Johannes 19-21, Crucifixion, Resurrection

JOHANNES WICOWOYAKE 19.

1 Unkan hehan Pilate Jesus icu qa kapsinpsinta.

2 Unkan akicita wapepeka wapaha wan kaontapi qa wapaha kiyapi, qa šina to wan in kiyapi.

3 Qa, iho, Juda Wicaštayatapi kin, eciyapi, qa nape on apapi.

4 Pilate ake tankan inanpe ca, Iho, wicašta kin dee e tankan cicaupi, hecen on taku šica takudan en iyewaye šni e sdonyayapi kta, ewicakiya.

5 Hehan Jesus wapepeka wapaha kin un, qa šina to kin in, tankata inanpa. Unkan, Wanyaka po, wicašta kin dee ce, ewicakiya.

6 Unkan wošnapi kagapi tankapi qa akicita tancanpi kin, he wanyag iheyapi hehan, panyehan heyapi, Icipaweh okatan wo, icipaweh okatan wo. Nišnana icupi qa icipaweh okatan po, miye qe taku šica econ takudan iyewaye šni, Pilate ewicakiya.

7 Wowakiconze wan unhapi, wowakiconze unhapi kin eciyatanhan te kta iyececa, Wakantanka Cinhintku keiciye cin heon etanhan, Juda oyate kin eya ayuptapi.

8 Unkan Pilate iapi kin he nahon qehan, iyotan inihan;

9 Qa woyaco tipi kin timahen kihde ca, Nitokiya tanhan he? Jesus eciya. Tuka Jesus ayupte šni.

10 Hehan Pilate heciya; Amayadupte šni he? Iciyaweh onicatanpi owakihi ; qa niciyuškapi nakun owakihi, he sdonyaye šni he?

11 Hehan Jesus ayupte; Wankan tanhan taku kin de nicupi šni unkanš takudan on omayakihi kte šni tuka; heon tuwe niye en amahi kin he iye woahtani tanka.

12 Hetanhan Pilate kiyuškapi akita. Tuka, Wicašta kin de yakiduške cinhan Cæsar takuyaye šni; tuwe wicaštayatapi icicage cinlian Cæsar i en hiycya ece, Juda oyate kin panyehan eyapi.

13 Pilate iapi kin he nahon, unkan Jesus tankan yuha inanpa, qa oiyotanke tawa kin he ohna kiyotanka, inyan mdaya omanipi kin in, he Hebrew iapi kin etanhan Gabbatha eciyapi.

14 Woacakšin itokam anpetu piiciyapi ece kin hetu, qa wiyotanhe cin hehantu; Wicaštayatapi nitawapi kin wanyaka po, Pilate Juda oyate kin ewicakiya.

15 Tuka, Icunonpa, icunonpa iyeye ca icipaweh okatan wo, panyehan eyapi. Wicaštayatapi nitawapi kin de icipaweh owakatan kta he? Pilate ewicakiya. Unkan wošnapi kagapi tankapi kin ayuptapi; Cæsar ecedan wicaštayatapi unhapi ce.

16 Hehan icipaweh okatanpi kta e wicaqu. Unkan Jesus icupi qa tokan ayapi.

17 Unkan Jesus can susbeca kicin, qa makoce wan Wicapahu eciyapi, he Hebrew iapi on Golgotha eciyapi, he ekta aya.

18 Hen icipaweh okatanpi, qa wicašta toktokeca nom itan anokatanhan ewicahdepi, qa Jesus okitahedan.

19 Unkan Pilate wowapi wan kage ca, can susbeca inkpa kin en ehnaka; JESUS NAZARETH ETANHAN, JUDA OYATE WTCAŠTAYATAPI KIN.

20 Wowapi kin de Juda wicašta ota yawapi; makoce kin Jesus en icipaweh okatanpi kin he otonwe kin ikiyedan. qa he Hebrew, qa Helenes, qa Roma iapi henakiya wicoie kin on owapi.

