Ohanyanpi (Acts) 1-2

YEWICAŠIPI KIN OHANYANPI QON.

WICOWOYAKE 1.

1 Theophilus, wicoie tokaheya wakage cin he en Jesus tokaheya taku econ qa waonspekiye cin omdaka;

2 Tona wicakahnige ca yewicaši qon hena Woniya Wakan kin eciyatanhan wahokonwicakiye cin iyohakam, anpetu wan en wankan eyakupi kin hehanyan.

3 lye kakije cin iyohakam hena eqe en ni un taniniciya, woyuotanin ota on, anpetu wikcemna topa hehanyan wanyagiciya, qa Wakantanka tokiconze taku tawa kin cajehdata ece;

4 Qa mniciyapi kin en owicapeya un qehan, Jerusalem etanhan ye šni wicaši, qa Ateyapi kin wahowicaye ciqon he apepi kta; He miye eciyatanhan nayahonpi ce;

5 Awicakehan Johannes mini on baptem wicaqu, tuka tokata anpetu tonana ihan, hehan Woniya Wakan on baptem nicupi kta ce, eya.

6 Unkan hena witaya yukanpi hehan, Itancan, wanna dehantu Israel oyate wokiconze kin piya wicayaqu kta he? eya iwangapi.

7 Unkan hewicakiya; Tohanyan qa tohantu kin, Ate iye towašake kin en ekihnake cin hena sdonyayapi kta iyecece šni;

8 Tuka Woniya Wakan kin en nihipi kinhan, wowašake duhapi kta; hehan Jerusalem en, qa Juda makoce kin owancaya, qa Samaria qa maka ihanke kin hehanyan mayadaotaninpi kta ce.

9 Unkan hena hecen eye ca, wanhdakapi icunhan, yuwankan icupi; qa wanyakapi kin etanhan mahpiya šapa wan eyaku.

10 Unkan he wankan iyaye cin, mahpiya ekta etonwan yukanpi kin he icunhan, iho, wicašta nom ska ihduzapi en wicikiyadan najinpi;

11 Qa, Galilee wicašta, tokeca e mahpiya ekta etonwan nayajinpi he? Jesus e qe niyepi etanhan mahpiya ekta eyakupi kin, he mahpiya ekta wankan iyaya wandakapi kin he iyecen ake u kta, ewicakiyapi.

12 Hehan Olive paha eciyapi kin hetanhan Jerusalem ekta icicawin hdapi; he Jerusalem ikiyedan, anpetu wakan oicimani wanji ecetu.

13 En hdipi qa wankan tipi wanji tin iyayapi qa hen iyukanpi, Inyan, qa Jakob,qa Johannes, qa Andrew, Philip, qa Thomas, Bartholomew, qa Mattheos, Jakob Alpheus cinhintku, qa Simon Zelotes, qa Judas Jakob sunkaku:

14 Hena owasin tawacin wanjidan wocekiye eyapi qa kida yukanpi, winohinca kin hena om, qa Mary Jesus hunku, qa iye hunkawanjinwicaye cin hena koya.

15 Unkan anpetu kin hena en Inyan ookiye unpi kin wicacokaya najin, (wicacaje owasin opawinge sanpa wikcemna nom wicayawapi;)

16 Qa heya; Wicašta hunkawanjinciyapi, Judas tona Jesus iyahpayapi qon en mdetahunka kin he on, ehanna Woniya Wakan, David i kin eciyatanhan, ie ciqon, wowapi en kagapi kin, he ecetuyapi kta hunšte.

17 He iye unkiyopeyapi yawapi, qa wicohtani kin de en opa tuka.

18 Unkan wicašta kin he woahtani iyunwin kin maga wan iyopekiye ca, ehna makata ihpaya, unkan tancan kin kamdas ihpaye ca, šupe kin owasin tankan hiyu.

19 Tona Jerusalem en yakonpi sa owasin he sdonyapi; qa heon maga kin he iye iapi kin eciyatanhan, Akeldama eciyapi, he We Maga, eyapi.

20 Odowan wowapi kin en kaken kagapi; He tukten ti qon hewoskan yanke ca, tuwedan ohna ti šni nunwe; qa, Awanhdakapi wicohan yuhe ciqon he tuwe tokeca icu kta.

21 Heon etanhan wicašta kin dena ohinniyan om unyakonpi, Jesus Itancan kin unkopapi, ti mahen i, qa tankan ye cin,

22 Tokaheya Johannes baptem wicaqu qon hetanhan, anpetu kin en unkiyepi etanhan wankan eyakupi kin hehanyan, hena etanhan, piya ikicage cin, wanji unkiyopeyapi oyaka ece e kta, eya.

