Lukas 15-16

LUKAS WICOWOYAKE 15.

1 Unkan hehan wamnayanpi qa wahtanipi sa, hena owasin nahonpi kta e on en ahi.

2 Unkan Pharisee kin wowapi kagapi ko ikapapi qa heyapi; Wicašta kin de wahtanipi sa iyowinwicakiye ca oin wota ece.

3 Hehan wiyacinpi kin de owicakiyake ca heya;

4 Niyepi kin etanhan wicašta wanji tahinca wanunyanpi opawinge wicayuhe ca, wanjidan kitanin šni kinhan, wikcemna napcinwanka sanpa napcinwanka kin hena makotahedan en awicayuštan, qa tannin šni qon he tohanyan iyeye šni hehanyan okide šni naceca he?

5 Qa tohan iyeye cinhan, wiyuškinyan hiyete akan akionpa ece.

6 Qa wanna tiyata ki eca, kodawicaye ca, ikiyedan tipi kin hena witaya wicakico, qa hewicakiya; Miciiyuškin po, tahinca wanunyanpi wan makitanin šni qon he wanna iyewakiya ce.

7 Heciciyapi ce; he iyececa, wahtanipi sa wanjidan iyopeiciya eca, mahpiya ekta wiyuškinpi ece e kta, wicašta owotanna qa woahtani on iyopeiciyapi kta iyececapi šni wikcemna napcinwanka sanpa napcinwanka on iyecen wiyuškinpi kte šni.

8 Qa nakun winohinca tuwe kašpapidan wikcemna yuhe, ca wanji togehpekiye cinhan, hecen petijanjan ideye, ca tipi kin kahinte, ca tohan iyekiye šni kin hehanyan okide šni naceca he?

9 Qa tohan wanna iyeye cinhan, kodawicaye cin, qa ikiyedan tipi kin hena witaya wicakico qa hewicakiya; Miciiyuškin pe, kašpapidan toki ehpewakiye ciqon he wanna iyewakiya ce.

10 He iyececa wahtanipi sa wanjidan iyopeiciya eca, on Wakantanka taohnihde kin wicitokam wiyuškinpi ece, eciciyapi ee.

11 Unkan heya; Wicašta wan cinhintku nonpa.

12 Unkan hakakta kin he atkuku kin heciya; Ate, woyuha mitawa kte cin he micu wo. Unkan woyuha kin akipam wicaqu.

13 Unkan iyohakam anpetu tonana hehan cinhintku hakakta qon he taku owasin witaya tpahi, qa itehanyan makoce wan ekta icimani iyaya: qa hen šicaya ohanyanpi kin on taku yuhe cin hdutakuni šni.

14 Unkan wanna owasin hdusote cehan, makoce kin he en wicaakihan tanka icaga; hehan iye wicakiš un.

15 Qa makoce kin hen unpi kin wanji ekta ye ca kici yanka: unkan he kukuše wo wicaqu kta e maga kin ekta ye ši.

16 Unkan omnica kukuše yutapi kin hee etanhan wipiiciye wacin; tuka tuwedan takudan qu šni.

17 Unkan iciksuye cehan heya; Ookiye opetonpi heca aguyapi iyakicuya yuhapi kin tona ate wicayuha hwo; qa miye e wotektehdapi on atakuni šni amayan ce!

18 Ito nawajin qa ate ekta wahde kta, qa hewakiye kta; Ate, mahpiya kin en, qa niye nakun nitokam wawahtani:

19 Qa detanhan cincamayaye kta iyemacece šni; wicašta opewicayaton kin he iš wanji iyececa makaga wo, epe kta ce.

20 Unkan najin hiyaye ca atkuku kin ekta hda. Tuka nahahin itehan atkuku wanhdake ca onšikida, qa ekta inyang ye ca, poskin hduze ca i itputaka.

21 Unkan cinhintku kin heciya; Ate,mahipiya kin en qa niye nitokam wawahtani; qa detanhan cincamayaye kta iyemacece šni ce.

