where the translators mistook the native speaker (Joseph Renville) with the "and" (not unkan, but qa when it was followed by es^) and the "or" (kaes^). Are trying to make sure all of those are right- what a big difference a little word makes! If there are any places we missed, remember, this is just the second go thru (the first was untangling all the verses). Thanks for your patience and praise God (Wakantanka) that He guides the work!

LUKAS WICOWOYAKE 9.

1 Unkan waonspewicakiya akenonpapi kin hena wicakico, qa wowašake wookihi ko, wakan šice owasin on, qa wowayazan asniyanpi kta hecen wicaqu.

2 Qa Wakantanka tokiconze kin oyakapi kta, qa wayazankapi kin asniwicayapi kta ye wicaši.

3 Qa hewicakiya; Icimayanipi kte cin on cansagye, qa wojuhadan, qa waneya, qa mazaska takudan eyakupi šni po; qa nakun onhdohda nomnom yuhapi šni po.

4 Qa tukte tipi wan en yaipi kinhan, hen ece yukan po, qa hetanhan iyoopta ya po.

5 Qa tuwe kašta iyowinniciyapi šni kinhan, otonwe kin he inayapapi kinhan, nisihapi watušekšeca onistakapi kin hee kaeš katata po, he owicayake kta ce.

6 Unkan iyayapi,qa otonwe iyaza yapi, qa wootanin wašte oyakapi, qa owancaya waasniyanpi.

7 Unkan taku econ kin owasin, Herod wicaštayatapi kin nahon; qa hehan token cante yuza nun tannin šni; apa Johannes wiconte kin etanhan kini keyapi kin heon etanhan:

8 Qa apa iš, Elias hi ce, eyapi; qa apa tokeca iš, Wannakaja waayatapi qon hena etanhan wanji kini ce, eyapi.

9 Unkan Herod heya, Johannes pa bawaksa ce: tuka de tuwe e on taku decekceca nawahon he? Unkan wanyake kta cin.

10 Unkan wahošiyapi kin hena wanna hdipi qehan, taku token econpi kin owasin okiyakapi. Unkan ewicahdaku qa nahmanna icunonpa makotahedan wan ekta i, he otonwe wan Bethsaida eciyapi kin ahankeya.

11 Unkan oyate kin sdonyapi qehan, ihakam eyaya: unkan iyowinwicakiye ca, Wakantanka tokiconze kin he iwowicakiyake ca, tona asniyanpi cinpi kin hena asniwicaya.

12 Unkan wanna htayetu aye cehan, akenonpapi kin upi, qa heciyapi, Wicota kin tokan yewicaši wo; hecen otonwe qa ihdukšan makoce wanke cin hena ektakta yapi, qa taku yutapi oicidepi, qa iwankapi kta ce; den makotahedan unyakonpi heon etanhan.

13 Tuka hewicakiya; Niye wo wicaqu po. Unkan heyapi; Aguyapi zaptan qa hogan nonpa henana unhapi; oyate denakeca woyute opewicakiciton unyanpi šni kinhan.

14 Wicašta kektopawinge zaptan ecetupi. Unkan waonspewicakiye cin hewicakiya; Wikcemna zaptanptan ptaptaya iyotang wicakiya po, eya.

15 Unkan ecen econpi, qa owasin iyotang wicakiyapi.

16 Hehan aguyapi zaptan qa hogan nonpa qon hena icu; qa mahpiya ekta etonwan, qa yawašte, qa yušpašpa, qa waonspewicakiye cin wicaqu; qa iye oyate kin wicitokam ewicakicihnakapi kta.

17 Unkan wotapi qa owasin wipipi; unkan onšpašpa iwicakiciyaye cin hena pahipi, makanopiye akenonpa.

18 Unkan išnana wocekiye eya un qehan, waonspewicakiye cin hena kici unpi: unkan wiwicawange ca heya; Miye matuwe oyate kin keyapi he?