23 Unkan nom najinwicakiyapi, Joseph Barsabas eciyapi, he, Justus, eya caštonpi, qa Matthias.

24 Hehan cekiyapi qa heyapi; Itancan niye wicacante owasin sdonya nanka, wicista kin dena unma tukte yakahnige cin he yutanin wo;

25 Ookiye wicohan qa yewicašipi kin de en ope kta, Judas iye oyanke tawa kin ekta hde kta e etanhan hinhpaye cin he.

26 Hehan woohiye ehpekiyapi, unkan woohiye kin Matthias ahinhpaya; qa hecen yewicašipi akewanjipidan kin owicapeya yawapi.

OHANYANPI QON WICOWOYAKE 2.

1 Anpetu Iwikcemna Zaptan kin wanna iyehantu, unkan owasin tawacin wanjidan witaya yukanpi.

2 Hehan ihnuhanna, tate wan wašagya uye cin he iyecen, oqo wan mahpiya kin eciyatanhan hiyu, qa tipi ohna yukanpi kin ocowasin ojudan.

3 Unkan wicaceji, peta se ececa, en wicatanin, qa otoiyohi kicipamnipi kin en awicahan.

 4 Unkan owasin Woniya Wakan kin on ojupidan qa wicaceji toktokeca on iapi, Woniya Wakan ie wicakiye cin he iyecen.

5 He ehan wicašta owotanna Juda wicašta kin hecapi, mahpiya ihukuya ovate hiyeye cin etanhan Jerusalem en tipi.

6 Wicaho kin de otanin, unkan wicota en mniciyapi qa inihanpi, otoiyohi iye iapi tawapi kin on, hena ia yukanpi he nakihonpi kin heon.

7 Owasin inihanpi qa yušinyayapi qa otoiyohi hekiciyapi; Tona ia yukanpi kin hena owasin Galilee wicašta kin hecapi šni he?

8 Token on otoiyohi iapi kin yuha untonpi kin hena ia nawicunhonpi he?

9 Parthia qa Mede qa Elamite, qa Mesopotamia en tipi qon, Judea makoce kin en, qa Cappadocia en, Pontus qa Asia en;

10 Phrygia qa Pamphylia en, Egypta qa Libya makoce kin en, Cyrene ihdukšan, Roma oyate kin etanhan, Juda wicašta, qa en opewicakiyapi qon,

11 Crete qa Arabe kin heuncapi, Wakantanka taku tanka econ kin, unkiye unkiapi kin eciyatanhan, hena ia oyakapi kin naunhonpi ce, eyapi.

12 Owasin inihanpi, qa yušinyayapi, qa otoiyohi hekiciyapi; De taku kapi hwo.

13 Qa wanjikši ihahapi qa; Dena miniša skuya on imnanpi ce, eyapi.

14 Tuka Inyan ake wanjipidan kin om najin, ho yuwankan icu, qa hewicakiya; Juda wicašta, tona Jerusalem en dukanpi ko, owasin he de sdonyapi, qa mioie kin anagoptan po.

15 Niye hecannipi kin hecetu šni, wanna anpetu kin en yamni ape cin hehantu, heon wicašta kin dena witkopi šni.

16 Tuka Joel wicašta wokcan oyake ciqon he dee.

17 Unkan anpetu ihankeya kin en, (Wakantanka eya,) mitaniya kin wicacehpi owasin awicawakaštan kta; unkan nicinkšipi nicunkšipi ko wokcanpi kta, qa koška nitawapi kin wowanyake kin wanyakapi kta, qa wicahinca nitawapi kin wowihamde ihamnanpi kta ce.

18 Anpetu kin hena en wicašta taokiye, qa winyan taokiye mitawa kin, hena en mitaniya awicawakaštan kta, qa hena e wokcanpi kta.

19 Unkan wankan mahpiya kin ekta taku on yušinyayapi wicawaqu kta, qa kuya maka kin akan wowapetokeca kin, we qa peta qa šotoju.

20 Itancan taanpetu tanka wowinihan kin he hi šni itokam, anpetu wi kin otpaza icu kta, qa hanyetu wi kin iš we icage kta.

21 Unkan hehan tuwe Itancan caje kin hoyekiye cinhan he nikiyapi kta ce.

22 Israel wicašta, wicoie kin de nahon po; Jesus Nazareth etanhan qon, wicašta wan niyepi kin ekta, Wakantanka hdutanin qon, wicowašake, taku on inihanpi, qa wowapetokeca niyepi cokaya Wakantanka econ kiye ciqon hena e niye sdonyayapi.

