OHANYANPI QON WICOWOYAKE
25.
1 Unkan Festus
makoce kin he en hiyotanke cin, iyohakam anpetu yamni, hehan Cæsarea etanhan
Jerusalem ekta itawankanhde iyaya.
2 Unkan wawayušna
itancan qa Juda wicašta tokapapi kin, Palos on okiyakapi qa cekiyapi;
3 Cinkiyapi,
Jerusalem ekta Palos au wicakiye kta, qa iyepi kin nahmana ktepi kta e tahepi
iyapepi kta.
4 Tuka Festus,
Palos Cæsarea ekta awanyakapi kta, qa iye kin ecadan ekta hde kta, keya.
5 Qa niyepi kin
etanhan tona wašakapi kinhan, apamahde om mde kta, qa wicašta kin he taku en un
kinhan wiyaonpapi kta ce, eya.
6 Unkan anpetu
šahdogan, kaeš wikcemna hena om un kin, hehan Cæsarea ekta hda, qa ihanhanna
qehan woyaco oiyotanke kin akan kiyotanke cin, hehan Palos en au wicaši.
7 He en hi,
unkan hehan Juda wicašta Jerusalem etanhan hipi qon hena ihdukšan najinpi, qa
wiyaonpapi tanka ota Palos en aupi, tuka yaecetupi okihipišni.
8 Hehan iye
wohdaka; Juda oyate wicoope hduhapi, qa tipi wakan kin en, qa nakun Cæsar en
takudan wawahtani šni ce, eya.
9 Tuka Festus
Juda oyate kin iyokipi wicaya cin, heon talos ayupte ca heciya; Jerusalem ekta
de ca, heciya mitokam dena on niyacopi kta tawatenyaya he? eya.
10 Hehan Palos,
Cæsar woyaco oiyotanke tawa kin en nawajin, hen mayacopi kta iyececa; Juda
oyate kin taku šice cin takudan ecawicawecon šni e tanyan sdonyaya.
11 Wawahtani,
qa taku šica on maktepi kta iyecece cin he; ecamon kinhan, mate kta tawatenwaya
tuka; tuka dena taku iyamaonpapi kin taku šni kinhan, tuwedan hena mayuhe wicakiye
kte šni. Cæsar cajemdata ce, eya.
12 Hehan
Festus, tona owicapeya wayaco iyotanke cin hena om wohdaka, hehan ayupta; Cæsar
cajedata, Cæsar ekta de kta ce, eya.
13 Unkan anpetu
tonana iyohakam, Agrippa wicaštayatapi i kin Bernice kici, Festus nape yuzapi
kta e on Cæsarea en hipi.
14 Qa anpetu
ota hen yukanpi, hehan Festus wicaštayatapi kin Palos on okiyake ca heya, Wicašta
wan Felix kaška ehnake ciqon he nahanhin ecen yanka.
15 Jerusalem
ekta wai qehan, wawayušna tankapi, qa Juda hunka wicayapi kin hena he kapi, qa
omakiyakapi, qa yacopi kta e cinpi.
16 Hena hecen
awicamdupte ca, Wicašta wan taku iyaonpapi kinhan, tona taku iyaonpeya eyapi
kin wicitokam wiyaonpapi kin en waayupte iyowinkiyapi šni kinhan, teyapi yacopi
kin he Roma wicohan šni ce, epa.
17 Heon hena
den hipi, unkan mdutehan šni, tuka ihanhanna hehan, woyaco oiyotanke kin akan
wakimdotanke ca, wicašta kin he en au wicawaši.
18 Hehan tona
taku iyaonpapi kin hena najinpi, tuka token wacami qon he iyecen takudan
iyaonpapi šni.
19 Tuka iyepi wocekiye
eyapi kin eciyatanhan wiwicawangapi kin wanjikji he en aupi, qa nakun wanji
Jesus eciyapi kin he ta, tuka ake kini kin, Palos keya ece.
