Johannes 13-15

JOHANNES WICOWOYAKE 13.

1 Anpetu en Woacakšin ece kin itokam, anpetu qon wanna hiyohi, he en maka kin detanhan iyaye kta, Atkuku ektakiya hde kta, Jesus sdonkiya, tona maka akan tawa kin waštewicadake cin hena owihanketa waštewicakida.

2 Wotapi ayaštanpi hehantu; Judas Iskariot Simon cinhintku kin hee, Jesus wiyopeye kte cin, Wakanšica wanna hecen cante ozekiya.

3 Hehan Jesus Atkuku taku owasin tawa kiye eiqon he sdonkiya un, Wakantanka eciyatanhan hi, qa ake Wakantanka ekta hde kta.

4 Hecen wotapi kin etanhan najin, qa šina ekihnaka; qa napipakinte wan icu, qa ipiwaka.

5 Qa hehan mini wakšica en okaštan, qa waonspewicakiye cin siha wicakiyujaja, qa napipakinte wan ipiyake ciqon heon siha kin wicakipakinta.

 6 Simon Inyan ehan ahi; unkan, Itancan, niye siha mayakidujaja kta he? eciya.

7 Unkan Jesus ayupte ca, Taku ecamon kin de nakaha sdonyaye šni, taka ihakamya sdonyaye kta, eciya.

8 Icimana siha mayakidujaja kte šni, ake Inyan eciya. Hehan Jesus ayupte; Ciciyujaja šni kinhan takudan on miyecica kte šni, eya.

9 Hehan Simon Inyan heciya; Itancan, siha ecedan šni, tuka minape, mapa koya.

10 Unkan Jesus heciya; Tuwe wanna ihdujaja kin he takudan sanpa cin šni, siha ecedan yujajapi kta, eya wanna ocowasin ska; unkan niye niskapi, tuka iyuhpapi šni.

11 Tuwe wiyopeye kte cin he sdonya, heon etanhan, owasin niskapi šni ce, eya.

12 Unkan siha wicakiyujaja yuštan kin hehan šina ehduku qa hdowin qa iyotanke ca, Taku tokaciconpi kin de sdonyayapi he? ewicakiya.

13 Waonspekiya qa Itancan, emayakiyapi ece; he tanyan ehapi; he miye nakaeš.

14 Heon etanhan miš miye Waonspekiya qa Itancan mayaduhapi kin, siha ciciyujajapi kinhan, niš eya otoiyohi siha yeciyujajapi kta iyececa.

15 Waonspeciciyapi kin he niš he iyecen ecanonpi kta e hecaciconpi.

16 Ookiye unpi kin he Itancan kin iyakapa šni; qa tuwe u šipi kin he tuwe u ši hecinhan, he iš iye kapa šni, wowicake, wowicake eciyatanhan eciciyapi.

17 Taku kin dena sdonyayapi hecinhan, ecen ecanonpi kinhan wašteya yaunpi kta.

18 Taku epe cin de niye iyuhpa heciciyapi šni; tona wicawakahnige cin hena sdonwicawakiya; tuka wowapi en kagapi qon yuecetu kta; Tuwe kici aguyapi wata ece kin he miye on siha yuwankan ehdaku ce.

19 Taku kin dena ecetu šni itokam ociciyakapi; hecen tohan iyecetu kinhan, he miye e wicayadapi kta.

20 Tuwe tokiya yewakiye cin tuwe iyowinkiye cinhan, he miye e iyowinmaye; qa tuwe iyowinmaye cinhan, he tuwe u maši kin he iyowinkiya, wowicake, wowicake eciyatanhan eciciyapi.

21 Jesus hena hecen eye ca hehan toksape kin ekta iyahdeiciya, hdaotanin qa heya; De dukanpi kin etanhan wanji wiyopemayayapi kta, wowicake, wowicake on eciciyapi ce.

