Lukas 21-22

Hello again all, just wanted to let you know that Wakantanka is moving this right along. Although this is only our second pass, we are trying to make sure that the spelling gets standardized and that it is all correct- that will happen mostly on the third pass. However, since the work has not been accessible for so long to the Lakota people, we are just trying to get it into the open so it can be worked with. Love to y'all!

LUKAS WICOWOYAKE 21.

1 Unkan wankan etonwe, ca wicašta wijicapi kin womnaye opiye kin en taku wicaqupi kin ehpeya ayapi wanyaka.

2 Unkan wiwazica wanji wahpanica kin iš mazašadan nonpa en ehpeya c wanyaka.

3 Unkan heya; Awicakehan heciciyapi, Wiwazica wahpanica kin de išnana ota en ehpeya ce.

4 Dena owasin taku iwicakiciyaye cin hee Wakantanka taku qupi kin en ehpekiyapi ece; tuka iye taku ton šni, etanhan taku on ni kte cin ocowasin en ehpeya ce.  

5 Unkan apa iš tipi wakan kin inyan waštešte, qa taku wicaqupi kin on ayucopi kin, he cajeyatapi qehan, heya;

6 Anpetu hiyohi kta, en taku wandakapi kin dena inyan nonpa icitakihna wanke šni ehpeyapi kta ce.

7 Hehan wiwangapi, qa heyapi; Waonspekiye cin, tohan kinhan hena hecetu kta he? qa hena hecetu kte cin wanna iyehantu kinhan, taku on sdonyapi kta he?

8 Unkan heya; Ihnuhan nihnayanpi kinhan; wicota micaje kin on upi qa, He miye Messiya, qa wanna ecadan iyehantu kta ce, eyapi kta: tuka wicihakam yapi šni po.

9 Tuka okicize owodutatonpi ko cajeyatapi nayahonpi kinhan, nihinciyapi šni po; ito tokaheya hena hecen hiyohi kta iyececa, tuka owihanke kin hinyahinke kte šni ce.

10 Hehan hewicakiya; Oyate wan oyate tokeca azuye kta, qa wokiconze wan wokiconze tokeca on inajin kta:

11 Qa otakiya maka kin nina škanškan, qa wicaakihan, qa makošikšice, qa wowanyake wokokipe, qa mahpiya kin eciyatanhan wowapetoktokeca, hena hecekcen yuke kta ce.

12 Tuka taku kin dena owasin itokaptu, micaje kin on etanhan iyanihpayapi, qa šicaya nicuwapi, qa omniciye tipi, kaška wicahnakapi tipi ko en aniyanpi, qa wicaštayatapi wicašta iwicadakapi kin ko wicitokam aniyanpi kta ce:

13 Unkan hecen on oniyakapi ece e kta.

14 Hecen icantekicun po; token waaduptapi kte cin he kanyehan awacinpi šni po:

15 Wicai wicoksape ahna cicupi kta, hecen tokaniyanpi kin tuwedan taku iennihdepi kte šni, qa iyakapeniyanpi kte šni.

16 Tuka hunkake wicayayapi, qa hunkawanjin wicayayapi, qa takuwicayayapi, qa koda wicayayapi kin, hena e wiyopeniyanpi kta; qa apa teniyanpi kagapi kta ce:

17 Qa micaje kin on etanhan owasin niciyušepi kta.

18 Tuka paha wanjidan kaeš awinitukapi kte šni ce.

19 Wacinnitankapi kin on nicantepi kin hduha po.

20 Jerusalem ihdukšan ozuye yankapi wandakapi kinhan, ihangyapi kte cin he wanna kiyadan e sdonya po.

21 Hehan tona Juda makoce kin en unpi kinhan, he kin ekta najicapi kta; qa tona cokaya en unpi kinhan tankan inapapi kta; qa okšan makoce wanke cin tona en yakonpi kinhan, ekta hdicupi kte šni.

22 Tokiconpi anpetu kin hena ee; hecen taku token owapi qon hena owasin ecen yuštanpi kta ce.

23 Tuka anpetu kin hena en tona ihdušakapi, qa tona hokšin azinwicakiyapi kin hena wotehi wicakiciyanke kta! maka kin akan wokakije tanka kta, qa wocanniye oyate kin de en awicaun kta.

24 Qa mazasagye ope kin on wankahanpi kta; qa oyate kin owasin ektakta wayaka awicahdapi kta; qa Ikcewicašta kin Jerusalem naatinzapi kta, ecen Ikcewicašta kin taku iyewicakicihantu kta ce.