19 Unkan waayuptapi qa, Johannes baptem wicaqu qon; qa apa iš, Elias; qa apa tokeca iš; Wanakaja waayatapi qon hena etanhan wanji kini ce, eyapi ce, eyapi.

20 Unkan hewicakiya; Tuka niye matuwe kehapi he? Unkan Inyan waayupte ca heya; Wakantanka etanhan Messiya kin.

21 Unkan nina owicakiye, ca wicašta kin tuwedan okiyakešni wicaši;

22 Qa heya; Wicašta Cinhintku kin taku otakiya on ito iyotanhan iyekiye kta, qa wicašta tokapapi, qa wawayušnapi itancanpi, qa wowapi kagapi kin hena heyata iyeyapi, qa teyapi kta ce: unkan anpetu iyamni kinhan kini kta ce, eya.

23 Unkan owasin hewicakiya; Tuwe miyahna u wacin kinhan, waipiicida, qa anpetu otoiyohi cansusbeca kin kicin, qa miyahna u kta.

24 Tuwe kašta wiconi kin hduhe wacin kinhan, togehpekiye kta ce; tuka tuwe kašta miye on wiconi kin togehpekiye cinhan, hee hduhe kta ce.

25 Wicašta togehpeiciya, qa iš tokan ehpeyapi hecinhan, maka kin ocowasjn ohiiciya ešta, taku ecin on tanyan un kta he?

26 Tuwe miye qa mioie kin on ištece cinhan, hee on Wicašta Cinhintku kin ištece kta, tohan iye towitan, qa Atkuku tawa qa taohnihde wakan tawapi kin hduha u kinhan.

27 Tuka awicakehan heciciyapi; Den najinpi kin apa Wakantanka tokiconze kin tohanyan wanyakapi šni kin hehanyan tapi kte šni.

28 Unkan wicoie kin dena iyohakam anpetu šahdogan ecetu, hehan Inyan, qa Johannes, qa Jakob, hena ewicayaku, qa cekiye kta paha wan ekta i.

29 Unkan cekiya icunhan ite kin tokeca hinhda, qa tawokoyake kin ska qa wiyatpatpa.

30 Unkan iho, wicašta nonpa kici wohdakapi, Moses qa Elias hena eepi.

31 Hena wokitaninyan hinajinpi, qa iye iyaye kte cin, Jerusalem ekta hduštan kte cin he iwohdakapi.

32 Tuka Inyan qa om un kin hena nina ištinmapi; unkan kiktapi qehan wookitanin tawa kin he wanyakapi, qa nakun wicašta nonpa kici najinpi kin hena.

33 Unkan hena ehpeya kihdapi icunhan, Inyan Jesus heciya; Itancan, den unkanpi kte cin he wašte; ito wakeya yamni unkagapi kta, wanji niye, qa wanji Moses, qa wanji Elias, hecen unnicicagapi kta; taku eye cin he sdonkiye šni.

34 Hena hecen eya icunhan, mahpiya šoka wan u, qa aohanziwicaya. Unkan mahpiya šoka kin en hiyayapi hehan nina wikopapi.

35 Unkan mahpiya qon etanhan wicaho wan hinape, ca heya; Micinkši waštewakidake cin he dee ce: he anagoptan po.

36 Unkan wicaho qon yaštan qehan, Jesus išnana en najin. Unkan iye inina unpi, qa taku wanyakapi qon anpetu kin hena en wicašta kin tuwedan okiyakapi šni.

37 Unkan ianpetu qehan, paha qon eciyatanhan wanna en hdipi qehan, oyate ota itkokipapi.

38 Unkan iho, wicota kin etanhan wicašta wanji hoyekiye ca heya; Waonspekiye cin, ceciciya ce, micinkši kin atonwan wo; micinca hecedan:

39 Unkan iho, woniya wan yuza eca, ihnuhana šicahowaya ece; qa yuhdehdeca, qa hecen minitaga apašdiya, qa onšiya kuwa, qa kitan se ayuštan ece.