20 Unkan
wiwicawangapi heca kin imdukcan šni heon, Jerusalem ekta de ca heciya dena on
niyacopi kta tawatenyaya he, eya imunga.
21 Tuka Palos
Augustus cajeyate ca, he itokam yacopi kta keye cehan, Cæsar ekta aye
wicawakiye kta hehanyan awanyag wicawaši.
22 Hehan, Miš
eya wicašta kin de nawahon kta wacin ce, Agrippa Festus eciya. Unkan iš,
Heyakecinhan nayahon kta ce, eya.
23 Unkan
ihanhanna qehan, Agrippa Bernice kici wokoyake waštešte kicun hipi, qa wanahon
tipi kin en tin ipi; qa nakun akicita tancanpi kin, qa otonwe en wicašta
tokapapi kin hena ko; hehan Festus econwicaši kin on Palos en ahipi.
24 Unkan Festus
heya, Agrippa wicaštayatapi kin, qa wicašta tona den om unkanpi kin, wicašta
kin on Jerusalem ekta, qa deciya nakun, Juda oyate kin owasin cemakiyapi qa,
Sanpa ni kta e hecetu šni ce, eya hotaninpi qon, he dee wandakapi.
25 He taku šica
econ kin, on te kte cin, takudan iyewaye šni, kaeš iye Augustus cajeyate cin,
heon ekta ayapi kta e wakonza.
26 Tuka he on,
mayuhe cin taku wecage kte cin atayedan takudan mduhe šni. He etanhan nakaha en
cicahipi, wicaštayatapi kin niye iniyotan, hecen tohan tanyan wiwangapi kinhan,
token wakage kte cin taku mduhe kta.
27 Wicašta wan
kaškapi kin he heciya aye šipi, qa wiyaonpapi kin takudan kagapi šni kinhan, he
hecetu šni imdukcan ce, eya.
OHANYANPI QON WICOWOYAKE
26.
1 Hehan Agrippa
Palos heciya, Wanna woyahdake kte cin iyowinniciyapi ce. Unkan hehan Palos nape
kin hdugate ca wohdaka.
2 Agrippa wicaštayatapi
kin, Juda oyate taku iyamaonpapi kin owasin nakaha nitokam wowahdake kte cin
heon imduškin.
3 Juda wicohan
kin wiwangapi ko owasin tanyan hdukcan nanka sdonwaya, heon etanhan. Qa hecen
ceciciya ce, wacin tanka on namahon wo.
4 Tokaheya
tanhan Jerusalem ekta mitaoyate kin om, homakšidan ehantanhan, token ohanyan
waun qon Juda wicašta kin owasin sdonyapi.
5 Token
ohoundapi ece kin owotanna hince cin en opeya waun, Pharisee hemaca, hena e
otokaheya tanhan sdonmayanpi, oyakapi cinpi unkanš.
6 Qa nakaha
Wakantanka hunkake wicunyanpi kin iwahowicaye ciqon he apepi kin on, den
mayacopi kin ecen nawajin.
7 De ekta
wicoun unkitawapi ake nonpapi kin iyohipi kta e ape yukanpi, qa anpetu hanyetu
ko cekiyapi ece. Agrippa wicaštayatapi kin, woape kin de on Juda wicašta
wimawangapi qon.
8 Wakantanka
wicate cin ake ekicetu wicaye cin he tokeca e he taku wicadapica šni kecanipi
he?
9 Miš eya Jesus
Nazareth etanhan caje kin on, taku ota kipajinyan ecamon kta iyececa kepce
ciqon.
10 Jerusalem
ekta hena hecen ecamon qon; qa wawayušna tankapi kin wowašake maqupi kin on,
wicašta owotanna kin ota wicakaška tipi kin en iyewicawaye ca. te yapi kta wicayacopi
qehan, miš eya iyecen epa ece.
11 Qa omniciye
tipi kin iyaza otakiya wicawakaštake ca, waoštehda wicawakiye ca, nina canniye
wicawaye cin heon otonwe tokeca ekta šicaya wicawakuwa.
