Roma 4-7 (Romans 4-7)

ROMA OYATE WOWAPI WICOWOYAKE 4.

1 Heon, Abraham ate unyanpi kin, wicacehpi eciyatanhan taku iyeye ciqon tukte e he, unkeyapi kta he?

2 Abraham wicohan on ihduowotanna kinhan taku iwinkta kte cin hduba, tuka Wakantanka itokamya šni.

3 Wowapi wakan kin token eya he? Abraham Wakantanka wacinyan, qa woowotanna kiciyawapi qon.

4 Tuwe htani kin he wokajuju kin wowaonšida iyecen kiciyawapi šni, tuka wopetonpi kin he iyececa.

5 Tuka tuwe ohanye šni, qa tuwe tona wahtanipi kin wicayaowotanna kin he wacinye cinhan, wacinyanpi kin he wicoowotanna kiciyawapi ece.

6 Wicašta kin tuwe wicohan codan Wakantanka wicoowotanna kiciyawa kin wowašte yuhe cin he David oyake ciqon iyececa:

7 Tona taku šica econpi qon wicakicicajujupi, qa wahtanipi kin yutokan iyewicakiciciyapi kin hena wicayawaštepi ece.

8 Wicašta kin tuwe Itancan kin woahtani kiciyawa šni kin he yawaštepi ce.

9 Unkan wowašte kin de bakihdayapi kin ecedan en au he; kaeš bakihdayapi šni kin nakun en au he? Wacinyanpi kin he Abraham woowotanna on kiciyawapi ce, unkeyapi qon.

10 Token he on kiciyawapi he? bakihdayapi kin en un kaeš bakihdayapi šni en? Bakihdayapi en un šni, tuka bakihdayapi šni kin en icunhan.

11 Qa nahanhin bakihdayapi šni un kin en icunhan, bakihdayapi kin he wowapetogton, wowacinye woowotanna ipuspe kin hee icu; hecen tona wacinyanpi kin owasin, bawicahdayapi šni ešta, he ateyapi kta, qa nakun hena e wicoowotanna wicakiciyawapi kta.

12 Qa tona bakihdayapi kin heceepidan šni, nakun Abraham ateunyanpi, hinahin bakihdaye šni, he ehan wacinye ciqon, tona he oye kin ohna manipi kinhan, hena iš eya bakihdayapi kin en ateyapi kte cin heon.

13 Maka kin tawaye kte cin, Abraham iye cinca kin om, iwahoyapi qon he woope kin eciyatanhan šni, tuka wacinyanpi on woowotanna kin eciyatanhan.

14 Tona woope kin eciyatanhanpi kin hena tawayapi kte cin eepi hecinhan, wacinyanpi kin ecetušniyapi, qa wahoyapi qon he nakun takudan okihi šni.

15 Woope kin he wocanniye kaga; tukten woope wanica hecinhan hen woahtani nakun wanica.

16 Heon etanhan, he wacinyanpi kin on, wowaonšida  eciyatanhan kte cin heon, qa wahoyapi qon cincapi kin owasin en wicakiciyusutapi kta, tona woope eciyatanhan un kin heceedan šni, tuka tona Abraham, unkiye owasin ateunyanpi kin, wacinye ciqon en opapi kin hena koya.

17 Wowapi qon iyececa; Ikcewicašta oyate ota ateniyanpi kta e ecihde ce; Wakantanka wicate cin ake ni wicaye ca, taku tona un šni kin hena taku un kin iyecen cajeyata ece kin he wacinyan kin heon etanhan.

18 Oyate ota ateyapi kte cin he apepica šni, tuka wacinyan un kin heon ape, taku eyapi qon iyececa; Nicinca iyenaka kta ce.

19 Qa wašagya wacinye cin heon iye tancan kin wanna kan he awakicin šni wanna waniyetu opawinge ikiyedan, qa Sara tamni kin nakun wanna ecece šni tuka.

20 Qa Wakantanka wahoye cin he cetunhda kin on kaktihanhan šni; tuka wacinyanpi on wakišaka un, qa Wakantanka yatan.

21 Qa taku iwahoye cin he ecen econ kta okihi e he nina wicada.

22 Heon etanhan he wicoowotanna kiciyawapi.

23 Qa he hecen kiciyawapi kin he iye išnana on wowapi kin en kagapi šni;

24 Tuka unkiyepi on, he unkiciyawapi kte cin heon etanhan, tuwe Jesus Messiya Itancan unkiyapi kin wiconte etanhan najin kiye ciqon he wacinunyanpi kinhan.