21 Hehan Juda oyate etanhan wošnapi kagapi tankapi kin Pilate heciyapi; Juda oyate Wicaštayatapi kin, eya owa šni wo: tuka. Juda oyate Wicaštayatapi kin he miye ce, eiciye cin, hee e ecen owa wo.

22 Tuka Pilate waayupte; Taku owawa kin he wanna owawa ce, eya.

23 Akicita Jesus icipaweh okatanpi, hehan tawokoyake icupi, qa wopamni tom kagapi, akicita otoiyohi kicipamnipi; qa nakun tašina icupi: šina kin he okagege wanica, wankan tanhan kun ihankeya kin hehanyan okagege codan kagapi:

24 Heon etanhan iye iyakitedan hekiciyapi; Šina kin he unyuhdecapi kte šni, econkupidan qa yeunkiyapi kta, hecen tuwe ohiye cinhan yuhe kta. Hecen wowapi en kagapi qon he iyecetu; Mitawokoyake kicipamnipi, qa mitašina kin he oeconna en yekiyapi ce. Unkan akicita kin hena hecen econpi.

25 Unkan Jesus hunku, qa tankaku kicica, Mary Kleopas tawicu, qa Mary Magdalene, hena can susbeca kin icahda najinpi.

26 Jesus hunku wanhdaka, qa en icunonpa ikiyadan waonspewicakiye cin wanji iyotan kidake ciqon wanhdaka, unkan, Winohinca, nicinkši kin hee ce! hunku kin eciya.

27 Qa waonspekiyapi kin he iš, Wanyaka wo, nihun kin hee ce! eciya. Unkan waonspekiyapi kin he anpetu kin hetanhan iye ti kin ekta aki.

28 Wanna taku kin owasin ecetu Jesus wanyaka, qa wowapi en kagapi qon iyecetu kta e heon, Imapuza ce, eya.

29 Unkan mini škumna wakšica ojudan en icunhan han; mini škumna icupi, qa nakun mini iyuhepe wan en oputkanpi qa peji hota hu wan icam yeyapi, qa i kin en qupi.

30 Unkan Jesus mini škumna icu qehan, Wanna yuštanpi ce, eya; hehan pa makata iyeye ca taniya kin hiyuya.

31 Hehan Juda oyate kin Pilate cekiyapi, hu kawegapi qa etanhan icupi kta; hecen anpetu wakan icunhan, tancan kin can susbeca kin akan un kte šni, anpetu en piiciyapi kin wanna hehantu, qa anpetu wakan kin he anpetu tanka, heon.

32 Unkan akicita en hipi, qa tokaheya kin hu kawegapi, qa nakun unma kici icipaweh okatanki qon.

33 Hehan Jesus ehan ipi, unkan wanna ta wanyakapi, heon hu kin kawegapi šni.

34 Tuka akicita wanji wahukeza wan on cuwi kin en capa; unkan we mini ko au.

35 Tuwe wanyake ca yaotanin kin he wayaotanin kin he wowicake. Wowicake eye cin he sdonkiya, qa hecen on wicayadapi kta.

36 Hena hecetu, unkan wicowoyake wowapi en kagapi qon iyecetu; Hu kin wanjidan kawegapi kte šni ce.

37 Qa nakun wowapi icinonpa

hecen eya; Tuwe pahdokapi kin he wanyakapi kta.

38 Hehan ihakam Joseph Arimathea etanhan Pilate cekiya, Jesus tancan kin icu kta e heon; unkan iš eya Jesus waonspewicakije cin wanji ee, tuka anahbeya, Juda oyate kowicakipe cin heon; unkan Pilate ayupta. He en u, qa Jesus tancan kin hdokiyahda.

39 Unkan Nicodemus, tuwe tokaheya hanyen Jesus en hi qon hee, nakun en hi, qa pejihuta waštemna nom icicahiyapi, tkeutapi opawinge ecetu, yuha hi.