12 He icunhan wawayušna
tankapi kin wowašake wowapi ko maqupi kin, he yuha Damascus ekta imdamda.
13 Unkan tahepi
iho, wicaštayatapi, anpe cokaya kin hehantu, iyoyanpa wan anpetu wi kin sam
iyeya wiyatpa kin he wanmdaka. he ihdukšan iyoyanpa maye ca tona om mawani kin
hena nakun.
14 Unkan owasin
makata ehpeunkiciyapi, hehan wicaho wan nawahon, Hebrew iapi on hecen emakiya, Saul,
Saul, tokeca šicaya mayakuwa he? can pesto kin nayantake cin he tehika ce.
15 Unkan miš,
Itancan, nituwe he? epa. Unkan, Jesus šicaya yakuwa kin he miye ce, eya.
16 Tuka inajin,
qa nisiha kin on najin wo; token wandake ca, tokata taku wanyag ciciye kte cin
hena en waayatanin, qa ookiye kin cicage kta e heon nakaha wanmayag ciciya.
17 Oyate kin
etanhan ecihdaku kta, Ikcewicašta kin nakun, hena e ekta nakaha ye ciši.
18 Išta
wicadumdaye ca, otpaza etanhan iyoyanpa ekta, qa Satan towašake kin etanhan
Wakantanka ekta wicaduhomni kta; qa hecen wacinmayanpi kin on wahtanipi
wicakicicajujupi kin, qa tona ska wicakagapi kin hena om woyuha yuhapi kta ce.
19 Hecen on,
Agrippa wicaštayatapi kin, mahpiya wowanyake kin he cetunwahda šni.
20 Tuka
tokaheya Damascus en yakonpi, qa Jerusalem, qa Juda makoce kin owancaya, qa
nakun Ikcewicašta kin, ihduecetupi, qa Wakantanka ekta ihduhomnipi kta, qa
ihduecetupi wicohan kin econpi kta hena hecen owicawakiyaka ece.
21 Hena on
etanhan, Juda wicašta kin tipi wakan kin ohna mayuzapi, qa maktepi kta tuka.
22 Tuka
Wakantanka omakiye cin heon anpetu kin dehanyan wani, qa tona ciqapidan tankinyanyan
ko, wicawakiyaotanin, qa wicašta wokcan kin Moses kici taku u kte cin oyakapi
qon henana owicawakiyaka ece.
23 Messiya
kakije kte ca iye tokaheya wicate cin etanhan najin kta, qa oyate kin Ikcewicašta
ko iyoyam wicaye kte cin.
24 Hena hecen
eya, unkan Festus hotankakiya ie ca, Palos niyuhnaškinyan, wowapi ota onspeniciciye
cin he wicayuhnaškinyan en iyeniyan ce, eya.
25 Tuka iye, Festus
iyotan wašte kin, mayuhnaškinye šni, tuka wowicake wicowahbadan oie kin epa ce,
eya.
26 Qa wicaštayatapi
kin iš hena tanyan sdonya, heon itokam waditagya wowahdaka, hena taku kin iye
kin anakihmanpi šni e mdukcan, okahmin en econpi šni nakaeš.
27 Agrippa wicaštayatapi
kin, wicašta wokcan kin hena wicayada he? Wicayada e sdonwaya.
28 Hehan
Agrippa Palos heciya; Kitan ecinyan Christian hemaca kta e awacinmayaya ce.
29 Unkan Palos
heya, Wakantanka cewakiya ce, niye nišnana šni, tuka tona anpetu kin de
namahonpi kin owasin, kitan ecinyan hee šni, tuka ocowasin miš waun kin iyecen
yaunpi kta, tuka icaške kin dena ope kte šni.
30 Hena hecen
eya, unkan hehan wicaštayatapi, qa wicašta itancan kin, Bernice kici, qa tona om
iyotankapi kin hena ko najnpi;
31 Qa icunom
yapi qa, Wicašta kin de taku on te kte ca, kaškapi kte cin takudan econ šni ce,
iyakitedan ekiciyapi.