25 Anpetu wi, qa hanyetu wi, qa wicanhpi kin hena ekta wowapetokeca yuke kta; qa maka akan oyate kin yazanhdapi kta, qa wicotoketu tannin šni; qa miniwanca otaja ko sa wanke kta.

26 Wicašta kin kopa, qa maka akan taku hiyohi kte cin he ape hiyeye cin, hena on cante toki wicayanka tanin kte šni ece; mahpiya wowašake kin hena huhuzahe kta heon.

27 Hehan Wicašta Cinhintku kin mahpiya šapa wan akan, wowašake qa wookitanin tanka hduha u wandakapi kta.

28 Unkan dena decen aye cinhan, hehan wankan etonwanpi, qa pa yuwankan icu po; openicitonpi kin he wanna kiyadan u ce, eya.

29 Unkan wiyacinpi wan owicakiyaka: Suken can, qa can kin owasin, hena wanyaka po;

30 Canwapa paha eca, mdoketu wanna ikiyedan, niye cinka wandakapi, qa sdonyayapi ece.

31 Iho he iyececa, taku kin dena iyecetu wandakapi kinhan, Wakantanka tokiconze kin he wanna ikiyedan un e sdonya po.

32 Awicakehan heciciyapi, Wicoicage kin de tokan iyaye šni, ecen dena owasin iyecetu kta ce.

33 Mahpiya kin maka ahna tokan iyaye kta, tuka mioie kin e tokan iyaye kte šni ce.

34 Unkan itonicipa po; okinni tukten wotapi, qa witkopi, qa wiconi kin de awacinpi kin, hena on nicantepi kin niyušakapi kta naceca; qa hecen sdonyakiyapi šni ecen anpetu kin he nihiyohipi kte.

35 Maka ite kin akan yakonpi kin owasin wohmuke wan iyecen wicahiyohi kta ce.

36 Heon ohinniyan wakta po, qa cekiya po; hecen taku hiyohi kte cin dena owasin icunom idadapi, qa Wicašta Cinhintku kin itokam nayajinpi kta iyececa niyawapi kta ce.

37 Unkan anpetu icunhan tipi wakan kin ohna waonspekiya un; qa hanyetu hehan tankan hdicu, qa paha wan Olive eciyapi kin he en yanka.

38 Unkan hanhanna hinca oyate kin owasin oie nahonpi kta e tipi wakan kin en ahi.

LUKAS WICOWOYAKE 22.

1 Unkan aguyapi napohyapi šni yutapi Woacaksin eciyapi kin, he wanna ecadan iyehantu kte.

2 Unkan wawayušnapi itancanpi, qa wowapi kagapi kin, hena token econpi, qa teyapi kte cin he akitapi; tuka oyate kin kowicakipapi.

3 Unkan akenonpapi kin etanhan, wanji Judas Iskariot eciyapi kin he Satan tancan mahen iyaya.

4 Unkan he ekta ye ca, wawayušna  itancanpi, qa akicita itancanpi kin hena om wohdaka, token econ qa wicaqu kte cin heon.

5 Unkan iyuškinpi, qa mazaska qupi kta keciyapi.

6 Hecen wicada, qa wicota kin en unpi šni icunhan wicaqu kta akita.

7 Unkan aguyapi napohyapi šni anpetu en woacakšin ktepi kte cin wanna hehantu.

8 Hehan Inyan qa Johannes ye wicaši qa heya; Ya po, woacakšin untapi kte cin he wiyeya unkicihnaka po.

9 Unkan heciyapi; Tukten wiyeya unhnakapi kta yacin he?

10 Unkan hewicakiya; Otonwe kin en yaipi kinhan, wicašta wan wakiškokpa mini ohnaka yuha itkonicipapi kta; iho, iye tukten tin kihde cinhan, iyahna ya po.

11 Qa tipi tawa kin heciya po; Waonspekiye cin heniciya ce; Wotapi tipi ohna Woacakšin kin he waonspewicawakiye cin om wate kte cin he tukte e he?

12 Kinhan, wankan tipi wan tankaya, qa ayucopi e nicipazopi kta; hen wiyeya hnaka po, eya.

13 Unkan iyayapi, qa token ewicakiye ciqon ecen iyeyapi; qa Woacakšin wiyeya hnakapi.

14 Unkan wanna iyehantu qehan, en iyotanka, qa wahošiyapi akenonpapi kin nakun.

15 Unkan hewicakiya; Makakije kte cin he itokamya Woacakšin kin de untapi kte cin nina wacin qon.

16 Qa heciciyapi ce; Tohan Wakantanka tokiconze kin ekta yuecetupi šni kin, hehanyan detanhan ake wate kte šni ce, eya.

17 Unkan miniyatkan kin he icu, qa wopida eye ca heya; De icupi qa kicipamni po:

18 Qa heciciyapi ce; Wakantanka tokiconze kin he tohan hiyohišni kin, hehanyan hastanhanka iyuwi waskuyeca kin etanhan mdatke kte šni ce, eya.