22 Tuka atkuku taokiye kin hewicakiya; Šina iyotan wašte kin he aupi qa inkiya po; qa mazanapcupe wan nape kin en iyekiya po, qa hanpa ohekiya po:

23 Qa ptejicadan cemyapi kin he den aupi qa kte po; wauntapi qa unkiyuškinpi kta ce:

24 Micinkši kin de ta, tuka kini; tannin šni, tuka iyeyapi ce, eya. Unkan hinnakaha wiyuškinpi.

25 Tuka cinhintku tokapa qon he magata un; unkan ti kiyedan ku hehan dowanpi qa wacipi nahon.

26 Unkan ookiye wanji kipan, qa token he kapi hecinhan he iwanga.

27 Unkan heciya; Nisunka hdi; unkan ni un, qa zaniyan hdi kin on etanhan niyate ptejicadan cemyapi qon he kikte ce, eya.

28 Unkan hecen šihda, qa tin kihde wacin šni: hehan atkuku kin tankan hiyu, qa cekiya.

29 Unkan waayupte ca atkuku kin heciya; Wanyaka wo, wanna waniyetu ota ociciye ca tohinni nioie kawape šni; hececa ešta kodawicawaye cin om wimduškin kta e tacincadan wan tohinni mayaqu šni.

30 Tuka nicinkši witkowinpi kin om woyuha nitawa kin temniciye cin de hdi ca, wancake ptejicadan cemyapi kin he yecicata ce, eya.

31 Unkan heciya; Cinš, ohinniyan mici yaun, qa taku mitawa kin he iyuhpa nitawa.

32 Nisunka kin de ta, unkan kini; tannin šni, unkan iyeyapi kin, on etanhan ito cante unwaštepi, qa unkiyuškinpi kte cin he hecetu ce.

LUKAS WICOWOYAKE 16.

1 Hehan waonspewicakiye cin hewicakiya; Wicašta wijica wanji waawanyake wan yuha; unkan he yuhe cin woyuha tawa yutakuni šni ce, keya okiyakapi.

2 Hehan kico qa heciya; Taku eniciyapi kin de toketu he? waawandake cin ito ohdaka wo; wanna waawandake cin aduštan kta ce.

3 Unkan waawanyake cin cante mahen heya; Token eeamon kta he? waawanmdake cin he mayuhe cin imicicu; mahqapi kin owakitpani, qa timatayapi kin he imašteca.

4 Taku ecamon kte cin he sdonwakiya, heon tohan waawanmdake cin he etanhan heyata iyemayanpi kinhan, tipi kin en tin hiyumayanpi kta ce.

5 Unkan hecen yuhe cin tona ikicazopi qon owasin wicakico, qa tokaheya kin he heciya; Mayuhe cin tona nahahin yecu šni he?

6 Unkan, Wihdi iyutapi opawinge ce, eya. Unkan heciya; Koyahanna wowapi nitawa kin ehdaku, qa iyotanke, ca wikcemna zaptan e okiwa wo.

7 Unkan wanji tokeca hehan heciya; Qa niš tona nahahin yecu šni he? Unkan, Aguyapisu iyutapi opawinge ce, eya. Unkan heciya; Wowapi nitawa kin ehdaku, qa wikcemna šahdogan e okiwa wo.

8 Unkan yuhe cin waawanyake owotanna šni kin ya onihan, okiksamya econ kin heon etanhan: maka kin de cincapi kin iwicacage cin en iyoyanpa cinca kin isanpa ksapapi ece.

9 Unkan miš heciciyapi; Woyuha owotanna šni kin on tawašitku icicaga po; hecen tohan niye onicihipi šni kinhan, iye tipi owihanke kte šni en tin hiyuniciyapi kta ce.

10 Tuwe taku iyotan cistinna on wicaka hecinhan, hee taku ota nakun on wicaka ece; qa tuwe taku iyotan cistinna kin on owotanna šni hecinhan, hee taku ota kin nakun on owotanna šni ece.