40 Unkan waonspewicayakiye cin cewicawakiye, ca napeye wicawaši; tuka okitpanipi, eya.

41 Unkan Jesus waayupte ca heya; Wicoicage wicada šni qa tawacin tehika, tohanyan cicipi waun kta, qa iyowinciciyapi kta he? nicinkši kin den au wo.

42 Unkan u kin hepiya, wakan šica cin makata ehpeye, ca yuhdehdeca. Unkan Jesus woniya šape cin kišice ca, hokšidan kin asniye ca, atkuku kin kicu.

43 Unkan Wakantanka towašake hince cin on owasin inihanpi. Tuka Jesus taku token econ kin on owasin inihanpi icunhan, waonspewicakiye cin hewicakiya;

44 Wicoie kin dena mnogepi kin en iyohpayapi kte; Wicašta Cinhintku kin wicašta napepi kin en wicaqupi kta.

45 Tuka iapi kin he okahnigapi šni, qa anawicakihmanpi, hecen iyukcanpi šni: unkan wicoie kin on iwangapi kte cin itonpapi

46 Unkan hehan wanji tukte iyotan tankapi kte cin he hdokinicapi.

47 Unkan cante ekta hdokinicapi kin he Jesus wanyake cehan, hokšiyoqopa wan icu qa iye iyokihe ehde;

48 Qa hewicakiya; Tuwe kašta hokšiyopa kin de micaje on eyaku kinhan, he miye e emayaku; qa tuwe kašta miye emayaku kinhan. he umaši kin hee eyaku ece; hecen niyepi owasin wanji tukte nicistinpidan kinhan, hee tanka kta ce, eya.

49 Unkan Johannes waayupte ca heya; Itancan, tuwe nicaje on taku wakan šice napewicaya wanunyakupi, qa den ounpapi šni kin on etanhan teunhindapi.

50 Unkan Jesus heciya; Tehindapi šni po: tuwe unkipajinpi šni kin he unkicicapi ece.

51 Unkan anpetu en wankan eyakupi kte cin wanna kiyedan aya, hehan Jerusalem ekta ye kta e ite kin hdusuta;

52 Qa wahošiyapi kin heca tokata ye wicaši. Unkan iyayapi, qa taku wiyeya kicihnakapi kta e Samariya wicašta tonwanyanpi kin wanji en ipi.

53 Unkan Jerusalem ekta ye kta sece cin on etanhan iyowinkiyapi šni.

54 Unkan waonspewicakiye cin, Jakob qa Johannes he wanyakapi qehan, heyapi; Itancan, Elias econ qon he iyecen unkiye, mahpiya eciyatanhan peta kun u, qa huhnahwicaye unšipi kta yacin he?

55 Tuka ihduhomni qa wicakišice, ca heya; Tawacin toniketupi kin sdonyakiyapi šni ce.

56 Wicašta Cinhintku kin wicašta tewicaye kta on hi šni, tuka niwicaye kta heon hi ce, eya. Unkan otonwe wan tokeca ekta iyayapi.

57 Unkan canku ohna yapi icunhan, tuwe heciya; Itancan kin, tokiya kašta de cinhan ciyahna mde kta ce, eya.

58 Unkan Jesus heciya; Šungidan kin wašun tonpi, qa mahpiya okinyanpi kin hohpi yuhapi, tuka Wicašta Cinhintku kin iye pa kin tukten iwanke kte cin ee kaeš hduhe šni ce.

59 Unkan wanji tokeca heciya; Miyahna u wo. Tuka heya; Itancan, tokaheya ate wehe mde kte cin he iyowinmakiya ye.

60 Jesus heciya; Tona tapi kin ta wicayuhapi kin hena ito wicakihapi kta; tuka niye qe ye ca Wakantanka tokiconze kin he oyaka wo.

61 Unkan wanji tokeca nakun heya; Itancan, ciyahna waun kta; tuka ito tokaheya wahde, ca wati kin ohna un kin tanyan wehnake kte cin he iyowinmakiya wo.

62 Unkan Jesus heciya; Wicašta kin tuwe mahiyumdu wanna yuze, ca hehan hinakaha hakikta kinhan, he Wakantanka tokiconze kin en ope kta iyecece šni ce. 