22 Hehan waonspewicakiye cin opakicihta yukanpi, wanji tukte e on heye cin sdonyapi šni.

23 Unkan Jesus waonspewicakiye cin wanji nina waštekiduke ciqon, he eca maku kin en makan iwanka.

24 Heon Simon Inyan he wikiyuta, qa wanji tukte he on heye cin he iwange ši.

25 Hehan he Jesus maku kin en iwanke ca, Itancan, he tuwe he? eya.

26 Jesus ayupte; Wanji tukte hpanyanpi onšpa waqu kinhan hee kta, eya. Hecen onšpa hpanye ca, Judas Iskariot eciyapi Simon cinhintku he qu.

27 Unkan Judas hpanyanpi kin icu, hehan Satan mahen iyaya. Hecen Jesus heciya; Taku ecanon kte cin kohanna econ wo.

28 Wahna wotapi kin ihdukšan yukanpi kin, taku on heye cin tuwedan okahnigapi šni.

29 Judas mazaska opiye yuhe cin heon, Jesus wošnapi kta on taku cinpi kin he opeton ši; qa iš, wahpanicapi kin taku wicaqu ši, apa kecinpi.

30 Unkan hpanyanpi qon he icu qehan, hecehnana tankan iyaya; wanna hanyetu hehantu.

31 He tankan iyaya, hehan Jesus heya; Wanna Wicašta Cinhintku kin yutanpi, qa nakun iye eciyatanhan Wakantanka iš yutanpi.

32 Qa iye eciyatanhan Wakantanka yutanpi hecinhan, hehan Wakantanka iš iye kin on hdutan kta, nakun kohanna hdutan kta.

33 Hokšiyoqopa ehake ptenyedan ocipapi kta. Amayakitapi kta, qa Juda oyate ewicawakiye ciqon; Tokiya mde cin ekta yaipi kta oyakihipi šni ce; he iyecen nakaha eciciyapi.

34 Woahope teca wan cicupi, oioiyohi wasteyecidapi kta; wastecicidapi kin he iyecen wašteyecidapi kta.

35 Heon waonspeciciyapi yaunpi kin wicašta owasin sdonyapi kta, otoiyohi wašteyecidapi kinhan.

36 Itancan, tokiya de kta he? Simon Inyan eciya. Jesus ayupte; Tokiya mde cin ekta de kta ešta nakaha oyakihi kte šni, tuka ihakamya mihektam yau kta, eya.

37 Unkan Inyan heciya; Itancan, tokeca nakaha cihakam waun kta owakihi šni he? niye on wiconi mduhe cin ehpewaye kta, eya.

38 Jesus ayupte; Miye on wiconi nitawa ehpeyaye kta he? Wowicake, wowicake on heciciya; Anpaohotnnna kin hoton šni itokam yamni akihde sdonmayaye šni, kehe kta ce, eya.

JOHANNES WICOWOYAKE 14.

1 Ihnuhan cantc nišicapi kinhan; Wakantanka wicayadapi, qa miš nakun wicamayadapi.

2 Ate ti kin en ounyanpi kte cin ota yanka; he hecece šni unkanš ociciyakapi kta tuka; ekta wahde ca oyanke kin ciciyuštanpi kta.

3 Ekta mde ca oyanke ciciyuštanpi kinhan, hehan ake wau qa acihdapi kta; hecen miš waun kin he en niš nakun yaunpi kta.

 4 Unkan tokiya mde cin he sdonyayapi, qa canku kin he nakun sdonyayapi.

5 Itancan, tokiya de cin sdonunyanpi šni, tokiya tanhan canku kin he sdonunyanpi kta he? Thomas eciya.

6 Unkan Jesus heciya; Canku, qa wowicake, wiconi ko he miye; tuwedan Ateyapi kin en u šni, miye eciyatanhan ecedan en u ece.

7 Sdonmayayapi unkanš nakun Atewaye ein sdonyayapi kta tuka; qa detanhan sdonyayapi qa wandakapi ce.

8 Itancan, Ateyaye cin wanyag unyan po, hecen iunmnanpi kta, Philip eciya.

9 Hehan Jesus heciya; Philip, wanna wanakajatanhan cicipi waun, tuka nahanhin sdonmayaye šni he? tuwe wanmayake cin he Ateyapi kin wanyaka; hecen tokeca, Ateyapi kinwanyag unyan miye, eha he?

10 Atewaye cin he wecica qa Atewaye cin he micica kin he wicayada šni he? Wicoie eciciyapi kin dena miye cinka eciciyapi šni; Atewaye micica kin he wicohan kin hena iye econ.