19 Unkan aguyapi kin icu, qa wopida eye, ca yušpašpa, qa wicaqu, qa heya; Mitancan niyepi on qupi kin he dee ce; decen miksuya econ po.

20 Unkan miniyatkan kin iš eya wotapi iyohakamya wicaqu, qa heya; Mawe niyepi kin on papsonpi kin, en okodakiciye teca kin, miniyatkan kin he dee ce.

21 Tuka iho, wiyopemaye

kte cin he nape kin wahna wotapi kin akan miciun.

22 Unkan Wicašta Cinhintku kin token kiconzapi qon ecen ye kta e hecetu; tuka tuwe he wiyopeya hecinhan he wicašta kin wotehi kiciyanka ce!

23 Unkan hinakaha iye iyakitedan tukte wanji hecon kte cin he ikiciwanh yeyapi.

24 Unkan tukte wanji iyotan yawapi kte cin he nakun hdokinicapi.

25 Unkan hewicakiya; Oyate kin wicaštayatapi wicayuhapi kin hena iš iwicadakapi, qa tona wicookihiya owicakihanyanpi kin hena ohanwaštepi, ewicakiyapi ece.

26 Tuka niš henicecapi kte šni; tuka niyepi kin ekta tukte wanji tokapa kinhan, hee hakakta kin iyecece kta ce.

27 Wota yanke cin, qa wayutankiyapi kin, hena unma tukte iyotan tanka he? Tuwe wota yanke cin hee šni he? Tuka miš wayutankiyapi kin he iyecen cicipi waun ce.

28 Wawiyutanmayanpi kin en kici maunpi kin he niyepi:

29 Heon Atewaye cin he wokiconze wan maqu kin he iyecen cicupi:

30 Qa hecen wokiconze mitawa kin en, wahna wotapi mitawa kin ekta wayatapi, qa wadatkanpi kta; qa wicaštayatapi oyanke kin heca akan idotankapi kta, qa Israel wicoun akenonpapi kin wicadacopi kta ce.

31 Hehan Itancan kin heya; Simon, Simon, iho, Satan niyuhe ca, aguyapi su iyecen niyucan kta e cin tuka ce.

32 Tuka wacinyaye cin he iyotpani kte šni e wocekiye eciciya; qa tohan niš niyuhomnipi kinhan, nihunkawanji wicahduwašaka wo, eya.

33 Unkan heciya; Itancan, wicokaške wiconte ko en nici mde kta wiyeya waun ce.

34 Unkan heya; Simon, anpetu kin de anpaohotonna hoton šni, ecen yamni akihde sdonmayaye cin he anayakihbe kta, eciciya ce.

35 Unkan hewicakiya; Mazaska ojuha, qa wojuhadan, qa hanpa, hena codan yecišipi qon he ehan, taku wanjidan kaeš iniciyotpanipi he? Unkan, Takudan šni ce, eyapi.

36 Hehan hewicakiya; Tuka nakaha tuwe mazaska ojuha ton kinhan, ehdaku kta; qa wojuhadan nakun: qa tuwe mazasagye nice cinhan, wokoyake tawa kin wiyopekiye, ca wanji opeton kta.

37 Taku wowapi en kagapi qon, Wicohan šica econpi kin om yawapi ce, eyapi kin he miye en yuecetupi kta, eciciyapi: Unkan dena miye on ecen econpi kta ce.

38 Unkan heciyapi; Itancan, wanyaka wo, den mazasagye nonpa ce. Unkan, Henakeca ce, ewicakiya.

39 Unkan tankan hdicu, qa Olive paha kin ekta i ece qon, he ake ekta ya; unkan waonspewicakiye cin iš iyahna yapi.

40 Unkan wanna ehan i qehan, hewicakiya; Wowiyutanye kin en idadapi kte šni e cekiya po.

41 Hehan wicicunonpa inyan ekta ehpeyapi kin hehanyan ecen i, qa canpeška makehde inajin qa cekiya,

42 Qa heya; Ate hecen nitawacin kinhan, miniyatkan kin de tokan imiciyaye kta; tuka miye mitawacin kin hee šni, niye nitawacin kin hee ecen econpi nunwe.