LUKAS WICOWOYAKE 10.

1 Unkan taku kin hena iyohakam, Itancan kin toktokeca wikcemna šakowin cajewicayate, ca iye otonwe tona ekta ye kte cin, qa tokiya kašta ekta ye kte cin, hena kohan ektakta nomnom yewicaši.

2 Qa hecen ewicakiya; Awicakehan woksapi kin tanka, tuka htanipi kin e tonana ce; he on etanhan woksapi Itancan kin, he iye htanipi kin heca woksapi kin en yewicaši kte cin he icekiya po.

3 Ya po; iho, tahincaska šunktokeca ehna unpi he iyecen ye cišipi.

4 Mazaska opiye, qa wojuhadan, qa hanpa hena hduhapi šni po: qa tahepi wicašta tuwedan okiyapi šni po.

5 Qa tukten tipi wan en tin idadapi kinhan, tokaheya, Wookiye tipi kin den un nunwe, eya po.

6 Unkan wookiye cinhintku kin en un kinhan wookiye nitawapi kin en iyahe kta: tuka hecece šni kinhan, ake en nihdipi kta.

7 Qa tipi kin he en ece un po, taku nicupi kin yuta qa yatkan dukanpi kta; tuwe htani kin he wokajuju kicupi ece e kta. Tipi iyaza yapi šni po.

8 Qa tukten otonwe wanji en yaipi, qa iyowinniciyapi kinhan, taku nitokam enicihnakapi kin he ece yuta po.

9 Qa wayazanka en unpi kin hena asniwicaya po, qa, Wakantanka tokiconze kin he kiyedan nihiyohipi ce, ewicakiya po.

10 Qa tukte otonwe wanji en yaipi qa iyowinniciyapi šni kinhan, otonwe kin he canku kin en hdicupi qa heya po;

11 Nitotonwepi watušekšeca ountkapapi kin hee kaeš itkom unnicicatatapi ce; tuka Wakantanka tokiconze kin he kiyedan nihiyohipi kin sdonya po.

12 Tuka heciciyapi ce, Anpetu kin he en otonwe kin he tehiya un kte cin he Sodom aoptenya un kta ce, eya.

13 Korazin wotehi niciyanka ce! Bethsaida wotehi niciyanka ce! niyepi kin en wicohan tanka econpi kin hena Tyre qa Sidon en econpi unkanš, wanacaja wahinske ojuha cahota ahna en iyotanka  iyopeiciyapi kta tuka.

14 Tuka wayacopi kin ekta niye tehiya yaunpi kte cin he Tyre qa Sidon kici aoptenya unpi kta.

15 Qa niye Kapernaum, yuwankan mahpiya ekta aniyanpi kin, kuya wakanšica tipi kin ekta iyaye niyanpi kta ce, eya.

16 Tuwe ananigoptanpi  kin, he miye e anamagoptan; qa tuwe wahtenidapi šni kin, he miye e wahtemada šni; qa miš tuwe wahtemada šni kin, he umaši kin hee wahteda šni ece, eya.

17 Unkan wikcemna šakowinpi qon wopidaya hdipi, qa heyapi; Itancan, nicaje kin eciyatanhan wakan šice kin iyepi kaeš anaungoptanpi ece.

18 Unkan hewicakiya; Mahpiya kin eciyatanhan wakanhdi iyecen Satan hinhpaya wanmdaka ce.

19 Iho, wowašake cicupi, hecen wamduška sintehda ko ayahanpi kta, qa toka token wašakapi ešta isanpa yaunpi kta; hecen takudan ksuweniyanpi kte šni.

20 Tuka wakan šice cin hena ananigoptanpi kin heon wiyuškinpi šni po; tuka mahpiya ekta caje oniwapi kin hee on wiyuškin po, eya.