40 Hehan Jesus tancan kin icupi, qa minihuha ska iyapemnipi, pejihuta waštemna iyahna, Juda oyate wicašta hnakapi ece kin he iyececa.

41 Unkan icipaweh okatanpi qon he en ikiyadan wojupi wan han, wojupi he cin he en ohna wicašta hnakapi wan iyuštan yanka, tuwedan he ohna oonpapi šni.

42 Juda oyate piiciyapi anpetu kin he icunhan, ohna wicašia hnakapi en ikiyadan yanke cin heon Jesus tancan kin en ohnakapi.

JOHANNES WICOWOYAKE 20.

1 Anpetu wakan kin en, anpetu tokaheya hanhanna hinca, nahanhin otpaza, hehan Mary Magdalene hnakapi qon ekta i, qa inyan kin hnakapi etanhan icunonpa iyeyapi e wanyaka.

2 Hehan inyang hde ca Simon Inyan hee, qa waonspewicakiye cin unma Jesus waštekidake ciqon, hena en hi qa hewicakiya; Itancan kin hnakapi kin etanhan eyakupi, qa tukten hnakapi kin sdonunyanpi šni ye.

3 Unkan Inyan waonspewicakiye cin unma qon kici tankan inanpapi, qa en hnakapi qon ekta yapi.

4 Napin inyang yapi; qa waonspewicakiye cin unma qon hee duzahe ca Inyan kapa, qa iye tokaheya ehan i;

5 Patuš inajin, qa hnakapi kin aokasin, minihuha ecedan wanyaka, tuka mahen iyaye šni.

6 Hehan iš Simon Inyan iyohi, unkan katinyan mahen iyaya, minihuha ecedan makata yanka wanyaka.

7 Minihuha pa akan ehnakapi kin he, minihuha umanpi qon en ope šni, he iš aiyog pehan yanka.

8 Hehan waonspewicakiye cin unma tokaheya hi qon he iš hnakapi kin mahen iyaya, qa iš eya wanyake ca wicada.

9 He wiconte etanhan ekicetu kta, eyapi, wowapi en kagapi qon he hinyahin tanyan sdonyapi šni.

10 Hehan waonspewicakiye cin hena iye tipi ekta icicawin hdapi.

11 Tuka hnakapi kin itankan Mary e ecen najin, qa ceya. Unkan ceyaya patuš inajin, qa hnakapi kin en aokasin.

12 Qa mahpiya ohnihde nom wokoyake ska ece koyakapi kin hena wanwicayaka, Jesus tancan wanke ciqon itan anokatanhan, unma pa wanke ciqon eciyatanhan, qa unma iš siha qon eciyatanhan yukanpi.

13 Unkan, Winohinca, taku on yaceya he? eciyapi. Unkan iš, Itancan mitawa tancan kin icupi, qa toki ehnakapi kin sdonwaye šni ce, ewicakiya.

14 Heye ca hehan ihdamna unkan Jesus en najin wanyaka, tuka Jesus hee kin sdonye šni.

15 Unkan Jesus heciya, Winohinca taku on yaceya he? tuwe ayakita he? Unkan iš he wakicanye hee kecin, qa heon, Itancan, he niye iyacu hecinhan tokiya eyahnake cin omakiyaka ye, kinhan ewehdaku kta ce, eciya.

16 Unkan Jesus heciya, Mary. Unkan iye ihdamna, qa, Rabboni, eciya; he Waonspekiye eyapi.

17 Unkan Jesus heciya; Ihnuhan omayadutan kin; nahanhin Ate ekta wahde šni ce. Tuka mihunkawanji ekta wicaye ca hewicakiya wo, Ate ekta wahde kta, he ate yayapi kin ee, he Wakantanka mitawa kin ee, qa niš he Wakantanka nitawapi kin ee ce, eya.