32 Hehan, Wicašta
kin de Cæsar cajeyate šni unkanš kiyuškapi kta tuka, Agrippa Festus eciya.
OHANYANPI QON WICOWOYAKE
27.
1 Unkan Italia
ekta watom unyanpi kta e wanna konzapi, hehan Palos qa wicakaškapi tokeca kin,
akicita tancan wan, Augustus taobe kin etanhan, Julius eciyapi kin, he
wicayuhekiyapi.
2 Unkan wita
wata wan Adramytium etanhan, Asia makoce kin ekta tuktekten oihunni kte cin he
en unkopapi, qa pacanan iyeunyanpi, qa Aristarchus Macedonia etanhan, Thessalonica etanhan, he kici
unyanpi.
3 Unkan
ihanhanna qehan, Sidon en unkihunnipi. Unkan Julios Palos tanyan okicihan, takuwicaye
cin ekta wicai, qa hena etanhan taku yuhe kta e iyowinkiya.
4 Unkan hetanhan
pacanan iyeunyanpi, qa Cyprus ihukuya watounpapi, tatoheya unyanpi kin heon.
5 Unkan Cilicia
qa Pamphylia miniwanca kin unkihunnipi qehan, Lycia en Myra eciyapi kin he ekta
unhipi.
6 Unkan hen
wita wata wan Alexandria etanhan, Italia ekta watom ye kte cin, he akicita
tancan kin wanyake ca, he en ope unyanpi.
7 Unkan anpetu
ota iwaštedan watounpapi qa kitan se Cnidus en iyotakons unkipi, tatoheya
unyanpi nakaeš, hehan Crete ihukuya, Salmone iyotakons watounpapi.
8 Qa he kitan
se kapeya unyanpi, hehan makoce wan Oihunni Wašte eciyapi kin he en unkipi, he
Lasea otonwe kin ikiyadan.
9 Wanna anpetu
ota, qa watopapi kin okokipe aya, hamdepi tanka kin wanna enakiyapi, hehan
Palos wahokonwicakiya;
10 Qa
hewicakiya, Wicašta kin, watounpapi kte cin de on wita wata kin taku ohnaka ko
yutakunipi kte šni, qa nakun unkiyepi kin iyotanhan iyeunkiyapi kta e imdukcan
ce, eya.
11 Tuka akicita
tancan kin, wahektape cin qa wita wata tawa kin hena anawicakicigoptan, qa
Palos ie cin he wicada šni.
12 Unkan oihunni
kin he en waniyetu osan yukanpi kte cin he wašte šni, heon hetanhan yapi, qa
okihipi kinhan, Phenice ekta watom ipi, qa hen waniyetu owanji yukanpi kta,
wicota keyapi; Crete en oihunni wan itokagatanhan, wiyohpeyata ohna waziyata
etkiya huta kin yuškomya wanke cin hee.
13 Unkan okaga
tanhan tate kin iwaštedan hiyu, qa hecen token wacinpi qon wanna ecetu kecinpi,
hehan kiyuškapi qa Crete ikiyedan watopapi.
14 Tuka
iecadan, tateyanpa wan ohitike cin he en iyapa hiyu, he Euroclydon eciyapi.
15 Unkan wita
wata kin nina iyapa, hecen tatoheya yapi okihipi šni, hehan kaha iyeunyanpi
iyowinunkiyapi.
16 Unkan wita
wan Clauda eciyapi, he ikiyadan unyanpi, hehan kitan hin wata cistinna kin icu
unkokihipi.
17 He yuwankan
ehdakupi, qa icaške kin unpi, qa wita wata kin opta yuskiskitapi, hehan wiyaka šice
cin en iyohpeyapi kta kokipapi, qa heon šina on watopapi kin pahpapi qa hecen
tate on kaha iyewicayapi.