43 Hehan mahpiya eciyatanhan ohnihde wan en hi qa yuwašaka.

44 Unkan nina hin yazanhda qehan, iyotan wokitanyan cekiya; qa temni kin he we ošbuye tankinkinyan inakata hinhpaya se ececa.

45 Unkan cekiye cin hetanhan wanna najin hiyaye, ca waonspewicakiye cin en wicahdi qehan, wacin iyokišicapi kin on ištinmapi  iyewicaya.

46 Qa hewicakiya; Tokeca ništinmapi he? najinpi qa cekiya po; hecen wowiyutanye kin en yaipi kte šni.

47 Hena hecen eya icunhan, iho, wicota, qa akenonpapi kin etanhan wanji Judas eciyapi kin, he wicitokam u, qa Jesus i iputake

kta e ikiyedan hiyu.

48 Tuka Jesus heciya; Judas, Wicašta Cinhiutku kin i iputakapi wan on wicayaqu he?

49 Unkan kici unpi qon hena, taku toketu kte cin wanna wanyakapi qehan heciyapi; Itancan, mazasagye on waaunpapi kta he?

50 Unkan wanji wawayušna itancan taokiye wanji ape, ca etapa kin eciyatanhan noge kin kašpa.

51 Unkan Jesus waayupte ca, Hehanyan iyowinmakiya wo, eye ca noge yutan, qa asniyan.

52 Hehan Jesus wawayušna itancanpi, qa tipi wakan kin en itancanpi, qa tokapapi en au qon, hena hewicakiya; Mazasagye can ko yuha wamanon sa wan tatpe yapi se iyecen yahipi he?

53 Anpetu iyohi tipi wakan kin ohna opeya ciunpi qon ehan, tuwedan nape kin itkom hiyumayakiyapi šni; tuka dehan nakaha kin he niye nitawapi, qa otpaza wowašake kin, eya.

54 Hehan yuzapi qa ayapi, qa wawayušna itancan ti fcin ekta aipi. Unkan Inyan itenan ihakam u.

55 Unkan itankan tipi kin en cokaya cetipi, qa ptaya iyotankapi qehan, Inyan iš eya wicehna iyotanka.

56 Tuka petkahda iyotankehan yanke cin, hehan wikoška wan wanyake ca, opahte ca heya; Wicašta kin de iš eya he kici un tuka ce, eya.

57 Unkan anakihbe, ca, Winohinca, he tuwe kin sdonwaye šni ce, eya.

58 Unkan iecadan wanji tokeca wanyake ca heya; Niš eya henitanhan ce. Unkan Inyan heya; Wicašta, hematanhan šni ce.

59 Unkan iyohakam wihiyayedan oape wanji ecetu, hehan wanji tokeca yaatinze ca heya; Galilee wicašta kin de heca, on etanhan awicakehan iš eya he kici un tuka ce.

60 Unkan Inyan heya; Wicašta, token ehe cin he sdonwaye šni ce. Unkan hecehnana, iahan icunhan, anpaohotonna kin hoton.

61 Unkan Itancan kin ihduhomni, qa Inyan atonwan. Hehan Itancan kin, Anpaohotonna hoton šni kin itokam yamni akihde anamayakihbe kta ce, eye ciqon, oie kin he Inyan kiksuya.

62 Hehan Inyan tankan kihde ca nina hin ceya.

63 Unkan wicašta Jesus yus unpi kin hena ihahapi qa apapi.

64 Qa ite kin akahpetonpi hehan, ite kin ohna apapi, qa heya iwangapi: Tuwe anipa hecinhan ito iyukcan wo.

65 Qa taku toktokeca ota itkom waoštehdaya eciyapi.

66 Unkan wanna anpao qehan, oyate kin en tona tokapapi, qa wawayušna itancanpi, qa wowapi kagapi kin, hena mniciyapi, qa omniciye kin en aupi;

67 Qa heyapi; Messiya he niye? unkokiyaka po. Unkan hewicakiya; Ociciyakapi ešta wicayadapi kte šni.

68 Qa wiciwangapi ešta amayaduptapi kte šni, qa amayaduštanpi kte šni.

69 De iyohakam Wicašta Cinhintku kin Wakantanka towašake etapa kin eciyatanhan iyotanke kta ce, eya.

70 Unkan owasin heyapi; Hecen Wakantanka Cinhintku kin he niye he? Unkan, He miye kehapi ce, ewicakiya.

71 Unkan heyapi; lye i kin eciyatanhan unkiyepi hinca wanna naunhonpi ce; hecen tokeca ecin sanpa wayaotaninpi unkodepi kta he?