18 Hehan Mary Magdalene ku qa, Itancan kin wanhdake ca hena hecen eciye cin, waonspewicakiye cin owicakiyaka.

19 Anpetu kin he anpetu tokaheya kin ee, ihtayetu kin he en waonspewicakiye cin, Juda oyate kowicakipa, qa aonaicitag yukanpi, en Jesus wicacokaya inajin, qa, Wookiye nicipi un kte, ewicakiya.

20 Hecen eye ca hehan nape cuwi ko wicakipazo. Waonspewicakiye cin Itancan kin wanyakapi, unkan wiyuškinpi tunka.

21 Wookiye nicipi un nun we, ake Jesus ewicakiya. Ate u maši kin he iyecen miš ye cišipi.

22 Hecen eye ca hehan awicaniya qa, Woniya Wakan icu po, ewicakiya.

23 Tona woahtani wicayecicajujupi kinhan, hena wicakicicajujupi kta; qa tona wicayakipaganpi šni kinhan, hena wicakipaganpi kte šni.

24 Ake nonpapi kin etanhan Thomas Didymus eciyapi he Jesus hi kin he icunhan en ope šni.

25 Itancan kin wanunyakapi, waonspewicakiye cin unmapi kin eciyapi. Tuka iye kin hewicakiya; Maza on nape en okatanpi qon he wanmdake šni, qa napsukaza maza okatanpi kin en omdutan šni, qa cuwi nakun en nape yewaye šni kinhan, wicawada kte šni ce, eya.

26 Unkan anpetu šahdogan iyohakam, hehan ake waonspewicakiye cin mahen yukanpi, qa Thomas owicapeya un. Hehan Jesus en hi, tiyopa onatag han, qa wicacokaya inajin, qa, Wookiye nicipi un nunwe, ewicakiya.

27 Hehan Thomas heciya; Ninapsukaza uye ca minape kin wanyaka wo; qa ninape kin uye qa micuwi kin en oputkan wo, qa wacetunhda šni wicada wo.

28 Unkan Thomas ayupte ca heciya; Itancan mitawa, qa Wakantanka mitawa.

29 Jesus heciya; Thomas, wanmayadake cin heon wicayada; tuka tona wanmayakapi šni ešta wicadapi kinhan, hena wicayawaštepi ce.

30 Unkan waonspewicakiye cin wanyakapi en taku tokeca ota wapetokeca Jesus econ, tuka hena eqe wowapi kin de en kagapi šni.

31 Tuka dena e owapi, heon Jesus he Messiya Wakantanka Cinhintku kin hee e wicayadapi kta; qa wicayadapi kin on, iye caje kin eciyatanhan, wiconi duhapi kta.

 

JOHANNES WICOWOYAKE 21.

1 Hena iyohakam Jesus ake waonspewicakiye cin en ihdutanin, Tiberias mde kin etu; unkan ihdutanin kin he kaketu:

2 Simon Inyan, qa Thomas Didymus eciyapi, qa Nathanael, Kana Galilee makoce kin hetanhan, qa Zebedee cinhintku napin, qa waonspewicakiye cin tokeca nonpa, hena witayapi etu.

3 Ho wakuwa kta ce, Simon Inyan ewicakiya. Niyahna unyanpi kta ce, eciyapi. Hecehna yapi, qa wata wan en opapi, tuka hanyetu kin he

takudan ktepi sin.

4 Ihanhanna qehan wicihuta ekta Jesus najin; tuka waonspewicakiye cin Jesus hee kin sdonyapi šni.

5 Unkan Jesus hewicakiya, Hokšiyopa, taku yutapi duhapi he? Unkan, Hiya, eyapi.

6 Unkan hewicakiya; Ho kin he wata etapa kin eciyatanhan ehpeya po, etanhan iyeyayapi kta ce. Unkan ecen iyohpeyapi, tuka ehaeš hogan kin ota kin heon ehdakupi okitpanipi.

7 Hehan waonspekiyapi wan Jesus waštedake ciqon he Inyan heciya; Itancan kin hee ce. Simon Inyan, Itancan kin hee, cya nahon qehan, tancodan un kin heon onhdohda kicun qa minin ehpeiciya.