11 Atewaye cin he wecica qa Atewaye cin he micica he wicamada po; kaeš wicohan kin hena e on wicamada po.

12 Wowicake, wowicake on heciciyapi; Tuwe wicamada kin he wicohan ecamon kin hena iš iyecen econ kta, nakun eeš sanpa tanka econ kta; Ate ekta  wahde kte cin heon etanhan.

13 Qa micaje kin on taku yadapi kinhan, ecen ecamon kta; Ateyapi kin Cinhintku kin on  yutanpi kta e heon.

14 Taku wanji micaje on yadapi kinhan, ecen ecamon kta.

15 Waštemayadapika hecinhan, mitawoahope kin tanyan yuha po.

16 Hehan Ate cewakiye kta, unkan wicakicanpte wan tokeca nicupi kta, he owihanke wanin nicipi un kta.

17 Wowicake Woniya kin hee, oyate kin he icu okihipi šni, tohinni wanyakapi šni qa sdonyapi šni; tuka niye he sdonyayapi, he nicipi un qa en niunpi kta.

18 Wamdenica ehpeciyapi kte šni; ake cihdiyohipi kta.

19 Wanna ptenyedan kinhan oyate wanmayakapi kte šni, tuka niye wanmayadakapi kta; wani waun, qa niš yani yaunpi kte cin heon.

20 Anpetu kin he en, Atewaye cin he wecica, qa niš miyecicapi, qa miš ocicipapi kin he sdonyayapi kta.

21 Tuwe mitawoahope yuhe ca, hena ope cinhan he waštemadake cin ee; qa tuwe waštemadake cinhan, Atewaye cin he waštedake kta, qa miš nakun waštewadake kta, qa en mihdutanin kta ce.

22 Hehan Judas, Iskariot hee šni, he heciya; He tokeca Itancan, unkišnana sdonniye unyayapi kta he, qa oyate kin sdonniyanpi kte šni?

23 Jesus waayupte ca heciya; Tuwe waštemadake cinhan mioie kin yuhe kta; qa Atewaye cin waštedake kta, qa tukten un kinhan en unhipi kta, qa ti kin en kici unyakonpi kta.

24 Tuwe waštemadake šni kin he mioie kin yuhe šni. Wicoie nayahonpi kin de mitawa šni, Atewaya umaši kin he iye tawa.

25 Ocipapi kin en taku kin hena heciciyapi.

26 Tuka Wicakicanpte, Woniya Wakan kin hee, Atewaye cin micaje on uši kte cin he, taku owasin onspeniciyapi kta, qa taku eciciyapi kin owasin kiksuyeniciyapi kta.

27 Wokiyapi aihpeciyapi; wookiye mitawa cicupi: wicašta akantu kicicupi he iyecen cicupi šni. Ihnuhan cante nišicapi qa kopehda yaunpi kinhan.

28 Wahde ca ake en ciupi kta eciciyapi kin he wanna nayahonpi. Waštemayudapi kinhan iduškinpi kta; Atewaye cin ekta wahde kta epe cin he; Atewaye cin he iye mikapeya tanka.

29 Qa nakaha hena heciciyapi, taku kin itokam; tohan he hiyohi kinhan hehan wicayadapi kta,

30 Detanhan taku ota eciciyapi kte šni; maka akan itancan kin wanna u, tuka miye kin en takudan tawa šni.

31 Tuka Atewaye cin waštewakida; qa Ate taku eniakiye cin owasin ecen ecamon, he oyate kin sdonyapi kta. Najin po, detanhan icunonpa unyanpi kta.

JOHANNES WICOWOYAKE 15

1 Hastanhanka iyuwi wowicake kin he miye, qa Atewaye cin he kicanye cin ee.

2 Adetka tona miye on waskuyeca icahye šni kin hena yupšun; qa adetka tona waskuyeca icahye cin hena pakinta, hecen on waskuyeca ota icahye kta.