23 He qe Wakantanka atayedan wakiconze ca, iye osdonye kin eciyatanhan qupi qon, he iyacupi, qa nape šikšica on icipaweh oyakatanpi, qa yaktepi.

24 Hee Wakantanka ekicetu yc ca, wiconte icaške kin kiyuška, en yuhapi kta okihipica šni nakaes.

25 David he ke ca, kaken eya; Ohinniyan mitokam Jehovah wanmdaka, mietapa kin ekta yanke, heon pahoho šni waun kta.

26 Heon micante kin iyuškin, qa miceji kin ipsica; qa micehpi kin woape en wanke kta.

27 Minagi kin he Hades ekta ehpemayakiye šni, qa Wanji Wakan nitawa kin he wicahwin wanyake kta e on yaqu kte šni.

28 Wiconi canku kin sdonye mayaye kta; qa niite kin etanhan wowiyuškin on imnamayaye kta.

29 Wicašta qa hunkawanjinciyapi, David hunkakeyapi un kin he eciyatanhan taninyan ociciyakapi kta; he te ca hapi, qa anpetu kin dehanyan ohna hnakapi kin unkicipi wanka.

30 He wicašta wokcan kin heca, qa Wakantanka wokonze on konza, wicacehpi eciyatanhan iye tancan aicage kte cin he etanhan Messiya, iye oiyoianke kin akan iyotanke kta e icahye kta he sdonya.

31 Hecen tokaheya tanhan he wanyake ca Messiya ekicetuyapi kin he cajeyata, nagi kin Hades ekta ehpekiyapi kte šni, qa cehpi kin wicahwin wanyake kte šni.

32 Jesus iye qe Wakantanka ekicetuye cin he unkiyepi owasin unyaotaninpi ece.

33 He Wakantanka etapa kin ekta yuwankan icupi, qa Atkuku kin Woniya Wakan iwahoye ciqon he icu, heon nakaha taku wandakapi qa nayahonpi kin he akaštan.

34 David e qe malipiya ekta wankan iyaye šni, tuka kaken eya; Jehovah Itancan mitawa kin kaken eciya, Mietapa kin eciyatanhan iyotanka wo,

35 Tona toka niye cin hena nisiha oahe kin ewahuake kte cin hehanyan.

36 Heon etanhan, Israel tiyohnaka owasin, de tanyan sdonya wo, Jesus icipaweh oyakatanpi qon, hee Wakantanka Itancan qa Messiya kaga ce.

37 He nahonpi unkan cante kin ekta iyoyakapi, qa Inyan qa yewicašipi unmapi kin om, Wicašta qa hunkawanjin unniyanpi token econkupi kta he? ewicakiyapi.

38 Hehan Inyan hewicakiya; Ihduecetu po, qa woahtani nicicajujupi kta e on Jesus Messiya caje kin on baptem nicupi kta; kinhan Woniya Wakan itunicihhanpi kin he iyacupi kta.

39 Wahoyapi kin de niye nitawapi, qa nicincapi, qa tona itehanyan yukanpi kin owasin, tona Itancan unkita Wakantanka kin wicakico kte cin hena tawapi ce, eya.

40 Qa wicoie tokeca ota on wicakiyatanin, qa wahokonwicakiye ca heya; Wicoicage šice cin de etanhan niiciya po.

41 Unkan tona oie kin iyuškinyan icupi kin hena baptem wicaqupi; hecen anpetu kin he en wicanagi kektopawinge yamni en opapi.

42 Qa yewicašipi kin taku onspewicakiyapi kin en katinyan opapi ece, qa om taku yuhapi, aguyapi kiyušpapi qa wocekiye eyapi kin en ece unpi.

43 Unkan wicašta owasin nina yušinyayapi; unkan yewicašipi kin taku wakanyan econpi qa wowapetokeca ota econpi ece.

44 Unkan tona wicadapi kin hena owasin witaya yukanpi, qa taku owasin ptaya yuhapi.

45 Qa tona maga qa woyuha yuhapi kin hena e wiyopekiyapi, qa otoiyohi cinpi kin iyecen owasin wicakipamnipi.

46 Qa anpetu otoiyohi, tawacin wanjidan, tipi wakan kin ohna yukanpi, qa tipi iyaza aguyapi kiyušpapi, wowiyuškin cante okonwanjidan ko yuha taku yutapi icupi.

47 Wakantanka yatanpi, qa oyate kin owasin en wowašte yuhapi. Unkan Itancan kin tona nipi kte cin heca, anpetu otoiyohi, okodakiciye kin en ope wicakiya.