18 Qa nina
unkakihanšicapi, heon ihanhanna, hehan wata
kin etanhan taku tankan ehpeyapi.
19 Qa anpetu iciyamni
hehan, unnapepi kin on, wita wata kin en, taku wowinyunyanpi kin minin
ehpeunyanpi.
20 Unkan anpetu
ota, anpetu wi wicanhpi ko tanin šni un, qa nina unkakihanšicapi, hehan unnipi
kta unkecinpi qon he wanna unkayuštanpi.
21 Tuka tehan
takudan yute šni unpi kin, hehan Palos wicacokaya najin, qa, Wicašta kin,
anamayagoptanpi qa Crete etanhan pacanan iyeyayapi kte šni iyececa, hecen taku šice
ca wicakakije cin de nihiyahdepi kte šni tuka.
22 Qa nakaha
ceciciyapi ce, cante wašte po; tuwedan nitapi kte šni, tuka wita wata kin hecedan.
23 Wakantanka ohowada,
qa iye mayuhe cin he taohnihde ye cin hinhan en mahinajin.
24 Qa, Palos
kokipe šni wo; Cæsar itokam inayajin kta, unkan tona om watoyape cin owasin
Wakantanka nicu ce, eya ce.
25 Heon
etanhan, wicašta kin, cante wašte po; Wakantanka wicawada, token emakiye cin he
ecetu kte.
26 Tuka wita
wan en iyeunyanpi kta ce, eya.
27 Unkan otpaza
iaketopa kin, hehan Adria miniwanca kin ohna kaha iyeunyanpi kin icunhan, hanye
cokaya hehan watope wicakiyapi kin makoce wan ikiyadan upi kecinpi.
28 Qa hehan
mazasu hahonta ikoyake cin minin iyeyapi, qa akatinpi wikcemna nonpa e iyeyapi.
Hetanhan kitanna kapeya yapi, hehan ake econpi, unkan wanna akatinpi ake
zaptan.
29 Unkan imnija
kin en iyewicayapi kta e kokipapi, heon wahektapa kin etanhan maza aspeiciyapi
tom minin iyeyapi, qa anpao kta e cinpi hinca.
30 Unkan watope
wicakiyapi kin wita wata kin etanhan najicapi kta akitapi, qa wata cistina qon
he mini kin ekta yuhukun iyeyapi, watokapa tanhan maza aspeiciyapi minin iyeya
konzapi.
31 Unkan Palos
akicita tancan kin akicita ko hewicakiya; Dena wita wata kin ohna yukanpi šni
kinhan, yanipi oyakihipi kte šni ce.
32 Hehan
akicita kin wata cistina hahonta ikoyake cin bapsakapi, qa kun iyeyapi.
33 Wanna anpao
kta hehan Palos owasin taku yutapi icu wicaši, qa heya, Nakaha takudan yute šni
yaunpi anpetu iake topakin he dee, hehanyan takudan iyacupi šni.
34 Heon
ceciciyapi ce, taku yutapi icu po, on wanišakapi kta ce, paha nitawapi sukaza
wanjidan hinhpaye kte šni ce.
35 Hena hecen
eya hehan aguyapi icu, qa owasin wicitokam Wakantanka cekiye ca, kiyušpe ca
yuta.
36 Hehan owasin
cante waštepi, qa woyute icupi.
37 Unkan wita
wata kin ohna, wicanagi owasin opawinge nom sanpa wikcenina šakowin sanpa šakpe
unyakonpi.
38 Unkan taku
yutapi on imnanpi hehan wita wata kin yukapojedanpi, qa aguyapi su kin minin
ehpeyapi.
39 Unkan wanna
anpa kamdeze cehan, makoce kin iyekiyapi šni; tuka kahmin wan huta oihunni wašte
kin he wanyakapi, qa okihipi kinhan, he en wita wata kin aipi kta, keyapi.