3 Eya wanna niskapi, wicoie ociciyakapi kin heon.

4 Mici un po, hecen miš cicipi waun kta. Hastanhanka iyuwi adetka wiyuwi kin en ikoyake šni kinhan waskuyeca icahya okihi šni ece; he iyecen miyeci yaunpi šni ehantanhan, niš eya oyakihipi kte šni.

5 Hastanhanka iyuwi kin he miye, adetka kin he niyepi. Tuwe mici un qa miš kici waun kin he waskuyeca ota icahya; miye kin en icunonpa yaunpi kinhan takudan oyakihipi kte šni.

6 Tuwe mici un šni kinhan adetka iyecen tankan ehpeyapi, hecen šnija aya; unkan hena wicašta pahipi qa petan ehpeyapi, hecen huhnaga ece.

7 Miyeci yaunpi qa mioie kin he nicipi un kinhan, taku tona yacinpi kin hena yadapi kta, unkan ecen ecaniconpi kta.

8 Waskuyeca ota icahyayapi kinhan Atewaye cin nina yutanpi kta; qa heciya tanhan waonspeciciyapi yaunpi kta.

9 Atewaye cin token waštemakida kin he iyecen waštecicidapi; mitowašte kin he kici un po.

10 Mitawoahope kin duhapi kinhan, mitowašte kin he kici yaunpi kta; Ate tawoahope mduhe cin heon towašte kin kici waun kin he iyececa.

11 Taku eciciyapi kin deua on mitowiyuškin kin nicipi un kta e, qa nitowiyuškinpi kin he ecetu nicieiyapi kta.

12 Mitawoahope kin he dee, waštecicidapi kin he iyecen wašteyecidapi kta.

13 Tuwe takuwicaye cin on wiconi ehpekiye cinhan, he wowašte kin tuwedan kapeye šni.

14 Taku econ cišipi kin owasin ecen ecanonpi kinhan takuciyapi yaunpi.

15 Ookiye wicayapi wanna eciciyapi šni; ookiye yapi un kin he Itancan ye cin taku econ keš sdonye šni. Tuka takuciyapi eciciyapi; Atewaye cin tona nahonmaye cin owasin sdonye ciciyapi kin heon.

16 Niye he mayakahnigapi šni, tuka miye e cicahnigapi qa ciyusutapi; hecen tokiya dapi qa waskuyeca icahyayapi kta; qa waskuyeca nitawapi kin ohinniyan un kta; hecen micaje on Atewaye cin taku yakidapi kinhan nicupi kta ce.

17 Otoiyohi wašte kicida po, he iwahokonciciyapi ce.

18 Oyate kin šice nidapi ešta, he itokam miye šice madapike ciqon he sdonyayapi.

19 Oyate kin enitanhanpi unkanš oyate kin taku iye tawapi waštekidapi kta; tuka oyate kin henitanhanpi šni, miye e oyate kin etanhan cicahnigapi kin heon oyate kin šice nidapi.

20 Wicoie wan eciciyapi qon he yeksuyapi; Ookiye yapi un kin he Itancan yuhe cin kakipe ca iyotan tanka šni. Šicaya makuwapi hecinhan, niš oyate kin šicaya nicuwapi kta; qa mioie yuhapi hecinhan, niš nioie kin niciyuhapi kta.

21 Tuka micaje kin on hena owasin ecen ecaniconpi kta; tuwe u maši kin he sdonyapi šni heon etanhan.

22 Wahi šni qa owicawakiye šni kinhan, woahtani nicapi kta tuka; tuka detanhan woahtani woakahpe nicapi.

23 Tuwe šice madake cin he nakun Atewaye cin šice daka.

24 Wicohan tuwedan hecen econ šni iyecen ecawicawecon šni unkanš, woahtani nicapi kta tuka; tuka wanna Atewaye cin kici wanmayakapi, qa napin šice undakapi.

25 Tuka woope tawapi kin en wicoie kagapi qon he wanna iyecetu; Takudan on etanhan šni šice madakapi ce.

26 Tuka Wicakicanpte, Atewaye cin etanhan uwaši kte cin he, Wowicake Woniya kin hee, tohan hi kinhan, he iye Atewaye cin etanhan u kta, qa omayake kte cin hee.

27 Qa niš nakun omayadakapi kta, toka ehantanhan miyahna yaunpi qon heon.