21 Unkan he ehan Jesus cante mahen iyuškin, qa heya;  Ate, mahpiya maka ahna on Itancan, niye taku kin dena ksapapi, qa wayupikapi kin hena anawicayakihbe, ca hokšiyoqopa kin heca sdonyewicayakiye cin, he pidamayakiya ce; han, Ate; niye hecen iyonicipi kin heon etanhan.

22 Atewaye cin he taku owasin yuhemakiya; qa Cinhintkuyapi kin he tuwe kin tuwedan sdonye šni, Ateyapi kin heceyedan; qa Ateyapi kin iš tuwe kin, Cinhintkuyapi kin iye qa tona owicakiyake kte cin henana sdonyapi ece.

23 Unkan waonspewicakiye cin ekta ihduhomni, qa nahmana heya; Taku wandakapi kin hena wicišta tona wanyakai kin hena yawaštepi ece.

24 Qa heciciyapi; Waayatapi kin wicaštayatapi  ko ota taku wandakapi kin hena wanyag cinpi, tuka wanyakapi šni; qa taku nayahonpi kin he nahon cinpi, tuka nahonpi šni, eya.

25 Unkan inyun, wicoope aiapi kin heca wanji najin hiyaye, ca wawiyutanye, ca heciya; Waonspekiye cin, token ecamon qa owihanke wanin wiconi ohimiciye kta he?

26 Unkan heciya; Wicoope kin en token owapi he? token dawa ece he?

27 Unkan waayupte, ca heya; Itancan Wakantanka nitawa kin he nicante kin ocowasin, qa ninagi ocowasin, qa nitowašake ocowasin, qa nitawacin ocowasin on wašteyadake kta; qa niye inihdacin kin he iyecen nikiyedan un kin wašteyadake kta ce.

28 Unkan heciya; Tanyan waadupta; hecen econ wo, kinhan yani kta ce.

29 Tuka iye ihdaowotanna wacin, qa Jesus heciya; Unkan mikiyedan un kin he tuwe he?

30 Unkan Jesus ayupte ca heya; Wicatšta wan Jerusalem etanhan Jeriko ekta iyaya; qa wamanonpi sa awicakipa, hena tawokoyake kin kipi, qa apapi, qa to icakiš ehpeya kihdapi.

31 Unkan ehantudan wawayušna wanji canku kin he ohna hiyaya; qa he wanyake cehan iyoopta iyaya.

32 Unkan Levite heca wanji iš eya ehan i qehan, atonwe ca iyoopta iyaya.

33 Unkan Samariya wicašta wanji icimani un, he wanke cin en hi; qa wanyake cehan onšida;

34 Qa en i, qa kašujapi kin pahte ca wihdi miniša ko en okaštan; hehan iye tašunke kin akan yankekiye ca, owote tipi wan en ahi, qa awanyaka.

35 Unkan ihanhanna iyoopta ye kta, hehan kašpapidan nom ehdaku, qa tipi tawa kin qu, qa heciya; Tanyan yuha wo, qa dena sanpa tona on dusote cinhan, tohan waku kinhan cicu kta ce.

36 Iho, hena yamnipi kin, wamanonpi sa awicakipe ciqon wanji tukte ikiyidan un idukcan he?

37 Unkan, Wanji onšida qon hee ce, eya. Hehan Jesus heciya; Ye ca, iyecen econ wo.

38 Unkan hetanhan iyoopta iyayapi, hehan otonwe wan en i: unkan winohinca wan Martha eciyapi, he iye ti kin en kico.

39 Unkan he tankaku kin, Mary eciyapi kin he Jesus siha kin en iyotanke ca, oie kin nahon ece.

40 Tuka Martha wicohan ota on token cante yuza tannin šni; heon en hi qa heya; Itancan, mitanka ehpemaye ca mišnana taku ota ecamon ece kin niš ekta ewacanni šni he? heon etanhan omakiye kta keciya ye.

41 Tuka Jesus waayupte ca heciya; Martha, Martha, taku ota yakicanda wacanni, qa on nagiyeniciya ece:

42 Tuka taku wanjidan cinpica: unkan Mary taku wašte kin he kahniga, he icimana kipi kte šni ce,