40 Hehan maza
aspeiciyapi kin bapsag iyeyapi, qa minin ehpeyapi, qa iyupse yuza icaške kin
kiyuškapi; hehan sina watopekiyapi tanka kin yuwankan iyeyapi, qa huta kin ekta
yapi.
41 Tuka tukten
miniwanca nom kokijuya hiyu kin he en iyohpayapi, qa hen wita wata kin azi
yapi. Unkan watokapatanhan kin he sutaya ihan, tuka wahektapatanhan kin taja on
kamden iyeya.
42 Unkan
akicita kin wicakaškapi kin hena wicaktepi kta e konzapi, okinni wanjikji huta
kin ekta niwanpi, qa najicapi kta, keyapi.
43 Tuka akicita
tancan kin iš Palos nikiye kta cin kin, heon taku econpi kte cin iyowicaki šni;
qa hehan tona niwan okihipi kin hena tokaheya minin ehpeiciyapi qa huta kin
ekta niwanpi kta, keya.
44 Hehan tona
nahahin en un kin hena, hunh canmdaska akan, qa hunh iš wita wata etanhan
onšpašpadan akan iyayapi. Unkan hecen owasin huta kin ekta tanyan iyohipi.
OHANYANPI QON WICOWOYAKE
28.
1 Unkan ekta
tanyan iyohipi hehan wita kin he Melita eciyapi e sdonyapi.
2 Unkan Ikcewicašta
kin nina taku wašte ecaunkiconpi, cetipi qa otoiyohi en unkicopi, nina magaju
qa osni kin heon etanhan.
3 Unkan Palos
can cikcistina ota pahi, qa peta en aonpa hehan, wamduškadan wan iyokatapi kin
etanhan hiyu, qa Palos nape kin en ikoyag iciya.
4 Unkan nape
kin en taku ocinšice cin de ikoyake cin he Ikcewicašta kin wanyakapi qehan,
iyakitedan hekiciyapi; Awicakehan wicašta kin de tin wicakte kin heca,
miniwanca kin etanhan ni hiyu ešta, taku owotanna kin he ni kta e iyowinkiye šni
ce.
5 Tuka wamduškadan
qon nape kin etanhan peta kin en hdatata ehpeye ca tuktedan kiunniye šni.
6 Tuka kapokta,
kaeš ihnuhanna ta iyaye kta kecinpi. Qa tehan ekta etonwan yukanpi qa tuktedan
kiunniye šni un kin wanyakapi, hehan tawacin kin tokeca hinhdapi qa, De taku wakan
kin hee ce, eyapi.
7 Unkan hen
ikiyedan, wita kin ohna wicašta tokapa, Publius eciyapi kin he makoce onšpa
yuha; unkan he tin hiyu unšipi, qa anpetu yamni hehanyan tanyan wo unqupi.
8 Unkan Publius
atkuku kin wayazanka, tancan kate ca we ece iheya. Palos he en i, qa cekiye ca,
nape on aputake ca asniyan.
9 Hecen econ,
unkan hehan wita kin en tona wowayazan yuhapi kin hena en hipi, qa asni
wicayapi.
10 Heon etanhan
nina unkinihanpi, qa hetanhan unyanpi kte cin, hehan taku uncinpi kin owasin
unqupi.
11 Unkan wi
yamni, hehan wita wata wan Alexandrea etanhan, he wita kin hen waniyetu wanke
cin, he wiyokiyedan yuke cin, Castor qa Pollux cekpapi tawa kin hee, unkan he
en unkopapi.
12 Qa Syrakuse
ekta unkihunnipi, qa anpetu yamni unyakonpi.
13 Unkan hetanhan ohomni
unyanpi, qa
Regium ekta unhipi. Qa anpetu wanjidan iyohakam, tate itokaga tanhan uya, qa anpetu
inonpa hehan Puteoli en unkipi.
14 Hen
hunkawanjin kiciyapi kin wanjikji
iyewicunyanpi, qa anpetu šakowin om unyakonpi kta e cinpi. Hehan Roma ektakiya
unyanpi.