11 Hecen woyuha owotanna šni kin he on wicayakapi šni ehantanhan, wicake cin he tuwe ecin yuheniciyapi kta he?

12 Qa wicašta tokeca taku tawa kin on wicayakapi šni ehantanhan, niye nitawapi kin hee tuwe ecin nicupi kta he?

13 Ookiye kin tuwedan yuhe cin nonpa en wowidagiciye kta okihi šni; wanji šicedake kta, qa unma iš waštedake kta; qa is wanji en iyaihdaške kta, qa unma kin iš ekta ewacin kte šni. Wakantanka qa mammon napin en wowidagniciyapi kta oyakihipi šni ce

14 Unkan Pharisee kin wakonpi kin, hena owasin nahonpi; qa wowihayapi.

15 Unkan hewicakiya; Wicasta kin wicitokam ihdaowotanpidan kin he niyepi; tuka Wakantanka nicante ozepi kin he sdonniyanpi ce: ecaeš wicašta ekta taku takudapi hince cin hee Wakantanka wahteda šni ece.

16 Woope qa wicašta wokcan kin hena Johannes hehanyan; tuka hetanhan Wakantanka tokiconze kin oyakapi ece, qa owasin en opapi kte hinca.

17 Mahpiya maka ko tokan iyaye kte cin he aoptetu, qa woope oowa wanjidan kaeš yuecetupi kte šni kin hee tehika ce.

18 Tuwe tawicu ehpekiye ca wanji tokeca yuze cinhan, hee wawicihahapi econ ece: qa hihnaku ehpeye ciqon he tuwe yuze cinhan he wawicihuliapi econ ece.

19 Wicašta wanji wijica, he wokoyake stan qa minihuha zimzipedan ece koyaka, qa an- petu oioiyohi wiyuškinyan un.

20 Nakun wicašta walipanica wan Lazarus eciyapi, he tatiyopa kin en ahionpapi, tancan owancaya hdihdi;

21 Qa wicašta wijica wahna wotapi tawa kin etanhan ošnašna hinhpaye cin hena yunkiyapi kta cin. Tuka šunka kin en ahi, qa ohdihdi kin sdipapi.

22 Unkan wahpanica kin he ta; qa mahpiya ohnihde kin Abraham maku kin ekta ayapi. Wicašta wijica qon iš eya ta, qa hapi.

23 Unkan wakan šice tipi kin en kakiš yanke cehan, wankan etonwe, ca tehan tanhan Abraham wanyaka; qa maku kin ohna Lazarus yanka.

24 Unkan heya niyan; Ate Abraham, onšimakida qa Lazarus u ši wo, napsukaza inkpa kin mini en oputkan qa ceji makasni kta; oide kin de ohna makakija ce.

25 Tuka Abraham heya; Cinš, yani qon he ehan taku waštešte yahduha, qa Lazarus taku šikšica yuha, he kiksuya wo; tuka nakaha iye kicanptapi qa niye kakišniyanpi.

26 Qa nakun unkiyotahedan kaksiza wan tanka yanka; hecen tona deciya tanhan niye ekta ye wacinpi keš okitpanipi ece; qa nakun heciya tanhan den ekta unhipi kta okitpanipi ece.

27 Hehan heya; Heon ate, ceciciya ce, ate ti kin ekta ye yaši kta;

28 Misunka zaptan, hena wowicakiyake kta; iš eya okinni wokakije kin de en upi nun ce.

29 Abraham heciya; Moses qa wicašta wokcan kin hena yuhapi; hena iš anawicagoptanpi ešta šni.

30 Tuka heya; Hiya, ate Abraham: tuka tapi kin eciyatanhan wanji ekta wicai unkanš, ihduecetupi kta tuka.

31 Unkan heciya; Moses qa wicašta wokcan kin hena anawicagoptanpi šni ehantanhan, tapi kin eciyatanhan wanji kini qeyaš, nakun wicadapi kte šni ce, eya.