25 Iye waunhtanipi kin on wicaqupi, qa owotanna unyawapi kte cin on ake najinkiyapi qon.

ROMA OYATE WOWAPI WICOWOYAKE 5.

1 Hecen wacinyanpi on owotanna unyawapi kin, heon etanhan Wakantanka ekta wookiye unhapi, Jesus Messiya Itancan unkiyapi kin eciyatanhan.

2 Qa he iye eciyatanhan en unhiyupi, wowaonšida  en ahan naunjinpi kin en, wacinyanpi kin on etanhan, qa Wakantanka towitan kin ape unkiyuškinpi ece.

3 Qa hecedan šni, nakun wokakije on unkiyuškinpi ece; wokakije kin he wacin tankapi kaga e sdonunyanpi;

4 Qa wacin tankapi kin he wiyukcanpi, qa wiyukcanpi kin he woape;

5 Qa woape kin he išten wicaye šni, Woniya Wakan unqupi kin he eciyatanhan, Wakantanka towašte uncantepi kin en unkokicicaštanpi kin he etanhan.

6 Takudan unkokihipi šni kin he icunhan, wanna iyehantu qehan Messiya wahtanipi sa kin on ta.

7 Tuwedan wicašta owotanna kin on te kte šni naceca; tuka okinni wicašta wašte on tuwe te kta tawatenye kta nace.

8 Tuka wahtanipi sa heuncapi; kin he icunhan, Messiya unkiyepi on te cin he en, Wakantanka token canteunkiyapi kin hduotanin.

9 Hecen sam iyeya, nakaha iye we kin on owotanna unyawapi kin, iye eciyatanhan wocanniye kin etanhan eunhdakupi kta.

10 Toka unyakonpi qehan he icunhan, iye Cinhintku te cin eciyatanhan, Wakantanka kici okiciciye unyanpi hecinhan, he sam iyeya kici okiciciya unyakonpi kin, iye ni un kin eciyatanhan ni unyanpi kta.

11 Qa hecedan šni, tuka nakun Wakantanka kin en unkiyuškinpi, Jesus Messiya Itancan unkiyapi kin eciyatanhan, he etanhan nakaha wookiye unhapi.

12 Heon etanhan wicašta wanjidan eciyatanhan woahtani wicoicage kin wicehna hiyu, qa woahtani etanhan wiconte, qa hecen wiconte wicašta owasin akan iwicayaya, owasin wahtanipi nakaeš.

13 (Woope kin itokam woahtani wicašta kin ehna un; tuka tukten woope wanice cinhan hen woahtani wicakiciyawapi šni ece.

14 Hececa ešta, Adam qa Moses iyotahedan wiconte ounyan, Adam tuwe u kte cin oowa kin hee wahtani kin tona iyecen wahtanipi šni kin hena eepi kaeš en ounyan.

15 Tuka woahtani qon he kici wowaonšida  kin akidecece šni. Wicašta wanjidan wahtani qon he on wicota tapi hecinhan, he sam iyeya Wakantanka towaonšida, qa wowaonšida  on ituwicakihanpi kin he wicašta wanjidan, Jesus Messiya kin hee on wicota en wicakiciyuota kta.

16 Qa wicašta wanjidan wahtani qon eciyatanhan, wowaonšida  on ituwicakihanpi kin he iyecece šni. Wanjidan on etanhan wiconte iwicayacopi; tuka wowaonšida  on ituhanpi kin he woahtani ota etanhan wicayaowotanna kta.

17 Wicašta wanjidan wahtani kin on etanhan wanjidan eciyatanhan wiconte ounyan hecinhan, he sam iyeya tona wowaonšida  untkana, qa wicoowotanna wicaqupi kin icupi kin hena, wanjidan, Jesus Messiya kin hee, e eciyatanhan wiconi kin en ounyanpi kta.)

18 Heon etanhan woahtani wanjidan eciyatanhan, wicašta owasin en wiconte iwicayacopi kin aupi; he iyecen woowotanna wanjidan on etanhan wiconi iwicayaowotanna kin he wicašta owasin en aupi.

19 Wicašta wanjidan waanagoptan šni un qon he etanhan wicota wahtani sa wicakagapi kin, he iyecen wanji waanagoptan un kin eciyatanhan wicota owotanna wicakagapi kta.

20 Woahtani ihduota kte cin heon woope kin hi, tuka tukten woahtani yuota ikicage ciqon hen wowaonšida  nina sam iyeya ihduota.