8 Unkan waonspewicakiye cin unmapi kin wata cistinna wan ohna upi, huta kin icannan yakonpi, wicišpa opawinge nom hehanyan, qa ho kin hogan ojudan akupi.

9 Wanna hutata kihunnipi, hehan petaga itkon wanyakapi, qa hogan aguyapi ko akan yanka.

10 Unkan Jesus hewicakiya, Hogan nakaha iyacupi kin etanhan aku po.

11 Simon Inyan ekta ye ca ho kin heyata hiyuya, hogan tankinyanyan ece opawinge qa sanpa wikcemna zaptan qa sam yamni; hogan kin ota ho kin ohnaka tuka iyuhdece šni.

12 Upi qa de yuta po, Jesus ewicakiya. Unkan waonspewicakiye cin etanhan, Tuwe niye he? eyapi kta tuka tuwedan tawatenye šni; Itancan hee kin he sdonyapi kin he etanhan.

13 Hehan Jesus en ye ca aguyapi icu, qa wicaqu, hogan nakun iyecen econ.

14 Piya ekicetu kin etanhan, de iyamni Jesus waonspewicakiye cin en ihdutanin.

15 Unkan wotapi ayaštanpi, hehan Jesus Simon Inyan heciya; Simon Jona cinhintku, dena eqe sam iyeya waštemayadaka he? Han, Itancan, waštecidaka e sdonyakiye ciqon, eya. Tahincadan mitawa kin taku yutapi wicaqu wo, eciya.

16 Ake icinonpa, Simon Jona cinhintku waštemayadaka he? eciya. Han, Itancan, waštecidaka e sdonyakiya, eya. Tahinca mitawa kin wo wicaqo wo, eciya.

17 Ake iciyamni, Simon Jona cinhintku waštemayadaka he? eciya. Yamni akihde, Waštemayadaka he? eya iwange cin heon Inyan iyokišica; unkan heciya, Itancan, taku owasin sdonyaya; waštecidake cin he sdonyaya. Hehan Jesus, Tahinca mitawa kin wo wicaqu wo, eciya.

18 Wowicake, wowicake on heciciya; Koniška qehan niye cinka ipiyag yeton qa tokiya yacin eca ekta da ece, tuka tohan winicahinca kinhan wicašta tokeca wan ekta nape yeyakiye kta, kinhan ipiyag nicaton qa tokiya yacin šni ešta ekta aniye kta ce, eya.

19 Wiconte tukte e on Wakantanka yutan kta e he kiciyaotanin kta heon hecen eya. Hecen eye cin hehan, Miyahna u wo, eciya.

20 Hehan Inyan hakikta, qa waonspekiyapi wan Jesus iyotan kidake ciqon hee wicihektam u e wanyaka, htayetu wotapi icunhan maku kin ipahin wanke ca, Itancan, tuwe e wiyopeniye kta he? eye ciqon hee.

21 Inyan he wanyaka unkan Jesus heciya, Itancan, de iš taku e akipe kta he?

22 Ake tohan wahi kte cin hehanyan decen un kta wacin ešta, he etanhan initokeca he? niye miyahna u wo, Jesus eciya.

23 Heon etanhan wicoie kin de hunkawanjinkiciyapi kin wicehna iyaya; waonspekiyapi kin de te kte šni, eyapi kin. Tuka Jesus, He te kte šni ce, eciye šni; tuka, Wahi kte cin hehanyan decen un kta, wacin ešta, he etanhan initokeca he?

24 Taku kin hena waonspekiyapi kin he yaotanin qa wowapi en kaga; qa taku yaotanin kin he wowicake kin e sdonunyanpi.

25 Nakun taku ota Jesus econ, tuka nakun hena owasin otoiyohi kagapi ešta, oyate hiyeye cin wowapi kagapi kte cin he yuhapi kta epce šni. Amen.