15 Unkan
heciyatanhan hunkawanjin kiciyapi kin unkiyepi eciyatanhan nahonpi, qa
itkounkipapi au, Appii Forum qa Owote Tipi Yamni Kin hehanyan. Hena Palos
wanwicayaka, unkan Wakantanka wopida eciye ca wakišag iciya.
16 Unkan Roma
ekta unkipi, hehan akicita tancan qon wicakaške cin hena wicaštayatapi taakicita
tancan kin qu, tuka Palos akicita wanjidan awanyag un kin he kicišnana yanke
kta e iyowinkiyapi.
17 Unkan anpetu
yamni iyohakam, Palos Juda wicašta tokapapi kin wicakico. Qa en mniciyapi hehan
hewicakiya, Wicašta hunkawanjinciyapi, atewicunyanpi oyate qa wicohan kin en
taku šica takudan ecamon šni ešta, Jerusalem ekta makaškapi ecen Roma oyate
napepi kin en iyemayanpi.
18 Hena iš
wimawangapi qehan makiyuškapi kta, miye en taku on mate kte cin takudan iyeyapi šni.
19 Tuka Juda wicašta
kin nina tehindapi kin heon, Cæsar caje mdate kta iyececa wadaka, mitaoyate kin
taku iyawicawaonpe kte cin takudan mduhe šni tuka qon,
20 Heon etanhan
nakaka cicopi, wanciyakapi qa wociciyakapi kta, Israel oyate awacinpi kin he on
maza icicahiha kin de on makaškapi ce, eya.
21 Hehan iš eya
heciyapi, Juda makoce kin etanhan niye on wowapi unkahipi šni, qa hunkawanjin
kiciyapi heciyatanhan hipi kin tuwedan taku šica iyanionpe ca oyake šni.
22 Tuka niš
token nitawacin kin naunnihonpi kta uncinpi, yuomdecapi kin de owancaya yašicapi
e sdonunyanpi ce.
23 Unkan anpetu
wan cajeyatapi kin he en wicota Palos yanke cin en hipi; unkan iš Wakantanka
tokiconze kin yaotanin, qa onspewicakiye ca, Moses toope kin wicašta wokcan ko,
etanhan Jesus on wahokonwicakiya, anpao kin etanhan otpaze cin hehanyan.
24 Unkan hunh
taku oyakapi kin wicadapi, qa hunh iš wicadapi šni.
25 Unkan
okonwanjidan awakicinpi šni kin, hehan kihdapi, Palos wicoie wanjidan oyake cin
iyohakam; Woniya Wakan kin Isaya wicašta wokcan kin en, hunkake wicunyanpi kin
tanyan wowicakiyaka;
26 Qa heya,
Oyate kin de ekta wicai, qa heya wo; Wanahonpi kin on nayahonpi kta tuka oyakahnigapi
kte šni, qa wawanyakapi kin on wandakapi kta tuka widukcanpi kte šni :
27 Oyate kin de
cantepi kin cepa aye ca nogepi kin on kitan se wanahonpi, qa ištapi kin ohmus
icupi; išta kin on wawanyakapi kte šni, qa noge kin on wanahonpi kte šni, qa
cante kin on okahnigapi kte šni, qa ihduecetupi kte šni, qa miš okizi wicawaye kte
šni heon etanhan.
28 Hecen on he
sdonya po, Wakantanka wiconi tawa kin Ikcewicašta kin wicaqupi, unkan hena iš
nahonpi kta ce.
26 Hena hecen
eya, unkan Juda wicašta kin kihdapi, qa nina hdokinicapi.
30 Unkan Palos
waniyetu nom tipi iyunwin ton odote cin he ohna yanke ca, tona en hipi kin
owasin tin u wicaši.
31 Wakantanka
tokiconze kin yaotanin, qa Jesus Messiya Itancan taku tawa kin waditagya oyaka
ece, tuwedan tehinda šni.
No comments:
Post a Comment