21 Hecen wiconte en woahtani ounye ciqon he iyecen wiconi owihanke wanica en wowaonšida ounye kta, Jesus Messiya Itancan unkiyapi kin eciyatanhan.

ROMA OYATE WOWAPI WICOWOYAKE 6.

1 Hecen taku unkeyapi kta he? Wowaonšida yuotapi kte cin heon woahtani en unkitanpi kta he?

2 Hiya hecetu šni. Tona woahtani ekta untapi kin, token he en nakun unnipi kta he?

3 Tona Jesus Messiya en baptem wicaqupi kin hena iye te cin en baptem wicaqupi kin he sdonyayapi šni he?

4 Heon etanhan baptem eciyatanhan he kici unhnakapi, wiconte kin en, hecen iye Atkuku towitan kin Messiya wicate cin etanhan ekicetu ye ciqon he iyecen unkiš eya wiconi teca kin en maunnipi kta.

5 Qa iye te cin iyacinpi kin en kici huunhdepi hecinhan, nakun he piya ikicage cin en iyecen unyakonpi kta.

6 Qa wicašta tanina unhapi kin he iye kici icipaweh okatanpi kin he sdonunkiyapi, hecen woahtani tancan kin he ihangyapi kta, qa hetanhan woahtani wowidag unyanpi kte šni.

7 Tuwe te cinhan, he wanna woahtani etanhan kiyuškapi.

8 Hecen Messiya kici untapi hecinhan, kici unnipi kta e wacinunyanpi.

9 Qa Messiya wicate cin etanhan ekicetuyapi qon he ake icimana te kte šni e sdonunyanpi; tokata wiconte tohinni yuha okihi kte šni.

10 He te ciqon wancadan woahtani on ta; qa he kini kin Wakantanka on ni un.

11 He iyecen niš eya woahtani on te nihdawapi, tuka Wakantanka ekta ni yaunpi, Jesus Messiya Itancan unkiyapi kin eciyatanhan.

12 Heon nitancan te kte cin en woahtani ounye šni nunwe, hecen wocantiheye šice cin anayagoptanpi kte šni.

13 Qa nihuhapi kin hena wicohan šica en woahtani wowinyunye kta e qupi šni po, tuka wicate cin etanhan ni un kin iyecen Wakantanka icicu po, qa nihuhapi kin wicoowotanna en Wakantanka wowinyunye kiya po.

14 Woahtani icimana inidakapi kte šni. Woope kin ihukuya yaunpi šni tuka wowaonšida  kin ihukuya.

15 Hecen tokeca kta; woope kin ihukuya unyakonpi šni, tuka wowaonšida ihukuya unyakonpi kin heon etanhan waunhtanipi kta he? Hiya hecetu šni.

16 Tuwe anayagoptanpi kta inidake niciyapi kin he anayagoptanpi kin on wowidake niyanpi kin he sdonyayapi šni he; he woahtani wiconte aiyahdeye cin hee, kaeš waanagoptanpi kin on wicoowotanna kta.

17 Tuka Wakantanka wopida kiciun nunwe, woahtani inidakapi tuka qon; tuka woonspe ecedan en yeniyanpi qon he cante eciyatanhan oyapapi.

18 Qa woahtani etanhan enihdakupi kin, heon wicoowotanna wowidake niyan yaunpi.

19 Wicašta akantu kin iyecen iwaa ce, nicehpipi wašake šni kin heon etanhan. Wicošice en nihuhapi kin ašapapi qa woahtani wowinyunniyanpi kta e iyowinyakiyapi qon, he iyecen nakaha wicayuecedan kin en nihuhapi kin wicoowotanna inidakapi kta e iyowinkiya po.

20 Woahtani wowidake niyanpi qehan, wicoowotanna inidakapi šni.

21 Hehan taku nakaha on iništecapi kin hena en taku waskuyeca duhapi qon he tukte e he? hena e ihanke kin he wiconte ee.

22 Tuka nakaha woahtani etanhan enihdakupi, qa Wakantanka wowidake niyanpi, heon wicayuecedan on waskuyeca duhapi, qa he ihanke kin owihanke wanin wiconi kin hee.

23 Woahtani wokajuju kin he wiconte ee; tuka Wakantanka taku ituwicakihan kin he, Jesus Messiya Itancan unkiyapi kin eciyatanhan, owihanke wanin wiconi kin hee.

ROMA OYATE WOWAPI WICOWOYAKE 7.

1 Mihunkawanji, (tona woope sdonyapi kin hena owicawakiya); woope kin wicašta kin wowidag ya, tohanyan ni un kin hehanyan, he sdonyayapi šni he?

2 Winohinca kin tuwe hihna ton kinhan, hihnaku ni un kin hehanyan, toope kin on kaškapi; tuka hihnaku kin wanna te cinhan helian hihnaku toope kin etanhan kiyuškapi.

3 Hecen hihnaku ni un kin icunhan, wicašta tokeca hihnaye cinhan, wawicihahapi econ eciyapi kta; tuka hihnaku te cinhan hehan woope qon etanhan kiyuškapi qa wicašta tokeca hihnayan ešta he wawicihahapi econ šni.

4 Heon etanhan, mihunkawanji, niš eya Messiya tancan kin eciyatanhan woope kin ekta nitapi kin; hecen tuwe tokeca hihnayayapi kta, tuwe wicate cin etanhan ekicetuyapi qon he hee; hecen Wakantanka on waskuyeca icahunyanpi kta.

5 Wicacehpi kin en unyakonpi qehan, woahtani wocantiheye kin, woope kin eciyatanhan un kin, hena waskuyeca wiconte icahkiciciye kta e heon unhuhapi kin en ohanyan.

6 Tuka nakaha woope kin etanhan unkiyuškapi, taku on unkaškapi qon he ekta untapi kin; hecen oowa tanina kin en wowidag unyanpi kte šni, tuka woniya teca kin en.

7 Hecece cinhan token unkeyapi kta he? Woope kin he woahtani kin ee he? Hiya hecetu šni; woope eciyatanhan šni unkanš, woahtani sdonwakiye kte šni tuka qon. Woope kin, Tokan tawa yacin kte šni ce, eye šni unkanš, wocantiheye šice cin sdonwaye kte šni tuka.

8 Hehan woahtani woahope kin wowinyunye ca, miye mahen wocantiheye šice cin owasin micaga. Woope codan woahtani ta wanka.

9 Ehanna woope codan ni waun; tuka woahope kin he hi qehan, woahtani kini, qa miye mata.

10 Qa woahope kin wiconi kta e on yuštanpi qon he wiconte kin ee imicicaga ce.

11 Woahtani woahope kin wowinyunyan, hecen mahnaye ca, on makte.

12 Hecen woope kin he wakan; qa woahope kin he nakun wakan, owotanna qa wašte.

13 Hecen taku wašte kin he wiconte imicicaga he? Hiya hecetu šni. Tuka woahtani kin he woahtani hee e tanin kta, heon taku wašte on etanhan wiconte icah miciciya; hecen woahope kin eciyatanhan woahtani kin iyotan šice kta.

14 Woope kin he wakan sdonunyanpi; tuka miye qe wicacehpi kin hemaca, qa woahtani ihukuya wiyopemayanpi.

15 Taku ecamon ece kin he iyowinwakiye šni. Taku wacin kin he ecen ecamon šni; tuka taku šice wadake cin he ecen ecamon ece.

16 Taku wacin šni kin he ecen ecamon kinhan, woope kin he wašte e mduotanin.

17 Qa hecen tuwe hecon kin he miye šni, tuka woahtani miye mahen un kin hee.

18 Miye en, micehpi kin he waka, taku wašte en maun šni e sdonwakiya. Iciconzapi kin he iyemicihantu, tuka token taku wašte ecamon kte cin iyewakiye šni.

19 Taku wašte wacin kin he ecen ecamon šni; tuka taku šica wacin šni kin hee ecen ecamon ece.

20 Hecen taku wacin šni kin he ecen ecamon kinhan, tuwe hecon kin he miye šni, tuka woahtani miye mahen un kin he hecon.

21 Hecen woope wanji iyewakiya, taku wašte ecamon wacin eca, taku šica miye en miciun ece.

22 Wicašta mahentu kin eciyatanhan Wakantanka toope kin on imduškin:

23 Tuka mihuha kin en woope tokeca wan wanmdaka, he mitawacin toope kin kici kicize ca, woahtani woope mihuha kin en un kin he en wayaka amahda.

24 Wicašta nina iyokišice cin he miye! tuwe wiconte tancan kin de etanhan emahdaku kta he?

25 Wakantanka wopida ewakiya ece, Jesus Messiya Itanean unkiyapi kin hee on etanhan. Hecen miye mitawacin kin on Wakantanka toope kin wowidag mayan, tuka wicacehpi eciyatanhan woahtani woope kin he imadaka.